"މަތީ ތައުލީމާއި ތަމްރީނު" ކަމަށް ބުނެފައި އެވަނީ، މިނިސްޓްރީގައި ރަޖިސްޓަރީ ކޮށްފައިވާ މަރުކަޒެއްގައި ދޭ، ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލަކަށް ފެތޭ ތައުލީމާއި ތަމްރީނުގެ ޕްރޮގްރާމްތަކަށާއި، ނޭށަނަލް ކޮމްޕިޓެންސީ ސްޓޭންޑަޑްގައި ބަޔާންކޮށްފައިވާ، އަދި އެ ސްޓޭންޑަޑަށް ތައްޔާރުކޮށް ހިންގާ، މަސައްކަތްތެރިކަމާއި ހުނަރުވެރިކަން ދަސްކޮށްދިނުމުގެ ޕްރޮގްރާމްތަކަށެވެ.

"އެމް.އެން.ކިއު.އެފް" ކަމަށް ބުނެފައި އެވަނީ، ދިވެހިރާއްޖޭގެ ގައުމީ ސަނަދުތަކުގެ އޮނިގަނޑަށެވެ.

"ދިވެހިރާއްޖޭގެ ގައުމީ ސަނަދުތަކުގެ އޮނިގަނޑު" ކަމަށް ބުނެފައި އެވަނީ، މަތީ ތައުލީމާއި ތަމްރީނުގެ ހަރުފަތްތަކާއި، އެ ހަރުފަތްތަކުގެ ފެންވަރާއި، އެއިން ކޮންމެ ހަރުފަތަކަށް ވާސިލުވެވޭނެ ގޮތްތަކާއި، އެއިން ކޮންމެ ހަރުފަތެއްގައި ހާސިލުވާންޖެހޭ މިންވަރާއި، އެއިން ކޮންމެ ހަރުފަތެއް ފުރިހަމަކުރުމުން ލިބޭނޭ ސަނަދުތަކުގެ އޮނިގަނޑަށެވެ.

"ވެލިޑޭށަން" ކަމަށް ބުނެފައި އެވަނީ، ސަނަދުގެ ފެންވަރު ބެލުމަށްފަހު، އެ ސަނަދަކީ ވަކި ފެންވަރެއް ކަމަށް ކަނޑައަޅައި ނިންމާ ނިންމުމަށެވެ. އަދި އެކަމަށް ތައްގަނޑެއް ޖަހާނަމަ ނުވަތަ ރިޕޯޓެއް ދޫކުރާނަމަ އެކަމަށެވެ.

"ސަނަދު ގަބޫލުކުރުން" ކަމަށް ބުނެފައި އެވަނީ، ސަނދުގެ ފެންވަރު ބެލުމަށް މީހަކު ހުށަހަޅާ ސަނަދަކީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑަށް ފެތޭ ސަނަދުގެ ފެންވަރު ބެލުމަށްފަހު ސަނަދު ގަބޫލުކުރުމަށް ނިންމާ ނިންމުމަށެވެ.

"ސަނަދުގެ ފެންވަރު ބެލުން" ކަމަށް ބުނެފައި އެވަނީ، ސަނދުގެ ފެންވަރު ބެލުމަށް މީހަކު ހުށަހަޅާ ސަނަދަކީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑަށް ފެތޭ ސަނަދެއްތޯ ބެލުމަށް ކުރާ މަސައްކަތަށެވެ.

"އެމް.ކިއު.އޭ" ކަމަށް ބުނެފައި އެވަނީ، މޯލްޑިވްސް ކޮލިފިކޭށަންސް އޮތޯރިޓީއަށެވެ.

"ކުށްކުރާ ތާރީހު" ކަމަށް ބުނެފައި އެވަނީ، މައްސަލައަކާ ގުޅިގެން އިދާރީގޮތުން މިނިސްޓްރީން ކުރަންޖެހޭ ތަހުގީގު ކޮށް، އެ ކުށެއް ކުރިކަމަށް ސާބިތުވާ ތާރީހަށެވެ.

"މަތީ ތައުލީމާއި ތަމްރީނުގެ މައުލޫމާތު ފޯރުކޮށްދިނުމަށް ދޭ ހުއްދަ" ކަމަށް ބުނެފައި އެވަނީ، އާންމުކޮށް ހުޅުވައިލައިގެން ދޭ މަތީ ތައުލީމާއި ތަމްރީނުދޭ މަރުކަޒުތަކުގެ މައުލޫމާތާއި، މަރުކަޒުތަކުން ހިންގާ ޕްރޮގުރާމްތަކާއި، އެ ޕްރޮގުރާމްތަކަށް ވަނުމަށް ބޭނުންވާ ށަރު ޠުތަކާއި، މަރުކަޒުތަކުން އެކިއެކި ކަންކަމަށް ނަގާ ފީއާއި، ކިޔެވުމަށް ދޭ ލޯނާއި، ސްކޮލަރށިޕް ސްކީމްތަކާއި، ކިޔެވުމަށް ދޭ އެހެނިހެން އެހީތަކާބެހޭ މައުލޫމާތު ދިނުމަށް ބާއްވާ ހަރަކާތްތައް ރާއްޖޭގައި ބޭއްވުމަށް، ށަރުޠުތަކާއެކު ސޮއިކޮށް ތައްގަނޑު ޖަހައިފައި މިނިސްޓްރީން ދޫކުރާ ލިޔުމަށެވެ.

"މަތީ ތައުލީމާއި ތަމްރީނުގެ މައުލޫމާތު ފޯރުކޮށްދިނުން" ކަމަށް ބުނެފައި އެވަނީ، އާންމުކޮށް ހުޅުވައިލައިގެން ދޭ، މަތީ ތައުލީމާއި ތަމްރީނުދޭ މަރުކަޒުތަކުގެ މައުލޫމާތާއި، މަރުކަޒުތަކުން ހިންގާ ޕްރޮގުރާމްތަކާއި، އެ ޕްރޮގުރާމްތަކަށް ވަނުމަށް ބޭނުންވާ ށަރުޠުތަކާއި، މަރުކަޒުތަކުން އެކިއެކި ކަންކަމަށް ނަގާ ފީއާއި، ކިޔެވުމަށް ދޭ ލޯނާއި، ސްކޮލަރށިޕް ސްކީމްތަކާއި، ކިޔެވުމަށް ދޭ އެހެނިހެން އެހީތަކާބެހޭ މައުލޫމާތު ދިނުމަށް ބާއްވާ ހަރަކާތްތަކަށެވެ.

"މައުލޫމާތު ލިބިގަންނަ ފަރާތް" ކަމަށް ބުނެފައި އެވަނީ، އާންމުކޮށް ހުޅުވައިލައިގެން،މަތީ ތައުލީމާއި ތަމްރީނުގެ މައުލޫމާތު ދިނުމަށް ބާއްވާ ހަރަކާތްތަކުގައި ބައިވެރިވާ ފަރާތްތަކުން ސީދާ މައުލޫމާތު ލިބުނު ފަރާތަށެވެ.

"އިލެކްޓްރޯނިކް މަނީ އިށޫކުރުމުގެ ހިދުމަތް" ކަމަށް ބުނެފައި އެވަނީ، އިލެކްޓްރޯނިކް މަނީ އިށޫކޮށް، ޑިސްޓްރިބިއުޓްކޮށް އަދި ރިޑީމްކުރުމުގެ ހިދުމަތަށެވެ. މީގެ ތެރޭގައި، އިލެކްޓްރޯނިކް މަނީ މެދުވެރިކޮށް ދެވޭ ހުރިހާ ހިދުމަތްތަކާއި، އެ ހިދުމަތް ދިނުމުގެ ހިންގުމާ ގުޅޭ ހުރިހާ ކަންކަން ހިމެނޭނެއެވެ. 

"އެކައުންޓް އިންފޮމޭށަން ފޯރުކޮށްދިނުމުގެ ހިދުމަތް" ކަމަށް ބުނެފައި އެވަނީ، ޕޭމަންޓް ހިދުމަތްދޭ އެހެން ފަރާތެއްގައި ނުވަތަ ޕޭމަންޓް އެކައުންޓް ހިދުމަތްދޭ އެއް ފަރާތަކަށްވުރެ ގިނަ ފަރާތްތަކުގައި، ކަސްޓަމަރުގެ ނަމުގައިވާ އެއް ޕޭމަންޓް އެކައުންޓް ނުވަތަ އެއް އެކައުންޓަށްވުރެ ގިނަ ޕޭމަންޓް އެކައުންޓްގެ މައުލޫމާތު ކޮންސޮލިޑޭޓްކޮށް ފޯރުކޮށްދޭ އޮންލައިން ހިދުމަތަކަށެވެ. 

"ޕޭމަންޓް އިނީށިއޭށަން ހިދުމަތް" ކަމަށް ބުނެފައި އެވަނީ، ޕޭމަންޓް އެކައުންޓް ހިދުމަތްދޭ ފަރާތެއްގައި އޮތް ޕޭމަންޓް އެކައުންޓަކާ ގުޅޭގޮތުން، ކަސްޓަމަރެއް އެދިގެން ޕޭމަންޓް އިންސްޓްރަކްށަނެއް އިނީށިއޭޓްކުރުމަށް ފޯރުކޮށްދޭ އޮންލައިން ހިދުމަތަކަށެވެ.

"އިލެކްޓްރޯނިކް ފަންޑްސް ޓްރާންސްފަރގެ ހިދުމަތް" ކަމަށް ބުނެފައި އެވަނީ، އިލެކްޓްރޯނިކް ފަންޑްސް ޓްރާންސްފަރކޮށްދިނުމުގެ ހިދުމަތަށެވެ.