gaanoon_logo
-
ށަހްސު
"ށަހްސު" ކަމަށް ބުނެފައި އެވަނީ، ދައުލަތުގެ އިދާރާއަކަށް ނުވަތަ ދައުލަތުގެ ވިޔަފާރި ތަނަކަށް ނުވަތަ ދައުލަތުގެ ކޮންޓްރޯލިންގ ހިއްސާ އޮންނަ ވިޔަފާރި ތަނަކަށް ނުވަތަ އެހެން ގާނޫނެއްގައި ށަހްސެއްކަމަށް ބަޔާންކޮށްފައިވާ ކޮންމެތަނެކަށެ
ށަރީއަތުގެ ހަރަދު

"ށަރީއަތުގެ ހަރަދު" ކަމަށް ބުނެފައި އެވަނީ، މަދަނީ ދައުވާއެއް ކާމިޔާބުކުރާ ފަރާތަކަށް، އެ ދައުވާ ކާމިޔާބުނުވި ފަރާތުގެ ކިބައިން ކޯޓުން ނަގައިދ ށަރީއަތުގެ ހަރަދަށެވެ.

ށަރީއަތުގެ ނިޒާމު ނަހަމަގޮތުގައި ބޭނުންކުރުން

"ށަރީއަތުގެ ނިޒާމު ނަހަމަގޮތުގައި ބޭނުންކުރުން" ކަމަށް ބުނެފައި އެވަނީ، މަދަނީ މައްސަލަތައް ބެލުމުގެ އިހްތިސާސް ލިބިގެންވާ ކޯޓެއްގައި އުފުލޭ ދައުވާއެއް ކޯޓަށް ހުށަހެޅުމުގައި ނުވަތަ އެފަދަ ދައުވާއެއް ކޯޓުގައި ހިންގުމުގެ މަރުހަލާގައި މައްސަލައިގެ ހަސްމަކު ނުވަތަ ހަސްމަކު ތަމްސީލުކުރާ ފަރާތަކުން ށަރީއަތުގެ ނިޒާމު ނަހަމަގޮތުގައި ބޭނުންކުރާ ކުރުމަށެވެ.

ށަރީއަތުގެ މަޖިލިސް
"ށަރީއަތުގެ މަޖިލިސް" ކަމަށް ބުނެފައި އެވަނީ، ކަމުގެ އިހްތިސާސް ލިބިގެންވާ ކޯޓެއްގައި ފަނޑިޔާރެއްގެ ކުރިމަތީގައި ބޭއްވޭ ކޮންމެ އަޑުއެހުމަކަށެވެ. އޭގެ ތެރޭގައި، ކުށުގެ ތުހުމަތުގައިވާ މީހާ ހައްޔަރުކުރުމަށްފަހު ފަނޑިޔާރެއްގެ ކުރިމައްޗަށް ފުރަތަމަ ހާޒިރުކޮށް، ބޭއްވޭ އަޑުއެހުމާއި، އިބްތިދާއީ އަޑުއެހުމާއި، ށަރީއަތުގެ ކުރިން ހުށަހަޅާ ހުށަހެޅުންތަކުގެ އަޑުއެހުންތަކާއި، މައްސަލައިގެ ށަރީއަތުގެ އަޑުއެހުންތައް ހިމެނެއެވެ. އަދި، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް އެއް މާލަމަށްވުރެ ގިނަ މާލަން ގުޅުވާލައިގެން ބޭއްވޭ ކޮންމެ އަޑުއެހުމަކީވެސް، ފަނޑިޔާރެއްގެ ކުރިމަތީގައި ބޭއްވޭ ށަރީއަތުގެ މަޖިލީހެކެވެ.
ށަރީއަތުގެ މަޖިލިސް (ޖިނާއީ)
"ށަރީއަތުގެ މަޖިލިސް" ކަމަށް ބުނެފައި އެވަނީ، ޖިނާއީ މައްސަލަތައް ބެލުމުގެ އިހްތިސާސް ލިބިގެންވާ ކޯޓެއްގައި ފަނޑިޔާރެއްގެ ކުރިމަތީގައި ބޭއްވޭ ކޮންމެ އަޑުއެހުމަކަށެވެ. އޭގެ ތެރޭގައި، ކުށުގެ ތުހުމަތުގައިވާ މީހާ ހައްޔަރުކުރުމަށްފަހު ފަނޑިޔާރެއްގެ ކުރިމައްޗަށް ފުރަތަމަ ހާޒިރުކޮށް، ބޭއްވޭ އަޑުއެހުމާއި، އިބްތިދާއީ އަޑުއެހުމާއި، ށަރީއަތުގެ ކުރިން ހުށަހަޅާ ހުށަހެޅުންތަކުގެ އަޑުއެހުންތަކާއި، މައްސަލައިގެ ށަރީއަތުގެ އަޑުއެހުންތަކާއި، ހުކުމްކުރުމަށާއި އަދަބު ކަނޑައެޅުމަށް ބާއްވާ އަޑުއެހުންތައް ހިމެނޭގޮތުންނެވެ. އަދި، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް އެއް މާލަމަށްވުރެ ގިނަ މާލަން ގުޅުވާލައިގެން ބޭއްވޭ ކޮންމެ އަޑުއެހުމަކީވެސް، ފަނޑިޔާރެއްގެ ކުރިމަތީގައި ބޭއްވޭ ށަރީއަތުގެ މަޖިލީހެކެވެ.
ށަރީއަތް ހިންގުން

"ށަރީއަތް ހިންގުން" ކަމަށް ބުނެފައި އެވަނީ، މަދަނީ މައްސަލަތައް ބެލުމުގެ އިހްތިސާސް ލިބިގެންވާ ކޯޓެއްގައި އުފުލޭ ދައުވާތަކުގެ ތެރެއިން ދައުވާލިބޭ ފަރާތުން ދިފާއު ހުށަހެޅުމުގެ ސަބަބުން ށަރީއަތް ހިންގުމަށް ކަނޑައެޅޭ މައްސަލަތަކުގެ ށަރީއަތް ހިންގުމަށެވެ. "ށަރީއަތް ހިންގުން" މި އިބާރާތް ބޭނުންކޮށްފައިވަނީ، "ޓްރަޔަލް" ހިންގުމުގެ މާނައިގައެވެ.

ށަރީއަތް ހިންގުމަކާ ނުލައި މައްސަލަ ނިންމުން

"ށަރީއަތް ހިންގުމަކާ ނުލައި މައްސަލަ ނިންމުން" ކަމަށް ބުނެފައި އެވަނީ، މަދަނީ މައްސަލަތައް ބެލުމުގެ އިހްތިސާސް ލިބިގެންވާ ކޯޓެއްގައި އުފުލޭ ދައުވާ، ދައުވާލިބޭ ފަރާތަށް ދިފާއުކުރެވިދާނެކަމުގެ ފުރުސަތެއް ނެތް ހާލަތުގައި، ނުވަތަ ދައުވާކުރާ ފަރާތުން އެދިފައިވާ ގޮތަށް އެ ދައުވާ ނިމުމުގެ ފުރުސަތެއް ނެތް ހާލަތުގައި، މަދަނީ އިޖުރާއަތުގެ ގާނޫނު (ގާނޫނު ނަންބަރު 2021-32) ގެ ފަނަރަވަނަ ބާބުގައިވާ ގޮތުގެމަތިން އެ ދައުވާގެ ށަރީއަތް ހިންގުމަކާ ނުލައި، ދައުވާއާ ގުޅޭ ގޮތުން ހުށަހެޅިފައިވާ ލިޔެކިޔުމާއި ހެއްކަށް ބިނާކޮށް، އެ ދައުވާގައި ގޮތެއް ކަނޑައަޅައި ހުކުމް ކުރުމަށެވެ.

ށަރުއީ ކޯޓަކަށް ހުށަހަޅައިފައިވާ

"ށަރުއީ ކޯޓަކަށް ހުށަހަޅައިފައިވާ" ކަމަށް ބުނެފައި އެވަނީ، ދިވެހިރާއްޖޭގެ ށަރުއީ ކޯޓަކަށް ގަނެވިއްކުމުގެ މުއާމަލާތް ފުރިހަމަކުރުމަށް ހުށަހަޅާ މައްސަލަތަކަށެވެ

ށަރުއީ މައުޒޫނު
"ށަރުއީ މައުޒޫނު" ކަމަށް ބުނެފައި އެވަނީ ، ކަމާބެހޭ ރަސްމީ ފަރާތަކުން ކާވެނިކުރުމުގެ ހުއްދަ ދީ، އެކަމަސް އައްޔަން ކޮށްފައިވާ ކޮންމެ މީހަކަށެވެ.
ށަރުއީ ލިޔުމެއް
"ށަރުއީ ލިޔުމެއް" ކަމަށް ބުނެފައިއެވަނީ، ށަރުއީ ކޯޓަކުން ނެރޭ ކޯޓަށް ހާޒިރުވުމުގެ އަމުރާއި، ނޯޓިހާއި، އެނޫންވެސް އެފަދަ އަމުރާއި، ހުކުމްތައް ހިމެނޭގޮތުންނެވެ.
ށަރުތުގެ ނޯޓިސް

"ށަރުތުގެ ނޯޓިސް" ކަމަށް ބުނެފައި އެވަނީ، ވަކި ދުވަހެއްގެ ވަކި ވަގުތަކަށް ފުލުހުންގެ ވަކި މަރުކަޒަކަށް ހާޒިރުވުން ށަރުތުކޮށްފައި އެކަން އަންގައިފައި، ތިރީގައިވާ މައުލޫމާތު ހިމެނޭ ގޮތަށް ފުލުހަކު މީހަކަށް ދޫކުރާ ލިޔުމަކަށެވެ.

  1. މީހާގެ ނަމާއި، އެޑްރެހާއި، އުމުރު؛
  2. ހާޒިރުވުމަށް އަންގާ ބޭނުން،
  3. ހާޒިރުވާންޖެހޭ ފުލުހުންގެ މަރުކަޒާއި، ތާރީހާއި، ގަޑި؛
  4. އެ ލިޔުން ދޫކުރާ ފުލުހުންގެ އޮފިސަރުގެ ނަމާއި، ރޭންކާއި، ސަރވިސް ނަންބަރާއި، ސޮއި؛
  5. ލިޔުން ދޫކުރި ތާރީހާއި ގަޑި.
ށަކުވާ (އާސަންދައާއި ގުޅޭ)

"ށަކުވާ" ކަމުގައި ބުނެފައި އެވަނީ، ކްލެއިމްސްއާއި ފައިސާއާ ގުޅިގެން އުފެދޭހިޔާލުތަފާތުވުންތަކާ ގުޅުންހުރި ނިންމުންތަކާ ގުޅޭގޮތުން މި ގަވާއިދުގެ ދަށުން ހުށަހެޅޭ މައްސަލަތަކަށެވެ.

ށައްކެއް ނުކުރެވޭނެ މިންވަރަށް ކުށް ސާބިތުވުން
"ށައްކެއް ނުކުރެވޭނެ މިންވަރަށް ކުށް ސާބިތުވުން" ކަމަށް ބުނެފައި އެވަނީ ހެކީގެ މިންގަނޑުތަކުގެ އެންމެ މަތީ ދަރަޖައިގެ ހެކިބަހުން ސާބިތުވާ ސާބިތުވުމަށެވެ. އަދި އެ މިންގަނޑުން ކޮށްދޭ ކަމަކީ ސާބިތުކުރުމަށް ބޭނުންވާކަމުގެ ތެދުކަމާމެދު އެކަށީގެން ނުވާ ގޮތުގައި އެއްވެސް ށައްކެއް އުފެދޭނެ ފުރުސަތެއް ނުދިނުމެވެ.
ށަފަހީ ހެކި

"ށަފަހީ ހެކި" ކަމަށް ބުނެފައި އެވަނީ، ހުސޫމާތެއް އުފެދިފައިވާ ވަކި ވާގިއާއަކާ ގުޅޭ ގޮތުން ހެކިބަސްދ މީހާ ށަރީއަތުގެ މަޖިލީހަށް ހާޒިރުވެ ހުރެ، އެ މަޖިލީހުގައި އޭނާ އަނގަބަހުން ދހެކިބަހަށެވެ.

ށަފަހީ ހެކި

"ށަފަހީ ހެކި" ކަމަށް ބުނެފައި އެވަނީ، ހުސޫމާތެއް އުފެދިފައިވާ ވަކި ވާގިއާއަކާ ގުޅޭގޮތުން ހެކިބަސް ދޭ މީހާ ށަރީއަތުގެ މަޖިލީހަށް ހާޒިރުވެހުރެ،އެ މަޖިލީހުގައި އޭނާ އަނގަބަހުން ދޭ ހެކިބަހަށެވެ.