gaanoon_logo
-
ޒަކާތު ނަފާ ޕްރޮގްރާމް ހިންގުމާބެހޭ ގޮތުން ވެވޭ ފަހުމުނާމާ

"ޒަކާތު ނަފާ ޕްރޮގްރާމް ހިންގުމާބެހޭ ގޮތުން ވެވޭ ފަހުމުނާމާ" ކަމަށް ބުނެފައި އެވަނީ، ޒަކާތު ނަފާ ޕްރޮގްރާމް ހިންގާނެ ގޮތުގެ އުސޫލު (އުސޫލު ނަންބަރު 2022-40) ގެ 1 ވަނަ މާއްދާގެ (ހ) ގައި ހަވާލާދީފައިވާ ފަހުމުނާމާއަށެވެ.

ޒަކާތު ފަންޑު

"ޒަކާތު ފަންޑު" ކަމަށް ބުނެފައި އެވަނީ، ޒަކާތުގެ ގޮތުގައި ލިބޭ ފައިސާ ބެލެހެއްޓުމަށް މިނިސްޓްރީގައި ގާއިމުކޮށްފައިވާ ފަންޑަށެވެ.

ޒަވާޖީ ހަޔާތެއް ފަށާފައިވުން
"ޒަވާޖީ ހަޔާތެއް ފަށާފައިވުން" ކަމުގައި ބުނެފައި އެވަނީ ކައިވެނި ކޮށްފައިވުމަށެވެ. އަދި ކައިވެންޏެއްކޮށް، އެކައިވެނި ރޫޅިފައިވީ ނަމަވެސް ބެލެވޭނީ ޒަވާޖީ ހަޔާތެއް ފަށާފައިވާ ކަމުގައެވެ.
ޒާތީ ހިދުމަތް ދޭ ތަންތަން
"ޒާތީ ހިދުމަތް ދޭ ތަންތަން" ކަމަށް ބުނެފައިއެވަނީ، ރީތިވުމާއި، ބޯކޮށުމާއި، ނިޔަފަތި ކެނޑުމާއި، އިސްތަށި ބޭލުމާއި، ހަށިގަނޑު ތޮރުފުމާއި، ހަށިގަނޑު ރީތިކުރުމާއި، ކުލަ ޖެއްސުމާއި، އެނޫންވެސް ގޮތްގޮތުން އަގު އަދާކޮށްފައި، މީހުންނަށް ޒާތީގޮތުން ރީތިވުމުގެ ހިދުމަތް ދޭ ތަންތަނަށާއި މަރުކަޒުތަކަށެވެ.
ޒާތީ މައުލޫމާތު
"ޒާތީ މައުލޫމާތު" ކަމަށް ބުނެފައި އެވަނީ، ކުއްޖާގެ ނަމާއި، އެޑްރެހާއި، ސްކޫލާއި، ނުވަތަ ސީދާގޮތުން ނުވަތަ ނުސީދާގޮތުން ނަމަވެސް ކުއްޖާއަކީ ކާކުކަން އެނގޭނެ ފަދަ އެއްވެސް މައުލޫމާތެއް ނުވަތަ އޭނާގެ ތަސްވީރަށެވެ.
ޒާތީ މައުލޫމާތު
"ޒާތީ މައުލޫމާތު" ކަމަށް ބުނެފައި އެ ވަނީ، އާބާދީގެ ސިއްހީ މައުލޫމާތާއި، ސިއްހަތާ ގުޅުންހުރި އިޖުތިމާއީ މައުލޫމާތަށެވެ. މީގެ ތެރޭގައި، ބަލިމީހާގެ ނަމާއި، އުފަން ތާރީހާއި، އުފަންވި ތަނާއި، ޖިންސާއި، ދާއިމީ އެޑްރެހާއި، ދިރިއުޅޭ އެޑްރެސް ފަދަ، ބަލިމީހާއަކީ ކާކުކަން އަންގައިދޭ މައުލޫމާތު ހިމެނެއެވެ.
ޒާތީ މައުލޫމާތު

"ޒާތީ މައުލޫމާތު" ކަމުގައި ބުނެފައި އެވަނ،ީ ދިވެހި ރައްޔިތެއްކަން އަންގައިދޭ ކާޑު ނަންބަރާއި، އުފަންތާރީހާއި، ފޯނު ނަންބަރާއި، ފޮޓޯއަށެވެ.

ޒާތީ މައުލޫމާތު

"ޒާތީ މައުލޫމާތު" ކަމުގައި ބުނެފައި އެވަނ،ީ ދިވެހި ރައްޔިތެއްކަން އަންގައިދޭ ކާޑު ނަންބަރާއި، އުފަންތާރީހާއި، ފޯނު ނަންބަރާއި، ފޮޓޯއަށެވެ.

ޒާތީ މަސްލަހަތު
"ޒާތީ މަސްލަހަތު" ކަމަށް ބުނެފައި އެވަނީ، ސީދާ އެމީހަކާ ގުޅުންހުރި ހަމައެކަނި އެމީހަކަށް މަންފާ ލިބޭ ކަންކަމަށެވެ.
ޒިނޭކުރުން
"ޒިނޭކުރުން" ކަމަށް ބުނެފައި އެވަނީ ފިރިހެނަކު އޭނާގެ އަނބިމީހާ ނުވަތަ އޭނާ ކުރި ރަޖުއީ ވަރިއެއްގެ އިއްދައިގައި އިން އަންހެނާ ފިޔަވައި، އެހެން އަންހެނެއްގެ ފަރުޖަށް އެ ފިރިހެންމީހާގެ ޒަކަރު ނުވަތަ ޒަކަރުގެ ކުޑަމިންވަރެއް ނަމަވެސް ވެއްދުމަށެވެ.
ޒިނޭކުރުން
"ޒިނޭކުރުން" ކަމަށް ބުނެފައި އެވަނީ، ދެމަފިރިން ކަމުގައި ނުވާ ދެމީހުންގެ މެދުގައި، ފިރިހެނަކު އޭނާގެ ކުރިމަތިފަރާތް އަންހެނެއްގެ ކުރިމަތިފަރާތަށް ކިތަންމެ ކުޑަ މިންވަރަކަށް ނަމަވެސް ވެއްދުމަށެވެ.
ޒިންމާ އުފުލުމުގެ މަސްލަހަތު
"ޒިންމާ އުފުލުމުގެ މަސްލަހަތު" ކަމަށް ބުނެފައި އެވަނީ، މީހެއްގެ ފަރާތުން، ނުވަތަ ޖަމްއިއްޔާއެއްގެ ފަރާތުން، ނުވަތަ އިދާރާއެއްގެ ފަރާތުން، އެފަރާތުގެ މަސްލަހަތަށްޓަކައި ވަކި އަމަލުތަކެއް ކުރުމުގެ ގާނޫނީ ވާޖިބެއް އޮތުމަށެވެ.
ޒިންމާދާރު އިސްވެރިޔާ

"ޒިންމާދާރު އިސްވެރިޔާ" ކަމަށް ބުނެފައި އެވަނީ ސަރުކާރުގެ މަސްއޫލު އޮފީސްތަކުގައި، މި ގާނޫނުގައިވާ ކަންކަން ހިންގުމަށްޓަކައި ކަނޑައަޅާފައިވާ ވެރިޔާއަށެވެ.

ޒިންމާދާރު ވެރިއެއް
"ޒިންމާދާރު ވެރިއެއް" ކަމަށް ބުނެފައި އެވަނީ، މާލިއްޔަތުގެ ގާނޫނު (ގާނޫނު ނަންބަރ 3/2006) ގެ 46 ވަނަ މާއްދާގެ ދަށުން، ސަރުކާރުގެ މަސްއޫލު އޮފީސްތަކުގައި، މިގާނޫނުގައިވާ ކަންކަން ހިންގުމަށްޓަކައި ކަނޑައަޅާ ވެރިޔާއަށެވެ.
ޒިންމާދާރު މީހެއް
"ޒިންމާދާރު މީހެއް" ކަމަށް ބުނެފައި އެވަނީ، ކުޑަކުއްޖެއްގެ ބެލެނިވެރިއެއް ނުވަތަ ބަލަދުވެރިއެއް ނުވަތަ އެ ކުއްޖަކާ ޒިންމާވާނެ އެނޫންވެސް ފަރާތަކަށެވެ.