"ށާއިއުކުރުން" ކަމަށް ބުނެފައި އެވަނީ، މި ގާނޫނުގެ ބޭނުމަށްޓަކައި، ޝާއިޢުކުރުމުގެ މާނައިގެ ތެރޭގައި، އޮންލައިން ނޫސްތައް ހިމެނޭގޮތުން، ރަޖިސްޓްރީކޮށްގެން ހިންގާ ނޫސް މަޖައްލާ ތަކުގައި ޢާންމުކުރުމާއި، ވެބްސައިޓްތަކާއި، ސޯޝަލްމީޑިއާއާއި ބްލޮގްތަކާއި އިންޓަނެޓް ހިމެނޭގޮތުން، އަދި އެނޫންވެސް ޚިޔާލާއި މަޢުލޫމާތު ޢާންމުކުރާ ފޯރަމްތަކާއި މަޖައްލާތަކުގައި ޢާންމުކުރުން ހިމެނޭގޮތުންނެވެ.

"ށަހްސު" ކަމަށް ބުނެފައި އެވަނީ، ދައުލަތުގެ އިދާރާއަކަށް ނުވަތަ ދައުލަތުގެ ވިޔަފާރި ތަނަކަށް ނުވަތަ ދައުލަތުގެ ކޮންޓްރޯލިންގ ހިއްސާ އޮންނަ ވިޔަފާރި ތަނަކަށް ނުވަތަ އެހެން ގާނޫނެއްގައި ށަހްސެއްކަމަށް ބަޔާންކޮށްފައިވާ ކޮންމެތަނެކަށެ

"ށަރުއީ މައުޒޫނު" ކަމަށް ބުނެފައި އެވަނީ ، ކަމާބެހޭ ރަސްމީ ފަރާތަކުން ކާވެނިކުރުމުގެ ހުއްދަ ދީ، އެކަމަސް އައްޔަން ކޮށްފައިވާ ކޮންމެ މީހަކަށެވެ.

"ށިޕް ސްޓޯރޒް" ކަމަށް ބުނެފައި އެވަނީ، ބޯޓުގެ އިކުއިޕްމަންޓާއި، އާލާތާއި، ތެލާއި، ފެނާއި، ފަޅުވެރިންނަށް ބޭނުންވާ ކާބޯތަކެއްޗަށެވެ.

"ހަނގުރާމަ މަތީ ހަތިޔާރު" ކަމަށް ބުނެފައިއެވަނީ، ބަޑިބޭސް ނުވަތަ އެފަދަ ނުރައްކާތެރި ކެމިކަލެއް ހިމެނޭފަދަ ހަތިޔާރަށާއި، މީހެއްގެ ހަށިގަނޑަށް ނުވަތަ މުދަލަކަށް ބޮޑު ގެއްލުމެއް ދެނިވި ހަތިޔާރަށެވެ.

"ހެލްތް އިންފޮމޭށަން ސިސްޓަމް" ކަމަށް ބުނެފައި އެވަނީ، ސިއްހީ ހިދުމަތްދޭ ތަނެއްގައިދޭ ހިދުމަތާބެހޭ ނުވަތަ ހިންގުމާބެހޭ ނުވަތަ ތަނާބެހޭ ނުވަތަ ބަލިމީހުންގެ މައުލޫމާތު، ކަރުދާހުގައި ނުވަތަ އިލެކްޓްރޯނިކްކޮށް އެއްކުރެވޭ ނިޒާމަށެވެ. މި ނިޒާމުގައި ސިއްހީ ހިދުމަތްދޭ ތަނަކުން މުޖްތަމައުއާއެކުދޭ ކޮމިއުނިޓީ ހިދުމަތްތަކުގައި ނުވަތަ މޮބައިލް ހިދުމަތްފަދަ ހިދުމަތްތަކުގައި ދެވޭ ނުވަތަ އެއްކުރެވޭ ސިއްހީ މައުލޫމާތުވެސް ހިމެނޭނެއެވެ.

"ހަތިޔާރު" ކަމަށް ބުނެފައި އެވަނީ؛ އެއްވެސް ބާވަތެއްގެ ވަޅިއެއް؛ ކަނޑިއާއި ހަންޖަރު؛ ރޭޒަރު ތިލައާއި ކަޓަރާއި ކަޓަރު ތިލަ؛ ކަތިވަޅިއާއި ކޯރާޑިއާއި ފުރޯއާއި މުޅޯ؛ ތޫނުކޮށްފައި ނުވަތަ ކޮޅު ފޭއްސާފައި ހުންނަ ދަގަނޑާއި ދަނޑިއާއި ލަކުޑިއާއި އަދި އެނޫންވެސް އެފަދަ ތަކެތި؛ ދަގަނޑު ހޮޅިބުރިއާއި މޮހޮރު ޖަހާފައި ހުންނަ ފިލާގަނޑާއި ލަކުޑިބުރިއާއި މުގުރު؛ ޗޭނު ބުރިއާއި، ވައިރާއި، ވައިރު ނަރާއި، ޓައީ ކްލިޕް އަދި އެކިއެކި ގުނަވަންތަކުގައި އެޅުވުމަށް ތައްޔާރުކޮށްފައި ހުންނަ ކަންވާރު ބުރިއާއި ސާޅަނގައާއި މިފަދަ ތަކެތި؛ ގޮވާ ތަކެއްޗާއި އަލިފާން ރޯވާ ފަދަ ތަކެތި؛ ޓޭޒަރ ގަންއާއި ސްޓަން ގަން އަދި އެނޫންވެސް މީހެއްގެ ހަށިގަނޑަށް ށޮކެއް ފޮނުވައިގެން އޭނާއަށް ނުކުޅެދޭ ހާލަތެއް ވަގުތީ ގޮތުން މެދުވެރި ކުރުވާ ކޮންމެ އެއްޗެއް؛ ވަކި ވަގުތެއް ޖެހުމުން ގޮވާގޮތަށް ހަދާފައި ހުންނަ ތަކެއްޗާއި ގޮވާނެ ވަކި ގޮތެއް ރޭވިފައި ހުންނަ ތަކެތި؛ އަޑުގަދަވުމުން ސިއްސައިގެންދާގޮތަށް މޮޑިފައިކޮށްފައި ހުންނަ އެއްގަމު އުޅަނދުފަހަރު؛ ވިހައާއި ވިހަ ގޭސް؛ ނުރައްކާތެރި ބަޔޮލޮޖިކަލް ނުވަތަ ކެމިކަލް މާއްދާތަކާއި ނުރައްކާތެރި އެސިޑްތަކާއި ރޭޑިއޯއެކްޓިވް މާއްދާތައް؛ މިނޫންވެސް މީހަކަށް އަނިޔާއެއް ދެވިދާނެ ނުވަތަ ތަނަކަށް ގެއްލުމެއް ދެވިދާނެ ކޮންމެ އެއްޗެއް.

"ހިއްސާގެ ބާޒާރު" ގެ މާނައަކީ، ސެކިއުރިޓީޒް ވިއްކުމަށާއި، ގަތުމަށާއި، ބަދަލުކުރުމަށް ހުށަހެޅޭ ބާޒާރެއް، ނުވަތަ އިންތިޒާމެވެ.

"ހިއުމަން ރިސޯސަސް މިނިސްޓްރީ" ކަމަށް ބުނެފައިއެވަނީ، ވަޒީފާއަދާކުރާ ފަރާތްތަކާގުޅޭ ސިޔާސަތުތައް ތަންފީޒުކުރުމުގެ ޒިންމާ އެއިރަކު ހަވާލުކޮށްފައިވާ ސަރުކާރުގެ ވުޒާރާއަށެވެ.

"ހުއްދައޮތް ބަނދަރު" ކަމަށް ބުނެފައި އެވަނީ، ރާއްޖޭގެ ކަނޑުގެ ބަނދަރުތަކާއި، ވައިގެ ބަނދަރުތަކުގެ ތެރެއިން، ބައިނަލްއަގްވާމީ ދަތުރުތަކަށް ހުޅުވާލެވިފައިވާ އަދި އިމިގްރޭށަނުގެ ހިދްމަތްތައް ގާއިމުކުރެވިފައިވާ ބަނދަރުތަކަށެވެ

"ހުއްދައަކާއި ނުލައި ގޯތިގެދޮރަށް ވަނުން" ކަމަށް ބުނެފައި އެވަނީ، މީހަކު ނުވަތަ ބަޔަކު ދިރިއުޅޭ ތަނެއްނަމަ އެތަނެއްގެ ވެރިފަރާތް ނުވަތަ ދިރިއުޅޭ ފަރާތް ނުވަތަ އެތަނަކާ ހަވާލުވެހުރި ފަރާތުގެ ހުއްދައަކާ ނުލައި، އެތަނަކަށް ވަނުން އަދި ދައުލަތުގެ އިދާރާއެއް ނުވަތަ އާންމު ފަރާތެއްގެ އިދާރާއެއްގައި އާންމުން ވަދެ ނުކުތުމަށް ކަނޑައެޅިފައިވާ އުސޫލާ ހިލާފަށް ހުއްދާއަކާ ނުލައި އެތަނަކަށް ވަނުމަށެވެ.

"ހޮސްޕިޓަލް" ކަމަށް ބުނެފައިއެވަނީ، ސިއްހީ ހިދުމަތް ދޭ ހޮސްޕިޓަލްތަކާއި، މަރުކަޒުތަކާއި، ޕޯސްޓްތަކާއި، ކްލިނިކްތަކާއި އެފަދަ އެހެން ތަންތަން ހިމެނޭ ގޮތަށެވެ.

"ހުށަހެޅުމައިގެން ކުރިއަށްދިޔުމުގެ ހުއްދަ" ނުވަތަ "ކުރިއަށްދިޔުމުގެ ހުއްދަ" ކަމަށް ބުނެފައިއެވަނީ، ދިވެހިރާއްޖޭގައިވާ ބޭރު ގައުމެއްގެ ކުށްވެރިޔަކު އެ ގައުމަށް އެކްސްޓްރަޑައިޓްކުރުމަށް އެދި އެކްސްޓްރަޑިށަންގެ ގާނޫނު (ގާނޫނު ނަންބަރ 1/2015) ގެ 15 ވަނަ މާއްދާގެ ދަށުން އެ ގައުމަކުން ހުށަހަޅާ ހުށަހެޅުމައިގެން ކުރިއަށްދިޔުމަށް އެކްސްޓްރަޑިށަންގެ ގާނޫނު (ގާނޫނު ނަންބަރ 1/2015) ގެ 16 ވަނަ މާއްދާގެ ދަށުން ޕްރޮސިކިއުޓަރ ޖެނެރަލް ދޭ ހުއްދައަށެވެ.

"ހަނގުރާމައިގެ ހާލަތު" ކަމަށް ބުނެފައިއެވަނީ، ދިވެހިރާއްޖޭގެ ގައުމީ ދިފާއީ ބާރުގައި ސިފައިން އަމަލުކުރާ އަސްކަރީ އުސޫލުތަކުގެ މައްޗަށް ބިނާކޮށް، ނުވަތަ މޯލްޑިވްސް ޕޮލިސް ސަރވިސްގައި ފުލުހުން އަމަލުކުރާ އުސޫލުތަކުގެ މައްޗަށް ބިނާކޮށް، ނުވަތަ ގާނޫނު ތަންފީޒުކުރުމުގެ މަސްއޫލިއްޔަތުހަވާލުކުރެވިގެންވާ އިދާރާއަކުން އަމަލުކުރާ ތަންފީޒީ އުސޫލުތަކުގެ މައްޗަށް ބިނާކޮށް، ނުވަތަ ދައުލަތާއި ރައްޔިތުންގެ ސަލާމަތާއި ރައްކާތެރިކަމަށް މަސައްކަތް ކުރާ އެނޫންވެސް ދިވެހި ދައުލަތުގެ މުއައްސަސާއަކުން އަމަލުކުރާ އުސޫލުތަކުގެ މައްޗަށް ބިނާކޮށް، ދިވެހި ދައުލަތުގެ ދުށްމަނުންނާ ދެކޮޅަށްހަނގުރާމަކުރުމުގެ ގޮތުން، ނުވަތަ އެމީހުންގެ އަމަލުތައް ހުއްޓުވުމުގެ ގޮތުން، ނުވަތަ އެމީހުންގެ ބާރު ކަނޑުވާލުމުގެގޮތުން، ދިވެހިރާއްޖޭގެ ގާނޫނާއި ދިވެހިރާއްޖެ ބައިވެރިވެފައިވާ ބައިނަލްއަގްވާމީ މުއާހަދާތައް ހުއްދަކުރާ ފިޔަވަޅުތައް އެޅުމުގެ ހާލަތަށެވެ.

"ހަނގުރާމަމަތީ މަތިންދާބޯޓު" ކަމަށް ބުނެފައިވަނީ، ސިފައިންގެ މަތިންދާބޯޓުތަކާއި އެބޯޓެއްގައިހުރި ހަތިޔާރުގެ ސަބަބުން ހަނގުރާމަވެރި ގޮތެއްގައި އެބޯޓެއް ބޭނުން ކުރެވިދާނެ ކޮންމެ މަތިންދާބޯޓަކަށެވެ.