"ބަސް" ކަމަށް ބުނެފައި އެވަނީ، އާންމު ދަތުރުފަތުރުގެ ހިދުމަތް ދިނުމަށް ޓަކައި އެއްގަމުގައި ދުއްވާ އުޅަނދު ރަޖިސްޓަރީ ކުރުމުގައި B0, B1 އާއި B2 ކެޓަގަރީގައި ރަޖިސްޓަރީ ކޮށްފައިވާ އެއްގަމުއުޅަނދަށެވެ.

"ބަސްހުއްޓި" ކަމަށް ބުނެފައި އެވަނީ، މީހުން އެރުވުމަށާއި ބޭލުމަށް ބަސް މަޑުކުރުމަށް ކަނޑައަޅައިފައިވާ ތަންތަނަށެވެ.

"ހައްޖަށް ގެންދިއުމުގެ ހިދުމަތް ފޯރުކޮށްދޭ ފަރާތް" ކަމަށް ބުނެފައި އެވަނީ ހއްޖަށް މީހުން ގެންދިއުމުގެ ހުއްދަ ސަރުކާރުގެ ކަމާބެހޭ އިދާރާއިން ދީފައިވާ ގާނޫނީ ށަޙްސުތަކާއި އަދި ދިވެހި ސަރުކާރުން ޙިއްސާވާ ގޮތަށް ހއްޖުގެ އަޅުކަން އަދާކުރުމާ ގުޅުންހުރި މަސައްކަތް ކުރުމަށް އުފައްދާފައިވާ ކުންފުނި ނުވަތަ އެ މަސައްކަތް ކުރުމަށް ސަރުކާރުން ހވާލުކުރާ އިދާރާތަކުގެތެރެއިން ޕެންށަން އޮފީހާއެކު އެއްބަސްވުން ގާއިމުކޮށްފައިވާ ފަރާތްތަކަށެވެ. 

"މޯލްޑިވްސް ރިޓަޔަރމަންޓް ޕެންށަން ސްކީމް" ކަމަށް ބުނެފައި އެވަނީ ދިވެހިރާއްޖޭގެ ޕެންށަނާބެހޭ ގާނޫނުގެ ދަށުން އެކުލަވައިލައި ފައިވާ މޯލްޑިވްސް ރިޓަޔަރމަންޓް ޕެންށަން ސްކީމަށެވެ.

"އިންކޯޓަރމްސް" ކަމަށް ބަޔާންކޮށްފައި އެވަނީ، އެއްތަނުން އަނެއްތަނަށް މުދާ އުފުލުމުގައި ހިދުމަތް ދޭ ފަރާތާއި ހިދުމަތް ލިބިގަންނަ ފަރާތުގެ ޒިންމާތައް ކަނޑައަޅާ "އިންޓަރނޭށަނަލް ޗެމްބަރ އޮފް ކޮމާރސް" އިން ށާއިއުކުރާ އުސޫލުތަކަށެވެ.

"ބަންކަރު ދިނުން" ކަމަށް ބަޔާންކޮށްފައި އެވަނީ، ބޯޓުގެ މެށިނަރީ ހިންގުމަށް ބޭނުންވާ ތެޔޮ ބޯޓަށް ބަރުކުރުމަށެވެ.

"ށިޕު ސްޓޯރު" ކަމަށް ބަޔާންކޮށްފައި އެވަނީ، ބޯޓު ދުއްވުމާއި، މަރާމާތާއި، ހިންގުމަށް ބޭނުންވާ އާލާތާއި ސާމާނު އަދި ފަޅުވެރިންނާއި ފަސިންޖަރުންނަށް ބޭނުންވާ ކާބޯތަކެއްޗާއި، ފެނާއި، ބޭހާއި އަދިވެސް މިފަދަ ތަކެއްޗަށެވެ.

"ސައިންއޮން އަދި ސައިންއޮފް" ކަމަށް ބަޔާންކޮށްފައި އެވަނީ ، ދިވެހިރާއްޖޭގެ އިމިގްރޭށަންގެ ހުއްދައާއެކު ދިވެހިރާއްޖެއިން ބޭރަށް ދަތުރުކުރާ ބޯޓުފަހަރުގެ ދަފުތަރުގައި މީހުން ޖެއްސުމާއި ދަފުތަރުން މީހުން އުނިކުރުމަށެވެ.

"އާގުބޯޓުފަހަރު" ކަމަށް ބަޔާންކޮށްފައި އެވަނީ، މީހުންނާއި މުދާ ނުވަތަ މީހުން ނުވަތަ މުދާ އަރުވައިގެން ރާއްޖެއިން ބޭރަށް ދަތުރުކުރުމަށް މޯލްޑިވްސް ޓްރާންސްޕޯޓް އޮތޯރިޓީގައި ރަޖި ސްޓަރީ ކޮށްފައިވާ އުޅަނދުފަހަރަށާއި، ރާއްޖެއިން ބޭރުން ރާއްޖެއަށް އަންނަ އެންމެހައި އުޅަނދުފަހަރަށެވެ.

"ށިޕް ބްރޯކަރޭޖު" ކަމަށް ބަޔާންކޮށްފައި އެވަނީ، ކަނޑު އުޅަނދު ކުއްޔަށް ދޫކުރުމާއި، ކަނޑުމަގުން އުފުލާ މުދަލާއި މީހުން ފޮނުވުމަށް އުޅަނދުފަހަރުން ޖާގަ ހޯދައިދިނުމާއި، ބޯޓުފަހަރު ގަނެ ވިއްކުމުގެ މަސައްކަތް ކުރާ ފަރާތަށެވެ.

"ފްރައިޓް ޗާޖު" ކަމަށް ބަޔާންކޮށްފައި އެވަނީ، ކަނޑުމަގުން އެއްތަނުން އަނެއްތަނަށް މުދާ ގެންގޮސް ދިނުމަށް ނަގާ އުޖޫރައަށެވެ.

"ޗާޓަރު" ކަމަށް ބަޔާންކޮށްފައި އެވަނީ، ކަނޑު އުޅަނދެއް ކުއްޔަށް ހިފުން ނުވަތަ ސްލޮޓް ޗާޓަރ (ޗާޓަރު ކުރާ ފަރާތް ބޯޓުގެ ސްލޮޓެއް އެހެންފަރާތަކަށް ޗާޓަރަށް ދިނުން) އުސޫލުން ކުއްޔަށް ހިފުމަށެވެ.

"ޕްރިންސިޕަލް" ކަމަށް ބަޔާންކޮށްފައި އެވަނީ، ބޯޓުގެ ވެރިފަރާތް ނުވަތަ ބޯޓު ޗާޓަރުކޮށްގެން އުޅޭ ފަރާތް ނުވަތަ ބޯޓުގެ އޮޕަރޭޓަރ ނުވަތަ ށިޕިންގ އޭޖެންސީ ނުވަތަ ށިޕިންގ އޭޖެންޓް އެޕޮއިންޓްކޮށްފައިވާ ފަރާތަކަށެވެ.

"ށިޕިންގ އޭޖެންސީ ނުވަތަ ށިޕިންގ އޭޖެންޓް" ކަމަށް ބުނެފައި އެވަނީ،އާގުބޯޓެއްގެ ވެރިފަރާތް، ނުވަތަ ކަނޑު އުޅަނދު ޗާޓަރުކޮށްގެން އުޅޭ ފަރާތް،ނުވަތަ ކަނޑު އުޅަނދު އޮޕަރޭޓަރުގެ ފަރާތުން ރާއްޖޭގެ ބަނދަރުތަކަށް އަންނަ އުޅަނދުފަހަރަށް އެ އުޅަނދު އައުމާއި ފުރުމާ ދެމެދު ދޭންޖެހޭ ހިދުމަތްތައް ދިނުމާއި، އެ ބޯޓަކުން ގެނައި މުދާ ދޫކުރުމަށް ޑެލިވަރީ އޯޑަރ ދޫކުރުމާއި، ބޯޓުގެ މާސްޓަރާއި ވެރިފަރާތުން ދައުލަތުގެ މުއައްސަސާތަކާ ގުޅިގެން ކުރަންޖެހޭ އެންމެހައި ކަންކަން ކޮށްދިނުމާއި، ޖުމުލަކޮށް ބޯޓުގެ ބަލަދުވެރިކަން ބަލަހައްޓާ ފަރާތަށެވެ.

"ށިޕު ސްޓޯރު" ކަމަށް ބަޔާންކޮށްފައި އެވަނީ، ބޯޓު ދުއްވުމާއި މަރާމާތާއިހިންގުމަށް ބޭނުންވާ އާލާތާއި ސާމާނާއި، އަދި ފަޅުވެރިންނާއި ފަސިންޖަރުންނަށް ބޭނުންވާ ކާބޯތަކެއްޗާއި، ފެނާއި ބޭހާއި އަދިވެސް މިފަދަ ތަކެއްޗަށެވެ.