"ހިދުމަތް ދޭ ފަރާތް" ކަމަށް ބުނެފައި އެވަނީ، ޓްރާންސްޕޯޓް އޮތީރިޓީން ހިދުމަތް ދިނުމުގެ މަސްއޫލިއްޔަތު ހަވާލުކުރާ ފަރާތަށެވެ.

"ޓްރާންސްޕޯޓް އޮތޯރިޓީ" ކަމަށް ބުނެފައި އެވަނީ، އާންމު ދަތުރުފަތުރުގެ ގޮތުގައި ބަހުގެ ހިދުމަތް ދިނުމަށް ހުއްދަ ދިނުމާއި، ބަހުގެ ހިދުމަތް ދިނުމުގެ އުސޫލުތައް ކަނޑައަޅައި ގަވާއިދު ނަންބަރު 1/2016 ("އާންމު ދަތުރުފަތުރުގެ ގޮތުގައި ބަހުގެ ހިދުމަތް ދިނުމުގެ ގަވާއިދު") ހިންގުމާ ހަވާލުވެފައިވާ ސަރުކާރުގެ އިދާރާކަމަށްވާ "ޓްރާންސްޕޯ އޮތޯރިޓީ" އަށެވެ. 

"ދަފުތަރު" ކަމުގައި ބުނެފައި އެވަނީ، ނެށަނަލް ސޯށަލް ޕްރޮޓެކްށަން އެޖެންސީން އެކުލަވައިލައި ބަލަހައްޓާ، މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާނީ ކުދިންނަށާއި އެ ކުދިން ބަލަހައްޓާ ފަރާތްތަކުގެ ދަފުތަރަށެވެ.

"ރަސްމީ ތައުލީމު" ކަމުގައި ބުނެފައި އެވަނީ، ގްރޭޑް 1 ން 10 އަކަށެވެ. 

"ދާއިމީ" ކަމުގައި ބުނެފައި އެވަނީ، 1 އަހަރުދުވަހަށްވުރެ ގިނަ ދުވަހު ދިވެހިރާއްޖެއިން ބޭރުގައި އުޅެމުންދާ ފަރާތްތަކަށެވެ.

"ސްކޫލަށް ގަވާއިދުން ގެންދިއުން" ކަމުގައި ބުނެފައި އެވަނީ، އެކަށީގެންވާ އުޒުރެއް މެދުވެރިވެގެން މެނުވީ ސްކޫލަށް ހާޒިރުވާންޖެހޭ ދުވަސްތަކުގެ ތެރެއިން މަދުވެގެން %80 ދުވަހު ހާޒިރުވުމަށެވެ. 

"ވެކްސިން ދޭ އުމުރު" ކަމުގައި ބުނެފައި އެވަނީ، ކުއްޖާ އުފަންވާ ދުވަހުން ފެށިގެން އުމުރުން 5 އަހަރު ފުރުމާ ދެމެދަށެވެ.

"ވެކްސިންތައް" ކަމުގައި ބުނެފައި އެވަނީ، ކުޑަކުދިންނަށް ކޮންމެހެން ދިނުމަށް ހެލްތު ޕްރޮޓެކްށަން އެޖެންސީން ކަނޑައަޅާފައިވާ ވެކްސިންތަކަށެވެ.

"މާލީ އެހީ" ކަމުގައި ބުނެފައި އެވަނީ، މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނަށާއި، އެކުދިން ބަލަހައްޓާ ފަރާތްތަކަށް މާލީ އެހީ ދިނުމާބެހޭ ގަވާއިދު (ގަވާއިދު ނަންބަރު 38/2016) ގެ 10 ވަނަ މާއްދާގެ ދަށުން އެހީއަށް އެދޭ ފަރާތަކަށް ދެވޭ އެހީގެ މިންވަރަށެވެ.

"ހާލަތު ބަދަލުވުން" ކަމުގައި ބުނެފައި އެވަނީ، މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނަށާއި، އެކުދިން ބަލަހައްޓާ ފަރާތްތަކަށް މާލީ އެހީ ދިނުމާބެހޭ ގަވާއިދު (ގަވާއިދު ނަންބަރު 38/2016) ގެ 7 ވަނަ މާއްދާއާއި 8 ވަނަ މާއްދާއާއި 9 ވަނަ މާއްދާއާއި 18 ވަނަ މާއްދާ އަދި 19 ވަނަ މާއްދާގައި ކަނޑައަޅާފައިވާ ށަރުތެއް އުނިވުމަށް ނުވަތަ ހާލަތަކަށް ބަދަލުއައުމަށެވެ.

"މީލާދީ މަހެއްގެ މައްޗަށް ލިބޭ އާމްދަނީ" ކަމުގައި ބުނެފައި އެވަނީ، ގަވާއިދުން މަހުން މަހަށް، ނުވަތަ ގަނޑުކޮށް ނޫނީ އިނާޔަތުގެ ގޮތުގައި ލިބޭ ފައިސާ މަހުން މަހަށް ބަހާލުމުން ޖެހޭ އާމްދަނީގެ އަދަދަށެވެ.

"އެއް ގޭބިސީ" ކަމުގައި ބުނެފައި އެވަނީ، އެއްތަނެއްގައި ކައްކައި ކައިބޮއި ނިދައި އުޅޭ އެންމެންނަށެވެ.

"ހަރަދުކޮށް ބަލަހައްޓަންޖެހޭ ކުދިންނާއި މީހުން" ކަމުގައި ބުނެފައި އެވަނީ، އެއް ގޭބިސީއެއްގައި ދިރިއުޅެމުންދާ އެހީއަށް އެދޭ މީހާއާއި އެ މީހާ ބަލަހައްޓަންޖެހޭ ކުދިންނާއި މީހުންނަށެވެ.

"އަސާސީ ކަންކަމާއި ބޭނުންތައް" ކަމުގައި ބުނެފައި އެވަނީ، ކެއިންބުއިމާއި، ދިރިއުޅޭނެ ތަނަކާއި، އަންނައުނާއި، ބޭސް ފަރުވާއާއި، ތައުލީމާއި އަދި މި ނޫންވެސް މިފަދަ އަސާސީ ކަންކަމަށެވެ.

"ކުއްޖާ ނުވަތަ ކުދިންގެ ރައްކާތެރިކަން" ކަމުގައި ބުނެފައި އެވަނީ، ކުއްޖާއަށް ލިބިދާނެ އެއްވެސް އަނިޔާއަކުން ނުވަތަ ގޯނާއަކުން ސަލާމަތްކަން ހޯދައި ދިނުމެވެ. މީގެ ތެރޭގައި ނަފުސާނީ އަދި ޖިސްމާނީ އަނިޔާ ހިމެނޭނެއެވެ.