ޓެކްސް ބަޔާން ހުށަނާޅާ ނުވަތަ ފައިސާ ނުދައްކާ ފަރާތްތަކުގެ ނަން ހާމަކުރުމުގައި އަމަލުކުރާނެ ގޮތުގެ އުސޫލު (ކޮންސޮލިޑޭޓެޑް)

(ކޮންސޮލިޑޭޓެޑް ނަންބަރު 2022-10)

(1ވަނަ، 2ވަނަ، 3ވަނަ، 4ވަނަ އިސްލާހު ކޮންސޮލިޑޭޓް ކުރެވިފައި)

1 ވަނަ މާއްދާ - ތައާރުފު

(ހ) މިއީ، ހުށަހަޅަންޖެހޭ ޓެކްސް ބަޔާން ހުށަނާޅާ ނުވަތަ ދައްކަންޖެހޭ ޓެކުހާއި އެހެނިހެން ފައިސާ ނުދައްކާ ފަރާތްތަކުގެ ނަން ހާމަކުރުމުގައި އަމަލުކުރާނެ ގޮތުގެ އުސޫލެވެ.

(ށ) މި އުސޫލަކީ، ގަވާއިދު ނަންބަރު 2013-45 (ޓެކްސް ނެގުމާބެހޭ އިދާރީ ގަވާއިދު) ގެ 44 ވަނަ މާއްދާގެ ދަށުން އެކުލަވައިލައިފައިވާ އުސޫލެކެވެ.

(ނ) މި އުސޫލަށް ކިޔާނީ، "ޓެކްސް ބަޔާން ހުށަނާޅާ ނުވަތަ ފައިސާ ނުދައްކާ ފަރާތްތަކުގެ ނަން ހާމަކުރުމުގައި އަމަލުކުރާނެ ގޮތުގެ އުސޫލު" އެވެ.

2 ވަނަ މާއްދާ - ނަން ހާމަކުރުން

(ހ) ޓެކްސް ގާނޫނެއްގެ ދަށުން ހުށަހަޅަންޖެހޭ ޓެކްސް ބަޔާނެއް ހުށަނާޅާ ނުވަތަ ދައްކަންޖެހޭ ޓެކްސް ނުދައްކާ ފަރާތްތަކުގެ ނަން ހާމަކުރާނީ، ތިރީގައި ބަޔާންކޮށްފައިވާ ކަންކަން ފުރިހަމަވުމުންނެވެ.

1. ޓެކްސް ބަޔާން ހުށަނޭޅުމާ ގުޅިގެން ނުވަތަ ފައިސާ ނުދެއްކުމާ ގުޅިގެން ދޭ 2 (ދޭއް) ނީޓިސް ދީފައިވުން ނުވަތަ އެ ފައިސާ ދެއްކުމަށް ޓެކްސް ދައްކާ ފަރާތަށް އަންގައިފައިވުން ނުވަތަ މީރާގެ އުސޫލު ނަންބަރު 2025-08 (އިންސްޓޯލްމަންޓަށް ބަހައިލައިގެން ފައިސާ ދެއްކުމުގެ އުސޫލު) ގެ ދަށުން ދީފައިވާ އިންސްޓޯލްމަންޓް އެއްބަސްވުމެއް ބާތިލުކޮށްފައިވުން؛ (އިސްލާހު1 / އިސްލާހު2 ކުރެވިފައި)

2. ފައިސާ ނުދައްކާ ފަރާތެއް ކަމުގައި ވާނަމަ، ނުދައްކާ ހުރި އަދަދު، މީރާއިން ކަނޑައަޅާ ތްރެށްހޯލްޑަކަށްވުރެ މަތިވުން؛

3. ޓެކުހުގެ ގާނޫނުތަކުގައި ކަނޑައަޅައިފައިވާ ސުންގަޑިތަކާ އެއްގޮތަށް ޓެކްސް ބަޔާނެއް ހުށަނާޅާ ފަރާތެއް ކަމަށް ވުން. (އިސްލާހު1 / އިސްލާހު2 ކުރެވިފައި)

4. (އިސްލާހު ކުރެވި / އުނި ކުރެވިފައި)

5. (އުނި ކުރެވިފައި).

(ނ) މި އުސޫލުގެ ދަށުން ހާމަކުރާނީ، ޓެކްސް ދައްކާ ފަރާތުގެ ނަމާއި، އެޑްރެހާއި، ރަޖިސްޓަރީ ނަންބަރާއި، ޓިންއާއި، އެ ފަރާތުގެ ނަމުގައި ރަޖިސްޓަރީ ކޮށްފައިވާ ޓެކްސް ނެގޭ ހަރަކާތްތަކުގެ ނަމެވެ. އަދި މިގޮތުން ނަން ހާމަކުރާއިރު އެހައިތަނަށް ނުދައްކައި އޮތް އަދަދާއި މުއްދަތު ހާމަކުރެވިދާނެއެވެ. (އިސްލާހު1 / އިސްލާހު2 ކުރެވިފައި)

(ރ) މި އުސޫލުގެ ދަށުން ނަން ހާމަކުރެވޭނެ މަރުހަލާތައް؛ (މުޅި ނަންބަރު އިސްލާހު ކުރެވިފައި)

މީރާގެ ވެބްސައިޓުގައި ށާއިއުކުރުމާއެކު ޓެކްސްޕޭޔަރ ސަރވިސް ސެންޓަރުގައި އިއުލާނުކުރުން؛
ދިވެހި ސަރުކާރުގެ ގެޒެޓުގައި ށާއިއުކުރުން.

(ބ) މި މާއްދާގެ (ރ) ގައި ބަޔާންކޮށްފައިވާ އެއް މަރުހަލާއިން އަނެއް މަރުހަލާއަށް ދާންވާނީ، އެ މަރުހަލާއެއްގައި މަދުވެގެން 5 (ފަހެއް) ދުވަހު އިއުލާނުކުރުމަށް ފަހުގައެވެ. (އިސްލާހު ކުރެވިފައި)

3 ވަނަ މާއްދާ - ނަން ހާމަކުރުމުގެ ކުރިން ޔަގީންކުރަންޖެހޭ ކަންކަން

(ހ) މި އުސޫލުގެ ދަށުން އެއްވެސް ފަރާތެއްގެ ނަން ހާމަކުރުމުގެ ކުރިން، އެ ފަރާތާ ގުޅޭގޮތުން އަންނަނިވި ކަންކަން ޔަގީންކުރަންވާނެއެވެ.

1. ޓެކްސް ދައްކާ ފަރާތްތަކުގެ ރަޖިސްޓަރީން އުނިކޮށްފައިވާ ފަރާތެއް ނޫންކަން؛ (އިސްލާހު ކުރެވިފައި)

2. ނިޔާވެފައިވާ ފަރާތެއް ނޫންކަން. (އުނި ކުރެވި / އިތުރު ކުރެވިފައި)

(ށ) މި މާއްދާގެ (ހ) ގައި ބަޔާންކޮށްފައިވާ ކަންކަން ޔަގީންކުރުމުގެ މަރުހަލާގައި، ޓެކްސް ބަޔާން ހުށަނާޅާކަމަށް ނުވަތަ ފައިސާ ނުދައްކާކަމަށް މީރާއިން ބުނާ ބުނުމާމެދު އެ ފަރާތުން ޖަވާބުދާރ ވުމުގެ ފުރުސަތު ދޭންވާނެއެވެ. (އިސްލާހު ކުރެވިފައި)

(ނ) މި މާއްދާގެ (ށ) ގައި އެހެން ބަޔާންކޮށްފައި އޮތް ނަމަވެސް، އެ ފަރާތުން ޖަވާބުދާރީ ވުމަށް ދީފައިވާ ފުރުސަތުގެ ބޭނުންކޮށްފައި ނުވާ ނަމަ ނުވަތަ އެ ފަރާތުގެ ނަމުގައި ރަޖިސްޓަރީ ކޮށްފައިވާ އީމެއިލް އެޑްރެހުން ނުވަތަ އެ ފަރާތަކާ ގުޅޭނެ ފޯނުު ނަންބަރުކަމަށް މީރާގައި ރަޖިސްޓަރީ ކޮށްފައިވާ ފޯނު ނަންބަރުން ނުގުޅުމުގެ ސަބަބުން ނުވަތަ އެ މައުލޫމާތު ހިއްސާކޮށްފައި ނުވުމުގެ ސަބަބުން ނުވަތަ އެއްބާރުލުން ނުލިބުމުގެ ސަބަބުން، އެ ފަރާތުގެ ބަހެއް ހޭދޭ ގޮތް ނުވެއްޖެ ނަމަ، އެ ފަރާތެއްގެ ނަން މި އުސޫލުގެ ދަށުން ހާމަކުރެވޭނެއެވެ. (އިސްލާހު ކުރެވިފައި)

4 ވަނަ މާއްދާ - ނަން ހާމަކުރާނެ ގޮތް

(ހ) ޓެކުހާއި ޓެކްސް ފިޔަވައި އެހެނިހެން ފައިސާއާ ގުޅިގެން މީރާއިން ނަން ހާމަކުރާނީ، މީރާއިން ކަނޑައަޅާ މުއްދަތުތަކަކާ ގުޅޭ އިލްތިޒާމުތައް އަދާ ނުކުރާ ފަރާތްތަކުގެ ތެރެއިން، މީރާއިން ނަން ހާމަކުރަން ކަނޑައަޅާ ތުރެށްހޯލްޑަކަށް ރިއާޔަތްކޮށް، މީރާއިން ކަނޑައަޅާ ތާރީީހުތަކެއްގައެވެ. މިގޮތުން ނަން ހާމަކުރާނީ، މި އުސޫލުގެ 2 ވަނަ މާއްދާގެ (ރ) ގައިވާ މަރުހަލާތަކުގައި، އެ ތަރުތީބުންނެވެ. (އިސްލާހު1 / އިސްލާހު2 ކުރެވިފައި)

ޖީ.އެސް.ޓީ. އާއި، ޖީ.އާރް.ޓީ. އާއި، ވިތުހޯލްޑިންގ ޓެކުހާ ގުޅިގެން ނަން ހާމަކުރާނީ، ކޮންމެ އަހަރެއްގެ މާރިޗު މަހުގައްޔާއި، ސެޕްޓެންބަރު މަހުގައެވެ. މިގޮތުން ނަން ހާމަކުރާނީ، މި އުސޫލުގެ 2 ވަނަ މާއްދާގެ (ރ) ގައިވާ މަރުހަލާތަކުގައި، އެ ތަރުތީބުން، އެ ދުވަހުގެ ކުރީ ދުވަހުގެ ނިޔަލަށް ބަޔާން ހުށަނާޅާ ފަރާތްތަކުގެ ނަންތަކާއި، ފައިސާ ނުދައްކާ ހުރި ފަރާތްތަކުގެ ނަންތަކެވެ.

(ށ) (އުނި ކުރެވިފައި)

(ނ) (އުނި ކުރެވިފައި)

(ރ) މި މާއްދާގެ ދަށުން ނަން ހާމަކުރުމުގައި އެއް މަރުހަލާގައި ނަން ހާމަކުރުމަށްފަހު އަނެއް މަރުހަލާގައި ނަން ހާމަކުރާނީ، ނަން ހާމަކުރުމުގެ ކުރީ ދުވަހުގެ ނިޔަލަށް ބަޔާން ހުށަނާޅާ ނުވަތަ ފައިސާ ނުދައްކާ ހުރި ފަރާތްތަކުގެ ނަންތަކެވެ.

(ބ) (އިތުރު ކުރެވި / އުނި ކުރެވިފައި)

5 ވަނަ މާއްދާ - ލިސްޓުގައިވާ ފަރާތަކުން ފައިސާ ދެއްކުން ނުވަތަ ބަޔާން ހުށަހެޅުން

ނަން ހާމަކުރުމުގެ ފަހުން އެއްވެސް ފަރާތަކުން ޓެކްސް ބަޔާން ހުށަހަޅައިފިނަމ،ަ ނުވަތަ ފައިސާ ދައްކައިފިނަމަ ނުވަތަ އެ ފައިސާ ދައްކާނެ ގޮތަކާމެދު މީރާއާއެކު އެއްބަސް ވުމެއްގައި ސޮއިކޮށްފިނަމަ، އެ ފަރާތުގެ ނަން، މީރާގެ ލިސްޓުން އުނިކުރެވޭނެއެވެ. ނަމަވެސް، ދިވެހި ސަރުކާރުގެ ގެޒެޓުގައި ށާއިއުކުރުމަށްފަހު، އެ ފަރާތެއްގެ ނަން، އެ ލިސްޓުން އުންޏެއް ނުކުރެވޭނެއެވެ. (އިސްލާހު ކުރެވިފައި)

6 ވަނަ މާއްދާ - އިސްތިސްނާވާ ފަރާތްތައް

(ހ) ނުދައްކާ ހުރި ފައިސާއާ ގުޅިގެން، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރ ގާނޫނު) ގެ 42 ވަނަ މާއްދާގެ ދަށުން އިއުތިރާޒު ކޮށްފައިވާ ނަމަ ނުވަތަ ކޯޓު މަރުހަލާގައިވާ މައްސަލައެއް ނަމަ، އެ މައްސަލަ ނިމެންދެން، މި އުސޫލުގެ ދަށުން އެ ފައިސާއާ ގުޅޭގޮތުން ނަން ހާމަކުރުމުން އިސްތިސްނާވެގެންވެއެވެ. (އިސްލާހު1 / އިސްލާހު2 ކުރެވިފައި)

(ށ) ނުދައްކާ ހުރި ފައިސާ ދައްކާނެ ގޮތުގެ އެއްބަސްވުމަކަށް މީރާއާއެކު އައިސްފައިވާނަމަ، އަދި އެ އެއްބަސްވުމާ އެއްގޮތަށް ފައިސާ ދައްކަމުންދާނަމަ،މި އުސޫލުގެ ދަށުން ނަން ހާމަކުރުމުން އިސްތިސްނާވެގެންވެއެވެ.

(ނ) ސަރުކާރުގެ މެޖޯރިޓީ ހިއްސާ އޮންނަ ކުންފުނިތަކާއި، ދައުލަތުގެ އިދާރާތަކުގެ ނަން، މި އުސޫލުގެ ދަށުން ހާމަކުރުމުން އިސްތިސްނާވެގެންވެއެވެ. (އިސްލާހު ކުރެވިފައި)

7 ވަނަ މާއްދާ - ސްޓިއަރިން ކޮމިޓީ

މި އުސޫލުގެ ދަށުން ކުރަންޖެހޭ ކަންތައްތައް ފުރިހަމަކުރުމުގައި އަމަލުކުރާނެ އިޖުރާތުތައް ކަނޑައެޅުމުގައި ލަފާދީ، މަސައްކަތްތައް ވިލަރެސްކުރާނީ، އެ ކަމަށް ހާއްސަކޮށް، ކޮމިށަނަރ ޖެނެރަލް އެކުލަވައިލާ ސްޓިއަރިންގ ކޮމިޓީންނެވެ. މި ކޮމިޓީގައި ހިމެނޭނީ، މީރާގެ ކަމާބެހޭ ޑިޕާޓްމަންޓްތަކުން ހޮވައިލެވޭ މުވައްޒަފުންނެވެ. (އިސްލާހު ކުރެވިފައި)

8 ވަނަ މާއްދާ - މުއްދަތު ގުނުން

މި އުސޫލުގައި ކަނޑައެޅިގެން އެހެން ގޮތަކަށް ބަޔާންކޮށްފައިނުވާހައި ހިނދަކު، މި އުސޫލުގައި ބަޔާންކޮށްފައިވާ މުއްދަތު ގުނާނީ، ރަސްމީ ބަންދު ދުވަސްތަކާއި ސަރުކާރު ބަންދު ދުވަސްތައް ވެސް ހިމަނައިގެންނެވެ.

9 ވަނަ މާއްދާ - އަމަލުކުރަން ފެށުން

މި އުސޫލަށް އަމަލުކުރަން ފަށާނީ، 1 އެޕްރީލް 2022 އިން ފެށިގެންނެވެ.