އިންސްޓޯލްމަންޓަށް ބަހައިލައިގެން ފައިސާ ދެއްކުމުގެ އުސޫލު

(ކޮންސޮލިޑޭޓެޑް ނަންބަރު 2022-08)

(1ވަނަ، 2ވަނަ އިސްލާހު ކޮންސޮލިޑޭޓް ކުރެވިފައި)

1 ވަނަ މާއްދާ - ތައާރުފު

(ހ) މިއީ މީރާއަށް ދައްކަންޖެހޭ ޓެކުހާއި އެހެނިހެން ފައިސާ އިންސްޓޯލްމަންޓަށް ބަހައިލައިގެން ދެއްކުމަށް އެދޭ ފަރާތްތަކަށް އެ ފުރުސަތު ދިނުމުގައި އަމަލުކުރާނެ ގޮތުގެ އުސޫލެވެ.

(ށ) މި އުސޫލަކީ، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރީ ގާނޫނު) ގެ 3 ވަނަ މާއްދާއަށް ރިއާޔަތްކޮށް، ގަވާއިދު ނަންބަރު 2013-45 (ޓެކްސް ނެގުމާބެހޭ އިދާރީ ގަވާއިދު) ގެ 42 ވަނަ މާއްދާއާއި، 43 ވަނަ މާއްދާއާއި، 4-44 ވަނަ މާއްދާގެ ދަށުން އެކުލަވައިލައިފައިވާ އުސޫލެކެވެ.

2 ވަނަ މާއްދާ - މަގުސަދު

މި އުސޫލުގެ މަގުސަދަކީ މީރާ އަށް ދައްކަންޖެހޭ ޓެކުހާއި އެހެނިހެން ފައިސާ ދައްކަންޖެހޭ ސުންގަޑިއަށް އެ ފައިސާ އެއްފަހަރާ ދެއްކުމަށް ދަތިވާ ފަރާތްތަކަށް ލުއިފަސޭހަ ގޮތެއްގައި އެ ފައިސާ ދެއްކޭނެ އިންތިޒާމެއް ހަމަޖެއްސުމާއެކު، މި ފުރުސަތު ދިނުމުގައި ހަމަހަމަކަމާއެކު ދެފުށް ފެންނަހެން އަމަލުކުރާނެ ގޮތުގެ އުސޫލެއް ކަނޑައެޅުމެވެ.

3 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދައްކަން އެދޭ ފަރާތްތައް

(ހ) ބަހައިލައިގެން އިންސްޓޯލްމަންޓަށް ފައިސާ ދެއްކުމަސް އެދޭ ފަރާޓްތަކުން އެއް ވަގުތެއްގައި އެއް ބާވަތެއްގެ ޓެކުހާ ގުޅޭގޮތުން (އެއް ޓެކްސް އެކައުންޓަކަށް) ދެވޭނީ އެއް އިންސްޓޯލްމަންޓެވެ. އެހެންނަމަވެސް އިންސްޓޯލްމަންޓް އެގްރީމަންޓާ އެއްގޮތަށް ގަވާއިދުން ފައިސާ ދައްކަމުންދާ ފަރާތެއް ނަމަ، ވަގުތާ ހާލަތަށް ބަލައި، އެއް އިންސްޓޯލްމަންޓަށްވުރެ އިތުރަށް އިންސްޓޯލްމަންޓް ދިނުމުގެ އިހުތިޔާރު ކޮމިށަނަރ ޖެނެރަލަށް ލިބިގެންވެއެވެ. (އިސްލާހު1 / އިސްލާހު2 ކުރެވިފައި)

(ށ) ބަހައިލައިގެން އިންސްޓޯލްމަންޓަށް ފައިސާ ދެއްކުމަށް މި އުސޫލުގެ ދަށުން ފުރުސަތު ދެވޭ ފަރާތަކުން، އެ އެއްބަސްވުމާ އެއްގޮތަށް ފައިސާ ދައްކަމުން ގެންދާހައި ހިނދަކު، އެ ފައިސާ ހޯދުމުގެ ގޮތުން އެ ފަރާތާމެދު ފިޔަވަޅެއް ނާޅާނެއެވެ.

4 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދެއްކުމުގެ ފުރުސަތު ދިނުމުގެ ށަރުތުތައް

(ހ) ނުދައްކާ ހުރި ފައިސާ ބަހައިލައިގެން އިންސްޓޯލްމަންޓަށް ދެއްކުމަށް މި އުސޫލުގެ ދަށުން ފުރުސަތު ދެވޭނީ، އަންނަނިވި އެންމެހައި ށަރުތުތައް ފުރިހަމަވުމުންނެވެ.

1. ބަހައިލައިގެން އިންސްޓޯލްމަންޓަށް ދެއްކުމަށް އެދޭ ފައިސާއަކީ، އެ ފައިސާ ދައްކަންޖެހޭ ސުންގަޑި ފާއިތުވެފައިވާ ފައިސާއަކަށް ވުން؛

2. އެ ފަރާތަކުން އެ ޓެކުހަކާ ގުޅޭގޮތުން އެ ދުވަހާ ހަމަޔަށް މީރާއަށް ހުށަހަޅަންޖެހޭ ޓެކްސް ބަޔާންތަކާއި އެހެނިހެން ލިޔެކިޔުންތައް ހުށަހަޅައިފައި ވުން؛

3. ނުދައްކާ ހުރި ފައިސާއާ ގުޅޭގޮތުން ދައްކަންޖެހޭކަމަށް މި އުސޫލުގެ 6 ވަނަ މާއްދާގެ (ށ) ގެ ދަށުން ކަނޑައެޅޭ ކޮމިޓްމަންޓް ޕޭމަންޓް ދެއްކުން؛

4. ބަހައިލައިގެން އިންސްޓޯލްމަންޓަށް ފައިސާ ދައްކަންޖެހޭ ގޮތުގެ ތާވަލާއި، ފައިސާ ދެއްކުމުގައި އަމަލުކުރަންޖެހޭކަމަށް މީރާއިން ކަނޑައަޅާ ކަންކަމަށް އެއްބަސްވެ، އިންސްޓޯލްމަންޓް އެއްބަސްވުމެއްގައި މީރާއާއެކ،ު އެ ފަރާތުން ސޮއިކުރުން ނުވަތަ މީރާއިން ކަނޑައަޅާ ގޮތެއްގެ މަތީން މީރާކަނެކްޓް މެދުވެރިކޮށް އެއްބަސްވުން އެކްނޮލެޖްކުރުން؛ (އިސްލާހު ކުރެވިފައި)

5. (އުނި ކުރެވިފައި)

6. މީރާ އާއި އެ ފަރާތާއެކު އިންސްޓޯލްމަންޓް އެއްބަސްވުމެއް ހަދައިފައިވާނަމަ، އެ އެއްބަސްވުމާ އެއްގޮތަށް ފައިސާ ދައްކަމުން ދިއުން.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، މި އުސޫލުގެ ދަށުން ނުދައްކާ ހުރި ފައިސާ ބަހައިލައިގެން އިންސްޓޯލްމަންޓަށް ދެއްކުމަށް އެދި ހުށަހަޅާ ފަރާތްތަކުގެ މާލީހާލަތާއި، ކޮމްޕްލަޔަންސް ހިސްޓްރ އާއި،ވަގުތާއި ހާލަތަށް ރިއާޔަތްކޮށް، އެ ފުރުސަތު ނުދިނުމުގެ އިހްތިޔާރު،ކޮމިށަނަރ ޖެނެރަލަށް ލިބިގެންވެއެވެ.

5 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދެއްކުމަށް އެދި ހުށަހެޅުން

(ހ) ފައިސާ ނުދައްކާ ހުރި ފަރާޓަކުން ދަައްކަންޖެހިފައިވާ ފައިސާ އިންސްޓޯލްމަންޓަށް ބަހައިލައިގެން ދެއްކުމަށް އެދޭނަމަ، "އިންސްޓޯލްމަންޓަށް އެދުން" (MIRA 905) ފޯމު ފުރިހަމަކުރުމަށްފަހުު މީރާގެ ވެބްސައިޓް މެދުވެރިކޮށް ނުވަތަ މީރާ ކަނެކްޓް މެދުވެރިކޮށް ހުށަހަޅަންވާނެއެވެ. (އިސްލާހު1 / އިސްލާހު2 ކުރެވިފައި)

(ށ) މި އުސޫލުގެ ދަށުން ބަހައިލައިގެން އިންސްޓޯލްމަންޓަށް ފައިސާ ދެއްކުމަށް ހަމަޖައްސައިދެވޭ ފަރާތްތަކުން ދައްކަންޖެހޭ ކޮންމެ އިންސްޓޯލްމަންޓެއްގެ މުއްދަތަކީ، މީލާދީ 1 (އެކެއް) މަސްދުވަހެވެ.

(ނ) މި މާއްދާގެ (ހ) ގެ ދަށުން ބަހައިލައިގެން އިންސްޓޯލްމަންޓަށް ފައިސާ ދެއްކުމަށް އެދި ހުށަހަޅާ ފަރާތްތަކަށް އެ ފުރުސަތު ދެވޭނީ، އެ ފަރާތަކުން އެ ވަގުތަކު، އެ ޓެކުހަކާ ގުޅޭގޮތުން ނުދައްކާ ހުރި ނުވަތަ ފައިސާ ދެއްކުމަށް އެއްބަސްވެފައިނުވާ ހުރިހާ ފައިސާއަކަށް (އެއާ ގުޅޭ ޖޫރިމަނާއާއި އިންޓްރެސްޓް ހިމެނޭ ގޮތުން) އެއްކޮށެވެ.

6 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދެއްކުމުގެ ފުރުސަތު ދިނުން

(ހ) ޓެކުހުގެ ގޮތުގައި ދައްކަންޖެހޭ ފައިސާ ބަހައިލައިގެން އިންސްޓޯލްމަންޓަށް ދެއްކުމުގެ ފުރުސަތު ދެވޭނީ، މި އުސޫލުގެ ޖަދުވަލުތަކުގައި ކަނޑައަޅައިފައިވާ ގޮތުގެ މަތީންނެވެ.

(ށ) ބަހައިލައިގެން އިންސްޓޯލްމަންޓަށް ފައިސާ ދެއްކުމަށް ފުރުސަތު ދެވޭނީ، އެ ފުރުސަތު ދެވިދާނެކަމަށް އެ ފަރާތަކަށް އަންގައި، މި އުސޫލުގެ ޖަދުވަލުތަކުގައި ކަނޑައަޅާފައިވާ ގޮތުގެ މަތީން ދައްކަންޖެހޭ ކޮމިޓްމަންޓް ޕޭމަންޓް، އެ ފައިސާ ދެއްކުމަށް މީރާއިން އަންގާ މުއްދަތެއްގެ ތެރޭގައި ދެއްކުމުންނެވެ. މިގޮތުން އެފައިސާ ދެއްކުމަށް ދެވޭނެ އެންމެ ދިގު މުއްދަތަކީ 10 (ދިހައެއް) ދުވަހެވެ. (އިސްލާހު1 / އިސްލާހު2 ކުރެވިފައި)

(ނ) ފައިސާ ދެއްކުމަށް ހަމަޖައްސައިދެވޭ އިންސްޓޯލްމަންޓުގެ އަދަދު ކަނޑައެޅުމުގައި ބަލާނީ، މި މާއްދާގެ (ށ) ގައިވާ ގޮތުގެ މަތީން ދައްކާ ކޮމިޓްމަންޓް ޕޭމަންޓް ދެއްކުމުގެ ކުރިން އެ ފަރާތުން ދައްކަންޖެހިފައިވާ ޖުމުލަ އަދަދަށެވެ.

(ރ) ޓެކްސް ދައްކާ ފަރާތްތަކުން ގާނޫނާއި ގަވާއިދުތަކަށް އަމަލުކުރާ މިންވަރު އިތުރުކުރުމުގެ ގޮތުން މީރާއިން ހިންގާ ހާއްސަ ހަރަކާތެއްގެ ތެރެއިން އިންސްޓޯލްމަންޓް ދެވޭ ފަރާތަކަށް، މި އުސޫލުގެ ޖަދުވަލުގައިވާ ގޮތަށްވުރެ ލުއިކޮށް ވެސް އިންސްޓޯލްމަންޓް ދިނުމުގެ އިހްތިޔާރު، ކޮމިށަނަރ ޖެނެރަލަށް ލިބިގެންވެއެވެ. އަދި މި ގޮތުން އިންސްޓޯލްމަންޓް ދޭ ފަރާތްތަކުގެ މައުލޫމާތު، މީރާގެ ބޯޑާ ހިއްސާ ކުރަންވާނެއެވެ.

7 ވަނަ މާއްދާ - އިންސްޓޯލްމަންޓާ ގުޅޭ އެހެނިހެން ކަންކަން

(ހ) މި އުސޫލުގައިވާ ގޮތުގެ މަތީން ބަހައިލައިގެން އިންސްޓޯލްމަންޓަށް ފައިސާ ދެއްކުމުގެ ފުރުސަތު ދިން ނަމަވެސް، އިންސްޓޯލްމަންޓުގެ ތެރޭގައި ހިމެނޭ ޓެކްސް ނުވަތަ އެނޫން ވެސް ފައިސާ، އެ ފައިސާ ދެއްކުމުގެ އަސްލު ސުންގަޑިއަށް ދައްކާފައި ނުވާތީ، ގާނޫނުގައިވާ ގޮތުގެ މަތީން ޖޫރިމަނާ ނުވަތަ އިންޓްރެސްޓ،ް ކޮމިށަނަރ ޖެނެރަލް ކަނޑައަޅާ ގޮތެއްގެ މަތީން ދައްކަން އެންގިދާނެއެވެ. (އިސްލާހު ކުރެވިފައި)

(ށ) ފައިސާ ނުދައްކާ ހުރި ފަރާތަކުން، މި އުސޫލުގެ ދަށުން ދައްކާ ފައިސާ އަޅައިކެނޑޭނީ، އެ ފަރާތުން ދައްކަންޖެހިފައިވާ ޕްރިންސިޕަލް އަދަދު، އެއަށްފަހު ޖޫރިމަނާ، އަދި އެއަށްފަހު އިންޓްރެސްޓް، މި ތަރުތީބުންނެވެ.

(ނ) ނުދައްކާ ހުރި ފައިސާ ހޯދުމުގެ ގޮތުން އެކައުންޓް ފްރީޒްކޮށްފައިވާނަމަ، ބަހައިލައިގެން އިންސްޓޯލްމަންޓަށް ދެއްކުމުގެ ފުރުސަތު އެ ފަރާތަކަށް ދެވޭނީ، އުސޫލު ނަންބަރު 2022-09 (ބެންކު އެކައުންޓުގައި ހުރި ފައިސާ ހިފެހެއްޓުމާއި، ބެންކު އެކައުންޓު ބެލުމުގައި އަމަލުކުރާނެ ގޮތުގެ އުސޫލު) ގެ ދަށުން އެ ފަރާތުގެ ބެންކު އެކައުންޓުގައި ހުރި ފައިސާގެ ތެރެއިން ނެގެންހުރި ހުރިހާ ފައިސާ ނެގުމަށް ފަހުގައެވެ.

(ރ) މި މާއްދާގެ (ނ) ގައި އެހެން ބަޔާންކޮށްފައި އޮތް ނަމަވެސް، އެންމެ ކުދ،ި ކުދި އަދި މެދު ފަންތީގެ ވިޔަފާރިތަކުން ދައްކަންޖެހިފައިވާ ފައިސާ، އިންސްޓޯލްމަންޓް އެގްރ މަންޓެއްގެ ދަށުން ދެއްކުމަށް އެއްބަސްވާނަމަ، އެ އެއްބަސްވުމުގެ ދަށުން ދައްކަންޖެހޭ ކޮމިޓްމަންޓް ޕޭމަންޓް ދެއްކުމުން ނުވަތަ ފްރީޒްކޮށްފައިވާ އެކައުންޓުން ކޮމިޓްމަންޓް ޕޭމަންޓުގެ ފައިސާ ނެގުމަށްފަހު އިންސްޓޯލްމަންޓް ދިނުމުގެ އިހްތިޔާރު، ކޮމިށަނަރ ޖެނެރަލަށް ލިބިގެންވެއެވެ. (އިސްލާހު ކުރެވިފައި)

(ބ) މި އުސޫލުގެ ދަށުން ބަހައިލައިގެން އިންސްޓޯލްމަންޓަށް ފައިސާ ދެއްކުމަށް ވެވޭ އެއްބަސްވުމާ އެއްގޮތަށް ފައިސާ ނުދައްކާތާ 30 (ތިރީސް) ދުވަސް ފާއިތުވެފައިވާނަމަ، ކަނޑައެޅިފައިވާ އުސޫލުން ފިޔަވަޅު އެޅޭނެއެވެ.

(ޅ) އެއްބާވަތެއްގެ ޓެކުހާ ގުޅޭގޮތުން ދައްކަންޖެހޭ ފައިސާ އެއްކޮށްލައިގެން އިންސްޓޯލްމަންޓް ދެވިދާނެއެވެ. ނަމަވެސް މި ގޮތަށް އިންސްޓޯލްމަންޓް ދޭނީ، އެ ޓެކުހާ ގުޅޭގޮތުން ދައްކަންޖެހޭ ފައިސާ އެއްކޮށްލުމުން، އިންސްޓޯލްމަންޓް ދިނުމުގައި ބަލާ ތްރެށްހޯލްޑަށްވުރެ އިތުރުވާނަމައެވެ.

(ކ) މި އުސޫލުގައިވާ އެންމެހައި ކަންކަން ފުރިހަމަ ނުވިޔަސް، ޓެކްސް ދައްކާ ފަރާތުގެ މާލީހާލަތާއި، ކޮމްޕްލަޔަންސް ހިސްޓްރ އާއި، ވަގުތާ ހާލަތަށް ރިއާޔަތްކޮށް، ބަހައިލައިގެން އިންސްޓޯލްމަންޓަށް ފައިސާ ދެއްކުމުގެ ފުރުސަތު ދިނުމުގެ އިހްތިޔާރު، ކޮމިށަނަރ ޖެނެރަލަށް ލިބިގެންވެއެވެ.

(އ) އިންސްޓޯލްމަންޓް އެއްބަސްވުމުގެ ދަށުން ދައްކަންޖެހޭ ފައިސާ ދައްކަމުންދާކަމަށް ބެލެވޭނީ، އެ ފަރާތުން މި އުސޫލުވެ، އެއްބަސްވުމުގެ ޖަދުވަލުގައި ކަނޑައެޅިފައިވާ ސުންގަޑިތަކުގައި ގަވާއިދުން ފައިސާ ދައްކަމުންދާ ކަމުގައިވާނަމައެވެ. (އިތުރު ކުރެވިފައި)

8 ވަނަ މާއްދާ - އިންސްޓޯލްމަ ންޓުގެ އެއްބަސްވުން ބާތިލުވާ ހާލަތުތައް

އެއްބަސްވުމުގެ ދަށުން ދައްކަންޖެހޭ ންސްޓޯލްމަންޓުގެ ފައިސާ ދައްކަންޖެހޭ ސުންގަޑީގެ ފަހުން 30 (ތިރީސް) ދުވަހުގެ ތެރޭގައި މަގުބޫލު އުޒުރެއްނެތި ދައްކައިފައި ނުވާނަމަ، ނުވަތަ ންސްޓޯލްމަންޓުގެ އެއްބަސްވުމުގެ ބޭރުން އެ ޓެކްސް އެކައުންޓަކާ ގުލޭގޮތުން ފުރިހަމަކުރަންޖެހޭ ޓެކްސް ބަޔާން ހުށަހެޅުމާއި ފައިސާ ދެއްކުމުގެ އިލްތިޒާމުތައް ކަނޑައެޅިފައިވާ ސުންގަޑިން ފެށިގެން 30 (ތިރީސް) ދުވަހުގެ ތެރޭގައި ފުރިހަމަކޮށްފައި ނުވާނަމަ، ންސްޓޯލްމަންޓުގެ އެއްބަސްވުން ބާތިލުކުރުމުގެ އިހްތިޔާރު ކޮމިށަނަރ ޖެނެރަލަށް ލިބިގެންވެއެވެ. މަގުބޫލު އުޒުރެއް ކަމަށް ބަލާނީ އަންނަނިވި ކަންތައްތަކުންކުރެ ކަމެއް މެދުވެރިވެފައިވާނަމައެވެ. (އިސްލާހު1 އިސްލާހު2 ކުރެވިފައި)

(ހ) އެކްސިޑެންޓެއް ނުވަތަ ގުދުރަތީ ކާރިސާއެއް ކުރިމަތިވުން؛

(ށ) އެ ކަމެއް ކުރުމަށް ނުކުޅެދޭ ފަދަ ބައްޔެއްވުން؛

(ނ) ޓެކްސް ދައްކާ ފަރާތުގެ ކޮންޓްރޯލުން ބޭރުގައިވާ ކަމަށް ކޮމިށަނަރ ޖެނެރަލަށް ގަބޫލުކުރެވޭ އެނޫންވެސް ކަމެއް ކުރިމަތިވުން.

9 ވަނަ މާއްދާ - ކޯޓުގައި ދައުވާ އުފުލޭ ފަރާތްތަކާމެދު އަމަލުކުރާނެ ގޮތް

ފައިސާ ނުދައްކާ ފަރާތަކުން ފައިސާ ހޯދުމަށް މީރާއިން ސިވިލް ކޯޓުގައި ދައުވާ އުފުލާ މައްސަލައެއްގައި، ދައުވާކުރާ ފައިސާ ދެއްކުމަށް ކޯޓުން ހުކުމް ކުރުމަށްފަހ،ު އިންސްޓޯލްމަންޓަށް ބަހައިލައިގެން އެ ފައިސާ ދެއްކުމުގެ ފުރުސަތެއ،ް މި އުސޫލުގެ ދަށުން އެ ފަރާތަކަށް ނުދެވޭނެއެވެ. (އިސްލާހު ކުރެވިފައި)

9-1 ވަނަ މާއްދާ - ތަހުގީގެއް ކުރުމަށްފަހު ދައްކަންޖެހޭ ކަމަށް ކަނޑައަޅާ އަދަދު ބަހައިލައިގެން ދެއްކުން (މުޅި މާއްދާ އިތުރު ކުރެވިފައި)

ޓެކްސް ދައްކާ ފަރާތެއްގެ ތަހުގީގެއް މީރާއިން ހިންގުމަށްފަހު، އެ މުއްދަތަކާ ގުޅޭގޮތުން ދައްކަންޖެހޭ އަދަދެއް ކަނޑައަޅާ ހާލަތުގައި އެ ފައިސާ ބަހަައިލައިގެން ދެއްކުމުގެ ފުރުސަތު ދެވޭނީ، އެ ފަރާތަކަށް ރައްދުވާ މި އުސޫލުގެ ދަުވަލުގެ ދަށުން އެ ފަރާތަކުން ދައްކަންޖެހޭނެ ކޮމިޓްމަންޓް ޕޭމަންޓުގެ ދެ ގުނަ، ކޮމިޓްމަންޓް ޕޭމަންޓުގެ ގޮތުގައި ދެއްކުމުންނެވެ. އަދި އެއްބަސްވުމުގެ މުއްދަތު ގޮތުގައި ދެވޭނީ އެ ޖަދުވަލުގައި ބަޔާންކޮށްފައިވާ ގޮތުގެ މަތީން އެ ފަރާތަށް ލިބޭނެ މުއްދަތުގެ ދެބައިކުޅަ އެއްބައެވެ.

9-2 ވަނަ މާއްދާ - ތަކުރާރުކޮށް އިންޓޯލްމަންޓް ދިނުން (މުޅި މާއްދާ އިތުރު ކުރެވިފައި)

ޓެކްސް ދައްކާ ފަރާތާއެކު ވެވޭ އިންޓޯލްމަންޓް އެގްރީމަންޓާ އެއްގޮތަށް އަމަލު ނުކުރުމުން އެގްރީމަންޓް އުވައިލައިފި ނަމަ، ކުރިން އިންޓޯލްމަންޓް ދީފައިވާ އަދަދެއް ހިމެނޭގޮތުން އެ ޓެކްސް އެކައުންޓަކާ ގުޅޭގޮތުން ދައްކަންޖެހިފައިވާ ފައިސާ އިންސްޓޯލްމަންޓަށް ބަހައިލުމުގެ ފުރުސަތު ދެވޭނީ، ކޮމިޓްމަންޓް ޕޭމަންޓުގެ ގޮތުގައި މި އުސޫލުގެ އެ ފަރާތަކަށް ރައްދުވާ ޖަދުވަލުން އެ ފަރާތުން ދައްކަންޖެހޭނެކަމަށް ކަނޑައަޅާ ކޮމިޓްމަންޓް ޕޭމަންޓުގެ އިންސައިތައިގެ އިތުރުން، އެ އަދަދުގެ %50 (ފަންސާސް އިންސައްތަ) ދެއްކުމުންނެވެ. އަދި، އެއްބަސްވުން ތަކުރާރުވާ ކޮންމެ ފަހަރަކު މި އަދަދު، މި ނިސްބަތުން އިތުރުވާނެއެވެ.

10 ވަނަ މާއްދާ - ޓެކުހަށް ނުވާ ފައިސާ ހޯދުމުގައި ޓެކުހުގެ އުސޫލު ހިންގުން

މީރާއަށް ބަލައިގަންނަ ޓެކުހަށް ނުވާ ފައިސާއާ ގުޅިގެން އިންސްޓޯލްމަންޓް ދިނުމުގައި އަމަލުކުރާނީ، އެ ފައިސާއެއްގެ ބެލެނިވެރި އިދާރާއަކުން ކަނޑައަޅާ ގޮތެއްގެ މަތީންނެވެ.

11 ވަނަ މާއްދާ - މުއްދަތު ގުނުން

މި އުސޫލުގަ-އި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހައި ހިނދަކު، މި އުސޫލުގައި ބަޔާންކޮށްފައިވާ މުއްދަތު ގުނާނީ، ރަސްމީ ބަންދު ދުވަސްތަކާއި ސަރުކާރު ބަންދު ދުވަސްތައް ވެސް ހިމަނައިގެންނެވެ.

12 ވަނަ މާއްދާ - މާނަކުރުން

އުސޫލުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހައި ހިނދަކު، ތިރީގައި ބަޔާންކޮށްފައިވާ އިބާރާތްތަކާއި ލަފުޒުތަކަށް ދީފައިވަނީ، އެ އިބާރާތްތަކާއި ލަފުޒުތަކަށް ތިރީގައި ދީފައިވާ މާނައެވެ.

(ހ) "ކޮމިޓްމަންޓް ޕޭމަންޓް" ކަމަށް ބުނެފައި އެވަނީ، އިންސްޓޯލްމަންޓަށް ބަހައިލައިގެން ފައިސާ ދެއްކުމުގެ ފުރުސަތު ލިބިގަތުމަށް ޓަކައި މި އުސޫލުގެ ޖަދުވަލުތަކުގައިވާ ގޮތުގެ މަތީން، އިންސްޓޯލްމަންޓް އެއްބަސްވުމުގައި ސޮއިކުރުމުގެ ކުރިން މީރާއަށް ދައްކަންޖެހޭ ފައިސާއަށެވެ.

(ށ) "ކޮމްޕްލަޔަންސް ލެވެލް" ކަމުގައި ބުނެފައި އެވަނީ، ޓެކްސް ދައްކާ ފަރާތްތަކުން ފުރިހަމަކުރަންޖެހޭ އިލްތިޒާމުތައް އެ ފަރާތްތަކުން ފުރިހަމަކުރާ މިންވަރަށެވެ.

(ނ) "އެންމެ ކުދި، ކުދި އަދި މެދު ފަންތީގެ ވިޔަފާރި" ކަމަށް ބުނެފައި އެވަނީ، ގާނޫނު ނަންބަރު 2013-06 (ކުދި އަދި މެދު ފަންތީގެ ވިޔަފާރީގެ ގާނޫނު) ގެ ދަށުން، އެންމެ ކުދި، ކުދި އަދި މެދު ފަންތީގެ ވިޔަފާރީގެ ގޮތުގައި ކަނޑައަޅައިފައިވާ ފަރާތްތަކަށެވެ.

(ރ) "ދައްކަންޖެހިފައިވާ ފައިސާ" ކަމަށް ބުނެފައި އެވަނީ، ދައްކަންޖެހޭ ޖޫރިމަނާއާއި އިންޓްރެސްޓް ވެސް ހިމަނައިގެންނެވެ.

(ބ) "ގަވާއިދު" ކަމަށް ބުނެފައި އެވަނީ، ގަވާއިދު ނަންބަރު 2013-45 (ޓެކްސް ނެގުމާބެހޭ އިދާރީ ގަވާއިދު) އަށެވެ.

(ޅ) "ގާނޫނު" ކަމަށް ބުނެފައި އެވަނީ، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރީ ގާނޫނު) އަށެވެ.

(ކ) "އެ ފައިސާއެއް ދައްކަންޖެހޭ ކަރަންސީއަކުން" ކަމަށް ބުނެފައި އެވަނ ޓެކްސް ދައްކާ ފަރާތުން ހުށަހަޅާ ބަޔާނުގައި ބަޔާންކޮށްފައިވާ ކަރަންސ އަށެވެ. (އިތުރު ކުރެވިފައި)

13 ވަނަ މާއްދާ - އަމަލުކުރަން ފެށުން

މި އުސޫލަށް އަމަލުކުރަން ފަށާނީ، 1 އެޕްރީލް 2022 އިން ފެށިގެންނެވެ.