(މި ގާނޫނަށް އަމަލުކުރަން ފަށާނީ/ފެށީ 1 ޖަނަވަރީ 2025 ގައި)

(މި ގާނޫނުގެ 23 ވަނަ މާއްދާއިން ވަނީ  ގާނޫނު ނަންބަރު 1981-06  ގެ 24 ވަނަ މާއްދާގެ (ރ) އަދި (ބ) އާއި ބޭރު ފައިސާއާބެހޭ ގަވާއިދު (ގަވާއިދު ނަންބަރު 2024-91)

 

އެއްވަނަ ބާބު

ފެށުން

 

1 ވަނަ މާއްދާ - ތަައާރުފާއި ނަން

(ހ) މިއީ، ދިވެހިރާއްޖޭގައި ބޭރު ފައިސާއިން ކުރެވޭނެ މުއާމަލާތްތައް ކަނޑައެޅުމާއި، ވިޔަފާރިތަކަށް ބޭރު ފައިސާއިން ލިބޭ އާމްދަނީ ބޭންކުތަކަށް ޖަމާކުރުމާއި މާރުކުރުމާބެހޭ އުސޫލުތައް ކަނޑައަޅައި، ބޭރު ފައިސާއާބެހޭ އެނޫންވެސް ކަންކަން ބަޔާންކުރުމުގެ ގާނޫނެވެ.

(ށ) މި ގާނޫނަށް ކިޔާނީ "ބޭރު ފައިސާއާބެހޭ ގާނޫނު" އެވެ.

 

2 ވަނަ މާއްދާ - މަގްސަދު

މި ގާނޫނުގެ މައިގަނޑު މަގްސަދުތައް ތިރީގައި ބަޔާންކޮށްފައި އެވަނީއެވެ.

(ހ) ދިވެހިރާއްޖޭގައި ބޭރު ފައިސާ ލިބޭނެ ގޮތް މަގުފަހިކުރުން؛

(ށ) ބޭންކު އެކައުންޓްތަކުން ކުރެވޭ މުއާމަލާތްތައް ހިމެނޭގޮތުން ދިވެހިރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައެޅުން؛

(ނ) ވިޔަފާރިތަކަށް ބޭރު ފައިސާއިން ލިބޭ އާމްދަނީ ބޭންކު އެކައުންޓަކަށް ޖަމާކުރުމާބެހޭ އުސޫލުތައް ކަނޑައެޅުން؛ އަދި

(ރ) ބޭރު ފައިސާއިން ލިބޭ އާމްދަނީން ބައެއް ރުފިޔާއަށް މާރުކުރުމާބެހޭ އުސޫލުތައް ކަނޑައެޅުން.

 

 

ދެވަނަ ބާބު

ދިވެހިރާއްޖޭގައި މަނިޓަރީ މުއާމަލާތްތައް ކުރުމުގެ ވަސީލަތް

 

3 ވަނަ މާއްދާ - ރުފިޔާއިން މުއާމަލާތްކުރުން

(ހ) މި ގާނޫނުގައި ނުވަތަ އެހެން ގާނޫނެއްގައި ކަނޑައެޅިގެން އެހެން ގޮތަކަށް ބަޔާންކޮށްފައިނުވާހާ ހިނދަކު، ދިވެހިރާއްޖޭގައި ކުރެވޭ އެންމެހައި މަނިޓަރީ އިލްތިޒާމްތައް ނުވަތަ މުއާމަލާތްތައް، ހުށަހަޅަންވާނީ އަދި އަދާކުރަންވާނީ ރުފިޔާއިންނެވެ.

(ށ) މި ގާނޫނުގައި ނުވަތަ އެހެން ގާނޫނެއްގައި ބޭރު ފައިސާއިން ކުރެވޭނެ ކަމަށް ކަނޑައެޅިގެން ބަޔާންކޮށްފައިވާ މުއާމަލާތްތައް ފިޔަވައި، ދިވެހިރާއްޖޭގައި ކުރެވޭ އެއްވެސް މަނިޓަރީ އިލްތިޒާމެއް ނުވަތަ މުއާމަލާތެއް، ބޭރު ފައިސާއިން ހުށަހެޅުމަކީ އަދި އަދާކުރުމަކީ މަނާކަމެކެވެ.

 

4 ވަނަ މާއްދާ - ބޭރު ފައިސާއިން މުއާމަލާތްކުރުން

މި ގާނޫނުގެ 3 ވަނަ މާއްދާގައި އެފަދައިން ބަޔާންކޮށްފައިވީ ނަމަވެސް، އަންނަނިވި އިލްތިޒާމްތަކާއި މުއާމަލާތްތައް، ބޭރު ފައިސާއިން ހުށަހަޅައި އަދި އަދާކުރެވިދާނެއެވެ.

(ހ) ގާނޫނެއް ނުވަތަ ގަވާއިދެއްގެ ދަށުން ބާރު ލިބިގެން، ބޭރު ފައިސާއަކުން ސަރުކާރަށް ނުވަތަ ދައުލަތުގެ އިދާރާއަކަށް ދެއްކުމަށް ހުއްދަކުރާ ފައިސާ ދެއްކުމާއި، އެ ފައިސާ ބަލައިގަތުން؛

(ށ) ބޭންކުތަކާއި ފައިނޭންސިންގ ކުންފުނިތަކުން ދޭ ހިދުމަތްތަކާއި، އެ އިދާރާތަކާއި އެ އިދާރާތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތައް؛

(ނ) ރެމިޓެންސް ހިދުމަތްދޭ ފަރާތްތަކާއި އެފަރާތްތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތައް؛

(ރ) އިންށުއަރެންސް ކުންފުނިތަކުން، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކަށް ވިއްކާ އިންށުއަރެންސް ޕޮލިސީއާ ގުޅިގެން އެ ކުންފުނިތަކާއި އެ ކުންފުނިތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތަކާއި، އެފަދަ ޕޮލިސީއާ ގުޅިގެން އިންށުއަރެންސް އިންޓަރމީޑިއަރީތަކާއި ކަސްޓަމަރުންނާ ދެމެދު ކުރެވޭ މުއާމަލާތްތައް، އަދި އިންށުއަރެންސް ކުންފުނިތަކުން ކުރާ މުއާމަލާތްތަކުގެ ތެރެއިން މި ގާނޫނުގެ ދަށުން ހަދާ ގަވާއިދުގައި ކަނޑައަޅާ އެނޫންވެސް މުއާމަލާތްތައް؛

(ބ) ދިވެހިރާއްޖޭގެ ސެކިއުރިޓީޒް މާރކެޓްގައި ކުރާ މުއާމަލާތްތައް؛

(ޅ) ބައިނަލްއަގްވާމީ މުއާމަލާތްތައް؛

(ކ) ޓޫރިސްޓުންނަށް ވިއްކާ މުދަލާއި ޓޫރިސްޓުންނަށް ދޭ ހިދުމަތުގެ އަގު ބޭރު ފައިސާއިން ބަލައިގަތުން؛

(އ) އެކްސްޕޯޓް ކުރެވޭ މުދަލާއި ހިދުމަތުގެ އަގު ބޭރު ފައިސާއިން ބަލައިގަތުން؛

(ވ) ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލާއި ހޯދާ ހިދުމަތުގެ އަގު، ބޭރު ފައިސާއިން އަދާކުރުމަށް އެ ވިޔަފާރިއަކުން ބޭނުންވާނަމަ ބޭރު ފައިސާއިން އަގު އަދާކުރުން، އަދި އެ މުދާ ވިއްކި ނުވަތަ ހިދުމަތް ފޯރުކޮށްދިން ފަރާތުން ބޭރު ފައިސާއިން އަގު ބަލައިގަތުން؛

(މ) ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުންވާނަމަ، އެ ވިޔަފާރިއަކުން ހިއްސާދާރުންނަށް ޑިވިޑެންޑް ދިނުމާއި، އެ ވިޔަފާރިއަކާއި އެ ވިޔަފާރިއެއްގެ ހިއްސާދާރުންނާ ދެމެދު ކުރެވޭ އެހެން މުއާމަލާތްތައް އަދި އެފަދަ ވިޔަފާރިއަކާއި އެ ވިޔަފާރިއަކާ ގުޅުންހުރި އެހެން ފަރާތްތަކާ ދެމެދު ކުރެވޭ މުއާމަލާތްތައް؛

(ފ) ބޭރު ފައިސާއިން އާމްދަނީ ލިބޭ ވިޔަފާރިއެއްގެ ހިއްސާ ގަނެވިއްކުމާއި، އެ ވިޔަފާރިއަކުން ބޮންޑް ނުވަތަ ސުކޫކް ދޫކުރުމާއި، އެ ވިޔަފާރިއަކާއި އެ ވިޔަފާރިއެއްގެ ބޮންޑް ހޯލްޑަރުންނާއި ސުކޫކް ހޯލްޑަރުންނާ ދެމެދު ކުރެވޭ މުއާމަލާތްތައް؛

(ދ) ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުންވާނަމަ، އެ ވިޔަފާރިއެއްގެ މުވައްޒަފުންނަށް ބޭރު ފައިސާއިން މުސާރައާއި އިނާޔަތްތައް ދިނުމާއި، މުވައްޒަފުން މުސާރައާއި އިނާޔަތްތައް ބޭރު ފައިސާއިން ބަލައިގަތުން؛ 

(ތ) ޑިއުޓ-ީފްރީ ފިހާރަތަކުން ޓޫރިސްޓުންނަށް ވިއްކާ މުދަލާއި ހިދުމަތުގެ އަގު ޓޫރިސްޓުންގެ އަތުން ބޭރު ފައިސާއިން ބަލައިގަތުމާއި ޓޫރިސްޓުން އެ އަގު ބޭރު ފައިސާއިން އަދާކުރުން؛

(ލ) ށަރުއީ ކޯޓެއްގެ ހުކުމެއް ނުވަތަ އަމުރެއް، ނުވަތަ ޓްރައިބިއުނަލެއްގެ ނިންމުމެއް ނުވަތަ އާބިޓްރޭށަން ފަދަ މައްސަލަ ބެލުމުގެ ނިޒާމެއްގެ ދަށުން ނިންމާފައިވާ ނިންމުމެއްގައި ދެއްކުމަށް ކަނޑައަޅާފައިވާ ބޭރު ފައިސާގެ އިލްތިޒާމްތައް؛

(ގ) މި ގާނޫނުގެ ދަށުން ހަދާ ގަވާއިދުގައި ކަނޑައަޅާ އެނޫންވެސް އިލްތިޒާމްތަކާއި މުއާމަލާތްތައް.

 

5 ވަނަ މާއްދާ - ބޭރު ފައިސާއިން އަގު އަދާކުރުމަށް ދިވެހިންގެ މައްޗަށް ލާޒިމުނުކުރެވުން

މި ގާނޫނުގެ 4 ވަނަ މާއްދާގައި ބަޔާންކޮށްފައިވާ އިލްތިޒާމްތަކާއި މުއާމަލާތްތައް ބޭރު ފައިސާއިން ހުށަހަޅައި އަދި އަދާކުރުމަކީ ހުއްދަ ކަމެއްކަމުގައި އެ މާއްދާގައި ބަޔާންކޮށްފައިވީ ނަމަވެސް، ސަރުކާރާއި ދައުލަތުގެ އިދާރާތަކާއި މާލީ އިދާރާތަކުން ގާނޫނާ އެއްގޮތްވާ ގޮތުގެމަތިން ބޭރު ފައިސާއިން މުއާމަލާތްކުރުމަށް ކަނޑައަޅާފައިވާ ކަންކަމުގައި ފިޔަވައި، ދިވެހިރާއްޖޭގައި، ދިވެއްސަކު ގަންނަ މުދަލާއި ހޯދާ ހިދުމަތުގެ އަގު، ބޭރު ފައިސާއިން އަދާކުރުމަށް ލާޒިމެއް ނުކުރެވޭނެއެވެ.

 

 

ތިންވަނަ ބާބު

ބޭރު ފައިސާ

 

6 ވަނަ މާއްދާ - ބޭރު ފައިސާ

(ހ) މި ގާނޫނުގެ ބޭނުމަށްޓަކައި ބޭރު ފައިސާ ކަމުގައި ބުނެފައި އެވަނީ، ދިވެހިރާއްޖެ ނޫން އެހެން ކޮންމެ ގައުމެއްގެ ފައިސާއަށެވެ.

(ށ) ގާނޫނާ އެއްގޮތްވާ ގޮތުގެމަތިން، ދިވެހިރާއްޖެއަށް ބޭރު ފައިސާ އެތެރެކުރުމާއި، ދިވެހިރާއްޖެއިން ބޭރު ފައިސާ ބޭރުކުރުމާއި، ދިވެހިރާއްޖޭގައި ބޭރު ފައިސާ ގެންގުޅުމާއި ބޭނުންކުރުމާއި، ދިވެހިރާއްޖޭގައި ބޭރު ފައިސާއިން އިންވެސްޓުކުރުމަކީ ހުއްދަ ކަމެކެވެ.

(ނ) ބޭންކަކުން ކަނޑައަޅާ ގޮތެއްގެމަތިން، އެ ބޭންކެއްގައި ބޭރު ފައިސާއެއްގެ އެކައުންޓް ހުޅުވައި ބޭނުންކުރުމަކީ ހުއްދަ ކަމެކެވެ. 

 

 

ހަތަރުވަނަ ބާބު

ބޭރު ފައިސާއިން ލިބޭ އާމްދަނީ ޖަމާކުރުން

 

7 ވަނަ މާއްދާ - ބޭރު ފައިސާގެ އާމްދަނީ ބޭންކު އެކައުންޓަކަށް ޖަމާކުރުން

(ހ) އަންނަނިވި ފަރާތްތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް، މީލާދީ މަހެއްގެ ތެރޭގައި ލިބޭ ބޭރު ފައިސާގެ ރިއަލައިޒްޑް ސޭލްސް ޕްރޮސީޑްސް އެކުގައި، އެ މަހަށް ފަހު ހިނގާ ތިންވަނަ މަހުގެ 28 (އަށާވީސް) ވަނަ ދުވަހުގެ ކުރިން ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފަރ ނުވަތަ ޖަމާކުރަންވާނެއެވެ.

1. ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތައް؛ އަދި
2. މި މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް، ފާއިތުވި މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15,000,000.00 (ފަނަރަ މިލިއަން) އެމެރިކާ ޑޮލަރަށް ނިސްބަތްވާ އަދަދެއް ލިބޭ ފަރާތްތައް.

(ށ) މި މާއްދާގެ (ހ) ގެ ދަށުން ޖަމާކުރާ ބޭރު ފައިސާ، އެ ފައިސާ ޖަމާކުރާ ބޭންކަކުން، އެ ބޭންކެއްގައި ބޭރު ފައިސާގެ އެކައުންޓެއް ހުޅުވައިދޭ އަދި އޮތޯރިޓީން ހުއްދަކުރާ ކޮންމެ ބޭރު ފައިސާއަކުންވެސް ޖަމާކުރެވިދާނެއެވެ.

 

8 ވަނަ މާއްދާ - ދައުލަތުގެ އިދާރާތަކުން މައުލޫމާތު ފޯރުކޮށްދިނުން

(ހ) އެހެން ގާނޫނެއްގައި އެހެން ގޮތަކަށް ބަޔާންކޮށްފައިވީ ނަމަވެސް، މި ގާނޫނު ތަންފީޒުކުރުމަށް ބޭނުންވާ މައުލޫމާތާއި، މި ގާނޫނުގެ 7 ވަނަ މާއްދާގައި ބަޔާންކޮށްފައިވާ ފަރާތްތަކުގެ މައުލޫމާތާއި ހިސާބުތައް އޮތޯރިޓީން އެދުމުން، މި ގާނޫނުގެ މަގްސަދުތައް ހާސިލުކުރުމަށް ބޭނުންވާ މިންވަރަށް، މީރާއިން އޮތޯރިޓީއަށް ދޭންވާނެއެވެ.

(ށ) މި ގާނޫނަށް އަމަލުކުރަން ފަށާއިރު، ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން ރަޖިސްޓަރީކޮށްފައިވާ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި، ރިޒޯޓު ހޮޓާތަކާއި، ޓޫރިސްޓް އުޅަނދުތަކާއި، ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސްތަކާއި، އަދި އެނޫންވެސް އެފަދަ ތަންތަނާބެހޭ މައުލޫމާތު، މި ގާނޫނަށް އަމަލުކުރަން ފަށާ ތާރީހުން ފެށިގެން ގިނަވެގެން 1 (އެކެއް) މަސްދުވަހުގެ ތެރޭގައި ޓޫރިޒަމާބެހޭ މިނިސްޓްރީން އޮތޯރިޓީއާ ހިއްސާކުރަންވާނެއެވެ. 

(ނ) މި ގާނޫނަށް އަމަލުކުރަން ފަށާ ފަހުން ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން ރަޖިސްޓަރީކުރެވޭ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި، ރިޒޯޓު ހޮޓާތަކާއި، ޓޫރިސްޓް އުޅަނދުތަކާއި، ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސްތަކާއި، އަދި އެނޫންވެސް އެފަދަ ތަންތަނާބެހޭ މައުލޫމާތު، އެއިން ތަނެއް ރަޖިސްޓަރީކުރާ ތާރީހުން ފެށިގެން ގިނަވެގެން 1 (އެކެއް) މަސްދުވަހުގެ ތެރޭގައި، ޓޫރިޒަމާބެހޭ މިނިސްޓްރީން އޮތޯރިޓީއާ ހިއްސާކުރަންވާނެއެވެ.

(ރ) އެހެން ގާނޫނެއްގައި އެހެން ގޮތަކަށް ބަޔާންކޮށްފައިވީ ނަމަވެސް، މި ގާނޫނު ތަންފީޒުކުރުމަށް އޮތޯރިޓީއަށް ބޭނުންވާ މައުލޫމާތު، ރަޖިސްޓްރާރ އޮފް ކޮމްޕެނީޒް އޮތޯރިޓީއާ ހިއްސާކުރަންވާނެއެވެ. 

(ބ) މި މާއްދާގެ (ހ)، (ށ)، (ނ) އަދި (ރ) ގެ ދަށުން އޮތޯރިޓީއަށް ލިބޭ އެއްވެސް މައުލޫމާތެއް، މި ގާނޫނު ތަންފީޒުކޮށް މި ގާނޫނުގެ މަގްސަދުތައް ހާސިލުކުރުމަށް ފިޔަވައި އެހެން އެއްވެސް ބޭނުމަކަށް ބޭނުންކޮށްގެންނުވާނެއެވެ. 

 

 

ފަސްވަނަ ބާބު

ބޭރު ފައިސާއިން ލިބޭ އާމްދަނީން ބައެއް ރުފިޔާއަށް މާރުކުރުން

 

9 ވަނަ މާއްދާ - ބޭރު ފައިސާއިން ލިބޭ އާމްދަނީ މާރުކުރަންޖެހޭ ފަރާތްތައް

މި ގާނޫނުގެ 10 ވަނަ މާއްދާގައި ބަޔާންކުރާ ގޮތުގެމަތިން، ބޭރު ފައިސާ މާރުކުރުމުގެ އިލްތިޒާމް އަދާކުރަންޖެހޭ ފަރާތްތައް ތިރީގައި ބަޔާންކޮށްފައި އެވަނީއެވެ.

(ހ) "ކެޓެގަރީ- އޭ ޓޫރިޒަމް އެސްޓެބްލިށްމަންޓް": މި ކެޓެގަރީގައި ހިމެނޭނީ، ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން ރަޖިސްޓަރީކޮށްފައިވާ، ދިވެހިރާއްޖޭގައި ހިންގާ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ޕްރައިވެޓް އައިލެންޑްތަކާއި، ރިޒޯޓު ހޮޓާތަކާއި، އެނޫންވެސް އެފަދަ ތަންތަން

(ށ) "ކެޓެގަރީ-ބީ ޓޫރިޒަމް އެސްޓެބްލިށްމަންޓް": މި ކެޓެގަރީގައި ހިމެނޭނީ، ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން ރަޖިސްޓަރީކޮށްފައިވާ، ޓޫރިސްޓް އުޅަނދުތަކާއި، ޓޫރިސްޓް ހޮޓާތަކާއި، ޓޫރިސްޓް ގެސްޓްހައުސްތައް.

(ނ) މި މާއްދާގެ (ހ) އަދި (ށ) ގައި ބަޔާންކޮށްފައިވާ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް ފާއިތުވި މީލާދީ އަހަރުގެ ތެރޭގައި ބޭރު ފައިސާއިން މަދުވެގެން 15,000,000.00 (ފަނަރަ މިލިއަން) އެމެރިކާ ޑޮލަރަށް ނިސްބަތްވާ އަދަދެއް ލިބިފައިވާ ފަރާތްތައް.

 

10 ވަނަ މާއްދާ - ބޭރު ފައިސާއިން ލިބޭ އާމްދަނީން ބައެއް މާރުކުރުން

(ހ) ކެޓެގަރީ- އޭ ޓޫރިޒަމް އެސްޓެބްލިށްމަންޓްތަކުން، އަންނަނިވި ދެ ގޮތުންކުރެ އެ އެސްޓެބްލިށްމަންޓަކުން އިހްތިޔާރުކުރާ ގޮތެއްގެމަތިން ކަނޑައެޅޭ އަދަދެއްގެ ބޭރު ފައިސާ، އެ އެސްޓެބްލިށްމަންޓް ހިންގާ ފަރާތުން، ބޭންކަކަށް، ރުފިޔާއަށް މާރުކުރަންވާނެއެވެ.

1. މީލާދީ މަހެއްގެ ތެރޭގައި އެ އެސްޓެބްލިށްމަންޓަކަށް އަންނަ ކޮންމެ ޓޫރިސްޓަކަށް 500.00 (ފަސްސަތޭކަ) އެމެރިކާ ޑޮލަރުގެ ރޭޓުން، އެ މަހެއްގެ ތެރޭގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު؛ ނުވަތަ
2. މީލާދީ މަހެއްގެ ތެރޭގައި އެ އެސްޓެބްލިށްމަންޓެއްގެ ބޭރު ފައިސާގެ ގްރޮސް ސޭލްސްގެ %20 (ވިހި އިންސައްތަ).

(ށ) ކެޓެގަރީ-ބީ ޓޫރިޒަމް އެސްޓެބްލިށްމަންޓްތަކުން، އަންނަނިވި ދެ ގޮތުންކުރެ އެ އެސްޓެބްލިށްމަންޓަކުން އިހްތިޔާރުކުރާ ގޮތެއްގެމަތިން ކަނޑައެޅޭ އަދަދެއްގެ ބޭރު ފައިސާ، އެ އެސްޓެބްލިށްމަންޓް ހިންގާ ފަރާތުން، ބޭންކަކަށް، ރުފިޔާއަށް މާރުކުރަންވާނެއެވެ.

1. މީލާދީ މަހެއްގެ ތެރޭގައި އެ އެސްޓެބްލިށްމަންޓަކަށް އަންނަ ކޮންމެ ޓޫރިސްޓަކަށް 25 (ފަންސަވީސް) އެމެރިކާ ޑޮލަރުގެ ރޭޓުން، އެ މަހެއްގެ ތެރޭގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު؛ ނުވަތަ
2. މީލާދީ މަހެއްގެ ތެރޭގައި އެ އެސްޓެބްލިށްމަންޓެއްގެ ބޭރު ފައިސާގެ ގްރޮސް ސޭލްސްގެ %20 (ވިހި އިންސައްތަ).

(ނ) މި ގާނޫނުގެ 9 ވަނަ މާއްދާގެ (ނ) ގައި ބަޔާންކޮށްފައިވާ ފަރާތްތަކުން، އެފަރާތްތަކުން މީލާދީ މަހެއްގެ ތެރޭގައި ވިއްކާ ނުވަތަ ފޯރުކޮށްދޭ މުދަލާއި ހިދުމަތުގެ ބޭރު ފައިސާގެ ގްރޮސް ސޭލްސްގެ %20 (ވިހި އިންސައްތަ) އެފަރާތުން، ބޭންކަކަށް، ރުފިޔާއަށް މާރުކުރަންވާނެއެވެ.

(ރ) މި މާއްދާގެ (ހ)، (ށ) އަދި (ނ) ގެ ދަށުން ކޮންމެ މީލާދީ މަހެއްގެ މައްޗަށް ބޭންކަށް މާރުކުރަންޖެހޭ ފައިސާ، އެ މަހަށް ފަހު ހިނގާ ތިންވަނަ މަހުގެ 28 )އަށާވީސް( ވަނަ ދުވަހުގެ ކުރިން މާރުކޮށް ނިންމަންވާނެއެވެ. 

 

11 ވަނަ މާއްދާ - ބޭރު ފައިސާ މާރުކުރުމުން އިސްތިސްނާވާ ފަރާތްތަކާއި ހާލަތްތައް

(ހ) މި ގާނޫނުގެ 10 ވަނަ މާއްދާގެ (ހ) ގެ (1) ވަނަ ނަންބަރު އަދި އެ މާއްދާގެ (ށ) ގެ (1) ވަނަ ނަންބަރުގެ ބޭނުމަށް، އެ މާއްދާގައި ބަޔާންކޮށްފައިވާ ގޮތުގެމަތިން ޓޫރިޒަމް އެސްޓެބްލިށްމަންޓަށް އަންނަ ޓޫރިސްޓުން ހިސާބުކުރުމުގައި އަންނަނިވި ފަރާތްތަކެއް ނުހިމެނޭނެއެވެ.

1. އެ ޓޫރިޒަމް އެސްޓެބްލިށްމަންޓެއްގައި ގިނަވެގެން 24 (ސައުވީސް) ގަޑިއިރު ހޭދަކޮށްފައިނުވާ ޓޫރިސްޓުން؛
2. ޓޫރިސްޓުންގެ ތެރެއިން އުމުރުން 12 (ބާރަ) އަހަރު ފުރިހަމަނުވާ ކުޑަކުދިން؛
3. އެ ޓޫރިޒަމް އެސްޓެބްލިށްމަންޓެއްގައި ހިލޭ ނުވަތަ ކޮމްޕްލިމެންޓަރީކޮށް ތިބޭ ފަރާތްތައް؛
4. ސަރުކާރުން ހާއްސަ އިމްތިޔާޒް ދީފައިވާ މެހުމާނުން

(ށ) މި ގާނޫނުގެ 9 ވަނަ މާއްދާގެ (ށ) ގައި ބަޔާންކޮށްފައިވާ ޓޫރިސްޓް އުޅަނދުތަކުގެ ތެރެއިން ދިވެހިރާއްޖެއިން ބޭރުގައި ރަޖިސްޓަރީކޮށް އޮޕަރޭޓްކުރާ ޓޫރިސްޓް އުޅަނދުތައް މި ގާނޫނުން އިސްތިސްނާވާނެއެވެ.

 

12 ވަނަ މާއްދާ - މާރުކުރަންޖެހޭ ބޭރު ފައިސާގެ އަދަދު މުރާޖައާކުރުން

(ހ) މި ގާނޫނުގެ 9 ވަނަ މާއްދާގައި ބަޔާންކޮށްފައިވާ ފަރާތްތަކުން، މި ގާނޫނުގެ 10 ވަނަ މާއްދާގައި ބަޔާންކޮށްފައިވާ ގޮތުގެމަތިން މާރުކުރަންޖެހޭ ބޭރު ފައިސާގެ މިންވަރު ހިސާބުކުރުމަށްފަހުގައި، އެ މިންވަރަށް ބޭރު ފައިސާ މާރުކޮށްފިނަމަ، އެފަރާތްތަކުން އަދާކުރަންޖެހިފައިވާ ތިރީގައި ބަޔާންކޮށްފައިވާ ބޭރު ފައިސާގެ އިލްތިޒާމެއް ނުވަތަ އިލްތިޒާމްތަކެއް އަދާކުރުމަށް ބޭނުންވާ ބޭރު ފައިސާ އެފަރާތެއްގެ އަތުގައި ނުހުންނާނެކަން ބަޔާންކޮށް އޮތޯރިޓީއަށް ހުށަހެޅުމުން، އެ މިންވަރަށް ބޭރު ފައިސާ ނުހުންނާނެކަމަށް އޮތޯރިޓީއަށް ގަބޫލުކުރެވޭނަމަ، އޮތޯރިޓީން ކަނޑައަޅާ މުއްދަތަކަށް، މި ގާނޫނުގެ 10 ވަނަ މާއްދާގައި ބަޔާންކޮށްފައިވާ މިންވަރަށްވުރެ މަދު މިންވަރެއް މާރުކުރުމުގެ ހުއްދަ އޮތޯރިޓީން ދެވިދާނެއެވެ.

1. ބޭރު ފައިސާއިން ދައްކަންޖެހިފައިވާ ޓެކްސްއާއި ބޭރު ފައިސާއިން ސަރުކާރަށް ދައްކަންޖެހިފައިވާ އިލްތިޒާމްތައް؛
2. ދިވެހިރާއްޖޭގައި ނުވަތަ ދިވެހިރާއްޖެއިން ބޭރުގައި ހިންގާ ބޭރުގެ މާލީ އިދާރާއަކަށް ބޭރު ފައިސާއިން އަދާކުރަންޖެހިފައިވާ ދަރަނި؛
3. ށަރުއީ ކޯޓެއްގެ ހުކުމެއް ނުވަތަ އަމުރެއް، ނުވަތަ ޓްރައިބިއުނަލެއްގެ ނިންމުމެއް ނުވަތަ އާބިޓްރޭށަން ފަދަ މައްސަލަ ބެލުމުގެ ނިޒާމެއްގެ ދަށުން ނިންމާފައިވާ ނިންމުމެއްގައި ދެއްކުމަށް ކަނޑައަޅާފައިވާ ބޭރު ފައިސާގެ އިލްތިޒާމްތައް؛ ނުވަތަ
4. އޮތޯރިޓީން ހުއްދަދޭ އެހެންވެސް ބޭރު ފައިސާގެ އިލްތިޒާމްތައް. 

(ށ) މި މާއްދާގެ (ހ) ގެ ދަށުން އޮތޯރިޓީގެ ހުއްދައަށް އެދި ހުށަހަޅާނީ، ބޭރު ފައިސާއިން އަދާކުރަންޖެހިފައިވާ އިލްތިޒާމްތަކުގެ ތަފްސީލާއި އޮތޯރިޓީން ކަނޑައަޅާ އެހެން މައުލޫމާތާއި ލިޔެކިޔުންތަކާ އެކުގައެވެ.

 

13 ވަނަ މާއްދާ - ބޭންކަށް މާރުކުރާ ބޭރު ފައިސާ އޮތޯރިޓީއަށް ވިއްކުން

(ހ) މި ގާނޫނުގެ 10 ވަނަ މާއްދާގެ ދަށުން ބޭންކަކަށް ލިބޭ ބޭރު ފައިސާގެ ތެރެއިން އޮތޯރިޓީން ކަނޑައަޅާ ވަކި އިންސައްތައެއްގެ ފައިސާ، އޮތޯރިޓީން ކަނޑައަޅާ މުއްދަތެއްގެ ތެރޭގައި، އެ ބޭންކަކުން އޮތޯރިޓީއަށް ވިއްކަންވާނެއެވެ.

(ށ) މި ގާނޫނުގެ 10 ވަނަ މާއްދާގެ ދަށުން މަހެއްގެ ތެރޭގައި ބޭންކަށް ލިބޭ ބޭރު ފައިސާގެ ތަފްސީލ،ު އޮތޯރިޓީން ކަނޑައަޅާ މުއްދަތެއްގެ ތެރޭގައި އަދި އޮތޯރިޓީން ކަނޑައަޅާ ގޮތެއްގެމަތިން، އެ ބޭންކަކުން އޮތޯރިޓީއަށް ހުށަހަޅަންވާނެއެވެ. 

 

 

ހަވަނަ ބާބު

ގާނޫނާ ހިލާފުވާ ފަރާތްތަކުގެ މައްސަލަ ބެލުމާއި ފިޔަވަޅު އެޅުން

 

14 ވަނަ މާއްދާ - ގާނޫނާ ހިލާފުވާ ފަރާތްތަކުގެ މައްސަލަ ބެލުމުގެ ބާރު

(ހ) މި ގާނޫނާއި މި ގާނޫނުގެ ދަށުން ހަދާ ގަވާއިދުތަކާ ހިލާފުވެފައިވާކަމަށް ބެލެވޭ ފަރާތްތަކުގެ މައްސަލަތަކާއި، މި ގާނޫނުގައި ކުރަންޖެހޭ ކަންކަން ކުރުމުގައި ހިސާބުތަކާއި މައުލޫމާތުތައް އޮޅުވާލާފައިވާކަމަށް ބެލެވޭ ފަރާތްތަކުގެ މައްސަލަތަކާއި، މި ގާނޫނުގެ ދަށުން އޮތޯރިޓީން އަންގާ އެންގުންތަކާ ހިލާފުވާ ފަރާތްތަކުގެ މައްސަލަތައް ބަލައި ފިޔަވަޅު އެޅުމުގެ ބާރު އޮތޯރިޓީއަށް ލިބިގެންވެއެވެ.

(ށ) މި މާއްދާގެ (ހ) ގައި ބަޔާންކޮށްފައިވާ ގޮތުގެމަތިން އޮތޯރިޓީން ބަލާ މައްސަލަތައް ބެލުމުގައި، އޮތޯރިޓީއަށް ލިބިދޭ ބާރުތަކާއި މައްސަލަ ބެލުމުގައި އަމަލުކުރާނެ އުސޫލުތައް މި ގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެއެވެ.

 

15 ވަނަ މާއްދާ - ގާނޫނާ ހިލާފުވާ ފަރާތްތަކާމެދު ފިޔަވަޅު އެޅުން

(ހ) މި ގާނޫނުގެ 7 ވަނަ މާއްދާގައި ބަޔާންކޮށްފައިވާ ގޮތުގެމަތިން ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ބޭރު ފައިސާ ޓްރާންސްފަރ ނުވަތަ ޖަމާނުކުރާ ފަރާތްތަކާއި، ކަނޑައެޅިފައިވާ އަދަދަށް ޖަމާނުކުރާ ފަރާތްތައް، އެފަރާތަކުން އެ މަހަކަށް ޖަމާކުރަންޖެހޭ ބޭރު ފައިސާގެ %0.25 (ސުމެއް ޕޮއިންޓް ދޭއް ފަހެއް އިންސައްތަ) އަށްވުރެ އިތުރުނުވާ އަދަދަކުން ޖޫރިމަނާކުރުމުގެ ބާރު އޮތޯރިޓީއަށް ލިބިގެންވެއެވެ. އަދ،ި އެފަދައިން ޖޫރިމަނާކުރުމުގައި، އޮތޯރިޓީއަށް ފެނިއްޖެ ހިނދެއްގައި، އެފަރާތަކުން ވެފައިވާ ހިލާފު ރަނގަޅުކުރަންދެން ނުވަތަ އަމަލުކުރަންޖެހޭ ކަންތައްތަކަށް އަމަލުކުރަންދެން ހިނގާ ކޮންމެ ދުވަހެއްގެ މައްޗަށް، އެ މަހަކަށް ަމާކުރަންޖެހޭ ބޭރު ފައިސާގެ %0.25 (ސުމެއް ޕޮއިންޓް ދޭއް ފަހެއް އިންސައްތަ) އަށްވުރެ އިތުރުނުވާނެ އަދަދަކުން އެފަރާތެއް ޖޫރިމަނާކުރުމަށް އޮތޯރިޓީއަށް ކަނޑައެޅިދާނެއެވެ

(ށ) މި ގާނޫނުގެ 10 ވަނަ މާއްދާގައި ބަޔާންކޮށްފައިވާ ގޮތުގެމަތިން، ބޭރު ފައިސާ ރުފިޔާއަށް މާރުނުކުރާ ފަރާތްތަކާއި، ކަނޑައެޅިފައިވާ އަދަދަށް މާރުނުކުރާ ފަރާތްތައް، އެފަރާތަކުން އެ މަހަކަށް މާރުކުރަންޖެހޭ ބޭރު ފައިސާގެ %0.5 (ސުމެއް ޕޮއިންޓް ފަހެއް އިންސައްތަ) އަށްވުރެ އިތުރުނުވާ އަދަދަކުން އެފަރާތެއް ޖޫރިމަނާކުރުމުގެ ބާރު އޮތޯރިޓީއަށް ލިބިގެންވެއެވެ. އަދ،ި ޖޫރިމަނާކުރުމުގައި، އޮތޯރިޓީއަށް ފެނިއްޖެ ހިނދެއްގައި، އެފަރާތަކުން ވެފައިވާ ހިލާފު ރަނގަޅުކުރަންދެން ނުވަތަ އަމަލުކުރަންޖެހޭ ކަންތައްތަކަށް އަމަލުކުރަންދެން ހިނގާ ކޮންމެ ދުވަހެއްގެ މައްޗަށް، އެ މަހަކަށް މާރުކުރަންޖެހޭ ބޭރު ފައިސާގެ %0.5 (ސުމެއް ޕޮއިންޓް ފަހެއް އިންސައްތަ) އަށްވުރެ އިތުރުނުވާނެ އަދަދަކުން އެފަރާތެއް ޖޫރިމަނާކުރުމަށް އޮތޯރިޓީއަށް ކަނޑައެޅިދާނެއެވެ.

(ނ) މި މާއްދާގެ (ހ) އާއި (ށ) ގައި ބަޔާންކޮށްފައިވާ ކަންކަން ފިޔަވައި، މި ގާނޫނާއި މި ގާނޫނުގެ ދަށުން ހަދާ ގަވާއިދަކާ ނުވަތަ މި ގާނޫނާއި މި ގާނޫނުގެ ދަށުން ހަދާ ގަވާއިދެއްގެ ދަށުން އޮތޯރިޓީން އަންގާ އެންގުމަކާ ހިލާފުވާ ފަރާތްތައް، އެފަރާތަކުން ކުރި ކަމެއްގެ ކުޑަބޮޑު މިނަށް ބަލައި، 10,000 (ދިހަހާސް) ރުފިޔާއާއި 1,000,000 (އެއް މިލިއަން) ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރު އޮތޯރިޓީއަށް ލިބިގެންވެއެވެ.

(ރ) މި މާއްދާގެ (ހ) އަދި (ށ) ގެ ދަށުން ޖޫރިމަނާކުރުމުގައި، ބޭރު ައިސާއިން ޖޫރިމަނާކުރުމުގެ އިހްތިޔާރު އޮތޯރިޓީއަށް ލިބިގެންވެއެވެ.

 

16 ވަނަ މާއްދާ - ޖޫރިމަނާ ނުދައްކާ ފަރާތްތަކުގެ ހުއްދަތައް ވަކި މުއްދަތަކަށް ހިފެހެއްޓުން

މި ގާނޫނުގެ ދަށުން އޮތޯރިޓީން ޖޫރިމަނާކުރުމަށް ކަނޑައަޅައި، ޖޫރިމަނާ ދެއްކުމަށް އަންގާފައިވާ ފަރާތަކުން، އެ ޖޫރިމަނާ ދެއްކުމަށް އޮތޯރިޓީން އެންގި ތާރީހުން ފެށިގެން 90 (ނުވަދިހަ) ދުވަހުގެ ތެރޭގައި އެ ޖޫރިމަނާ ދައްކާފައިނުވާނަމަ، އެފަރާތަކަށް ދައުލަތުގެ އިދާރާތަކުން ދޫކޮށްފައިވާ ވިޔަފާރީ ގެ ހުއްދަތައް، މި ގާނޫނުގެ ދަށުން ހަދާ ގަވާއިދުގައި ކަނޑައަޅާފައިވާ ގޮތެއްގެމަތިން، ވަކި މުއްދަތަކަށް ހިފެހެއްޓުމަށް ކަމާބެހޭ ދައުލަތުގެ އިދާރާއަކަށް އެންގުމުގެ ބާރު އޮތޯރިޓީއަށް ލިބިގެންވެއެވެ.

 

17 ވަނަ މާއްދާ - ޖޫރިމަނާގެ ފައިސާ ހޯދުން 

(ހ) މި ގާނޫނުގެ ދަށުން އޮތޯރިޓީން ޖޫރިމަނާކުރުމަށް ކަނޑައަޅައި، ޖޫރިމަނާ ދެއްކުމަށް އަންގާފައިވާ ފަރާތަކުން، އެ ޖޫރިމަނާ ނުދެއްކުމުގެ ސަބަބުން މި ގާނޫނުގެ 16 ވަނަ މާއްދާގައި ބަޔާންކޮށްފައިވާ ގޮތުގެމަތިން އެފަރާތަކާމެދު ފިޔަވަޅު އެޅުމުގެ އިތުރުން، ޖޫރިމަނާގެ ފައިސާ ހޯދުމުގެ މައްސަލަ ށަރީއަތަށް ހުށަހަޅައިގެން، އެ ފައިސާ ހޯދުމުގެ ބާރު އޮތޯރިޓީއަށް ލިބިގެންވެއެވެ.

(ށ) މި މާއްދާގެ (ހ) ގައި ބަޔާންކުރާ ގޮތުގެމަތިން، ޖޫރިމަނާ ފައިސާ ދައްކަންޖެހޭ ފަރާތުގެ މައްސަލަ ށަރީއަތަށް ހުށަހެޅުމުގެ ކުރިން، މި ގާނޫނުގެ ދަށުން އޮތޯރިޓީން ހަދާ ގަވާއިދުގައި ބަޔާންކުރާ ގޮތެއްގެމަތިން، އެފަރާތަކުން ދައްކަންޖެހޭ ޖޫރިމަނާގެ ފައިސާ ދެއްކުމަށް ލުއި ގޮތްތަކެއް ހަމަޖައްސައިދިނުމުގެ ބާރު އޮތޯރިޓީއަށް ލިބިގެންވެއެވެ. 

(ނ) މި މާއްދާގެ (ހ) ގެ ދަށުން ށަރީއަތަށް ހުށަހެޅޭ މައްސަލައެއް، އެ މައްސަލައެއް ހުށަހެޅޭތާ ގިނަވެގެން 180 (ސަތޭކަ އަށްޑިހަ) ދުވަހުގެ ތެރޭގައި ބަލައި، އެ މައްސަލައާމެދު ށަރީއަތުން ގޮތެއް ކަނޑައަޅަންވާނެއެވެ.

 

 

ހަތްވަނަ ބާބު

އެހެނިހެން

 

18 ވަނަ މާއްދާ - އޮތޯރިޓީގައި ރަޖިސްޓަރީކުރުން 

(ހ)  މި ގާނޫނަށް އަމަލުކުރަން ފަށާއިރު ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތްދޭ ފަރާތްތަކުން، މި ގާނޫނަށް އަމަލުކުރަން ފަށާތާ 10 (ދިހައެއް) ދުވަހުގެ ތެރޭގައި އޮތޯރިޓީގައި ރަޖިސްޓަރީކުރުމަށް އޮތޯރިޓީއަށް ހުށަހަޅަންވާނެއެވެ.

(ށ) މި ގާނޫނަށް އަމަލުކުރަން ފަށާއިރު، ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގެ ދަށުން، އެ ގަވާއިދުގެ ބޭނުމަށް އޮތޯރިޓީގައި ރަޖިސްޓަރީކޮށްފައިވާ ފަރާތްތައް ބެލެވޭނީ، މި މާއްދާގެ (ހ) ގެ ދަށުން ރަޖިސްޓަރީކޮށްފައިވާ ފަރާތްތަކުގެ ގޮތުގައެވެ. 

(ނ) މި ގާނޫނަށް އަމަލުކުރަން ފަށާއިރު، މި ގާނޫނުގެ 7 ވަނަ މާއްދާގެ (ހ) ގެ (2) ވަނަ ނަންބަރުގައި ބަޔާންކޮށްފައިވާ ށަރުތުތައް ފުރިހަމަވާ ފަރާތްތަކުން، މި ގާނޫނަށް އަމަލުކުރަން ފަށާ ތާރީހުން ފެށިގެން 30 (ތިރީސް) ދުވަހުގެ ތެރޭގައި، އޮތޯރިޓީގައި ރަޖިސްޓަރީކުރުމަށް ހުށަހަޅަންވާނެއެވެ.

(ރ) މި ގާނޫނަށް އަމަލުކުރަން ފަށާ ތާރީހުގެ ފަހުން، ޓޫރިޒަމް ދާއިރާގެ މުދަލެއް ނުވަތަ ހިދުމަތެއް ފޯރުކޮށްދޭން ފަށާ ފަރާތްތަކުން، އެ ވިޔަފާރި ފަށާ ދުވަހުން ފެށިގެން 30 (ތިރީސް) ދުވަހުގެ ތެރޭގައި އޮތޯރިޓީގައި ރަޖިސްޓަރީކުރުމަށް ހުށަހަޅަންވާނެއެވެ.

(ބ) މި ގާނޫނަށް އަމަލުކުރަން ފަށާ ތާރީހުގެ ފަހުން، ޓޫރިޒަމް ދާއިރާގެ މުދަލެއް ނުވަތަ ހިދުމަތެއް ފޯރުކޮށްދޭ ފަރާތްތަކާއި މާލީ އިދާރާތައް ފިޔަވައި، އެހެން ވިޔަފާރިއެއް ކުރަން ފަށާ ފަރާތްތަކުގެ ތެރެއިން، އެފަރާތަކުން ވިއްކި މުދަލާއި ފޯރުކޮށްދިން ހިދުމަތްތަކަށް، މީލާދީ އަހަރެއް ނިމޭއިރު، 15,000,000.00 (ފަނަރަ މިލިއަން) އެމެރިކާ ޑޮލަރާ އެއްވަރަށް ނުވަތަ އެއަށްވުރެ އިތުރަށް، ބޭރު ފައިސާ ލިބިފައިވާ ފަރާތްތައް، އެ މީލާދީ އަހަރަކާ ވިދިގެން އަންނަ އަހަރުގެ ޖަނަވަރީ މަސް ނިމުމުގެ ކުރިން، އޮތޯރިޓީގައި ރަޖިސްޓަރީކުރުމަށް ހުށަހަޅަންވާނެއެވެ.

(ޅ) މި މާއްދާގެ ދަށުން ރަޖިސްޓަރީކުރުމަށްޓަކައި ހުށަހަޅަންޖެހޭ މައުލޫމާތާއި ލިޔެކިޔުމާއި، ރަޖިސްޓަރީވުމަށް އެދި ހުށަހެޅުމުގައާއި ރަޖިސްޓަރީކުރުމުގައި އަމަލުކުރަންޖެހޭ އުސޫލުތަކާއި އިޖުރާއަތު މި ގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެއެވެ.

 

19 ވަނަ މާއްދާ - މައުލޫމާތު ހުށަހެޅުމާއި ރިކޯޑު ބެލެހެއްޓުން

(ހ) މި ގާނޫނަށް ނުވަތަ މި ގާނޫނުގެ ދަށުން ހަދާ ގަވާއިދުތަކުގެ ދަށުން އޮތޯރިޓީއަށް ބޭނުންވާ މައުލޫމާތުތައް ހޯދުމަށްޓަކައި، މި ގާނޫނަށް އަމަލުކުރަންޖެހޭ ފަރާތްތަކުން އޮތޯރިޓީން އަންގާ ގޮތެއްގެމަތިން އަދި އޮތޯރިޓީން އަންގާ ތަފްސީލުތަކާއެކު، އޮތޯރިޓީން އަންގާ މައުލޫމާތާއި ލިޔެކިޔުންތަކާއި ރިޕޯޓުތައް އޮތޯރިޓީއަށް ހުށަހަޅަންވާނެއެވެ.

(ށ) މި ގާނޫނަށް އަމަލުކުރަންޖެހޭ ފަރާތްތަކުން އޮތޯރިޓީން ކަނޑައަޅާ މައުލޫމާތާއި ހިސާބުތައް، އޮތޯރިޓީން ކަނޑައަޅާ މުއްދަތަކަށް ބަހައްޓަންވާނެއެވެ. 

(ނ)  މި މާއްދާގެ (ށ) ގެ ބޭނުމަށްޓަކައި، އިލެކްޓްރޯނިކްކޮށް ރިކޯޑުތައް ބެހެއްޓުމަކަށް މި މާއްދާ ހުރަހެއް ނާޅައެވެ.

 

20 ވަނަ މާއްދާ - އޮތޯރިޓީގެ މަސްއޫލިއްޔަތުތަކާއި ބާރުތައް

(ހ) މި ގާނޫނު ހިންގައި ތަންފީޒުކުރާނީ އޮތޯރިޓީންނެވެ.

(ށ) މި ގާނޫނު ތަންފީޒުކުރުމުގައި އަންނަނިވި ކަންކަން ކުރުމުގެ ބާރު އޮތޯރިޓީއަށް ލިބިގެންވެއެވެ.

1. ދިވެހިރާއްޖޭގެ ބޭރު ފައިސާގެ ބާޒާރު އެކަށީގެންވާ ގޮތަށް ތަރައްގީކޮށް ދެމެހެއްޓުމަށް ބޭނުންވާ ސިޔާސަތުތައް އެކަށައެޅުމާއި ތަންފީޒުކުރުން؛
2. މި ގާނޫނު ތަންފީޒުކޮށް ހިންގުމަށްޓަކައި ގަވާއިދުތަކާއި ސަރކިއުލަރތަކާއި އުސޫލުތަކާއި އިރުށާދުތަކާއި އެންގުންތަކާއި އިޖުރާއަތުތަކާއި ގައިޑްލައިންތައް އެކަށައެޅުން، އަދި އެއަށް އަމަލުކުރޭތޯ ބެލުން؛
3. ބޭންކު އެކައުންޓުން ކުރެވޭ މުއާމަލާތްތައް ހިމެނޭގޮތުން، ދިވެހިރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައެޅުން؛ އަދި
4. މި ގާނޫނުގެ މަގްސަދުތައް ހާސިލުކުރުމަށް ނުވަތަ މި ގާނޫނު ހިންގައި ތަންފީޒުކުރުމަށް ކުރަންޖެހޭ މިނޫންވެސް އެންމެހައި ކަންކަން ކުރުނ.ް

 

21 ވަނަ މާއްދާ - ސިއްރު ހިފެހެއްޓުން

ގާނޫނީ ގޮތުން ށަރުއީ ކޯޓަކަށް ބޭނުންވެއްޖެ ހިނދެއްގައި މެނުވީ، ނުވަތަ އެމީހަކު އަދާކުރާ އޮތޯރިޓީގެ ޒިންމާތަކުގެ ނުވަތަ މަސައްކަތުގެ ވާޖިބުތައް އަދާކުރުމުގެ ގޮތުން މެނުވީ، އޮތޯރިޓީގެ ބޯޑުގެ އެއްވެސް މެންބަރަކު ނުވަތަ ބޯޑުގެ މެންބަރުކަން ކުރި އެއްވެސް މީހަކު ނުވަތަ އޮތޯރިޓީގައި މަސައްކަތްކުރަމުންދާ ނުވަތަ މަސައްކަތްކުރި އެއްވެސް މުވައްޒަފަކު ނުވަތަ އޭޖެންޓެއް ނުވަތަ ކޮންސަލްޓަންޓެއް، މި ގާނޫނުގެ ދަށުން އޮތޯރިޓީއަށް ލިބޭ އެއްވެސް ފަރާތެއްގެ މައުލޫމާތެއް އެހެން އެއްވެސް ފަރާތަކަށް ހާމަކޮށްގެންނުވާނެއެވެ.

 

22 ވަނަ މާއްދާ - އިންތިގާލީ އިންތިޒާމްތައް

(ހ) ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގެ 7 ވަނަ މާއްދާގެ (ހ) ގެ ދަށުން ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން އެފަރާތްތަކަށް 2024 ވަނަ އަހަރުގެ އޮކްޓޫބަރު މަހާއި ނޮވެންބަރު މަހާއި ޑިސެންބަރު މަހު ލިބިފައިވާ ބޭރު ފައިސާގެ ޖުމްލަ (ރިއަލައިޒްޑް ސޭލްސް ޕްރޮސީޑްސް)، އެ ގަވާއިދުގައި ބަޔާންކޮށްފައިވާ ގޮތަށް ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފަރ ނުވަތަ ޖަމާކުރަންވާނެއެވެ. 

(ށ) ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގައި ބަޔާންކުރާ ކެޓެގަރީ- އޭ ޓޫރިޒަމް އެސްޓެބްލިށްމަންޓަކަށް 2024 ވަނަ އަހަރުގެ އޮކްޓޫބަރު މަހާއި ނޮވެންބަރު މަހާއި ޑިސެންބަރު މަހު އައިސްފައިވާ ކޮންމެ ޓޫރިސްޓަކަށް، 500.00 (ފަސްސަތޭކަ) އެމެރިކާ ޑޮލަރުގެ ރޭޓުން އެ ގަވާއިދުގައި ބަޔާންކޮށްފައިވާ ގޮތުގެމަތިން، އެ އެސްޓެބްލިށްމަންޓެއް ހިންގާ ފަރާތުން، ބޭންކަކަށް، ރުފިޔާއަށް މާރުކުރަންވާނެއެވެ.

(ނ) ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގައި ބަޔާންކުރާ ކެޓެގަރީ-ބީ ޓޫރިޒަމް އެސްޓެބްލިށްމަންޓަކަށް 2024 ވަނަ އަހަރުގެ އޮކްޓޫބަރު މަހާއި ނޮވެންބަރު މަހާއި ޑިސެންބަރު މަހު އައިސްފައިވާ ކޮންމެ ޓޫރިސްޓަކަށް، 25 (ފަންސަވީސް) އެމެރިކާ ޑޮލަރުގެ ރޭޓުން، އެ ގަވާއިދުގައި ބަޔާންކޮށްފައިވާ ގޮތުގެމަތިން، އެ އެސްޓެބްލިށްމަންޓެއް ހިންގާ ފަރާތުން، ބޭންކަކަށް، ރުފިޔާއަށް މާރުކުރަންވާނެއެވެ.

(ރ) ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގައި ބޭރު ފައިސާ ޖަމާކުރުމާއި މާރުކުރުމާ ގުޅޭގޮތުން އޮތޯރިޓީއަށް ހުށަހެޅުމަށް ކަނޑައަޅާފައިވާ މައުލޫމާތު ހުށަހެޅުމާއި އެނޫންވެސް ކަންކަން، އެ ގަވާއިދުގައި ބަޔާންކޮށްފައިވާ ގޮތުގެމަތިން، މި މާއްދާގެ (ހ)، (ށ) އަދި (ނ) ގެ ދަށުން ހިނގާ ކަންކަން ފުރިހަމަވަންދެން ހިނގާނެއެވެ.

(ބ) މި ގާނޫނުގައި ބަޔާންކުރާ ވަކި ކަމެއް އިންތިޒާމުކޮށް ހިންގުމުގެ ގޮތުން، މި ގާނޫނުން އެކަމަކާގުޅޭ ގަވާއިދު ހަދައި އަމަލުކުރަން ފަށަންދެން، މި ގާނޫނަށް އަމަލުކުރަން ފެށުމުގެ ކުރިން، ކަމާބެހޭ އެހެން ގާނޫނެއްގެ ދަށުން އެކުލަވާލައި އަމަލުކުރަމުންދާ ގަވާއިދުތަކަށް، އެ ގަވާއިދުތައް މި ގާނޫނުގައި ބަޔާންކުރާ ކަމާގުޅޭ ހަމަތަކާއި އުސޫލުތަކާ ތައާރުޒުނުވާހާ ހިނދަކު، އަމަލުކުރުމަކަށް މި ގާނޫނު ހުރަހެއް ނާޅައެވެ.

 

23 ވަނަ މާއްދާ - އުވާލެވޭ ގާނޫނާއި ގަވާއިދު

(ހ) މި ގާނޫނަށް އަމަލުކުރަން ފެށުމާއެކު، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ 24 ވަނަ މާއްދާގެ (ރ) އަދި (ބ) އުވުނީއެވެ.

(ށ) މި ގާނޫނުގެ 22 ވަނަ މާއްދާގެ (ހ)، (ށ) އަދި (ނ) ގައި ކަނޑައަޅާފައިވާ ކަންކަން ފިޔަވައި، މި ގާނޫނަށް އަމަލުކުރަން ފެށުމާއެކު، ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) އުވުނީއެވެ.

 

24 ވަނަ މާއްދާ - ގަވާއިދު ހަދައި ހިންގުން

(ހ) މި ގާނޫނުގެ ދަށުން ހަދަންޖެހޭ ގަވާއިދުތައް ހަދައި ހިންގާނީ، އޮތޯރިޓީންނެވެ.

(ށ) މި ގާނޫނުގެ ދަށުން ހަދަންޖެހޭ ގަވާއިދުތައް، މި ގާނޫނަށް އަމަލުކުރަން ފަށާ ތާރީހުން ފެށިގެން 2 (ދޭއް) މަސްދުވަހުގެ ތެރޭގައި އޮތޯރިޓީން އެކުލަވާލައި، ދިވެހިސަރުކާރުގެ ގެޒެޓުގައި ށާއިއުކުރަންވާނެއެވެ.

 

25 ވަނަ މާއްދާ - ގާނޫނަށް އަމަލުކުރަން ފެށުން

މި ގާނޫނަށް އަމަލުކުރަން ފަށާނީ، 1 ޖަނަވަރީ 2025 ގައެވެ. 

 

26 ވަނަ މާއްދާ - މާނަކުރުން

މި ގާނޫނުގައި އިބާރާތެއް ނުވަތަ ލަފްޒެއް ބޭނުންކޮށްފައިވާ ގޮތުން ކަނޑައެޅިގެން އެހެން މާނައެއް ދޭހަނުވާހާ ހިނދަކު، އަންނަނިވި އިބާރާތްތަކާއި ލަފްޒުތަކަށް ދެވިފައިވަނީ، އެ އިބާރާތްތަކާއި ލަފްޒުތަކާ ގުޅިގެން، ތިރީގައި ދީފައިވާ މާނަކުރުމެވެ.

(ހ) "ރެމިޓެންސް ހިދުމަތްދޭ ފަރާތް" ކަމުގައި ބުނެފައި އެވަނީ، ގާނޫނު ނަންބަރު 2021-08 (ގައުމީ ޕޭމަންޓް ސިސްޓަމްގެ ގާނޫނު) ގެ ދަށުން ރެމިޓެންސް ހިދުމަތް ދިނުމަށް ލައިސަންސް ލިބިފައިވާ ފަރާތަކަށެވެ.

(ށ) "ބައިނަލްއަގްވާމީ މުއާމަލާތް" ކަމުގައި ބުނެފައި އެވަނީ، ރާއްޖެއިން ބޭރަށް ކުރެވޭ ނުވަތަ ބޭރުން ރާއްޖެއަށް ކުރެވޭ ބޭރު ފައިސާ ޓްރާންސްފަރކުރުމުގެ މުއާމަލާތަށެވެ.

(ނ) "ބޭންކު" ކަމުގައި ބުނެފައި އެވަނީ، ގާނޫނު ނަންބަރު 2010-24 (ދިވެހިރާއްޖޭގެ ބޭންކިންގއާބެހޭ ގާނޫނު) ގެ ދަށުން، އެ ގާނޫނުގައި ަޔާންކުރާ ބޭންކިންގ ވިޔަފާރިކުރުމަށް ނުވަތަ ބޭންކިންގ ހިދުމަތެއް ދިނުމަށް ނުވަތަ ބޭންކިންގ ހަރަކާތެއް ހިންގުމަށް، ލައިސަންސް ނުވަތަ ހުއްދަ ލިބިފައިވާ ކޮންމެ ފަރާތަކަށެވެ.

(ރ) "ބޭރު ފައިސާ" ކަމުގައި ބުނެފައި އެވަނީ، ދިވެހިރާއްޖެ ނޫން އެހެން ކޮންމެ ގައުމެއްގެ ފައިސާއަށެވެ.

(ބ) "އިންށުއަރެންސް ކުންފުނި" ކަމުގައި ބުނެފައި އެވަނީ، ދިވެހިރާއްޖޭގައި އިންށުއަރެންސް ވިޔަފާރިކުރުމަށް އޮތޯރިޓީން ދޫކުރާ ލައިސަންސް ލިބިފައިވާ ކުންފުންޏަކަށެވެ.

(ޅ) "އޮތޯރިޓީ" ކަމުގައި ބުނެފައި އެވަނީ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ ދަށުން އުފައްދާފައިވާ މޯލްޑިވްސް މަނިޓަރީ އޮތޯރިޓީއަށެވެ. 

(ކ) "ފައިނޭންސިންގ ކުންފުނި" ކަމުގައި ބުނެފައި އެވަނީ ދިވެހިރާއްޖޭގައި ފައިނޭންސިންގ ވިޔަފާރިކުރުމަށް އޮތޯރިޓީން ދޫކުރާ ލައިސަންސް ލިބިފައިވާ ކުންފުންޏަކަށެވެ.

(އ) "ފަރާތެއް" ކަމުގައި ބުނެފައި އެވަނީ، ތަބީއީ ށަހްސާއި ގާނޫނީ ށަހްސު ހިމެނޭގޮތަށެވެ.

(ވ) "މީރާ" ކަމުގައި ބުނެފައި އެވަނީ، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރީ ގާނޫނު) ގެ ދަށުން އުފައްދާފައިވާ މޯލްޑިވްސް އިންލަންޑް ރެވެނިއު އޮތޯރިޓީއަށެވެ.

(މ) "މާލީ އިދާރާ" ކަމުގައި ބުނެފައި އެވަނީ، މޯލްޑިވްސް މަނިޓަރީ އޮތޯރިޓީ ނުވަތަ ކެޕިޓަލް މާރކެޓް ޑިވެލޮޕްމަންޓް އޮތޯރިޓީން ދޫކުރާ ލައިސަންސް ލިބިފައިވާ ފަރާތަކަށެވެ.

(ފ) "ކެޕިޓަލް މާރކެޓް ޑިވެލޮޕްމަންޓް އޮތޯރިޓީ" ކަމުގައި ބުނެފައި އެވަނީ، ގާނޫނު ނަންބަރު 2006-02 (ދިވެހިރާއްޖޭގެ މާލީ ސެކިއުރިޓީޒްއާބެހޭ ގާނޫނު) ގެ ދަށުން އުފައްދާފައިވާ ކެޕިޓަލް މާރކެޓް ޑިވެލޮޕްމަންޓް އޮތޯރިޓީއަށެވެ.

(ދ) "ޓޫރިޒަމް ދާއިރާގެ މުދަލާއި ހިދުމަތް" ކަމުގައި ބުނެފައި އެވަނީ، ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) ގައި ޓޫރިޒަމް ދާއިރާގެ މުދަލާއި ހިދުމަތުގެ ގޮތުގައި ބަޔާންކޮށްފައިވާ މުދަލާއި ހިދުމަތްތަކަށެވެ.

(ތ) "ޓޫރިސްޓުން" ކަމުގައި ބުނެފައި އެވަނީ، ދިވެހިރާއްޖެއަށް އަންނ،ަ ޓޫރިސްޓް ވިސާ އޮތް، ބިދޭސީންނަށެވެ.

(ލ) "ބޭރު ފައިސާއިން އާމްދަނީ ލިބޭ ވިޔަފާރިއެއް" ކަމުގައި ބުނެފައި ެވަނީ، އެ ވިޔަފާރިއަކަށް ބޭރު ފައިސާއިން އާމްދަނީ ލިބޭ ކޮންމެ ވިޔަފާރިއަކަށެވެ. މިގޮތުން، އާމްދަނީގެ ވަކި މިންވަރެއް ބޭރު ފައިސާއިން ލިބުން ލާޒިމެއް ނޫނެވެ. އާމްދަނީގެ ގޮތުގައި އެއްވެސް މިންވަރެއް ބޭރު ފައިސާއިން ލިބުނު ކަމުގައިވީ ނަމަވެސް، ބޭރު ފައިސާއިން އާމްދަނީ ލިބޭ ވިޔަފާރިއެއް ކަމަށް ބެލެވޭނެއެވެ.

(ގ) "ދައުލަތުގެ އިދާރާ" ކަމަށް ބުނެފައި އެވަނީ، ވެރިކަން ހިންގުމުގެ ބާރުގެ ދަށުން ހިނގާ އެންމެހައި އިދާރާތަކާއި އޮފީސްތަކާއި، ގާނޫނު ހެދުމުގެ ބާރުގެ ދަށުން ހިނގާ އެންމެހައި އިދާރާތަކާއި އޮފީސްތަކާއި، ގާނޫނުއަސާސީއާއި ގާނޫނުގެ ދަށުން އުފެދިފައިވާ އެންމެހައި މުސްތަގިއްލު ކޮމިށަންތަކާއި މުސްތަގިއްލު މަގާމުތަކުގެ އޮފީސްތަކާއި އެ ތަންތަނުގެ ދަށުން ހިނގާ އެންމެހައި އިދާރާތަކާއި އޮފީސްތަކާއި، އަދުލު އިންސާފު ގާއިމްކުރުމުގެ ބާރުގެ ދަށުން ހިނގާ އެންމެހައި އިދާރާތަކާއި އޮފީސްތަކާއި ތަންތަނަށެވެ.

 

އުވުނު ގާނޫނާއި ގަވާއިދު

1. ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ 24 ވަނަ މާއްދާގެ (ރ) އަދި (ބ)
2. ބޭރު ފައިސާއާބެހޭ ގަވާއިދު (ގަވާއިދު ނަންބަރު 2024-91)