(މި ގަވާއިދަށް އަމަލުކުރަން ފެށީ 9 ޖަނަވަރީ 2025 ގައި)

 

ފުރަތަމަ ބާބު

ފެށުން

 

1 ވަނަ މާއްދާ - ތައާރުފާއި ނަން

(ހ) މިއީ،ގާނޫނު ނަންބަރު 2024-32 (ބޭރު ފައިސާއާބެހޭ ގާނޫނު) ގެ ދަށުން އޮތޯރިޓީގައި ރަޖިސްޓަރީކުރަންޖެހޭ ފަރާތްތަކުން، އޮތޯރިޓީގައި ރަޖިސްޓަރީވުމުގައި އަމަލުކުރަންޖެހޭ އުސޫލުތަކާއި އިޖުރާއަތު ކަނޑައެޅުމުގެ ގަވާއިދެވެ.

(ށ) މި ގަވާއިދު އެކުލަވައިލައިފައިވަނީ، ބޭރު ފައިސާއާބެހޭ ގާނޫނުގެ 18 ވަނަ މާއްދާގެ (ޅ) އާއި 24 ވަނަ މާއްދާގެ (ހ) ގެ ދަށުންނެވެ.

(ނ) މި ގަވާއިދަށް ކިޔާނީ، "ބޭރު ފައިސާއާބެހޭ ގާނޫނުގެ ދަށުން ރަޖިސްޓަރީކުރުމުގެ ގަވާއިދު" އެވެ.

 

 

ދެވަނަ ބާބު

ރަޖިސްޓަރީކުރުން

 

2 ވަނަ މާއްދާ - އޮތޯރިޓީގައި ރަޖިސްޓަރީކުރަންޖެހޭ ފަރާތްތައް 

ބޭރު ފައިސާއާބެހޭ ގާނޫނުގެ ދަށުން، އަންނަނިވި ފަރާތް ތަކުން، މި ގަވާއިދުގައި ބަޔާންކޮށްފައިވާ ގޮތުގެ މަތީން ރަޖިސްޓަރީކުރަން އޮތޯރިޓީއަށް ހުށަހަޅަންވާނެއެވެ. 

(ހ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތައް.

(ށ) މި މާއްދާގެ (ހ) ގައި ބަޔާންކޮށްފައިވާ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް، ފާއިތުވި މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15,000,000.00 (ފަނަރަ މިލިޔަން) އެމެރިކާ ޑޮލަރަށް ނިސްބަތްވާ އަދަދެއް ލިބޭ ފަރާތްތައް.

 

3 ވަނަ މާއްދާ - ރަޖިސްޓަރީކުރުމަށް އެދި ހުށަހަޅަންޖެހޭ މުއްދަތު

މި ގަވާއިދުގެ 2 ވަނަ މާއްދާގައި ބަޔާންކޮށްފައިވާ ފަރާތްތަކުން، ތިރީގައިވާ މުއްދަތުތަކުގެ ތެރޭގައި ރަޖިސްޓަރީކުރުމަށް އެދި އޮތޯރިޓީއަށް ހުށަހަޅަންވާނެއެވެ.

(ހ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ތެރެއިން، ގަވާއިދު ނަންބަރު 2024-91 (ބޭރު ފައިސާއާބެހޭ ގަވާއިދު) ގެ ދަށުން އޮތޯރިޓީގައި ރަޖިސްޓަރީކޮށްފައިނުވާ ފަރާތްތަކުން، 13 ޖަނަވަރީ 2025 ވަނަ ތާރީހުގެ ކުރިން ރަޖިސްޓަރީކުރުމަށް އެދި އޮތޯރިޓީއަށް ހުށަހަޅަންވާނެއެވެ.

(ށ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް، 2024 ވަނަ އަހަރުގެ ތެރޭގައި ބޭރު ފައިސާއިން މަދުވެގެން 15,000,000.00 (ފަނަރަ މިލިޔަން) އެމެރިކާ ޑޮލަރަށް ނިސް ބަތްވާ އަދަދެއް ލިބިފައިވާ ނަމަ، އެ ފަރާތަކުން، 3 ފެބުރުވަރީ 2025 ވަނަ ތާރީހުގެ ކުރިން ރަޖިސްޓަރީކުރުމަށް އެދި އޮތޯރިޓީއަށް ހުށަހަޅަންވާނެއެވެ.

(ނ) 1 ޖަނަވަރީ 2025 ވަނަ ތާރީހުގެ ފަހުން، ޓޫރިޒަމް ދާއިރާގެ މުދަލެއް ނުވަތަ ހިދުމަތެއް ފޯރުކޮށްދޭން ފަށާ ފަރާތްތަކުން، އެ ވިޔަފާރި ފަށާ ދުވަހުން ފެށިގެން 30 (ތިރީސް) ދުވަހުގެ ތެރޭގައި، އޮތޯރިޓީގައި ރަޖިސްޓަރީކުރުމަށް އެދި ހުށަހަޅަންވާނެއެވެ. 

(ރ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ ހިދުމަތަށް، 1 ޖަނަވަރީ 2025 ވަނަ ތާރީހުގެ ފަހުން އެ ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ހިދުމަތަށް، މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15,000,000.00 (ފަނަރަ މިލިޔަން) އެމެރިކާ ޑޮލަރަށް ނިސްބަތްވާ އަދަދެއް ލިބިފައިވާ ނަމަ، އެ މީލާދީ އަހަރަކާ ވިދިގެން އަންނަ އަހަރުގެ ޖަނަވަރީ މަސް ނިމުމުގެ ކުރިން، އެ ފަރާތެއް އޮތޯރިޓީގައި ރަޖިސްޓަރީކުރުމަށް އެދި ހުށަހަޅަންވާނެއެވެ.

(ބ) މި މާއްދާގެ (ނ) ގެ ބޭނުމަށް ޓަކައި ވިޔަފާރިއެއް ފަށާ ދުވަސް ކަމުގައި ބަލާނީ، ކަމާބެހޭ ދައުލަތުގެ އިދާރާއަކުން އެ ވިޔަފާރިއަކަށް އޮޕަރޭޓިންގ ލައިސަންސް ނުވަތަ ހުއްދަ ދޫކުރާ ތާރީހު ނުވަތަ އެއީ،އޮޕަރޭޓިންގ ލައިސަންސެއް ބޭނުންނުވި ނަމަވެސް، ވިޔަފާރި ފަރަކާތެއް ރަޖިސްޓަރީކޮށްގެން ހިންގަންޖެހޭ ފަދަ ވިޔަފާރިއެއް ނަމަ، އެ ވިޔަފާރި ފަރަކާތެއް ގާނޫނާ އެއްގޮތްވާ ގޮތުގެ މަތީން ރަޖިސްޓަރީކުރާ ތާރީހެވެ.

 

4 ވަނަ މާއްދާ - ރަޖިސްޓަރީކުރަން ހުށަހެޅުން

(ހ) މި ގަވާއިދުގެ 2 ވަނަ މާއްދާގައި ބަޔާންކޮށްފައިވާ ފަރާތްތަކުން، އޮތޯރިޓީގައި ރަޖިސްޓަރީކުރަން އެދި ހުށަހަޅާނީ، އޮތޯރިޓީގެ ވެބްސައިޓުގައިވާ "މޯލްޑިވްސް މަނިޓަރީ އޮތޯރިޓީގެ ފޮރިން އެކްސްޗޭންޖު ރަޖިސްޓްރޭށަން ޕޯޓަލް" ބޭނުންކޮށްގެންނެވެ.

(ށ) މި ގަވާއިދުގެ 2 ވަނަ މާއްދާގެ (ހ) ގައި ބަޔާންކޮށްފައިވާ ފަރާތްތަކުން ރަޖިސްޓަރީކުރަން ހުށަހަޅާއިރު، ތިރީގައިވާ މައުލޫމާތު ފޯރުކޮށްދޭންވާނެއެވެ.

1. ވިޔަފާރި ތަނުގެ ނަން؛
2. ވިޔަފާރި ރަޖިސްޓްރޭށަން ނަންބަރު؛
3. އެ ތަނެއްގެ ވިޔަފާރި ނަން؛
4. ޓެކްސްޕޭޔަރ އައިޑެންޓިފިކޭށަން ނަންބަރު (ޓިން)؛
5. އެ ވިޔަފާރިއެއް ހިންގަމުންދާ ރަށާއި އަތޮޅު؛
6. އެ ވިޔަފާރިއަކީ ސަބްސިޑިއަރީ ކުންފުންޏެއް ނަމަ، ޕޭރަންޓު ކުންފުނީގެ ނަމާއި ވިޔަފާރި ރަޖިސްޓްރޭށަން ނަންބަރު؛
7. އެ ތަނަކަށް އޮޕަރޭޓިންގ ލައިސަންސެއް ދޫކޮށްފައިވާ ނަމަ، އެ ލައިސަންސްގެ ނަންބަރު؛
8. ބެޑް ކެޕޭސިޓީ؛
9. ޓޫރިޒަމް ދާއިރާގެ ވިޔަފާރީގެ ބާވަތް؛
10. ގްރީން ޓެކްސް ދައްކަންޖެހޭ ފަރާތެއް ނަމަ، އެ ކަމާ ގުޅޭ މައުލޫމާތު؛
11. އޮތޯރިޓީން ކަނޑައަޅާ އެނޫންވެސް މައުލޫމާތު.

 (ނ) މި ގަވާއިދުގެ 2 ވަނަ މާއްދާގެ (ށ) ގައި ބަޔާންކޮށްފައިވާ ފަރާތްތަކުން ރަޖިސްޓަރީކުރަން ހުށަހަޅާއިރު، ތިރީގައިވާ މައުލޫމާތު ފޯރުކޮށްދޭންވާނެއެވެ.

1. ވިޔަފާރި ތަނުގެ ނަން؛
2. ވިޔަފާރި ރަޖިސްޓްރޭށަން ނަންބަރު؛
3. އެ ތަނެއްގެ ވިޔަފާރި ނަން؛
4. ޓެކްސްޕޭޔަރ އައިޑެންޓިފިކޭށަން ނަންބަރު (ޓިން)؛
5. ވިޔަފާރި ތަނުގެ ބާވަތް؛
6. ވިޔަފާރީގެ ދާއިރާ؛
7. އެ ވިޔަފާރިއެއް ހިންގަމުންދާ ރަށާއި އަތޮޅު؛
8. އެ ވިޔަފާރިއަކީ ސަބްސިޑިއަރީ ކުންފުންޏެއް ނަމަ، ޕޭރަންޓު ކުންފުނީގެ ނަން؛
9. އޮތޯރިޓީން ކަނޑައަޅާ އެނޫންވެސް މައުލޫމާތު. 

(ރ) ރަޖިސްޓަރީކުރުމަށް އެދި ހުށަހަޅާ ކޮންމެ ހުށަހެޅުމަކާއެކު ވެސްއެ ހުށަހެޅުމެއްގައިވާ މައުލޫމާތުގެ ތެދުކަން ކަށަވަރުކޮށް، އޮތޯރިޓީން ކަނޑައަޅާ ނަމޫނާއަކާ އެއްގޮތަށް ތެދުކަން ކަށަވަރުކުރާ ބަޔާނެއް، ރަޖިސްޓަރީކުރާ ފަރާތުން ހުށަހަޅަންވާނެއެވެ. 

 

5 ވަނަ މާއްދާ - ރަޖިސްޓަރީކުރަންޖެހޭ ފަރާތުގެ ފަރާތުން ޒިންމާވާ ފަރާތް ހަމަޖެއްސުން 

(ހ) މި ގަވާއިދުގެ ދަށުން އޮތޯރިޓީގައި ރަޖިސްޓަރީކުރަންޖެހޭ ކޮންމެ ފަރާތަކުން ވެސް، އޮތޯރިޓީގައި ރަޖިސްޓަރީކުރުމާ ގުޅޭގޮތުންނާއި، ބޭރު ފައިސާއާބެހޭ ގާނޫނުގެ ދަށުން އެ ފަރާތުން އަދާކުރަންޖެހޭ ޒިންމާތަކާއި ރިޕޯޓުކުރަންޖެހޭ ކަންކަމާ ގުޅޭގޮތުން އެ ފަރާތާއި އޮތޯރިޓީއާ ދެމެދު މުއާމަލާތްކުރުމުގެ އިސް ޒިންމާ އުފުލާނެ ފަރާތަކާއި، އެ ފަރާތުގެ ބަދަލުގައި އެ ޒިންމާ އަދާކުރާނެ އޯލްޓަނޭޓް ފަރާތެއް ވެސް ހަމަޖައްސަންވާނެއެވެ. އަދި އޮތޯރިޓީގައި ރަޖިސްޓަރީކުރަން ހުށަހަޅާއިރު ޒިންމާވާ ފަރާތާއި އޯލްޓަނޭޓް ފަރާތާ ބެހޭ އަންނަނިވި މައުލޫމާތު ހިއްސާކުރަންވާނެއެވެ.

1. ނަން؛
2. މަގާމު؛
3. ދިވެހި ރައްޔިތެއްކަން އަންގައިދޭ ކާޑުގެ ނަންބަރު ނުވަތަ ޕާސްޕޯޓް ނަންބަރު؛
4. ގުޅޭނެ ފޯނު ނަންބަރު؛
5. ޕޯސްޓު އެޑްރެސް؛
6. ރަސްމީ އީ-މެއިލް އެޑްރެސް. 

(ށ) މި މާއްދާގެ (ހ) ގެ ދަށުން ޒިންމާވާ ފަރާތުގެ ގޮތުގައި އަދި އޯލްޓަނޭޓް ފަރާތުގެ ގޮތުގައި، އެ ވިޔަފާރި ތަނެއްގެ ޑިރެކްޓަރަކު ނުވަތަ ޕާޓްނަރަކު ނުވަތަ އެ ވިޔަފާރި ތަނެއްގެ މުވައްޒަފަކު ނުވަތަ އޮފިސަރަކު ހަމަޖެއްސިދާނެއެވެ.

(ނ) މި މާއްދާގެ (ހ) ގައި ބަޔާންކޮށްފައިވާ ފަރާތްތަކާ ގުޅޭގޮތުން އޮތޯރިޓީއަށް ހުށަހަޅާ މައުލޫމާތު ބަދަލުވެއްޖެ ނަމަ، އެކަން ލަސްނުކޮށް އޮތޯރިޓީއަށް އެންގުމަކީ އޮތޯރިޓީގައި ރަޖިސްޓަރީކުރާ ފަރާތުގެ ޒިންމާއެކެވެ.

 

6 ވަނަ މާއްދާ - ރަޖިސްޓަރީކުރާއިރު ހުށަހަޅަންޖެހޭ ލިޔެކިޔުން

(ހ) މި ގަވާއިދުގެ 2 ވަނަ މާއްދާގެ (ހ) ގައި ބަޔާންކޮށްފައިވާ ފަރާތްތަކުން ރަޖިސްޓަރީކުރަން ހުށަހަޅާއިރު، އަންނަނިވި ލިޔެކިޔުންތައް ހުށަހަޅަންވާނެއެވެ.

1. ވިޔަފާރި ރަޖިސްޓްރޭށަންގެ ކޮޕީ؛
2. އެ ތަނަކަށް އޮޕަރޭޓިންގ ލައިސަންސެއް ދޫކޮށްފައިވާ ނަމަ، އެ ލައިސަންސްގެ ކޮޕީ؛
3. ޖީ.އެސް.ޓީ ރަޖިސްޓްރޭށަން ސެޓުފިކެޓުގެ ކޮޕީ؛
4. ގްރީން ޓެކްސް ދައްކަންޖެހޭ ފަރާތެއް ނަމަ، ގްރީން ޓެކްސްގެ ރެޖިސްޓްރޭށަން ސެޓުފިކެޓުގެ ކޮޕީ؛
5. ޒިންމާވާ ފަރާތުގެ ކާކުކަން އަންގައިދޭ ލިޔުން؛
6. އޮތޯރިޓީން ކަނޑައަޅާ ނަމޫނާއަކާ އެއްގޮތަށް ޒިންމާވާ ފަރާތް އައްޔަންކޮށް ހުށަހަޅާ ގަރާރު؛
7. އޮތޯރިޓީން ކަނޑައަޅާ އެނޫންވެސް ލިޔެކިޔުން.

(ށ) މި ގަވާއިދުގެ 2 ވަނަ މާއްދާގެ (ށ) ގައި ބަޔާންކޮށްފައިވާ ފަރާތްތަކުން ރަޖިސްޓަރީކުރަން ހުށަހަޅާއިރު، އަންނަނިވި ލިޔެކިޔުންތައް ހުށަހަޅަންވާނެއެވެ.

1. ވިޔަފާރި ރަޖިސްޓްރޭށަންގެ ކޮޕީ
2. ޖީ.އެސް.ޓީ. ރެޖިސްޓްރޭށަން ސެޓުފިކެޓުގެ ކޮޕީ؛
3. ޒިންމާވާ ފަރާތުގެ ކާކުކަން އަންގައިދޭ ލިޔުން؛
4. އޮތޯރިޓީން ކަނޑައަޅާ ނަމޫނާއަކާ އެއްގޮތަށް ޒިންމާވާ ފަރާތް އައްޔަންކޮށްހުށަހަޅާ ގަރާރު؛
5. އޮތޯރިޓީން ކަނޑައަޅާ އެނޫންވެސް ލިޔެކިޔުން.

 

7 ވަނަ މާއްދާ - ރަޖިސްޓަރީކުރުން

(ހ) މި ގަވާއިދުގެ 2 ވަނަ މާއްދާގައި ބަޔާންކުރާ ފަރާތަކުން މި ގަވާއިދުގެ 4 ވަނަ މާއްދާގެ (ހ) އާ އެއްގޮތްވާ ގޮތުގެ މަތީން އޮތޯރިޓީގެ ފޮރިން އެކްސްޗޭންޖު ރަޖިސްޓްރޭށަން ޕޯޓަލް މެދުވެރިކޮށް ރަޖިސްޓަރީކުރުމަށް އެދި ހުށަހެޅުމެއް ހުށަހެޅުމުން، އެ ފަރާތެއް ރަޖިސްޓަރީކުރުމަށް ހުށަހެޅުނީކަމަށް ބެލޭނެއެވެ.

(ށ) ރަޖިސްޓަރީކުރުމަށް އެދި ހުށަހެޅުމެއް އޮތޯރިޓީއަށް ލިބޭތާ ރަސްމީ 10 (ދިހައެއް) ދުވަހުގެ ތެރޭގައި، އެ ހުށަހެޅުމެއް ފުރިހަމަވާ ނަމަ، އެ ފަރާތެއް އޮތޯރިޓީގައި ރަޖިސްޓަރީކޮށް، އެ ފަރާތަށް އެކަން އޮތޯރިޓީން އަންގަންވާނެއެވެ.

(ނ) ރަޖިސްޓަރީކުރުމަށް އެދި އޮތޯރިޓީއަށް ލިބޭ ހުށަހެޅުމެއްގައި މި ގަވާއިދުގައި ބަޔާންކުރާ މައުލޫމާތު ނުވަތަ ލިޔެކިޔުން ފުރިހަމަނުވާކަމަށް ފާހަގަކުރެވޭ ނަމަ، އެ މައުލޫމާތެއް ނުވަތަ ލިޔެކިޔުމެއް ހުށަހަޅަން އޮތޯރިޓީން އަންގާތާ ރަސްމީ 10 (ދިހައެއް) ދުވަހުގެ ތެރޭގައި އެ މައުލޫމާތެއް ނުވަތަ ލިޔެކިޔުމެއް ހުށަހަޅަންވާނެއެވެ. މިގޮތުން އިސްލާފުކުރުމަށްފަހު ހުށަހަޅާ ހުށަހެޅުމެއް ފުރިހަމަވާ ނަމަ، އެ އިސްލާފުކޮށްފައިވާ ހުށަހެޅުން އޮތޯރިޓީއަށް ލިބޭތާ ރަސްމީ 5 (ފަހެއް) ދުވަހުގެ ތެރޭގައި އެ ފަރާތެއް އޮތޯރިޓީގައި ރަޖިސްޓަރީކޮށް އެ ފަރާތަށް އެކަން އޮތޯރިޓީން އަންގަންވާނެއެވެ.

 

 

ތިންވަނަ ބާބު

އެހެނިހެން

 

8 ވަނަ މާއްދާ - އޮތޯރިޓީއަށް ލިބިދޭ ބާރު

މި ގަވާއިދުގެ 2 ވަނަ މާއްދާގައި ބަޔާންކޮށްފައިވާ ށަރުތުތަކުގެ ތެރެއިން ށަރުތެއް ފުރިހަމަވާ ފަރާތަކުން މި ގަވާއިދުގައި ބަޔާންކޮށްފައިވާ ގޮތުގެ މަތީން އޮތޯރިޓީގައި ރަޖިސްޓަރީކޮށްފައި ނުވާކަމަށް އޮތޯރިޓީއަށް ގަބޫލުކުރެވޭ ނަމަ، މި ގަވާއިދާ އެއްގޮތްވާ ގޮތުގެ މަތީން ރަޖިސްޓަރީކުރުމަށް އެ ފަރާތަށް އެންގުމުގެ ބާރު އޮތޯރިޓީއަށް ލިބިގެންވެއެވެ.

 

9 ވަނަ މާއްދާ - ރަޖިސްޓަރީނުކުރާ ފަރާތްތަކާމެދު ފިޔަވަޅު އެޅުން 

މި ގަވާއިދުގައި ބަޔާންކޮށްފައިވާ ގޮތުގެ މަތީން ރަޖިސްޓަރީނުކުރާ ފަރާތްތަކާމެދު ބޭރު ފައިސާއާބެހޭ ގާނޫނުގެ 15 ވަނަ މާއްދާގެ (ނ) ގައި ބަޔާންކޮށްފައިވާ ފިޔަވަޅު އެޅުމުގެ އިފުތިޔާރު އޮތޯރިޓީއަށް ލިބިގެންވެއެވެ.

 

10 ވަނަ މާއްދާ - ގަވާއިދަށް އަމަލުކުރަންފެށުން

މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ.

 

11 ވަނަ މާއްދާ - މާނަކުރުން

މި ގަވާއިދުގައި އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި އިބާރާތްތަކާއި ލަފުޒުތަކަށް ދެވިފައިވަނީ، އެ އިބާރާތްތަކާއި ލަފުޒުތަކާ ގުޅިގެން، ތިރީގައި ދީފައިވާ މާނަކުރުމެވެ.

(ހ) "ބޭރު ފައިސާއާބެހޭ ގާނޫނު" ކަމުގައި ބުނެފައި އެވަނީ، ގާނޫނު ނަންބަރު 2024-32 (ބޭރު ފައިސާއާބެހޭ ގާނޫނު) އަށެވެ.

(ށ) "އޮތޯރިޓީ" ކަމުގައި ބުނެފައި އެވަނީ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ ދަށުން އުފައްދައިފައިވާ މޯލްޑިވްސް މަނިޓަރީ އޮތޯރިޓީއަށެވެ.

(ނ) "ވިޔަފާރި ފަރަކާތް" ކަމުގައި ބުނެފައި އެވަނީ، ގާނޫނު ނަންބަރު 2014-18 (ވިޔަފާރި ރަޖިސްޓަރީކުރުމުގެ ގާނޫނު) ގެ 31 މާއްދާގެ (ޏ) ގައި ބަޔާންކޮށްފައިވާ، އެ ގާނޫނުގެ 7 ވަނަ މާއްދާގައި ބަޔާންކޮށްފައިވާ ބާވަތުގެ ކަންކަން ހިމެނޭ ގޮތުން ހިންގާ ކޮންމެ ފަރަކާތަކަށެވެ.

(ރ) "ވިޔަފާރި ނަން" ކަމުގައި ބުނެފައި އެވަނީ، ގާނޫނު ނަންބަރު 2014-18 (ވިޔަފާރި ރަޖިސްޓަރީކުރުމުގެ ގާނޫނު) ގެ 31 ވަނަ މާއްދާގެ (ވ) ގައި ބަޔާންކޮށްފައިވާ، އެ ގާނޫނުގެ 4 ވަނަ މާއްދާގައި ބަޔާންކުރާ ވިޔަފާރި ތަންތަނުން ހިންގާ ވިޔަފާރީގައި ބޭނުންކުރުމަށް އެ ގާނޫނުގެ ދަށުން ރަޖިސްޓަރީކުރާ ނަމަށެވެ.

(ބ) "ވިޔަފާރި ތަން" ކަމުގައި ބުނެފައި އެވަނީ، ގާނޫނު ނަންބަރު 2014-18 (ވިޔަފާރި ރަޖިސްޓަރީކުރުމުގެ ގާނޫނު) ގެ 31 މާއްދާގެ (ނ) ގައި ބަޔާންކޮށްފައިވާ އެ ގާނޫނުގެ 4 ވަނަ މާއްދާގެ ދަށުން ރަޖިސްޓަރީކުރާ ކުންފުނި ނުވަތަ ޕާޓްނަރށިޕް ނުވަތަ ކޯޕަރޭޓިވް ސޮސައިޓީ ނުވަތަ އަމިއްލަ ވިޔަފާރިއަށެވެ.

(ޅ) "ފަރާތެއް" ކަމުގައި ބުނެފައި އެވަނީ، ތަބީއީ ށަހްސާއި ގާނޫނީ ށަހްސު ހިމެނޭގޮތަށެވެ.

(ކ) "ޓޫރިޒަމް ދާއިރާގެ މުދަލާއި ހިދުމަތް" ކަމުގައި ބުނެފައި އެވަނީ، ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) ގައި ޓޫރިޒަމް ދާއިރާގެ މުދަލާއި ހިދުމަތުގެ ގޮތުގައި ބަޔާންކޮށްފައިވާ މުދަލާއި ހިދުމަތްތަކަށެވެ.

(އ) "ޖީ.އެސް.ޓީ" ކަމުގައި ބުނެފައި އެވަނީ، ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) ގައި ބަޔާންކުރާ "ގުޑްސް އެންޑް ސަރވިސަސް ޓެކްސް" އަށެވެ.

 

މައި ގާނޫނު

ބޭރު ފައިސާއާބެހޭ ގާނޫނު (ގާނޫނު ނަންބަރު 2024-32)