މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދަށް 23 ވަނަ އިސްލާހު ގެނައުމުގެ ގަވާއިދު

(މި ގަވާއިދަށް އަމަލުކުރަން ފެށީ 21 ޑިސެމްބަރު 2017 ގައި)

މިއީ ގާނޫނު ނަންބަރު 2011-14 މެދުވެރިކޮށް އިސްލާހުކޮށްފައިވާ، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރީ ގާނޫނު) ގެ 84 ވަނަ މާއްދާގެ ދަށުން ނެރެފައިވާ ރޫލިންގއެކެވެ. އެހެން ގޮތަކަށް ބަޔާންކޮށްފައިވާ ހާލަތެއްގައި މެނުވީ، ގާނޫނަށް ހަވާލާދީފައިވާ ތަންތަނުގައި ހަވާލާދީފައި އެވަނީ ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) އަށެވެ. އަދި ގަވާއިދަށް ހަވާލާދީފައިވާ ތަންތަނުގައި ހަވާލާދީފައި އެ ވަނީ އިސްލާހުކޮށްފައިވާ ގަވާއިދު ނަންބަރު 2011-43 (މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު) އަށެވެ. ޓެކްސް ދައްކާ ފަރާތްތަކުން މި ރޫލިނގއަށް ތަބާވުން ގާނޫނީގޮތުން ލާޒިމުކުރެއެވެ.

1 ވަނަ މާއްދާ - މަގްސަދު

މި ރޫލިންގގެ މަގްސަދަކީ ގަވާއިދުގެ 46 ވަނަ މާއްދާ އިސްލާހުކުރުމެވެ.

2 ވަނަ މާއްދާ - ރޫލިންގ

ގަވާއިދުގެ 46 ވަނަ މާއްދާ އަންނަނިވި ގޮތަށް އިސްލާހުކުރުން:

(ހ) ރަޖިސްޓަރީކޮށްފައިވާ ފަރާތަކުން، އެ ފަރާތެއްގެ ޓެކްސް ނެގޭ ހަރަކާތަކަށް ނިސްބަތްވާ ކެޕިޓަލް ހަރަދާ ގުޅޭ އިންޕުޓް ޓެކްސް އުނިކުރެވޭނީ، އަންނަނިވި ގޮތުގެ މަތިން، އެ ޓެކްސް ނެގޭ ހަރަކާތުގެ އައުޓްޕުޓް ޓެކުހުންނެވެ.

1. އެއް ކަމަކަށް ކުރާ ކެޕިޓަލް ހަރަދު ނުވަތަ އެއް ބާވަތެއްގެ އެއްޗެހިތަކެއް ހޯދުމަށް އެއްފަހަރާ ކުރާ ކެޕިޓަލް ހަރަދުގެ ޖުމުލަ 500,000 (ފަސް ލައްކަ) ރުފިޔާ ނުވަތަ އެއަށްވުރެ ކުޑަނަމަ، އައުޓްޕުޓް ޓެކުހުން އެ ހަރަދަކާ ގުޅޭ އިންޕުޓް ޓެކްސް އެއްފަހަރާ އުނިކުރެވިދާނެއެވެ. މި ގޮތުން، އެއްފަހަރާ އުނިކުރެވޭނީ އެ ކެޕިޓަލް ހަރަދުކުރި ޓެކްސް ނެގޭ މުއްދަތު ނިމުނު ތާރީހުން ފެށިގެން 12 (ބާރަ) މަސްދުވަހުގެ ތެރޭގައެވެ.
2. އެއް ކަމަކަށް ކުރާ ކެޕިޓަލް ހަރަދު ނުވަތަ އެއް ބާވަތެއްގެ އެއްޗެހިތަކެއް ހޯދުމަށް އެއްފަހަރާ ކުރާ ކެޕިޓަލް ހަރަދުގެ ޖުމުލަ 500,000 (ފަސް ލައްކަ) ރުފިޔާއަށްވުރެ ބޮޑުނަމަ، އެ ހަރަދުކުރި ޓެކްސް ނެގޭ މުއްދަތުން ފެށިގެން ކުރިއަށް އޮތް 36 (ތިރީސް ހައެއް) މަސްދުވަހަށް އެއްވަރަކަށް ބަހާލައިގެން، އައުޓްޕުޓް ޓެކުހުން އެ ހަރަދަކާ ގުޅޭ އިންޕުޓް ޓެކްސް އުނިކުރެވިދާނެއެވެ.
3. މި މާއްދާގެ (ހ) ގެ (1) ވަނަ ނަންބަރު ރައްދުވާ ހާލަތުގައި، އެއްވެސް ސަބަބަކާހުރެ 12 (ބާރަ) މަސްދުވަސް ނިމޭއިރު އުނި ނުކުރެވި ހުރި ކެޕިޓަލް ހަރަދާ ގުޅޭ އިންޕުޓް ޓެކްސް އަދި މި މާއްދާގެ (ހ) ގެ (2) ވަނަ ނަންބަރު ރައްދުވާ ހާލަތުގައި، އެއްވެސް ސަބަބަކާހުރެ 36 (ތިރީސް ހައެއް) މަސްދުވަސް ނިމޭއިރު އުނި ނުކުރެވި ހުރި ކެޕިޓަލް ހަރަދާ ގުޅޭ އިންޕުޓް ޓެކްސް، އެއްވެސް ޓެކްސް ނެގޭ މުއްދަތެއްގައި އުނި ނުކުރެވޭނެއެވެ.
4. އެ ހަރަދުކުރި ޓެކްސް ނެގޭ މުއްދަތުގެ ނިޔަލަށް، އެ ހަރަކާތަށް އެއްވެސް އައުޓްޕުޓް ޓެކުހެއް ލިބިފައިނުވާނަމަ، މި މާއްދާގެ (ހ) ގެ (2) ވަނަ ނަންބަރަށް އަމަލުކުރުމުގައި 36 (ތިރީސް ހައެއް) މަސް ގުނަން ފަށާނީ ފުރަތަމަ ފަހަރަށް އެ ހަރަކާތަށް އައުޓްޕުޓް ޓެކުހެއް ލިބޭ ޓެކްސް ނެގޭ މުއްދަތު ނިމޭ މަހަކީ ފުރަތަމަ މަސް ކަމުގައި ބަލައިގެންނެވެ.
5. މި މާއްދާގެ (ހ) ގެ (2) ވަނަ ނަންބަރަށް އަމަލުކުރުމުގައި، ޓެކްސް ނެގޭ މުއްދަތެއްގައި، ކެޕިޓަލް ހަރަދުތަކާ ގުޅިގެން އުނިކުރެވޭ އިންޕުޓް ޓެކުހުގެ އަދަދު، އެ ހަރަކާތެއްގެ އެ މުއްދަތުގެ އައުޓްޕުޓް ޓެކުހުން އެ މުއްދަތުގައި އުނިކުރެވޭނެ އެހެނިހެން ހަރަދުތަކާ ގުޅޭ އިންޕުޓް ޓެކްސްގެ ޖުމުލަ އަދަދާއި، މި މާއްދާގެ (ހ) ގެ (1) ވަނަ ނަންބަރުގެ ދަށުން އުނިކުރެވެންހުރި ކެޕިޓަލް ހަރަދާ ގުޅޭ އިންޕުޓް ޓެކްސްގެ ޖުމުލަ އަދަދު އުނިކުރުމުން އަންނަ އަދަދަށްވުރެ އިތުރުވެގެން ނުވާނެއެވެ. އެފަދައިން އިތުރުވާ ހާލަތުގައި އެ އިތުރުވި ބައި އުނިކުރެވޭނީ، މި މާއްދާގައިވާ ގޮތުގެ މަތިން، ޖެހިގެން އަންނަ ޓެކްސް ނެގޭ މުއްދަތުތަކުގައެވެ.

(ށ) ކެޕިޓަލް ހަރަދަކާ ގުޅޭ އިންޕުޓް ޓެކްސް އުނިކުރެވޭނީ އެ ޓެކްސް ނެގޭ ހަރަކާތަކުން އައުޓްޕުޓް ޓެކުހެއް ލިބުމުންނެވެ. މި ގޮތުން، އައުޓްޕުޓް ޓެކްސް ލިބުނުކަމަށް ބަލާނީ، އެ ހަރަދު ކުރެވުނު ޓެކްސް ނެގޭ ހަރަކާތުގެ މައިގަނޑު ވިޔަފާރިން އައުޓްޕުޓް ޓެކުހެއް ލިބުމުންނެވެ.

(ނ) ކެޕިޓަލް ހަރަދުކުރި ޓެކްސް ނެގޭ މުއްދަތުގެ ޓެކްސް ބަޔާނާއެކު، މީރާއިން ކަނޑައަޅާ ފޯމެޓެއްގައި، ކެޕިޓަލް ހަރަދުގެ މައުލޫމާތު މީރާއަށް ހުށަހަޅަންވާނެއެވެ. މި ގޮތަށް މައުލޫމާތު ހުށަހަޅާފައިނުވާ ކެޕިޓަލް ހަރަދަކާ ގުޅޭ އިންޕުޓް ޓެކްސް އެއްވެސް ޓެކްސް ނެގޭ މުއްދަތެއްގައި އުނި ނުކުރެވޭނެއެވެ.

(ރ) ރަޖިސްޓަރީކޮށްފައިވާ ފަރާތަކުން ކެޕިޓަލް ހަރަދެއް ކުރަނީ ޖީއެސްޓީ ނެގުމުން އިސްތިސްނާވާ މުދަލާއި ހިދުމަތް ފޯރުވައިދިނުމަށާއި، ޓެކްސް ނެގޭ މުދަލާއި ހިދުމަތް ފޯރުވައިދިނުމަށް، މި ދެ ބޭނުމަށް، ކަމުގައިވާނަމަ، އެ ކެޕިޓަލް ހަރަދާ ގުޅޭ އިންޕުޓް ޓެކުހުގެ ތެރެއިން ޖީއެސްޓީ ނެގުމުން އިސްތިސްނާވާ މުދަލާއި ހިދުމަތް ފޯރުވައިދިނުމަށް ނިސްބަތްވާނެކަމަށް އަދުލުވެރިގޮތަކަށް ލަފާކުރެވޭ އަދަދު، އެ ފަރާތުގެ އައުޓްޕުޓް ޓެކުހުން އުނި ނުކުރެވޭނެއެވެ. އެހެންނަމަވެސް، އެ ހަރަދުގެ ތެރެއިން ޓެކްސް ނެގޭ މުދަލާއި ހިދުމަތް ފޯރުވައިދިނުމަށް ނިސްބަތްވާނެ ކަމަށް އަދުލުވެރިގޮތަކަށް ލަފާކުރެވޭ އަދަދު، މި މާއްދާގައިވާ ގޮތުގެމަތިން އެ ފަރާތުގެ އައުޓްޕުޓް ޓެކުހުން އުނިކުރެވިދާނެއެވެ.

(ބ) ޓެކްސް ރޫލިންގ 2017-45 މެދުވެރިކޮށް މި މާއްދާއަށް ގެނެވުނު އިސްލާހުތަކަށް އަމަލުކުރާނީ 1 ޖަނަވަރީ 2018 އިން ފެށިގެންނެވެ. އެ ތާރީހުގެ ކުރިން އެ ވަގުތު މި ގަވާއިދުގައި ބަޔާންކޮށްފައިވާ ގޮތަށް ކެޕިޓަލް ހަރަދާގުޅޭ އިންޕުޓް ޓެކްސް އުނިކުރުމުގައި، އަމަލުކޮށްފައިވާ ނުވަތަ އަމަލުކުރަން ފަށާފައިވާ ފަރާތްތަކަށް، އެ ކެޕިޓަލް ގުޑްސްއާ ގުޅޭ އިންޕުޓް ޓެކްސް އުނިކުރުމުގައި، މި ރޫލިންގގައި ބަޔާންކޮށްފައިވާ އުސޫލުތަކަށް އަމަލުކުރަމުންނެވެ.

3 ވަނަ މާއްދާ - އަމަލުކުރަން ފެށުން

މި ރޫލިންގއަށް އަމަލުކުރަން ފަށާނީ، މި ރޫލިންގ ދިވެހިސަރުކާރުގެ ގެޒެޓުގައި ށާއިއުކުރާ ތާރީހުން ފެށިގެންނެވެ.

މައި ގަވާއިދު

މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު (ގަވާއިދު ނަންބަރު 2011-43)