(މި އުސޫލަށް އަމަލުކުރަން ފެށީ 14 އޮކްޓޫބަރު 2026 ގައި)

މި ފައިލް އަދި އަޕްލޯޑްކޮށް ނުނިމޭ

1 ވަނަ ބާބު

ތައާރަފު

 

1 ވަނަ މާޢްދާ - ތައާރަފާއި ނަން

(ހ) މިއީ، ދިވެހިރާއްޖޭގެ ޞިއްޙީ ޚިދުމަތުގެ ޤައުމީ ނިޒާމުގެ ތެރެއިން، އާންމު ޞިއްޙަތު ރައްކައުތެރިކުރުމުގެ ޤައުމީ ޕުރޮގުރާމުތަކުގެ ދާއިރާއިން ފޯރުކޮށްދިނުމަށް ކަނޑައަޅައިފައިވާ ޕްރިވެންޓިވް ކެއަރގެ ޚިދުމަތްތައް ފޯރުކޮށްދިނުމުގައި ހުންނަންޖެހޭ ފަންނީ މިންގަނޑުތަކާއި އުސޫލުތައް ބަޔާންކުރުމުގެ ގޮތުން، ޤާނޫނު ނަންބަރު 29/2015 (ޞިއްޙީ ޚިދުމަތް ދިނުމުގެ ޤާނޫނު) ގެ 2-10 ވަނަ މާއްދާގެ (ށ) ގެ ދަށުން ބާރު ލިބިގެން އެކުލަވައިލައިފައިވާ އުސޫލެކެވެ.

(ށ) މި އުސޫލަށް ކިޔާނީ، "އާންމު ޞިއްޙަތުގެ ޤައުމީ ޕުރޮގުރާމުތަކާއި އެ ޕުރޮގުރާމުތަކުގެ ދާއިރާއިން ފޯރުކޮށްދެވޭ ޚިދުމަތްތަކާ ގުޅޭ ކަންކަމުގެ ފަންނީ މިންގަނޑުތަކާއި ހަމަތަކާ ގުޅޭ އުސޫލު" އެވެ.

 

2 ވަނަ މާޢްދާ - އުސޫލު ހިނގާނެ ދާއިރާ

(ހ) މި އުސޫލުގައި ބަޔާންކޮށްފައިވާ މިންގަނޑުތަކަށް ޢަމަލުކޮށް، އެ ޚިދުމަތްތައް ފޯރުކޮށްދޭނެ ތަންތަން، ތިރީގައި ބަޔާންކޮށްފައި މި ވަނީއެވެ.

(ށ) މި އުސޫލުގައި ހިމެނޭ ޚިދުމަތްތައް ފޯރުކޮށްދޭ އަމިއްލަ ހޮސްޕިޓަލްތަކާއި ކްލިނިކްތައް.

 

3 ވަނަ މާއްދާ - އާންމު ޞިއްޙަތު ރައްކައުތެރިކުރުމުގެ ޤައުމީ ޕުރޮގުރާމުތައް

އާންމު ޞިއްޙަތު ރައްކައުތެރިކުރުމުގެ ޤައުމީ ޕުރޮގުރާމުތައް، ތިރީގައި ބަޔާންކޮށްފައި މިވަނީއެވެ. މި ޕުރޮގުރާމުތަކަކީ، އާންމު ޞިއްޙަތުގެ ހާލަތަށް ރިއާޔަތްކޮށް، ހާލަތާއި ވަގުތަށް އެކަށީގެންވާ ގޮތަށް ބަދަލުގެނެސް އަދާހަމަކުރެވޭނެ ޕުރޮގުރާމުތަކެކެވެ.

(ހ) ދަރިމައިވުމުގެ ޞިއްޙަތާއި، މައިންނާއި ޅަދަރީންގެ ޞިއްޙަތާބެހޭ އާންމު ޞިއްޙަތު ޕުރޮގުރާމު.

(ށ) ވެކްސިން ދިނުމުގެ ޤައުމީ ޕުރޮގުރާމު (ނޭޝަނަލް އިމިއުނައިޒޭޝަން ޕުރޮގުރާމު).

(ނ) ގައިންގަޔަށް އަރާ ބަލިތަކުން ރައްކައުތެރިކުރުމާއި ކޮންޓްރޯލުކުރުމުގެ އާންމު ޞިއްޙަތު ޕުރޮގުރާމު.

(ރ) ގައިންގަޔަށް ނާރާ ބަލިތަކާއި ދިރިއުޅުމުގެ ވައްޓަފާޅިއާ ގުޅުންހުރި ބަލިތަކުން ރައްކައުތެރިކުރުމާއި ކޮންޓްރޯލުކުރުމުގެ އާންމު ޞިއްޙަތު ޕުރޮގުރާމު.

(ބ) ތިމާވެށްޓާ ގުޅޭ އާންމު ޞިއްޙަތު (އެންވަޔަރަންމަންޓަލް ހެލްތު) ޕުރޮގުރާމު.

(ޅ) ޞިއްޙީ ހޭލުންތެރިކަން އިތުރުކުރުމާއި، އާންމު ޞިއްޙަތު ކުރިއެރުވުމުގެ ޤައުމީ ޕުރޮގުރާމު.

 

 

2 ވަނަ ބާބު

ދަރިމައިވުމުގެ ޞިއްޙަތާއި މައިންނާއި ޅަދަރީންގެ ޞިއްޙަތާބެހޭ އާންމު ޞިއްޙަތު ޕުރޮގުރާމު

 

4 ވަނަ މާއްދާ - ދަރިމައިވުމުގެ ޞިއްޙަތާއި މައިންނާއި ޅަދަރީންގެ ޞިއްޙަތާ ބެހޭ އާންމު ޞިއްޙަތު ޕުރޮގުރާމުގެ ޚިދުމަތްތައް

އަންނަނިވި ޚިދުމަތްތަކަކީ ދަރިމައިވުމުގެ ޞިއްޙަތާއި މައިންނާއި ޅަދަރީންގެ ޞިއްޙަތާބެހޭ އާންމު ޞިއްޙަތު ޕުރޮގުރާމުގެ ދާއިރާއިން ފޯރުކޮށްދެވޭ ޕްރިވެންޓިވް ކެއަރގެ ޚިދުމަތްތަކެވެ.

(ހ) ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް.

(ށ) އާއިލާ ރޭވުމުގެ ޚިދުމަތްތައް.

(ނ) ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް.

(ރ) މައިކްރޯނިއުޓްރިއަންޓް ސަޕްލިމެންޓޭޝަނާއި ފަނިބޭސް ދިނުމުގެ ޚިދުމަތް.

(ހ) ޞިއްޙީ ޚިދުމަތްދޭ، ސަރުކާރުގެ ހޮސްޕިޓަލްތަކާއި ޞިއްޙީ މަރުކަޒުތަކާއި އަރބަން ޕްރައިމަރީ ހެލްތުކެއަރގެ ޚިދުމަތްދޭ މަރުކަޒުތައް.

 

5 ވަނަ މާއްދާ - ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ދިނުމުގެ މަގުސަދު

މި އުސޫލުގެ ދަށުން، ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ފޯރުކޮށްދިނުމުގެ މަގުސަދުތައް، ތިރީގައި މި ވަނީއެވެ.

(ހ) މާބަނޑު ދުވަސްވަރާއި ވިހެއުމަށްފަހު މައިމީހާއާއި ތުއްތު ދަރިފުޅުގެ ޞިއްޙަތު ރައްކައުތެރިކުރުން.

(ށ) ދަރިމައިވުމުގައި ކުރިމަތިވެދާނެ ޞިއްޙީ އެކިއެކި މައްސަލަތަކުން ރައްކައުތެރިވެތިބުމާއި، ޖިސްމާނީ ދުޅަހެޔޮކަމާއި ނަފުސާނީ ދުޅަހެޔޮކަން ގެނެސްދިނުން.

(ނ) ދުޅަހެޔޮކަމާއެކު މާބަނޑު ދުވަސްވަރާއި ވިހެއުމަށްފަހު މައިމީހާއާއި ތުއްތު ދަރިފުޅުގެ ޞިއްޙަތު ދެމެހެއްޓުމަށް މަޢުލޫމާތު ފޯރުކޮށްދީ، އާއިލާ ބާރުވެރިކުރުވުން.

 

6 ވަނަ މާޢްދާ - ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ދިނުމުގައި ހިމެނޭ ބައިތައް

ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ދިނުމުގައި ހިމެނޭ ބައިތައް، ތިރީގައި މިވަނީއެވެ.

(ހ) މާބަނޑުމީހުން ރަޖިސްޓަރީކުރުމާއި، ރިކޯޑު ބެލެހެއްޓުން. ނޭޝަނަލް އެންޓިނޭޓަލް އެންޑް ޕޯސްޓްނޭޓަލް ކެއަރ ގައިޑްލައިންގައި ކަނޑައަޅައިފައިވާ ގޮތުގެ މަތިން އެންޓިނޭޓަލް ކެއަރ (އޭ.އެން.ސީ) އާއި ޕޯސްޓްނޭޓަލް ކެއަރ (ޕީ.އެން.ސީ) ކާޑު ނުވަތަ އެ އިރެއްގައި ރިކޯޑު ބެލެހެއްޓުމަށް ހަމަޖެހިފައިވާ ނިޒާމުގެ ތެރެއިން ރަޖިސްޓަރީކުރެވޭ މާބަނޑު ކޮންމެ މީހެއްގެ މަޢުލޫމާތު ފުރިހަމަކުރުމާއި، އެ މަޢުލޫމާތު އަދާހަމަކޮށް ބެލެހެއްޓުން.

(ށ) މާބަނޑު ދުވަސްވަރާއި ވިހެއުމަށްފަހު ދިމާވެދާނެ ޞިއްޙީ މައްސަލަތަކުން ރައްކައުތެރިވުމަށް އެންޓިނޭޓަލް ކެއަރ (އޭ.އެން.ސީ) އާއި ޕޯސްޓްނޭޓަލް ކެއަރ (ޕީ.އެން.ސީ) ގައިޑްލައިންގައި ކަނޑައަޅައިފައިވާ ޚިދުމަތްތައް ދިނުމުގެ އިންތިޒާމު ހަމަޖެއްސުމާއި، އެ ޚިދުމަތްތައް ގަވާއިދުން ހޯދުމަށް ބާރުއެޅުން.

(ނ) އެ ރަށެއްގައި ގާއިމުވެގެން ދިރިއުޅޭ މާބަނޑުމީހުން، ކަނޑައެޅިފައިވާ އުސޫލުން ޚިދުމަތް ލިބިގަންނަކަން މޮނިޓަރކުރުމާއި، ޚިދުމަތް ހޯދާ މީހުން ރަޖިސްޓަރީކޮށް ރިކޯޑު ބެލެހެއްޓުން. އަދި ބުނެވިދިޔަ ފަރާތްތައް ގާއިމުވެގެން ދިރިއުޅޭ ރަށްނޫން އެހެން ރަށަކުން ނުވަތަ އެހެން ތަނަކުން ޚިދުމަތް ހޯދާ ހާލަތްތަކުގައި ވެސް އެ މަޢުލޫމާތު ވެސް އަދާހަމަކޮށް ރިކޯޑު ބެލެހެއްޓުން.

 

7 ވަނަ މާއްދާ - ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ދިނުމުގެ އިންތިޒާމު

ރައްކައުތެރި މައިވަންތަކަމަށް ފޯރުކޮށްދެވޭ ޚިދުމަތްތައް ދިނުމަށް، ތިރީގައިވާ އިންތިޒާމުތައް، ޚިދުމަތްދޭ ތަނުގެ މެނޭޖްމަންޓުގެ ފަރާތުން ހަމަޖައްސަންވާނެއެވެ.

(ހ) މި ޚިދުމަތް ދިނުމަށް ކަނޑައަޅައިފައިވާ މަސައްކަތްތައް ކުރުމަށާއި ހިންގުމަށް، އެ މަސައްކަތަކަށް އެކަށޭނަ ޞިއްޙީ ޚިދުމަތުގެ ފަންނީ މަސައްކަތްތެރީންނާއި އެހެނިހެން މުވައްޒަފުން ކަނޑައަޅައި، ޚިދުމަތް ދިނުމުގެ އިންތިޒާމު ހަމަޖައްސަންވާނެއެވެ.

(ށ) މި ޚިދުމަތް ދިނުމުގައި، ޚިދުމަތް ހޯދާ ފަރާތްތަކުގެ ސިއްރު ހިފެހެއްޓޭކަން ކަށަވަރުކުރެވޭ ގޮތަށް (ޕްރައިވަސީ ލިބޭގޮތަށް) މައުލޫމާތު ފޯރުކޮށްދީ، ދެފަރާތުން އިތުބާރާއެކު މަޝްވަރާކޮށް ވާހަކަދެއްކޭނެ ގޮތަށް އިންތިޒާމުތައް ހަމަޖައްސަންވާނެއެވެ.

(ނ) ޚިދުމަތްދޭ ތަނުގައި ޚިދުމަތް ދިނުމަށް ބޭނުންވާ ތަކެއްޗާއި އާލާތްތަކާއި ވަސީލަތްތައް ހަމަކޮށްފައި ހުންނަންވާނެއެވެ.

(ރ) މި ޚިދުމަތް ދިނުމަށް ބޭނުންވާ ތަކެއްޗާއި ވަސީލަތްތައް، ޞިއްޙީ ޚިދުމަތްދޭ ތަނުން މެދުނުކެނޑި ފޯރުކޮށްދިނުމަށް ޓަކައި، ފޯކާސްޓްކޮށް ތަކެއްޗާއި ވަސީލަތްތައް، އެ އެކަމަށް ކަނޑައަޅައިފައިވާ އުސޫލާ އެއްގޮތަށް، މެނޭޖްމަންޓުން ހޯދައި ބަލަހައްޓަންވާނެއެވެ.

(ބ) ރައްކައުތެރި މައިވަންތަކަމަށް ފޯރުކޮށްދެވޭ ޕްރިވެންޓިވް ކެއަރގެ ޚިދުމަތްދިނުމުގައި ބޭނުންކުރާ އޭ.އެން.ސީ ކާޑާއި ޕީ.އެން.ސީ ކާޑު ނުވަތަ އެ އިރެއްގައި ރިކޯޑު ބެލެހެއްޓުމަށް ކަނޑައަޅައިފައިވާ ތަކެއްޗާއި، އަޔަން ފޮލިކް އެސިޑާއި، ވިހެއުމަށްފަހު އާއިލާ ރޭވުމަށް ކަނޑައަޅައިފައިވާ ވަސީލަތްތައް، ހަމަޖެހިފައިވާ އުސޫލުން ހޯދަންވާނެއެވެ.

(ޅ) ރައްކައުތެރި މައިވަންތަކަމަށް ފޯރުކޮށްދެވޭ ޕްރިވެންޓިވް ކެއަރގެ ޚިދުމަތްތައް ދިނުމަށް ހަމަޖައްސާ މުވައްޒަފުން، އެ މުވައްޒަފުންނަށް ކުރުމަށް ހަވާލުކުރެވޭ މަސައްކަތާ އެއްގޮތްވާ ގޮތުގެ މަތީން މަސައްކަތަށް ހޭލުންތެރިކޮށް އަހުލުވެރިކުރުވުމަށް އެކަށީގެންވާ މައުލޫމާތާއި ތަމްރީނު ދިނުމުގެ އިންތިޒާމު، މިނިސްޓްރީއާއި އެޖެންސީއާ ގުޅިގެން، މެނޭޖްމަންޓުގެ ފަރާތުން ހަމަޖައްސަންވާނެއެވެ. މި ތަމްރީނުތައް އޮންލައިންކޮށް ދިނުމަކަށް މި އުސޫލު ހުރަހެއް ނާޅައެވެ.

 

8 ވަނަ މާއްދާ - ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ދިނުމުގައި ބޭނުންކުރާ ގައިޑްލައިންތައް

(ހ) ރައްކައުތެރި މައިވަންތަކަމަށް ފޯރުކޮށްދެވޭ އެ ޞިއްޙީ ޚިދުމަތްތައް ފޯރުކޮށްދިނުމުގައި ބޭނުންކުރާނީ ތިރީގައިވާ ގައިޑްލައިންތަކެވެ.

1. ނޭޝަނަލް އެންޓިނޭޓަލް އެންޑް ޕޯސްޓްނޭޓަލް ކެއަރ ގައިޑްލައިން؛
2. ރައްކައުތެރި މައިވަންތަކަމާ ގުޅޭގޮތުން ދުނިޔޭގެ ޞިއްޙަތު ޖަމުޢިއްޔާއިން އާންމުކުރާ ގައިޑްލައިންތައް.

(ށ) ރައްކައުތެރި މައިވަންތަކަމަށް ފޯރުކޮށްދެވޭ ޞިއްޙީ ޚިދުމަތްތައް ފޯރުކޮށްދިނުމުގައި ބޭނުންކުރާނެ އަދާހަމަ ގައިޑްލައިންތައް، އެޖެންސީއާއި މިނިސްޓްރީގެ ވެބްސައިޓުން ފެންނަން ހުންނާނެއެވެ.

 

9 ވަނަ މާއްދާ - އާއިލާ ރޭވުމުގެ ޚިދުމަތްތައް ފޯރުކޮށްދިނުމުގެ މަގުސަދު

މި އުސޫލުގެ ދަށުން އާއިލާ ރޭވުމުގެ ޚިދުމަތްތައް ފޯރުކޮށްދިނުމުގެ މަގުސަދުތައް، ތިރީގައި މިވަނީއެވެ.

(ހ) ދަރިމައިވުމުގެ ޞިއްޙަތު ރައްކައުތެރިކުރުމާއި ދުޅަހެޔޮ އާއިލާއެއް ބިނާކުރުން.

(ށ) އާއިލާ ރޭވުމުގެ ޚިދުމަތް ހޯދާ ފަރާތްތަކަށް ލިބެންހުރި ވަސީލަތްތަކުގެ ފުރިހަމަ މައުލޫމާތު ދިނުމާއި، އެކަށީގެންވާ ވަސީލަތެއް ޚިޔާރުކުރުމަށް އެ ފަރާތަކަށް އެހީތެރިވުން.

 

10 ވަނަ މާޢްދާ - އާއިލާ ރޭވުމުގެ ޚިދުމަތްތައް ފޯރުކޮށްދިނުމުގައި ހިމެނޭ ބައިތައް

އާއިލާ ރޭވުމުގެ ޚިދުމަތްތައް ދިނުމުގައި ހިމެނޭ ބައިތައް، ތިރީގައި މިވަނީއެވެ.

(ހ) ޚިދުމަތް ހޯދާ ފަރާތަކަށް ލިބެންހުރި އާއިލާ ރޭވުމުގެ ވަސީލަތްތަކުގެ މައުލޫމާތު ފޯރުކޮށްދިނުމަށާއި، އެކަށީގެންވާ ވަސީލަތެއް ޚިޔާރުކުރުމަށް ބޭނުންވާ ކައުންސެލިންގ ދިނުން.

(ށ) އާއިލާ ރޭވުމުގެ ވަސީލަތްތައް ފޯރުކޮށްދިނުން.

(ނ) އާއިލާ ރޭވުމުގެ ޚިދުމަތް ހޯދާ ފަރާތްތައް ރަޖިސްޓަރީކުރުމާއި ރަޖިސްޓަރީ ބެލެހެއްޓުން.

(ރ) ދަރިމައިވުމުގެ ޞިއްޙަތާބެހޭ ނޭޝަނަލް ޕުރޮގުރާމުން އެ އިރެއްގައި ރިކޯޑު ބެލެހެއްޓުމަށް ހަމަޖެހިފައިވާ ނިޒާމުގެ ތެރެއިން ރަޖިސްޓަރީކުރެވޭ ފަރާތްތަކުގެ މައުލޫމާތު ފުރިހަމަކުރުމާއި އެ މައުލޫމާތު އަދާހަމަކޮށް ބެލެހެއްޓުން.

(ބ) ޚިދުމަތްދެވޭ ގޮތުގެ ރިޕޯޓުތައް، ކަނޑައެޅިފައިވާ ގޮތުގެ މަތީން ތައްޔާރުކޮށް ފޮނުވުން.

(ޅ) އާއިލާ ރޭވުމުގެ ވަސީލަތްތައް ބޭނުންކުރާ މިންވަރު ފޯކާސްޓްކޮށް، ހަމަޖެހިފައިވާ އުސޫލުގެ ތެރެއިން ކޮންޓްރާސެޕްޓިވް ރިކުއިސިޝަން ތައްޔާރުކޮށް ފޮނުވުން.

(ކ) ކަމާބެހޭ ގަވާއިދުތަކާއި އުސޫލުތަކަށް ޞިއްޙީ ޚިދުމަތްދޭ ފަރާތްތައް އަހުލުވެރިވުން.

 

11 ވަނަ މާއްދާ - އާއިލާ ރޭވުމުގެ ޚިދުމަތްތައް ފޯރުކޮށްދިނުމުގެ އިންތިޒާމު

އާއިލާ ރޭވުމުގެ ޚިދުމަތްތައް ދިނުމަށް، ތިރީގައިވާ އިންތިޒާމުތައް، ޚިދުމަތްދޭ ތަނުގެ މެނޭޖްމަންޓުގެ ފަރާތުން ހަމަޖައްސަންވާނެއެވެ.

(ހ) މި ޚިދުމަތް ދިނުމަށް ކަނޑައަޅައިފައިވާ މަސައްކަތްތައް ކުރުމަށާއި ހިންގުމަށް، އެ މަސައްކަތަކަށް އެކަށޭނަ ޞިއްޙީ ޚިދުމަތުގެ ފަންނީ މަސައްކަތްތެރީންނާއި އެހެނިހެން މުވައްޒަފުން ކަނޑައަޅައި، ޚިދުމަތް ދިނުމުގެ އިންތިޒާމު ހަމަޖައްސަންވާނެއެވެ.

(ށ) މި ޚިދުމަތް ދިނުމުގައި، ޚިދުމަތް ހޯދާ ފަރާތްތަކުގެ ސިއްރު ހިފެހެއްޓޭކަން ކަށަވަރުކުރެވޭގޮތަށް (ޕްރައިވަސީ ލިބޭގޮތަށް) މައުލޫމާތު ފޯރުކޮށްދީ، އިތުބާރާއެކު ދެފަރާތުން މަޝްވަރާކޮށް ވާހަކަދެއްކޭނެ ގޮތަށް އިންތިޒާމުތައް ހަމަޖައްސަންވާނެއެވެ.

(ނ) ޚިދުމަތްދޭ ތަނުގައި ޚިދުމަތް ދިނުމަށް ބޭނުންވާ ތަކެއްޗާއި އާލާތްތައް ހަމަކޮށްފައި ހުންނަންވާނެއެވެ.

(ރ) އާއިލާ ރޭވުމުގެ ޚިދުމަތް ދިނުމަށް ކަނޑައެޅިފައިވާ ވަސީލަތްތައް، ޞިއްޙީ ޚިދުމަތްދޭ ތަނުން މެދުނުކެނޑި ފޯރުކޮށްދިނުމަށް ޓަކައި، ކަނޑައެޅިފައިވާ އުސޫލުގެ މަތީން ފޯކާސްޓްކޮށް، މި ތަކެއްޗާއި ވަސީލަތްތައް ހޯދުމުގެ ކަންކަން ހަމަޖައްސަންވާނެއެވެ.

(ބ) އާއިލާ ރޭވުމުގެ ޚިދުމަތް ދިނުމަށް ކަނޑައަޅައިފައިވާ އުސޫލުގެ މަތީން، ޚިދުމަތް ދިނުމަށް ހަމަޖައްސާ މުވައްޒަފުންނަށް، އެ މުވައްޒަފުންނަށް ކުރުމަށް ހަވާލުކުރާ މަސައްކަތާ އެއްގޮތްވާ ގޮތުގެ މަތީން މަސައްކަތަށް ހޭލުންތެރިކޮށް އަހުލުވެރިކުރުމަށް އެކަށީގެންވާ މަޢުލޫމާތާއި ތަމްރީނުތައް ދިނުމުގެ އިންތިޒާމު ހަމަޖައްސަންވާނެއެވެ. މި ތަމްރީނުތައް އޮންލައިންކޮށާއި ފިޒިކަލް ސެޝަންގެ ޒަރީއާއިން ދެވިދާނެއެވެ.

 

12 ވަނަ މާއްދާ - އާއިލާ ރޭވުމުގެ ޚިދުމަތް ފޯރުކޮށްދިނުމުގެ ގައިޑްލައިންތަކާއި މިންގަނޑުތައް

(ހ) އާއިލާ ރޭވުމުގެ ޚިދުމަތްތައް ފޯރުކޮށްދިނުމުގައި ބޭނުންކުރާނީ ތިރީގައިވާ ގައިޑްލައިންތަކާއި މިންގަނޑުތަކެވެ.

1. ނޭޝަނަލް ސްޓޭންޑަރޑްސް ފޮރ ފެމެލީ ޕްލޭނިންގ ސަރވިސަސް؛
2. އާއިލާ ރޭވުމާ ގުޅޭގޮތުން ދުނިޔޭގެ ޞިއްޙަތު ޖަމުޢިއްޔާއިން ޢާންމުކޮށްފައިވާ ގައިޑްލައިންތައް.

(ށ) މި އުސޫލުގެ 9 ވަނަ މާއްދާގެ ދަށުން، އާއިލާ ރޭވުމުގެ ޚިދުމަތްތައް ފޯރުކޮށްދިނުމުގައި ބޭނުންކުރާނެ އަދާހަމަ ގައިޑްލައިންތައް، އެޖެންސީއާއި މިނިސްޓްރީގެ ވެބްސައިޓުން ފެންނަން ހުންނާނެއެވެ.

 

13 ވަނަ މާޢްދާ - ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ފޯރުކޮށްދިނުމުގެ މަޤްޞަދު

މި އުސޫލުގެ ދަށުން ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ފޯރުކޮށްދިނުމުގެ މަޤްޞަދުތައް، ތިރީގައި މިވަނީއެވެ.

(ހ) ކުޑަކުދިން ހެދިބޮޑުވާ މިންވަރާއި، ކުއްޖާގެ ޙިއްސުތައް ތަރައްޤީވާ މިންވަރު ދެނެގަތުން.

(ށ) ދުޅަހެޔޮ އާބާދީއެއް ބިނާކުރުމަށް 5 (ފަހެއް) އަހަރުން ދަށުގެ ކުދިން ހެދިބޮޑުވާ މިންވަރު ދެނެގަތުމާއި، މައްސަލަތައް ދެނެގަތުމާއި، އަޅަންޖެހޭ ފިޔަވަޅުތައް އެޅުން.

(ނ) ޅަފަތުގައި ހެދިބޮޑުވުމުގައި އެއްވެސް ލަސްކަމެއް ހުންނަ ކުދިން ދުރާލައި ދެނެގަނެ، އިތުރު ފަރުވާއާއި ޚިދުމަތް ލިބިގަތުމަށް މަގުފަހިކުރުމާއި، އެކަމާބެހޭ މައްސަލަތަކަށް ރިއާޔަތްކޮށްގެން ޕުރޮގުރާމުތައް ހިންގުން.

 

14 ވަނަ މާއްދާ - ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ފޯރުކޮށްދިނުމުގައި ހިމެނޭ ބައިތައް

ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭގޮތުން ފޯރުކޮށްދެވޭ ޚިދުމަތްތައް ދިނުމުގައި ހިމެނޭ ބައިތައް، ތިރީގައި މިވަނީއެވެ.

(ހ) ކުޑަކުދިން ހެދިބޮޑުވާގޮތް ބެލުމަށް ކަނޑައަޅައިފައިވާ އުސޫލާއި މިންގަނޑުތަކާ އެއްގޮތަށް ކުދިންގެ އިސްކޮޅާއި ބަރުދަނާއި ބޮލުގެ ވަށަމިން ބަލައި މޮނިޓަރކުރުން.

(ށ) ކުދިން ހެދިބޮޑުވާ މިންގަނޑުތަކާ މެދު ބެލެނިވެރީންނަށް މައުލޫމާތު ދިނުމާއި، ކައުންސެލިންގ ދިނުމާއި، އުމުރާ އެއްވަރަށް އިސްކޮޅާއި ބަރުދަން ނުހުންނަ ހުރިހާ ކުދިންނާއި ހެދި ބޮޑުވަމުން ދިއުމުގެ މަރުޙަލާތަކުގައި މައްސަލަ ހުންނަ ކުދިންގެ މައުލޫމާތު ޚާއްޞަގޮތެއްގައި ބަލަހައްޓައި، ކަނޑައަޅައިފައިވާ ގޮތަށް ކައުންސެލިންގއާއި މައުލޫމާތު ދިނުން.

(ނ) ކުއްޖާގެ އުމުރުން 6 (ހައެއް) މަސްދުވަސްވަންދެން ހަމައެކަނި ގާތުން ކިރުދިނުމަށާއި، 6 (ހައެއް) މަސްފުރުމުން ފައިދާހުރި ކާނާ ދިނުމާއެކު، ކުއްޖާއަށް 2 (ދޭއް) އަހަރުވަންދެން ގާތުން ކިރުދިނުން ކުރިޔަށްގެންދިއުމަށް ބާރުއަޅައި ބެލެނިވެރީންނަށް މައުލޫމާތު ދިނުން.

(ރ) ކުޑަކުދިން ހެދިބޮޑުވަމުން ދިއުމުގެ މަރުޙަލާތައް ޗެކްކުރަމުން ގެންދިއުމާއި، ޗައިލްޑް ހެލްތު ރިކޯޑު ފޮތުގައިވާ ޗެކް ލިސްޓް ގަވާއިދުން ފުރިހަމަކުރަމުން ގެންދިއުމަށް ބެލެނިވެރީންނަށް ބާރުއެޅުމާއި، މައްސަލަ ހުންނަ ކުދިންނަށް އިތުރު ޚިދުމަތް ބޭނުންވާކަން ފާހަގަކޮށް މައުލޫމާތު ދިނުން.

(ބ) ކުދިންގެ ހެދިބޮޑުވުމުގެ މިންގަނޑުތަކާއި ކައުންސެލިންގއާއި މައުލޫމާތު ދެވުނު ގޮތް ރިކޯޑުކޮށް ޚިދުމަތްދޭ ތަނުގައި ”ޑިސްޓްރިކްޓް ހެލްތު އިންފޮމޭޝަން ސިސްޓަމް 2“ (ޑީ.އެޗް.އައި.އެސް 2) ގެ އޮންލައިން ސިސްޓަމް ނުވަތަ ރިކޯޑުކޮށް ބަލަހައްޓަން ކަނޑައަޅައިފައިވާ ނިޒާމާ އެއްގޮތްވާ ގޮތުގެ މަތީން ރަޖިސްޓަރީއެއް އަދާހަމަކޮށް ބެލެހެއްޓުން.

(ޅ) ކުޑަކުދިން ހެދިބޮޑުވާ ގޮތުގެ މައުލޫމާތާއި، ހެދިބޮޑުވުން ލަސްވާ ކުދިންގެ މައުލޫމާތު ޑީ.އެޗް.އައި.އެސް 2 ގެ އޮންލައިން ސިސްޓަމް ނުވަތަ ރިޕޯޓުކުރުމަށް އެ ވަގުތަކު ކަނޑައަޅައިފައިވާ ނިޒާމުގައިވާ ގޮތުގެ މަތީން ރިޕޯޓުކުރުން.

(ކ) ކުޑަކުދިން ހެދިބޮޑުވުމުގެ މިންގަނޑުތައް ބަލައި މޮނިޓަރކުރުމަށް ބޭނުންވާ އާލާތްތަކާއި ވަސީލަތްތަކުގެ ސްޓޮކް، ކަނޑައަޅައިފައިވާ އުސޫލުގެ މަތީން ހޯދައި ބެލެހެއްޓުން.

 

15 ވަނަ މާއްދާ - ގްރޯތު މޮނިޓަރިންގ އެންޑް ފްރޮމޯށަނާ ގުޅޭ ހިދުމަތްތައް ފޯރުކޮށްދިނުމުގެ އިންތިޒާމު

ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ދިނުމަށް، ތިރީގައިވާ އިންތިޒާމުތައް، އެ ތަނެއްގެ މެނޭޖްމަންޓުގެ ފަރާތުން ހަމަޖައްސަންވާނެއެވެ.

(ހ) ޚިދުމަތްދޭނެ މުވައްޒަފުން ނުވަތަ ޞިއްޙީ ޚިދުމަތްތެރީން ހަމަޖައްސަންވާނެއެވެ. އެގޮތުން މި ޚިދުމަތް ދިނުމަށް ކަނޑައަޅައިފައިވާ މަސައްކަތްތައް ކުރުމަށާއި ހިންގުމަށާއި، އެ މަސައްކަތަކަށް އެކަށޭނަ ޞިއްޙީ ޚިދުމަތުގެ ފަންނީ މަސައްކަތްތެރީންނާއި އެހެނިހެން މުވައްޒަފުން ކަނޑައަޅައި ޚިދުމަތް ދިނުމުގެ އިންތިޒާމު ހަމަޖައްސަންވާނެއެވެ.

(ށ) ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތް ދިނުމަށް ޚާއްޞަކޮށްފައިވާ ތަނެއް ހަމަޖައްސަންވާނެއެވެ. މި ތަނަކީ މި ޚިދުމަތް ހޯދާ ފަރާތްތަކުގެ ސިއްރު ހިފެހެއްޓޭކަން ކަށަވަރުކުރެވޭ ގޮތަށް (ޕްރައިވަސީ ލިބޭ ގޮތަށް) ހެދިބޮޑުވަމުންދާ ގޮތް ބެލުމުގެ މަސައްކަތާއި ނިއުޓްރިޝަން ކައުންސެލިންގ ފޯރުކޮށްދެވޭނެ ފަދަ ތަނެއް ވަކިން ނުވަތަ ވަކި ގަޑިތަކެއްގައި ބޭނުންކުރެވޭ ގޮތަށް ޚާއްޞަކުރެވިފައިވާ ތަނެއްކަމުގައި ވާންވާނެއެވެ. އަދި މި ޚިދުމަތް ދިނުމަށް ބޭނުންވާ ތަކެއްޗާއި އާލާތްތަކާއި ތަކެތި ހަމަކޮށްފައިވާ ތަނެއްކަމުގައި ވާންވާނެއެވެ.

(ނ) ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ހިންގުމަށް ބޭނުންވާ ތަކެތި ހަމަޖައްސަންވާނެއެވެ. އަދި މި ޚިދުމަތް ދިނުމަށް ބޭނުންވާ ތަކެތި މެދުނުކެނޑި ފޯރުކޮށްދިނުމަށް ޓަކައި ކަނޑައެޅިފައިވާ އުސޫލުގެ މަތީން ފޯކާސްޓްކޮށް، މި ތަކެއްޗާއި ވަސީލަތްތައް ހޯދުމުގެ ކަންކަން ހަމަޖައްސަންވާނެއެވެ.

(ރ) ޕުރޮގުރާމު ހިންގުމަށް ބޭނުންވާ ތަމްރީނާއި މަޢުލޫމާތު ދޭންވާނެއެވެ. ގްރޯތު މޮނިޓަރިންގ އެންޑް ޕްރޮމޯޝަނާ ގުޅޭ ޚިދުމަތްތައް ފޯރުކޮށްދިނުމަށް ކަނޑައަޅައިފައިވާ އުސޫލުގެ މަތީން ޚިދުމަތް ދިނުމަށް ހަމަޖައްސާ މުވައްޒަފުންނަށް، އެ މުވައްޒަފުން ކުރަން ހަވާލުކުރެވޭ މަސައްކަތްތަކަށް އަހުލުވެރިކުރުވުމަށް އެކަށީގެންވާ މަޢުލޫމާތާއި ތަމްރީނު ދޭންވާނެއެވެ. އަދި މި ތަމްރީނުތައް ދިނުމުގެ އިންތިޒާމު، އެޖެންސީގެ ލަފަޔާއި އެހީއާއެކު މެނޭޖްމަންޓުގެ ފަރާތުން ހަމަޖައްސަންވާނެއެވެ. މި ތަމްރީނުތައް އޮންލައިންކޮށް ދިނުމަކަށް މި އުސޫލު ހުރަހެއް ނާޅައެވެ.

 

16 ވަނަ މާއްދާ - ގްރޯތު މޮނިޓަރިންގ އެންޑް ޕްރޮމޯށަނާ ގުޅޭ ހިދުމަތްތައް ފޯރުކޮށްދިނުމުގެ އުސޫލުތަކާއި ގައިޑްލައިންތަކާއި މިންގަނޑުތައް