ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވާއިދު (ގަވާއިދު ނަންބަރު 2019-158) އަށް 2 ވަނަ އިސްލާހު ގެނައުމުގެ ގަވާއިދު 

(ގަވާއިދު ނަންބަރު 2019-1046)

(މި ގަވާއިދަށް އަމަލުކުރަން ފެށީ 30 ޖުލައި 2019 ގައި)

 

ގަވާއިދު ނަންބަރު 2019-158 (ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވާއިދު) އަށް އަންނަނިވި އިސްލާހު ގެނައުން.

 

1 ވަނަ މާއްދާ - ބުނެވިދިޔަ ގަވާއިދުގެ 13 ވަނަ މާއްދާގެ ފަހަތަށް އަންނަނިވި މާއްދާ އިތުރުކުރުން.

އިސްތިސްނާ ހާލަތްތައް 13-1.

(ހ) ތިރީގައި ބަޔާންކޮށްފައިވާ ދުންފަތުގެ ބާވަތްތަކުގައި، މި ގަވާއިދުގެ 5 ވަނަ މާއްދާއާއި 7 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެ މަތިން ދުންފަތުގެ ބާވަތްތައް ބަންދުކޮށް އިންޒާރުގެ ނޯޓިސް ޖެހުން، މި ގަވާއިދު ލާޒިމެއް ނުކުރެއެވެ.

1. ގަވާއިދު ނަންބަރު 2011-04 (ކަސްޓަމްސްގެ އާންމު ގަވާއިދު) ގެ ދަށުން، ޑިއުޓީ ހިލޭ ފިހާރަތަކަށް ގެންނަ މުދާބެހެއްޓުމަށް ހާއްސަކޮށް ރަޖިސްޓަރީ ކޮށްދީފައިވާ ބޮންޑެޑްވެއަރހައުސްތަކަށާއި، ރާއްޖެއިން މުދާ އެކްސްޕޯޓުކުރުމަށް ހާއްސަކޮށް ރަޖިސްޓަރީ ކޮށްދީފައިވާ އެކްސްޕޯޓް ބޮންޑެޑް ވެއަރހައުސްތަކަށް ގެންނަ ދުންފަތުގެ ބާވަތްތައް؛
2. ރާއްޖޭގެ ސަރަހައްދުގައި ހުންނަ ޑިއުޓީ ހިލޭ ފިހާރަތަކުގައި ވިއްކާ ދުންފަތުގެ ބާވަތްތައް؛
3. ގާނޫނު ނަންބަރު 1979-31 (ދިވެހިރާއްޖޭގެ އެކްސްޕޯޓު އިމްޕޯޓުގެ ގާނޫނު) ގެ ދަށުން ރާއްޖެއިން ބޭރުން ދަތުރުކޮށްފައި އަންނަ ދަތުރުވެރިންނަށް ޑިއުޓީ މައާފުކޮށްދީފައިވާ ދުންފަތުގެ ބާވަތްތަ އް، އެ ގާނޫނުގެ ދަށުން ހުއްދަ ދީފައިވާ މިންވަރަށް. 

(ށ) މި މާއްދާގެ (ހ) ގެ 1 ވަނަ ނަންބަރުގައި އެހެން ބަޔާންކޮށްފައި އޮތް ނަމަވެސް، އެ މާއްދާގެ ދަށުން ޑިއުޓީ ހިލޭ ފިހާރަތަކަށް ގެންނަ މުދާ ބެހެއްޓުމަށް ހާއްސަކޮށް ރަޖިސްޓަރީކޮށްދީފައިވާ ބޮންޑެޑް ވެއަރހައުސްތަކަށާއި، ރާއްޖެއިން މުދާ އެކްސްޕޯޓުކުރުމަށް ހާއްސަކޮށް ރަޖިސްޓަރީ ކޮށްދީފައިވާ އެކްސްޕޯޓް ބޮންޑެޑް ވެއަރހައުސްތަކަށް ގެންނަ ދުންފަތުގެ ބާވަތްތައް، ދިވެހިރާއްޖޭގައި ބޭނުންކުރުމަށްޓަކައި ދޫކުރެވޭނީ މި ގަވާއިދުގެ 5 ވަނަ މާއްދާއާއި 7 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެ މަތިން ބަންދުކޮށް އިންޒާރުގެ ނޯޓިސް ޖެހުމަށްފަހުއެވެ.

 

2 ވަނަ މާއްދާ - ބުނެވިދިޔަ ގަވާއިދުގެ 17 ވަނަ ފަހަތަށް އަންނަނިވި މާއްދާ އިތުރުކުރުން.

އިންވާރޑް ކްލިއަރަންސް ހޯދައިފައިވާ ބޯޓުފަހަރުގައި ހުރި ދުންފަތުގެ ބާވަތްތައް އެތެރެކުރުން 1-17.

މި ގަވާއިދުގައި އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތް ނަމަވެސް، 31 ޖުލައި 2019 ގެ ކުރިން، މޯލްޑިވްސް ކަސްޓަމްސް ސަރވިސްއިން އިންވާރޑް ކްލިއަރަންސް ދޫކޮށްފައިވާ އުޅަނދުތަކުގައި ދިވެހިރާއްޖެއަށް އެތެރެކުރުމަށް ގެނެސްފައިވާ ދުންފަތުގެ ބާވަތްތަކަކީ، މި ގަވާއިދުގެ ބޭނުމަށްޓަކައި ދިވެހިރާއްޖެއަށް އެތެރެކޮށްފައިވާ ދުންފަތުގެ ބާވަތްތައް ކަމަށް ބެލޭނެއެވެ.

 

3 ވަނަ މާއްދާ - ބުނެވިދިޔަ ގަވާއިދުގެ 18 ވަނަ މާއްދާގެ (ކ) ގެ (1) ވަނަ ނަންބަރ،ު އަންނަނިވި ގޮތަށް އިސްލާހުކުރުން.

މާނަކުރުން 18 (ކ).

(1) ރާއްޖެއަށް މުދާ އެތެރެކުރެވޭ މަރުހަލާގައި ނަމ،ަ ގަވާއިދާ ހިލާފަށް ހުރި ދުންފަތުގެ ހުރިހާ ބާވަތަކަށެވެ.

 

4 ވަނަ މާއްދާ - ބުނެވިދިޔަ ގަވާއިދުގެ 18 ވަނަ މާއްދާގެ (އ) ގެ ފަހަތަށް (ވ) އިތުރުކުރުން.

މާނަކުރުން 18.

(ވ) މި ގަވާއިދުގެ ބޭނުމަށްޓަކައި، ދުންފަތުގެ ބާވަތްތައް ރާއްޖެއަށް އެތެރެކުރެވޭ މަރުހަލާކަމަށް ބެލޭނީ، ދުންފަތުގެ ބާވަތްތައް ރާއްޖޭގެ ބަނދަރަކަށް ގެނެސް މޯލްޑިވްސް ކަސްޓަމްސް ސަރވިސްއިން ކަނޑައަޅައިފައިވާ އިޖުރާއަތުތަކާ އެއްގޮތަށް އެ މުދާ ރާއްޖޭގެ ބަނދަރަކަށް ބޭލުމަށެވެ.

 

މި ގަވާއިދަށް އަމަލުކުރަން ފަށާނީ، ދިވެހިސަރުކާރުގެ ގެޒެޓުގައި މި ގަވާއިދު ށާއިއުކުރާ ދުވަހުން ފެށިގެންނެވެ.

 

މައި ގަވާއިދު

ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވާއިދު (ގަވާއިދު ނަންބަރު 2019-158)

 

ކޮންސޮލިޑޭޓެޑް ގަވާއިދު

ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވާއިދު (ކޮންސޮލިޑޭޓެޑް ނަންބަރު 2019-158)