(މި ގަވާއިދަށް އަމަލުކުރަން ފެށީ 1 އޮކްޓޫބަރު 2024 ގައި)

(މި ގަވާއިދުގެ 2 ވަނަ މާއްދާގެ (ށ) އިން ވަނީ "މަނިޓަރީ ގަވާއިދު" 1987) އުވާލެވިފައި)

 

ފުރަތަމަ ބާބު

ފެށުން 

 

1 ވަނަ މާއްދާ - ތައާރުފާއި ނަން

(ހ) މިއީ، ފޮރިން އެކްސްޗޭންޖް ރޭޓު ގެ ނިޒާމު ތަންފީޒުކުރުމަށް ޓަކައި ދިވެހިރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައެޅުމާއި، ފޮރިން އެކްސްޗޭންޖް ރޭޓާބެހޭ އެހެންވެސް ސިޔާސަތުތައް ކަނޑައެޅުމުގެ ގަވާއިދެވެ.

(ށ) މި ގަވާއިދު އެކުލަވައިލައިފައިވަނީ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ 24 ވަނަ މާއްދާއާއި 38 ވަނަ މާއްދާގެ ދަށުންނެވެ.

(ނ) މި ގަވާއިދަށް ކިޔާނީ، "ބޭރު ފައިސާއާބެހޭ ގަވާއިދު" އެވެ.

 

2 ވަނަ މާއްދާ - ގަވާއިދަށް އަމަލުކުރަން ފެށުމާއި، އުވައިލެވޭ ގަވާއިދު

(ހ) މި ގަވާއިދަށް އަމަލުކުރަން ފަށާނީ، 1 އޮކްޓޫބަރު 2024 ގައެވެ.

(ށ) މި ގަވާއިދަށް އަމަލުކުރަން ފެށުމާއެކު، 1 މާޗް 1987 ގެ ތާރީހުގައިވާ "މަނިޓަރީ ގަވާއިދު" އުވުނީއެވެ.

 

3 ވަނަ މާއްދާ - މާނަކުރުން

މި ގަވާއިދުގައި އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި އިބާރާތްތަކާއި ލަފުޒުތަކަށް ދެވިފައިވަނީ، އެ އިބާރާތްތަކާއި ލަފުޒުތަކާ ގުޅިގެން، ތިރީގައި ދީފައިވާ މާނަކުރުމެވެ.

(ހ) "ރެމިޓެންސް ހިދުމަތްދޭ ފަރާތް" ކަމަށް ބުނެފައި އެވަނީ، ގާނޫނު ނަންބަރު 2021-08 (ގައުމީ ޕޭމަންޓް ސިސްޓަމްގެ ގާނޫނު) ގެ ދަށުން ރެމިޓެންސް ހިދުމަތް ދިނުމަށް ލައިސަންސް ލިބިފައިވާ ފަރާތަކަށެވެ.

(ށ) "ބައިނަލްއަގުވާމީ މުއާމަލާތް" ކަމަށް ބުނެފައި އެވަނީ، ރާއްޖެއިން ބޭރަށް ކުރެވޭ ނުވަތަ ބޭރުން ރާއްޖެއަށް ކުރެވޭ ބޭރު ފައިސާ ޓްރާންސްފަރކުރުމުގެ މުއާމަލާތަށެވެ.

(ނ) "ބޭންކު" ކަމަށް ބުނެފައި އެވަނީ، ގާނޫނު ނަންބަރު 2010-24 (ދިވެހިރާއްޖޭގެ ބޭންކިންގއާބެހޭ ގާނޫނު) ގެ ދަށުން ލައިސަންސް ލިބިފައިވާ ކޮންމެ ފަރާތަކަށެވެ.

(ރ) "ބޭރު ފައިސާ" ކަމަށް ބުނެފައި އެވަނީ، ދިވެހިރާއްޖެ ނޫން އެހެން ގައުމެއްގެ ފައިސާ އަށެވެ.

(ބ) "ކެޓެގަރީ އޭ ޓޫރިޒަމް އެސްޓެބްލިށްމަންޓް" ކަމަށް ބުނެފައި އެވަނީ، ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން، ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ، ދިވެހިރާއްޖޭގައި ހިންގާ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް އުޅަނދުތަކާއި، އެނޫންވެސް އެފަދަ ތަންތަނަށެވެ.

(ޅ) "ކެޓެގަރީ ބީ ޓޫރިޒަމް އެސްޓެބްލިށްމަންޓް" ކަމަށް ބުނެފައި އެވަނީ، ގާނޫނު ނަންބަރު 1999-02 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ ދަށުން ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ޓޫރިސްޓް ގެސްޓްހައުސްތަކަށާއި، މީހުން ދިރިއުޅޭ ރަށްރަށުގައި ހިންގާ ހޮޓާތަކުގެ ތެރެއިން 50 (ފަންސާސް) ކޮޓަރި ނުވަތަ އެއަށްވުރެ މަދު އަދަދެއްގެ ކޮޓަރި ރަޖިސްޓަރީކޮށްފައިވާ ތަންތަނަށެވެ.

(ކ) "އިންށުއަރެންސް ކުންފުނި" ކަމަށް ބުނެފައި އެވަނީ، ދިވެހިރާއްޖޭގައި އިންށުއަރެންސް ވިޔަފާރި ކުރުމަށް އޮތޯރިޓީން ދޫކުރާ ލައިސަންސް ލިބިފައިވާ ކުންފުންޏަކަށެވެ.

(އ) "އޮތޯރިޓީ" ކަމަށް ބުނެފައި އެވަނީ،ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ ދަށުން އުފައްދައިފައިވާ މޯލްޑިވްސް މަނިޓަރީ އޮތޯރިޓީއަށެވެ.

(ވ) "ފައިނޭންސިންގ ކުންފުނި" ކަމަށް ބުނެފައި އެވަނީ، ދިވެހިރާއްޖޭގައި ފައިނޭންސިންގ ވިޔަފާރި ކުރުމަށް އޮތޯރިޓީން ދޫކުރާ ލައިސަންސް ލިބިފައިވާ ކުންފުންޏަކަށެވެ.

(މ) "ފަރާތެއް" ކަމަށް ބުނެފައި އެވަނީ، ތަބީއީ ށަހްސާއި ގާނޫނީ ށަހްސު ހިމެނޭގޮތަށެވެ.

(ފ) "މީރާ" ކަމަށް ބުނެފައި އެވަނީ، ގާނޫނު ނަންބަރު 2010-03 (ޓެކްސް ނެގުމާބެހޭ އިދާރީ ގާނޫނު) ގެ ދަށުން އުފައްދައިފައިވާ މޯލްޑިވްސް އިންލަންޑް ރެވެނިއު އޮތޯރިޓީއަށެވެ.

(ދ) "މަސައްކަތު ދުވަސް" ކަމަށް ބުނެފައި އެވަނީ، ސަރުކާރު ބަންދު ދުވަހެއް ނޫން ކޮންމެ ދުވަހަކަށެވެ.

(ތ) "ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތައް" ކަމަށް ބުނެފައި އެވަނީ، ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) ގައި ޓޫރިޒަމް ދާއިރާގެ މުދަލާއި ހިދުމަތް ކަމަށް ބަޔާންކޮށްފައިވާ މުދަލާއި ހިދުމަތް ފޯރުކޮށްދޭ ފަރާތްތަކަށެވެ.

(ލ) "ޓޫރިޒަމް ދާއިރާގެ މުދަލާއި ހިދުމަތް" ކަމަށް ބުނެފައި އެވަނީ، ގާނޫނު ނަންބަރު 2011-10 (މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނު) ގައި ޓޫރިޒަމް ދާއިރާގެ މުދަލާއި ހިދުމަތުގެ ގޮތުގައި ބަޔާންކޮށްފައިވާ މުދަލާއި ހިދުމަތްތަކަށެވެ.

(ގ) "ޓޫރިސްޓުން" ކަމަށް ބުނެފައި އެވަނީ، ދިވެހިރާއްޖެއަށް އަންނަ ޓޫރިސްޓް ވިސާ އޮތް ބިދޭސީންނަށެވެ. 

 

 

ދެވަނަ ބާބު

މުއާމަލާތް ކުރެވޭނެ ފައިސާ

 

4 ވަނަ މާއްދާ - މުއާމަލާތް ކުރެވޭނެ ފައިސާ

(ހ) މި މާއްދާގެ (ރ) ގައި ބަޔާންކޮށްފައިވާ މުއާމަލާތްތައް ފިޔަވައި، ދިވެހިރާއްޖޭގައި ކުރާ ހުރިހާ މުއާމަލާތްތައް ކުރަންވާނީ ރުފިޔާއިންނެވެ. މި މުއާމަލާތްތަކުގެ ތެރޭގައި މުދަލާއި ހިދުމަތުގެ އަގު، މަސައްކަތުގެ އަގު، ފީއާއި ޗާޖު، ކުލި އަދާކުރުމާއި ބަލައިގަތުން އަދި މަސައްކަތުގެ އުޖޫރަ ދިނުމާއި ބަލައިގަތުން ހިމެނޭނެއެވެ.

(ށ) މުދަލާއި ހިދުމަތުގެ އަގު، މަސައްކަތުގެ އަގު، ފީއާއި ޗާޖު، ކުލ،ި އަދި މަސައްކަތުގެ އުޖޫރަ ރުފިޔާ ފިޔަވައި އެހެން ފައިސާއަކުން ހުށަހެޅުމަކީ މަނާ ކަމެކެވެ. 

(ނ) އެއްވެސް ފަރާތަކުން ބޭރު ފައިސާ ގެންގުޅުމާއި ބެހެއްޓުމަކީ މި ގަވާއިދުގެ ދަށުން މަނާ ކަމެއް ނޫނެވެ.

(ރ) ތިރީގައިވާ މުއާމަލާތްތައް، މި މާއްދާގެ (ހ) ގައި ރުފިޔާއިން ކުރުމަށް ބަޔާންކޮށްފައިވާ މުއާމަލާތްތަކުން އިސްތިސްނާވާނެއެވެ. އަދި، މި މާއްދާގެ (ށ) ގައި ބަޔާންކުރާ މަނާކުރުމުން ތިރީގައިވާ މުއާމަލާތްތަކާއި ކަންކަން އިސްތިސްނާވާނެއެވެ.

1. ގާނޫނެއް ނުވަތަ ގަވާއިދެއްގެ ދަށުން ބޭރު ފައިސާއަކުން ސަރުކާރަށް ނުވަތަ ދައުލަތުގެ އިދާރާއަކަށް ދެއްކުމަށް ހުއްދަކުރާ ފައިސާ ދެއްކުމާއި އެ ފައިސާ ބަލައިގަތުން؛
2. ބޭންކުތަކާއި ފައިނޭންސިންގ ކުންފުނިތަކުން ދޭ ހިދުމަތްތަކާއި، އެ އިދާރާތަކާއި އެ އިދާރާތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތައް؛
3. ރެމިޓެންސް ހިދުމަތްދޭ ފަރާތްތަކާއި އެ ފަރާތްތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތައް؛
4. އިންށުއަރެންސް ކުންފުނިތަކުން، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކަށް، ވިއްކާ އިންށުއަރެންސް ޕޮލިސީއާ ގުޅިގެން، އެ ކުންފުނިތަކާއި އެ ކުންފުނިތަކުގެ ކަސްޓަމަރުންނާ ދެމެދު ކުރެވޭ މުއާމަލާތްތަކާއި، އެފަދަ ޕޮލިސީއާ ގުޅިގެން އިންށުއަރެންސް އިންޓަރމީޑިއަރީތަކާއި ކަސްޓަމަރުންނާ ދެމެދު ކުރެވޭ މުއާމަލާތްތައް؛
5. ބައިނަލްއަގުވާމީ މުއާމަލާތް ތައް؛
6. ޓޫރިސްޓުންނަށް ވިއްކާ މުދަލާއި ޓޫރިސްޓުންނަށް ދޭ ހިދުމަތުގެ އަގު ބޭރު ފައިސާއިން ބަލައިގަތުން؛
7. އެކްސްޕޯޓް ކުރެވޭ މުދަލާއި ހިދުމަތުގެ އަގު ބޭރު ފައިސާއިން ބަލައިގަތުން؛
8. ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލާއި ހޯދާ ހިދުމަތުގެ އަގު، ބޭރު ފައިސާއިން އަދާކުރުމަށް އެ ވިޔަފާރިއަކުން ބޭނުންވާނަމަ ބޭރު ފައިސާއިން އަގު އަދާކުރުން، އަދި އެ މުދާ ވިއްކި ނުވަތަ ހިދުމަތް ފޯރުކޮށްދިން ފަރާތުން ބޭރު ފައިސާއިން އަގު ބަލައިގަތުން؛
9. ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުންވާ ނަމަ، އެ ވިޔަފާރިއަކުން ހިއްސާދާރުންނަށް ޑިވިޑެންޑް ދިނުމާއި، އެ ވިޔަފާރިއަކާއިއެ ވިޔަފާރިއެއްގެ ހިއްސާދާރުންނާ ދެމެދު ކުރެވޭ އެހެން މުއާމަލާތްތައް، އަދި އެފަދަ ވިޔަފާރިއަކާއި އެ ވިޔަފާރިއަކާ ގުޅުންހުރި އެހެން ފަރާތްތަކާ ދެމެދުކުރެވޭ މުއާމަލާތްތައް؛
10. ބޭރު ފައިސާއިން އާމްދަނީ ލިބޭ ވިޔަފާރިއެއްގެ ހިއްސާ ގަނެވިއްކުން؛
11. ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުންވާ ނަމަ، އެ ވިޔަފާރިއެއްގެ މުވައްޒަފުންނަށް ބޭރު ފައިސާއިން މުސާރައާއި އިނާޔަތްތައް ދިނުމާއި، މުވައްޒަފުން މުސާރަ އާއި އިނާޔަތްތައް ބޭރު ފައިސާއިން ބަލައިގަތުން؛
12. ޑިއުޓީ ފްރީ ފިހާރަތަކުން ޓޫރިސްޓުންނަށް ވިއްކާ މުދަލާއި ހިދުމަތުގެ އަގު ޓޫރިސްޓުންގެ އަތުން ބަލައިގަތުމާއި، ޓޫރިސްޓުން އެ އަގު އަދާކުރުން.

 

ތިންވަނަ ބާބު

ބޭރު ފައިސާއިން ލިބޭ އާމްދަނީ ޑިޕޮސިޓްކުރުމާއި މާރުކުރުން

 

5 ވަނަ މާއްދާ - ޓޫރިޒަމް ދާއިރާގައި ހަރަކާތްތެރިވާ ފަރާތްތައް ރަޖިސްޓަރީކުރުން

(ހ) މި ގަވާއިދަށް އަމަލުކުރަން ފަށާއިރު، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ގޮތުގައި މީރާގައި ރަޖިސްޓަރީކޮށްފައިވާ ހުރިހާ ފަރާތްތަކުން، މި ގަވާއިދަށް އަމަލުކުރަން ފަށާތާ 30 (ތިރީސް) ދުވަހުގެ ތެރޭގައި ރަޖިސްޓަރީ ކުރުމަށް އޮތޯރިޓީއަށް ހުށަހަޅަންވާނެއެވެ.

(ށ) މި ގަވާއިދަށް އަމަލުކުރަން ފަށާ ދުވަހުގެ ފަހުން، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ގޮތުގައި މީރާގައި ރަޖިސްޓަރީ ކުރާ ފަރާތްތަކުން، ރަޖިސްޓަރީކުރާތާ 30 (ތިރީސް) ދުވަހުގެ ތެރޭގައި ރަޖިސްޓަރީ ކުރުމަށް އޮތޯރިޓީއަށް ހުށަހަޅަންވާނެއެވެ.

(ނ) މި މާއްދާގެ (ހ) އާއި (ށ) ގެ ދަށުން ރަޖިސްޓަރީ ކުރުމަށް ހުށަހަޅާނީ، އޮތޯރިޓީން އެކަމަށް ކަނޑައަޅާ ފޯމު ފުރިހަމަ ކުރުމަށް ފަހު، އެ ފޯމުގައި ނުވަތަ އޮތޯރިޓީން ކަނޑައަޅާ މައުލޫމާތާއި ލިޔެކިޔުންތަކާ އެކުގައެވެ.

 

6 ވަނަ މާއްދާ - ބޭރު ފައިސާއިން ލިބޭ އާމްދަނީގެ މައުލޫމާތު ހުށަހެޅުން

ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން، މީލާދީ މަހެއްގެ ތެރޭގައި، ވިއްކާ ނުވަތަ ފޯރުކޮށްދޭ ޓޫރިޒަމް ދާއިރާގެ މުދަލާއި ހިދުމަތުގެ ތަފުސީލު، ލަސްވެގެން ޖެހިގެން އަންނަ މަހުގެ 28 ވަނަ ދުވަހުގެ ކުރިން، އޮތޯރިޓީން ކަނޑައަޅާ ގޮތަކަށް އޮތޯރިޓީއަށް ހުށަހަޅަންވާނެއެވެ.

 

7 ވަނަ މާއްދާ - ބޭރު ފައިސާއިން ލިބޭ އާމްދަނީ ބޭންކު އެކައުންޓަކަށް ޖަމާކުރުން

(ހ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން، ވިއްކާ ނުވަތަ ފޯރުކޮށްދޭ ޓޫރިޒަމް ދާއިރާގެ މުދަލާއި ހިދުމަތަށް، މީލާދީ މަހެއްގެ ތެރޭގައި ލިބޭ ބޭރު ފައިސާގެ ޖުމުލަ (ރިއަލައިޒްޑް ސޭލްސް ޕްރޮސީޑްސް) އެކުގައި، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކެއްގައި ހުޅުވައިފައިވާ ބޭރު ފައިސާގެ އެކައުންޓަކަށް ޓްރާންސްފަރ ނުވަތަ ޖަމާކުރަންވާނެއެވެ. މިސާލަކަށް، އޮކްޓޫބަރު 2024 ގައި ރިއަލައިޒްވާ ސޭލްސް ޕްރޮސީޑްސް (އެ ފައިސާ ނިސްބަތްވަނީ ކޮންމެ އިރެއްގެ ސޭލްސް އަކަށް ކަމުގައި ވީނަމަވެސް) ލަސްވެގެން 28 ޖަނަވަރީ 2025 ގައި ބޭންކް އެކައުންޓަކަށް ޓްރާންސްފަރ ނުވަތަ ޖަމާކުރަންވާނެއެވެ.

(ށ) މި މާއްދާގެ (ހ) ގެ ދަށުން ފައިސާ ޖަމާކުރާނީ، އެމެރިކާ ޑޮލަރުން ނުވަތަ އޮތޯރިޓީން ހުއްދަކުރާ އެހެންވެސް ބޭރު ފައިސާއަކުންނެވެ.

(ނ) ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން، މި މާއްދާގެ (ހ) ގައި ބަޔާންކޮށްފައިވާ ގޮތުގެ މަތީން، ބޭންކަކަށް ބޭރު ފައިސާ ޓްރާންސްފަރ ނުވަތަ ޖަމާކުރުމަށް ފަހު، އެކަމުގެ މައުލޫމާތާއި އޮތޯރިޓީން އަންގާ އެހެންވެސް މައުލޫމާތު، އޮތޯރިޓީން ކަނޑައަޅާ ގޮތަކަށް އޮތޯރިޓީއަށް ހުށަހަޅަންވާނެއެވެ.

 

8 ވަނަ މާއްދާ - ބޭރު ފައިސާއިން ލިބޭ އާމްދަނީ މާރުކުރުން

(ހ) ކެޓެގަރީ އޭ ޓޫރިޒަމް އެސްޓެބްލިށްމަންޓަކަށް މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 (ފަސް ސަތޭކަ) އެމެރިކާ ޑޮލަރުގެ ރޭޓުން، އެ މަހެއްގެ ތެރޭގައި އައިސްފައިވާ ޖުމުލަ ޓޫރިސްޓުންނަށް ޖެހޭ އަދަދ،ު އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން، އެ އެސްޓެބްލިށްމަންޓް ހިންގާ ފަރާތުން ބޭންކަކަށް، ރުފިޔާއަށް މާރުކުރަންވާނެއެވެ.

(ށ) ކެޓެގަރީ ބީ ޓޫރިޒަމް އެސްޓެބްލިށްމަންޓަކަށް މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 25 (ފަންސަވީސް) އެމެރިކާ ޑޮލަރުގެ ރޭޓުން، އެ މަހެއްގެ ތެރޭގައި އައިސްފައިވާ ޖުމުލަ ޓޫރިސްޓުންނަށް ޖެހޭ އަދަދ،ު އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން، އެ އެސްޓެބްލިށްމަންޓް ހިންގާ ފަރާތުން ބޭންކަކަށް، ރުފިޔާއަށް މާރުކުރަންވާނެއެވެ.

(ނ) ކެޓެގަރީ އޭ ޓޫރިޒަމް އެސްޓެބްލިށްމަންޓެއް ހިންގާ ފަރާތަކުން ނުވަތަ ކެޓެގަރީ ބީ ޓޫރިޒަމް އެސްޓެބްލިށްމަންޓެ އް ހިންގާ ފަރާތަކުން، މި މާއްދާގެ (ހ) ނުވަތަ (ށ) ގައި ބަޔާންކޮށްފައިވާ މިންވަރަށް ބޭރު ފައިސާ މާރުކޮށްފި ނަމަ، ތިރީގައި ބަޔާންކޮށްފައިވާ ބޭރު ފައިސާގެ އިލްތިޒާމެއް ނުވަތަ އިލްތިޒާ މުތައް އަދާކުރުމަށް ބޭނުންވާ ބޭރު ފައިސާ އެ ފަރާތެއްގެ އަތުގައި ނުހުންނާނެކަން ބަޔާންކޮށް އޮތޯރިޓީއަށް ހުށަހެޅުމުން، އެ މިންވަރަށް ބޭރު ފައިސާ ނުހުންނާނެކަމަށް އޮތޯރިޓީއަށް ގަބޫލުކުރެވޭ ނަމަ، މި މާއްދާގެ (ހ) ނުވަތަ (ށ) ގައި ބަޔާންކޮށްފައިވާ އަދަދަށް ވުރެ މަދު އަދަދެއް މާރު ކުރުމުގެ ހުއްދަ އޮތޯރިޓީން ދެވިދާނެއެވެ.

1. ބޭރު ފައިސާއިން އަދާ ކުރަންޖެހިފައިވާ ޓެކްސް؛
2. މާލީ އިދާރާއަކަށް ބޭރު ފައިސާއިން އަދާ ކުރަންޖެހިފައިވާ ދަރަނި؛
3. ކޯޓު ހުކުމެއްގައި ދެއްކުމަށް ކަނޑައަޅައިފައިވާ ބޭރު ފައިސާގެ އިލްތިޒާމުތައް؛ ނުވަތަ 
4. އޮތޯރިޓީން ހުއްދަދޭ އެހެންވެސް ބޭރު ފައިސާގެ އިލްތިޒާމުތައް.

(ރ) މި މާއްދާގެ (ނ) ގެ ދަށުން އޮތޯރިޓީގެ ހުއްދައަށް އެދި ހުށަހަޅާނީ، ބޭރު ފައިސާއިން އަދާކުރަންޖެހިފައިވާ އިލްތިޒާމުތަކުގެ ތަފުސީލާއި، އޮތޯރިޓީން ކަނޑައަޅާ އެހެން މައުލޫމާތާއި ލިޔެކިޔުންތަކާއެކުގައެވެ.

(ބ) މި މާއްދާގެ (ހ) ނުވަތަ (ށ) ގެ ދަށުން ބޭންކަކަށް ކޮންމެ ހަފުތާއަކު ލިބޭ ބޭރު ފައިސާގެ %60 (ފަސްދޮޅަސް އިންސައްތަ)، ޖެހިގެން އަންނަ ހަފުތާގެ ބުދަދުވަހުގެ ކުރިން އެ ބޭންކުން އޮތޯރިޓީއަށް ވިއްކަންވާނެއެވެ.

(ޅ) މި މާއްދާގެ (ހ) ނުވަތަ (ށ) ގެ ދަށުން ކޮންމެ ބޭންކަކަށް ވެސް މަހެއްގެ ތެރޭގައި ލިބޭ ބޭރު ފައިސާގެ ތަފުސީލު، އޮތޯރިޓީން ކަނޑައަޅާ މުއްދަތެއްގެ ތެރޭގައި، އޮތޯރިޓީން ކަނޑައަޅާ ގޮތަކަށް އެ ބޭންކަކުން އޮތޯރިޓީއަށް ހުށަހަޅަންވާނެއެވެ.

(ކ) މި މާއްދާގެ (ހ) ނުވަތަ (ށ) ގައި ބަޔާންކޮށްފައިވާ ގޮތުގެ މަތީން، މަހެއްގެ ތެރޭގައި ބޭންކަކަށް މާރުކޮށްފައިވާ ބޭރު ފައިސާގެ ތަފުސީލާއި، އޮތޯރިޓީން ކަނޑައަޅާ އެހެންވެސް މައުލޫމާތު، އެ މަހެއް ނިމޭތާ 10 (ދިހައެއް) މަސައްކަތު ދުވަހުގެ ތެރޭގައި، އޮތޯރިޓީން ކަނޑައަޅާ ގޮތަކަށް ކެޓެގަރީ އޭ ޓޫރިޒަމް އެސްޓެބްލިށްމަންޓްތައް ހިންގާ ފަރާތްތަކުންނާއި ކެޓެގަރީ ބީ ޓޫރިޒަމް އެސްޓެބްލިށްމަންޓްތައް ހިންގާ ފަރާތްތަކުން، އޮތޯރިޓީއަށް ހުށަހަޅަންވާނެއެވެ.

 

9 ވަނަ މާއްދާ - ރިކޯޑު ބެހެއްޓުން

ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން، އޮތޯރިޓީން ކަނޑައަޅައި އަންގައި، އެ ފަރާތްތަކުގެ ޓޫރިޒަމް ދާއިރާގެ މުދަލާއި ހިދުމަތްތަކާބެހޭ މައުލޫމާތާއި ލިޔެކިޔުންތައް، އެ މުދަލެއް ނުވަތަ ހިދުމަތެއް ވިއްކި ތާރީހުން ފެށިގެން މަދުވެގެން 5 (ފަހެއް) އަހަރުދުވަހުގެ މުއްދަތަށް ބަހައްޓަންވާނެއެވެ.

 

 

 ހަތަރުވަނަ ބާބު

ރަނގަޅުކުރުމަށް އެޅޭ ފިޔަވަޅުތަކާއި ގަވާއިދު ހިންގުމަށް އެޅޭ ފިޔަވަޅު

 

10 ވަނަ މާއްދާ - ރަނގަޅުކުރުމަށް އެޅޭ ފިޔަވަޅުތަކާއި ގަވާއިދު ހިންގުމަށް އެޅޭ ފިޔަވަޅު

(ހ) އެއްވެސް ފަރާތަކުން މި ގަވާއިދުގެ 4 ވަނަ މާއްދާއާ ހިލާފުވެއްޖެ ނަމަ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ 24 ވަނަ މާއްދާގެ (ބ) ގައި ބަޔާންކޮށްފައިވާ ފަދައިން، އެ ފަރާތެއް 10,000 (ދިހަހާސް) ރުފިޔާއާއި 1,000,000 (އެއް މިލިއަން) ރުފިޔާއާ ދެމެދުގެ އަދަދަކުން ޖޫރިމަނާކުރެވިދާނެއެވެ.

(ށ) އެއްވެސް ފަރާތަކުން މި ގަވާއިދުގެ 5 ވަނަ މާއްދާއިން ފެށިގެން 9 ވަނަ މާއްދާގެ ނިޔަލަށް ހުރި މާއްދާތަކުގެ ތެރެއިން މާއްދާއަކާ ހިލާފުވެއްޖެ ނަމަ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ 40 ވަނަ މާއްދާގެ (ށ) ގައި ބަޔާންކޮށްފައިވާ ފަދައިން، އެ ފަރާތެއް 5,000 (ފަސްހާސް) ރުފިޔާއާއި 1,000,000 (އެއްމިލިއަން) ރުފިޔާއާ ދެމެދުގެ އަދަދަކުން ޖޫރިމަނާ ކުރެވިދާނެއެވެ. އަދި، ޖޫރިމަނާކުރުމުގައި، އޮތޯރިޓީއަށް ފެނިއްޖެ ހިނދެއްގައި، ވެފައިވާ ހިލާފު ރަނގަޅުކުރަންދެން ނުވަތަ އަމަލުކުރަންޖެހޭ ކަންތައްތަކަށް އަމަލުކުރަންދެން ހިނގާ ކޮންމެ ދުވަހެއްގެ މައްޗަށް 5,000 (ފަސްހާސް) ރުފިޔާއަށް ވުރެ އިތުރުނުވާނެ އަދަދެއް ކަނޑައެޅިދާނެއެވެ.

 

މައި ގާނޫނު

މަނިޓަރީ އޮތޯރިޓީގެ ގާނޫނު (ގާނޫނު ނަންބަރު 1981-06

 

އުވުނު ގަވާއިދު

މަނިޓަރީ ގަވާއިދު - 1987 (އަދި ނުހިމެނި)