މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިށަނުގެ ގަވާއިދު

(މި ގަވާއިދަށް އަމަލުކުރަންފެށީ 28 ސެޕްޓެމްބަރު 2026 ގައި)

1 ވަނަ މާއްދާ - ތައާރުފާއި ނަން

(ހ) މި ގަވާއިދަކީ، ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަންގެ ގާނޫނު) ގެ 35 ވަނަ މާއްދާގެ ދަށުން އެކުލަވައިލައިފައިވާ ގަވާއިދެކެވެ.
(ށ) މި ގަވާއިދަށް ކިޔާނީ، "މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިށަނުގެ ގަވާއިދު" އެވެ.

 

2 ވަނަ މާއްދާ - މަގްސަދު

މި ގަވާއިދުގެ މައިގަނޑު މަގްސަދަކީ، އަންނަނިވި ކަންކަން ހާސިލުކުރުމެވެ.

(ހ) ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަންގެ ގާނޫނު) އާއި، ގާނޫނު ނަންބަރު 2025-16 (ބްރޯޑްކާސްޓްކުރުމުގެ ގާނޫނު) އިން ކޮމިށަނާ މަތިކޮށްފައިވާ ގާނޫނީ ޒިންމާތަކާއި، ލިބިދީފައިވާ އިހުތިޔާރުތައް ތަންފީޒުކުރުމަށް ބޭނުންވާ އިދާރީ އޮނިގަނޑާއި، އިޖުރާއީ އޮނިގަނޑު އެކަށައެޅުން.

(ށ) ކޮމިށަނުގެ ހިންގުމާއި، ނިންމުންތައް ނިންމުމުގެ މަރުހަލާތަކުގައި ދެފުށްފެންނަ، ޒިންމާދާރު އަދި ހަރުދަނާ ގަވަރނަންސް ނިޒާމެއް ގާއިމުކޮށް ދެމެހެއްޓުން.

(ނ) ދިވެހިރާއްޖޭގައި ނޫސްވެރިކަމުގެ މިނިވަންކަން ކުރިއަރުވައި މީޑިއާގެ ޒިންމާދާރުކަން އިތުރުކުރުމަށް ބޭނުންވާ ރެގިއުލޭޓަރީ މިންގަނޑުތައް ހަރުދަނާކަމާއެކު ހިންގުން.

(ރ) ނޫސްވެރިކަމުގެ މިނިވަންކަން ނެގެހެއްޓުމަށްޓަކައި، މީޑިއާތަކާއި ނޫސްވެރިންނަށް ގާނޫނުން ލިބިދޭ ހިމާޔަތާއި ރައްކައުތެރިކަން ކަށަވަރުކޮށްދިނުން.

 

3 ވަނަ މާއްދާ - މައިގަނޑު އަސާސްތައް

ކޮމިށަނުގެ އެންމެހައި މަސައްކަތްތަކާއި ނިންމުންތައް ބިނާކުރަންވާނީ އަންނަނިވި އަސާސްތަކުގެ މައްޗަށެވެ.

(ހ) އިސްލާމްދީނާއި، އިންސާނީ ހައްގުތަކާއި، ގައުމީ ސަލާމަތާއި، ނާޒުކު ޖަމާއަތްތަކަށް އިހްތިރާމުކުރުން.

(ށ) ނޫސްވެރިކަމުގެ މިނިވަންކަން ވީހައިވެސް ފުޅާ ދާއިރާއެއްގައި ކުރިއަރުވައި، ތަރައްގީކޮށް، ދެމެހެއްޓުމަށްޓަކައި، މީޑިއާއާއި މީޑިއާގައި މަސައްކަތްކުރާ ފަރާތްތަކާއި، ނޫސްވެރިންނަށް އެކަށީގެންވާ ހިމާޔަތާއި ރައްކައުތެރިކަން ފޯރުކޮށްދިނުން.

(ނ) ކޮމިށަނުގެ މެންބަރުންނާއި މުވައްޒަފުންގެ މަސައްކަތުގައި، ނަޒާހަތްތެރިކަން އިސްކޮށް، ރިށްވަތާއި، މަކަރާއި ހީލަތުން ދުރުހެލިވުމާއެކު، އަމިއްލަ މަންފާއަށްޓަކައި މަގާމުގެ ބާރު ނަހަމަގޮތުގައި ބޭނުންނުކުރުން.

 

4 ވަނަ މާއްދާ - ކޮމިށަނުގެ ރައީސްގެ ޒިންމާ

ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަންގެ ގާނޫނު) ގެ 23 ވަނަ މާއްދާއަށް ރިއާޔަތްކޮށް، ކޮމިށަނާ މަތިކުރެވިފައިވާ ގާނޫނީ ޒިންމާ އަދާކުރުމުގައި، ކޮމިށަނުގެ ރައީސްގެ ޒިންމާތައް، ތިރީގައި ބަޔާންކޮށްފައި މިވަނީއެވެ.

(ހ) ގާނޫނުގެ ދަށުން ކޮމިށަނުން ކުރަންޖެހޭ އެންމެހައި މަސައްކަތްތައް ރާވައި ހިންގުން.

(ށ) ކޮމިށަނުގެ ޖަލްސާތަކުގެ އެޖެންޑާ ކަނޑައެޅުމާއި، ރިޔާސަތު ބެލެހެއްޓުމާއި، ޖަލްސާތަކުގެ ގަވާއިދުތައް ހިފެހެއްޓުން.

(ނ) ކޮމިށަނުގެ މަސައްކަތްތައް ކޮމިށަނުގެ މެންބަރުންނާ ހަވާލުކުރުން.

(ރ) ކޮމިށަނުގެ އެންމެހައި ކަންކަން ހިންގައި ބެލެހެއްޓުން.

(ބ) ކޮމިށަންގެ މެންބަރުންގެ މެދުގައި، މަސްލަހަތު ފުށުއަރާ އެންމެހައި ކަންކަން ހާމަކޮށް ރައްޔިތުންގެ އިތުބާރު ދެމެހެއްޓޭނެ ފަދަ ގޮތަކަށް ކޮމިށަނުގެ ގަވަރނަންސް ބައްޓަންކުރުން 

(ޅ) ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ގާނޫނު) ގެ 6 ވަނަ މާއްދާއާއި 25 ވަނަ މާއްދާއާއި 34 ވަނަ މާއްދާ ނެގެހެއްޓުމުގައި މެންބަރެއްގެ ހައިސިއްޔަތުން ކުރަންޖެހޭ އެންމެހައި ކަންކަން ކުރުމުގެ ފުރިހަމަ އިހުތިޔާރާއި، އެއްބާރުލުން، މެންބަރުންނަށް ކޮމިށަނުގެ ރައީސް ދޭންވާނެއެވެ.

(ކ) ވަކިވަކި މެންބަރުންނާ ހަވާލުކުރެވޭ މަސައްކަތްތައް ކުރިޔަށްގެންދާނެ ގޮތުގެ ހަރުދަނާ ނިޒާމެއް ގާއިމުކުރަންވާނެއެވެ.

 

5 ވަނަ މާއްދާ - ކޮމިށަނުގެ ނައިބު ރައީސްގެ ޒިންމާތައް ތިރީގައި ބަޔާންކޮށްފައި މިވަނީއެވެ.

(ހ) ކޮމިށަނުގެ ރައީސަށް އޭނާގެ މަސްއޫލިއްޔަތުތައް އަދާކުރުމަށް ނުކުޅެދިއްޖެ ހާލަތެއްގައި ނުވަތަ އުޒުރުވެރިވެއްޖެ ހާލަތެއްގައި ނުވަތަ އެ މަގާމު ހުސްވެއްޖެ ހާލަތެއްގައި ރައީސްގެ މަސްއޫލިއްޔަތުތައް ވަގުތީގޮތުން އަދާކުރުން.

(ށ) ކޮމިށަނުގެ މަސައްކަތްތަކާ ގުޅިގެން ކޮމިށަނުގެ ރައީސް ހަވާލުކުރާ މަސައްކަތްތައް ކުރުން.

(ނ) ކޮމިށަނުގެ ރައީސްގެ މަސްއޫލިއްޔަތުތައް އަދާކުރުމުގައި އެހީތެރިވެދިނުން.

 

6 ވަނަ މާއްދާ - މެންބަރުންގެ ޒިންމާތައް ތިރީގައި މިވަނީއެވެ.

(ހ) ކަނޑައެޅިގެން އެނގެން އޮތް އުޒުރެއް ދިމާވެގެން މެނުވީ، ކޮމިށަނުގެ ޖަލްސާތަކަށް ހާޒިރުވުން.

(ށ) ކަނޑައެޅިގެން އެނގެން އޮތް އުޒުރެއް ދިމާވެގެން މެނުވީ، ކޮމިށަނުން ހަވާލުކުރާ މަސްއޫލިއްޔަތުތައް އަދާކުރުން.

(ނ) ކޮމިށަނުގެ މަސައްކަތާ ބެހޭގޮތުން ކަނޑައަޅަންޖެހޭ ސިޔާސަތުތަކާއި މިންގަނޑުތައް ކަނޑައެޅުން.

(ރ) ކޮމިށަނަށް ހުށަހަޅާ ށަކުވާތަކާއި މައްސަލަތައް ބެލުން.

(ބ) ސިއްރުގެ ގޮތުގައި ކޮމިށަނުން ކަނޑައަޅާ މައުލޫމާތު، ސިއްރުގެ ގޮތުގައި ހިފެހެއްޓުން 

(ޅ) ތިމާއަށް ލިބިދޭ ބާރާއި އިހުތިޔާރު، ނުރަނގަޅު ނިޔަތެއްގައި ވަކި ފަރާތަކަށް ގެއްލުމެއް ދިނުމުގެ ބޭނުމުގައި ބޭނުންނުކުރުމާއި، ގާނޫނުގެ ދާއިރާގެ ތެރޭގައި ލިބިދޭ އިހުތިޔާރު ސައްހަގޮތުގައި ބޭނުންކުރުމާއި، އެ އިހުތިޔާރު ބޭނުންކުރުމުގައި އެހެން މީހުންގެ ހައްގުތަކަށާއި ވާޖިބުތަކަށާއި ގާނޫނުގައިވާ ސައްހަ މަސްލަހަތުތަކަށް އިހްތިރާމުކުރުން.

(ކ) މިނިވަންކަމާއި އަދުލުވެރިކަމާއި އިންސާފުވެރިކަމާއެކު ކޮމިށަނަށް ހިދުމަތްކުރުމާއި، ހަވާލުކުރެވޭ ކަންކަން އެއްވެސް ނުފޫޒަކަށް ލެނބުމެއް ނެތި އިސްލާމްދީނާއި ދިވެހިރާއްޖޭގެ ގާނޫނުތަކާ އެއްގޮތްވާ ގޮތުގެ މަތިން ކުރުން.

(އ) ނޫސްވެރިކަމުގެ ހުނަރު ތަރައްގީކުރުމަށް އެހީތެރިވެދިނުން.

(ވ) ނޫސްވެރިކަމުގެ މިނިވަންކަން ދެމެހެއްޓުމަށްޓަކައި މީޑިއާއާއި، މީޑިއާގައި މަސައްކަތްކުރާ ފަރާތްތަކާއި، ނޫސްވެރިންނަށް ގާނޫނުން ލިބިދޭ ހިމާޔަތާއި ރައްކައުތެރިކަން ފޯރުކޮށްދިނުމަށް މަސައްކަތްކުރުން.

(މ) މެންބަރުންނާ ވަކިވަކިން ހަވާލުކުރެވޭ މަސައްކަތްތަކާގުޅޭ ތެދު، އަދާހަމަ މައުލޫމާތު އެ މެންބަރަކު ކޮމިށަނާ ހިއްސާކުރަމުން ގެންދިއުން.

(ފ) ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ގާނޫނު) ގެ 6 ވަނަ މާއްދާ (ކޮމިށަނުން ނަގަހައްޓަންޖެހޭ އަސާސީ އުސޫލުތައް) އާއި، 23 ވަނަ މާއްދާ (ކޮމިށަނުގެ ރައީސްގެ ޒިންމާ) އާއި، 34 ވަނަ މާއްދާ (މަސްލަހަތު ހިމެނޭ ކަންކަން ހާމަކުރުން) ނެގެހެއްޓުމުގައި ކޮމިށަނުގެ ރައީސްގެ ހައިސިއްޔަތުން ކުރަންޖެހޭ އެންމެހައި ކަންކަން ކުރުމުގައި އެހީތެރިކަމާއި އެއްބާރުލުން، މެންބަރުން ދިނުން.

 

7 ވަނަ މާއްދާ -  މެންބަރުންގެ ސުލޫކީ މިންގަނޑު

ކޮމިށަނުގެ މެންބަރުންގެ މަސްއޫލިއްޔަތުތައް އަދާކުރުމުގައްޔާއި، ބާރުތައް ބޭނުންކުރުމުގައްޔާއި، ކޮމިށަނުގެ މެންބަރުކަމުގެ މުއްދަތުގައި، ކޮމިށަނުގެ ކޮންމެ މެންބަރަކު ވެސް، އަންނަނިވި ގޮތަށް އަމަލުކުރަންވާނެއެވެ.

(ހ) ގާނޫނުގެ ވެރިކަން ކުރިއަރުވައި، ރައްޔިތުންގެ ހައްގުތަކާއި މިނިވަންކަން ރައްކައުތެރިކުރުން

(ށ) މެންބަރުކަމުގެ މަސްއޫލިއްޔަތުތައް އަދާކުރުމުގައްޔާއި ބާރުތައް ބޭނުންކުރުމުގައި އެއްވެސް ރައްޔިތެއްގެ ނަސްލަށް ނުވަތަ އުފަންވީ ގައުމަށް ނުވަތަ ކުލަޔަށް ނުވަތަ ޖިންސަށް ނުވަތަ އުމުރަށް ނުވަތަ ޖިސްމާނީ ނުކުޅެދުންތެރިކަމަކަށް ނުވަތަ ނަފުސާނީ ނުކުޅެދުންތެރިކަމަކަށް ނުވަތަ އެ މީހެއްގެ ސިޔާސީ ވިސްނުމަށް ނުވަތަ އެނޫންވެސް ވިސްނުމަކަށް ނުވަތަ މާލީ ފުދުންތެރިކަމަށް ނުވަތަ ނިސްބަތްވާ އާއިލާއަށް ނުވަތަ އުފަން ރަށަށް ނުވަތަ ވާހަކަދައްކާ ބަހުރުވައަށާއި އިޖުތިމާއީ ދަރަޖައަށް ނުވަތަ މަގާމަށް ބަލައިގެން ތަފާތުނުކުރުން.

(ނ) މެންބަރުކަމުގެ މަސްއޫލިއްޔަތުތައް އަދާކުރުމުގައްޔާއި، ބާރުތައް ބޭނުންކުރުމުގައި އެއްވެސް މީހަކު ނުވަތަ އެއްވެސް ފަރާތަކުން އަންގާ ގޮތަށް ކަންކަން ކުރާ، އަދި އެއްވެސް މީހެއްގެ ނުވަތަ އެއްވެސް ފަރާތެއްގެ ނުފޫޒެއްގެ ދަށުގައިވާ މީހަކަށްނުވުން.

(ރ) މަގާމުގެ ހައިސިއްޔަތުން މެންބަރަކަށް ލިބިފައިވާ މައުލޫމާތެއް، މެންބަރުކަމުގެ ވާޖިބުތަކާއި މަސްއޫލިއްޔަތު އަދާކުރުމުގެ ގޮތުން ފިޔަވައި، ތިންވަނަ ފަރާތަކަށް އެ މައުލޫމާތެއް ހާމަނުކުރުން.

(ބ) މަސްލަހަތު ހިމެނޭ ކަންކަން ހާމަކުރުން.

 

8 ވަނަ މާއްދާ - މަސްލަހަތު ހިމެނޭ ކަންކަން ހާމަކުރުން

(ހ) އެއްވެސް މެންބަރެއްގެ އަމިއްލަ މަސްލަހަތެއް ނުވަތަ ދައުރެއް ނުވަތަ މާލީ މަންފާއެއް ނުވަތަ އެނޫންވެސް ފައިދާއެއް އޮތް މައްސަލައެއް ކޮމިށަނުން ބަލާ ނަމަ، އެ ބައްދަލުވުމެއްގައި އެކަން ހާމަކުރަންވާނެއެވެ.

(ށ) މި މާއްދާގެ (ހ) ގެ ދަށުން ހާމަކުރާ ކަންކަން ކޮމިށަނުގެ އެ ބައްދަލުވުމެއްގެ ޔައުމިއްޔާގައި ހިމަނަންވާނެއެވެ.

(ނ) މި މާއްދާގެ (ހ) ގައިވާ ގޮތުގެ މަތީން، މެންބަރެއްގެ މަސްލަހަތެއް އޮތް ކަމެއް ހާމަކުރުމަށްފަހު، އެ މައްސަލައަކާބެހޭ ބަހުސެއްގައި ނުވަތަ ނިންމުމެއްގައި، އެ މެންބަރަކަށް ބައިވެރިއެއް ނުވެވޭނެއެވެ.

(ރ) މަސްލަހަތު ފުށުއަރާކަމެއް ގަސްތުގައި ސިއްރުކުރުމަކީ ނުވަތަ ހާމަނުކުރުމަކީ، ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ގާނޫނު) ގެ 28 ވަނަ މާއްދާގެ (ށ) ގެ (3) ވަނަ ނަންބަރުގެ ދަށުން، މެންބަރުކަމުގެ މަގާމުގައި ހުރެ ކުރުން އެކަށީގެންނުވާ ފަދަ ކަމެއް ކަމުގައި ބަލައި މަގާމުން ވަކިކުރުމުގެ އިޖުރާތު، ރައްޔިތުންގެ މަޖިލީހުން ފެށިދާނެ ސަބަބެކެވެ.

 

9 ވަނަ މާއްދާ - މެންބަރުންގެ ރަސްމީ މަސައްކަތް

(ހ) ކޮމިށަނުގެ މެންބަރުންގެ ޒިންމާތަކާއި މަސްއޫލިއްޔަތުތައް އަދާކުރުމަށް، ކަނޑައެޅިގެން، އެނގެންއޮތް އުޒުރެއް ދިމާވެގެން މެނުވީ، ކޮމިށަނަށް އެއްބާރުލުންދީ، ޖަލްސާތަކުގައި ބައިވެރިވާންވާނެއެވެ.
(ށ) ކޮމިށަނުގެ މެންބަރުންގެ ޒިންމާތަކާއި މަސްއޫލިއްޔަތުތައް އަދާކުރުމަށް ބާއްވާ ބައްދަލުވުންތަކުގައި ޒަމާނީ ވަސީލަތްތައް ބޭނުންކުރުމަށް ހުރަހެއް ނެތެވެ.

 

10 ވަނަ މާއްދާ - ކޮމިށަނުގެ ބައްދަލުވުންތައް

(ހ) ކޮމިށަނުގެ ބައްދަލުވުމެއް ބޭއްވޭނެ ގާނޫނީ އަދަދަކީ، ކޮމިށަނުގެ ޖުމުލަ މެންބަރުންގެ އަޣުލަބިއްޔަތެވެ.

(ށ) ކޮމިށަނުގެ 3 (ތިނެއް) މެންބަރުން އެދިއްޖެ ނަމަ ނުވަތަ ދައުލަތުގެ އިދާރާއަކުން އެއްވެސް ބާވަތެއްގެ މައްސަލައެއް ހުށަހެޅިއްޖެ ނަމަ، އެ މައްސަލައެއް ހުށަހެޅިތާ 48 (ސާޅީސް އަށެއް) ގަޑިއިރުގެ ތެރޭގައި، ކޮމިށަންގެ ބައްދަލުވުމެއް ބާއްވައި އެ މައްސަލައެއް ކުރިޔަށްގެންދާނެ ގޮތުގެ ނިންމުން ނިންމަންވާނެއެވެ. މި މާއްދާގައި ބަޔާންކޮށްފައިވާ ބައްދަލުވުންތައް ފިޔަވައި، އެހެނިހެން ބައްދަލުވުންތައް ބޭއްވުމަކަށް މި ގަވާއިދު ހުރަހެއް ނާޅައެވެ.

(ނ) މުޅި ކޮމިށަނުގެ ފެންވަރުގައި ބަލާ މައްސަލަތައް ނިންމުމުގައި، ކޮމިށަނުގެ އިއްތިފާގުން އެ މައްސަލަތައް ނިންމޭތޯ މަސައްކަތްކުރަންވާނެއެވެ. އެފަދަ މައްސަލަތައް ނިންމުމުގައި ކޮމިށަނުގެ އިއްތިފާގު ނުލިބޭ ހާލަތްތަކުގައި މައްސަލަތައް ނިންމާނީ، ކޮމިށަނުގެ އަޣުލަބިއްޔަތުންނެވެ.

(ރ) ކޮމިށަނުގެ ބައްދަލުވުންތަކުގެ އެޖެންޑާ ކަނޑައެޅުމާއި ރިޔާސަތު ބެލެހެއްޓުމާއި ބައްދަލުވުމުގެ އަހުލާގީ މިންގަނޑުތައް ހިފެހެއްޓުމަކީ، ކޮމިށަނުގެ ރިޔާސަތުގެ ޒިންމާއެކެވެ.

(ބ) ކޮމިށަނުން އެހެން ގޮތަކަށް ކަނޑަނާޅާހައި ހިނދަކު، ބައްދަލުވުންތަކުގައި ހިނގާ އެންމެހައި ކަންކަމާއި މަށްވަރާތަކަކީ، ސިއްރުގެ ގޮތުގައި ހިފަހައްޓަންޖެހޭނެ ކަންކަމެވެ.

 

11 ވަނަ މާއްދާ - ރައްޔިތުން މަޖިލީހަށް ޖަވާބުދާރީވުން

ރައްޔިތުންގެ މަޖިލީހަށް ނުވަތަ އެ މަޖިލީހުގެ ކޮމިޓީއަކުން ބޭނުންވެއްޖެ ހިނދެއްގައި، އެ މަޖިލީހަށް ނުވަތަ އެ މަޖިލީހުގެ ކޮމިޓީއަކަށް ކޮމިށަނުގެ މެންބަރުން ހާޒިރުވާންވާނެއެވެ.

 

12 ވަނަ މާއްދާ - ސެކްރެޓަރީ ޖެނެރަލް

ސެކްރެޓަރީ ޖެނެރަލުގެ މަގާމަކީ، މި ކޮމިށަނުގެ އިދާރީ އެންމެ އިސް މަގާމެވެ. ސެކްރެޓަރީ ޖެނެރަލަކީ، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިށަނުގެ އިދާރާ ހިންގުމަށް ސިވިލް ސަރވިސް ކޮމިށަނުން އައްޔަނުކުރާ ފަރާތެކެވެ. ކޮމިށަނުގެ ސެކްރެޓަރީ ޖެނެރަލް މަސައްކަތްކުރަންވާނީ، ސިޔާސީ ހަރަކާތްތަކުން މުޅިން އެއްކިބާވެހުރެ، ގާނޫނާއި ގަވާއިދާ އެއްގޮތަށް، މި ގަވާއިދާއި މި ގަވާއިދުގެ ދަށުން އެކުލަވައިލާ އުސޫލުތައް ދެމެހެއްޓުމާއެކު، ރައްޔިތުންނަށް ހިދުމަތް ދިނުމަކީ، މައިގަނޑު މަގުސަދުކަމުގައި ހަދައިގެންނެވެ.

 

13 ވަނަ މާއްދާ - ސެކްރެޓަރީ ޖެނެރަލުގެ ޒިންމާތައް

(ހ) ކޮމިށަނުގެ ރައީސްގެ އިރުށާދުގެ ދަށުން، ޖަލްސާތަކުގެ އެންމެހައި އިންތިޒާމުތައް ހަމަޖެއްސުން.

(ށ) ކޮމިށަނުގެ ޖަލްސާތަކުގައި އަމަލީގޮތުން ބައިވެރިވުން.

(ނ) ކޮމިށަނުގެ ޖަލްސާތަކުގައި ނިންމާ ނިންމުންތަކާއި، ބަހުސްކުރެވޭ ކަންކަން ހިމެނޭގޮތަށް ޔައުމިއްޔާތައް ރައްކައުތެރިކަމާއެކު ބެލެހެއްޓުން.

(ރ) ކޮމިށަނުގެ ބައްދަލުވުންތަކުން ނިންމާ ނިންމުންތައް ތަންފީޒުކުރުމަށް ކަނޑައަޅައިފައިވާ މުއްދަތުގައި އެކަން ތަންފީޒުކުރުމާއި، އެ ކަންކަން ތަންފީޒުކުރަމުން ގެންދާކަން ކަށަވަރުކުރުން.

(ބ) ކޮމިށަނަށް ހުށަހެޅޭ ށަކުވާތަކާއި މައްސަލަތަކުގެ އިތުރުން ކޮމިށަނުގެ ސަމާލުކަމަށް ގެންނަންޖެހޭ އެންމެހައި ކަންކަން ކޮމިށަނުގެ ސަމާލުކަމަށް ގެނައުން.

 

14 ވަނަ މާއްދާ - ކޮމިށަނުގެ މުވައްޒަފުން

ކޮމިށަނުގެ މުވައްޒަފުންގެ ގޮތުގައި ތިބޭނީ ސިވިލް ސަރވިސްގެ މުވައްޒަފުންނެވެ. އަދި އެ މުވައްޒަފުންގެ މައްޗަށް ހިނގާނީ، ގާނޫނު ނަންބަރު 2007-05 (ދިވެހި ސިވިލް ސަރވިސްގެ ގާނޫނު) އާއި، އެ ގާނޫނުގެ ދަށުން ހަދާ ގަވާއިދުތަކާއި، އުސޫލުތަކެވެ.

 

15 ވަނަ މާއްދާ - އަހަރީ ރިޕޯޓު

(ހ) ކޮމިށަންގެ ހަރަކާތްތަކުގެ މައްޗަށް އެކުލަވައިލާ އަހަރީ ރިޕޯޓެއް، ކޮންމެ އަހަރެއްގެ ފެބުރުވަރީމަހުގެ 10 (ދިހައެއް) ވަނަ ދުވަހުގެ ކުރިން ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ފޮނުވަންވާނެއެވެ.

(ށ) އަހަރީ ރިޕޯޓުގައި، އެ ރިޕޯޓުގެ މުއްދަތުގައި ހިނގައިދިޔަ އަންނަނިވި ކަންކަން ހިމަނަންވާނެއެވެ.

1. ކޮމިށަނުން ކުރި މަސައްކަތުގެ ތަފުސީލާއި، ކޮމިށަނުގެ މަގްސަދުތައް ހާސިލުކުރެވިފައިވާ މިންވަރު؛
2. ކޮމިށަނުން ދޫކޮށްފައިވާ ލައިސަންސްތަކާބެހޭ މައުލޫމާތު؛
3. ކޮމިށަނުން ރަޖިސްޓަރީކޮށްދީފައިވާ މަޖައްލާތަކާބެހޭ މައުލޫމާތު؛
4. ކޮމިށަނަށް ހުށަހެޅުނު މައްސަލަތައް ނުވަތަ ށަކުވާތަކާބެހޭ މައުލޫމާތު؛
5. ކޮމިށަނުން ނިންމި މައްސަލަތަކާއި އެ މައްސަލަތައް ނިންމި ގޮތުގެ މައުލޫމާތު؛
6. ކޮމިށަނަށް ހުށަހެޅިފައިވާ މައްސަލަތަކުގެ ތެރެއިން ބަލަމުންގެންދާ މައްސަލަތަކުގެ މައުލޫމާތު؛
7. ކޮމިށަނުން ފިޔަވަޅު އަޅައިފައިވާ މައްސަލަތަކުގައި އަޅައިފައިވާ ފިޔަވަޅުތަކުގެ ތަފުސީލު؛
8. އޮޑިޓަރުންގެ ރިޕޯޓުގެ ކޮޕީ.

 

16 ވަނަ މާއްދާ - ގަވާއިދާއި އުސޫލު ފާސްކުރުން

ކޮމިށަނުގެ ގަވާއިދުތަކާއި އުސޫލުތައް، ކޮމިށަނުގެ ރަސްމީ ޖަލްސާއަކުން ފާސްކުރަންވާނެއެވެ. އަދި ކޮމިށަނުގައި އަމަލުކުރަމުންދާ ގަވާއިދަކަށް، ނުވަތަ އުސޫލަކަށް ބަދަލުގެންނަން ޖެހިއްޖެ ނަމަ، އެ ބަދަލެއް ވެސް، ކޮމިށަނުގެ ރަސްމީ ޖަލްސާއަކުން ފާސްކުރަންވާނެއެވެ.

 

17 ވަނަ މާއްދާ - މީޑިއާއަށް މައުލޫމާތު ދިނުން

(ހ) ކޮމިށަނުން ހާމަކުރަންޖެހޭ މައުލޫމާތު ހާމަކުރާނީ، ކޮމިށަނުގެ ރައީސް ނުވަތަ ކޮމިށަން ހިންގުމާ އެ ވަގުތަކު ހަވާލުވެހުރި މެންބަރަކު، ނުވަތަ ކޮމިށަނުން އެކަމަށް ކަނޑައަޅާ ފަރާތެކެވެ.

(ށ) ކޮމިށަނުން ބަލަމުންދާ މައްސަލަތަކުގެ ތަހުގީގުގެ ސިއްރު ހިފެހެއްޓުމަށާއި މައްސަލައެއް ނިމުމުން، އެ މައްސަލައިގެ ނިންމުން ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ގާނޫނު) ގެ 69 ވަނަ މާއްދާގެ (ށ) ގައި ބަޔާންކޮށްފައިވާ ގޮތުގެ މަތީން ހާމަކަން ބޮޑު ގޮތެއްގައި ށާއިއުކުރުމަށް އިސްކަންދޭންވާނެއެވެ.

(ނ) ކޮމިށަނުން މައުލޫމާތު ހާމަކުރުމުގައި، ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ގަވާއިދު) ގެ 42 ވަނަ މާއްދާ (އާންމު މަސްލަހަތާގުޅޭ މައްސަލަތަކުގައި، މައުލޫމާތު ހާމަކުރުމުގެ މިންގަނޑު) އަށް ރިއާޔަތް ކުރަންވާނެއެވެ.

(ރ) މި މާއްދާގެ (ށ) ގައި ބަޔާންކޮށްފައިވާ މައުލޫމާތުގެ ރިކޯޑުތައް، ސެކްރެޓަރީ ޖެނެރަލްގެ އިރުށާދުގެ ދަށުން ބަލަހައްޓަންވާނެއެވެ.

 

18 ވަނަ މާއްދާ - އާންމުކުރާނެ މައުލޫމާތު

ކޮމިށަނުން އާންމުންނާ ހިއްސާކުރާނެ މައުލޫމާތު ބަހައިލެވިފައިވަނީ އަންނަނިވި ބައިތަކުގެ މައްޗަށެވެ.

(ހ) އަލަށް ލައިސަންސް ދޭ ބްރޯޑްކާސްޓަރުން/ރީބްރޯޑްކާސްޓަރުން.

(ށ) އަލަށް ރަޖިސްޓަރީކުރާ ނޫސްމަޖައްލާތައް.

(ނ) ކޮމިށަނުގެ މެންބަރުން އައްޔަނުކުރުމާ ގުޅޭ މައުލޫމާތު.

(ރ) ކޮމިށަނުން މެންބަރަކާ މެދު ފިޔަވަޅުއަޅަން ނިންމައިފި ނަމަ، އެ މައުލޫމާތު.

(ބ) ކޮމިށަނުން ކުރާ ދަތުރުތަކާބެހޭ މައުލޫމާތު.

(ޅ) ކޮމިށަނުގެ ތަފާސްހިސާބާބެހޭ މައުލޫމާތު.

(ކ) ގާނޫނު ނަންބަރު 2014-01 (މައުލޫމާތު ހޯދައި ލިބިގަތުމުގެ ހައްގުގެ ގާނޫނު) ގެ ދަށުން، ހާމަކުރަން ލާޒިމުކުރާ މައުލޫމާތު.

(އ) މިތާގައި ބަޔާންކޮށްފައިވާ މައުލޫމާތުގެ އިތުރުން ވެސް، ވަކި މައުލޫމާތެއް ހާމަކުރުމަށް ކޮމިށަނުން ނިންމައިފި ނަމަ، އެ މައުލޫމާތެއް.

 

19 ވަނަ މާއްދާ - މައުލޫމާތު ހާމަކުރާނެ ގޮތް

ކޮމިށަނުން ހާމަކުރާ މައުލޫމާތު ހިއްސާކުރާނީ، ތިރީގައި ބަޔާންކޮށްފައިވާ ވަސީލަތްތައް ބޭނުންކޮށްގެންނެވެ.

(ހ) މީސްމީޑިއާގެ މަންސަތައް މެދުވެރިކޮށް.

(ށ) ކޮމިށަނުގެ ވެބްސައިޓު މެދުވެރިކޮށް.

(ނ) ކޮމިށަނުން ށާއިއުކުރާ ހަބަރާއި މައުލޫމާތު މީޑިއާތަކަށް ފޮނުވައިގެން.

(ރ) މީޑިއާގެ އެކިއެކި ޓޯކް ށޯވ ފަދަ ޕްރޮގުރާމުތަކުގައި ބައިވެރިވެގެން.

(ބ) ނޫސް ކޮންފަރެންސް ބާއްވައިގެން.

 

20 ވަނަ މާއްދާ - ކޮމިށަނުން ހަބަރާއި މައުލޫމާތު މީޑިއާއަށް ދޭނެ ފަރާތް

(ހ) ކޮމިށަނުން މީޑިއާއަށް ދޭންޖެހޭ މައުލޫމާތުތައް ދިނުމަށްޓަކައި، ކޮމިށަނުގެ މެންބަރަކު ކަނޑައަޅަންވާނެއެވެ.

(ށ) މި ގަވާއިދުގެ ދަށުން ކޮމިށަނުގެ ވެބްސައިޓާއި މީސްމީޑިއާގައި ށާއިއުކުރުން ލާޒިމުކުރާ އެންމެހައި މައުލޫމާތާއި، ރިޕޯޓުތަކާއި، ފޮޓޯތަކާއި އެހެނިހެން މައުލޫމާތު ވެބްސައިޓުގައި ށާއިއުކުރުމަށްޓަކައި އެ ކަމެއް ހިންގާ ސެކްށަނަކުން، އެ ކަމަކާ ގުޅޭ ސެކްށަނާ ހަވާލުކުރަމުން ގެންދަންވާނެއެވެ.

(ނ) މި ގަވާއިދުގައި ބަޔާންކޮށްފައިވާ މައުލޫމާތުތައް އާންމުކުރުމުގެ ކުރިން ސެކްރެޓަރީ ޖެނެރަލް އެ ހަބަރެއް ނުވަތަ އެ ބަޔާނެއް ޗެކުކޮށް އެޕްރޫވްކުރަންވާނެއެވެ.

 

21 ވަނަ މާއްދާ - ކޮމިށަނުން ބާއްވާ ނޫސްކޮންފަރެންސްތައް

ނޫސް ކޮންފަރެންސެއް ބާއްވަން ފެނިއްޖެ ހިނދެއްގައި، އެ އިންތިޒާމު ހަމަޖައްސާނީ، ކޮމިށަނުގެ ރައީސްގެ އިރުށާދުގެ ދަށުން، ސެކްރެޓަރީ ޖެނެރަލެވެ.

 

22 ވަނަ މާއްދާ - މީސްމީޑިއާގެ މަންސަތަކުގައި މައުލޫމާތު އާންމުކުރުން

މި ގަވާއިދުގައި އާންމުކުރުމަށް ބަޔާންކޮށްފައިވާ މައުލޫމާތާ ގުޅުންހުރި މީސްމީޑިއާ ޕޯސްޓުތައް، މި ކޮމިށަނުގެ ރަސްމީ މީސްމީޑިއާ އެކައުންޓުތަކުގައި ށާއިއުކުރުމަކީ، ޕަބްލިކް ރިލޭށަން (ޕީއާރު) ސެކްށަނުގެ ޒިންމާއެކެވެ.

 

23 ވަނަ މާއްދާ - ކޮމިށަނުގެ އިންފޮމޭށަން އޮފިސަރ

(ހ) ގާނޫނު ނަންބަރު 2014-01 (މައުލޫމާތު ހޯދައި ލިބިގަތުމުގެ ހައްގުގެ ގާނޫނު) ގައި ބަޔާންކޮށްފައިވާ ގޮތުގެ މަތިން ކޮމިށަނުގެ އިންފޮމޭށަން އޮފިސަރުގެ ގޮތުގައި ހަމަޖައްސާނީ، އެ ވަގުތަކު ކޮމިށަނުން ކަނޑައަޅާ ފަރާތެކެވެ.

(ށ) ގާނޫނު ނަންބަރު 2014-01 (މައުލޫމާތު ހޯދައި ލިބިގަތުމުގެ ހައްގުގެ ގާނޫނު) ގައި ބަޔާންކޮށްފައިވާ އެންމެހައި މައުލޫމާތެއް، ކޮމިށަނުގެ ވެބްސައިޓުން ފެންނާނޭހެން ހަމަޖައްސަންވާނެއެވެ.

 

24 ވަނަ މާއްދާ - ކޮމިށަނުގެ ނިންމުންތަކަށް އަމަލުކުރުން

(ހ) ކޮމިށަނުން ނިންމާ ކޮންމެ ނިންމުމަކީ، ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަންގެ ގާނޫނު) ގެ 69 ވަނަ މާއްދާގެ (ށ) ގައިވާ ގޮތުގެ މަތީން، އެ ނިންމުމެއް އެގޮތަށް ނިންމި ސަބަބާއި، އަޅައިފައިވާ ފިޔަވަޅާއި، އެ ނިންމުން އިސްތިއުނާފުކުރުމުގެ ހައްގުއޮތްކަން ސާފުކޮށް ބަޔާންކޮށްފައިވާ ނިންމުމަކަށް ވާންވާނެއެވެ.

(ށ) ކޮމިށަނުގެ ބައްދަލުވުންތަކުން ނިންމައިފައިވާ ނިންމުންތައް ތަންފީޒުކުރެވޭ ގޮތް ނުވެއްޖެ ނަމަ، ނުވަތަ ތަންފީޒުކުރުމުގައި ދަތިކަމެއް ކުރިމަތިވެއްޖެ ނަމަ، އެކަމަށް ގޮތެއް ނިންމުމަށް ޓަކައި، ކޮމިށަނުގެ ބައްދަލުވުމަކަށް އެކަން އަލުން ހުށަހަޅަންވާނެއެވެ.

(ނ) ކޮމިށަންގެ ބައްދަލުވުންތަކުން ނިންމާ ނިންމުންތަކަށް އިހްތިރާމުކޮށް، އެ ނިންމުންތަކާ އެއްގޮތަށް އަމަލުކުރުމަކީ، ކޮމިށަނުގެ މެންބަރުންނާއި މުވައްޒަފުންގެ މައްޗަށް ލާޒިމު ކަމެކެވެ.

(ރ) ކޮމިށަނުގެ ނިންމުމަކާ ގުޅިގެން ޖޫރިމަނާއެއް ދައްކަންޖެހޭ ހާލަތްތަކުގައި، އެ ޖޫރިމަނާ ދެއްކުމަށް ދެވޭ މުއްދަތާއި ޖޫރިމަނާ ނުދައްކައިފި ނަމަ، އަޅާނެ އިތުރު ފިޔަވަޅުތައް ނިންމުމުގައި ސާފުކޮށް ބަޔާންކުރަންވާނެއެވެ.

 

25 ވަނަ މާއްދާ - ސިއްރު ހިފެހެއްޓުން

ކޮމިށަނުގެ ބައްދަލުވުމަކުން ކަނޑައަޅާ އުސޫލެއްގެ މަތީން މެނުވީ، ކޮމިށަނުގެ ބައްދަލުވުމެއްގައި ހިނގާ އެއްވެސް ކަމެއް، އެ ބައްދަލުވުމެއްގައި ބައިވެރިވާ އެއްވެސް ފަރާތަކުން އެހެން ފަރާތަކަށް ހާމަކޮށްގެން ނުވާނެއެވެ.

 

26 ވަނަ މާއްދާ - ގަވާއިދުގައި ނުހިމެނޭ ކަމެއް ދިމާވުން

މި ގަވާއިދުގައި ނުހިމެނޭ ކަމެއް ދިމާވެއްޖެ ނަމަ، ނުވަތަ ގަވާއިދުގައި ހިމެނިފައިވާ ކަމެއް މާނަކުރުމުގައި އޮޅުމެއް ނުވަތަ ހިޔާލު ތަފާތުވުމެއް އުފެދިއްޖެ ނަމަ، އެ ކަމެއްގެ ހައްލު ހޯދަންވާނީ، ކޮމިށަނުގެ ބައްދަލުވުމެއްގައި ހާޒިރުވެ ތިބި މެންބަރުންގެ އަޣުލަބިއްޔަތުންނެވެ.

 

27 ވަނަ މާއްދާ - މާނަކުރުން

މި ގަވާއިދުގައި އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި ލަފުޒުތަކާއި އިބާރާތްތަކަށް ދީފައި އެވަނީ، އެ ލަފުޒުތަކާއި އިބާރާތްތަކަށް ތިރީގައިވާ އަކުރުތަކުގައި ދީފައިވާ މާނަކުރުމެވެ.

(ހ) "ކޮމިށަން" ކަމަށް ބުނެފައި އެވަނީ، ގާނޫނު ނަންބަރު 2025-16 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަން ގާނޫނު) ގައި ބަޔާންކޮށްފައިވާ "މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިށަން" އަށެވެ.

(ށ) "ކޮމިށަނުގެ ނިންމުން" ކަމަށް ބުނެފައި އެވަނީ، ކޮމިށަނުގެ ޖަލްސާގެ އިއްތިފާގުން ނުވަތަ އަޣުލަބިއްޔަތުން ނިންމާ ނިންމުމަށެވެ.

(ނ) "މުވައްޒަފުން" ކަމަށް ބުނެފައި އެވަނީ، ސެކްރެޓަރީ ޖެނެރަލާއި، ކޮމިށަންގެ އެންމެހައި މުވައްޒަފުންނަށެވެ.

(ރ) "ސެކްރެޓަރީ ޖެނެރަލް" ކަމަށް ބުނެފައި އެވަނީ، އިދާރީ އެންމެ އިސް މުވައްޒަފު ނުވަތަ ސެކްރެޓަރީ ޖެނެރަލުގެ މަސްއޫލިއްޔަތު އަދާކުރުމަށް އެ ވަގުތަކު ހަވާލުވެ ހުންނަ އިސް ފަރާތަށެވެ.

 

28 ވަނަ މާއްދާ - ގަވާއިދަށް އަމަލުކުރުން

(ހ) މި ގަވާއިދަށް އަމަލުކުރަން ފަށާނީ، ކޮމިށަނުން މި ގަވާއިދު ފާސްކޮށް، ދިވެހި ސަރުކާރުގެ ގެޒެޓުގައި ށާއިއުކުރާ ތާރީހުން ފެށިގެންނެވެ.

(ށ) މި ގަވާއިދަށް އެއްވެސް ބަދަލެއް ގެނެވޭނީ، ކޮމިށަނުގެ ބައްދަލުވުމެއްގައި، ކޮމިށަނުގެ ޖުމުލަ މެންބަރުންގެ އަޣުލަބިއްޔަތުން، އެ ބަދަލެއް ގެނައުމަށް ފާސްކުރުމުންނެވެ.

(ނ) މި ގަވާއިދުގައި ބަޔާންކޮށްފައިވާ ކަންކަން ތަންފީޒުކުރުމުގައި، އުސޫލެއް ނުވަތަ ގައިޑްލައިނެއް އެކުލަވައިލަން ޖެހިއްޖެ ހިނދެއްގައި، އެކަމާގުޅޭ މިންގަނޑުތައް ކަނޑައެޅުމަށްފަހު ފާސްކުރާނީ ކޮމިށަނުގެ ރަސްމީ ޖަލްސާއަކުންނެވެ.

 

މައި ގާނޫނު

މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭށަންގެ ގާނޫނު (ގާނޫނު ނަންބަރު 2025-16)