ޒަކާތު ފަންޑު ހިންގުމާބެހޭ ގަވާއިދު
(ގަވާއިދު ނަންބަރު 2026-11)
(މި ގަވާއިދަށް އަމަލުކުރަން ފެށީ 5 މާރިޗު 2026)
1 ވަނަ މާއްދާ - ތައާރުފާއި ނަން
(ހ) މިއީ، ގާނޫނު ނަންބަރު 2025-27 (ޒަކާތުގެ ގާނޫނު) ގެ 42 ވަނަ މާއްދާގައި ޒަކާތުގެ ގޮތުގައި ލިބޭ ފައިސާ އަމާނާތްތެރިކަމާއެކު ބަލަހައްޓައި، އެ ފައިސާ ޒަކާތުގެ ބެހެނިވެރީންނަށާއި ބޭނުންތަކަށް ދޫކުރުމަށާއި އެ ފައިސާއިން އިސްލާމީ ށަރީއާ ހުއްދަކުރާ ގޮތުގެ މަތީން އިންވެސްޓްކޮށް، ރަނގަޅު ފައިދާއެއް ހޯދައިދިނުމަށް ޓަކައި އުފައްދައިފައިވާ "ޒަކާތު ފަންޑު" ހިންގުމުގެ އެންމެހައި ކަންކަން ބަޔާންކުރުމަށް ޓަކައި، އެ ގާނޫނުގެ 47 ވަނަ މާއްދާގެ (ށ) ގެ ދަށުން ބާރު ލިބިގެން އެކުލަވައިލައިފައިވާ ގަވާއިދެކެވެ.
(ށ) މި ގަވާއިދަށް ކިޔާނީ، "ޒަކާތު ފަންޑު ހިންގުމާބެހޭ ގަވާއިދު" އެވެ.
2 ވަނަ މާއްދާ - މަގުސަދު
މި ގަވާއިދުގެ މަގުސަދުތައް، ތިރީގައި ބަޔާންކޮށްފައި މިވަނީއެވެ.
(ހ) ޒަކާތުގެ ގާނޫނުގެ ދަށުން ޒަކާތުގެ ގޮތުގައި ދައުލަތަށް ދައްކާ ފައިސާ ފަންޑަށް ޖަމާކޮށް، އަމާނާތްތެރިކަމާއެކު އެ ފައިސާ ބެލެހެއްޓުމާ ގުޅޭ ކަންކަން ބަޔާންކުރުން.
(ށ) ދެފުށް ފެންނަ ސިޔާސަތެއްގެ ދަށުން ޒަކާތުގެ ގާނޫނުގެ ދަށުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ހަލުވިގޮތެއްގައި ފޯރުކޮށްދިނުމާ ގުޅޭ ކަންކަން ބަޔާންކުރުން.
(ނ) ޒަކާތުގެ ގާނޫނުގެ ދަށުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންގެ ބޭނުންތަކަށް ދޫކުރެވޭ މިންވަރު އިތުރުކުރުމަށް ޓަކައި، ފަންޑަށް ޖަމާކުރެވޭ ފައިސާ، އިސްލާމީ ށަރީއަތާއި ގާނޫނު ހުއްދަކުރާ ގޮތުގެ މަތީން އިންވެސްޓްކުރުމާ ގުޅޭ ކަންކަން ބަޔާންކުރުން.
(ރ) ފަންޑަށް ލިބޭ ފައިސާ ޖަމާކުރުމާއި، ފައިސާ ބޭނުންކުރުމުގައި އަމަލުކުރަންވީ ގޮތާއި، ފަންޑު ހިންގުމުގައި އަމަލުކުރަންޖެހޭ އެންމެހައި ކަންކަން ބަޔާންކުރުން.
3 ވަނަ މާއްދާ - ފަންޑަށް ޖަމާކުރެވޭ ފައިސާ
ޒަކާތުގެ ގާނޫނުގެ 42 ވަނަ މާއްދާގެ ދަށުން ގާއިމުކުރެވޭ ޒަކާތު ފަންޑަށް ޖަމާކުރާނީ، އަންނަނިވި ގޮތްގޮތުން ލިބޭ ފައިސާއެވެ.
(ހ) މުދަލު ޒަކާތުގެ ގޮތުގައި ދައުލަތަށް ދައްކާ ފައިސާ.
(ށ) ފިތުރު ޒަކާތުގެ ގޮތުގައި ދައްކާ ފައިސާ.
(ނ) ފަންޑުން ގާއިމުކުރާ އިންވެސްޓްމަންޓްތަކުން ލިބޭ ފައިސާ.
4 ވަނަ މާއްދާ - ފަންޑު ހިންގުމުގެ ޒިންމާ
(ހ) ޒަކާތުގެ ގާނޫނުގެ ދަށުން ޒަކާތު ފަންޑު ހިންގައި ބަލަހައްޓާނީ، ޒަކާތު ހައުސްއިންނެވެ.
(ށ) ޒަކާތް ދައްކަންޖެހޭ ފަރާތްތަކުން މުދަލު ޒަކާތުގެ ގޮތުގައި ނުވަތަ ފިތުރު ޒަކާތުގެ ގޮތުގައި ފައިސާ ދައްކާނީ ޒަކާތު ހައުސްއަށެވެ. އެގޮތުން ޒަކާތުގެ ގޮތުގައި ދައްކާ ފައިސާ ޒަކާތު ހައުސްގެ ފަރާތުން ބަލައިގަތުމުގައި ހަރަކާތްތެރިވާނެ އިދާރާތައް އައްޔަނުކުރުމުގެ އިހުތިޔާރު، ޒަކާތު ހައުސްއަށް ލިބިގެންވެއެވެ.
5 ވަނަ މާއްދާ - ފަންޑުގެ ފައިސާ މެނޭޖްކުރުން
(ހ) ޒަކާތު ފަންޑު ބަލަހައްޓަންވާނީ، މާލިއްޔަތާބެހޭ ވުޒާރާއިން ކަނޑައަޅާ ގޮތެއްގެ މަތީން. ޕަބްލިކް ބޭންކް އެކައުންޓާ ވަކިން މޯލްޑިވްސް މަނިޓަރީ އޮތޯރިޓީގައި ގާއިމުކުރާ ވަކި އެކައުންޓެއްގައެވެ.
(ށ) ފަންޑަށް ލިބޭ ފައިސާ ބަލައިގަނެ އެ ފައިސާ ފަންޑަށް ޖަމާކުރުމާބެހޭ އިޖުރާތުތައް ފުރިހަމަކުރުމުގެ ގޮތުން. އަންނަނިވި ކަންކަން ޒަކާތު ހައުސްއިން ފުރިހަމަކުރަންވާނެއެވެ.
- ޒަކާތުގެ ގޮތުގައި ދައުލަތަށް ލިބޭ ފައިސާ ފަންޑަށް ޖަމާކުރެވޭނެ އިންތިޒާމު؛
- ފިތުރު ޒަކާތުގެ ގޮތުގައްޔާއި، މުދަލު ޒަކާތުގެ ގޮތުގައްޔާއި، ފަންޑުން ގާއިމުކުރާ އިންވެސްޓްމަންޓުތަކުން ލިބޭ ފައިސާ ބެލެހެއްޓުމަށް ޓަކައި، އެއިން ކޮންމެ ބާވަތެއްގެ ފައިސާ ޖަމާކޮށް ވަކިން ބެލެހެއްޓުން؛
- ފަންޑަށް ޖަމާކުރެވޭ ފައިސާ، އިސްލާމީ ށަރީއަތާއި ގާނޫނު ހުއްދަކުރާ ގޮތުގެ މަތީން އިންވެސްޓްކޮށް، ޒަކާތުގެ ގާނޫނުގެ ދަށުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ދޫކުރެވޭ މިންވަރު އިތުރުކޮށްދެވޭނެ އިންތިޒާމު ހަމަޖެއްސުން؛
- މަތީގައި ބަޔާންކޮށްފައިވާ ކަންކަމުގެ އިތުރުން މޯލްޑިވްސް މަނިޓަރީ އޮތޯރިޓީގެ ހިސާބުތަކާއި ޒަކާތު ހައުސްގެ ހިސާބުތައް މަހުންމަހަށް ރިކޮންސައިލް ކުރުން.
6 ވަނަ މާއްދާ - ފަންޑުގެ ކަސްޓޯޑިއަން
(ހ) ޒަކާތު ފަންޑުގެ ކަސްޓޯޑިއަންއެއްގެ ގޮތުގައި މަސައްކަތްކުރާނީ، މޯލްޑިވްސް މަނިޓަރީ އޮތޯރިޓީއެވެ.
(ށ) ޒަކާތު ފަންޑުގެ ކަސްޓޯޑިއަންގެ މައިގަނޑު މަސްއޫލިއްޔަތުތަކަކީ، ޒަކާތު ފަންޑުގެ އެކި އެކައުންޓުތައް އެ އޮތޯރިޓީގައި ހުޅުވައި، އެ އެކައުންޓުތައް ބަލަހައްޓައި، ފަންޑުގެ އިންފްލޯއާއި އައުޓްފްލޯ ރިޕޯޓުތައް، ޒަކާތު ހައުސްއިން ކަނޑައަޅާ ގޮތެއްގެ މަތީން ތައްޔާރުކުރުމާއި، މޯލްޑިވްސް މަނިޓަރީ އޮތޯރިޓީގެ ހިސާބުތަކާއި ޒަކާތު ހައުސްގެ ހިސާބުތައް ރިކޮންސައިލް ކުރުމެވެ.
(ނ) މި މާއްދާގެ (ށ) ގައި ބަޔާންކޮށްފައިވާ މަސްއޫލިއްޔަތުތައް ކަސްޓޯޑިއަންއާ ހަވާލުކުރުމުގެ ގޮތުން. ޒަކާތު ހައުސްއާއި އެ ފަރާތާ ދެމެދު، ޒަކާތު ފަންޑުގެ ކަސްޓޯޑިއަންއެއްގެ ގޮތުގައި މަސައްކަތްކުރުމުގެ އެއްބަސްވުމެއްގައި ސޮއިކުރަންވާނެއެވެ.
(ރ) މި މާއްދާގެ (ހ) ގައި ބަޔާންކޮށްފައިވާ ކަސްޓޯޑިއަން ސަރވިސްއަށް އެއްވެސް ފީއެއް ނަގާ ނަމަ، އެ ކަމަށް ހަރަދުކުރާނީ، ޒަކާތު ފަންޑުންނެވެ.
7 ވަނަ މާއްދާ - ފަންޑަށް ފައިސާ ޖަމާކޮށް ބެލެހެއްޓުން
(ހ) ޒަކާތުގެ ގޮތުގައި ދައްކާ ފައިސާ ފަންޑަށް ބަލައިގަތުމުގެ އިންތިޒާމުތައް ހަމަޖެއްސުމަށް ޒަކާތު ހައުސްއިން މާލީ އިދާރާއެއް އައްޔަނުކުރާ ނަމަ، އެ އިދާރާއާ އެކު އެއްބަސްވުމެއް ހަދަންވާނެއެވެ. މި އެއްބަސްވުމުގައި، އިދާރާތަކާ ހަވާލުކުރެވޭ މަސްއޫލިއްޔަތުތަކުގެ ދާއިރާއާއި، އެ މަސްއޫލިއްޔަތުތައް ތަންފީޒުކުރުމަށް ބޭނުންވާ ވަސީލަތްތައް ހޯދާނެ ގޮތާއި، ޒަކާތު ހައުސްއާއި އިދާރާތަކާ ގުޅިގެން މަސައްކަތްކުރާނެ ގޮތާއި، މަސައްކަތްތައް ވިލަރެސްކުރާނެ އުސޫލުތައް ފަދަ ކަންކަން ބަޔާންކުރަންވާނެއެވެ.
(ށ) މި ގަވާއިދުގެ 3 ވަނަ މާއްދާގެ ދަށުން ފަންޑަށް ޖަމާކުރެވޭ ފައިސާ ހަރަދުކުރުމާ ގުޅޭގޮތުން ކަނޑައެޅޭ ބަޖެޓު އެކުލަވައިލައި، ޒަކާތު ކައުންސިލުން އެ ބަޖެޓު ފާސްކުރަންވާނެއެވެ.
(ނ) ޒަކާތު ހައުސްގެ އެންމެހައި ހިސާބުތަކާއި މާލީ ލިޔެކިޔުންތައް ބަލަހައްޓަންވާނީ، ގާނޫނު ނަންބަރު 2006-03 (ދައުލަތުގެ މާލިއްޔަތުގެ ގާނޫނު) އާއި، ގަވާއިދު ނަންބަރު 2023-158 (ދައުލަތުގެ މާލިއްޔަތުގެ ގަވާއިދު) އާ އެއްގޮތްވާ ގޮތުގެ މަތީންނެވެ.
(ރ) ޒަކާތު ފަންޑު ހިންގައި ބަލަހައްޓައި، އެ ފަންޑު ކުރިއެރުވުމަށް މަސައްކަތްކުރުމަކީ، ޒަކާތު ހައުސްގެ ޒިންމާއެކެވެ.
8 ވަނަ މާއްދާ - ޒަކާތުގެ ބެހެނިވެރީންނަށާއި ބޭނުންތަކަށް ފައިސާ ދޫކުރުމުގެ އިޖުރާތު
(ހ) ޒަކާތު ފަންޑަށް ޖަމާކުރާ ފައިސާ ބޭނުންކުރެވޭނީ، ފަންޑުގެ މަގުސަދުތައް ހާސިލުކުރުމަށް ޓަކައި، އަންނަނިވި ބޭނުންތަކަށެވެ.
- މުދަލު ޒަކާތުގެ ބެހެނިވެރީންނަށާއި ބޭނުންތަކަށް ފައިސާ ދޫކުރުމަށް؛
- ފިތުރު ޒަކާތުގެ ބެހެނިވެރީންނަށާއި ބޭނުންތަކަށް ފައިސާ ދޫކުރުމަށް؛
- ފަންޑަށް ޖަމާކުރެވޭ ފައިސާ، އިސްލާމީ ށަރީއަތާއި ގާނޫނު ހުއްދަކުރާ ގޮތުގެ މަތީން އިންވެސްޓްކުރުމަށް؛
- ޒަކާތް ނެގުމާއި ޒަކާތް ބެހުމުގެ ކަންކަން ތަންފީޒުކުރުމަށް ޓަކައި، ޒަކާތުގެ ގާނޫނުގެ 16 ވަނަ މާއްދާގެ (ށ) ގެ ދަށުން ޒަކާތު ހައުސްއިން ހަރަދުކުރުމަށް ކަނޑައަޅާ ކަންކަމަށް؛
- ޒަކާތު ހައުސްގެ ވެބްސައިޓުގައި އާންމުކޮށްފައިވާ "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" ގައި ބަޔާންކޮށްފައިވާ އެހެން ކަންކަމަށް.
(ށ) ފަންޑަށް ލިބޭ ފައިސާ، ށަރުއީ މިންގަނޑާ އެއްގޮތަށް ހޭދަކުރަންވާނީ، ކީރިތި ގުރްއާނުގައި ކަނޑައެޅިފައިވާ 8 (އަށެއް) ދާއިރާއަށެވެ. އަދި މި ދާއިރާތައް ކުރިއެރުވުމަށް ޓަކައި ފަންޑު އިތުރަށް ވުނަކުރުމަށެވެ. އަދި ވުނަކުރުމުގައި އަމަލުކުރާނީ، މި ގަވާއިދުގެ 10 ވަނަ މާއްދާއާއި 11 ވަނަ މާއްދާއާއި 12 ވަނަ މާއްދާގައި ބަޔާންކޮށްފައިވާ ގޮތުގެ މަތީންނެވެ.
(ނ) މި މާއްދާގެ (ށ) ގެ ދަށުން ޒަކާތު ފަންޑުން ފައިސާ ހޭދަކުރާނެ މިންވަރުތަކާ ގުޅޭގޮތުން ޒަކާތު ކައުންސިލުގެ ލަފާ ހޯދަންވާނެއެވެ. އަދި މި ދާއިރާތަކުން އިސްކަންދޭ ތަރުތީބު ކަނޑައެޅުމުގައި ރިއާޔަތްކުރާނީ، ޒަކާތު ހައުސްގެ ވެބްސައިޓުގައި އާންމުކޮށްފައިވާ "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" ގައިވާ ކަންކަމަށެވެ.
(ރ) ޒަކާތު ފަންޑުގެ ވަކިވަކި ކަންކަން ހިންގައި ބެލެހެއްޓުމަށް ވަކިވަކި ކޮމިޓީތައް އެކުލަވައިލުމުގެ އިހުތިޔާރު، ޒަކާތު ހައުސްއަށް ލިބިގެންވެއެވެ.
- މި މާއްދާގެ (ރ) ގައި ބަޔާންކޮށްފައިވާ ކޮމިޓީތަކަށް އައްޔަނުކުރެވޭ ފަރާތްތަކުގެ ށަރުތުތަކާއި، ކޮމިޓީ އެކުލެވިގެންވާ ގޮތާއި، ކޮމިޓީގެ މަސްއޫލިއްޔަތުތައް ހިމެނޭހެން ކޮމިޓީ ހިންގުމުގެ އުސޫލުތައް ޒަކާތު ހައުސްއިން ހަދަންވާނެއެވެ.
- މި މާއްދާގައި ބަޔާންކޮށްފައިވާ ކޮމިޓީތަކަށް މެންބަރުން އައްޔަނުކޮށް ވަކިކުރާނީ، މިނިސްޓަރެވެ.
(ބ) ޒަކާތު ހައުސްގެ މަސައްކަތްތަކުގެ ބޭނުމަށް ޒަކާތު ހައުސްއިން އެކުލަވައިލާ ކޮމިޓީތަކަށް ޒަކާތު ފަންޑުން އެލަވަންސްތައް ދެވިދާނެއެވެ. މިގޮތުން ދޭނެ އެލަވަންސްތަކާއި އެލަވަންސް ދޭނެ މިންވަރު ކަނޑައަޅާނީ، ޒަކާތު ކައުންސިލު ގެ ލަފާގެ މަތީން ޒަކާތު ހައުސްއިންނެވެ. އަދި ޒަކާތު ހައުސްއިން އެލަވަންސް ދޭނެ މިންވަރު ކަނޑައަޅާނީ، ނޭށަނަލް ޕޭ ކޮމިށަނުން ކަނޑައަޅައިފައިވާ މިންގަނޑުތަކަށް ރިއާޔަތްކޮށްގެންނެވެ.
(ޅ) ފަންޑު ހިންގައި ބެލެހެއްޓުމަށް ޓަކައި ވަކި ފަރާތްތައް ކަނޑައަޅައި، އެ ފަރާތްތަކުގެ މަސްއޫލިއްޔަތުތަކާއި ޒިންމާތައް ކަނޑައެޅުމުގެ އިހުތިޔާރު ވެސް، ޒަކާތު ހައުސްއަށް ލިބިގެންވެއެވެ.
(ކ) ޒަކާތު ފަންޑުން ހަރަދުކުރަންވާނީ، ޒަކާތުގެ ގާނޫނާއި ޒަކާތު ހައުސް ގެ ވެބްސައިޓުގައި އާންމުކޮށްފައިވާ "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" އަދި ކަމާ ގުޅޭ ގަވާއިދުތަކާ އެއްގޮތްވާ ގޮތުގެ މަތީންނެވެ.
9 ވަނަ މާއްދާ - ޒަކާތް ނެގުމާއި ބެހުމުގެ ކަންކަން ތަންފީޒުކުރުމުގެ ހަރަދުތައް
(ހ) ޒަކާތް ނެގުމާއި ޒަކާތުގެ ގޮތުގައި ލިބޭ މުދަލާއި ފައިސާ ބެހުމުގެ ކަންކަން ހިންގައި ތަންފީޒުކުރުމަށް ބޭނުންވާ ހަރަދުތައް ބަލަހައްޓާނީ، ގަވާއިދު ނަންބަރު 2023-158 އާ އެއްގޮތްވާ ގޮތުގެ މަތީން. ދައުލަތުގެ ބަޖެޓުންނެވެ.
(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ޒަކާތް ނެގުމާއި ޒަކާތް ބެހުމުގެ ކަންކަން ކުރުމަށާއި ޒަކާތު ހައުސް ހިންގައި ތަރައްގީކުރުމަށް ޓަކައި، އިސްލާމީ ށަރީއަތާއި ގާނޫނު ހުއްދަކުރާ މިންގަނޑުގެ ތެރެއިން ޒަކާތު ފަންޑުން ހަރަދުކުރެވިދާނެއެވެ.
10 ވަނަ މާއްދާ - ފަންޑުގެ ފައިސާ އިންވެސްޓްކުރުން
(ހ) ޒަކާތުގެ ގާނޫނުގެ ދަށުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ދޫކުރެވޭ މިންވަރު އިތުރުކުރުމުގެ މަގުސަދުގައި، ޒަކާތު ފަންޑުގައިވާ ފައިސާ އިންވެސްޓް ކުރެވިދާނެއެވެ.
(ށ) ފަންޑުން ކުރެވޭ އިންވެސްޓްމަންޓްތަކާ ގުޅޭގޮތުން ޒަކާތު ހައުސްގެ އިންވެސްޓްމަންޓް އެޑްވައިޒަރީ ކޮމިޓީގެ ލަފާ ހޯދަންވާނެއެވެ. މި ކޮމިޓީ އެކުލަވައިލާނީ މިނިސްޓަރެވެ. މި ކޮމިޓީ އެކުލަވައިލާނީ، 5 (ފަހެއް) މެންބަރުންނަށް ވުރެ އިތުރުނުވާ ގޮތެއްގެ މަތީން އޮނަހިރި އަދަދެއްގެ މައްޗަށެވެ. ކޮމިޓީގެ މެންބަރުންނަށް އައްޔަނުކުރެވޭ ފަރާތްތަކަކީ، ކޮމިޓީގެ މަސްއޫލިއްޔަތުތަކާއި ވާޖިބުތައް އަދާކުރެވޭ ފަދަ އިލްމީގޮތުން ގާބިލު އަދި ތަޖުރިބާ ހުރި، ފަންނީ ފަރާތްތަކަށް ވާންވާނެއެވެ.
(ނ) ޒަކާތުގެ ފައިސާ އިންވެސްޓްކުރާނީ، މޯލްޑިވްސް ޒަކާތު ހައުސްއިންނެވެ. އަދި އެހެން ފަރާތަކާ ގުޅިގެން އިންވެސްޓްކުރާ ނަމަ އިންވެސްޓްކުރަންވާނީ، އިސްލާމީ ށަރީއަތާ އެއްގޮތްވާ ގޮތުގެ މަތީން ހިންގާ، ހަމައެކަނި ސަރުކާރުގެ ފަންޑުތަކާއި ދައުލަތުގެ މުއައްސަސާތަކާ އެކުގައެވެ.
(ރ) ފަންޑުގެ ދަށުން ހަދައިފައިވާ އިންވެސްޓްމަންޓްތަކުގެ ހާލަތު ދެނެގަނެ، އެ އިންވެސްޓްމަންޓްތަކުގެ ކަންކަން ޒަކާތު ހައުސްއިން ގަވާއިދުން މޮނިޓަރކުރަންވާނެއެވެ.
11 ވަނަ މާއްދާ - ފަންޑު އިންވެސްޓްމަންޓް ޕްރިންސިޕަލްސް
ޒަކާތު ފަންޑުން އިންވެސްޓްކުރުމުގައި އަމަލުކުރާނެ އިންވެސްޓްމަންޓް ޕްރިންސިޕަލްސް، ތިރީގައި މިވަނީއެވެ.
(ހ) ށަރީއާ ހުއްދަކުރާ ކަންކަމަށް އިންވެސްޓްކުރުން.
(ށ) ހިރާސް ކުޑަ ކަންކަމަށް އިންވެސްޓްކުރުން.
(ނ) ފަންޑުން އިންވެސްޓްކުރުމުގެ ކުރިން. އެކަމާބެހޭ ށަރުއީ ލަފާ ހޯދުން.
(ރ) ޒަކާތުގެ ބެހެނިވެރީންނަށް ގެއްލުންނުވާ ގޮތަށް އަހަރުން އަހަރަށް ހޭދަކުރަންޖެހޭ ކަންކަމަށް ރިއާޔަތްކޮށްގެން އިންވެސްޓްކުރުން.
(ބ) އިންވެސްޓްމަންޓްތަކުން ލިބޭ ނަފާ، ޒަކާތުގެ ބެހެނިވެރީންގެ މަސްލަހަތު ހުރި ކަންކަމުގައި ހޭދަކުރުން.
(ޅ) އިންވެސްޓްމަންޓް ރައްކައުތެރިކޮށް ބެލެހެއްޓުން.
(ކ) އިންވެސްޓްމަންޓްތައް ޑައިވަރސިފައިކުރުން.
(އ) އެކަށީގެންވާ މިންވަރަކަށް ފަންޑުގެ ލިކުއިޑިޓީ ދެމެހެއްޓުން.
12 ވަނަ މާއްދާ - ފަންޑު އިންވެސްޓްމަންޓް ސްޓްރެޓަޖީ
ޒަކާތު ފަންޑުން އިންވެސްޓްކުރުމުގައި އަމަލުކުރާނެ އިންވެސްޓްމަންޓް ސްޓްރެޓަޖީތައް، ތިރީގައި މިވަނީއެވެ.
(ހ) ފަގީރު މީހާ ތަނަވަސް މީހަކަށް ހަދައި، ޒަކާތް ނަގާ މީހެއްގެ ބަދަލުގައި ޒަކާތް ނެރޭ މީހަކަށް ބަދަލުކުރުން.
(ށ) މުޖުތަމައުން ފަގީރުކަން ނައްތައިލުން.
(ނ) ޒަކާތު ފަންޑުން ފުޅާ ދާއިރާއެއްގައި ބެހެނިވެރީންގެ ހާޖަތްތައް ފުއްދައިދިނުން.
(ރ) ޒަކާތު ފަންޑަކީ ދެމެހެއްޓެނިވި ފަންޑަކަށް ހެދުން.
(ބ) ފަގީރުންގެ ދަފުތަރުގައި ހިމެނޭ ފަރާތްތަކާއި ބޭނުންތަކާ ގުޅޭ ފުރުސަތުތައް ފަހިކޮށްދިނުން.
13 ވަނަ މާއްދާ - އިންވެސްޓްކުރުމުގެ ށަރުތުތައް
ޒަކާތު ފަންޑުން އިންވެސްޓްކުރަންވާނީ އަންނަނިވި ށަރުތުތައް ފުރިހަމަވާ ގޮތުގެ މަތީންނެވެ.
(ހ) ޒަކާތުން ދިނުން ލާޒިމުވާ ފަރާތްތަކަށް އެ ހައްގު އަވަހަށް ލިބިދިނުން ލާޒިމުވާ ފަދަ ކަމެއް ކުރިމަތިވެފައި ނުވުން.
(ށ) ޒަކާތުގެ ހައްގުވެރީންގެ ބޭނުންތަކަށް ދާއިމީ ހައްލެއް ލިބުމާއި، ޒަކާތު ފަންޑު އިތުރުވެގެންދާނެކަމުގެ ޔަގީންކަން އޮތުން.
(ނ) އަހަރުން އަހަރަށް ބަހަންޖެހޭ ޒަކާތުގެ މިންވަރު ބެހުމަށްފަހު، ބެހެނިވެރީންގެ ބޭނުންތަކަށް ދަތިނުވާނޭހޭން ވުނަކުރުން.
(ރ) އިސްލާމީ ށަރީއަތް ހުއްދަކުރާ ދާއިރާތަކަށް ވުނަކުރުން.
(ބ) ޒަކާތުގެ ފައިސާ ވުނަކޮށްގެން ލިބޭ އެންމެހައި މަންފާއެއްގެ މިލްކުވެރީންނަކީ، ޒަކާތުގެ ބެހެނިވެރީން ކަމުގައި ވުން.
(ޅ) ޒަކާތުގެ ފައިސާ ވުނަކުރުމުގެ މަސައްކަތްކުރާ ފަރާތްތަކަކީ، އެ ކަމުގެ ގާބިލިއްޔަތުކަން ހުރި އަމާނާތްތެރި ބަޔަކު ކަމުގައި ވުން.
(ކ) ވުނަކުރުމުގެ މަށްރޫއަކީ، ބޭނުންވެއްޖެ ހިނދެއްގައި ލިކުއިޑޭޓްކުރެވޭ ފަދަ މުދަލަކަށް ވުން.
(އ) ލިކުއިޑޭޓްކުރެވޭ ފައިސާ އަނބުރާ ޒަކާތު ފަންޑަށް ޖަމާކުރުން.
(ވ) އެ މަށްރޫއެއް ފެށުމުގެ ކުރިން އެކަށީގެންވާ ފީޒިބިލިޓީ ސްޓަޑީއެއް ހެދުމަށްފަހު، ވަރަށް ބޮޑަށް ފައިދާވާނެކަމަށް ބެލެވުން.
(މ) މަތީގައި ބަޔާންކޮށްފައިވާ ކަންކަމުގެ އިތުރުން. ޒަކާތު ހައުސް ގެ ވެބްސައިޓުގައި އާންމުކޮށްފައިވާ "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" ގައި ބަޔާންކޮށްފައިވާ އިތުރު ކަންކަމަށް ރިއާޔަތްކުރުން.
14 ވަނަ މާއްދާ - އޮޑިޓްކުރުމާއި ރިޕޯޓުކުރުން
(ހ) މާލީ ކޮންމެ އަހަރަކު، ޒަކާތު ފަންޑު، އޮޑިޓަރ ޖެނެރަލް އޮޑިޓްކޮށް، އޮޑިޓް ރިޕޯޓު، ރައްޔިތުންގެ މަޖިލީހަށް، އޮޑިޓަރ ޖެނެރަލް ހުށަހަޅަންވާނެއެވެ.
(ށ) މީލާދީ ކޮންމެ އަހަރެއް ނިމުމުން އެ އަހަރަކު ޒަކާތު ފަންޑު ހިންގި ގޮތުގެ އަހަރީ ރިޕޯޓު ތައްޔާރުކޮށް، އެ އަހަރެއް ނިމޭތާ 3 (ތިނެއް) މަސްދުވަހުގެ ތެރޭގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް، އެ ރިޕޯޓު، ޑިރެކްޓަރ ޖެނެރަލް ހުށަހަޅަންވާނެއެވެ.
15 ވަނަ މާއްދާ - ގަވާއިދުގައި ނެތްކަމެއް ދިމާވުން
މި ގަވާއިދުގައި ބަޔާންކޮށްފައިނުވާ ކަމެއް ދިމާވެއްޖެ ނަމަ، އެ ކަމެއްގައި އަމަލުކުރާނެ ގޮތެއް ކަނޑައަޅާނީ، މިނިސްޓަރާއި ޒަކާތު ކައުންސިލުގެ ލަފާގެ މަތީން. ޒަކާތު ހައުސްއިންނެވެ. އަދި މާލީ ކަންކަމުގައި، މި ގަވާއިދުގައި ބަޔާންކޮށްފައިނުވާ ކަމެއް ދިމާވެއްޖެ ނަމަ، އެ ކަމެއްގައި އަމަލުކުރާނެ ގޮތެއް ކަނޑައަޅާނީ، މާލިއްޔަތާބެހޭ ވުޒާރާގެ ލަފާ ހޯދުމަށްފަހުގައެވެ.
16 ވަނަ މާއްދާ - ގަވާއިދަށް އިސްލާހު ގެނައުން
މި ގަވާއިދަށް އެއްވެސް އިސްލާހެއް ގެނެވޭނީ، މިނިސްޓަރާއި ޒަކާތު ކައުންސިލުގެ ލަފާގެ މަތީން. ޒަކާތު ހައުސްއިންނެވެ. އަދި މި ގަވާއިދަށް އެއްވެސް އިސްލާހެއް ގެނައުމުގެ ކުރިން އެ ކަމަކާ ގުޅޭގޮތުން މާލިއްޔަތާބެހޭ ވުޒާރާގެ ލަފާ ހޯދަންވާނެއެވެ.
17 ވަނަ މާއްދާ - މާނަކުރުން
މި ގަވާއިދުގައި، ލަފުޒެއް ނުވަތަ އިބާރާތެއް ބޭނުންކޮށްފައިވާ ގޮތުން. ކަނޑައެޅިގެން އެހެން މާނައެއް ދޭހަނުވާހައި ހިނދަކު، އަންނަނިވި ލަފުޒުތަކާއި އިބާރާތްތަކަށް ދީފައި އެވަނީ އެ ލަފުޒުތަކާއި އިބާރާތްތަކަށް ތިރީގައި ދީފައިވާ މާނަކުރުމެވެ.
(ހ) "މިނިސްޓަރު" ކަމަށް ބުނެފައި އެވަނީ، ޒަކާތާބެހޭ ކަންކަން ހިމެނޭގޮތުން އިސްލާމްދީނާ ގުޅޭ ކަންކަން ހިންގައި ބެލެހެއްޓުމުގެ ޒިންމާ އެ އިރެއްގައި ހަވާލުކޮށްފައިވާ ސަރުކާރުގެ ވުޒާރާގެ ވަޒީރަށެވެ.
(ށ) "ޒަކާތު ފަންޑު" ނުވަތަ "ފަންޑު" ކަމަށް ބުނެފައި އެވަނީ، ޒަކާތުގެ ގާނޫނުގެ 42 ވަނަ މާއްދާގެ ދަށުން އުފައްދާ ފަންޑަށެވެ.
(ނ) ( "ޒަކާތު ކައުންސިލް" ކަމަށް ބުނެފައި އެވަނީ، ޒަކާތުގެ ގާނޫނުގެ 6 ވަނަ މާއްދާގެ ދަށުން އެކުލަވައިލާ ޒަކާތު ކައުންސިލަށެވެ.
(ރ) "މޯލްޑިވްސް ޒަކާތު ހައުސް" ނުވަތަ "ޒަކާތު ހައުސް" ކަމަށް ބުނެފައި އެވަނީ، ޒަކާތުގެ ގާނޫނުގެ 11 ވަނަ މާއްދާގެ ދަށުން އުފައްދާ "މޯލްޑިވްސް ޒަކާތު ހައުސް" އަށެވެ.
(ބ) "ޑިރެކްޓަރ ޖެނެރަލް" ކަމަށް ބުނެފައި އެވަނީ، ޒަކާތުގެ ގާނޫނުގެ 13 ވަނަ މާއްދާގެ ދަށުން އައްޔަނުކުރާ ޑިރެކްޓަރ ޖެނެރަލަށެވެ.
(ޅ) "މާލިއްޔަތާބެހޭ ވުޒާރާ" ކަމަށް ބުނެފައި އެވަނީ، ދައުލަތުގެ މާލިއްޔަތާބެހޭ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ ސަރުކާރުގެ ވުޒާރާއަށެވެ.
(ކ) "މޯލްޑިވްސް މަނިޓަރީ އޮތޯރިޓީ" ކަމަށް ބުނެފައި އެވަނީ، ގާނޫނު ނަންބަރު 1981-06 (މޯލްޑިވްސް މަނިޓަރީ އޮތޯރިޓީގެ ގާނޫނު 1981) ގެ ދަށުން އުފައްދައިފައިވާ "މޯލްޑިވްސް މަނިޓަރީ އޮތޯރިޓީ" އަށެވެ.
(އ) "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" ކަމަށް ބަޔާންކޮށްފައި އެވަނީ، ޒަކާތު ހައުސްގެ ވެބްސައިޓުގައި އާންމުކޮށްފައިވާ "ޒަކާތް ނެރުމާއި ބެހުމުގައި އަމަލުކުރާނެ ގޮތުގެ ށަރުއީ އަސާސްތަކާއި މިންގަނޑުތައް" އަދި އެ މިންގަނޑުތަކަށް ގެނެވޭ އިސްލާހުތައް ހިމެނޭގޮތަށެވެ.
(ވ) "ޒަކާތުގެ ގާނޫނު" ކަމަށް ބުނެފައި އެވަނީ، 6 ޑިސެންބަރު 2025 ގައި ދިވެހި ސަރުކާރުގެ ގެޒެޓު ގައި ށާއިއުކޮށްފައިވާ ގާނޫނު ނަންބަރު 2025-27 (ޒަކާތުގެ ގާނޫނު) އާއި، އެ ގާނޫނަށް ގެނެވޭ އިސްލާހުތައް ވެސް ހިމެނޭ ގޮތަށެވެ.
18 ވަނަ މާއްދާ - ގަވާއިދަށް އަމަލުކުރަން ފެށުން
މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ.
ކިޔުންތެރިންގެ ހިޔާލު