(މި ފައިލް އަދި އަޕްޑޭޓްކޮށް ނުނިމޭ)

އެއްވަނަ ބާބު

އިބްތިދާއީ މާއްދާތައް

 

1 ވަނަ މާއްދާ - ތައާރުފާއި ނަން

(ހ) މިއީ ގާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާ ބެހޭ ގާނޫނު) ގެ 63 ވަނަ މާއްދާއާއި، ގާނޫނު ނަންބަރު 7/2023 (ކުންފުނީގެ ގާނޫނު) ގެ 173 ވަނަ މާއްދާގެ ދަށުން، ކެޕިޓަލް މާކެޓް ޑިވެލޮޕްމަންޓް އޮތޯރިޓީއަށް ލިބިދީފައިވާ ބާރުގެ ދަށުން، އެކުލަވައިލައިފައިވާ ގަވާއިދެކެވެ.

(ށ) މި ގަވާއިދުގެ ނަމަކީ، "ޕްރޮސްޕެކްޓަސް ގަވާއިދު" އެވެ.

 

2 ވަނަ މާއްދާ - ގަވާއިދު ހިންގޭ ދާއިރާ

މި ގަވާއިދު ހިނގާނީ އަންނަނިވި ފަރާތްތަކުގެ މައްޗަށެވެ.

(ހ) އާންމުކޮށް ހުޅުވައިލައިގެން މެއިން މާކެޓުގައި މާލީ ސެކިއުރިޓީޒް (ހިއްސާ، ބޮންޑް، ސުކޫކް، ށަރީއާ ހުއްދަކުރާ އުސޫލުން ދޫކުރާ އިކުއިޓީ) ދޫކުރާ ކުންފުނިތައް.

(ށ) ޕްރައިވެޓް ޕްލޭސްމަންޓުގެ އުސޫލުން ޕްރައިވެޓް ސެކިއުރިޓީޒް ސެގްމަންޓުގައި މާލީ ސެކިއުރިޓީޒް (ކޯޕަރޭޓް ބޮންޑާއި ސުކޫކް) ދޫކުރާ ކުންފުނިތައް.

 

 

ދެވަނަ ބާބު

އާންމު އުސޫލުތައް

 

3 ވަނަ މާއްދާ - ރަޖިސްޓަރ ނުކުރާ ޕްރޮސްޕެކްޓަސް ށާއިއުކުރުން މަނާކުރުން

ގާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާ ބެހޭ ގާނޫނު)، އާއި، ގާނޫނު ނަންބަރު 7/2023 (ކުންފުނީގެ ގާނޫނު)، ގައި ވާ ގޮތުގެ މަތީން އޮތޯރިޓީގެ ހުއްދަ ހޯދުމެއް ނެތި ޕްރޮސްޕެކްޓަސްއެއް ށާއިއުކުރުމަކީ ނުވަތަ ށާއިއުކޮށްފައިވާ ކަމަށް ދެއްކުމަކީ މަނާ ކަމެކެވެ.

 

4 ވަނަ މާއްދާ - މައުލޫމާ ތުގެ ސައްހަކަމާއި ފުރިހަމަކަން ކަށަވަރުކުރުން

ޕްރޮސްޕެކްޓަސްގައި ހާމަކުރާ އެއްވެސް މައުލޫމާތެއް ހާމަކޮށްފައި އޮންނަންވާނީ، އެ މައުލޫމާތުގެ ހަގީގަތާއި، ސައްހަކަމާއި ފުރިހަމަކަން ކަށަވަރު ކުރުމަށްފަހުގައެވެ.

 

5 ވަނަ މާއްދާ - ސިގްނިފިކަންޓް ބަދަލުތައް އޮތޯރިޓ އަށް އެންގުމުގެ ޒިންމާ

(ހ) ޕްރޮސްޕެކްޓަސްއަށް ޒިންމާވާންޖެހޭ އެއްވެސް ފަރާތަކަށް ޕްރޮސްޕެކްޓަސްގެ މުއްދަތުގައި ހާމަކޮށްފައި އޮތް އެއްވެސް މައުލޫމާތަކަށް ސިގްނިފިކަންޓް ބަދަލެއް އަންނާނެ ފަދަ ކަމެއް ހިނގައިފައިވާކަން އެނގިފައިވާ ނަމަ ނުވަތަ އެ ގޮތަށް ގަބޫލުކުރެވޭ ނަމަ 48 (ސާޅީސްއަށެއް) ގަޑިއިރުގެ ތެރޭގައި އޮތޯރިޓީއަށް އެކަން އެންގުން ލާޒިމުވާނެއެވެ.

(ށ) މި މާއްދާގެ (ހ) ގައި ބަޔާންކޮށްފައިވާ ގޮތުގެ މަތީން، މިހާރު އޮތް ޕްރޮސްޕެކްޓަސްއާ ގުޅޭ ސިގްނިފިކަންޓް އައު މައުލޫމާތެއް ނުވަތަ މިހާރު ހާމަކޮށްފައިވާ މައުލޫމާތަކަށް އައިސްފައި އޮތް ބަދަލެއް އޮތޯރިޓީއަށް ހާމަކުރުމާ ގުޅިގެން އޮތޯރިޓީން ދޭ ލަފަޔާއި އިރުށާދުތަކާ އެއްގޮތަށް ކުންފުނިން ނުވަތަ ޕްރިންސިޕަލް އެޑްވައިޒަރު، މި ގަވާއިދުގެ 159 ވަނަ މާއްދާއާއި 173 ވަނަ މާއްދާގައި ބަޔާންކޮށްފައިވާ ފަދަ ސަޕްލިމެންޓްރީ ޕްރޮސްޕެކްޓަސްއެއް ނުވަތަ ރިޕްލޭސްމަންޓް ޕްރޮސްޕެކްޓަސްއެއް ހުށަހަޅަންވާނެއެވެ.

 

6 ވަނަ މާއްދާ - ޕްރޮސްޕެކްޓަސްގައި މައުލޫމާތު ހާމަކުރަންޖެހޭ އުސޫލު

ޕްރޮސްޕެކްޓަސްގައި މައުލޫމާތު ހާމަކޮށްފައި އޮންނަންވާނީ، އިންވެސްޓަރުން އިންވެސްޓްކުރުމަށް ހަދަންޖެހޭ އެސެސްމަންޓްތައް ފަސޭހައިން ހަދައި، ފަހުމްކުރެވޭނެ ގޮތަށެވެ. މި ގޮތުން ޕްރޮސްޕެކްޓަސްއަށް ޒިންމާވާންޖެހޭ ފަރާތްތަކުން، ޕްރޮސްޕެކްޓަސް ޑްރާފްޓްކުރުމުގައި އަންނަނިވި ކަންކަމަށް ސަމާލުކަން ދޭންވާނެއެވެ.

(ހ) ހުރިހާ މައުލޫމާތެއް ސާފުކޮށް ސަރީހަކޮށް ފަސޭހައިން ފަހުމްވާނެ ފަދަ ކުރު އިބާރާތްތަކުން ލިޔެފައި ހުރުން 

(ށ) އަޅައިބެލުމަށް، ފޯރުކޮށްދެވިފައިވާ މައުލޫމާތު ހުންނަންވާނީ، އޭގެ މާނަ ފަސޭހައިން ދޭހަވާނެ ގޮތަށް، އިންސާފުވެރި، އަދި، ހަމަހަމަ އުސޫލަކުން، އަދި މިފަދަ މައުލޫމާތުގެ މަސްދަރުތައް ހާމަކުރުން

(ނ) މި ޕްރޮސްޕެކްޓަސްގައި ހާމަކޮށްފައިވާ މައިގަނޑު މައުލޫމާތު ފާހަގަވެ އެނގޭނޭ ގޮތަށް ހާމަކުރުން

(ރ) ޕްރޮސްޕެކްޓަސްގެ ބައިތައް މި ގަވާއިދުގައި ބަޔާންކޮށްފައިވާ ތަރުތީބުން ހުރުން.

 

7 ވަނަ މާއްދާ - އަދާހަމަކޮށްފައިވާ މައުލޫމާތު ފޯރުކޮށްދިނުން

ޕްރޮސްޕެކްޓަސްގައި ހާމަކޮށްފައިވާ ކޮންމެ މައުލޫމާތަކީ ވެސް، ޕްރޮސްޕެކްޓަސް ތާރީހުގެ ކުރިން، އެ ފަދަ މައުލޫމާތު ފޯރުކޮށްދެވެން އޮތް އެންމެ ފަހުގެ ތާރީހަކާ ހަމަޔަށް އަދާހަމަކޮށްފައިވާ މައުލޫމާތު ކަމުގައި ވާންވާނެއެވެ.

 

8 ވަނަ މާއްދާ - ޑިޒައިނާއި ލޭއައުޓް

ޕްރޮސްޕެކްޓަސްގެ ޑިޒައިނާއި، ލޭއައުޓާއި ބޭނުންކޮށްފައިވާ ފޮންޏާއި، ފޮންޓުގެ ސައިޒު ހުންނަންވާނީ ފަސޭހައިން ކިޔައި ދެނެގަނެވޭނެ ގޮތަށެވ

 

9 ވަނަ މާއްދާ - ގައިޑަންސް ނޯޓުތައް

މި ގަވާއިދަށް އަމަލަކުރަންޖެހޭ ފަރާތްތަކަށް ބޭނުންވާނެ ގައިޑަންސް މި ގަވާއިދުގައި، އެކަށީގެންވާ ތަންތަނުގައި ހިމަނައިފައި ވާނެއެވެ. މި ގޮތުން، ފޯރުކޮށްދީފައިވާ އެފަދަ އެއްވެސް ގައިޑަންސަކާ ތައާރުޒުވުމެއް ފާހަގަކުރެވިފައިވާ ނަމަ އެ ފަދަ ތައާރުޒުވުމަކީ، މި ގަވާއިދާ ހިލާފުވާ ފަދަ ކަމެއްތޯ އޮތޯރިޓީން ބަލާނެއެވެ

 

10 ވަނަ މާއްދާ - އިސްތިސްނާކުރުން

މި ގަވާއިދަށް އަމަލުކުރަންޖެހޭ ފަރާތްތަކުން މި ގަވާއިދުގައި އަމަލުކުރަންޖެހޭ އެއްވެސް ކަމަކުން އިސްތިސްނާކޮށްދިނުމަށް ނުވަތަ ގަވާއިދުގައި ބަޔާންކޮށްފައިވާ ގޮތް ނޫން ގޮތަކަށް އަމަލުކުރަން ހުށަހަޅާ ނަމަ، އަންނަނިވި ކަންކަމަށް ރިއާޔަތްކުރުމަށްފަހު އެފަދަ އިސްތިސްނާ ދިނުމުގެ އިހުތިޔާރު، އޮތޯރިޓީއަށް ލިބިގެންވެއެވެ. މި ގޮތުން ދެވޭ އެއްވެސް އިސްތިސްނާއެއް ބަލަންވާނީ، މި ގަވާއިދުގެ ދަށުން އޮތޯރިޓީން ދީފައިވާ ލުޔެއްގެ ގޮތުގައެވެ.

(ހ) ބަދަލުގައި ހުށަހަޅާ އެ ފަދަ ކަންކަމަކީ މި ގަވާއިދުން ހާސިލުކުރުމަށް ކަނޑައަޅައިފައި އޮތް އަސްލު މަގުސަދާ ހިލާފުވާ ކަމަކަށް ނުވުން

(ށ) އެ ފަދަ އިސްތިސްނާއަކީ ނުވަތަ ބަދަލުގައި ހުށަހަޅައިފައިވާ ގޮތަކީ، ގަވާއިދުގެ އަސްލު މަގުސަދު ހާސިލުކުރެވޭ ފަދަ ނުވަތަ އެއާ އެއް މިންވަރެއްގެ، ނުވަތަ އެއް ފެންވަރެއްގެ މައުލޫމާތެއް ކަމުގައި އޮތޯރިޓީއަށް ގަބޫލުކުރެވުނު.

 

 

ތިންވަނަ ބައި

ޕްރޮސްޕެކްޓަސްގައި ހިމަނަންޖެހޭ ބައިތައް (ދޫކުރާ ސެކިއުރިޓީޒްއަކީ އިކުއިޓީ ނަމަ)

ފުރަތަމަ ބައި: ކަވަރ ޕޭޖާއި ފުރަތަމަ ސަފުހާ

 

11 ވަނަ މާއްދާ - ކަވަރ ޕޭޖް

ކަވަރ ޕޭޖުގައި ތިރީގައިވާ މައުލޫމާތާއި ބަޔާންތައް ހިމަނަންވާނެއެވެ.

(ހ) ކުންފުނީގެ ނަން.

(ށ) ރަޖިސްޓަރީކުރެވިފައިވާ ނަން.

(ނ) ރަޖިސްޓަރީ ނަންބަރ.

(ރ) ޕްރޮސްޕެކްޓަސްގެ ތާރީހު.

(ބ) ތިރީގައިވާ ބަޔާން: "މި ޕްރޮސްޕެކްޓަސްގެ ތާރީހުން ފެށިގެން 6 (ހައެއް) މަސްދުވަހުގެ ފަހުން، މި ޕްރޮސްޕެކްޓަސްއަށް ބިނާކޮށް އެއްވެސް ހިއްސާއެއް އެކަށައަޅައިގެން، ނުވަތަ ދޫކޮށްގެން ނުވާނެއެވެ."

(ޅ) ތިރީގައިވާ ބަޔާން ފވި ލިޔުމުން؛

"މި ޕްރޮސްޕެކްޓަސްގެ ކޮންޓެންޓްސް ކިޔައި، ފަހުމްކުރުމަށް އިންވެސްޓަރުންނަށް ނަސޭހަތްތެރިވަމެވެ. ސުވާލު އުފެދޭ ނަމަ، ޕްރޮފެށަނަލް އެޑްވައިޒަރެއްގެ ލަފާ ހޯދާށެވެ. ޕްރޮސްޕެކްޓިވް އިންވެސްޓަރުން ވިސްނަންޖެހޭ ހިރާސް (ރިސްކް ފެކްޓަރސް) އާ ބެހޭ މައުލޫމާތު ހޯދުމަށް ސަފުހާ "XX" އިން ފެށޭ "ހިރާސްތައް" ބަލާށެވެ!"

(ކ) ތިރީގައިވާ ބަޔާން:

"މި ޕްރޮސްޕެކްޓަސް ވަނީ، ގާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާ ބެހޭ ގާނޫނު) ގެ ދަށުން، ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގައި ރަޖިސްޓަރީކޮށްފައެވެ. މި ޕްރޮސްޕެކްޓަސް ރަޖިސްޓަރީކޮށްފައި ވުމުގެ މާނައަކީ، މި ޕްރޮސްޕެކްޓަސްގައި ހިމެނޭ އޮފަރިންގގައި އިންވެސްޓްކުރުމަށް އޮތޯރިޓީން ދީފައިވާ ލަފައެއް ނުވަތަ މި ޕްރޮސްޕެކްޓަސްގައި ހިމަނައިފައިވާ އެއްވެސް ބަޔާނެއްގެ ނުވަތަ އޮޕިނިއަންއެއްގެ ނުވަތަ ރިޕޯޓެއްގެ ސައްހަކަން މި އޮތޯރިޓީން ކަށަވަރުކޮށްދޭ ކަމެއް ކަމުގައި ބަލައިގެން ނުވާނެއެވެ. މި ޕްރޮސްޕެކްޓަސް މެދުވެރިކޮށް، އިންވެސްޓްކުރުމަށް ދޫކުރާ ސެކިއުރިޓީޒްގެ މެރިޓަށް އެއްވެސް މިންވަރަކަށް އޮތޯރިޓީން ބަލައިފައެއް ނުވާނެއެވެ."

(އ) ތިރީގައިވާ ބަޔާން:

"ކުންފުނިން ހާމަނުކުރާ އެއްވެސް މައުލޫމާތެއްގެ ނުވަތަ މި ޕްރޮސްޕެކްޓަސްގައި ހިމެނޭ އެއްވެސް މައުލޫމާތެއްގެ ޒިންމާއެއް އޮތޯރިޓީއަކުން ނޫފުލާނެއެވެ. އަދި މި ޕްރޮސްޕެކްޓަސްގައި ހިމެނޭ މައުލޫމާތުގެ ސައްހަކަމާއި ފުރިހަމަކަމާ ގުޅޭގޮތުން އޮތޯރިޓީއަކުން ޒިންމާއެއް ނޫފުލާނެއެވެ. މި ޕްރޮސްޕެކްޓަސްގައިވާ އެއްވެސް މައުލޫމާތަކަށް ނުވަތަ އެއިން ބަޔަކަށް ބިނާކޮށް ނިންމާ ނިންމުމަކުން ކުރިމަތިވެދާނެ ގެއްލުމެއްގެ ޒިންމާއެއް ވެސް އޮތޯރިޓީއަކުން ނޫފުލާނެއެވެ."

(ވ) ސްޓޮކް އެކްސްޗޭންޖުގެ ސެކަންޑް ބޯޑުގައި ލިސްޓުކުރުމަށް ގަސްތުކޮށްގެން އަންނަ ކުންފުނިތަކުން އަންނަނިވި ބަޔާން، ފާހަގަވާނެ ކުލަޔަކުން، ލިޔުމުން ހާމަކުރުން:

"ސްޓޮކް އެކްސްޗޭންޖުގެ ސެކަންޑް ބޯޑަކީ، ކުދި އަދި މެދުފަންތީގެ ކުންފުނިތަކަށް އަމާޒުކޮށްގެން އުފައްދައިފައިވާ އޯލްޓަނޭޓިވް ބޯޑެކެވެ. އަދި މި ބޯޑުގައި ލިސްޓުކުރެވޭ ކުންފުނިތަކަކީ މެއިން ބޯޑުގައި ލިސްޓުކުރެވޭ އެސްޓަބްލިށްޑް ކުންފުނިތަކަށް ވުރެ، އިންވެސްޓްމަންޓް ރިސްކް ބޮޑު ކުންފުނިތަކަކަށް ވުމަކީ އެކަށީގެންވާ ކަމެކެވެ. އަދި ސެކަންޑް ބޯޑުގައި ލިސްޓުކޮށްފައިވާ ހިއްސާއަކީ އެ ހިއްސާ މުއާމަލާތުކުރުމަށް އެކަށީގެންވާ ލިކުއިޑިޓީ ލިބޭނެކަމުގެ ކަށަވަރުކަން އޮތް ހިއްސާއަކަށް ނުވުމަކީ، އެކަށީގެންވާ ކަމެކެވެ. މި ފަދަ ކުންފުނިތަކުގައި އިންވެސްޓުކުރުމުގައި އެ އިންވެސްޓްމަންޓުގައި ހިމެނޭ ރިސްކުތައް ފަހުމްކޮށް ދެނެގަތުމަށްފަހުގައި އިންވެސްޓްކުރުމަށް ސަމާލުވާންވާނެއެވެ."

 

12 ވަނަ މާއްދާ - ފުރަތަމަ ސަފްހާ 

(ހ) ޒިންމާގެ ބަޔާންތައް:

1. ކުންފުނީގެ ޑިރެކްޓަރުންނާއި ޕްރޮމޯޓަރުން ވަނީ މި ޕްރޮސްޕެކްޓަސް ބަލައި ފާސްކޮށްފައެވެ. ކުންފުނީގެ ޑިރެކްޓަރުންނާއި ޕްރޮމޯޓަރުން އެކުގައި އަދި ވަކިވަކީން ވެސް ޕްރޮސްޕެކްޓަސްގައި ހިމެނޭ މައުލޫމާތުގެ ސައްހަކަމުގެ ފުރިހަމަ ޒިންމާ އުފުލައެވެ. ޕްރޮސްޕެކްޓަސްއާ ބެހޭ ގޮތުން ބަލަންޖެހޭ އެންމެހައި ކަންކަން އެކަށީގެންވާ މިންވަރަށް ބަލައިފައިވާކަމާއި ޑިރެކްޓަރުންނާއި ޕްރޮމޯޓަރުންނަށް ލިބިފައިވާ މައުލޫމާތަށް ބިނާކޮށް ބަލާއިރު، ޕްރޮސްޕެކްޓަސްގައި ސައްހަނޫން އެއްވެސް މައުލޫމާތެއް ނުވަތަ އޮޅުވައިލުމެއް ނުވާކަމާއި ހަގީގަތްތަކެއް ފޮރުވުމުގެ މަގުސަދެއްގައި އެނޫންވެސް މައުލޫމާތެއް ހާމަނުކޮށް ނޯންނޭކަން ކަށަވަރުކޮށްދެމެވެ."
   މި ބަޔާނާއެކުގައި ގާނޫނު ނަންބަރު 7/2023 (ކުންފުނީގެ ގާނޫނު) ގެ 172 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން ކުންފުނީގެ ޑިރެކްޓަރުންގެ ބޯޑުގެ ހުރިހާ މެންބަރުން ސޮއިކޮށްފައި ހުންނަންވާނެއެވެ.
2. "(ޕްރިންސިޕަލް އެޑްވައިޒަރުގެ ނަން)، ޕްރިންސިޕަލް އެޑްވައިޒަރުގެ ހައިސިއްޔަތުން، ލިބިފައިވާ ހުރިހާ މައުލޫމާތެއްގެ އަލީގައި، ލިބިފައިހުރި އިލްމާއި ގަބޫލުކުރާ ހަމަތަކަށް ބިނާކޮށް، މި ޕްރޮސްޕެކްޓަސްގައި އޮފަރިންގއާ ގުޅޭގޮތުން ހާމަކޮށްފައިވާ މެޓީރިއަލް މައުލޫމާތަކީ ތެދު އަދި ހަގީގީ މައުލޫމާތު ކަމުގައި ދެކެމެވެ."
3. ކުރިމަގަށް ލަފާކޮށްފައިވާ މާލީ މައުލޫމާތު ހާމަކޮށްފައިވާ ނަމަ، އަންނަނިވި ބަޔާން:
   "ކުރިމަގަށް ލަފާކޮށްފައިވާ މާލީ މައުލޫމާތު ތައްޔާރުކުރުމުގައި ބަރޯސާވެފައިވާ އަސާސްތަކާއި އެޒަމްޕްށަންތަކަކީ އެކަށީގެންވާ ކަންތައްތަކެއްކަން ކުންފުނީގެ ޑިރެކްޓަރުންނާއި ޕްރޮމޯޓަރުން އަދި/ނުވަތަ އޮފަރަރ، އެޕްލިކަބަލް ނަމަ، ކަށަވަރުކޮށްދެމެވެ."
   "ޕްރިންސިޕަލް އެޑްވައިޒަރުގެ (ނަން)، ޕްރިންސިޕަލް އެޑްވައިޒަރުގެ ހައިސިއްޔަތުން ކުރިމަގަށް ލަފާކޮށްފައިވާ މާލީ މައުލޫމާތު ތައްޔާރުކުރުމުގައި ބަރޯސާވެފައިވާ އަސާސްތަކާއި، އެޒަމްޕްށަންތަކަކީ އެކަށީގެންވާ ކަންތައްތަކެއްކަމަށް ގަބޫލުކުރަމެވެ."

(ށ) ޑިސްކްލައިވަރ ބަޔާންތައް:

1. އެޕްލިކަބަލް ނަމަ:
   "މި ޕްރޮސްޕެކްޓަސްގެ ބޭނުމަށް ހަދައިފައިވާ ވެލުއޭށަނަކީ (އެކަށީގެންވާ ހާލަތުތަކުގައި) ސަބްޖެކްޓް އެސެޓްސްގެ ވެލިއުގެ މައްޗަށް، ކެޕިޓަލް މާކެޓް ޑިވެލޮޕްމަންޓް އޮތޯރިޓީން ނުވަތަ ސްޓޮކް އެކްސްޗޭންޖުން، ދީފައިވާ އެންޑޯސްމަންޓެއްގެ ގޮތުގައި ބަލައިގެން ނުވާނެއެވެ."
2. އެޕްލިކަބަލް ނަމަ، އަންނަނިވި ބަޔާން:
   "ސްޓޮކް އެކްސްޗޭންޖުގެ (ނަން) ގެ އޮފިށަލް ލިސްޓުގައި ލިސްޓުކުރުމަށް އެޑްމިށަން ލިބިފައިވުމަކީ މި އޮފަރިންގ، ނުވަތަ ކުންފުނީގެ ނުވަތަ ދޫކުރެވޭ ހިއްސާގެ މެރިޓްސް އެންޑޯސްކޮށްދިނުން ކަމުގައި ބަލައިގެން ނުވާނެއެވެ."

(ނ) އެހެނިހެން ބަޔާންތައް:

1. "ގާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްއާ ބެހޭ ގާނޫނު) އާ ހިލާފަށް، ޕްރޮސްޕެކްޓަސްގައި، ދޮގު ނުވަތަ ހަގީގަތް އޮޅުވައިލުމުގެ މަގުސަދުގައި، އެއްވެސް މައުލޫމާތެއް ހިމެނުން ނުވަތަ ހަގީގަތް އޮޅުވައިލުމުގެ މަގުސަދުގައި އެއްވެސް މައުލޫމާތެއް ނުހިމެނުން، ނުވަތަ ޕްރޮސްޕެކްޓަސްއާ ގުޅިގެން އޮޅުވައިލުމުގެ އެއްވެސް އަމަލެއް، ކުންފުނިން ނުވަތަ މި ޕްރޮސްޕެކްޓަސްއާ ގުޅުންހުރި އެއްވެސް ފަރާތަކުން ކޮށްފައިވާ ނަމަ މި ގާނޫނުގެ ދަށުން ރިކޯސް ހޯދުމުގެ ފުރުސަތު އިންވެސްޓަރުންނަށް ލިބިގެންވާކަން އަންގައިދެމެވެ."
2. "އާންމުންނަށް ހިއްސާ ވިއްކުމަށް ހުޅުވައިލައިފައިވަނީ ހުރިހާ މެޓީރިއަލް މައުލޫމާތެއް ސައްހަ ގޮތުގައި ފުރިހަމަޔަށް ކަމަށާއި، ގާނޫނު ނަންބަރު 2/2006 (ދިވެހިރާއްޖޭގެ މާލީ ސެކިއުރިޓީޒްގެ ގާނޫނު) ގައި ބަޔާންކޮށްފައިވާ ކޮންމެ ފަރާތަކުން ވެސް އެކަމަށް ޒިންމާވާ ގޮތަށެވެ."
3. ދޫކުރުމަށް އަދި/ނުވަތަ ލިސްޓުކުރުމަށް ހުށަހަޅައިފައިވާ ހިއްސާއަކީ ށަރީއާ ހުއްދަކުރާ ހިއްސާގެ ގޮތުގައި ކަނޑައަޅައިފައިވާ ނަމަ، އަންނަނިވި ބަޔާން:
   "މި ޕްރޮސްޕެކްޓަސް މެދުވެރިކޮށް ދޫކުރުމަށް އަދި/ނުވަތަ ލިސްޓުކުރުމަށް ހުށަހަޅައިފައިވާ ހިއްސާއަކީ، އޮތޯރިޓީގެ ކެޕިޓަލް މާކެޓް ށަރީއާ އެޑްވައިޒަރީ ކައުންސިލުން ށަރީއާ ހުއްދަކުރާ ހިއްސާ ކަމަށް ގިންތިކޮށްފައިވާ ހިއްސާއެކެވެ. މި ގިންތިކުރުން، ޕްރޮސްޕެކްޓަސް ށާއިއުކުރާ ދުވަހުން ފެށިގެން، ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ ކެޕިޓަލް މާކެޓް ށަރީއާ އެޑްވައިޒަރީ ކައުންސިލުން ދެން ކުރިޔަށްގެންދާ ށަރީއާ ކޮމްޕްލަޔަންސް ރިވިއުއާ ހަމަޔަށް ސައްހަވާނެއެވެ."

(ރ) ދޫކުރުމަށް ހުށަހަޅައިފައިވާ ހިއްސާ ސްޓޮކް އެކްސްޗޭންޖުގެ އޮފިށަލް ލިސްޓުގައި ލިސްޓުކުރުމަށް ގަސްތުކޮށްފައިވާ ނަމަ އަންނަނިވި ބަޔާންތައް 

1. ސްޓޮކް އެކްސްޗޭންޖުގައި، ރާއްޖޭގެ ނުވަތަ އެހެން ގައުމެއްގެ ސްޓޮކް އެކްސްޗޭންޖުގައި ލިސްޓުކުރުމާއި ސެކަންޑަރީ މާކެޓުގައި ގަނެވިއްކަން ހުޅުވައިލުމަށް ސްޓޮކް އެކްސްޗޭންޖުން "އިން ޕްރިންސިޕަލް" ހުއްދަ ލިބިފައި އޮތްކަމުގެ ބަޔާނެއް، އަދި
2. އަންނަނިވި ބަޔާން ލިބިފައި "އިން ޕްރިންސިޕަލް" ހުއްދަ، އޮފަރިންގގެ ނަތީޖާއަށް ބިނާކޮށް ބާތިލުކުރުމަށް ސްޓޮކް އެކްސްޗޭންޖުން ނިންމައިފި ނަމަ، އެޕްލިކޭށަންތަކާއެކު ލިބިފައިވާ ފައިސާ، އެ ފައިސާއަށް އިންޓްރެސްޓް ނުހިނގާނެ ގޮތުގެ މަތީން އިންވެސްޓަރުންނަށް އަނބުރާ ދެވޭނެއެވެ."

(ބ) އޮފަރިންގ ބަންދުކުރާ ތާރީހުން ފެށިގެން 14 (ސާދަ) މާކެޓް ދުވަހުގެ ތެރޭގައި، ސްޓޮކް އެކްސްޗޭންޖުން ލިސްޓުކުރުމުގެ ހުއްދަދީފައި ނުވާ ނަމަ ލިބިފައި އޮތް "އިން ޕްރިންސިޕަލް" ހުއްދަ ބާތިލުވީކަމަށް ބެލެވޭނެކަމުގެ ބަޔާނެއް

(ޅ) އެ ކުންފުންޏެއްގެ ހިއްސާ ސްޓޮކް އެކްސްޗޭންޖުގައި ލިސްޓުކުރުމަށް އެދިފައިވާ ކަމުގައި ވާ ނަމަ ލިޔުމުން، އަދި ފާހަގަވާނެ ކުލަޔަކުން، އަންނަނިވި ބަޔާންތައް ހާމަކުރުން:

1. "މި ކުންފުންޏަކީ މި ކުންފުނީގެ ހިއްސާ ސްޓޮކް އެކްސްޗޭންޖުގައި ލިސްޓުކުރުމަށް އެދިފައިނުވާ ކުންފުންޏެކެވެ. ސްޓޮކް އެކްސްޗޭންޖުގައި ލިސްޓުކޮށްފައި އޮތް ކުންފުންޏަކާ އަޅައިބަލާއިރު، މި ކުންފުނީގެ ހިއްސާގައި ކުރާ އިންވެސްޓްމަންޓުގެ ރިސްކު ބޮޑުވާނެއެވެ. ސްޓޮކް އެކްސްޗޭންޖުގައި ލިސްޓުކުރަން އެދިފައިނުވާ ކުންފުންޏެއްގެ ހިއްސާއަކީ، ސްޓޮކް އެކްސްޗޭންޖުގައި އާންމުކޮށް ގަނެވިއްކަން ލިބެން ހުންނާނެ ހިއްސާއަކަށް ނުވުމާއެކު މި ހިއްސާގެ ލިކުއިޑިޓީ ދަށްވާނެއެވެ. ވީމާ، ތިޔަ ފަރާތުން މި ހިއްސާގައި އިންވެސްޓްކުރުމަށް ނިންމުމުގެ ކުރިން މި އިންވެސްޓްމަންޓުގައި ހިމެނޭ ރިސްކުތައް ފަހުމްކޮށް ދެނެގަތުމަށް ފަހުގައި އިންވެސްޓްކުރުމަށް ސަމާލުވާންވާނެއެވެ." 

2. ކުންފުނީގެ ހިއްސާ، ސްޓޮކް އެކްސްޗޭންޖުގެ ގަނެވިއްކުމުގެ މެކޭނިޒަމް ފިޔަވައި، އޮތޯރިޓީން ހުއްދަ ދީފައިވާ އެހެން ނިޒާމަކުން ގަނެވިއްކޭނެ މަގު ފަހިކޮށްދިނުމަށް ގަސްތުކޮށްފައި އޮތް ނަމަ، އެ ނިޒާމުގެ ތަފުސީލު މައުލޫމާތާއެކު އެ ކަމުގެ ބަޔާނެއް.

 

13 ވަނަ މާއްދާ - އިންޑިކޭޓިވް ޓައިމްލައިން

އިންޑިކޭޓިވް ޓައިމްލައިންގައި އަންނަނިވި ތާރީހުތަކާ ގުޅުންހުރި މައުލޫމާތު (އެޕްލިކަބަލް ނަމަ) ހިމަނަންވާނެއެވެ.

(ހ)

1. އޮފަރިންގ ހުޅުވާ ތާރީހާއި ބަންދުކުރާ ތާރީހު (ސަބްސްކްރިޕްށަން މުއްދަތު)؛
2. ހިއްސާ އެލޮޓްކުރާ ތާރީހު؛
3. ޑިޕޮޒިޓްކުރާ ތާރީހު؛
4. ލިސްޓުކުރާ ތާރީހު.

(ށ) މި މާއްދާގެ (ހ) ގައި ބަޔާންކޮށްފައިވާ ތާރީހުތަކަށް އަންނަ ބަދަލު މާކެޓަށް އަންގާނެ ވަސީލަތް ހާމަކުރަންވާނެއެވެ.

(ނ) މި މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ އޮފަރިންގ ހުޅުވާ ތާރީހަކީ، ޕްރޮސްޕެކްޓަސް ތާރީހުން ފެށިގެން، މަދުވެގެން 14 (ސާދަ) ދުވަހަށް ވުރެ ފަހުގެ ތާރީހަކަށް ވާންވާނެއެވެ.

(ރ) ޕްރޮސްޕެކްޓަސް ރަޖިސްޓަރީކުރުމަށްފަހު، އިންޑިކޭޓިވް ޓައިމްލައިނަށް އަންނަ ބަދަލުތަކަކީ ޕްރޮސްޕެކްޓަސްގައި ހާމަކޮށްފައިވާ މައުލޫމާތަށް އަސަރުކުރާނެ ސިގްނިފިކަންޓް ބަދަލެއްކަމުގައި ބެލެވޭނެއެވެ.

 

14 ވަނަ މާއްދާ - ކޯޕަރޭޓް ޑިރެކްޓަރީ

ކޯޕަރޭޓް ޑިރެކްޓަރީގައި، އަންނަނިވި ފަރާތްތަކާއި، އެ ފަރާތްތަކުގެ މައުލޫމާތު (އެޕްލިކަބަލް ނަމަ) ހިމަނަންވާނެއެވެ.

(ހ) ކޮންމެ ޑިރެކްޓަރެއްގެ ނަމާއި މަގާމާއި، ގައުމިއްޔަތާއި، އެޑްރެސް، އަދި ޑިރެކްޓަރަކީ އިންޑިޕެންޑަންޓް ނުވަތަ ނޮން-އިންޑިޕެންޑަންޓް ޑިރެކްޓަރެއްކަން.

(ށ) ކުންފުނީގެ ސެކްރެޓަރީގެ ނަމާއި، އެޑްރެހާއި، ޕްރޮފެށަނަލް ކޮލިފިކޭށަން އަދި ޕްރޮފެށަނަލް އެއްވެސް ބޮޑީއެއްގެ މެންބަރެއް ނަމަ، އެކަން،

(ނ) ކުންފުނި ރަޖިސްޓަރީކޮށްފައިވާ އޮފީހުގެ އެޑްރެހާއި، ހެޑް އޮފީހުގެ އެޑްރެހާއި، ޓެކްސް ދައްކާ ފަރާތުގެ އައިޑެންޓިފިކޭށަން ނަންބަރު (ޓިން) އާއި، ފޯނު ނަންބަރާއި، އީމެއިލް އެޑްރެހާއި، ވެބްސައިޓުގެ އެޑްރެސް.

(ރ) ތިރީގައިވާ ފަރާތްތަކުގެ ނަމާއި، އެޑްރެސް (އެޕްލިކަބަލް ނަމަ):

1. ޕްރިންސިޕަލް އެޑްވައިޒަރ؛
2. ލީގަލް އެޑްވައިޒަރ (ޕްރޮސްޕެކްޓަސްއާ ގުޅިގެން އައްޔަނުކުރާ) [ށެއަރ ރެޖިސްޓްރާރ]؛
3. އަންޑަރރައިޓަރ؛
4. ޕްލޭސްމަންޓް އޭޖަންޓް؛
5. ށަރީއާ އެޑްވައިޒަރ؛
6. ޕްރޮސްޕެކްޓަސްއާ ގުޅުންހުރި އެހެން އެއްވެސް ފަރާތެއް.
7. ޕްރޮސްޕެކްޓަސްއާ ގުޅުންހުރި ކަންކަމުގައި ރިޕޯޓުތައް ނުވަތަ އެކްސަރޕްޓްސް ނުވަތަ ހުލާސާތައް ފޯރުކޮށްދީފައިވާ.

(ބ) ކުންފުނީގެ އެކްސްޓަރނަލް އޮޑިޓަރުގެ ނަމާއި، އެޑްރެހާއި، ޕްރޮފެށަނަލް ކޮލިފިކޭށަން އަދި ޕްރޮފެށަނަލް ބޮޑީއެއްގެ މެންބަރެއް ނަމަ، އެކަން.

(ޅ) ޕްރޮސްޕެކްޓަސްއާ ގުޅުންހުރި ކަންކަމުގައި ރިޕޯޓުތައް ނުވަތަ އެކްސަރޕްޓްސް ނުވަތަ ހުލާސާތައް ފޯރުކޮށްދީފައިވާ ތަޖްރިބާކާރުގެ ނަމާއި، އެޑްރެހާއި، ކޮލިފިކޭށަން. އެ ތަޖުރިބާކާރަކީ ކުންފުންޏެއް ނުވަތަ ފަރމްއެއް ނަމަ، އެ ކުންފުނި ނުވަތަ ފަރމްގެ ފަރާތުން އެ ފަދަ ރިޕޯޓުތައް ނުވަތަ އެކްސަރޕްޓްސް ނުވަތަ ހުލާސާތައް ތައްޔާރުކުރުމުގެ ޒިންމާ އުފުލާ ފަރާތުގެ ނަމާއި، އެޑްރެހާއި، ޕްރޮފެށަނަލް ކޮލިފިކޭށަން. 

(ކ) ހިއްސާ ލިސްޓުކޮށްފައިވާ ސްޓޮކް: އެކްސްޗޭންޖުގެ ނަން - ނުވަތަ ޕްރޮސްޕެކްޓަސްއާ ގުޅިގެން ލިސްޓުކުރުމަށް ހުށަހަޅައިފައިވާ ސްޓޮކް: އެކްސްޗޭންޖުގެ ނަން

(އ) މި މާއްދާގެ (ރ) ގެ (7) ވަނަ ނަންބަރުގެ ބޭނުމަށްޓަކައި، މާލީ ލަފާ ދިނުމަށް އެއްވެސް ފަރާތެއް ނުވަތަ ފަރާތްތަކެއް އައްޔަނުކޮށްފައިވާ ނަމަ، އެ ފަރާތުގެ ނުވަތަ އެ ފަރާތްތަކުގެ މަސައްކަތުގެ/ހިދުމަތުގެ އެއްބަސްވުމުގެ މުހިންމު ށަރުތުތަކާއި ސްކޯޕް އޮފް ވަރކްގެ މައުލޫމާތު ހާމަކުރަންވާނެއެވެ.

 

15 ވަނަ މާއްދާ - ހުއްދަތަކާއި ށަރުތުތައް 

(ހ) އޮފަރއާ ގުޅިގެން ކަމާބެހޭ ފަރާތްތަކުން ދީފައިވާ ހުއްދަތަކާއި ށަރުތުތަކެއް ކަނޑައަޅައިފައިވާ ނަމަ، އެފަދަ ށަރުތުތަކަށް އަމަލުކުރެވެމުންދާކަމުގެ ބަޔާނެއް ޕްރޮސްޕެކްޓަސްގައި ހިމަނަންވާނެއެވެ.

(ށ) ގާނޫނާއި ގަވާއިދުތަކާއި ގައިޑްލައިންތަކާއި އެހެނިހެން ރެގިއުލޭޓަރީ ށަރުތުތަކަށް އަމަލުކުރުމުން ލުޔެއް ހޯދައިފައިވާ ނަމަ، އެ ލުއިތަކުގެ ތަފުސީލު ހާމަކުރަންވާނެއެވެ.

(ނ) ހިއްސާގެ މައްޗަށް އެއްވެސް މޮރަޓޯރިއަމެއް ކަނޑައެޅިފައިވާ ނަމަ، އަންނަނިވި މައުލޫމާތު ހާމަކުރަންވާނެއެވެ:

1. ހިއްސާދާރުގެ ނަން؛
2. އެފަދަ މޮރަޓޯރިއަމެއް ތަންފީޒުކުރުމަށް ކަނޑައެޅި އިދާރާ ނުވަތަ ފަރާތް؛
3. މޮރަޓޯރިއަމް ކަނޑައަޅައިފައިވާ ހިއްސާގެ އަދަދު؛
4. މޮރަޓޯރިއަމްގައި ހިމެނިފައިވާ ށަރުތުތަކުގެ ތަފުސީލު، މޮރަޓޯރިއަމްގެ މުއްދަތު ހިމެނޭ ގޮތަށް.

(ރ) ކުންފުނީގެ ވިޔަފާރީއަށް ހާއްސަކޮށް ހިނގާ ގާނޫނުތަކާއި ގަވާއިދުތައް ހުރި ނަމަ، އެފަދަ ގާނޫނުތަކާއި ގަވާއިދުތަކުގެ މައުލޫމާތާއި، އެޔަށް އަމަލުކުރަމުން އަންނަކަމުގެ ބަޔާނެއް ހާމަކުރަންވާނެއެވެ. 

 

 

ދެވަނަ ބައި: ޕްރޮސްޕެކްޓަސްގެ ހުލާސާ

 

16 ވަނަ މާއްދާ - ތައާރުފު

(ހ) ޕްރޮސްޕެކްޓަސްގެ ހުލާސާގައި، ކުންފުންޏާ ގުޅޭގޮތުންނާއި ޕްރޮސްޕެކްޓަސްއާ ގުޅުންހުރި މުހިންމު ކަންކަމުގެ ހުލާސާ މައުލޫމާތު ހިމަނަންވާނެއެވެ. މި ހުލާސާ 10 (ދިހައެއް) ސަފުހާއަށް ވުރެ ދިގުވެގެން ނުވާނެއެވެ. އަދި މި ހުލާސާ ހިމަނަންވާނީ ޕްރޮސްޕެކްޓަސްގެ ފެށުމުގައެވެ.

(ށ) ޕްރޮސްޕެކްޓަސްގެ ހުލާސާ ތައްޔާރުކުރުމުގައި، އަންނަނިވި ކަންކަމަށް ސަމާލުވާންވާނެއެވެ.

1. ހިއްސާގެ ޒާތާއި، މެޓީރިއަލް މަންފާތަކާއި، މެޓީރިއަލް ރިސްކުތަކާ ކެ މެދު ފެއަރ އެންޑް ބެލެންސްޑް ވިއު އެއް ފޯރުކޮށްދިނުން؛
2. ޕްރޮސްޕެކްޓަސްގެ އެހެނިހެން ބައިތަކުގައި ހާމަކޮށްފައިވާ މައުލޫމާތުތަކާ އެއްގޮތްވުން.
3. ޕްރޮސްޕެކްޓަސްގެ ހުލާސާ ފަށާއިރު، އަންނަނިވި ސަމާލުގެ ބަޔާން ލިޔުމުން ހިމަނަންވާނެއެވެ.
   "މި ހުލާސާގައި ހަމައެކަނި އަލިއަޅުވައިލައިފައިވަނީ ޕްރޮސްޕެކްޓަސްގެ އެހެން ބައިތަކުގައި ހިމެނިފައިވާ މުހިންމު މައުލޫމާތުތަކަށެވެ. މި ހުލާސާގައި، އިންވެސްޓަރުންނަށް މުހިންމުވެދާނެ ހުރިހާ މައުލޫމާތެއް ހިމެނިފައި ނުހުރެދާނެއެވެ. އެހެންކަމުން މި އޮފަރ ކުރެވޭ ހިއްސާގައި އިންވެސްޓްކުރުމަށް ނިންމުމުގެ ކުރިން، މުޅި ޕްރޮސްޕެކްޓަސް ކިޔައި ފަހުމްކުރަންވާނެއެވެ."

 

17 ވަނަ މާއްދާ - އޮފަރިންގއާ ގުޅޭ މައިގަނޑު މައުލޫމާތު

އިންވެސްޓަރުންގެ އެކިއެކި ގުރޫޕުތަކަށް ހުށަހަޅައިފައިވާ ހިއްސާއާ ގުޅޭގޮތުން އަންނަނިވި މައުލޫމާތު، ޕްރޮސްޕެކްޓަސްގެ ހުލާސާގައި ހާމަކުރަންވާނެއެވެ.

(ހ) ހިއްސާގެ އަދަދު،

(ށ) ހިއްސާ ވިއްކަން ހުށަހަޅާ އަގު.

(ނ) ހިއްސާގެ މައްޗަށް. އެއްވެސް މޮރިޓޯރިއަމެއް ކަނޑައަޅައިފައިވާ ނަމަ، އެކަން.

 

18 ވަނަ މާއްދާ - ވިޔަފާރީގެ މޮޑެލް

އަންނަނިވި ކަންކަން ހިމެނޭހެން ވިޔަފާރި މޮޑެލްގެ މައިގަނޑު ސިފަތައް ޕްރޮސްޕެކްޓަސްގެ ހުލާސާގައި ހާމަކުރަންވާނެއެވެ.

(ހ) ވިޔަފާރި ހިންގާ ގޮތާއި ވިޔަފާރީގެ މައިގަނޑު ހަރަކާތްތައް.

(ށ) ކުންފުނި އޮޕަރޭޓްކުރާ ޕްރިންސިޕަލް މާކެޓްތައް.

(ނ) ވިޔަފާރި ރަޖިސްޓަރީކޮށްފައިވާ ތަން.

 

19 ވަނަ މާއްދާ - ކޮމްޕެޓިޓިވް ޕޮޒިށަނާއި ވިޔަފާރީގެ ސްޓްރެޓެޖީ

ކޮމްޕެޓިޓިވް ޕޮޒިށަނާއި، ވިޔަފާރީގެ ސްޓްރެޓެޖީތައް ޕްރޮސްޕެކްޓަސްގެ ހުލާސާގައި ކުރުކޮށް ހާމަކުރަންވާނެއެވެ.

 

20 ވަނަ މާއްދާ - ހިރާސްތައް (ރިސްކް ފެކްޓަރސް)

ކުންފުނީގެ ވިޔަފާރީގެ ހިންގުމާއި މާލީ ހާލަތާއި، ހިއްސާދާރުންގެ އިންވެސްޓްމަންޓްތަކަށް، މެޓީރިއަލް އަސަރުތަކެއް ކޮށްފާނެކަމަށް ބެލެވޭ ހިރާސްތައް ޕްރޮސްޕެކްޓަސްގެ ހުލާސާގައި ހާމަކުރަންވާނެއެވެ.

 

21 ވަނަ މާއްދާ - ޑިރެކްޓަރުންނާއި ސީނިއަރ މެނޭޖްމަންޓުގެ އިސް މެންބަރުން

ޑިރެކްޓަރުންނާއި ސީނިއަރ މެނޭޖްމަންޓުގެ އިސް މެންބަރުންގެ ނަމާއި މަގާމު، ޕްރޮސްޕެކްޓަސްގެ ހުލާސާގައި ވަކިވަކިން ހާމަކުރަންވާނެއެވެ.

 

22 ވަނަ މާއްދާ - ޕްރޮމޯޓަރުންނާއި ސަބްސްޓޭންށަލް ހިއްސާދާރުން

ޕްރޮމޯޓަރުންނާއި، ސަބްސްޓޭންށަލް ހިއްސާދާރުންގެ އަންނަނިވި މައުލޫމާތު ޕްރޮސްޕެކްޓަސްގެ ހުލާސާގައި ހާމަކުރަންވާނެއެވެ.

(ހ) ނަން.

(ށ) އެ ފަރާތެއް ނިސްބަތްވާ ގައުމު ނުވަތަ ލީގަލް އެންޓިޓީއެއް ނަމަ، ރަޖިސްޓަރީކޮށްފައިވާ ގައުމު.

(ނ) ހިއްސާގެ އަދަދާއި، އިންސައްތަ، އޮފަރގެ ކުރިންނާއި ފަހުން 

(ރ) ނުސީދާގޮތެއްގައި ހިއްސާގެ މިލްކުވެރިކަން އޮތް ނަމަ، "މި މާއްދާގެ (ށ) ން ފެށިގެން (ނ) ނިޔަލަށް ބަޔާންކޮށްފައިވާ މައުލޫމާތު ހާމަކުރަންވާނީ "ބެނެފިށަލް އޯނަރާ ގުޅޭގޮތުންނެވެ.

(ރ) އޮފަރިން: ލިބޭނެކަމަށް ލަފާކުރެވޭ ޕްރޮސީޑްސްގެ އަދަދާއި ކުރަން ރާވައިފައިވާ މައިގަނޑު ހޭދަތައް ވަކިވަކީން އެނގޭ ގޮތަށް، އެ ކަންކަމަށް ބޭނުންކުރެވޭ ފައިސާގެ މިންވަރާއި، މުއްދަތުތަކާއެކު، ޕްރޮސްޕެކްޓަސްގެ ހުލާސާގައި ބަޔާންކުރަންވާނެއެވެ.

 

23 ވަނަ މާއްދާ - ޕްރޮސީޑްސް ހޭދަކުރާނެ ގޮތް

މާލީ ކަންކަމާއި، ހިންގުމުގެ ކަންކަމާ ގުޅިގެން ފާހަގަކުރެވޭ މުހިންމު ކަންކަން ޕްރޮސްޕެކްޓަސްގައި މާލީ މައުލޫމާތު ހާމަކޮށްފައިވާ މުއްދަތަށް ކޮންމެ އަހަރަކަށް ވަކިވަކީން ހުލާސާގޮތެއްގައި، ޕްރޮސްޕެކްޓަސްގެ ހުލާސާގައި ހިމަނަންވާނެއެވެ.

 

24 ވަނަ މާއްދާ - މާލީ ކަންކަމުގެ މައުލޫމާތާއި ހިންގުމުގެ މައުލޫމާތު.

 

25 ވަނަ މާއްދާ - ޑިވިޑެންޑް ޕޮލިސީ

އިށޫއަރގެ ޑިވިޑެންޑް ޕޮލިސީގެ ހުލާސާއެއް، ޕްރޮސްޕެކްޓަސް ހުލާސާގައި ހިމަނަންވާނެއެވެ.

 

26 ވަނަ މާއްދާ - ޕްރޮސްޕެކްޓަސް ހުލާސާގެ ގައިޑަންސް ނޯޓު

ޕްރޮސްޕެކްޓަސްގެ ހުލާސާގައި ހިމަނާ މައުލޫމާތުގެ ތަފުސީލް ހިމެނޭ ޕްރޮސްޕެކްޓަސްގެ ވަކިވަކި ސެކްށަންތަކަށް އެކަށީގެންވާ ކްރޮސް ރެފަރެންސް ހިމަނަންވާނެއެވެ.

 

 

ތިންވަނަ ބައި: އޮފަރގެ ތަފުސީލު

 

27 ވަނަ މާއްދާ - އޮފަރގެ ތަފުސީލު

ވިއްކުމަށް ހުށަހަޅައިފައިވާ ހިއްސާއާ ބެހޭ އަންނަނިވި މައުލޫމާތު ހާމަކުރަންވާނެއެވެ.

(ހ) ހިއްސާގެ އަދަދު: އިންވެސްޓަރ ގުރޫޕުތަކަށް ކަނޑައަޅައިފައިވާ ނަމަ، އެ އަދަދުތައް ވަކިވަކީން.

(ށ) މި އޮފަރިންގ އާ ވިދިގެން އެއްވަގުތެއްގައި އެއްގިންތިއެއްގެ ނުވަތަ އެހެން ގިންތިއެއްގެ ހިއްސާ، ޕްރައިވެޓް އުސޫލުން ދޫކޮށްފައިވާ ނަމަ، ނުވަތަ ސަބްސްކްރައިބްކޮށްފައިވާ ނަމަ، އެ މުއާމަލާތުގައި އެކުލެވޭ ހިއްސާގެ އަދަދާއި، މުއާމަލާތުގެ މައިގަނޑު ސިފަތައް ހާމަކުރުން. އެ ގޮތުން އަންޑަރރައިޓް ނުވަތަ އަންޑަރޓޭކިންގ އެރޭންޖްމަންޓެއް ކޮށްފައިވާ ނަމަ އެކަމުގެ މައުލޫމާތު. 

(ނ) މި އޮފަރިންގއާ ވިދިގެން އެއްވަގުތެއްގައި، އެހެން ބާވަތެއްގެ ސެކިއުރިޓީޒް އޮފަރކޮށްފައިވާ ނަމަ، އެ ފަދަ ސެކިއުރިޓީޒްގެ މައުލޫމާތު ހޯލްޑިންގ ކުންފުނީގެ ހިއްސާދާރުންގެ ގޮތުގައި މިހާރު ތިބި ފަރާތްތަކަށް، ރައިޓްސް އިށޫގެ އުސޫލުން، އޮފަރކުރާ ނަމަ ނުވަތަ އެލޮޓްކުރާ ނަމަ، އަންނަނިވި މައުލޫމާތު ހާމަކުރަންވާނެއެވެ.

 

28 ވަނަ މާއްދާ - ރައިޓްސް އިށޫގެ އުސޫލުން އޮފަރކުރުން 

(ހ) ހިއްސާ އެކަށައެޅުމަށް ނުވަތަ އެލޮކޭޓްކުރުމަށް ކަނޑައެޅިފައިވާ އުސޫލު.

(ށ) އޮފަރިންގއާ ގުޅިގެން، އެޕްލިކޭށަނާއި ފައިސާ ބަލައިގަންނާނެ ސުންގަޑި.

(ނ) ރައިޓްސް އެލޮކޭށަންގެ ސަބަބުން އުފެދޭ ފްރެކްށަންތަކާމެދު އަމަލުކުރަން ކަނޑައަޅައިފައިވާ އުސޫލު.

(ރ) އޮފަރިއަކީ ރިނައުންސަބަލް ނުވަތަ ނަންރިނައުންސަބަލް އުސޫލުން ކުރާ އޮފަރއެއް ނަމަ، އެކަން ހޯލްޑިންގ ކުންފުނީގެ ހިއްސާދާރުންގެ ހުއްދަ ހޯދައިފައިވާކަން.

(ވ) ވިއްކުމަށް ހުށަހަޅާ ހިއްސާގެ އަގާ ގުޅޭގޮތުން އަންނަނިވި މައުލޫމާތު ހާމަކުރަންވާނެއެވެ. ހިއްސާދާރުންގެ އެކި ގިންތިތަކަށް އޮފަރކޮށްފައިވާ އަގާއި، އެޕްލިކަބަލް ނަމަ، ވިއްކާނެ އެންމެ ދަށް އަގާއި، އެންމެ މަތީ އަގު.

 

29 ވަނަ މާއްދާ - ހިއްސާގެ އަގު

(ހ) ހިއްސާ ވިއްކުމަށް ހުށަހަޅައިފައިވާ އަގު ކަނޑައެޅުމުގައި ބަލައިފައިވާ އަސާސް. ވިއްކުމަށް ހުށަހަޅައިފައިވާ ހިއްސާއަކީ ރާއްޖެއިން ބޭރުގެ ސްޓޮކް އެކްސްޗޭންޖެއްގައި މިހާރު ވެސް ލިސްޓުކޮށްފައި އޮތް ހިއްސާއެއް ނަމަ، (ހިއްސާގެ) އަގަކީ ގާނޫނު ނަންބަރު 7/2023 (ކުންފުނީގެ ގާނޫނު) ގައި ބަޔާންކޮށްފައިވާ ގޮތުގެ މަތީން "ހިއްސާގެ މޫނުމަތީ އަގު" ކަމަށް ހިއްސާގެ ސެޓްފިކެޓުގައި ބަޔާންކޮށްފައިވާ އަގެވެ. އަދި "ހިއްސާގެ މޫނުމަތީ އަގަށް ވުރެ ދަށް އަގެއްގައި ހިއްސާ ވިއްކައިގެން ނުވާނެއެވެ."

(ށ) ހިއްސާ ވިއްކުމަށް ހުށަހަޅައިފައިވާ އަގު ކަނޑައެޅުމުގައި ބަލައިފައިވާ އަސާސް.

 

30 ވަނަ މާއްދާ - ހިއްސާގެ ހިސްޓޯރިކް އަގުތައް 

ހިއްސާ ވިއްކުމަށް ހުށަހަޅައިފައިވާ ހިއްސާއަކީ ރާއްޖެއިން ބޭރުގެ ސްޓޮކް އެކްސްޗޭންޖެއްގައި، މިހާރު ވެސް، ލިސްޓުކޮށްފައި، އޮތް ހިއްސާއެއް ނަމަ، އަންނަނިވި ގޮތުގެ މަތީން އެ ހިއްސާގެ އަގުތަކުގެ ހިސްޓްރީއެއް، (އެޕްލިކަބަލް ނަމަ) ހާމަކުރަންވާނެއެވެ.

(ހ) ފާއިތުވެދިޔަ 3 (ތިނެއް) މާލީ އަހަރުގައި، އެއިން ކޮންމެ އަހަރެއްގައި ހިއްސާގެ މުއާމަލާތުކުރެވުނު އަހަރީ އެންމެ މަތީ އަގާއި އެންމެ ދަށް އަގު.

(ށ) ފާއިތުވެދިޔަ 2 (ދޭއް) މާލީ އަހަރާއި އޭގެ ފަހަށް މުއްދަތެއް ހިނގައިފައި އޮތް ނަމަ، އެ މުއްދަތު ހިމެނޭ ގޮތަށް، ކޮންމެ ކުއާޓަރެއް ވަކިވަކިން، ހިއްސާގެ މުއާމަލާތުކޮށްފައިވާ އެންމެ މަތީ އަގާއި އެންމެ ދަށް އަގު.

(ނ) ޕްރޮސްޕެކްޓަސް ތާރީހުގެ ކުރިޔަށް 6 (ހައެއް) ފާއިތުވެދިޔަ މަސްދުވަހު، ކޮންމެ މަހެއް ވަކިވަކިން ހިއްސާގެ މުއާމަލާތުކޮށްފައިވާ އެންމެ މަތީ އަގާއި އެންމެ ދަށް އަގު.

(ރ) ސަބްސްކްރައިބް ކުރުމަށް ޕްރި-އެމްޕްޓިވް ރައިޓްސް ދީފައިވާ ނަމަ، އަންނަނިވި މައުލޫމާތު:

1. ޕްރޮސްޕެކްޓަސް ތާރީހުގެ ކުރިޔަށް ފާއިތުވެދިޔަ 6 (ހައެއް) މަސްދުވަހުގެ ފުރަތަމަ ޓްރޭޑިންގ ދުވަހުގައި ސެކިއުރިޓީޒް ބާޒާރުގައި ހިއްސާގެ މުއާމަލާތުކޮށްފައިވާ އެންމެ މަތީ އަގާއި އެންމެ ދަށް އަގު؛
2. އޮފަރ އިއުލާނުކުރި ތާރީހުގެ 1 (އެކެއް) ޓްރޭޑިންގ ދުވަހުގެ ކުރިން، ނުވަތަ އެ ތާރީހާއި ޕްރޮސްޕެކްޓަސްގެ ތާރީހު ތަފާތު ނަމަ، ޕްރޮސްޕެކްޓަސް ތާރީހުގެ ކުރިޔަށް އެންމެ ފަހު ޕްރެކްޓިކަބަލް ތާރީހުގައި ސެކިއުރިޓީޒް ބާޒާރުގައި ހިއްސާގެ މުއާމަލާތުކޮށްފައިވާ އެންމެ ފަހު އަގު.

(ބ) ހިސްޓޯރިކް އަގުތަކުގެ މައުލޫމާތު ހާމަކޮށްފައި ހުންނަންވާނީ، ހޯސްޓް މާކެޓް އަގުތަކަށް ބިނާކޮށާއި، ހޯސްޓް މާކެޓް ފިޔަވައި ބޭރުގެ ޕްރިންސިޕަލް ޓްރޭޑިންގ މާކެޓް (އެޕްލިކަބަލް ނަމަ) އެ އަށް ބިނާކޮށެވެ.

 

31 ވަނަ މާއްދާ - ޓްރޭޑިންގ ސަސްޕެންށަން

އެންމެ ފަހުގެ ޕްރެކްޓިކަބަލް ތާރީހެއްގެ ކުރިޔަށް ހިނގައިދިޔަ 3 (ތިނެއް) އަހަރުގެ ތެރޭގައި ޓްރޭޑިންގ އެއްވެސް ސަސްޕެންށަނެއް އައިސްފައި އޮތް ނަމަ، އެކަން ހާމަކުރަންވާނެއެވެ. އަދި އާދައިގެ މަތިން ބާޒާރުގައި ހިއްސާގެ މުއާމަލާތު ހިނގަމުން ގޮސްފައި ނެތް ހާލަތުގައި، އެކަށީގެންވާ ލިކުއިޑިޓީ ނެތްކަމުގެ މައުލޫމާތު ހާމަކުރަންވާނެއެވެ.

 

32 ވަނަ މާއްދާ - ޕްލޭން އޮފް ޑިސްޓްރިބިއުށަން

ކަނޑައެޅިފައިވާ ހާއްސަ ސްކީމެއްގެ ދަށުން، ށަރުތު ހަމަވާ ޑިރެކްޓަރުންނާއި މުވައްޒަފުންނަށް ނުވަތަ އެނޫންވެސް ފަރާތްތަކަށް ހިއްސާ ދޫކުރަން ކުންފުނިން ގަސްތުކުރާ ނަމަ، އަންނަނިވި ކަންކަން ހާމަކުރަންވާނެއެވެ.

(ހ) ޑިރެކްޓަރުންގެ ބޯޑުން ފާސްކުރާ ގޮތުގެ މަތީން ހިއްސާ އެލޮކޭޓުކުރުމަށް ކަނޑައަޅައިފައިވާ ކްރައިޓީރިއާ، މިންގަނޑުތަކުގެ ކުރު ބަޔާނެއް.

(ށ) ކަނޑައެޅިފައިވާ މިންގަނޑުތަކުގެ ދަށުން، ށަރުތު ހަމަވާ ފަރާތްތަކުގެ ޖުމުލަ އަދަދު.

(ނ) ކަނޑައެޅިފައިވާ މިންގަނޑުތަކަށް ޑިރެކްޓަރުންގެ ށަރުތު ހަމަވާ ނަމަ، ކޮންމެ ޑިރެކްޓަރަކަށް ދޫކުރުމަށް އެކަށައެޅިފައިވާ/އެލޮކޭޓްކުރެވިފައިވާ ހިއްސާގެ އަދަދު.

 

33 ވަނަ މާއްދާ - ޕްރައިސް ސްޓެބިލައިޒޭށަން

ޕްރައިސް ސްޓެބިލައިޒޭށަންގެ އެއްވެސް އުސޫލެއް ބޭނުންކޮށްފައި އޮތް ނަމަ، އެ އުސޫލުގެ މައުލޫމާތު ހާމަކުރަންވާނެއެވެ.

 

34 ވަނަ މާއްދާ - ހިއްސާ އެކަށައެޅުމާއި، އެލޮކޭޓުކުރުމަށް ހަމަޖެހިފައިވާ އެހެނިހެން އުސޫލުތައް.

(ހ) އޮފަރިންގގައި ދޫކުރުމަށް ހަމަޖެހިފައިވާ ހިއްސާ، އެއް ވަގުތެއްގައި 2 (ދޭއް) ނުވަތަ އެއަށްވުރެ ގިނަ މާކެޓުގައި ދޫކުރާ ނަމަ، އަދި އޮފަރިންގގައި ހިމެނޭ ޓްރާންޗެއް އެހެން މާކެޓެއްގައި ދޫކުރުމަށް ހާއްސަކޮށްފައިވާ ނަމަ، އެ ޓްރާންޗުގެ މައުލޫމާތާއި ހިއްސާ އެކަށައެޅުމާއި އެލޮކޭޓު ކުރުމަށް ހަމަޖެހިފައިވާ އެ ނޫން އެހެން އުސޫލުތައް ވެސް ހާމަކުރަންވާނެއެވެ.

(ށ) އަންޑަރރައިޓަރއެއް މެދުވެރިނުކޮށް ދޫކުރުމަށް ކަނޑައެޅިފައިވާ ހިއްސާގެ ޕްލޭން އޮފް ޑިސްޓްރިބިއުށަން އެކުލަވައިލައިފައި އޮތް ނަމަ، އެ މައުލޫމާތު ހާމަކުރަންވާނެއެވެ. މި ގޮތުން ދޫކުރުމަށް ހަމަޖެހިފައިވާ ހިއްސާގެ އަދަދާއި، އެ މުއާމަލާތުގެ ބާވަތް ނުވަތަ ސަބްސްކްރިޕްށަން ހާމަކުރަންވާނެއެވެ.

(ނ) މި އޮފަރިންގގައި އެލޮކޭޓްނުކުރެވި އިތުރަށް، ހިއްސާ ހުރެއްޖެ ހާލަތެއްގައި އެ ފަދަ ހިއްސާ އެލޮކޭޓް ކުރުމުގައި، ހަމަހަމަ އަދި އިންސާފުވެރި އުސޫލަކަށް، އަމަލުކުރާނެކަން ހާމަކުރަންވާނެއެވެ.

 

35 ވަނަ މާއްދާ - ސަބްސްކްރައިބް ކުރުމަށް ގަސްތުކޮށްފައިވާ ފަރާތްތަކުގެ މައުލޫމާތު

ކުންފުންޏަށް މައުލޫމާތު ލިބިފައި ހުރި މިންވަރެއްގެ މައްޗަށް ބިނާކޮށް އަންނަނިވި މައުލޫމާތު ހާމަކުރަންވާނެއެވެ:

(ހ) ސަބްސްޓޭންށަލް ހިއްސާދާރަކު ނުވަތަ ޑިރެކްޓަރަކު ނުވަތަ ސީނިއަރ މެނޭޖްމަންޓުގެ، އިސް މެންބަރަކު. ސަބްސްކްރައިބް ކުރުމަށް ގަސްތުކޮށްފައިވާ ނަމަ އެކަން.

(ށ) އެއްވެސް ފަރާތަކުން، ޖުމްލަ އޮފަރިންގގެ %5 (ފަހެއް) (އިންސައްތަ) އަށް ވުރެ ގިނަ ހިއްސާއަށް ސަބްސްކްރައިބް ކުރުމަށް. ގަސްތުކޮށްފައިވާ ނަމަ، އެ މައުލޫމާތު.

 

36 ވަނަ މާއްދާ - ސެލިންގ ށެއަރހޯލްޑަރސް

ކުންފުނީގެ ހިއްސާދާރުންގެ މިލްކުގައި ހުރި ހިއްސާ ވިއްކާ ނަމަ، އަންނަނިވި މައުލޫމާތު ހާމަކުރަންވާނެއެވެ.

(ހ) ވިއްކާ ހިއްސާދާރުގެ ނަމާއި، އެޑްރެހާއި، އެ ފަރާތްތަކުން އަދާކުރާ މަގާމުގެ ޒާތާއި، އޮފީސް ނުވަތަ ފާއިތުވެދިޔަ 3 (ތިނެއް) އަހަރުދުވަހުގެ ތެރޭގައި ކުންފުންޏާ ނުވަތަ ކުރިން ކުންފުންޏާ ގުޅުމެއް އޮތް ފަރާތަކާ ދެމެދު، އެހެން މެޓީރިއަލް ގުޅުމެއް އޮތް ނަމަ، އެ ކަމެއް ހާމަކުރުން.

(ށ) ކޮންމެ ހިއްސާދާރަކު ވަކިވަކިން ވިއްކަން ހުށަހަޅާ ހިއްސާގެ ގިންތިއާއި އަދަދު. އަދި ހިއްސާ ވިއްކުމުގެ ކުރިންނާއި ފަހުން، ކުންފުނީގެ ށެއަރ ކެޕިޓަލްގެ ނިސްބަތުން އެ ހިއްސާދާރެއްގެ މިލްކުގައި ހުރި ހިއްސާގެ އިންސައްތަ.

(ނ) އެންމެފަހުގެ ޕްރެކްޓިކަބަލް ތާރީހުގައި، އޮފަރިންގ ނިމުމާއެކު، ހިއްސާދާރުގެ މިލްކުގައި ހުރި ހިއްސާގެ ތެރެއިން ވިއްކާ ހިއްސާގެ ބާވަތްތަކާއި، އެއިން ކޮންމެ ބާވަތެއްގެ ހިއްސާ ހުރި އަދަދާއި، އިންސައްތަ.

 

37 ވަނަ މާއްދާ - ޑައިލިއުށަން

ޑައިލިއުށަނާ ގުޅޭ އަންނަނިވި މައުލޫމާތު ހާމަކުރަންވާނެއެވެ.

(ހ) ފާއިތުވެދިޔ 3 (ތިނެއް) އަހަރުދުވަހުގެ ތެރޭގައި ހިންގައިފައިވާ މުއާމަލާތުތަކުން، އަންނިވި ފަރާތްތަކުން ލިބިގެންފައި އޮތް ހިއްސާގެ ނުވަތަ ލިބިގެންފައި އޮތް ރައިޓްސްއިން ލިބިގަނެވެން އޮތް ހިއްސާގެ "އިފެކްޓިވް ކޭށް ކޮސްޓް" އާއި ހިއާންމުކޮށް ހިއްސާ ވިއްކުމަށް ހުޅުވައިފައި އޮތް އަގާ ދެމެދު ސަބްސްޓޭންށަލް ފަރަގެއް އޮތް ނަމަ، އެ ފަދަ ފަރާތްތަކުގެ "އިފެކްޓިވް ކޭށް ކޮންޓްރިބިއުށަން" އާއި އާންމުކޮށް ވިއްކުމަށް ހުޅުވައިލައިފައިވާ ހިއްސާތަކުގެ "ޕަބްލިކް ކޮންޓްރިބިއުށަން" އަޅައިބެލޭނެ ގޮތަށް ތާވަލެއްގައި ހާމަކުރުން:

1. ޑިރެކްޓަރުން؛
2. ސީނިއަރ މެނޭޖްމަންޓުގެ އިސް މެންބަރުން؛
3. ސަބްސްޓޭންށަލް ހިއްސާދާރުން ނުވަތަ
4. އޮފަރިންގއާ ގުޅުންހުރި އެހެން ފަރާތްތައް.

(ށ) މި އޮފަރިންގގެ ނަތީޖާއެއްގެ ގޮތުން ޑައިލިއުޓްވެގެންދާ ހިއްސާގެ އަދަދާއި އިންސައްތަ ހާމަކުރުން. މި ގޮތުން ޑައިލިއުށަން ހިސާބުކުރާއިރު، ހިއްސާ އޮފަރކުރި އަގާއި އެންމެ ފަހުން އޮޑިޓްކޮށްފައިވާ މާލީ އަހަރު ނިމޭ ތާރީހުގައި ނުވަތަ އެ މުއްދަތުގައި (ދެ ތާރީހުންކުރެ އެކަށީގެންވާ ތާރީހެއްގައި) ހިއްސާއަކަށް ޖެހޭ ނެޓް އެސެޓް ވެލިއުގެ ފަރަގު ބަލައި، މި ހިސާބުކުރުން އަންނަނިވި ކަންކަމަށް ބަލައި ނެޓް އެސެޓް ވެލިއު އެޖަސްޓުކުރުން.

(ނ) މި އޮފަރގެ ސަބަބުން ނެޓް އެސެޓް ވެލިއުއަށް އަންނާނެ ބަދަލުތައް.

1. މި އޮފަރިންގގެ ސަބަބުން ނެޓް އެސެޓް ވެލިއުއަށް އަންނާނެ ބަދަލުތައް.
2. އޮޑިޓްކޮށްފައިވާ އެންމެ ފަހުގެ މާލީ އަހަރު [ނުވަތަ އެ މުއްދަތުގައި (ދެ ތާރީހުންކުރެ އެކަށީގެންވާ ތާރީހެއްގައި)] އަދި މި ޕްރޮސްޕެކްޓަސްގެ ތާރީހާ ހަމަޔަށް، އެއްވެސް ޑިސްޕޯސަލެއް ނުވަތަ އެކުއިޒިށަނެއް ހިނގައިފައި އޮތް ނަމަ، އެ ކަންކަމަށް ބަލައި އެޖަސްޓުކުރުން.

(ރ) ޑައިލިއުށަނާ ގުޅޭ އެއްވެސް މައުލޫމާތެއް، ހިސާބުކޮށްފައިވަނީ، އެއްވެސް އެޒަމްޕްށަނެއްގެ މައްޗަށް ބިނާކޮށް، ނަމަ އަދި ޕްރޯ ފޯމާ އުސޫލުން، އެޑްޖަސްޓްމަންޓްތަކެއް ގެނެވިފައި އޮތް ނަމަ، އެ ފަދަ އެޒަމްޕްށަންތަކާއި އެޑްޖަސްޓްމަންޓްތަކުގެ މައުލޫމާތު ހާމަކުރުން.

(ބ) މިހާރު ތިބި ހިއްސާދާރުންނަށް އޮފަރކޮށްފައިވީ ނަމަވެސް އެ ފަރާތްތަކުން ސަބްސްކްރައިބް ކޮށްފައި ނުވާ ނަމަ ހިއްސާ ޑައިލިއުޓުވާ އަދަދާއި، އިންސައްތަ ހާމަކުރުން.

 

38 ވަނަ މާއްދާ - ޔޫސް އޮފް ޕްރޮސީޑްސް

ޕްރޮސީޑްސް ހޭދަކުރާނެ ގޮތުގެ އަންނަނިވި މައުލޫމާތު (އެޕްލިކަބަލް ނަމަ)، ހާމަކުރަންވާނެއެވެ.

(ހ) އޮފަރގެ ޖުމުލަ އަދަދު އަންޑަރރައިޓްކޮށްފައި ނެތް ހާލަތުގައި، އޮފަރގެ މަގުސަދު ހާސިލުކުރެވޭނެ ސަބްސްކްރިޕްށަންގެ އެންމެ މަދު މިންވަރާއި، އެ މިންވަރު ކަނޑައެޅުމުގެ ބޭސިސް.

(ށ) މި އޮފަރިންގ މެދުވެރިކޮށް ލިބޭނެކަމަށް އަންދާޒާކުރެވޭ ގްރޮސް ޕްރޮސީޑްސް ހާމަކުރުން. އެ ގޮތުން މި ފައިސާ އެކީގައި ބޭނުންކުރުމަށް ރާވައިފައިވާ މައިގަނޑު ކަންކަމާއި ޓައިމްލައިން ހާމަކުރުން. އަދި ލިބޭނެކަމަށް ލަފާކުރާ ޕްރޮސީޑްސް ރާވައިފައިވާ ބޭނުންތަކަށް ނުފުދޭނެ ނަމަ، އެ ބޭނުންތަކަށް ފައިސާ ހޭދަކުރުމުގައި އިސްކަންދޭނެ ތަރުތީބާއި، އެ ކަންކަމަށް މި ނޫން ގޮތްގޮތުން ފައިސާ ހޯދަންޖެހޭ ނަމަ ހޯދަންޖެހޭ ފައިސާގެ އަދަދާއި، ފައިސާ ހޯދާނެ ގޮތުގެ މައުލޫމާތު ހާމަކުރުން. މީގެ އިތުރުން، މި ފައިސާއިން ކުރަންޖެހޭ ބޭނުންތަކަށް ފައިސާ ހޭދަކުރުމާ ހަމަޔަށް، އެހެން ބޭނުމަކަށް ހޭދަކުރަން ގަސްތުކޮށްފައިވާ ގޮތާއި މަގުސަދު ހާމަކުރުން.

(ނ) އާންމު އުސޫލުން ކުރާ ވިޔަފާރީގެ ބޭރުން، ޕްރޮސީޑްސް ބޭނުންކޮށްގެން ސީދާގޮތުން ނުވަތަ ނުސީދާގޮތުން ވިޔަސް، އެއްވެސް އެސެޓެއް ގަތުމަށް ރާވައިފައިވާ ނަމަ، އެ އެސެޓާއި، އަގުގެ ކުރު ބަޔާނެއް ހާމަކުރުން. 

(ރ) ޕްރޮސީޑްސް ބޭނުންކޮށްގެން އެހެން ވިޔަފާރިއެއް ނުވަތަ ވިޔަފާރިތަކެއް ގަންނަ ނަމަ، އެފަދަ ވިޔަފާރިއެއް ނުވަތަ ވިޔަފާރިތަކުގެ ކުރު ބަޔާނަކާއި އެ ވިޔަފާރިތަކުގެ ހާލަތާ ބެހޭ މައުލޫމާތު ހާމަކުރުން.

(ބ) ޕްރޮސީޑްސް ބޭނުންކޮށްގެން ދަރަންޏަކުން ބައެއް އުނިކުރުމަށް، ނުވަތަ ބައެއް ދެއްކުމަށް ނުވަތަ އެކުގައި ދައްކައި ހަލާސްކުރުމަށް ނިންމައިފައިވާ ނަމަ، އެ ފަދަ ދަރަންޏެއްގެ އިންޓްރެސްޓް ރޭޓާއި ދަރަނީގެ މެޗޫރިޓީ ހާމަކުރުން. އަދި ޕްރޮސީޑްސް ހޭދަކުރަނީ ޕްރޮސްޕެކްޓަސްގެ ކުރީގެ 12 (ބާރަ) މަސްދުވަހުގެ ތެރޭގައި ނަގައިފައިވާ ދަރަންޏެއް ދެއްކުމަށް ކަމުގައިވާ ނަމަ، އެ ދަރަނި ހަރަދުކޮށްފައިވާ ގޮތް ހާމަކުރުން.

(ޅ) އޮފަރއާ ގުޅުންހުރި އަންނަނިވި ހަރަދުތަކުގެ މައުލޫމާތު. މި މައުލޫމާތު ހާމަކުރުމުގައި ކުރިމަތިވެދާނެ ކޮންޓިންޖެންސީސްއަށް ބިނާކޮށް ހާމަކުރެވިދާނެ. މި ގޮތުން އެއްވެސް ހަރަދަކާ ގުޅޭ އަދަދު ޔަގީންކޮށް ބަޔާންކުރެވެން ނެތް ނަމަ، އެ ހަރަދުގެ އަންދާޒާއެއް ހާމަކުރުން.

1. ހިއްސާ ދޫކުރުމާއި ޑިސްޓްރިބިއުޓްކުރުމާ ގުޅޭގޮތުން ކުންފުނިން ނުވަތަ ކުންފުނީގެ ފަރާތުން ކޮށްފައިވާ ހަރަދުތައް؛
2. މިހާރު ތިބި ހިއްސާދާރުން ދޫކުރާ ހިއްސާ ހިމެނޭ ނަމަ، އެ ފަރާތްތަކުން ނުވަތަ ހިއްސާދާރުންގެ ފަރާތުން ޒިންމާވާންޖެހޭ ހަރަދުތައް؛
3. ސަބްސްކްރައިބްކުރާ ނުވަތަ ގަންނަ ފަރާތްތަކުން ކުރަންޖެހޭ ގޮތަށް ކަނޑައެޅިފައިވާ ހަރަދުތައް.

(ކ) ބްރޯކަރޭޖް އެރޭޖްމަންޓްތަކާއި ކޮމިށަން. އެގޮތުން އަންޑަރރައިޓިންގ ފީއާއި ޕްލޭސްމަންޓް ފީ.

 

39 ވަނަ މާއްދާ - އަންޑަރރައިޓް ކުރުމުގެ އެއްބަސްވުންތައް

އަންނަނިވި ކަންކަން ހިމެނޭ ގޮތުން، އަންޑަރރައިޓް ކުރުމުގެ އެއްބަސްވުންތަކުގެ ތަފުސީލު ހާމަކުރަންވާނެއެވެ.

(ހ) އަންޑަރރައިޓް ކުރުމަށް އެއްބަސްވެފައި އޮތް މިންވަރާއެކު، އެ މިންވަރު ހަމަޖައްސަންޖެހޭ ކަމުގައި ކުންފުންޏަށް ގަބޫލުކުރެވުނު ޖަސްޓިފިކޭށަންތައް

(ށ) އަންޑަރރައިޓް ކޮށްދިނުމަށް އެއްބަސްވެފައިވާ ފަރާތުގެ ނަމާއެކު، އަންޑަރރައިޓް ކޮށްދިނުމަށް އެއްބަސްވެފައިވާ ހިއްސާގެ އަދަދު

(ނ) އަންޑަރރައިޓް ކޮށްދިނުމުގެ ކަމިށަން

(ރ) އަންޑަރރައިޓް ކުރުމުގެ އެއްބަސްވުން ތަންފީޒުކުރަން ފެށުމަށްފަހު، އަންޑަރރައިޓަރުންނަށް ފަރާތުގެ ޒިންމާއިން ތަނާޒުލުވެވޭނެ މަގުފަހިވާ ގޮތަށް، އެއްބަސްވުމުގައި ހުރި މާއްދާތަކުގެ ހުލާސާއެއް

(ބ) އަންޑަރރައިޓް ކޮށްފައިވާ އޮފަރިންގއެއް ނޫން ނަމަ، އެކަމުގެ ބަޔާނަކާއެކު އެ ގޮތަށް އެ ކަން ކަނޑައެޅުމުގައި ކުންފުންޏަށް ގަބޫލުކުރެވުނު ޖަސްޓިފިކޭށަންތައް

 

40 ވަނަ މާއްދާ - އެންމެ މަދުމިނުން ސަބްސްކްރައިބްވާންޖެހޭ އަދަދާ ގުޅޭ ގައިޑަންސް ނޯޓު

އެންމެ މަދުމިނުން ބޭނުންވާނެކަމަށް ކަނޑައަޅައިފައިވާ ސަބްސްކްރިޕްށަނުގެ މިންވަރު ކަނޑައެޅުމުގައި ބަލައިފައިވާ އަސާސްތަކުގެ މައުލޫމާތު ހާމަކުރަންވާނެއެވެ. އޭގެ ތެރޭގައި ޕަބްލިކް ށެއަރހޯލްޑިންގ ސްޕްރެޑް ރިކުއަރމަންޓްތަކަށް އަމަލުކުރުމާއި، ކުންފުންޏަށް ބޭނުންވާ ފަންޑިންގ ލެވެލް ފަދަ ކަންކަމުގެ ތަފުސީލު ހިމަނަންވާނެއެވެ.

ޕްރޮސީޑްސްގެ ހޭދަކުރުމަށް ކަނޑައަޅައިފައިވަނީ ވަރކިންގ ކެޕިޓަލަށް ނަމަ، އެ ފަދައިން ޕްރޮސީޑްސް ހޭދަކުރުމަށް ކަނޑައަޅާފައިވާ ކުންފުނީގެ ޖެނެރަލް ވަރކިންގ ކެޕިޓަލްގެ ވަކިވަކި އައިޓަމްތައް ބަޔާންކުރުމާއެކު އެ އިން ކޮންމެ އައިޓަމަކަށް ހޭދަކުރަން ރާވައިފައިވާ ގޮތުގެ މައުލޫމާތު ހާމަކުރަންވާނެއެވެ.

 

 

ހަތަރުވަނަ ބައި

ޕްރޮމޯޓަރުންނާއި ސަބްސްޓޭންށަލް ހިއްސާދާރުންނާއި، ޑިރެކްޓަރުންނާއި، ސީނިއަރ މެނޭޖްމަންޓުގެ އިސް މެންބަރުންނާއި ޓެކްނިކަލް ޕާސަނަލްގެ އިސް މެންބަރުންނާ ބެހޭ މައުލޫމާތު

 

41 ވަނަ މާއްދާ - ޕްރޮސީޑްސް ހޭދަކުރުމާ ގުޅޭ ގައިޑަންސް ނޯޓު

ޕްރޮމޯޓަރުންނާއި ސީދާގޮތުންނާއި ނުސީދާގޮތުން މަސްލަހަތު އޮތް ސަބްސްޓޭންށަލް ހިއްސާދާރުންގެ އަންނަނިވި ތަފުސީލު ހާމަކުރަންވާނެއެވެ:

 

42 ވަނަ މާއްދާ - ޕްރޮމޯޓަރުންނާއި ސަބްސްޓޭންށަލް ހިއްސާދާރުން

ސީދާގޮތުންނާއި ނުސީދާ ގޮތުން ހިއްސާ ލިބިގެންވާ ޕްރޮމޯޓަރުންނާއި ސަބްސްޓޭންށަލް ހިއްސާދާރުންގެ ތަފުސީލު ހާމަކުރަންވާނެ ގޮތުގެ ތަފުސީލު ހިމަނަންވާނެއެވެ.

(ހ) ނަން

(ށ) ވިޔަފާރީގެ މައިގަނޑު ހަރަކާތްތަކާއި، ވަނަވަރު ސާފުވާނެ އެހެނިހެން މައުލޫމާތު،

(ނ) އެ ފަރާތެއް ނިސްބަތްވާ ގައުމު، އަދި ހިއްސާ ކުންފުންޏެއް ނަމަ ރަޖިސްޓަރީކޮށްފައިވާ ގައުމު.

(ރ) އޮފަރގެ ކުރިންނާއި ފަހުން ހުރި ހިއްސާގެ އަދަދާއި މިއިންސައްތަ. މި ގޮތުން ހިއްސާގެ މިލްކުވެރިކަން އޮތީ ނުސީދާ ގޮތެއްގައި ނަމަ، ހަގީގީ ވެރިފަރާތް (އަލްޓިމޭޓް ބެނެފިށިއަލް އޯނަރ) ހާމަކުރުން.

(ބ) ވޭތުވެދިޔަ 3 (ތިނެއް) އަހަރުދުވަހުގެ ތެރޭގައި، ސީދާގޮތުން ނުވަތަ ނުސީދާގޮތުން ހިއްސާގެ މިލްކުވެރިކަމަށް އައިސްފައިވާ ސިގްނިފިކަންޓް ބަދަލެއް.

(ޅ) ކުންފުނ ގެ އެހެން ހިއްސާދާރުންނާ ހިލާފަށް، ސަބްސްޓޭންށަލް ހިއްސާދާރުންނާއި ނުވަތަ ޕްރޮމޯޓަރުންނަށް ލިބިދީފައި އޮތް ވޯޓުލުމުގެ ހައްގު ފަރަގުކޮށްފައިވާ ނަމަ، އެކަން ނުވަތަ އެ ފަދައިން ނެތް ނަމަ، އެކަމުގެ ބަޔާނެއް.

(ކ) ކުންފުންޏަށް ލިބިފައި ހުރި މައުލޫމާތުގެ އަލީގައި، ކުންފުނީގެ ހިއްސާގެ މައްޗަށް ސީދާކޮށް ނުވަތަ ނުސީދާކޮށް، ޖޮއިންޓްކޮށް، ނުވަތަ ވަކިވަކިން، ނަމަވެސް، ކޮންޓްރޯލެއް ހިންގައިފާނެ ކަމުގައި ބެލެވޭ ސަބްސްޓޭންށަލް ހިއްސާދާރުން (ނުވަތަ އެ ފަދަ ޕްރޮމޯޓަރުން). މި ގޮތުން އެ ފަރާތްތަކުން ހިންގައިފާނެ ކަމުގައި ބެލެވޭ ކޮންޓްރޯލުގެ ޒާތާއި، މިލްކުގައި ހުރި ހިއްސާގެ އަދަދާއި، މިލްކުގައި ހުރި ހިއްސާގެ އިންސައްތަ. 

(އ) ކައިރި ކުރިމަގެއްގައި ސަބްސްޓޭންށަލް ހިއްސާދާރުން ނުވަތަ އެ ފަދަ ޕްރޮމޯޓަރުންގެ ކޮންޓްރޯލަށް ބަދަލު އަތުވެދާނެ އެއްވެސް އިންތިޒާމެއް ހަމަޖެހިފައިވާ ނަމަ، އެ ކަން ބަޔާންކުރުން.

(ވ) ޕްރޮސްޕެކްޓަސްގެ ތާރީހުގެ ކުރިން ހިނގައިދިޔަ 2 (ދޭއް) އަހަރުދުވަހުގެ ތެރޭގައި، އެއްވެސް ޕްރޮމޯޓަރަކަށް، ނުވަތަ ސަބްސްޓޭންށަލް ހިއްސާދާރަކަށް ދީފައިވާ ނުވަތަ ދޭން ގަސްތުކޮށްފައިވާ އެއްވެސް އިނާޔަތެއް ނުވަތަ ބެނެފިޓެއް އޮތްނަމަ އެ ތަފުސީލު ހާމަކުރަންވާނެއެވެ. ޑިރެކްޓަރުންނާއި ސީނިއަރ މެނޭޖްމަންޓާއި ޓެކްނިކަލް ފަރާތްތަކުގެ އިސް މެންބަރުންގެ އަންނަނިވި މައުލޫމާތު ހާމަކުރަންވާނެއެވެ.

 

43 ވަނަ މާއްދާ - ޑިރެކްޓަރުންނާއި، ސީނިއަރ މެނޭޖްމަންޓާއި ޓެކްނިކަލް ފަރާތްތަކުގެ އިސް މެންބަރުން

(ހ) ނަމާއި، ތައުލީމީ ފެންވަރާއި، ޕްރޮފެށަނަލް ކޮލިފިކޭށަނާއި، ވިޔަފާރީގެ ދާއިރާއިން ނުވަތަ މެނޭޖްމަންޓުގެ ދާއިރާއިން ލިބިފައިވާ ފަންނީ ތަޖުރިބާ،

(ށ) ކުރާ މަސައްކަތްތަކާއި ލިބިފައިވާ ތަޖުރިބާގެ ދާއިރާ ނުވަތަ މަސްއޫލިއްޔަތުތައް.

(ނ) ކުންފުނި ފިޔަވައި، އެހެނިހެން ވިޔަފާރިތަކުގައި ބައިވެރިވުން އޮތް މިންވަރު. މިގޮތުން މިހާރު ފުރަމުންދާ ޑިރެކްޓަރުކަމުގެ މަގާމުތަކާއި (5 ވޭތުވެދިޔަ) އަހަރުދުވަހުގެ ތެރޭގައި ފުރައިފައިވާ ޑިރެކްޓަރުކަމުގެ މަގާމުތަކުގެ މައުލޫމާތާއި، އެ ފަދަ މަގާމުތަކުގެ ސަބަބުން ކުންފުނީގެ ވިޔަފާރިއަށް ލިބިދޭންޖެހޭ ކޮންޓްރިބިއުށަނަށް އެއްވެސް އަސަރެއް ކޮށްފާނެ ނަމަ، އެ ކަން ނުވަތަ އަސަރެއް ނުކުރާނެކަމުގެ ބަޔާނެއް.

(ރ) އެ ފަރާތްތަކުން ތަމްސީލުކުރާ ހިއްސާދާރުގެ މައުލޫމާތު. (އެޕްލިކަބަލް ނަމަ).

(ބ) ސަބްސްޓޭންށަލް ހިއްސާދާރުންނާއި، ޕްރޮމޯޓަރުންނާއި، ޑިރެކްޓަރުންނާއި، ސީނިއަރ މެނޭޖްމަންޓާއި، ޓެކްނިކަލް ފަރާތްތަކުގެ އިސް މެންބަރުންނާ ދެމެދު އޮންނަ އާއިލީ ގުޅުމެއް ނުވަތަ އެހެންވެސް ގުޅުމެއް އޮތްނަމަ، އެ ކަން ހާމަކުރުން.

 

44 ވަނަ މާއްދާ - ބޯޑުގެ އުސޫލުތައް

ބޯޑުގެ އުސޫލުތަކާ ބެހޭ، އަންނަނިވި މައުލޫމާތު ހާމަކުރަންވާނެއެވެ.

(ހ) ބޯޑުގެ ކޮންމެ މެންބަރެއްގެ ޑިރެކްޓަރުކަމުގެ މުއްދަތު ހަމަވާ ތާރީހާއި، ކޮންމެ ޑިރެކްޓަރަކު ބޯޑުގައި ހިދުމަތްކޮށްފައިވާ މުއްދަތު (އެޕްލިކަބަލް ނަމަ).

(ށ) ބޯޑުގެ ކޮމެޓީތަކާއި، އެ ކޮމިޓީތަކުގެ މެންބަރުންގެ ނަމާއި، ކޮންމެ ކޮމިޓީއެއްގެ ޓާމްސް އޮފް ރެފަރެންސްގެ ހުލާސާއެއް،

 

45 ވަނަ މާއްދާ - ސަރވިސް ކޮންޓްރެކްޓްތަކުގެ މައުލޫމާތު

ކުންފުންޏާއި ކުންފުނީގެ ޑިރެކްޓަރުންނާއި ސީނިއަރ މެނޭޖްމަންޓާއި، ޓެކްނިކަލް ފަރާތްތަކުގެ އިސް މެންބަރުންނާ ދެމެދު، މިހާރު ހިނގަމުންދާ ނުވަތަ ހުށަހަޅައިފައިވާ ސަރވިސް ކޮންޓްރެކްޓެއް އޮތް ނަމަ، އަދި އެ ފަރާތްތަކުން، އަދާކުރާ މަގާމުން ވަކިވުމުން، މި ކޮންޓްރެކްޓްތަކުގެ ދަށުން ލިބިދޭ އެއްވެސް އިނާޔަތެއް ނުވަތަ ބެނެފިޓެއް އޮތް ނަމަ، އެ ފަދަ ކޮންޓްރެކްޓްތަކުގެ މުހިންމު ތަފުސީލުތައް ހާމަކުރަންވާނެއެވެ.

 

46 ވަނަ މާއްދާ - ކުންފުނީގައި އޮތް ހިއްސާގެ މިލްކުވެރިކަން

ޑިރެކްޓަރުންނާއި ސީނިއަރ މެނޭޖްމަންޓާއި، ޓެކްނިކަލް ފަރާތްތަކުގެ އިސް މެންބަރުން، ސީދާގޮތުން ނަމަވެސް ނުވަތަ ނުސީދާގޮތުން ނަމަވެސް، ކުންފުނީގެ ހިއްސާއެއް އެ ފަރާތްތަކުގެ މިލްކުގައި އޮތް ނަމަ، އެ ހިއްސާގެ އަދަދާއި، އިންސައްތަ އޮފަރގެ ކުރިޔަށް އެންމެ ފަހުގެ ޕްރެކްޓިކަބަލް ތާރީހަކާ ހަމަޔަށް އޮތް ގޮތާއި، އޮފަރގެ ފަހުން ބަދަލެއް އަންނާނެ ނަމަ، އެކަން ހާމަކުރަންވާނެއެވެ.

 

47 ވަނަ މާއްދާ - ޑިރެކްޓަރުންނާއި ސީނިއަރ މެނޭޖްމަންޓުގެ އިސް ފަރާތްތަކުގެ މުސާރައާއި އިނާޔަތްތައް

(ހ) ވޭތުވެދިޔަ މާލީ އަހަރު ކޮންމެ ޑިރެކްޓަރަކާއި، ސީނިއަރ މެނޭޖްމަންޓުގެ ކޮންމެ އިސް ފަރާތެއް އަދާކުރި ހުރިހާ މަގާމުތަކަށް، އަންނަނިވި މައުލޫމާތު ހިމެނޭހެން މުސާރައާއި މެޓީރިއަލް އިނާޔަތްތައް އިންކައިންޑް ވެސް ހިމެނޭ ގޮތަށް ހާމަކުރަންވާނެއެވެ.

1. ބޯނަސް ނުވަތަ ޕްރޮފިޓް ށެއަރކުރުމުގެ ޕްލޭނަކާ ގުޅިގެން ދައްކައިފައިވާ ފައިސާއާއި، އެ ޕްލޭނާއި، އެ ޕްލޭނުގައި އެ ފަދަ ފަރާތްތަކުން ބައިވެރިވި ބޭސިސްއެއް އޮތް ނަމަ، އެކަމުގެ ކުރު ބަޔާނެއް ނުވަތަ ނެތް ނަމަ އެކަން؛ ނުވަތަ
2. ހިއްސާގެ އޮޕްށަނަކުން ހިއްސާ ލިބިގެންފައިވާ ނަމަ، އެ ހިއްސާގެ އަދަދާއި އަގު ނުވަތަ ލިބިގެންފައިނުވާ ނަމަ އެކަން؛
3. މި މާއްދާގެ (ހ) އާއި (ށ) ގެ ބޭނުމަށް ހާމަކުރާ މައުލޫމާތުގައި، އެއްވެސް ކޮންޓިންޖެންޓް ނުވަތަ ފަސްކުރެވިފައިވާ މުސާރައާއި އިނާޔަތްތައް އެކުލެވޭ ނަމަ، އެކަން ހާމަކުރުން އަދި މުސާރައާއި އިނާޔަތްތަކުން ބައެއް ހިއްސާގެ އޮޕްށަނެއް ގޮތުގައި ދީފައި  އޮތް ނަމަ، އެ އޮޕްށަނުގެ ތެރެއިން އެކްސަސައިޒް ނުކޮށް އޮތް ބައެއް އޮތް ނަމަ އެ ބައިގެ މައުލޫމާތާއި، އެކްސަސައިޒްކުރަންޖެހޭ މުއްދަތާއި، މުއްދަތު ހަމަވާ ތާރީހު.

(ށ) އޮތް ނަމަ، އެ އޮޕްށަނުގެ ތެރެއިން އެކްސަސައިޒް ނުކޮށް ޮތް ބައެއް. އޮތް ނަމަ، އެ ބައިގެ މައުލޫމާތާއި އެކްސަސައިޒްކުރަންޖެހޭ މުއްދަތާއި، މުއްދަތު ހަމަވާ ތާރީހް ހިނގަމުންދާ މާލީ އަހަރުގައި ކޮންމެ ޑިރެކްޓަރަކާއި ސީނިއަރ މެނޭޖްމަންޓުގެ ކޮންމެ އިސް މެންބަރަކު، އެ ފަރާތުން އަދާކުރި ހުރިހާ މަގާމުތަކަށް އަންނަނިވި މައުލޫމާތު ހިމެނޭހެން މުސާރައާއި މެޓީރިއަލް އިނާޔަތްތައް އިން-ކައިންޑް ވެސް ހިމެނޭ ގޮތަށް، ހާމަކުރަންވާނެއެވެ.

1. ބޯނަސް ނުވަތަ ޕްރޮފިޓް ށެއަރކުރުމުގެ ޕްލޭނަކާ ގުޅިގެން ދައްކައިފައިވާ ފައިސާއާއި، އެ ޕްލޭނާއި، އެ ޕްލޭނުގައި އެ ފަދަ ފަރާތްތަކުން ބައިވެރިވި ބޭސިސްއެއް އޮތް ނަމަ، އެކަމުގެ ކުރު ބަޔާނެއް، ނުވަތަ ނެތް ނަމަ އެކަން، ނުވަތަ
2. ހިއްސާގެ އޮޕްށަނަކުން ހިއްސާ ލިބިގެންފައިވާ ނަމަ އެ ހިއްސާގެ އަދަދާއި އަގު ނުވަތަ ލިބިގެންފައި ނުވާ ނަމަ އެ ކަން؛
3. މި މާއްދާގެ (ށ) ގެ ބޭނުމަށް، އޭގެ ތެރެއިން ދައްކައިފައިނުވާ ޕޭމަންޓު ނުހިމަނައި މުސާރައާއި އިނާޔަތްތަކުގެ މައުލޫމާތު ހާމަކުރެވިދާނެ ނަމަވެސް، އެ ފަދައިން މައުލޫމާތު އުނިކޮށްފައިވާކަމުގެ ބަޔާނެއް ހާމަކުރުން.

(ނ) މުސާރައާއި އިނާޔަތްތައް އިން-ކައިންޑް ވެސް ހިމެނޭ ގޮތަށް، މި ގަވާއިދުގައި ބަޔާންކޮށްފައިވާ ފަދައިން ހާމަކުރުމުގައި އަންނަނިވި މައުލޫމާތު ހިމަނަންވާނެއެވެ.

1. ކޮންމެ ޑިރެކްޓަރަކަށް ވަކިވަކީން، އެ ފަރާތަކަށް ލިބުނު މުސާރައާއި އިނާޔަތްތައް، (އިން-ކައިންޑް ވެސް ހިމެނޭ ގޮތަށް)؛ އަދި
2. ސީނިއަރ މެނޭޖްމަންޓުގެ ކޮންމެ އިސް މެންބަރަކަށް ވަކިވަކީން، އެ ފަރާތަކަށް ލިބުނު މުސާރައާއި އިނާޔަތްތައް (އިން-ކައިންޑް ވެސް ހިމެނޭ ގޮތަށް) ހިމެނޭ (ގޮތަށް) ބޭންޑްތަކުން 50,000/- (ފަންސާސް ހާސް) ރުފިޔާގެ ބޭންޑްތަކުން. 

 

48 ވަނަ މާއްދާ - މެނޭޖްމަންޓް ރިޕޯޓިންގ ސްޓްރަކްޗަރ

ކުންފުނީގެ މެނޭޖްމަންޓް ރިޕޯޓިންގ ސްޓްރަކްޗަރ ހާމަކުރަންވާނެއެވެ.

 

49 ވަނަ މާއްދާ - ޕްރޮމޯޓަރުންނާއި، ޑިރެކްޓަރުންނާއި ސީނިއަރ މެނޭޖްމަންޓާއި ޓެކްނިކަލް ފަރާތްތަކުގެ އިސް މެންބަރުންގެ އިގްރާރު

ރާއްޖެއާއި ރާއްޖެއިން ބޭރު ވެސް، ހިމެނޭ ގޮތަށް، އަންނަނިވި ކަންކަމުގައި ޕްރޮމޯޓަރުންނާއި ޑިރެކްޓަރުންނާއި، ސީނިއަރ މެނޭޖްމަންޓާއި ޓެކްނިކަލް ފަރާތްތަކުގެ އިސް މެންބަރުންގެ އިގުރާރެއް ހާމަކުރަންވާނެއެވެ.

(ހ) ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި، ބަނގުރޫޓުވެފައިވާ ކަމުގެ ނުވަތަ އިފްލާސްކުރެވިފައިވާ ކަމުގެ ޕެޓިށަނެއް، އެ ފަރާތަކާމެދު، ނުވަތަ ޑިރެކްޓަރެއްގެ ގޮތުގައި ނުވަތަ ސީނިއަރ މެނޭޖްމަންޓުގެ އިސް މެންބަރެއްގެ ހައިސިއްޔަތު އަދާކުރި ކުންފުންޏަކާމެދު ނުވަތަ ޕަރޓްނަރށިޕަކާ މެދު، އެ ފަދަ ޕެޓިށަނެއް ހުށަހެޅި ބާތިލުވެފައި ނެތް ނަމަ، އެކަން.

(ށ) ކުންފުންޏެއްގެ ޑިރެކްޓަރުކަމަށް ނުވަތަ ސީނިއަރ މެނޭޖްމަންޓުގެ އިސް މެންބަރެއްގެ މަގާމަށް ސީދާގޮތުން ނުވަތަ ނުސީދާގޮތުން ނަމަވެސް އައްޔަނުވުމުން ޑިސްކޮލިފައި ކުރެވިފައިވާ ނަމަ އެކަން.

(ނ) ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި، ޖިނާއީ ދައުވާއެއް އުފުލައިފައިވުން ނުވަތަ ސާބިތުވެފައިވާ ނަމަ ނުވަތަ ހިނގަމުންދާ ޖިނާއީ އިޖުރާތެއްގައި ދައުވާ އުފުލިފައިވާ ފަރާތެއް ކަމުގައި ވާ ނަމަ، އެކަން ނުވަތަ ނެތްކަން ހާމަކުރުން. ކުށް ސާބިތުވެފައިވާ ހާލަތުގައި، މުއްދަތު ގުނުމުގައި ބަލަންވާނީ، ކުށް ސާބިތުކުރެވުނު ތާރީހުން ފެށިގެން ނުވަތަ ޖަލު ހުކުމެއް ނަމަ ޖަލުން މިނިވަންވި ތާރީހުން ފެށިގެން.

(ރ) ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި، ކެޕިޓަލް މާކެޓާ ގުޅޭގޮތުން، ކުރަން ލާޒިމުވެފައި އޮތް ގާނޫނީ ކަމެއްގައި ކުށްވެރިވެފައިވާ ކަމަށް ނުވަތަ އަސްލު އޮޅުވައިލައިފައިވާ ކަމަށް ނުވަތަ ނަޒާހަތްތެރި ނޫންކަމަށް ނުވަތަ ނާގާބިލުކަމަށް، ނުވަތަ މެލްޕްރެކްޓިސްގެ އަމަލެއް، ކޮށްފައިވާ ކަމުގެ ނިންމުމެއް އެ ފަރާތުގެ މައްޗަށް އޮތް ނަމަ، އެކަން ނުވަތަ ނޫންކަން.

(ބ) ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި ކެޕިޓަލް މާކެޓާ ގުޅުންހުރި މަދަނީ އިޖުރާތުގެ މައްސަލައެއްގައި، އޭގެ ތެރޭގައި، މަކަރާއި ހީލަތުގެ ނުވަތަ އަސްލު އޮޅުވައިލުމުގެ ނުވަތަ ނަޒާހަތްތެރިނުވުމުގެ ނުވަތަ ނާގާބިލުވުމުގެ ނުވަތަ މެލްޕްރެކްޓިސްގެ އަމަލެއް ކުރިކަމުގެ ދައުވާއެއް އެ ފަރާތުގެ މައްޗަށް އުފުލައިފައި އޮތް ނަމަ، އެކަން، ނުވަތަ ނޫންކަން:

(ޅ) އެއްވެސް ވިޔަފާރިއެއް ކުރުން ނުވަތަ ވިޔަފާރީގެ އެހެން ހަރަކާތެއް ހިންގުން ވަގުތީގޮތުން ނަމަވެސް، މަނާކޮށް، ކޯޓަކުން ނުވަތަ ސަރުކާރުން ނުވަތަ ރެގިއުލޭޓަރީ އޮތޯރިޓީއަކުން، ނުވަތަ ބޮޑީއަކުން އަމުރެއް ނެރެފައިވާކަން ނުވަތަ ނިޔާއެއް އިއްވައިފައިވާކަން، ނުވަތަ ގާނޫނީ ނިންމުމެއް ނިންމައިފައި އޮތް ފަރާތެއްކަން ނުވަތަ ނޫންކަން:

(ކ) ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި، އެއްވެސް ރެގިއުލޭޓަރީ އޮތޯރިޓީއަކުން ނުވަތަ ސެކިއުރިޓީޒްއަކުން ޑެރިވެޓިވްސް އެކްސްޗޭންޖަކުން، ނުވަތަ ޕްރޮފެށަނަލް ބޮޑީއަކުން ނުވަތަ ސަރުކާރުގެ އިދާރާއަކުން، ޒިންމާކުރުވުމުގެ ފިޔަވަޅެއް ނުވަތަ އިންޒާރެއް ދީފައިވާ ފަރާތެއްކަން، ނުވަތަ ނޫންކަން:

(އ) އެއްވެސް ސަބަބަކާހުރެ އެ ފަރާތެއްގެ މައްޗަށް ތަންފީޒް ނުކުރެވި އޮތް ނުވަތަ އިއްވައިފައިވާ އެއްވެސް ހުކުމެއް ނުވަތަ އިއްވައިފައިވާ އެއްވެސް ނިޔާއެއް އޮތް ފަރާތެއްކަން ނުވަތަ ނޫންކަން.

 

 

ފަސްވަނަ ބައި: ކުންފުނީގެ މައުލޫމާތު

 

50 ވަނަ މާއްދާ - ކުންފުނީގެ މައުލޫމާތު ކުންފުނީގެ ބެކްގްރައުންޑާ ބެހޭގޮތުން އަންނަނިވި މައުލޫމާތު ހާމަކުރަންވާނެއެވެ.

(ހ) ކުންފުނީގެ ގާނޫނީ ނަމާއި ވިޔަފާރި ނަން

 

 

 

މައި ގާނޫނު

މާލިއްޔަތުގެ ގާނޫނު (ގާނޫނު ނަންބަރު 2006-03)