މަސްވެރިކަމުގެ އާންމު ގަވާއިދު (ގަވާއިދު ނަންބަރު 2020-75) އަށް 2 ވަނަ އިސްލާހު ގެނައުމުގެ ގަވާއިދު

(މި ގަވާއިދަށް އަމަލުކުރަން ފެށީ 20 ޖަނަވަރީ 2025 ގައި)

މަސްވެރިކަމުގެ އާންމު ގަވާއިދު (ގަވާއިދު ނަންބަރު 2020-75) އަށް އަންނަނިވި އިސްލާހުތައް ގެނައުން.

1 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ހ) އަންނަނިވި ގޮތަށް އިސްލާހުކުރުން.

މަސްވެރިކަމުގައި ދައު ބޭނުންކުރުން 5.

(ހ) ރަށްރަށުގެ ފަޅުގެ ސަރަހައްދުގައި ދައު ބޭނުންކޮށްގެން މަސްވެރިކަން ކުރެވޭނީ، ވަކިވަކި ފަރުދުން އަމިއްލަ ބޭނުމަށް ކުރާ މަސްވެރިކަމުގެ ހަރަކާތްތަކުގައެވެ. އަދި މިގޮތަށް ދައު ބޭނުންކުރަންވާނީ، މި ގަވާއިދުގެ ޖަދުވަލު 1 ގައި ބަޔާންކޮށްފައިވާ ގޮތުގެ މަތީންނެވެ.

2 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ނ) އަންނަނިވި ގޮތަށް އިސްލާހުކުރުން.

މަސްވެރިކަމުގައި ދައު ބޭނުންކުރުން 5.

(ނ) މީހުން ދިރިއުޅޭ ރަށްރަށް ފިޔަވައި، ކައުންސިލްތަކުގެ އިހްތިސާސްގެ ތެރޭގައި ހިމެނޭ ފަޅުފަޅުންނާއި، ވަރުވާއަށް ލިޔެދީފައިވާ ފަޅުރަށްރަށުގެ ފަޅުންނާއި، ކުއްޔަށް ދޫކޮށްފައިވާ ފަޅުރަށްރަށުގެ ފަޅުންނާއި، ދައުލަތުގެ އިދާރާއެއްގެ ބެލުމުގެ ދަށުގައިވާ ފަޅުރަށްރަށުގެ ފަޅުން، ވަކިވަކި ފަރުދުން އަމިއްލަ ބޭނުމަށް ކުރާ މަސްވެރިކަމުގެ ހަރަކާތްތަކުގައި ދައު ބޭނުންކޮށްގެން މަސްވެރިކަން ކުރަންވާނީ އެ ރަށެއްގެ ބެލެނިވެރި ފަރާތުގެ ހުއްދަ ލިބިގެން، މި ގަވާއިދުގެ ޖަދުވަލު 1 ގައި ބަޔާންކޮށްފައިވާ ގޮތުގެ މަތީންނެވެ.

3 ބުނެވިދިޔަ ގަވާއިދުގެ 5 ވަނަ މާއްދާގެ (ރ) އަންނަނިވި ގޮތަށް އިސްލާހުކުރުން.

މަސްވެރިކަމުގައި ދައު ބޭނުންކުރުން 5.

(ރ) މި މާއްދާގެ (ށ) އާއި (ނ) ގެ ދަށުން ދޫކުރާ ހުއްދައިގެ މައުލޫމާތު (ހުއްދަދެވޭ ފަރާތާއި، ހުއްދަދެވޭ ހަރަކާތާއި، ހުއްދައިގެ މުއްދަތު ހިމެނޭހެން)، ހުއްދަދޭ ފަރާތުން މިނިސްޓްރީއާ ހިއްސާކުރަންވާނެއެވެ.

4 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ބ) އަންނަނިވި ގޮތަށް އިސްލާހުކުރުން.

މަސްވެރިކަމުގައި ދައު ބޭނުންކުރުން 5.

(ބ) ރަށްރަށުގެ ފަޅުގެ ސަރަހައްދު ފިޔަވައި، ދިވެހިރާއްޖޭގެ ކަނޑުގެ ސަރަހައްދުގައި ދައު އަޅައިގެން މަސްވެރިކަން ކުރުމާއި، ދިވެހިރާއްޖޭގެ ކަނޑުގެ ސަރަހައްދުން ބޭރުގައި ދިވެހި އުޅަނދުފަހަރުން ދައު އަޅައިގެން މަސްވެރިކަން ކުރުމަކީ މަނާކަމެކެވެ.

5 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ބ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

މަސްވެރިކަމުގައި ދައު ބޭނުންކުރުން 5.

(ޅ) މިނިސްޓްރީގެ ފަރާތުން ދޫކޮށްފައިވާ މަސްވެރިކަންކުރުމުގެ ސައްހަ ލައިސަންސެއް އޮތް އުޅަނދަކުން އެންވެރިކަން ކުރުމަށް ރަށްރަށުގެ ފަޅުގެ ސަރަހައްދު ފިޔަވައި، ދިވެހިރާއްޖޭގެ ކަނޑުގެ ސަރަހައްދުގައި ދައު ބޭނުންކުރުން މި މާއްދާގެ ދަށުން އިސްތިސްނާވާނެއެވެ.

6 ވަނަ މާއްދާ - ބުނެވިދިޔަ ގަވާއިދުގެ 7 ވަނަ މާއްދާ އަންނަނިވި ގޮތަށް އިސްލާހުކުރުން.

ފަޅު ރަށްރަށުގެ ފަޅުން މަސްވެރިކަން ކުރުން 7.

މީހުން ދިރިއުޅޭ ރަށްރަށް ފިޔަވައި، ކައުންސިލްތަކުގެ އިހްތިސާސްގެ ތެރޭގައި ހިމެނޭ ފަޅުފަޅުންނާއި، ވަރުވާއަށް ލިޔެދީފައިވާ ފަޅުރަށްރަށުގެ ފަޅުންނާއި، ކުއްޔަށް ދޫކޮށްފައިވާ ފަޅުރަށްރަށުގެ ފަޅުންނާއި، ދައުލަތުގެ އިދާރާއެއްގެ ބެލުމުގެ ދަށުގައިވާ ފަޅުރަށްރަށުގެ ފަޅުން މަސްވެރިކަން ކުރަންވާނީ އެ ރަށެއްގެ ބެލެނިވެރި ފަރާތުގެ ހުއްދަ ލިބިގެންނެވެ.

7 ވަނަ މާއްދާ - ބުނެވިދިޔަ ގަވާއިދުގެ 20 ވަނަ މާއްދާގެ (ށ) އަންނަނިވި ގޮތަށް އިސްލާހުކުރުން.

ކަނދުފަތި ދޫކުރުން ނުވަތަ އެޅުން 20.

(ށ) މި މާއްދާގެ (ހ) ގައިވާ ގޮތުގެ މަތީން މިނިސްޓްރީން ނުވަތަ މިނިސްޓްރީން ހަވާލުކުރާ ފަރާތަކުން ހަރުކުރާ ކަނދުފަތިތަކުގެ ލިސްޓެއް (ކަނދުފަތީގެ ޕޮޒިށަނާއި، ނަންބަރާއި، އެހެނިހެން ތަފުސީލު ހިމެނޭ ގޮތަށް) ބަލަހައްޓައި، މިނިސްޓްރީގެ ވެބްސައިޓުގައި އާންމުކޮށް އަދާހަމަކުރަމުން ގެންދަންވާނެއެވެ. އަދި ކަނދުފަތިތައް ހަރުކުރުމާ ގުޅޭ ތަފުސީލީ މައުލޫމާތު، ކަމާ ގުޅުންހުރި ބައިނަލްއަގުވާމީ ޖަމުއިއްޔާތަކުންނާއި ސަރަހައްދީ ޖަމުއިއްޔާތަކަށް، އެ ޖަމުއިއްޔާތަކުން ކަނޑައަޅާ މުއްދަތެއްގެ ތެރޭގައި ހިއްސާކުރަމުން ގެންދަންވާނެއެވެ.

8 ވަނަ މާއްދާ - ބުނެވިދިޔަ ގަވާއިދުގެ 20 ވަނަ މާއްދާގެ (ނ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

ކަނދުފަތި ދޫކުރުން ނުވަތަ އެޅުން 20.

(ރ) މި މާއްދާގެ (ހ) ގައިވާ ގޮތުގެ މަތީން މިނިސްޓްރީގެ ފަރާތުން ހަރުކުރާ ކަނދުފަތީގެ ބައިތައް ފަރުމާ ކުރުމުގައްޔާއި، ކަނދުފަތިތައް ހަރުކުރާނެ ސަރަހައްދު ކަނޑައެޅުމުގައްޔާއި، ކަނދުފަތިތައް ހަރުކުރުމުގައި ކަމާ ގުޅޭ ބައިނަލްއަގުވާމީ ޖަމުއިއްޔާތަކުންނާއި ސަރަހައްދީ ޖަމްއިއްޔާތަކުން ކަނޑައަޅައިފައިވާ މިންގަނޑުތަކާއި އުސޫލުތަކަށް ފުރިހަމައަށް އަމަލުކުރަންވާނެއެވެ.

9 ވަނަ މާއްދާ - ބުނެވިދިޔަ ގަވާއިދުގެ 22 ވަނަ މާއްދާގެ (ށ) އުނިކުރުން.

10 ވަނަ މާއްދާ - ބުނެވިދިޔަ ގަވާއިދުގެ 22 ވަނަ މާއްދާގެ (ރ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

ކަނދުފަތި ކައިރިން މަސްވެރިކަންކުރުން 22.

(ބ) މި ގަވާއިދުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތް ނަމަވެސ،ް މިނިސްޓްރީގެ ފަރާތުން، ދޮށީގެ މަސްވެރިކަން ކުރުމަށް ހާއްސަކޮށްގެން އަޅައިފައިވާ ކަނދުފައްޗެއް ނުވަތަ މުނިފޫހިފިލުވުމަށް ކުރާ މަސްވެރިކަން ކުރުމަށް ހާއްސަކޮށްގެން އަޅައިފައިވާ ކަނދުފައްޗެއްގެ ވަށައިގެންވާ 3 (ތިނެއް) މޭލުގެ ސަރަހައްދުގައި، ދައު އަޅައިގެން އެންވެރިކަން ކުރުމަކީ މަނާކަމެކެވެ.

11 ވަނަ މާއްދާ - ބުނެވިދިޔަ ގަވާއިދުގެ 11 ވަނަ ބާބު އުނިކުރުން.

12 ބުނެވިދިޔަ ގަވާއިދުގެ ޖަދުވަލު 5 ގެ 2 ވަނަ ނަންބަރު އަންނަނިވި ގޮތަށް އިސްލާހުކުރުން.

13 ވަނަ މާއްދާ - ބުނެވިދިޔަ ގަވާއިދުގެ ޖަދުވަލު 5 ގެ 4 ވަނަ ނަންބަރުގެ ފަހަތަށް އަންނަނިވި ފަދައިން ނަންބަރެއް އިތުރުކުރުން. 

14 ވަނަ މާއްދާ - މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ދުވަހުން ފެށިގެންނެވެ.  

މައި ގަވާއިދު

މަސްވެރިކަމުގެ އާންމު ގަވާއިދު (ގަވާއިދު ނަންބަރު 2020-75)