ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު (ގަވާއިދު ނަންބަރު 2021-25) އަށް 7 ވަނަ އިސްލާހު ގެނައުމުގެ ގަވާއިދު
(ގަވާއިދު ނަންބަރު 2024-96)
(މި ގަވާއިދަށް އަމަލުކުރަން ފެށީ 8 އޮކްޓޫބަރު 2024 ގައި)
ގަވާއިދު ނަންބަރު 2021-25 (ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު) އަށް އަންނަނިވި އިސްލާހު ގެނައުން.
1 ވަނަ މާއްދާ - ބުނެވިދިޔަ ގަވާއިދުގެ ޖަދުވަލު 6 އަށް (ބ) ގެ ގޮތުގައި އަކުރެއް އިތުރުކުރުން.
(ބ) ފެހުރިއްސާއި އެ ތަކެތީގެ މާހައުލުތައް ހިމާޔަތްކޮށް ރައްކައުތެރިކުރުމުގައި އަމަލުކުރާނެ ގޮތުގެ އުސޫލުތައް.
(1) ގުދުރަތީ މާހައުލުގައި ފެންނަ ފެހުރިހީގެ ތަބީއަތު ދަމަހައްޓައި، އެ ތަކެއްޗަށާއި މާހައުލަށް ބުރޫނާރާނެ ފަދައިން އިންސާނުންގެ އަމަލުތައް ބަހައްޓަންވީ ގޮތާއި، މިކަމުގައި ގެންގުޅެންވީ އުސޫލުތައް.
1.1 މޫދުގެ އެއްވެސް ހަރަކާތެއްގައި މޫދަށް އެރިއުޅޭއިރު، ފެހުރިއްސާ 3 (ތިނެއް) މީޓަރަށްވުރެ ކައިރިވެގެން ނުވާނެއެވެ. އަދި ފެހުރިހީގެ ނިގޫކޮޅާ ދިމާއިން 4 (ހަތަރެއް) މީޓަރަށް ވުރެ ކައިރިވެގެން ނުވާނެއެވެ.
1.2 މޫދުގައި ހަރަކާތްތެރިވެ އުޅޭއިރު ފެހުރިހީގައި އަތްލައި ގޯނާކޮށްގެން ނުވާނެއެވެ. އަދި ފެހުރިހީގެ އުރަހައިގައި ހިފަހައްޓައިގެން ފަތާ ނުވަތަ ފީނާ ހަދައިގެން ނުވާނެއެވެ.
1.3 ފެހުރިއްސެއް ފެންނަ ހާލަތުގައި އެ ތަކެތި ދަތުރުކުރާ ދިމާއަށް ހުރަސްއަޅައިގެން ނުވާނެއެވެ.
1.4 ފެހުރިހި ބަލައިލުމަށް ޓަކައި ކައިރިވާންވާނީ ވީހައި ވެސް މަޑުމަޑުން، ފެހުރިހީގެ އަރިމަތިން، ފީނާ މީހާ ފެންނަ ގޮތަށެވެ. މި ހާލަތުގައި ފެހުރިހި ކުރިޔަށް ދިއުމަށް ހުރަސްއަޅައިގެން ނުވާނެއެވެ.
1.5 ފެހުރިހީގެ މައްޗަށް ވާ ގޮތަށް ފީނާ ނަމަ، މަދުވެގެން 20 (ވިހި) މީޓަރުގެ ދުރުމިން ބަހައްޓަންޖެހޭނެއެވެ. މިއަށްވުރެ ކައިރީގައި އޮންނަ ފެހުރިއްސެއްގެ މަތިން ފީނުމަކީ މަނާކަމެކެވެ. އެއީ އެ ދިރުންތަކަށް މައްޗަށް އެރޭނެ ޖާގަދިނުމަށާއި އެ ތަކެތި ތިލަވުމަށް ހުރަސްނޭޅުމަށާއި، ފެހުރިއްސަކީ، އޭގެ ހަށިގަނޑުގެ ފިނިހޫނުމިން އެއްވަރަކަށް ބެހެއްޓުމަށް ނުވަތަ ތާރމޯރެގިއުލޭޓް ކުރުމަށް މޫދުގައި ތިލަވާ ދިރުމަކަށް ވާތީއެވެ. އަދި ފެހުރިހި ބަލައިލަން އޭގެ އަނެއް ފަޅިއަށް ދާން ބޭނުންވެއްޖެ ހާލަތެއްގައި ފީނަންވާނީ، ފުރަތަމަ ފަހަތަށް ޖެހުމަށްފަހ،ު މި އަކުރުގެ 1.1 ގައި ބަޔާންކޮށްފައިވާ ދުރުމިން ބަހައްޓައިގެން، އޭގެ ނިގޫކޮޅަށްވާ ކޮޅުންނެވެ.
1.6 ފެހުރިއްސަށް ކާންދިނުމަކީ މަނާކަމެކެވެ. ފެހުރިއްސަށް ކާންއެޅުމަކީ، އެ ތަކެތީގެ ކެއުމުގެ ގުދުރަތީ ތަބީއަތަށް (ފިލްޓަރ ފީޑިންގއަށް) އަސަރު ފޯރާނެ ކަމެކެވެ.
1.7 ފެހުރިއްސަކީ އައްޔަށް ސެންސިޓިވް ދިރުމެއްކަމުގައި ވާތީ، އެއްވެސް ބާވަތެއްގެ އައްޔެއް ނުވަތަ ފްލޭށްއެއްބޭނުންކޮށްގެން ފެހުރިހީގެ މޫނާ ދިމާއިން ނުވަތަ ބޮލާ ދިމާއިން/ކައިރީގައި ފޮޓޯ ނަގައިގެން ނުވާނެއެވެ. އެއީ މިފަދަ އަލީގެ ސަބަބުން ފެހުރިހި ސިއްސައިގެންދިޔުމާއި ފެހުރިއްސަށް މިސްރާބު އޮޅުން ފަދަ ކަންކަން ދިމާވެދާނެތީއެވެ.
1.8 ފެހުރިހި ފެންނަ ސަރަހައްދުތަކުގައި ރޭގަނޑުގަޑީގައި ލައިޓް ދިއްލައިގެން ފެހުރިހި ތިލަކޮށްގެން ބެލުމުގެހަރަކާތްތައް ބާއްވައިގެން ނުވާނެއެވެ.
1.9 މޫދު ކުޅިވަރުގައި ބޭނުންކުރާ އިންޖީނުލީ އުޅަނދާއި، އިންޖީނު ނުލާ އުޅަނދު ފަދަ ތަކެތީގައި ފީނަން އުޅޭ މީހުން ނުވަތަ ފަތައިފައި އުޅޭ މީހުން، ފެހުރިހި ހުންނަ ސަރަހައްދުތަކުގައި ހަރަކާތްތެރިވެގެން ނުވާނެއެވެ.
1.10 ފެހުރިހި އުޅޭ ސަރަހައްދުގައި އަންމޭންޑް އޭރިއަލް ވެހިކަލް ބޭނުންކޮށްގެން ނުވަތަ ޑްރޯން ބޭނުންކޮށްގެން ފޮޓޯގްރަފީ ނުވަތަ ވީޑިއޯގްރަފީ ކުރާއިރު، ޑްރޯން އުދުއްސަންވާނީ، ކަނޑުގެ ލޮނުގަނޑުން ފެށިގެން 30 (ތިރީސް) މީޓަރަށް ވުރެ ތިރިނުވާވަރަށެވެ.
1.11 އަންމޭންޑް އޭރިއަލް ވެހިކަލް ބޭނުންކޮށްގެން ނުވަތަ ޑްރޯން ބޭނުންކޮށްގެން ފެހުރިހީގެ ފޮޓޯގްރަފީ ނުވަތަ ވީޑިއޯގްރަފީ ކުރާއިރު، ޑްރޯން ދުއްވާ ފަރާތަށް ހުރިހާ ވަގުތެއްގައި ވެސް ޑްރޯން ފެންނަން (ލައިން އޮފް ސައިޓް) ވާނެއެވެ.
1.12 ފެހުރިހި ފެންނަ ސަރަހައްދުތަކުގައި ސެލްފީ ސްޓިކް ނުވަތަ ފެހުރިހީގެ ތަބީއަތަށް ބުރޫއަރާފާނެ ފަދަ ތަކެތި ބޭނުންކޮށްގެން ނުވާނެއެވެ.
ތަސްވީރު .1 ފެހުރިއްސާ ކައިރިވެއުޅެވޭނެ ގޮތް ދައްކުވައިދޭ ކުރެހުން
2 ގުދުރަތީ މާހައުލުގައި ފެންނަ ފެހުރިހީގެ ތަބީއަތު ދަމަހައްޓައި، އެ ދިރުންތަކާއި މާހައުލަށް ބުރޫނާރާނެ ފަދައިން އުޅަނދުފަހަރުގެ ހަރަކާތްތައް ބަހައްޓަންވީ ގޮތާއި، މިކަމުގައި ގެންގުޅެންވީ އުސޫލުތައް.
2.1 އެއްވެސް ހާލަތެއްގައި ފެހުރިހީގެ ގައިމަތިން އުޅަނދުފަހަރު ދުއްވައިގެން ނުވާނެއެވެ.
2.2 ފެހުރިއްސެއް ފެންނަ ހާލަތުގައި އެ ތަކެތި ދަތުރުކުރާ ދިމާއަށް ހުރަސްއަޅައިގެން ނުވާނެއެވެ. އަދި އުޅަނދުގެ މިސްރާބ،ު ފެހުރިއްސަށް ހުރަސްނޭޅޭނޭ ގޮތަކަށް ބަދަލުކުރަންވާނެއެވެ.
2.3 ފެހުރިއްސަށް ކާންދިނުމަކީ މަނާކަމެކެވެ. ފެހުރިއްސަށް ކާންއެޅުމަކީ، އެ ތަކެތީގެ ކެއުމުގެ ގުދުތަރީ ތަބީއަތަށް (ފިލްޓަރ ފީޑިންގއަށް) އަސަރު ފޯރާނެ ކަމެކެވެ.
2.4 ފެހުރިއްސަކީ އައްޔަށް ސެންސިޓިވް ދިރުމެއްކަމުގައި ވާތީ، އުޅަނދުގެ ސަލާމަތީ ރައްކައުތެރިކަމަށް ބޭނުންކުރަން މެނުވީ އެއްވެސް ބާވަތެއްގެ އައްޔެއް ފެހުރިހި އުޅޭ ސަރަހައްދެއްގައި މޫދަށްވާގޮތަށް ބޭނުންކޮށްގެން ނުވާނެއެވެ.
2.5 ފެހުރިހި ފެންނަ ސަރަހައްދުތަކުގައި ރޭގަނޑުގަޑީގައި ލައިޓް ދިއްލައިގެން ފެހުރިހި ތިލަކޮށްގެން ބެލުމުގެ ހަރަކާތްތައް ހިންގައިގެން ނުވާނެއެވެ. އަދި އެއްވެސް އުޅަނދަކަށް ބޭނުންވާ ސަލާމަތީ ބައްތިއެއްގެ އިތުރުން އެއްވެސް ލައިޓެއް، މި ފަދަ ސަރަހައްދުތަކުގައި ރޭގަނޑު 6:00 އިން ފެށިގެން ހެނދުނު 6:00 އާ ދެމެދުގެ ވަގުތުތަކުގައި ދިއްލައިގެން ނުވާނެއެވެ.
3 ފެހުރިހީގެ ކޮންޓެކްޓް ޒޯނުގެ ކައިރީގައި ނުވަތަ ޒޯނުގެ ތެރޭގައި އުޅަނދުފަހަރު ހަރަކާތްތެރިވުމުގައި ގެންގުޅެންވީ އުސޫލުތައް.
3.1 ފެހުރިހީގެ ވަށައިގެންވާ 250 (ދުއިސައްތަ ފަންސާސް) މީޓަރު ނުވަތަ 820.2 (އަށްސަތޭކަ ވިހި ޕޮއިންޓް ދޭއް) ފޫޓުގެ ސަރަހައްދަކީ ކޮންޓެކްޓް ޒޯނެވެ.
3.2 ކޮންޓެކްޓް ޒޯނުގައި ހަރަކާތްތެރިވެވޭނީ ފަހަރަކު 3 (ތިނެއް) އުޅަނދަށެވެ. އެހެންނަމަވެސް ހިމާޔަތްކޮށްފައިވާ ސަރަހައްދުތަކުގައި އަމަލުކުރާނެ މެނޭޖްމަންޓް ޕްލޭނެއް އޮތް ނަމަ، އެ ސަރަހައްދަށް މި އަދަދު ކަނޑައަޅައި އަމަލުކުރާނީ، އެ މެނޭޖްމަންޓް ޕްލޭނަކުންނެވެ.
3.3 ކޮންޓެކްޓް ޒޯނުގައި ގަޑިއަކު 5 (ފަހެއް) ނޮޓް (9.3 ކިލޯމީޓަރު) އަށްވުރެ ބާރުމިނުގައި އުޅަނދުތައް ދުއްވައިގެން ނުވާނެއެވެ. މިގޮތަށް ހަރަކާތްތެރިވާއިރު ފެހުރިހީގެ 50 (ފަންސާސް) މީޓަރު ބައުންޑަރީގެ ތެރޭގައި އުޅަނދުތަކުގެ ބާރުމިން ބަހައްޓަން ޖެހޭނީ، ގަޑިއަކު 2 (ދޭއް) ނޮޓް (3.7 ކިލޯމީޓަރު) އަށެވެ. އަދި ސަލާމަތީ ހާލަތްތަކުގައި ކޮންޓެކްޓް ޒޯނުން ނުކުތުމަށް ގަޑިއަކު 5 (ފަހެއް) ނޮޓް (9.3 ކިލޯމީޓަރު) އަށްވުރެ ބާރަށް ދުއްވަން ޖެހިއްޖެ ހާލަތުގައި އެ ޒޯނުން ވީހައިވެސް އަވަހަކަށް ނުކުތުމަށް މަސައްކަތްކުރަންވާނެއެވެ.
3.4 ކޮންޓެކްޓް ޒޯނުގެ ތެރޭގައި އެންމެ ކައިރިއަށްވާގޮތަށް އޮންނަ ފެހުރިއްސާއި އުޅަނދާ ދޭތެރޭ 15 (ފަނަރަ) މީޓަރުގެ ދުރުމިން ބަހައްޓަންޖެހޭނެއެވެ. މިގޮތަށް 15 (ފަނަރަ) މީޓަރު ދުރުމިނުގައި އުޅަނދު ހަރަކާތްތެރިވާ ހާލަތްތަކުގައި ފެހުރިއްސެއް އުޅަނދާ ދިމާއަށް އަންނަ ނަމަ، އުޅަނދުގެ ގިޔަރު ނިއުޓްރަލަށް ލާންވާނެއެވެ. އަދި އަލުން ގިޔަރަ ށް ލާންވާނީ، ފެހުރިއްސާއި އުޅަނދާ ދޭތެރޭ މަދުވެގެން 15 (ފަނަރަ) މީޓަރު ދުރުމިން ހަމަވުމުންނެވެ.
3.5 ކޮންޓެކްޓް ޒޯނުގައިވާ އުޅަނދަކުން ފެހުރިހި ބަ ލައިލަން މޫދަށް ފޭބޭނީ، ގިނަވެގެން 12 (ބާރަ) މީހުންނަށެވެ. އަދި ފައިބާ ކޮންމެ މީހަކަށް މޫދުގައި ހަރަކާތްތެރިވެވޭނީ، 15 (ފަނަރަ) މިނެޓަށެވެ. އެހެންނަމަވެސް ހިމާޔަތްކޮށްފައިވާ ސަރަހައްދުތަކުގައި އަމަލުކުރާނެ މެނޭޖްމަންޓް ޕްލޭނެއް އޮތް ނަމަ، އެ ސަރަހައްދަށް މި އަދަދު ކަނޑައަޅައި އަމަލުކުރާނީ، އެ މެނޭޖްމަންޓް ޕްލޭނަކުންނެވެ.
3.6 ކޮންޓެކްޓް ޒޯނުގައި، އިންޖީނުއެޅި ނުވަތަ އެހެނިހެން ހަކަތައެއް ބޭނުންކޮށްގެން އުޅަނދެއްގެ އެހީގައިފަތައިގެން ނުވަތަ ފީނައިގެން ނުވާނެއެވެ. އަދި މި ނޫނަސ،ް މީހަކު ކަފުޖަހައިގެން ނުވަތަ އަރުވައިގެން ދުއްވުމަށް ވެސް ކޮންޓެކްޓް ޒޯނުގައި އުޅަނދެއް ބޭނުންކޮށްގެން ނުވާނެއެވެ.
3.7 ފެހުރިހީގެ ކޮންޓެކްޓް ޒޯ ނުގައި މޫދުކުޅިވަރުގައި ބޭނުންކުރާ އިންޖީނުލީ އުޅަނދު ހަރަކާތްތެރިވެގެން ނުވާނެއެވެ.
ތަސްވީރު 2. ފެހުރިއްސާ އުޅަނދު ކައިރިވެ އުޅުވޭނެ ގޮތް ދައްކުވައިދޭ ކުރެހުން
4 ހާނީއްކަވެފައިވާ ނުވަތަ ބަލިވެފައިވާ ފެހުރިއްސާމެދު އަމަލުކުރާނެ ގޮތް.
4.1 މަސްވެރިކަމުގެ ބޭނުންކުރާ އާލާތެއްގައި ނުވަތަ އޮޑިދޯނިފަހަރު ހިފަހައްޓަން ޖަހާ ވަލެއްގައި ނުވަތަ މޫރިންގ ލައިނެއްގައި ނުވަތަ އޮއިވާލި ކަނދުފައްޗެއްގައި ޖެހިފައިވާ ދިރިއޮތް ފެހުރިއްސެއް ފެނިއްޖެ ނަމަ، އެ ހަބަރު،ދޯނީގެ ފަޅުވެރީންނަށް ނުވަތަ އެޖެންސީއަށް އަވަހަށް އަންގައިދީ، އެ ސަރަހައްދު ފާހަގަކުރާށެވެ.
4.2 ހައްޔަރުވެފައިވާ ފެހުރިހީގައި އޮޅިފައިވާ ވައު ނުވަތަ ދައު (ނުވަތަ އެނޫންވެސް އެފަދަ އެހެން އެއްޗެއް)، ފެހުރިއްސަށް ގެއްލުންނުވާނެ ފަދަ ގޮތަކަށ،ް ވަޅިއެއްގެ ނުވަތަ ތޫނު އާލާތެއްގެ އެހީގައި ކަނޑައި ވަކިކުރުމަށްފަހ،ު މިނިވަންކުރަންވާނެއެވެ.
4.3 އޮއިވާލި އަނބުރާ މޫދަށް ދޫކޮށްނު ލައި އެއްގަމަށް ގެންދަންވާނެއެވެ. އަދި ވޭސްޓް މެނޭޖްމަންޓް ސެންޓަރަކަށް ގެންދެވެން އޮތް ނަމަ ގެންދަންވާނެއެވެ.
4.4 އޮޑިދޯނިފަހަރުގެ ބުރަފަތިން ޖެހިގެން ނުވަތަ ގުދުރަތީގޮތުން ކުރިމަތިވި ހާދިސާއެއްގެ ސަބަބުން ހާނީއްކަވެފައިވާ ފެހުރިއްސެއް ފެނިއްޖެ ނަމަ، ފެހުރިހީގައި އަތްލައި ނުވަތަ ފެހުރިހި އެހެން ތަނަކަށް ގެންދިއުމަށް މަސައްކަތް ކުރުމުގެ ބަދަލުގައި އެއަށް ލިބިފައިވާ ޒަހަމްތައް އަމިއްލައަށް އޭގެ ގުދުރަތީ މާހައުލުގައި ފަސޭހަވުމަށް ފުރުސަތުދޭންވާނެއެވެ.
4.5 މި ހާދިސާ ހިނގައިފައިވާ ސަރަހައްދާއި ފެހުރިހީގެ މައުލޫމާތު (ފޮޓޯ ނުވަތަ ވީޑިއޯ ތަފުސީލުކޮށް ނެގޭ ނަމަ، ފޮޓޯއާއި ވީޑިއޯއާއެކު) ވީހައިވެސް އަވަހަށް އޭޖެންސީއަށް އަންގަންވާނެއެވެ.
5 މަރުވެފައިވާ ނުވަތަ މަރާލައިފައިވާ ފެހުރިއްސާ މެދު އަމަލުކުރުމުގައި ގެންގުޅެންވީ އުސޫލުތައް.
5.1 މަރުވެފައިވާ ނުވަތަ މަރާލައިފައިވާކަމަށް ށައްކުކުރެވޭ ފެހުރިއްސެއް ފެނިއްޖެ ނަމަ، އެ ފެނުނު ފަރާތަކުން އެކަން، ވީހައިވެސް އަވަހަށް ފޮޓޯއާއެކު އޭޖެންސީއަށް އަންގަންވާނެއެވެ.
5.2 ފެހުރިހި މަރުވެފައިވަނީ ގުދުރަތީ ސަބަބެއް ނޫން އެހެން ސަބަބަކާހުރެކަމަށް ބެލެވޭ ނަމަ، މި ފަދަ ހާލަތެއްގައި ފެހުރިހި މަރުވެފައިވާ ތަނުން އެހެން ތަނަކަށް ގެންދިޔަ ކަމުގައި ވިޔަސް ގެންދަންވާނީ، އެޖެންސީގެ ލަފާގެ މަތީން، ތަހުގީގު ފުރިހަމަކުރުމަށް ބޭނުންވާ ހެއްކާއި ގަރީނާއާއި ބަޔާން ނެގުމަށްފަހުގައެވެ.
5.3 ގިނަ އަދަދަކަށް ފެހުރިހި މަރުވެފައިވާ ނަމަ ނުވަތަ މަރުވެފައިވަނީ އާދަޔާހިލާފު ގޮތަކަށް ކަމަށް ށައްކުކުރެވޭ ނަމަ، އެކަން އެޖެންސީގެ ސަމާލުކަމަށް ގެންނަންވާނެއެވެ.
5.4 ގިނަ އަދަދަކަށް ފެހުރިހި މަރުވެފައިވާ ނަމަ ނުވަތަ މަރުވެފައިވަނީ ގުދުރަތީ ކާރިސާއަކުން ނަމަ ނުވަތަ އާދަޔާހިލާފު ގޮތަކަށްކަމަށް ށައްކުކުރެވޭ ނަމަ، އެކަން ދެނެގަތުމަށް ހަދަންޖެހޭ އެސެސްމަންޓުތައް އެޖެންސީން ހަދަންވާނެއެވެ.
5.5 ގުދުރަތީ މަރަކުން މަރުވެފައިވާ ފެހުރިއްސެއްކަމަށް އެޖެންސީން ނިންމައިފި ހާލަތެއްގައި، މޫދުގައި ފަނާވުމަށް ފެހުރިހި ދޫކޮށްލާށެވެ.
6 ފެހުރިއްސާއި އެ ތަކެތީގެ މާހައުލުތަކުގައި އަމަލުކުރާނެ ބެސްޓް ޕްރެކްޓިސެސް.
6.1 އެންވެރިކަން ކުރުމަށް ލައިޓް ދިއްލާ ހާލަތުގައި ފެހުރިއްސެއް ތިލަވެއްޖެ ނަމަ، ލައިޓް ނިއްވައިލާށެވެ. ނުވަތަ އެހެން ސަރަހައްދަކުން އެން ނެގުމުގެ މަސައްކަތް ކުރިޔަށްގެންދާށެވެ.
6.2 ފެހުރިހި ކައިރީގައި އުޅެންވާނީ ވީހައި ވެސް އަޑުމަޑުކޮށެވެ. ބޯޓުން ފޭބުމުގައި އަދި މޫދުގައި ހަރަކާތްތެރިވެ އުޅޭއިރު ވެސް މިކަމަށް ސަމާލުވާން ޖެހޭނެއެވެ. އަދި ފެންމަތީގައި އަޑުގަދަނުކުރުމާއި ގަދަޔަށް ބަކަތަޅައި ނެހެދުމަށް ސަމާލުވާންޖެހޭނެއެވެ.
6.3 ފެހުރިހި ބެލުމަށް އުޅަނދުން މޫދަށް ފުންމާލާ ނަމަ، އަޑުގަދަވާނެ ފަދަ ގޮތަކަށް ފުންމައިނުލުމަށްސަމާލުވާންޖެހޭނެއެވެ.
6.4 ރަށެއްގެ ފަރުމައްޗަށް ނުވަތަ ފަޅުތެރެއަށް ނުވަތަ ބަނދަރުތެރެއަށް ފެހުރިއްސެއް ވަދެ 2 (ދޭއް) ގަޑިއިރަށްވުރެ ގިނައިރު ނުނިކުމެވި އުޅޭ ފަދަ މަންޒަރެއް ފެނިއްޖެ ނަމަ، އެކަން ވަގުތުން އެޖެންސީއަށް އަންގަންވާނެއެވެ. އަދި މިފަދަ ހާލަތުގައި ފެހުރިހި ބަނދަރުން ނެރުމަށް މީހުން ބަނދަރުތެރެއަށް އެރ،ި ފެހުރިހި އެ ތަނުން ނެރެން މަސައްކަތްކޮށްގެން ނުވާނެއެވެ. އަދި ބަނދަރުގައި ހަރަކާތްތެރިވާ އުޅަނދުފަހަރުގެ ހަރަކާތްތައް ވީހައި ވެސް މަދުކޮށ،ް ފެހުރިހި އަމިއްލައަށް ނުކުތުމަށް ޖާގަދޭންވާނެއެވެ.
6.5 ދިވެހިރާއްޖޭގައި ފެހުރިހި ފެންނަ ހާއްސަ ސަރަހައްދުތަކުގައި ހަރަކާތްތެރިވާ އަދި ފެހުރިހި ބެލުމަށް ދަތުރުކުރާ އުޅަނދުތަކުގައި ޕްރޮޕެލަރ ގާޑު ހަރުކުރުމަކީ އެދެވިގެންވާ ކަމެކެވެ.
2 މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެން 3 (ތިނެއް) މަސްދުވަސް ހަމަވާ ތާރީހުން ފެށިގެންނެވެ.
މައި ގަވާއިދު
ކިޔުންތެރިންގެ ހިޔާލު