އެއްގަމު ދަތުރުފަތުރުގެ ގާނޫނު (ގާނޫނު ނަންބަރު 2009-05) ގެ ދަށުން ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާބެހޭ ގަވާއިދު (ގަވާއިދު ނަންބަރު 2021-145) އަށް 2 ވަނަ އިސްލާހު ގެނައުމުގެ ގަވާއިދު
(ގަވާއިދު ނަންބަރު 2024-82)
(މި ގަވާއިދަށް އަމަލުކުރަން ފެށީ 9 ސެޕްޓެމްބަރު 2024 ގައި)
ގަވާއިދު ނަންބަރު 2021-145 (ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) ގެ ދަށުން ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާބެހޭ ގަވާއިދު) އަށް އަންނަނިވި އިސްލާހު ގެނައުން.
1 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ނ) ގެ (1) ވަނަ ނަންބަރު، އަންނަނިވި ގޮތަށް އިސްލާހުކުރުން.
(1) އުޅަނދާ ހަވާލުވުމުގެ ކުރިން، އުޅަނދުގެ ވެރިފަރާތުން، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) ގެ ދަށުން ނުވަތަ އެ ގާނޫނުގެ ދަށުން ހަދައިފައިވާ ގަވާއިދުތަކުގެ ދަށުން ދައްކަންޖެހޭ ޖޫރިމަނާއެއް އޮތް ނަމަ، އެ ޖޫރިމަނާއެއް ބަލައިގަތުމަށް ކަނޑައަޅައިފައިވާ އިދާރާއަކަށް ފައިސާ ދެއްކިކަމުގެ ލިޔުން ނުވަތަ އެފަދަ އިދާރާއަކަށް ޖޫރިމަނާ ފައިސާ ދެއްކުމަށް ވަކި އުސޫލަކަށް އެއްބަސްވެވިގެން ފައިސާ ދައްކަމުންދާ ނަމަ، އެފަދަ އެއްބަސްވުމެއް އޮތްކަން އެނގޭނެ ލިޔުމާއި، އެ އެއްބަސްވުމާ އެއްގޮތަށް ފައިސާ ދައްކަމުންދާކަމުގެ ލިޔުމާއި، ދިވެހި ފުލުހުންގެ ހިދުމަތުގެ ބެލުމުގެ ދަށަށް އެ އުޅަނދެއް ގެނެވުނު ސަބަބާ ގުޅިގެން ދައްކަންޖެހޭ ޖޫރިމަނާ ދެއްކިކަމުގެ ލިޔުން ހުށަހަޅަންވާނެކަން؛
2 ވަނަ މާއްދާ - ބުުނެވިދިޔަ ގަވާއިދުގެ 5 ވަނަ މާއްދާގެ (ބ) ގެ (2) ވަނަ ނަންބަރުގެ ފަހަތަށް އަންނަނިވި ގޮތަށް (3) ވަނަ ނަންބަރާއި (4) ވަނަ ނަންބަރުގެ ގޮތުގައި ނަންބަރު އިތުރުކުރުން.
(3) މި މާއްދާގެ (ޅ) ގެ (6) ވަނަ ނަންބަރުގައި ބަޔާންކޮށްފައިވާ އުޅަނދުތައް ދޫކުރެވޭނީ، އެ އުޅަނދަކަށް ދީފައިވާ ރަޖިސްޓްރީ ނަންބަރު ރަނގަޅުކޮށް، އެ އުޅަނދެއް ރަޖިސްޓަރީކޮށްފައިވާ ޒޯނަކަށް އެ އުޅަނދު އަނބުރާ ގެންދާކަން ދިވެހި ފުލުހުންގެ ހިދުމަތުން ކަށަވަރުކުރުމަށްފަހުގައެވެ.
(4) މި މާއްދާގެ (ޅ) ގެ (7) ވަނަ ނަންބަރުގައި ބަޔާންކޮށްފައިވާ މިނިސްޓްރީން ނުވަތަ މިނިސްޓްރީން ކަނޑައަޅާ ގޮތެއްގެ މަތީން، ރަޖިސްޓަރީނުކުރާ އެއްގަމު އުޅަނދެއްގައި، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) އާއި އެ ގާނޫނުގެ ދަށުން އެކުލަވައިލައިފައިވާ ގަވާއިދާ ހިލާފަށް ރަޖިސްޓަރީ ނަންބަރެއް ހަރުކޮށްގެން ނުވަތަ ރަޖިސްޓަރީ ނަންބަރެއް ހަރުނުކޮށް ދުއްވައިފައިވާ އުޅަނދެއް ހިފަހައްޓައިފި ނަމަ، އެ އުޅަނދެއް އަނބުރާ ހަވާލުކުރަންވާނީ، މި ގަވާއިދުގެ 5 ވަނަ މާއްދާގެ (ނ) ގެ (1) ވަނަ ނަންބަރާއި، 5 ވަނަ މާއްދާގެ (ބ) ގެ (2) ވަނަ ނަންބަރުގައި ބަޔާންކޮށްފައިވާ ކަންކަން ފުރިހަމަކުރިކަމުގައި ވީނަމަވެސް، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) އާއި އެ ގާނޫނުގެ ދަށުން އެކުލަވައިލައިފައިވާ ގަވާއިދާ އެއްގޮތްވާ ގޮތުގެ މަތީން 30 (ތިރީސް) ދުވަހުގެ މުއްދަތުގެ ތެރޭގައި އެ އުޅަނދެއް ރަޖިސްޓަރީކޮށް ނިންމުމުންނެވެ.
3 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ޅ) އަންނަނިވި ގޮތަށް އިސްލާހުކުރުން.
(ޅ) މި ގަވާއިދުގެ 5 ވަނަ މާއްދާގެ (ނ) ގެ (1) ވަނަ ނަންބަރުގައި، އުޅަނދާ ހަވާލުވުމަށް ޓަކައި އުޅަނދުގެ ވެރިފަރާތުން ޖޫރިމަނާގެ ފައިސާ ދެއްކިކަމުގެ ލިޔުން ނުވަތަ ޖޫރިމަނާގެ ފައިސާ ދެއްކުމަށް ވެވޭ އެއްބަސްވުމާ އެއްގޮތަށް ފައިސާ ދައްކަމުންދާކަމުގެ ލިޔުން ހުށަހަޅަންޖެހޭ ކަމުގައި ބަޔާންކޮށްފައި އޮތް ނަމަވެސް، މި އަކުރުގެ (1) ވަނަ ނަންބަރާއި (2) ނަންބަރާއި (3) ވަނަ ނަންބަރުގައި ބަޔާންކޮށްފައިވާ އުޅަނދުތައް ހިފެހެއްޓޭނެކަމަށް ކަނޑައަޅައިފައިވާ މުއްދަތުތައް ހަމަވުމުން، އެ އުޅަނދުތައް އަނބުރައި ހަވާލުކުރަންވާނެއެވެ. އަދި މި މާއްދާގެ (ޅ) ގެ (4) ވަނަ ނަންބަރުން ފެށިގެން (10) ވަނަ ނަންބަރުގެ ނިޔަލަށް ބަޔާންކޮށްފައިވާ އުޅަނދުތައް ދޫކުރެވޭނީ، މި ގަވާއިދުގެ 5 ވަނަ މާއްދާގެ (ނ) ގެ (1) ވަނަ ނަންބަރާއި 5 ވަނަ މާއްދާގެ (ބ) ގައި ބަޔާންކޮށްފައިވާ ކަންކަން ފުރިހަމަކޮށް، އެ ނަންބަރުގައި ކަނޑައަޅައިފައިވާ މުއްދަތު ހަމަވުމުންނެވެ.
- ދުވެލީގެ މިންގަނޑާ ހިލާފަށް 2 (ދޭއް) ފަހަރަށްވުރެ ގިނަ ފަހަރު ދުއްވުމުގެ ސަބަބުން ހިފަހައްޓައިފައިވާ އުޅަނދެއް ނަމަ، 15 (ފަނަރަ) ދުވަހުގެ މުއްދަތު ހަމަވުމުން؛
- ނުރައްކާތެރިކޮށް ނުވަތަ ފަރުވާކުޑަކޮށް އެއްގަމު އުޅަނދު ދުއްވުމުގެ ސަބަބުން ހިފަހައްޓައިފައިވާ އުޅަނދެއް ނަމަ، 30 (ތިރީސް) ދުވަހުގެ މުއްދަތު ހަމަވުމުން؛
- ލައިސަންސް އޮވެގެން ދުއްވަންޖެހޭ އެއްގަމު އުޅަނދެއް ލައިސަންސް ނުނަގައި ދުއްވުމުގެ ސަބަބުން ހިފަހައްޓައިފައިވާ އުޅަނދެއް ނަމަ، 15 (ފަނަރަ) ދުވަހުގެ މުއްދަތު ހަމަވުން؛
- ގަވާއިދާ ހިލާފަށް ޕާކުކޮށްފައިވާ އެއްގަމު އުޅަނދު ޕާކުކޮށްފައި ހުރި ތަނަކުން ނަގައިގެން ދިވެހި ފުލުހުންގެ ހިދުމަތުގެ ބެލުމުގެ ދަށަށް ގެންގޮސްފައިވާ އުޅަނދެއް ނަމަ، އެ އުޅަނދެއް ފުލުހުންގެ ބެލުމުގެ ދަށަށް ގެންދާ ވަގުތުން ފެށިގެން، 48 (ސާޅީސް އަށެއް) ގަޑިއިރު ހަމަވުމުން؛
- އުޅަނދުގެ އަސްލު ގެއްލޭގޮތަށް ބަދަލު ގެނެސްގެން ދުއްވާ އުޅަނދެއް، އެ ކަމެއް ރަނގަޅުކުރުމަށް އެ އުޅަނދުގެ ވެރިފަރާތަށް އަންގާ އެންގުމާ އެއްގޮތަށް އަމަލުނުކޮށްގެން ދިވެހި ފުލުހުންގެ ހިދުމަތުގެ ބެލުމުގެ ދަށަށް ގެންގޮސްފައިވާ އުޅަނދެއް ނަމަ، 15 (ފަނަރަ) ދުވަހުގެ ތެރޭގައި އެ އުޅަނދަކަށް ގެނެސްފައިވާ ބަދަލު ރަނގަޅުކުރުމުން؛
- މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން އުޅަނދަކަށް ދީފައިވާ ރަޖިސްޓަރީ ނަންބަރު ފިޔަވައި އެހެން ނަންބަރެއް އުޅަނދުގައި ހަރުކޮށްގެން ދުއްވުމުގެ ސަބަބުން އެ އުޅަނދެއް ހިފަހައްޓައިފި ނަމަ، 15 (ފަނަރަ) ދުވަހުގެ މުއްދަތު ހަމަވުމުން؛
- މިނިސްޓްރީން ނުވަތަ މިނިސްޓްރީން ކަނޑައަޅާ ގޮތެއްގެ މަތީން ރަޖިސްޓަރީނުކުރާ އެއްގަމު އުޅަނދެއްގައި، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) އާއި އެ ގާނޫނުގެ ދަށުން އެކުލަވައިލައިފައިވާ ގަވާއިދާ ހިލާފަށް ރަޖިސްޓަރީ ނަންބަރެއް ހަރުކޮށްގެން ދުއްވައިފައިވާ އުޅަނދެއް ހިފަހައްޓައިފި ނަމަ، އަދި އެކަމުގައި ޖިނާއީ ތަހުގީގެއް ކުރަންޖެހޭ ނަމަ، ޖިނާއީ ތަހުގީގު ނިމެންދެން، ނުވަތަ އެކަމުގައި ޖިނާއީ ތަހުގީގެއް ކުރަން ނުޖެހޭ ނަމަ، 30 (ތިރީސް) ދުވަހުގެ މުއްދަތު ހަމަވުމުން؛
- މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތެއްގެ ހުއްދަ ނެތި އެއްގަމު އުޅަނދެއްގެ އިންޖީނު ނަންބަރާއި ޗެސިސް ނަންބަރަށް ބަދަލުގެނެސްގެން ދުއްވައިފައިވާ އުޅަނދެއް ހިފަހައްޓައިފި ނަމަ، އެކަމުގެ ޖީނާއީ ތަހުގީގު ނިމުމަށްފަހު 7 (ހަތެއް) ދުވަހުގެ މުއްދަތުގެ ތެރޭގައި؛
- ސައިލެންސަރުގެ އަޑުގަދަކޮށްގެން އާންމުންގެ ހިތްތަކުގައި ބިރުވެރިކަން އުފެދޭ ގޮތަށް އުޅަނދަށް ބަދަލު ގެނެސްގެން (މޮޑިފައިކޮށްގެން) އެއްގަމު އުޅަނދު ދުއްވުމުގެ ސަބަބުން ހިފަހައްޓާ އުޅަނދު ދޫކުރެވޭނީ، އުޅަނދަށް ގެނެސްފައިވާ މޮޑިފިކޭށަން ރަނގަޅުކުރުމާއެކު، މޮޑިފައިކޮށްފައިވަނީ ސައިލެންސަރު ނުވަތަ ބަރުގޮނު ފަދަ ބިރުވެރިކަން އުފެދޭ އެއްޗެއް ނަމަ، އެ އެއްޗެއް ފުލުހުންގެ ބެލުމުގެ ދަށުން ނައްތައިލައި، އުޅަނދު ހިފެހެއްޓުނު ތާރީހުން ފެށިގެން 30 (ތިރީސް) ދުވަހުގެ މުއްދަތު ހަމަވުމުން؛
- އެކްސިޑެންޓުގެ މައްސަލަތަކާ ގުޅިގެން ހިފަހައްޓާ އެއްގަމު އުޅަނދު އެ މައްސަލައިގެ ތަހުގީގަށް އެ އުޅަނދެއް ހިފެހެއްޓި ބޭނުން ނިމުމަށްފަހު، 7 (ހަތެއް) ދުވަހުގެ މުއްދަތުގެ ތެރޭގައި،
4 ވަނަ މާއްދާ - ބުނެވިދިޔަ ގަވާއިދުގެ 5 ވަނަ މާއްދާގެ (ޅ) ގެ ފަހަތަށް އަންނަނިވި ގޮތަށް (ކ) ގެ ގޮތުގައި އަކުރެއް އިތުރުކުރުން.
(ކ) މި މާއްދާގެ (ޅ) ގައި ބަޔާންކޮށްފައިވާ ހާލަތްތަކުގައިވާ އުޅަނދުތައް ހިފެހެއްޓުމަށް މި ގަވާއިދުގައި ކަނޑައަޅައިފައިވާ މުއްދަތު ހަމަވުމުން، އެ އުޅަނދެއްގެ ވެރިފަރާތުން އެ އުޅަނދެއް ނުގެންގޮސްފި ނަމަ، ދެން އެ އުޅަނދަކާމެދު އަމަލުކުރާނީ، މި ގަވާއިދުގެ 6 ވަނަ މާއްދާއާއި 7 ވަނަ މާއްދާގައި ބަޔާންކޮށްފައިވާ ގޮތުގެ މަތީންނެވެ.
5 ވަނަ މާއްދާ - ބުނެވިދިޔަ ގަވާއިދުގެ 8 ވަނަ މާއްދާގެ (ށ) އާއި (ނ) އަންނަނިވި ގޮތަށް އިސްލާހުކުރުން.
(ށ) މި ގަވާއިދުގެ 6 ވަނަ މާއްދާގެ (ށ) ގައިވާ މުއްދަތުގައި ހަވާލުވެފައިނުވާ އުޅަނދުތަކުގެ ރަޖިސްޓްރޭށަން ބާތިލުކުރުމަށް، ދިވެހި ފުލުހުންގެ ހިދުމަތުން، މިނިސްޓްރީއަށް ހުށަހަޅަންވާނެއެވެ.
(ނ) މި މާއްދާގެ (ށ) ގެ ދަށުން އުޅަނދުތަކުގެ ރަޖިސްޓްރޭށަން ބާތިލުކުރުމަށް ހުށަހަޅާތާ 7 (ހަތެއް) ދުވަހުގެ ތެރޭގައި ރަޖިސްޓްރޭށަން ބާތިލުކުރުމަށްފަހު، މިނިސްޓްރީން، ދިވެހި ފުލުހުންގެ ހިދުމަތަށް އެކަން އަންގަންވާނެއެވެ.
6 ވަނަ މާއްދާ - މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ދުވަހުން ފެށިގެންނެވެ.
މައި ގަވާއިދު
ކޮންސޮލިޑޭޓެޑް ގަވާއިދު
އެއްގަމު ދަތުރުފަތުރުގެ ގާނޫނު (ގާނޫނު ނަންބަރު 2009-05) ގެ ދަށުން ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާބެހޭ ގަވާއިދު (ގަވާއިދު ނަންބަރު 2021-145) (ކޮންސޮލިޑޭޓެޑް ނަންބަރު 2021-145)
ކިޔުންތެރިންގެ ހިޔާލު