ކަރެކްށަނަލް ސަރވިސްގެ ވަޒީފާއާބެހޭ ގަވާއިދު (ގަވާއިދު ނަންބަރު 2015-218)

އަށް 4 ވަނަ އިސްލާހު ގެނައުމުގެ ގަވާއިދު

(ގަވާއިދު ނަންބަރު 2019-1026)

(މި ގަވާއިދަށް އަމަލުކުރަން ފެށީ 21 އެޕްރީލް 2019 ގައި)

 

ގަވާއިދު ނަންބަރު 2015-218 (މޯލްޑިވްސް ކަރެކްށަނަލް ސަރވިސްގެ ވަޒީފާއާ ބެހޭ ގަވާއިދު) އަށް އަންނަނިވި އިސްލާހުތައް 
ގެނައުން.

 

1 ވަނަ މާއްދާ - ބުނެވިދިޔަ ގަވާއިދުގެ 89 ވަނަ މާއްދާގެ ފަހަތަށް، އަންނަނިވި ގޮތަށް މާއްދާއެއް އިތުރުކުރުން.

ވަޒީފާއިން ވަކިކުރުމާ ވިދިގެން ށަކުވާ އުފުލުން 90.

(ހ) މި ގަވާއިދުގެ 45 ވަނަ މާއްދާގައި ބަޔާންކޮށްފައިވާ ހާލަތެއް މެދު ވެރިވެގެން، ވަޒީފާއިން އެ ޖަލު އޮފިސަރަކު ނުވަތަ މުވައްޒަފަކު ވަކިކުރ،ީ އެކަށީގެންވާ ސަބަބެއް ނެތިކަމުގައި ވަޒީފާ އަދާކުރި ޖަލު އޮފިސަރަކަށް ނުވަތަ މުވައްޒަފަކަށް ގަބޫލުކުރެވޭ ނަމަ، ވަޒީފާއިން ވަކިކުރި ތާރީހުން ފެށިގެން، ބަންދު ދުވަސްތައް ހިމަނައިގެން 90 (ނުވަދިހަ) ދުވަހުގެ ތެރޭގައި އެ ކަމުގެ ށަކުވާ، ދިވެހިރާއްޖޭގެ ށަރުއީ ކޯޓަކަށް ހުށަހެޅުމުގެ ހައްގު، އެ ޖަލު އޮފިސަރަކަށް ނުވަތަ މުވައްޒަފަކަށް ލިބިގެންވެއެވެ.

(ށ) ވަޒީފާގެ ވަގުތީ މުއްދަތުގައި ޖަލު އޮފިސަރަކު ނުވަތަ މުވައްޒަފަކު ވަޒީފާއިން ވަކިކުރުމުން، އެ ކަމުގެ ށަކުވާ މި މާއްދާގެ (ހ) ގައިވާ ގޮތުގެ މަތިން ކުރުމުގެ ހައްގެއް، އެ ޖަލު އޮފިސަރަކަށް ނުވަތަ މުވައްޒަފަކަށް ލިބިގެނެއް ނުވެއެވެ. 

 

2 ވަނަ މާއްދާ - ބުނެވިދިޔަ ގަވާއިދުގެ 92 ވަނަ މާއްދާގެ (ހ) އާއި (ށ) އާއި (ރ) އަންނަނިވި ގޮތަށް އިސްލާހުކުރުން.

ބަލިވެ އިނުމާއި ވިހެއުމާ ގުޅިގެން ދޭ ޗުއްޓީ 92.

(ހ) ޖަލު އޮފިސަރަކު ނުވަތަ މުވައްޒަފަކު ވިހެއުމާ ގުޅިގެން، ވިހާ ދުވަހުން ފެށިގެން 6 (ހައެއް) މަސްދުވަހުގެ ޗުއްޓީއެއް، ބަންދު ދުވަސްތައް ހިމަނައިގެން، މުސާރަޔާއެކު ދޭން ވާނެއެވެ.

(ށ) ރަޖިސްޓަރީކޮށްފައިވާ ސިއްހީ މަސައްކަތްތެރިއަކު، ޖަލު އޮފިސަރަކު ނުވަތަ މުވައްޒަފަކު، ވިހާނެކަމަށް ލަފާކުރާ ދުވަސް ބަޔާންކޮށް ދޫކުރާ މެޑިކަލް ސެޓުފިކެޓެއް ހުށަހެޅުމުން، އެ ސެޓުފިކެޓުގައިވާ ތާރީހުން ފެށިގެން، ވިހެއުމާ ގުޅިގެން ދޭ 6 (ހައެއް) މަސްދުވަހުގެ ޗުއްޓީ، އެ ޖަލު އޮފިސަރަކަށް ނުވަތަ މުވައްޒަފަކަށް ދޭން ވާނެއެވެ.

(ރ) ޖަލު އޮފިސަރަކު ނުވަތަ މުވައްޒަފަކު ބަލިވެއިނުމުގެ ސަބަބުން، ވަޒީފާއަށް ނުކުތުމަށް އެ މީހެއްގެ ސިއްހީ ހާލަތު ތަން ނުދޭ ކަމަށް، ރަޖިސްޓަރީކޮށްފައިވާ ސިއްހީ މަސައްކަތްތެރިއަކު ދޫކުރާ މެޑިކަލް ސެޓުފިކެޓެއް ހުށަހެޅުމުން، ވިހެއުމުގެ ކުރިން ބަންދު ދުވަސް ހިމަނައިގެން، 28 (އަށާވީސް) ދުވަހުގެ ޗުއްޓީއެއް، މުސާރަ ނުލިބޭ ގޮތަށް އެ ޖަލު އޮފިސަރަކަށް ނުވަތަ މުވައްޒަފަކަށް ދޭން ވާނެއެވެ. އަދި މި 28 (އަށާވީސް)ދުވަހުގެ ޗުއްޓީގައި ހުއްޓައި ޖަލު އޮފިސަރަކު ނުވަތަ މުވައްޒަފަކު ވިހައިފިނަމަ، ޗުއްޓީ ނިމުމަކަށް އަންނާނެއެވެ.

 

3 ވަނަ މާއްދާ - ބުނެވިދިޔަ ގަވާއިދުގެ 92 ވަނަ މާއްދާގެ (ބ) ގެ ފަހަތަށް އަންނަނިވި ފަދައިން އަކުރުތައް އިތުރުކުރުން.

(ޅ) ޖަލު އޮފިސަރަކު ނުވަތަ މުވައްޒަފަކު ވިހެއުމަށް ފަހު ދެވޭ ޗުއްޓީގެ ދުވަސްވަރުގައި ދަރިފުޅު ނިޔާވެއްޖެ ނަމަ، ނިޔާވި ދުވަހުން ފެށިގެން ބަންދު ދުވަސްތައް ނުހިމަނައި 60 (ފަސްދޮޅަސް) ދުވަހުގެ ޗުއްޓީއެއް މުސާރަޔާއެކު، އެ ޖަލު އޮފިސަރަކަށް ނުވަތަ މުވައްޒަފަކަށް ދޭން ވާނެއެވެ.

(ކ) ޖަލު އޮފިސަރަކު ނުވަތަ މުވައްޒަފަކު ވިހެއުމަށް ފަހު ދޭ ޗުއްޓީގެ ދުވަސްވަރުގައި ދަރިފުޅު ނިޔާވެއްޖެ ނަމަ، ނިޔާވި ދުވަހުން ފެށިގެން ޗުއްޓީގެ ބާކީ 60 (ފަސްދޮޅަސް) ދުވަހަށް ވުރެ އިތުރުވާ ނަމަ، ޖަލު އޮފިސަރު ނުވަތަ މުވައްޒަފު ވިހެއުމާ ގުޅިގެން ދީފައިވާ ޗުއްޓީ ނިމޭ ތާރީހު ކަމަށް ކަނޑައެޅިގެން ދާނީ، ދަރިފުޅު ނިޔާވި ތާރީހުން ފެށިގެން 60 (ފަސްދޮޅަސް) ދުވަސް ހަމަވާ ތާރީހެއެވެ. އަދި ދަރިފުޅު ނިޔާވި ތާރީހުން ފެށިގެން ޗުއްޓީގެ ބާކީ ހުރި ދުވަސްތަކުގެ އަދަދު 60 (ފަސްދޮޅަސް) ދުވަހަށް ވުރެ ކުރުވާ ނަމަ، ޗުއްޓީގެ ބާކީ ހުރި ދުވަސްތައް، އެއްވެސް އުނި އިތުރެއް ނެތި ލިބިގެން ދާނެއެވެ.

(އ) ޖަލު އޮފިސަރަކު ނުވަތަ މުވައްޒަފަކު މާބަނޑު ދުވަސްވަރު ވިހެއުމުގެ ކުރިން ދަރިފުޅު ބައިގެންދާ ހާލަތެއް މެދުވެރިވެއްޖެ ނަމަ، އެކަން ބަޔާންކޮށް، ރަޖިސްޓަރީކޮށްފައިވާ ސިއްހީ މަސައްކަތްތެރިއަކު ދޫ ކުރާ މެޑިކަލް ސެޓުފިކެޓެއް ހުށަހެޅުމުން، ބަންދު ދުވަސްތައް ހިމަނައިގެން 20 (ވިހި) ދުވަހުގެ ޗުއްޓީއެއް މުސާރަޔާއެކު، އެ ޖަލު އޮފިސަރަކަށް ނުވަތަ މުވައްޒަފަކަށް ދޭން ވާނެއެވެ.

 

4 ވަނަ މާއްދާ - ބުނެވިދިޔަ ގަވާއިދުގެ 93 ވަނަ މާއްދާގެ (ހ) އަންނަނިވި ގޮތަށް އިސް ލާހުކުރުން.

ދަރިއަކު ލިބުމުން ދޭ ޗުއްޓީ 93. 

ފިރިހެން ޖަލު އޮފިސަރަކަށް ނުވަތަ މުވައްޒަފަކަށް، ދަރިއަކު ލިބޭ ދުވަހުން ފެށިގެން މުސާރަ ލިބޭ ގޮތަށް ރަސްމީ ބަންދު ދުވަސްތައް ހިމަނައިގެން 7 (ހަތެއް) ދުވަހުގެ މުސާރަ ލިބޭ ޗުއްޓީއެއް ދޭންވާނެއެވެ. އަދި މި 7 (ހަތެއް) ދުވަހުގެ ޗުއްޓީ ހަމަވުމަށް ފަހު ދަރިފުޅަށް 7 (ހަތެއް) މަސްދުވަސް ވުމާ ދެމެދ،ު 23 (ތޭވީސް) ދުވަހުގެ، މުސާރަ ލިބޭ ޗުއްޓީއެއް، ބަންދު ދުވަސްތައް ހިމަނައިގެން ދޭން ވާނެއެވެ. މި 23 (ތޭވީސް) ދުވަސް ޗުއްޓީގެ ގޮތުގައި ދޭން ވާނީ އެކީ އެއްފަހަރާއެވެ. 

 

5 ވަނަ މާއްދާ - ބުނެވިދިޔަ ގަވާއިދުގެ 93 ވަނަ މާއްދާގެ (ހ) ގެ ފަހަތަށް އަން ނަނިވި ގޮތަށް އަކުރެއް އިތުރު ކުރުން.

ދަރިއަކު ލިބުމުން ދޭ ޗުއްޓީ 93.

(ށ) ފިރިހެން ޖަލު އޮފިސަރުގެ ނުވަތަ މުވައްޒަފުގެ ދަރިފުޅު 7 (ހަތެއް) މަސްދުވަހުގެ ކުރިން ނިޔާވެއްޖެ ނަމަ، އަދި ނިޔާވި އިރު 23 (ތޭވީސް) ދުވަހުގެ ޗުއްޓީ ނުނަގާ އޮތް ނަމަ ނިޔާވި ދުވަހުން ފެށިގެން ދަރިއަކު ލިބުމާ ގުޅިގެން ދީފައިވާ 23 (ތޭވީސް) ދުވަހުގެ ޗުއްޓީ، ފިރިހެން ޖަލު އޮފިސަރަށް ނުވަތަ މުވައްޒަފަށް ދޭންވާނެއެވެ. އަދި ޗުއްޓީ ނިމޭ ތާރީހު ކަމަށް ކަނޑައެޅިގެން ދާނީ، ދަރިފުޅު ނިޔާވި ތާރީހުން ފެށިގެން 23 (ތޭވީސް) ދުވަސް ހަމަވާ ތާރީހެވެ.

 

6 ވަނަ މާއްދާ - ބުނެވިދިޔަ ގަވާއިދަށް އިތުރުކުރާ މާއްދާތަކާ އަކުރުތަކާ ގުޅިގެން ނުވަތަ އުނިކުރާ މާއްދާތަކާއި އަކުރުތަކާ ގުޅިގެން މި ގަވާއިދުގެ މާއްދާތަކުގެ ނަންބަރާއި އަކުރުތައް ތަރުތީބުކުރުން.

 

7 ވަނަ މާއްދާ - ބުނެވިދިޔަ ގަވާއިދުގެ ވަކި މާއްދާއަކަށް ނުވަތަ ވަކި މާއްދާއެއްގެ ބަޔަކަށް ހަވާލާދީފައިވާ ތަންތަން، މި ގަވާއިދުން ގެންނަ އިސްލާހުތަކާ ގުޅިގެން ބަދަލުކުރުން.

 

8 ވަނަ މާއްދާ - މި ގަވާއިދަށް އަމަލުކުރަން ފަށާނީ، ދިވެހިސަރުކާރުގެ ގެޒެޓުގައި މި ގަވާއިދު ށާއިއުކުރާ ދުވަހުން ފެށިގެންނެވެ.

 

މައި ގަވާއިދު

ކަރެކްށަނަލް ސަރވިސްގެ ވަޒީފާއިބެހޭ ގަވާއިދު (ގަވާއިދު ނަންބަރު 2015-218)