އިންސްޕެކްޓަރ އޮފް ކަރެކްށަނަލް ސަރވިސްގެ ށަރުތު ބަޔާންކުރާ ގަވާއިދު
(ގަވާއިދު ނަންބަރު 2019-1031)
(މި ގަވާއިދަށް އަމަލުކުރަން ފެށީ 12 މޭ 2019 ގައި)
(މި ގަވާއިދުގެ 10 ވަނަ މާއްދާއިން ވަނީ ގަވާއިދު ނަންބަރު 2014-165 އުވާލެވިފައި)
1 ވަނަ މާއްދާ - ތައާރަފު
މި ގަވާއިދަކީ، ގާނޫނު ނަންބަރު 2013-14 (ދިވެހިރާއްޖޭގެ ޖަލުތަކާއި ޕެރޯލްގެ ގާނޫނު) ގެ 9 ވަނަ މާއްދާގެ (ހ) ގެ ދަށުން މިނިސްޓަރު އައްޔަނުކުރާ އިންސްޕެކްޓަރ އޮފް ކަރެކްށަނަލް ސަރވިސްގައި ހުންނަންޖެހޭ ށަރުތުތަކާއި އެ ފަރާތުގެ މަސްއޫލިއްޔަތުތައް ބަޔާންކުރާ ގަވާއިދެވެ.
2 ވަނަ މާއްދާ - ނަން
މި ގަވާއިދަށް ކިޔާނީ، "އިންސްޕެކްޓަރ އޮފް ކަރެކްށަނަލް ސަރވިސްގެ ށަރުތުތައް ބަޔާންކުރާ ގަވާއިދު" އެވެ.
3 ވަނަ މާއްދާ - މަގުސަދު
މި ގަވާއިދުގެ މަގުސަދުތައް ތިރީގައި މިވަނީއެވެ.
(ހ) އިންސްޕެކްޓަރ އޮފް ކަރެކްށަނަލް ސަރވިސްގައި ހުންނަންޖެހޭ ށަރުތުތައް ބަޔާންކުރުން؛
(ށ) އިންސްޕެކްޓަރ އޮފް ކަރެކްށަނަލް ސަރވިސްގެ މަސް އޫލިއްޔަތުތައް ބަޔާންކުރުން.
4 ވަނަ މާއްދާ - އިންސްޕެކްޓަރ އޮފް ކަރެކްށަނަލް ސަރވިސް އައްޔަނުކުރުން
(ހ) ގާނޫނުގެ ދަށުން ޖަލުގެ ގޮތުގައި ކަނޑައަޅައިފައިވާ ތަންތަން ބަލައި ފާސްކޮށް، އެ ތަންތަނުގައި ކަންކަން ހިންގަނީ ގާނޫނާއި ގަވާއިދުގައިވާ ގޮތުގެ މަތިންތޯ ބަލައި މިނިސްޓަރަށް ރިޕޯޓުކުރުމަށާއި، ދައުލަތުގެ މުއައްސަސާއެއްގެ ނުވަތަ އިދާރާއެއްގެ ބެލުމުގެ ދަށުގައި ތިބޭ މީހުން ތިބޭ ތަންތަނާއި އެ މީހުންނާމެދު އަމަލުކުރެވޭ ގޮތް ބަލައި، ކަމާބެހޭ މުއައްސަސާތަކަށް ރިޕޯޓް ހުށަހެޅުމުގެ މަސްއޫލިއްޔަތު އަދާކުރުމަށްޓަކައި، ގާނޫނުގެ 9 ވަނަ މާއްދާގެ (ހ) ގެ ދަށުން މިނިސްޓަރު އައްޔަނުކުރާ ފަރާތަކީ އިންސްޕެކްޓަރ އޮފް ކަރެކްށަނަލް ސަރވިސްއެވެ.
(ށ) އިންސްޕެކްޓަރ އޮފް ކަރެކްށަނަލް ސަރވިސް އައްޔަނުކުރަންވާނީ މި ގަވާއިދުގެ 5 ވަނަ މާއްދާގައި ބަޔާންކުރާ ށަރުތުތައް ފުރިހަމަވާ ފަރާތްތަކުގެ ތެރެއިންނެވެ.
(ނ) އިންސްޕެކްޓަރ އޮފް ކަރެކްށަނަލް ސަރވިސްގެ ޒިންމާ އަދާކުރުމަށް ބޭނުންވާނެ އަންނަނިވި މުވައްޒަފުން މިނިސްޓަރު ހަމަޖައްސަވައިދޭންވާނެއެވެ.
- އިންސްޕެކްށަންގެ މަސައްކަތްކުރާ މުވައްޒަފުން؛
- ގާނޫނީ މަސައްކަތްކުރާ މުވައްޒަފުން؛ އަދި
- އިދާރީ މަސައްކަތްކުރާ މުވައްޒަފުން.
5 ވަނަ މާއްދާ - އިންސްޕެކްޓަރ އޮފް ކަރެކްށަނަލް ސަރވިސްގެ ށަރުތުތައް
(ހ) އިންސްޕެކްޓަރ އޮފް ކަރެކްށަނަލް ސަރވިސްކަމަށް އައްޔަނު ކުރަންވާނީ އަންނަނިވި ށަރުތުތައް ފުރިހަމަވާ ފަރާތެކެވެ.
- ދިވެހި ރައްޔިތެއް ކަމުގައި ވުން؛
- އުމުރުން 30 (ތިރީސް) އަހަރު ފުރިފައިވުން؛
- މަގާމާ ގުޅުންހުރި ދާއިރާއެއްގައި ޑިރެކްޓަރ ނުވަތަ އެ މަގާމާ އެއްފެންވަރެއްގެ މަގާމެއްގައި މަދުވެގެން 1 (އެކެއް) އަހަރުދުވަހު މަސައްކަތްކޮށްފައި ވުން؛ ނުވަތަ އިންސާނީ ހައްގުތަކުގެ ދާއިރާގައި ސުޕަވައިޒަރީ ފެންވަރެއްގެ މަގާމެއްގައި މަދުވެގެން 3 (ތިނެއް) އަހަރުދުވަހު މަސައްކަތް ކޮށްފައިވުން؛
- ޖިނާއީ ކުށެއް ސާބިތުވެފައިވާ މީހަކު ނަމަ، އެ ކުށެއް ސާބިތުވ،ެއެ ކުށެއްގެ ހުކުމް ތަންފީޒުކޮށް ނިމުނުތާ 5 (ފަހެއް) އަހަރުދުވަސް ވެފައިވުން؛
- ބައިނަލްއަގުވާމީ ފޯރަމުތަކުގައި ދިވެހިރާއްޖެ ތަމްސީލު ކުރެވޭނެ ގާބިލުކަން ހުރި ފަރާތެއް ކަމުގައި ވުން؛
- ދިވެހިބަހުންނާއި އިނގިރޭސިބަހުން ފުރިހަމައަށް ލިޔެ ވާހަކަ ދެއްކުމުގެ ގާބިލުކަން ހުރި ފަރާތެއް ކަމުގައިވުން.
(ށ) އިންސްޕެކްޓަރގެ މަގާމަށް މީހަކު އައްޔަނުކުރުމުގައި މި މާއްދާގެ (ހ) ގައި ބަޔާންކޮށްފައިވާ ށަރުތުތައް ފުރިހަމަވާ މީހުންގެ ތެރެއިން ކްރިމިނޮލޮޖީ ނުވަތަ ސައިކޮލޮޖީގެ ދާއިރާއިން ދަށްވެގެން މާސްޓަރސް ޑިގްރީ ހާސިލުކޮށްފައިވާ ފަރާތްތަކަށް އިސްކަންދެވޭނެއެވެ.
6 ވަނަ މާއްދާ - އިންސްޕެކްޓަރ އޮފް ކަރެކްށަނަލް ސަރވިސްގެ މަސްއޫލިއްޔަތުތައް
އިންސްޕެކްޓަރ އޮފް ކަރެކްށަނަލް ސަރވިސްގެ މަސްއޫލިއްޔަތުތައް ތިރީގައި ބަޔާންކޮށްފައި މިވަނީއެވެ.
(ހ) ޖަލުތައް އިމާރާތްކޮށްފައި ހުންނަނީ ގަވާއިދުގައި ބަޔާންކޮށްފައިވާ ގޮތަށްތޯ ބެލުން؛
(ށ) ގައިދީންނާއި ބަންދު މީހުންނަށް އެންމެ މަދުވެގެން ލިބިދޭންޖެހޭ އަސާސީ ހިދުމަތްތައް ގަވާއިދާ އެއްގޮތަށް ލިބިދޭތޯ ބެލުން؛
(ނ) ޖަލުތަކުގައި ގައިދީންނާއި ބަންދު މީހުންނާމެދު އަމަލުކުރަނީ އެ މީހުންނާމެދު އަމަލުކުރަންވާނެ ކަމަށް ގަވާއިދުގައި ބަޔާންކޮށްފައިވާ އުސޫލުތަކާ އެއްގޮތަށްތޯބެލުން؛
(ރ) ޖަލުގައި މީހުންނަށް ދޭ ކާނާއާއި ސިއްހީ ފަރުވާގެ މިންގަނޑުތައް ހުންނަނީ ގަވާއިދާ އެއްގޮތަށްތޯ ބެލުން؛
(ބ) ކަނޑައަޅައިފައިވާ ތާވަލާ އެއްގޮތަށް ޖަލުތަކަށް ޒިޔާރަތްކޮށް، ޖަލުތައް ބަލައި ފާސްކުރުން؛
(ޅ) ޖަލެއްގައި މީހުންނަށް އަނިޔާކުރާ ކަމަށް ކުރާ ށަކުވާތައް މިނިވަންކަމާއެކު އަޑުއަހައި، ތަހުގީގުކޮށް މިނިސްޓަރަށް ރިޕޯޓު ހުށަހެޅުން؛
(ކ) ޖަލެއްގައި މީހަކު މަރުވެއްޖެ ނަމަ، ނުވަތަ މީހަކަށް ނުރައްކައުތެރި އަނިޔާއެއް ދީފި ނަމަ، އެކަން ބަލައި ތަހުގީގުކޮށް މިނިސްޓަރަށް ރިޕޯޓު ހުށަހެޅުން.
(އ) ދައުލަތުގެ މުއައްސަސާއެއް ނުވަތަ އިދާރާއެއްގެ ބެލުމުގެ ދަށުގައި ތިބޭ މީހުން ތިބޭ ތަންތަނާއި، އެ މީހުންނާމެދު އަމަލުކުރާ ގޮތް ބަލައި ރިޕޯޓުކުރުން. ގާނޫނުގެ އެހެން މާއްދާއެއްގައި އެހެން ގޮތަކަށް ބަޔާންކޮށްފައި އޮތް ނަމަވެސް، މި އަކުރުގެ ދަށުން ބަޔާންކޮށްފައިވާ މަސްއޫލިއްޔަތާ ގުޅިގެން ރިޕޯޓު ހުށަހަޅާނީ، ކަމާބެހޭ މުއައްސަސާއަށެވެ.
7 ވަނަ މާއްދާ - އިންސްޕެކްޓަރ އޮފް ކަރެކްށަނަލް ސަރވިސްގެ އިނާޔަތްތައް
އެސިސްޓަންޓް ކޮމިށަނަރ އޮފް ޕްރިޒަންސްއާއި މޯލްޑިވްސް ކަރެކްށަނަލް ސަރވިސަސްގެ އެއަށްވުރެ މަތީ މަގާމުތަކުގައި ތިބޭ ފަރާތްތަކަށް ލިބޭ އިނާޔަތްތައް އިންސްޕެކްޓަރ އޮފް ކަރެކްށަނަލް ސަރވިސްއަށް ވެސް ހަމަޖައްސައިދޭންވާނެއެވެ.
8 ވަނަ މާއްދާ - މާނަ ކުރުން
މި ގަވާއިދުގައި އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި ލަފުޒުތަކާއި އިބާރާތްތަކަށް ދީފައި އެވަނީ، އެ ލަފުޒުތަކާއި އިބާރާތްތަކަށް ތިރީގައި ދީފައިވާ މާނައެވެ.
(ހ) "މިނިސްޓަރު" ކަމަށް ބުނެފައި އެވަނީ، ރާއްޖޭގެ ޖަލުތައް ބެލެހެއްޓު މާއި ޕެރޯލްގެ ކަންކަން ބެލެހެއްޓުމުގެ ޒިންމާ ހަވާލުވެފައިވާ ސަރުކާރުގެ ވުޒާރާ ހިންގުމާ ހަވާލުވެހުރި މިނިސްޓަރަށެވެ.
(ށ) "ޖަލު" ކަމަށް ބުނެފައި އެވަނީ، ގާނޫނުގެ 4 ވަނަ މާއްދާގެ ދަށުން ކަނޑައަޅާ ކަސްޓޯޑިއަލް ޖަލުތަކާއި ރިމާންޑް ޖަލުތަކާއި އާންމު ޖަލުތަކަށެވެ.
(ނ) "މަގާމާ ގުޅުންހުރި ދާއިރާ" ކަމަށް ބުނެފައި އެވަނީ، ޖަލުތަކާއި، މީހުން ބަންދުކުރެވޭ ތަންތަނާއި، ދައުލަތުގެ މުއައްސަސާއެއްގެ ނުވަތަ އިދާރާއެއްގެ ބެލުމުގެ ދަށުގައި ތިބޭ މީހުން ތިބޭ ތަންތަނަށް ޒިޔާރަތްކޮށް އިންސްޕެކްޓް ކުރުމުގެ މަސައްކަތަށެވެ.
(ރ) "ގާނޫނު" ކަމަށް ބުނެފައި އެވަނީ، ގާނޫނު ނަންބަރު 2013-14 (ދިވެހިރާއްޖޭގެ ޖަލުތަކާއި ޕެރޯލްގެ ގާނޫނު) އަށެވެ.
9 ވަނަ މާއްދާ - ގަވާއިދަށް އަމަލުކުރަން ފެށުން
މި ގަވާއިދަށް އަމަލު ކުރަންފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ދުވަހުން ފެށިގެންނެވެ.
10 ވަނަ މާއްދާ - އުވާލެވޭ ގަވާއިދު
މި ގަވާއިދަށް އަމަލުކުރަން ފަށާ ތާރީހުން ފެށިގެން ގަވާއިދު ނަންބަރު 2014-165 (އިންސްޕެކްޓަރ އޮފް ކަރެކްށަނަލް ސަރވިސްގެ ށަރުތުތައް ބަޔާންކުރާ ގަވާއިދު) އާއި، ގަވާއިދު ނަންބަރު 2019-1024 ( ގަވާއިދު ނަންބަރު: 2014-165 (އިންސްޕެކްޓަރ އޮފް ކަރެކްށަނަލް ސަރވިސްގެ ށަރުތުތައް ބަޔާންކުރާ ގަވާއިދު) އަށް 1 ވަނަ އިސްލާހު ގެނައުމުގެ ގަވާއިދު) ބާތިލުވީއެވެ.
އުވުނު ގަވާއިދު
ކިޔުންތެރިންގެ ހިޔާލު