ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނު (ގާނޫނު ނަންބަރު 2015-02) އަށް 1 ވަނަ އިސްލާހު ގެނައުމުގެ ގާނޫނު

(މި ގާނޫނަށް އަމަލުުރަން ފެށީ 17 ޑިސެމްބަރު 224 ގައި)

 

ގާނޫނު ނަންބަރު 2015-02 (ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނު) އަށް އަންނަނިވި އިސްލާހުތައް ގެނައުން. 

 

1 ވަނަ މާއްދާ -  ބުނެވިދިޔަ ގާނޫނުގެ 3 ވަނަ މާއްދާގެ (ހ) ގެ (9) ވަނަ ނަންބަރުގެ ފަހަތަށް އަންނަނިވި ފަދައިން ނަންބަރެއް އިތުރުކުރުން.

(10) މި ގާނޫނުގެ 4 ވަނަ ބާބުގައި ބަޔާންކޮށްފައިވާ ފިޔަވަޅުތައް އެޅުމުގައި.

 

2 ވަނަ މާއްދާ - ބުނެވިދިޔަ ގާނޫނުގެ 3 ވަނަ ބާބުގެ ސުރުހީގެ ފަހަތަށް އަންނަނިވި ސުރުހީ އިތުރުކުރުން.

އެއްވަނަ ބައި

އާންމު އުސޫލު

 

3 ވަނަ މާއްދާ - ބުނެވިދިޔަ ގާނޫނުގެ 14 ވަނަ މާއްދާގެ ފަހަތަށް އަންނަނިވި ފަދައިން 8 މާއްދާގެ މައްޗަށް އެކުލެވޭ ބައެއް އިތުރުކުރުން.

 

ދެވަނަ ބައި

އިލެކްޓްރޯނިކް ހެއްކާބެހޭ 

 

ވަނަ މާއްދާ - އާންމު އުސޫލު 1-14. 

(ހ) ކޮމްޕިއުޓަރ ސިސްޓަމެއް މެދުވެރިކޮށް ކުރާ ކުށަކާ ގުޅިގެން ނުވަތަ ކޮމްޕިއުޓަރ ޑޭޓާއާގުޅޭ ކުށަކާ ގުޅިގެން ނުވަތަ އިލެކްޓްރޯނިކް ހެކި  ހޯދަންޖެހޭފަދަ އެނޫންވެސް ކުށަކާ ގުޅިގެން ދިވެހިރާއްޖޭގައި ހިންގާ ޖިނާއީ ށަރީއަތްތަކުގެ ބޭނުމަށް ނުވަތަ އެފަދަ ކުށްތަކާގުޅޭ ތަހްގީގުގެ ބޭނުމަށް، ބޭރު ގައުމެއް ނުވަތަ އޭޖެންސީއަކާއެކު ނުވަތަ 24/7 ނެޓްވަރކްއަކާއެކު ނުވަތަ ބައިނަލްއަޤްވާމީ އޭޖެންސީއަކާއެކު، މި ބާބުގައި ބަޔާންކޮށްފައިވާ އުސޫލުތަކާ އެއްގޮތްވާ ގޮތުގެމަތިން ދިވެހިރާއްޖޭގެ ކަމާބެހޭ ފަރާތްތަކަށް މަސައްކަތްކުރެވިދާނެއެވެ. 

(ށ) ދިވެހިރާއްޖޭގައި ހިންގާފައިވާ ޖިނާއީ ކުށެއްގެ ތަހްގީގަކަށް ލިބިފައި ހުރި މައުލޫމާތަކީ، ބޭރު ޤައުމަކުން ނުވަތަ އޭޖެންސީއަކުން އެއްވެސް ކުށެއްގެ ތަހްގީގެއް ނުވަތަ ށަރިއަަތެއް ފެށުމަށް ނުވަތަ އެފަދަ ތަހްގީގެއް ނުވަތަ ށަރީއަތެއް ކުރިއަށްގެންދިޔުމަށް އެހީތެރިވެދާނެފަދަ މައުލޫމާތުކަމަށް ޕްރޮސިކިއުޓަރ ޖެނެރަލަށް ފެނިއްޖެނަމަ، އެއްވެސް ފަރާތަކުން އެކަމަށް އެދި ހުށަހެޅުމަކާ ނުލައި، އެ މަޢުލޫމާތެއް ބޭރު ގައުމަކާ ނުވަތަ ބޭރުގެ އޭޖެންސީއަކާ ނުވަތަ 24/7 ނެޓްވަރކްއަކާ ނުވަތަ ބައިނަލްއަގްވާމީ އޭޖެންސީއަކާ ހިއްސާކުރެވިދާނެއެވެ.

(ނ) ޖިނާއީ ތަހްގީގު ހިންގުމުގެ ބާރު ލިބިފައިވާ އިދާރާއަކަށް، ބޭރު ގައުމެއްގެ ހުއްދަ ހޯދުމަކާ ނުލައި، އަންނަނިވި ކަންކަން ކުރެވިދާނެއެވެ.

1. ދިވެހިރާއްޖެއިން ބޭރުގައި ހުރި ކޮމްޕިއުޓަރ ސިސްޓަމެއްގައި ރައްކާކޮށްފައި ހުރި ކޮމްޕިއުޓަރ ޑޭޓާ ހާމަކުރުމުގެ ގާނޫނީ ބާރު ލިބިފައިވާ ފަރާތުގެ ރުހުން، ގާނޫނާ އެއްގޮތްވާ ގޮތުގެމަތިން ހޯދުމަށްފަހު، ދިވެހިރާއްޖޭގައި ހުރި ކޮމްޕިއުޓަރ ސިސްޓަމެއް ބޭނުންކޮށްގެން އެ ޑޭޓާ ލިބިގަތުން ނުވަތަ އެ ޑޭޓާއަށް އެކްސެސްވުން؛
2. އަންނަނިވި ހާލަތްތަކުގައި، ދިވެހިރާއްޖޭގައި ހުރި ކޮމްޕިއުޓަރ ސިސްޓަމެއް ބޭނުންކޮށްގެން ދިވެހިރާއްޖެއިން ބޭރުގައި ހުރި ކޮމްޕިއުޓަރ ސިސްޓަމެއްގައި ރައްކާކޮށްފައި ހުރި ކޮމްޕިއުޓަރ ޑޭޓާ ލިބިގަތުން ނުވަތަ އެ ޑޭޓާއަށް އެކްސެސްވުން؛
   1. އަމިއްލަ ފަރުދުންގެ ފުރާނައަށް ނުވަތަ ސަލާމަތަށް ގާތް މުސްތަގުބަލެއްގައި ބޮޑު ނުރައްކަލެއް ކުރިމަތިވުމުގެ ފުރުސަތު އޮތުން؛ ނުވަތަ
   2. ދިވެހިރާއްޖޭގައި ގެއްލުން ލިބުނު މީހުންގެ އަދަދަށް ބަލާއިރު ނުވަތަ ގެއްލުމުގެ މިންވަރަށް ބަލާއިރު އިގްތިސާދީ ގޮތުން ބޮޑު ގެއްލުމެއް މެދުވެރިވުން.

(ރ) މި މާއްދާގެ (ނ) ގައި ބަޔާންކުރާ އިހްތިޔާރު ޖިނާއީ ތަހްގީގު ހިންގުމުގެ ބާރު ލިބިފައިވާ އިދާރާއަކުން ބޭނުންކުރަންވާނީ، އެކަންކަން ކުރުމަށްޓަކައި މި ގާނޫނުގައި ކަނޑައަޅާފައިވާ ގާނޫނީ އެހީތެރިކަން ފޯރުކޮށްދިނުމުގެ އާންމު އިޖުރާއަތުތައް ބޭނުންކޮށްފިނަމަ، ދިވެހިރާއްޖޭގައި ކުށެއްގެ ތަހްގީގު ހިންގުމަށް ނުވަތަ ދައުވާ އުފުލުމަށް ހުރަސްއެޅިގެންދާ ހާލަތެއްގައި އެކަންޏެވެ.

(ބ) މި މާއްދާގެ (ނ) ގެ ދަށުން ކޮމްޕިއުޓަރ ޑޭޓާ ލިބިގަތުމަށްފަހު ނުވަތަ އެ ޑޭޓާއަށް އެކްސެސްވުމަށްފަހު، އެކަށީގެންވާ މުއްދަތެއްގެ ތެރޭގައި އެކަން، ކަމާގުޅޭ ބޭރު ގައުމަކަށް، އެ ޑޭޓާ ލިބިގަތް ނުވަތަ ޑޭޓާއަށް އެކްސެސްވި އިދާރާއަކުން އަންގަންވާނެއެވެ.

(ޅ) އެހެން ގާނޫނެއްގައި އެހެން ގޮތަކަށް ބަޔާންކޮށްފައިނުވާހާ ހިނދަކު، ބޭރު ގައުމެއްގެ ހުއްދަ ހޯދުމަކާ ނުލައި ޖިނާއީ ތަހްގީގު ހިންގުމުގެ ބާރު ލިބިފައިވާ އިދާރާއަކުން، އާންމުކޮށް ލިބެން ހުންނަ (އޯޕަން ސޯސް) ކޮމްޕިއުޓަރ ޑޭޓާއަށް، އެ ޑޭޓާ ދުނިޔޭގެ ކޮންމެ ތަނެއްގައި ހުރި ނަމަވެސް، އެކްސެސްވުމަކަށް މި މާއްދާ ހުރަހެއްނާޅައެވެ.

(ކ) މި މާއްދާގެ (ނ) ގެ ދަށުން ބޭރު ގައުމެއްގެ ހުއްދަ ހޯދުމަކާ ނުލައި، ޖިނާއީ ތަހްގީގު ހިންގުމުގެ ބާރު ލިބިފައިވާ އިދާރާއަކުން ކޮމްޕިއުޓަރ ޑޭޓާ ލިބިގަތުމުގައި ނުވަތަ އެ ޑޭޓާއަށް އެކްސެސްވުމުގައި އަމަލުކުރަންވީ ގޮތުގެ އިޖުރާއަތު މި ގާނޫނުގެ ދަށުން ހަދާ ގަވާއިދުގައި ޕްރޮސިކިއުޓަރ ޖެނެރަލް ބަޔާންކުރަންވާނެއެވެ. 

(އ) މި ބާބުގެ ދަށުން ޕްރޮސިކިއުޓަރ ޖެނެރަލަށް ނުވަތަ ޖިނާއީ ތަހްގީގު ހިންގުމުގެ ބާރު ލިބިފައިވާ އިދާރާއަކަށް ލިބިދޭ އިހްތިޔާރުގެ ދަށުން މި ގާނޫނުގައި ބަޔާންކޮށްފައިވާ ގާނޫނީ އެހީތެރިކަން ފޯރުކޮށްދިނުމުގެ އިޖުރާއަތުތައް ތަންފީޒުކުރަންވާނީ، އަދި ބޭރު ގައުމަކުން ނުވަތަ ބޭރުގެ އޭޖެންސީއަކުން ނުވަތަ 24/7 ނެޓްވަރކްއަކުން ނުވަތަ ބައިނަލްއަގްވާމީ އޭޖެންސީއަކުން އެދޭ ހުށަހެޅުންތައް ބަލައިގަންނަންވާނީ، މި ގާނޫނުގެ 8 ވަނަ މާއްދާއާ ހިލާފުނުވާނެ ގޮތެއްގެމަތިންނެވެ.

 

ކޮމްޕިއުޓަރ ސިސްޓަމެއްގައި ރައްކާކޮށްފައި ހުންނަ ޑޭޓާ އަވަސް ގޮތެއްގައި ޕްރިޒަރވްކުރުން 2-14.

(ހ) ދިވެހިރާއްޖޭގައި ހުރި ކޮމްޕިއުޓަރ ސިސްޓަމެއްގައި ރައްކާކޮށްފައި ހުރި ޑޭޓާ ބަލައި ފާސްކުރުމަށް، ނުވަތަ އެ ޑޭޓާއަށް އެކްސެސްވުމަށް، ނުވަތަ އެ ޑޭޓާ ހޯދުމަށް، ނުވަތަ ހިފެހެއްޓުމަށް، ނުވަތަ ހާމަކުރުމަށް މި ގާނޫނުގެ 4-14 ވަނަ މާއްދާގެ ދަށުން ދިވެހިރާއްޖޭގެ އެހީތެރިކަމަށް އެދި ހުށަހެޅުމަށް ބޭރު ގައުމަކުން ނުވަތަ ބޭރުގެ އޭޖެންސީއަކުން ނުވަތަ 24/7 ނެޓްވަރކްއަކުން ނުވަތަ ބައިނަލްއަގްވާމީ އޭޖެންސީއަކުން ގަސްދުކުރާނަމަ، އެފަދަ ހުށަހެޅުމެއް ހުށަހެޅުމުގެ ކުރިން، އަވަސް ގޮތެއްގައި އެ ޑޭޓާ ޕްރިޒަރވްކުރުމަށް ނުވަތަ ޕްރިޒަރވްކުރުމުގެ އަވަސް އަމުރެއް ނެރެދިނުމަށް، އެ ހުށަހެޅުން ހުށަހަޅަން ގަސްދުކުރާ ފަރާތަކުން، ޕްރޮސިކިއުޓަރ ޖެނެރަލަށް ހުށަހެޅިދާނެއެވެ.

(ށ) މި މާއްދާގެ (ހ) ގެ ދަށުން އެއްވެސް ފަރާތަކުން ހުށަހެޅުމެއް ހުށަހަޅައިފިނަމަ، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި ބަޔާންކޮށްފައިވާ އިޖުރާއަތުތަކާއި އެ ގާނޫނުން ލިބިދީފައިވާ ބާރުތަކުގެ ދަށުން، އެ ޑޭޓާ ޕްރިޒަރވްކުރުމަށް އެޅެން ުރި އެންމެހައި ފިޔަވަޅުތައް، ވީ އެންމެ އަވަހަށް ޕްރޮސިކިއުޓަރ ޖެނެރަލް ނުވަތަ އޭނާ ކަނޑައަޅާ ގާނޫނު ތަންފީޒުކުރާ އިދާރާއަކުން އަޅަންވާނެއެވެ.

(ނ) ބޭރު ގައުމަކުން ނުވަތަ ބޭރުގެ އޭޖެންސީއަކުން ނުވަތަ 24/7 ނެޓްވަރކްއަކުން ނުވަތަ ބައިނަލްއަގްވާމީ އޭޖެންސީއަކުން ދިވެހިރާއްޖޭގައި ހުރި ކޮމްޕިއުޓަރ ސިސްޓަމެއްގައި ރައްކާކޮށްފައި ހުރި ޑޭޓާ ބަލައި ފާސްކުރުމަށް، ނުވަތަ އެ ޑޭޓާއަށް އެކްސެސްވުމަށް، ނުވަތަ އެ ޑޭޓާ ހޯދުމަށް، ނުވަތަ ހިފެހެއްޓުމަށް، ނުވަތަ ހާމަކުރުމަށް ދިވެހިރާއްޖޭގެ އެހީތެރިކަމަށް އެދި ހުށަހެޅުމަށް މަގުފަހިކުރުމަށްޓަކައި، މި މާއްދާގެ ދަށުން ޑޭޓާ ޕްރިޒަރވްކޮށްދިނުމަށް އެދި ހުށަހަޅާ ހުށަހެޅުމަކާ ގުޅިގެން، ޑޭޓާ ޕްރިޒަރވްކުރުމަށް އަޅާ ފިޔަވަޅުތައް އަޅަންވާނީ 60 (ފަސްދޮޅަސް) ދުވަހަށްވުރެ ކުރު ނޫން މުއްދަތަކަށެވެ. އަދި އެފަދައިން ހުށަހަޅާ ހުށަހެޅުމެއް ލިބުމާއެކު، އެ ހުށަހެޅުމަކާ ގުޅޭގޮތުން ވަކިގޮތެއް ކަނޑައެޅެންދެން، ޑޭޓާ ޕްރިޒަރވްކުރުމަށް އަޅާފައިވާ ފިޔަވަޅުތައް ދަމަހައްޓަންވާނެއެވެ. 

 

ޕްރިޒަރވްކޮށްފައިވާ ޓްރެފިކް ޑޭޓާ އަވަސް ގޮތެއްގައި ހާމަކުރުން 3-14.

މި ގާނޫނުގެ 14-2 ވަނަ މާއްދާގެ ދަށުން ނުވަތަ އެނޫން ގޮތަކުންވިޔަސް ވަކި ކޮމިއުނިކޭށަންއަކާ ގުޅިގެން ދިވެހިރާއްޖެއަށް ހުށަހަޅާފައިވާ ހުށަހެޅުމެއް ދިވެހިރާއްޖެއިން ތަންފީޒުކުރަމުންދާއިރ،ު އެ ކޮމިއުނިކޭށަން ޓްރާންސްމިޓްކުރުމުގައި އެހެން ތިންވަނަ ގައުމެއްގެ ސަރވިސް ޕްރޮވައިޑަރއެއް ބައިވެރިވާކަމުގެ މައުލޫމާތު ޕްރޮސިކިއުޓަރ ޖެނެރަލަށް ލިބިއްޖެނަމަ، އެކަމަށް ވަކިން އެދިފައިނުވިނަމަވެސް، އެ ސަރވިސް ޕްރޮވައިޑަރއާއި އެ ކޮމިއުނިކޭށަން ޓްރާންސްމިޓްކޮށްފައިވާ ގޮތް އެނގޭނެ މިންވަރުގެ ޓްރެފިކް ޑޭޓާ އަވަސް ގޮތެއްގައި، އެ ކޮމިއުނިކޭށަންއަކާ ގުޅޭ ގޮތުން ހުށަހެޅުން ހުށަހަޅާފައިވާ ބޭރު ގައުމަށް ނުވަތަ ބޭރުގެ އޭޖެންސީއަށް ނުވަތަ 24/7 ނެޓްވަރކްއަށް ނުވަތަ ބައިނަލްއަގްވާމީ އޭޖެންސީއަށް ދިވެހިރާއްޖެއިން ހާމަކުރަންވާނެއެވެ. 

 

ރައްކާކޮށްފައިވާ ކޮމްޕިއުޓަރ ޑޭޓާއަށް އެކްސެސްވުމާ ގުޅޭގޮތުން އެހީތެރިކަން ބަދަލުކުރުން 4-14.

(ހ) މި ގާނޫނުގެ 14-2 ވަނަ މާއްދާގެ ދަށުން ޕްރިޒަރވްކޮށްފައިވާ ޑޭޓާ ހިމެނޭގޮތުން، ދިވެހިރާއްޖޭގައި ހުރި ކޮމްޕިއުޓަރ ސިސްޓަމެއްގައި ރައްކާކޮށްފައި ހުރި ޑޭޓާ ބަލައި ފާސްކުރުމަށް، ނުވަތަ އެ ޑޭޓާއަށް އެކްސެސްވުމަށް، ނުވަތަ އެ ޑޭޓާ ހޯދުމަށް، ނުވަތަ ހިފެހެއްޓުމަށް، ނުވަތަ ހާމަކުރުމަށް އެދި ނުވަތަ އެފަދައިން އަމަލުކުރުމުގެ އަމުރަކަށް އެދި، ބޭރު ގައުމަކުން ނުވަތަ ބޭރުގެ އޭޖެންސީއަކުން ނުވަތަ 24/7 ނެޓްވަރކްއަކުން ނުވަތަ ބައިނަލްއަގްވާމީ އޭޖެންސީއަކުން، ޕްރޮސިކިއުޓަރ ޖެނެރަލަށް ހުށަހެޅުމެއް ހުށަހެޅިދާނެއެވެ.

(ށ) މި މާއްދާގެ (ހ) ގެ ދަށުން އެހީތެރިކަމަށް އެދި ހުށަހަޅާ ހުށަހެޅުމެއްގައި އަންނަނިވި މައުލޫމާތު ހިމަނަންވާނެއެވެ.

1. ހުށަހަޅާ ފަރާތުގެ މައުލޫމާތު؛
2. ތަހްގީގު ހިންގަމުންދާ ނުވަތަ ށަރީއަތް ހިނގަމުންދާ ޖިނާއީ ކުށުގެ މައުލޫމާތު އަދި އެ ކުށަކާގުޅޭ ވާގިއާތަކުގެ ހުލާސާއެއް؛
3. ބަލައި ފާސްކުރުމަށް ނުވަތަ އެކްސެސްވުމަށް، ނުވަތަ ހޯދުމަށް، ނުވަތަ ހިފެހެއްޓުމަށް، ނުވަތަ ހާމަކުރުމަށް އެދޭ ޑޭޓާ އެކުލެވިގެންވާ ކޮމްޕިއުޓަރ ސިސްޓަމް ނުވަތަ ޑިވައިސްގެ މައުލޫމާތު؛
4. ބަލައި ފާސްކުރުމަށް ނުވަތަ އެކްސެސްވުމަށް، ނުވަތަ ހޯދުމަށް، ނުވަތަ ހިފެހެއްޓުމަށް، ނުވަތަ ހާމަކުރުމަށް އެދޭ، އަދި ރައްކާކޮށްފައިވާ ކޮމްޕިއުޓަރ ޑޭޓާ ނުވަތަ ޕްރޮގްރާމްގެ މައުލޫމާތު، އަދި އެ ޑޭޓާ ނުވަތަ ޕްރޮގްރާމްއާ ކުށާ ހުރި ގުޅުން؛
5. ކޮމްޕިއުޓަރ ސިސްޓަމްގައި ރައްކާކޮށްފައި ހުރި ޑޭޓާގެ ވެރިފަރާތާ ގުޅޭގޮތުން ނުވަތަ ކޮމްޕިއުޓަރ ސިސްޓަމް ނުވަތަ ވައިސް ހުރި ތަނާ ގުޅޭގޮތުން ލިބިފައިވާ އެންމެހައި މައުލޫމާތު؛
6. ޑޭޓާ ބަލައި ފާސްކުރުމާއި ހިފެހެއްޓުމުގެ މުހިންމުކަން.

(ނ) މި މާއްދާގެ (ހ) ގެ ދަށުން ހުށަހެޅުމެއް ލިބުމާއެކު، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި ބަޔާންކޮށްފައިވާ އިޖުރާއަތުތަކާއި އެ ގާނޫނުން ލިބިދީފައިވާ ބާރުތަކުގެ ދަށުން އެ ހުށަހެޅުން ތަންފީޒުކުރުމަށްޓަކައި ހޯދަންޖެހޭ ހުއްދަތަކާއި އަމުރުތައް ހޯދުމަށްޓަކައި އަޅަންޖެހޭ އެންމެހައި ފިޔަވަޅުތައް ޕްރޮސިކިއުޓަރ ޖެނެރަލް ނުވަތަ އޭނާ ކަނޑައަޅާ ގާނޫނު ތަންފީޒުކުރާ އިދާރާއަކުން އަޅަންވާނެއެވެ.

(ރ) މި މާއްދާގެ (ނ) ގެ ދަށުން ހޯދަންޖެހޭ ހުއްދައެއް ނުވަތަ އަމުރެއް ލިބުމާއެކު، ބަލައި ފާސްކުރުމާއި ހިފެހެއްޓުމުގެ މަރުހަލާގައި، މި މާއްދާގެ (ހ) ގެ ދަށުން ހުށަހެޅުން ހުށަހެޅި ފަރާތުގެ އެއްބާރުލުމާއި އެހީތެރިކަމަށް އެދުމުގެ އިހްތިޔާރު ޕްރޮސިކިއުޓަރ ޖެނެރަލަށް ލިބިގެންވެއެވެ. 

(ބ) މި މާއްދާގެ (ހ) ގެ ދަށުން ބަލައި ފާސްކުރުމާއި ހިފެހެއްޓުމަށް އެދި ހުށަހެޅި ހުށަހެޅުން ތަންފީޒުކޮށް ނިމުމުން، އެފަދައިން ހޯދުނު ނުވަތަ
ހިފެހެއްޓުނު ހެކި، ހުށަހެޅުން ހުށަހެޅި ފަރާތާ ޕްރޮސިކިއުޓަރ ޖެނެރަލް ހިއްސާކުރަންވާނެއެވެ.

 

ޓްރެފިކް ޑޭޓާ ރިއަލް - ޓައިމްގައި ނެގުމަށްޓަކައި އެހީތެރިކަން ބަދަލުކުރުން 5-14.

(ހ) ކޮމްޕިއުޓަރ ސިސްޓަމެއް ބޭނުންކޮށްގެން ދިވެހިރާއްޖޭގައި ޓްރާންސްމިޓްކޮށްފައިވާ ވަކި ކޮމިއުނިކޭށަންތަކަކާގުޅޭ ޓްރެފިކް ޑޭޓާ ރިއަލް-ޓައިމްގައި ނެގުމުގެ އަމުރެއް ނެރެދިނުމަށް އެދި ނުވަތަ އެ ޑޭޓާ ރިއަލް-ޓައިމްގައި ނެގުމުގައި އެހީތެރިކަން ފޯރުކޮށްދިނުމަށް އެދި ބޭރު ގައުމަކުން ނުވަތަ 24/7 ނެޓްވަރކްއަކުން ނުވަތަ ބޭރުގެ އޭޖެންސީއަކުން ނުވަތަ ބައިނަލްއަގްވާމީ އޭޖެންސީއަކުން، ޕްރޮސިކިއުޓަރ ޖެނެރަލަށް ހުށަހެޅުމެއް ހުށަހެޅިދާނެއެވެ.

(ށ) މި މާއްދާގެ (ހ) ގެ ދަށުން ހުށަހެޅުމެއް ލިބުމާއެކު، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި ބަޔާންކޮށްފައިވާ އިޖުރާއަތުތަކާއި އެ ގާނޫނުން ލިބިދީފައިވާ ބާރުތަކުގެ ދަށުން އެ ހުށަހެޅުން ތަންފީޒުކުރުމަށްޓަކައި ހޯދަންޖެހޭ ހުއްދަތަކާއި އަމުރުތައް ހޯދުމަށްޓަކައި އަޅަންޖެހޭ އެންމެހައި ފިޔަވަޅުތައް ޕްރޮސިކިއުޓަރ ޖެނެރަލް ނުވަތަ އޭނާ ކަނޑައަޅާ ގާނޫނު ތަންފީޒުކުރާ އިދާރާއަކުން އަޅަންވާނެއެވެ.

(ނ) މި މާއްދާގެ (ށ) ގެ ދަށުން ހޯދަންޖެހޭ ހުއްދައެއް ނުވަތަ އަމުރެއް ލިބުމާއެކު، ރިއަލް-ޓައިމްގައި ޓްރެފިކް ޑޭޓާ ނެގުމުގެ މަރުހަލާގައި، މި މާއްދާގެ (ހ) ގެ ދަށުން ހުށަހެޅުން ހުށަހެޅި ފަރާތުގެ އެއްބާރުލުމާއި އެހީތެރިކަމަށް އެދުމުގެ އިހްތިޔާރު ޕްރޮސިކިއުޓަރ ޖެނެރަލަށް ލިބިގެންވެއެވެ.

(ރ) މި މާއްދާގެ (ހ) ގެ ދަށުން ރިއަލް-ޓައިމްގައި ޓްރެފިކް ޑޭޓާ ނެގުމަށް އެދި ހުށަހެޅި ހުށަހެޅުން ތަންފީޒުކޮށް ނިމުމުން، އެފަދައިން ނެގުނު ޓްރެފިކް ޑޭޓާ، ހުށަހެޅުން ހުށަހެޅި ފަރާތާ ޕްރޮސިކިއުޓަރ ޖެނެރަލް ހިއްސާކުރަންވާނެއެވެ. 

 

ކޮންޓެންޓް ޑޭޓާ އިންޓަރސެޕްޓްކުރުން 6-14.

(ހ) ކޮމްޕިއުޓަރ ސިސްޓަމެއް ބޭނުންކޮށްގެން ދިވެހިރާއްޖޭގައި ޓްރާންސްމިޓްކޮށްފައިވާ ވަކި ކޮމިއުނިކޭށަންތަކަކާގުޅޭ ކޮންޓެންޓް ޑޭޓާ ރިއަލް-ޓައިމްގައި ނެގުމުގެ ނުވަތަ ރެކޯޑުކުރުމުގެ އަމުރެއް ނެރެދިނުމަށް އެދި ނުވަތަ އެ ޑޭޓާ ރިއަލް-ޓައިމްގައި ނެގުމުގައި ނުވަތަ ރެކޯޑުކުރުމުގައި އެހީތެރިކަން ފޯރުކޮށްދިނުމަށް އެދި ބޭރު ގައުމަކުން ނުވަތަ 24/7 ނެޓްވަރކްއަކުން ނުވަތަ ބޭރުގެ އޭޖެންސީއަކުން ނުވަތަ ބައިނަލްއަގްވާމީ އޭޖެންސީއަކުން، ޕްރޮސިކިއުޓަރ ޖެނެރަލަށް ހުށަހެޅުމެއް ހުށަހެޅިދާނެއެވެ.

(ށ) މި މާއްދާގެ (ހ) ގެ ދަށުން ހުށަހެޅުމެއް ލިބުމާއެކު، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި ބަޔާންކޮށްފައިވާ އިޖުރާއަތުތަކާއި އެ ގާނޫނުން ލިބިދީފައިވާ ބާރުތަކުގެ ދަށުން އެ ހުށަހެޅުން ތަންފީޒުކުރުމަށްޓަކައި ހޯދަންޖެހޭ ހުއްދަތަކާއި އަމުރުތައް ޯދުމަށްޓަކައި އަޅަންޖެހޭ އެންމެހައި ފިޔަވަޅުތައް ޕްރޮސިކިއުޓަރ ޖެނެރަލް ނުވަތަ އޭނާ ކަނޑައަޅާ ގާނޫނު ތަންފީޒުކުރާ އިދާރާއަކުން އަޅަންވާނެއެވެ.

(ނ) މި މާއްދާގެ (ށ) ގެ ދަށުން ހޯދަންޖެހޭ ހުއްދައެއް ނުވަތަ އެންގުމެއް ނުވަތަ އަމުރެއް ލިބުމާއެކު، ކޮންޓެންޓް ޑޭޓާ އިންޓަރސެޕްޓްކުރުމުގެ މަރުހަލާގައި، މި މާއްދާގެ (ހ) ގެ ދަށުން ހުށަހެޅުން ހުށަހެޅި ފަރާތުގެ އެއްބާރުލުމާއި އެހީތެރިކަމަށް އެދުމުގެ އިހްތިޔާރު ޕްރޮސިކިއުޓަރ ޖެނެރަލަށް ލިބިގެންވެއެވެ.

(ރ) މި މާއްދާގެ (ހ) ގެ ދަށުން ކޮންޓެންޓް ޑޭޓާ ރިއަލް-ޓައިމްގައި ނެގުމަށް ނުވަތަ ރެކޯޑުކުރުމަށް އެދި ހުށަހެޅި ހުށަހެޅުން ތަންފީޒުކޮށް ނިމުމުން، އެފަދައިން ނެގުނު ނުވަތަ ރެކޯޑުކުރެވުނު ކޮންޓެންޓް ޑޭޓާ، ހުށަހެޅުން ހުށަހެޅި ފަރާތާ ޕްރޮސިކިއުޓަރ ޖެނެރަލް ހިއްސާކުރަންވާނެއެވެ. 

 

24/7 ނެޓްވަރކް 7-14.

ކޮމްޕިއުޓަރ ސިސްޓަމަކާ ނުވަތަ ކޮމްޕިއުޓަރ ޑޭޓާއާގުޅޭ ކުށަކާ ގުޅިގެން ނުވަތަ އިލެކްޓްރޯނިކް ހެކި ހޯދަންޖެހޭފަދަ އެނޫންވެސް ކުށަކާ ގުޅިގެން ހިންގާ ޖިނާއީ ތަހްގީގުތަކާއި ށަރީއަތްތަކަށް ނުވަތަ އެފަދަ ކުށްތަކާގުޅޭ ތަހްގީގުތަކަށް ބޭނުންވާ އެހީތެރިކަން ވަގުތުން ފޯރުކޮށްދިނުމަށްޓަކައި، ކޮންމެ ދުވަހެއްގެ 24 (ސައުވީސް) ގަޑިއިރު އަދި ކޮންމެ ހަފްތާއެއްގެ 7 (ހަތެއް) ދުވަހު މުއާމަލާތު ކުރެވޭނެ ފަރާތެއް، ދިވެހި ފުލުހުންގެ ހިދުމަތުގައި ގާއިމުކޮށްފައި ހުންނަންވާނެއެވެ.

(ށ) މި މާއްދާގެ (ހ) ގެ ދަށުން ގާއިމުކުރެވޭ 24/7 ނެޓްވަރކުން ފޯރުކޮށްދެވޭ އެހީތެރިކަމުގެ ތެރޭގައި، އަންނަނިވި ކަންކަމާގުޅޭ އެހީ ހިމެނެންވާނެއެވެ.

1. މި ގާނޫނުގެ 14-2 ވަނަ މާއްދާ އަދި 3-14 ވަނަ މާއްދާގައި ބަޔާންކޮށްފައިވާ ފަދައިން ޑޭޓާ ޕްރިޒަރވްކުރުން؛
2. އިކެލްޓްރޯނިކް ހެކި ހޯދުން؛
3. ގާނޫނީ މައުލޫމާތު ދިނުން؛
4. ކުށުގެ ތުހުމަތު ކުރެވޭ ފަރާތްތައް ވީތަނެއް ހޯދުން؛
5. ފަންނީ ލަފާ ދިނުން.

 

މާނަކުރުން 8-14.

(ހ) މި ބާބުގެ ބޭނުމަށްޓަކައި، "އެކްސެސްވުން" ނުވަތަ "ޑޭޓާއަށް އެކްސެސްވުން" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ އިބާރާތްތަކަށް ދީފައިވާ މާނަކުރުމެވެ.

(ށ) މި ބާބުގެ ބޭނުމަށްޓަކައި، "ކޮމްޕިއުޓަރ ސިސްޓަމް" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ އިބާރާތަށް ދީފައިވާ މާނަކުރުމެވެ.

(ނ) މި ބާބުގެ ބޭނުމަށްޓަކައި، "ޑިވައިސް" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ ލަފްޒަށް ދީފައިވާ މާނަކުރުމެވެ.

(ރ) މި ބާބުގެ ބޭނުމަށްޓަކައި، "ޑޭޓާ" ނުވަތަ "ކޮމްޕިއުޓަރ ޑޭޓާ" ނުވަތަ "ކޮންޓެންޓް ޑޭޓާ" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ ލަފްޒު ނުވަތަ އިބާރާތްތަކަށް ދީފައިވާ މާނަކުރުމެވެ.

(ބ) މި ބާބުގެ ބޭނުމަށްޓަކައި، "އިންޓަރސެޕްޓްކުރުން" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ އިބާރާތަށް ދީފައިވާ މާނަކުރުމެވެ.

(ޅ) މި ބާބުގެ ބޭނުމަށްޓަކައި، "ޕްރޮގްރާމް" އަށް ދީފައިއެވަނީ، ގާނޫނު ނަންބަރު 2014-09 (ދިވެހިރާއްޖޭގެ ގާނޫނުލްއުގޫބާތު) ގައި އެ ލަފްޒަށް ދީފައިވާ މާނަކުރުމެވެ.

(ކ) މި ބާބުގެ ބޭނުމަށްޓަކައި، "ސަރވިސް ޕްރޮވައިޑަރ" އަށް ދީފައިއެވަނީ، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި އެ އިބާރާތަށް ދީފައިވާ މާނަކުރުމެވެ.

(އ) މި ބާބުގެ ބޭނުމަށްޓަކައި، "ޓްރެފިކް ޑޭޓާ" އަށް ދީފައިއެވަނީ، ގާނޫނު ނަންބަރު 2016-12 (ޖިނާއީ އިޖުރާއަތުގެ ގާނޫނު) ގައި އެ އިބާރާތަށް ދީފައިވާ މާނަކުރުމެވެ.

 

4 ވަނަ މާއްދާ - މި ގާނޫނަށް އަމަލުކުރަން ފަށާނީ، މި ގާނޫނު ފާސްވެ، ތަސްދީގުކޮށް، ދިވެހިސަރުކާރުގެ ގެޒެޓުގައި ށާއިއުކުރާ ތާރީހުން ފެށިގެންނެވެ. 

 

މައި ގާނޫނު

ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނު (ގާނޫނު ނަންބަރު 2015-02)