ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނު (ގާނޫނު ނަންބަރު 1979-31) އަށް 5 ވަނަ އިސްލާހު ގެނައުމުގެ ގާނޫނު

(މި ގާނޫނަށް އަމަލުކުރަން ފެށީ 1 ޖެނުއަރީ 1994 ގައި)

 

1 ވަނަ މާއްދާ -

ދިވެހިރާއްޖޭގައި އުފެދޭ އަދި އުފައްދާ ތަކެތި އެކްސްޕޯޓް ކުރުމާއި، ރާއްޖެއަށް ތަކެތި އިމްޕޯޓް ކުރުމާއި، ރީއެކްސްޕޯޓް ކުރުމާއި، އިމްޕޯޓްކުރުާ މުދާ ވިއްކުމާއި، މިއިން ކަމެއް ރާއްޖޭގައި ހިންގަންވާނީ، މިނިސްޓްރީ އޮފް ޓްރޭޑް އެންޑް އިންޑަސްޓްރީޒުން ހުއްދަ ލިބިގެން، އަދި އެ މިނިސްޓްރީން ހަދާ ގަވާއިދެއްގެ މަތިންނެވެ. މިގާނޫނުގެ 5 ވަނަ މާއްދާގެ (ނ) އާއި (ރ) ގައި ބަޔާންކޮށްކުރެވިފައިވާ މިންވަރަށް ތަކެތި ރާއްޖެ ގެނައުމަށް ހުއްދަ ނަގާކަށް ނުޖެހޭނެއެވެ. 

 

2 ވަނަ މާއްދާ -

(ހ) ދިވެހިރާއްޖެއިން އެކްސްޕޯޓްކުރާ، ރާއްޖޭގައި އުފެދޭ ނުވަތަ އުފައްދާ ތަކެތީގެ ތެރެއިން މާވަހަރު ފިޔަވައި އެހެން އެއްވެސް އެއްޗަކުން އެކްސްޕޯޓް ޑިއުޓީއެއް ނުނެގޭނެއެވެ. 

(ށ) ދިވެހިރާއްޖެއިން ރީއެކްސްޕޯޓްކުރާ ތަކެތިން އެކްސްޕޯޓް ޑިއުޓީއެއް ނުނެގޭނެއެވެ. 

 

3 ވަނަ މާޢްދާ - 

މާވަހަރުން އެކްސްޕޯޓް ޑިއުޓީއަށް ނަގާނީ އޭގެ އެފް.އޯ.ބީ. އަގުގެ %50 އެވެ. 

 

4 ވަނަ މާއްދާ - 

ދިވެހިރާއްޖެއިން އެކްސްޕޯޓްކުރާ އެއްވެސް އެއްޗެއް ތައްޔާރު ކުރުމުގައި ނުވަތަ އެކްސްޕޯޓް ކުރުމުގައި މަކަރު ހެދުމަކުން، ނުވަތަ ފަރުވާކުޑަ ކުރުމަކުންވިޔަސް، ރާޢްޖޭގެ ނަމަށް ހުތުރެއް ނުވަތަ ރާއްޖޭގެ ވިޔަފާރިއަށް އުނިކަމެއް ލިބިދޭފަދަ އަމަލެއް ކޮށްގެން ނުވާނެއެވެ. 

 

5 ވަނަ މާއްދާ - ތިރީގައި މިބަޔާންކުރާ ތަކެތިން އިމްޕޯޓް ޑިއުޓީ ދައްކާކަށް ނުޖެހޭނެއެވެ.

(ހ) ހަނޑޫ، ހަކުރު، ފުށް.

(ށ) މުސްހަފާއި، ގުރްއާނުގެ ވަކިވަކިން ހުންނަ ބައިބައި.

(ނ) ދަތުރުވެރިން ގެންނަ ތަކެތިން ޑިއުޓީ މާފުކުރުމަށް ރައީސުލްޖުމްހޫރިއްޔާ ކަނޑައަޅާ އަދަދެއް. 

(ރ) އަމިއްލަ ފަރާތްތަކުގެ ކުދިކުދި ބޭނުންތަކަށް ގެނެވޭ ތަކެތިން ޑިއުޓީ މާފުކުރުމަށް ރައީސުލްޖުމްހޫރިއްޔާ ކަނޑައަޅާ އަދަދެއް. 

 

6 ވަނަ މާއްދާ - 

ދިވެހިރާޢްޖެއަށް އިމްޕޯޓްކުރާ ތަކެތީގެ ތެރެއިން މި ގާނޫނުގެ 5 ވަނަ މާއްދާގައި ބަޔާންކޮށްފައިވާ ތަކެތި ފިޔަވައި އެހެން ތަކެތިން ދިވެހި ސަރުކާރަށް އިމްޕޯޓް ޑިއުޓީ ދައްކަން ވާނެއެވެ. އިންށުއަރ ކޮށްގެން ގެންނަ މުދަލުން ޑިއުޓީ ދައްކާނީ، ތަކެތީގެ ސީ.އައި.އެފް. އަގުން ތިރީގައި މިބަޔާންކުރާ ގޮތުގެ މަތިންނެވެ. އިންށުއަރ ނުކޮށް ގެންނަ މުދަލުން ޑިއުޓީ ދައްކާނީ ތަކެތީގެ ސީ.އެންޑް.އެފް. އަގުން ތިރީގައި މިބަޔާންކުރާ ގޮތުގެ މަތިންނެވެ. 

(ހ) ތިރީގައިވާ ތަކެތިން ޑިއުޓީ ދައްކާނީ %5 އެވެ. 

1. ބަލިބައްޔަށް ފަރުވާދިނުމަށް ބޭނުންކުރާ ބޭހާއި، ނަންބަރު އައިނާއި އޭގެ ބައިބައި.
2. ދިވެހިބޭހަށް ބޭނުންކުރާ ތަކެއްޗާއި، މަލަން، ބެންޑޭޖް، ބޭސްއަޅާ ކަފަ، އިންޖެކްށަންޖަހާ ސިރިންޖުފަދަ ތަކެތި.
3. ޓޯޗް.
4. ސާޅިއާއި ސާޅިކަނޑާ ފޮތި.
5. ރޭޑިޔޯ، ވޯކްމަން، ސްޓީރިއޯ ސިސްޓަމް، ޓޭޕް ރެކޯޑަރ، ޓްރެކް މިކްސަރ ފަދަ މިޔުޒިކާއި ލަވަޖެހުމާއި ރެކޯޑް ކުރުމަށް ބޭނުންކުރާ އިލެކްޓްރޯނިކް ސާމާނާއި އެތަކެތީގެ ބައިބައި. 
6. ޓެލެވިޒަން ސެޓާއި، ވީޑިއޯ ކެސެޓް ރެކޯޑަރާއި، ވީޑިއޯ ކެސެޓް ޕްލޭޔަރު ފަދަ އިލެކްޓރިކް އަދި އިލެކްޓްރޯނިކް ސާމާނާއި އެތަކެތީގެ ބައިބައި. 
7. އިލެކްޓްރޯނިކް އޯގަން.
8. އެކި ބާވަތުގެ ކެމެރާ.
9. ޓެލެފޯން.
10. އެކި ބާވަތްތަކުގެ ގަޑިއާއި އޭގެ ބައިބައި. 
11. އެކި ބާވަތްތަކުގެ ކަރަންޓް އުނދުނާއި، ޓޯސްޓަރާއި، އައިސްއަލަމާރިއާއި، އިސްތިރީފަދަ ގެވެހި ސާމާނު.

(ށ) ތިރީގައިވާ ތަކެތިން ޑިއުޓީ ދައްކާނީ %10 އެވެ. 

1. ކިރުގެ ބާވަތްތަކާއި ބިހާއި، މާމުއި.
2. ތަރުކާރީގެ ތެލާއި ތަރުކާރީގެ ތެލުގެ ބާވަތްތަކާއި ޖަވާރާއި މަސްފަދަ ތަކެތީގެ ތެލާއި ސަރުބީ.
3. ފިއުލްގެ ގޮތުގައި ބޭނުންކުރާ ތެލާއި ފިއުލްގެ ގޮތުގައި ބޭނުންކުރާ ގޭސް.
4. ސައިބޯނި، ށޭމްޕޫ، އަދި އެކިބާވަތުގެ ދޮންނަ ކުނޑިއާއި އެފަދ ތަކެތި.
5. ސްކޫލް ފޮތް، ފަންސުރު، ފޮހޭރަބަރު، ފަތިގަނޑު، ފަރުގާލުފޮށި ފަދަ ކިޔެވުމަށް ބޭނުންކުރެވޭ ތަކެތި.
6. ކަރުދާހާއި، ކަރުދާހު ކޮތަޅާއި، ކަރުދާހު ފޮންޓާއި، ކަރުދާހުގެ ބާވަތްތަކާއި، އެކި ބާވަތް ބާވަތުެ ފޮތާއި، ނޫހާއި، މަޖައްލާއާއި، ފޮޓޯ، ޕޯސްޓަރުފަދަ ތަކެއްޗާއި، ޗާޕުޖެލި.
7. ތަށިމުށިން ނުވަތަ ބިއްލޫރިން ހަދާފައިވާ ހިފާ ގެންގުޅޭ ތަކެތި. 
8. ސިމެންތިއައި، ހިލައާއި، ހިލަވެލި.
9. ތަކެތި އުފެއްދުމަށާއި، މަސައްކަތްތެރިކަމުގެ ގޮތުން ބޭނުންކުރާ ކެމިކަލްސް. 

(ނ) ތިރީގައިވާ ތަކެތިން ޑިއުޓީ ދައްކާނީ %15 އެވެ. 

1. މި މާއްދާގެ (ށ) ބައި ހިމެނިފައިނުވާ ކާބޯތަކެތި.
2. ފަރުނީޗަރު ފިަޔވައި ލަކުޑިން ހަދާފައި ހުންނަ ތަކެއްޗާއި، ލަކުޑިއާއި ލަކުޑީގައިލާ ކުލަ.
3. ފުޅިމަދާއި، ފުޅިމަދުން ހަދާފައި ހުންނަ ތަކެތި.
4. ކަފައާއި، އެކިބާވަތްބާވަތުގެ ރޮއްޖާއި (ސާޅިއާއި ސާޅިކަނޑާ ފޮތިފިޔަވައި) އެކިބާވަތުގެ ފޮތި.
5. ކުޑައާއި، ފައިވާނާއި، ތޮތްޕާއި އެފަދަ ތަކެތި.
6. ދަނގަނޑާއި، އެކަތައާއި، ލޮޔާއި، އެލްމެނިއަމް. 
7. ސިމެންތިއާޢި، ހިލައާއި، ހިލަވެލި ފިޔަވައި، ގެދޮރު އެޅުމަށް ބޭނުންކުރާ އެހެނިހެން ތަކެއްޗާއި، ފާހާނާ ހެދުމަށް ބޭނުންކުރާ ތަކެތި. 
8. ތަށިމުށިން ނުވަތަ ބިއްލޫރިން ހަދާފައިވާ ހިފާގެންގުޅޭ ތަކެތި ފިޔަވައި ތަށިމުށިން ނުވަތަ ބިއްލޫރިން ހަދާފައިވާ އެހެނިހެން ތަކެއްޗާއި ބިއްލޫރި. 
9. ނަބަރު އައނު ނޫން އައިނާއި އޭގެ ބައިބަޔާއި ދުރުމީގެ ބާވަތްތަކާއި އޭގެ ބައިތައް.
10. ބައިސްކަލާއި އޭގެ ބައިބައި.

(ރ) ތިރީގައިވާ ތަކެތިން ޑިއުޓީ ދައްކާނީ %20 އެވެ. 

1. ފަރުނީޗަރުގެ ތެރޭގައި ހިމެނޭ ތަކެއްޗާއި، އެތަކެތީގެ ބައިބަޔާއި، އެތަކެއްޗާގުޅޭ ތަކެތި.
2. އެއަރކޮންޑިށަނަރާއި، އޭގެ ބައިތައް ފިޔަވައި އެކިއެކި މެށިނާއި، އެއްގައުމުގައި ދުއްވާ އެއްޗެތީގެ އިންޖީނު ފިޔަވައި އެކިއެކި އިންޖީނާއި، އެތަކެތީގެ ބައިބަޔާއި، މަސައްކަތްތެރި ކަމުގެ ގޮތުން ބޭނުންކުރާ ކީސް، ރޮންދާފަދަ ތަކެތި.

(ބ)  ތިރީގައިވާ ތަކެތިން ޑިއުޓީ ދައްކާނީ %25 އެވެ. 

1. ޖަނަވާރުގެ ހަމާއި، ކެހެރިއާއި، އެތަކެތިން ހަދާފައި ހުންނަ ތަކެތި.
2. ޕްލާސްޓިކް ކޮތަޅު ފިޔަވައި އަދި މިމާއްދާގެ އެހެން ނަންބަރެއްގައި ހިމެނިފައިނުވާ، ޕްލާސްޓިކާއި، ރަބަރުން ހަދާފައި ހުންނަ ތަކެތި.
3. ރަންރިހީގެ ގަހަނާއާއި، ރަނާއި، ރިއްސާއި، މުތާއި، ޖަވާހިރާއި، އެސްފަދަ ތަކެތި.
4. އެކިބާވަތުގެ ކެމެރާ ފިޔަވައި ފޮޓޯ ނެގުމުގެ ސާމާނާއި އޭގެ ބައިބައި. 
5. އެކިބާވަތުގެ ތައްޔާރީ ފޭރާމާއި، އެތަކެތީގެ ބައިބައި. 
6. މިމާއްދާގެ (ހ)، (ށ)، (ނ)، (ރ)، (ޅ)، (ކ)، (އ)، (ވ) ގައި ހިމެނިފައި ނުވާތަކެތި.

(ޅ) ތިރީގައިވާ ތަކެތިން ޑިއުޓީ ދައްކާނީ %35 އެވެ. 

1. ބައިސްކޯފް ދައްކާ ފޮށްޓާއި، ބައިސްކޯފް ފިލްމާއި، ވީޑިއޯ ފިލްމު ފަދަ ތަކެތި.
2. ފަންނީގޮތުން ފާހަގަކުރެވޭ ކުރެހުމާއި، ފޮޓޯފަދަ ތަކެއްޗާއި، އާސާރީ ތަކެތި.
3. ކާރާއި ސައިލް ފިޔަވައި އެއްގަމުގައި ދުއްވާ އިންޖީނުލީ އެއްޗިއްސާއި، އެއްގަމުގައި ދުއްވާ އެއްޗެތީގެ ބައިބައި.
4. ގާނޫނީގޮތުން ހުއްދަ ނަގައިގެން ގެންނަންޖެހޭ ތަކެތި.

(ކ) ތިރީގައިވާ ތަކެތިން ޑިއުޓީ ދައްކާނީ %50 އެވެ. 

1. ދުންފަތާއި، ބިޑީ، ސުއްޓާ، ސިގިރެޓްފަދަ ތަކެއްޗާއި ދުންފަތުގެ އިސްތިއުމާލު ކުރުމަށް ބޭނުންކުރާ ތަކެތި. 
2. އިލެކްޓްރިކް އޯގަން ފިޔަވައި، މިޔުޒިކް ކުޅުމަށް ބޭނުންކުރާ ތަކެއްޗާއި، އެތަކެތީގެ ބައިބައި. 

(އ) ތިރީގައިވާ ތަކެތިން ޑިއުޓީ ދައްކާނީ %100 އެވެ. 

1. އިންޖީނުގެ ކެޕޭސިޓީގައި 125 ކޮޑި ސެންޓިމީޓަރު ހަމަނުވާ ސައިކަލާއި އޭގެ ބައިތަކާއި، އިންޖީނުގެ ކެޕެސިޓީގައި 1500 ކޮޑި ސެންޓިމީތަރު ހަމަނުވާ ކާރާއި، އޭގެ ބައިތައް.
2. އެއަރކޮންޑިށަނަރާއި އޭގެ ބައިބައި. 

(ވ) ތިރީގައިވާ ތަކެތިން ޑިއުޓީ ދައްކާނީ %200 އެވެ. 

1. އިންޖީނުގެ ކެޕޭސިޓީގައި 125 ކޮޑި ސެންޓިމީޓަރު ހަމަވާ ނުވަތަ އެއަށްވުރެ މަތީގެ ސައިކަލާއި އޭގެ ބައިތައް.
2. އިންޖީނުގެ ކެޕޭސިޓީގައި 1500 ކޮޑި ސެންޓިމީޓަރު ހަމަވާ ނުވަތަ އެއަސްވުރެ މަތީގެ ކާރާއި އޭގެ ބައިތައް.
3. ޕްލާސްޓިކް ކޮތަޅު.

 

7 ވަނަ މާޢްދާ - 

(ހ) އިގްތިސާދީ ގޮތުން ދިވެހިރާއްޖޭއަށް ބޭނުންތެރި މަސައްކަތްތައް ފެށްޓުމަށާއި، ކުރުމަށާއި، ހިންގުމަށް އިމްޕޯޓްކުރާ ތަކެތިން ސަރުކާރަށް ދައްކަންވާ ޑިއުޓީ، ގިނަވެގެން 10 އަހަރު ދުވަހަށް މާފު ކުރުމުގެ އިހްތިޔާރު ރައީސުލްޖުމްހޫރިއްޔާއަށް ލިބިގެންވެއެވެ. 

(ށ) ދިވެހިރާއްޖޭގެ ރައްޔިތިންގެ، ނުވަތަ ރަށެއްގެ މުޅީ ރައްޔިތުންގެ އާންމު ފައިދާއަށްޓަކައި އިމްޕޯޓްކުރާ ތަކެތީގެ އިމްޕޯޓް ޑިއުޓީ، ނުވަތަ އިމްޕޯޓް ޑިއުޓީން ބައެއް، ހާއްސަ ހާލަތެއް މެދުވެރިވެއްޖެ ހިނދެއްގައި، މާފުކުރުމުގެ އިހްތިޔާރު ރައީސުލްޖުމްހޫރިއްޔާއަށް ލިބިގެންވެއެވެ. 

(ނ) ދިވެހި ސަރުކާރުން ޑިޕްލޮމެޓިކް އިމްތިޔާޒު ދީފައިވާ ފަރާތްތަކުން ރާއްޖެ ގެންނަ އަދި ގެންދާ ތަކެތީގެ ޑިއުޓީ ދިވެހިރާއްޖޭ ގަބޫލު ކޮށްފައިވާ ބައިނަލްއަގްވާމީ މުއާހަދާތަކާ އެއްގޮތްވާ ގޮތުގެ މަތިން އިސްތިސްނާ ކުރެވޭނެއެވެ. 

 

8 ވަނަ މާއްދާ -

އެހެން ގާނޫނަކުން ޑިއުޓީ އިސްތިސްނާ ކުރުމުގެ އިހްތިޔާރު ދިވެހި ސަރުކާރަށް ލިބިދޭ ފަރާޓަކާމެދު ކަނޑައެޅިފައިވާ ގޮތެއްގެ މަތިން ދިވހެި ސަރުކާރުން އަމަލު ކުރުމަކަށް މިގާނޫނު ހުރަހެއް ނާޅައެވެ. 

 

9 ވަނަ މާއްދާ - 

(ހ) އިމްޕޯޓް ކުރުމުގައި އަގު އެނގެން ނުހުންނަ ތަކެއްޗާއި، އާންމު ގޮތެއްގައި އިމްޕޯޓް ކޮށްފައި ހުންނަ އަގަށްވުރެ ދަށް އަގެއްގައި ހުންނަ ތަކެތިން ޑިއުޓީ ދައްކާނެ އަގެއް ކަނޑައަޅާނީ އެދުވަސްވަރެއްގައި އާންމުކޮށް ރާއްޖޭއަށް ތަކެތި އިމްޕޯތްކޮށްފައި ހުންނަ އަގުތަކަށް ބަލައިގެން ދިވެހި ސަރުކާރުންނެވެ. 

(ށ) އެކްސްޕޯޓް ކުރުމުގައި އަގު އެނގެން ނުހުންނަ ތަކެއްޗާއި، އާންމު ގޮތެއްގައި އެކްސްޕޯޓްކޮށްފައި ހުންނަ އަގަށްވުރެ ދަށް އަގެއްގައި ހުން ތަކެތިން ޑިއުޓީ ދައްކާނެ އަގެއް ކަނޑައަޅާނީ އެދުވަސްވަރެއްގައި އާންމުކޮށް ރާޢްޖޭއިން ތަކެތި އެކްސްޕޯޓް ކޮށްފައި ހުންނަ އަގުތަކަށް ބަލައިގެން ދިވެހި ސަރުކާރުންނެވެ. 

(ނ) މި މާއްދާގެ (ހ) އާއި (ށ) ގައިވާ ގޮތުގެ މަތިން ދިވެހި ސަރުކާރުން ކަނޑައަޅާ އަގާމެދު މުދަލުގެ ވެރިފަރާތުން ގަބޫލު ނުކުރާ މައްސަލއެއް އޮވެއްޖެނަމަ، އެއަގުން ޑިއުޓީ ދެއްކުމަށްފަހު އެމައްސަލައެއް ށަރީއަތަށް ހުށަހެޅުމުގެ ހައްގު އެފަރާތަަކަށް ލިބިގެންވެއެވެ. އެމައްސަލައިގައި އެފަރާތުން ހުށަހަޅާ އަގަކީ ސައްހަ އަގެއްކަން ށަރީއަތަށް ސާބިތުވެއްޖެނަމަ، ޑިއުޓީއަށް އިތުރަށް ދައްކާފައިވާ ފައިސާ، ދިވެހި ސަރުކާރުން އެމުދަލުގެ ވެރިފަރާތަށް އަނބުރާ ދޭންވާނެއެވެ. 

 

10 ވަނަ މާއްދާ - 

މި ގާނޫނުގެ 9 ވަނަ މާއްދާގައިވާ ގޮތުން ޑިއުޓީ ދައްކާނެ އަގެއް، ދިވެހި ސަރުކާރުން ކަނޑައަޅަންޖެހޭ މައްސަލަތަކުގައި އެމުދަލެއް އިމްޕޯޓްކުރާ ނުވަތަ އެކްސްޕޯޓްކުރާ ފަރާތުން ކަނޑައެޅިގެން އޮޅުވާލުމަށް މަސައްކަތް ކޮށްފައިވާކަން ސާބިތު ނުވާނަމަ، އެއީ މިގާނޫނާ ހިލާފުވި ކަމަކަށް ނުބެލެވޭނެއެވެ. 

 

11 ވަނަ މާއްދާ - 

(ހ) މުދާ އިމްޕޯޓް ކުރުމުގައި އޮޅުވާލައިގެން ދަށް އަގެއް ހުށަހަޅައިވިނަމަ، ފުރަތަމަފަހަރު އެކަމުގައި ހިމެނޭ މުދަލުގެ ހަމަ އަގުގެ ދެގުނައަށްވުރެ ބޮޑުނޫން އަދަދަކުން އެކުށްކުރ ފަރާތް ޖޫރިމަނާ ކުރުމާއި، އެއްފަހަރަށްވުރެ ގިނަފަހަރަށް މިކުށް ކޮށްފިނަމަ، އެކަމުގައި ހިމެނޭ މުދަލުގެ ހަމަ އަގުގެ ދެގުނައަށްވުރެ ބޮޑުނޫން އަދަދަކުން އެކުށްކުރި ފަރާތް ޖޫރިމަނާ ކުރުމާއެކު، 2 އަހަރަށްވުރެ ދިގުނޫން މުއްދަތަކަށް އެފަރާތަކުން އިމްޕޯޓް ކުރުން ބަންދު ކުރުމުގެ އިހްތިޔާރު ދިވެހި ސަރުކާރަށް ލިބިގެންވެއެވެ. 

(ށ) މުދާ އެކްސްޕޯޓް ކުރުމުގައި އޮޅުވާލައިގެން ދަށް އަގެއް ހުށަހަޅައިފިނަމަ، ފުރަތަމަފަހަރު އެކަމުގައި ހިމެނޭ މުދަލުގެ ހަމަ އަގުގެ ދެގުނައަށްވުރެ ބޮޑުނޫން އަދަދަކުން އެކުށްކުރި ފަރާތް ޖޫރިމަނާ ކުރުމާއި، އެއްފަހަރަށްވުރެ ގިނަފަހަރަށް މިކުށް ކޮށްފިނަމަ، އެކަމުގައި ހިމެނޭ މުދަލުގެ ހަމަ އަގުގެ ދެގުނައަށްވުރެ ބޮޑުނޫން އަދަދަކުން އެކުށްކުރި ފަރާތް ޖޫރިމަނާ ކުރުމާއެކު، 2 އަހަރަށްވުރެ ދިގުނޫން މުއްދަތަކަށް އެފަރާތަކުން އެކްސްޕޯޓް ކުރުން ބަންދު ކުރުމުގެ އިހްތިޔާރު ދިވެހި ސަރުކާރަށް ލިބިގެންވެއެވެ. 

(ނ) މުދާ އިމްޕޯޓް ކުރުމާއި އެކްސްޕޯޓް ކުރުމުގެ އަގުތައް ހުށަހެޅުމުގައި އޮޅުވާލައިގެން ދަށް އަގެއް ހުށަހެޅުމުގެ ކުށް ފަިޔވައ މިގާނޫނުގެ އެހެން މާއްދާއަކާ ހިލާފުވެއްޖެނަމަ އެކަމުގައި ހިމެނޭ މުދަލެއްގެ ހަމަ އަގުގެ ދެގުނައަަށްވުރެ ބޮޑުނޫން އަދަދަކުން އެކުށްކުރި ފަރާތް ޖޫރިނަމާ ކުރެވޭނެއެވެ. އަދި މިފަދަ އަމަލެއް ކުރަން އުޅެފިކަން އެނގިޖެއްނަމަ އެކަމެއް ހިންގަން ބޭނުންކުރި ނުވަތަ ބޭނުންކުރަން އުޅުނު މުދަލުގެ ހަމައަގަށްވުރެ ބޮޑުނޫން އަދަދަކުން އެ އަމަލެއް ހިންގަން އުޅުނު ފަރާތް ޖޫރިމަނާ ކުރެވޭނެއެވެ. 

(ރ) މިމާއްދާގައި ބުނެފައިވާ ގޮތުން ކުރެވޭ ޖޫރިމަނާއަކާމެދު، ޖޫރިމަނާ ކުރެވުނު ފަރާތުން ގަބޫލު ނުކުރާ މައްސަލައެއް އޮވެއްޖެނަމަ އެޖޫރިމަނާއެއް ދެއްކުމަށްފަހު އެމައްސަލައެއް ށަރީއަތަށް ހުށަހެޅުމުގެ ހައްގު އެފަރާތަކަށް ލިބިގެންވެއެވެ. އެމައްސަލައިގައި އެފަރާތް ގާނޫނާ ހިލާފުނުވާކަމަށް ށަރީއަތުން ނިންމައިފިނަމަ މިގޮތުން ދެއްކި ޖޫރިމަނާ ސަރުކާރުން އެފަރާތަކަށް އަނބުރާ ދޭންވާނެއެވެ. 

 

12 ވަނަ މާއްދާ - 

މިގާނޫނުގައި:-

(ހ) ރީއެސްޕޯޓް ކުރުމަކީ، ގަވާއިދުން ދިވެހި ރާއްޖެއަށް އިމްޕޯޓް ކުރެވިފައިވާ ތަކެތި، އެތަކެތީގެ ޒާތަށް ބަދަލު ނުގެނެސް ދިވެހި ރާއްޖެއިން ބޭރަށް ގަވާއިދުން ގެންދިއުމެވެ. 

(ށ) އެފް.އޯ.ބީ. އަގަކީ ތަކެތީގެ އަގާއި، ބަނދަރުގައި، ނުވަތަ ވައިގެ ބަނދަރުގައި އޮތް އުޅަނދަކަށް އެތަކެތި އެރުވުމާހަމައަށް ހިނގި ހަރަދެވެ. މިހަރަދުގެ ތެރޭގައި ނާލާއި އިންށުއަރެންސެއް ނުހިމެނެއެވެ. 

(ނ) ސީ.އައި.އެފް. އަގަކީ، ތަކެތީގެ އަގާއި، އިންށުއަރެންސާއި، ނާލާއެކު އެއެއްޗަކަށްޖެހޭ އަގެވެ. 

(ރ) ސީ.އެންޑް.އެފް. އަގަކީ، ތަކެތީގެ އަގާއި، ނާލާއެކު އެއެއްޗަކަށްޖެހޭ އަގެވެ. 

 

 

މައި ގާނޫނު

ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނު (ގާނޫނު ނަންބަރު 1979-31)