ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނު (ގާނޫނު ނަންބަރު 1979-31) އަށް 7 ވަނަ އިސްލާހު ގެނައުމުގެ ގާނޫނު

(މި ގާނޫނަށް އަމަލުކުރަން ފެށީ 24 ޖޫން 1996 ގައި)

ގާނޫނު ނަންބަރު 1979-31 (ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނު) އަށް ތިރީގައިމިވާ އިސްލާހުތައް ގެނައުން. 

1 ވަނަ މާޢްދާ - 

ބުނެވެދިޔަ ގާނޫނުގެ 5 ވަނަ މާއްދާއަށް ތިރީގައިމިވާގޮތަށް (ބ) އެއް އިތުރުކުރުން.

(ބ) ރީ އެކްސްޕޯޓް ވިޔަފާރި ކުރިއެރުމަށްޓަކައި ރާއްޖޭއަށް އިމްޕޯޓްކުރާ ތަކެތި.

2 ވަނަ މާއްދާ -

ބުނެވިދިޔަ ގާނޫނުގެ 11 ވަނަ މާއްދާގެ ފަހަތަށް ތިރީގައިމިވާ މާއްދާ އިތުރުކޮށް، މިމާއްދާއަކީ އެ ގާނޫނުގެ 12 ވަނަ މާއްދާކަމަށް ހަމަޖެއްސުން. 

(ހ) މިގާނޫނުގައިވާ ގޮތުގެމަތިން ދިވެހިރާއްޖޭއަށް އިމްޕޯޓް ކުރުމުގެ ހުއްދަ ދީފައިނުވާ އެއްޗެއް ދިވެހިރާއްޖެއަށް ސިއްރުން އެތެރެކުރުމާއި، އެކްސްޕޯޓްކުރުމުގެ ހުއްދަ ދީފައިނުވާ އެއްޗެއް ދިވެހިރާއްޖެއިން ސިއރުން ބޭރުކުރުމާއި، ޑިއުޓީ ދައްކަންޖެހޭ އެއްވެސް މުދަލެއް އެމުދަލަކަށް ދައްކަންޖެހޭ ޑިއުޓީއެއް ދެއްކުމުން މަނާވެގަތުމަށްޓަކައި ދިވެހިރާއްޖެއަށް ސިއްރުން އެތެރކުރުމާއި، ދިވެހިރާއްޖެއިން ސިއްރުން ބޭރުކުރުމާއި، މިއިންކަމެއް ކުރަންއުޅުމަކީ ކުށެކެވެ. 

(ށ) ދިވެހިރާއްޖެއިން ސިއްރުން މުދާ އެތެރެކުރުން ކަމަަށް ބެލޭނީ، މުދަލެއް ދިވެހިރާއްޖެއަށް ގެނައުމާއެކު، މުދަލެއް ބޭލުމަށް ކަސްޓަމްސުން ކަނޑައަޅާ ސަރަހައްދުނޫން ތަނަކަށް އެމުދަލެއް ބޭލުމަށް، ނުވަތަ ދިވެހިރާއްޖެއަށް ގެންނަ މުދާ ބަހައްޓަން ކަސްޓަމްސަށް ނާންގައި، ނުވަތަ ކަސްޓަމްސުން ހުއްދަ ނުހޯދައި، އެ ސަރަހައްުން މުދާ ބޭރަށް ގެންދިުމަށް، ނުވަތަ ދައްކަންޖެހޭ ޑިއުޓީއެއް ނުދައްކައި ރާޢްޖެއަށް މުދާ އެތެރެކުރުމަށެވެ. 

(ނ) ދިވެހިރާއްޖެއިން ސިއްރުން މުދާ ބޭރުކުރުން ކަމަށް ބެލޭނީ، ކަސްޓަމްސަށް ނާންގައި، ނުވަތަ ކަސްޓަމްސުގެ ހުއްދަ ނުހޯދއި، ދިވެހިރާއްޖެއިން މުދާ ބޭރުކުރުމަށް، ނުވަތަ ދިވެހިރާއްޖެއިން ބޭރުކުރާ މުދާ ބަހައްޓަން ކަސްޓަމްސުން ކަނޑައަޅާފައިވާ ސަރަހައްދެއްގައި މުދާހުއްޓާ ކަސްޓަމްސަށް ނާންގައި، ނުވަތަ ކަސްޓަމްސުން ހުއްދަ ނުހޯދައި، އެސަރަހައްދުން ބޭރަށް ގެންދިއުމަށް ނުވަތަ ފޮނުވުމަށް، ނުވަތަ ދައްކަންޖެހެ ޑިއުޓީއެއް ނުދައްކައި، ރާޢްޖެއިން ބޭރަށް މުދާ ގެންދިއުމަށް ނުވަތަ ފޮނުވުމަށެވެ. 

3 ވަނަ މާޢްދާ - 

ބުނެވިދިޔަ ގާނޫނުގެ 12 ވަނަ މާއްދާއަކީ އެ ގާނޫނުގެ 13 ވަނަ މާއްދާކަމަށް ހަމަޖައްސައި، 12 ވަނަ މާއްދާގައި މިހާރުއޮތް (ހ) އާއި (ށ) އަކީ 13 ވަނަ މާއްދާގެ (ބ) އާއި (ޅ) ކަމަށް ހަމަޖައްސައި، 12 ވަނަ މާއްދާގައި މިހާރުއޮތް (ނ) އާއި (ރ) އުނިކޮށް، 13 ވަނަ މާއްދާގެ (ހ) (ށ) (ނ) (ރ) (ކ) (އ) ތިރީގައި މިވާގޮތަށް އޮތުން. 

(13)

(ހ) މިގާނޫނުގެ 12 ވަނަ މާއްދާގެ (ހ) ގައި ބަޔާންކޮށްފައިވާ ކުށެއް ކޮށްފިނަމަ، ނުވަތަ އެފަދަ ކުށެއް ކުރަންއުޅެފިނަމަ، މިގާނޫނުގެ ދަށުން ކަނޑައެޅޭ އަދަބު ދިނުމާއެކު، އެކަމެއްގައި ހިމެނޭ މުދާ، ބަދަލު ދިނުމަކާނުލައި އަތުލެވޭނެއެވެ. އަދި ސިއްތުން މުދާ އެތެރެކޮށްގެން ނުވަތަ ބޭރުކޮށްގެން އެއްވެސް މުދަލެއް ނުވަތަ ފައިސާއެއް ހޯދާފައިވާނަމަ، މިގާނޫނުގެ ދަށުން ކަނޑައެޅޭ އަދަބު ދިނުމާއެކު، އެމުދަލެއް ނުވަތަ ފައިސާއެއް އަތުލެވޭނެއެވެ. 

(ށ) ދިވެހިރާއްޖެއަށް ސިއްރުން މުދާ އެތެރކޮށްފި މީހެއްގެ ނުވަތަ ދިވެހިރާޢްޖެއިން ސިއްރުން މުދާ ބޭރުކޮށްފި މީހެއްގެ އަދަބަކީ، 6 މަސްދުވަހާއި 2 އަހަރާ ދެމެދުގެ މުއްދަތަކަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުމެވެ. 

(ނ) ދިވެހިރާއްޖެއަށް ސިއްރުން މުދާ އެތެރެކުރަން ނުވަތަ ދިވެހިރާއްޖެއިން ސިއްރުން މުދާ ބޭރުކުރަން އުޅެފިމީހެއްގެ އަދަބަކީ، 4 މަސްދުވަހާއި، 1/2 1 އަހަރާ ދމެދުގެ މުއްދަތަކަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުން، ނުވަތަ 10،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. 

(ރ) މި ގާނޫނުގެ 12 ވަނަ މާއްދާގެ (ހ) ގައިވާ ކުށް ތަކުރާރުކޮށްފި ނަމަ، މިގާނޫނުގެ ދަށުން ކަނޑައެޅޭ އަދަބުގެ ތެރެއަށް، ކުށް ތަކުރާރުކުރި ކޮންމެ ފަހަރަކަށް 1 އަހަރަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުން، އިތުރުކުރެވޭނެއެވެ. 

(ކ) މިގާނޫނުގައި އަދަބު ކަނޑައެޅިފައިވާ ކުށްތައް ފިޔަވައި މިގާނޫނުގެ އެހެން މާއްދާއަކާ ހިލާފު ވެއްޖެނަމަ، އެކަމުގައި ހިމެނޭ މުދަލެއްގެ ހަމައަަގުގެ ދެގުނައަށްވުރެ ބޮޑުނޫން އަދަދަކުން އެކުށްކުރި ފަރާތް ޖޫރިމަނާ ކުރެވޭނެއެވެ. އަދި މިފަދަ އަމަލެއް ކުރަން އުޅެފިކަން އެނގިއްޖެނަމަ، އެކަމެއް ހިނގަން ބޭނުންކުރި ނުވަތަ ބޭނުންކުރަން އުޅުނު މުދަލުގެ ހަމައަގަށްވުރެ ބޮޑުނޫން އަދަދަކުން އެއަމަލެއް ހިންގަން އުޅުނު ފަރާތް ޖޫރިމަނާ ކުރެވޭނެއެވެ. 

(އ) މިމާއްދާގެ (ބ) (ޅ) (ކ) ގައިވާގޮތުން ކުރެވޭ ޖޫރިމަނާއަކާމެދު ޖޫރިމަނާ ކުރެވުނު ފަރާތުން ގަބޫލު ނުކުރާ މައްސަލައެއް އޮވެއްޖެނަމަ، އެޖޫރިމަނާއެއް ދެއްކުމަށްފަހު، އެމައްސަލައެއް ށަރީއަތަށް ހުށަހެޅުމުގެ ހައްގު އެފަރާތަކަށް ލިބިގެންވެއެވެ. އެމައްސލައިގައި އެފަރާތް ގާނޫނާ ހިލާފު ނުވާކަމަށް ށަރީއަތުން ނިންފައިފިނަމަ، އެފަރާތުން ދައްކާފައިވާ ޖޫރިމަނާ ސަރުކާރުން އެފަރާތަކަށް އަނބުރާ ދޭންވާނެއެވެ. 

4 ވަނަ މާޢްދާ - 

ބުނެވިދިޔަ ގާނޫނުގެ 13 ވަނަ މާޢްދާއަކީ، އެގާނޫނުގެ 14 ވަނަ މާއްދާކަމުގައި ހަމަޖެއްސުން. 

މައި ގާނޫނު

ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނު (ގާނޫނު ނަންބަރު 1979-31)