މުދަލާއި ހިދުމަތުގެ އަގުން ނެގޭ ޓެކްސް: މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނާއި ގަވާއިދު (ނަންބަރު 2015-30) އަށް 1 ވަނަ އިސްލާހު ގެނައުމުގެ ރޫލިންގއ
(ޓެކްސް ރޫލިންގ ނަންބަރު 2024-50)
(މި ގަވާއިދަށް އަމަލުކުރަން ފެށީ 26 އޮގަސްޓު 2024 ގައި)
1 ވަނަ މާއްދާ - ތައާރަފު
މި ރޫލިންގގެ މަގުސަދަކީ، ޓެކްސް ރޫލިންގ 2015-30 ގެ 8 ވަނަ ޕެރެގްރާފާއި 10 ވަނަ ޕެރެގްރާފް އިސްލާހުކުރުމެވެ.
2 ވަނަ މާއްދާ - ރޫލިންގ
ރޫލިންގގެ 8 ވަނަ ޕެރެގްރާފް އަންނަނިވި ގޮތަށް އިސްލާހުކުރުން.
ގަވާއިދުގެ 109 ވަނަ މާއްދާގައި ވަނީ:
ޖީ.އެސް.ޓީ ހިމަނައިގެން އަގު ޖެހުން.
(ހ) ރަޖިސްޓަރ ކޮށްފައިވާ ފަރާތަކުން ފޯރުވައިދޭ މުދަލާއި ހިދުމަތުގެ އަގު، މުދަލާއި ހިދުމަތް ލިބިގަންނަ ފަރާތްތަކަށް ފެންނާނޭހެން ޖަހައިފައި ހުންނަންވާނެއެވެ. އަދި މި މާއްދާގެ (ށ) އަދި (ނ) ގައި ބަޔާންކޮށްފައިވާ ހާލަތުތައް ފިޔަވައި އެހެން ހާލަތުތަކުގައި އަގު ޖަހައިފައި ހުންނަންވާނީ އެ މުދަލުން ނުވަތަ ހިދުމަތުން ޖީ.އެސް.ޓީ ގެ ގޮތުގައި ނެގޭ އަދަދު ހިމަނައިގެންނެވެ.
(ށ) ރަޖިސްޓަރ ކޮށްފައިވާ ފަރާތަކުން ފޯރުވައިދޭ މުދަލާއި ހިދުމަތް ފޯރުވައިދިނުމަށް ސަރވިސް ޗާޖެއް ނަގާނަމަ، ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައި މުދަލުގެ ނުވަތަ ހިދުމަތުގެ އަގު ޖަހައިފައި ބެހެއްޓިދާނެއެވެ. އަދި މި ގޮތަށް އަގު ޖަހާނަމަ، އަގު ޖަހައިފައި ހުންނަންވާނީ މުދަލާއި ހިދުމަތް ލިބިގަންނަ ފަރާތްތަކުން މުދާ ނުވަތަ ހިދުމަތް ލިބިގަތުމަށް އެ ފަރާތަށް ދައްކަންޖެހޭ ފައިސާގެ ޖުމުލަ އަދަދު ހިސާބުކުރެވޭނެފަދަ ގޮތަކަށެވެ. މި އަކުރަށް އަމަލުކުރާނީ މި މާއްދާގެ (ނ) އާ ހިލާފުނުވާނެ ގޮތުގެ މަތިންނެވެ.
(ނ) ޓެލެކޮމިއުނިކޭށަން ހިދުމަތްދޭ ފަރާތްތަކާއި، ޓެލެކޮމިއުނިކޭށަން ހިދުމަތްދޭ ފަރާތްތަކުގެ އޭޖެންޓުންނާއި، ޓެލެކޮމިއުނިކޭށަން ހިދުމަތްތައް ގަނެ ވިއްކާ ފަރާތްތަކުން ފޯރުވައިދޭ ޓެލެކޮމިއުނިކޭށަން ހިދުމަތުގެ އަގު ޖަހައިފައި ހުންނަންވާނީ ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައެވެ. އެ ފަދަ ފަރާތްތަކުން ފޯރުވައިދޭ ޓެލެކޮމިއުނިކޭށަން ހިދުމަތުގައި އަގު ޖަހައިފައި ހުންނަންވާނީ ހިދުމަތް ލިބިގަންނަ ފަރާތްތަކުން ހިދުމަތް ލިބިގަތުމަށް އެ ފަރާތަށް ދައްކަންޖެހޭ ފައިސާގެ ޖުމުލަ އަދަދު ހިސާބުކުރެވޭނެފަދަ ގޮތަކަށެވެ.
(ރ) މި މާއްދާގެ (ނ) ގައި ބަޔާންކޮށްފައިވާ ފަރާތްތަކުން ފޯރުވައިދޭ ޓެލެކޮމިއުނިކޭށަން ހިދުމަތުގައި އަގު ޖަހަނީ ޖީ.އެސް.ޓީ ގެ ގޮތުގައި ނެގޭ އަދަދު ނުހިމަނައި ކަން ބަޔާންކުރާ ނޯޓިސްއެއް، އެ ފަރާތްތަކުގެ ޓެކްސް ނެގޭ ހަރަކާތްތައް ހިންގާ ތަންތަނުގައި ބަހައްޓަންވާނެއެވެ.
(ބ) (އުވައިލެވިފައި).
3 ވަނަ މާއްދާ - ރޫލިންގގެ 10 ވަނަ ޕެރެގްރާފުގެ (ބ) އަންނަނިވި ގޮތަށް އިސްލާހުކުރުން.
(ބ) މުދަލުގެ ނުވަތަ ހިދުމަތުގެ ޖީ.އެސް.ޓީ. ކްލެސިފިކޭށަން އެނގޭނޭހެން އާމްދަނީ ބެލެހެއްޓުން (އެ މުދަލަކީ ނުވަތަ ހިދުމަތަކ ޖީ.އެސް.ޓީ ނެގުމުން އިސްތިސްނާކުރެވިފައިވާ، ނުވަތަ ޖީ.އެސް.ޓީ ގާނޫނުގެ ހުދޫދުގެ ތެރޭގައި ނުހިމެނޭ، ނުވަތަ ސުން-ރޭޓުގައި ޖީ.އެސް.ޓީ ނެގ،ޭ ނުވަތަ %8 ނުވަތަ %16 ގައި ޖީ.އެސް.ޓީ ނެގޭ މުދަލެއް ނުވަތަ ހިދުމަތެއްކަން އެނގޭނޭހެން އާމްދަނީ ބެލެހެއްޓުން)؛
4 ވަނަ މާއްދާ - އަމަލުކުރަން ފެށުން
މި ރޫލިންގއަށް އަމަލުކުރަން ފަށާނީ، މި ރޫލިންގ، ދިވެހި ސަރުކާރުގެ ގެޒެޓުގައި ށާއިއުކުރާ ތާރީހުން ފެށިގެންނެވެ.
ކިޔުންތެރިންގެ ހިޔާލު