ގަވާއިދު ނަންބަރު 41/2011 ކަސްޓަމްސްގެ އާންމު ގަވާއިދު 2011 އަށް 3 ވަނަ އިސްލާހު ގެނައުން
(ގަވާއިދު ނަންބަރު 423/2014)
1 ވަނަ މާއްދާ - ބުނެވިދިޔަ ގަވާއިދުގެ 57 ވަނަ މާއްދާގެ (ށ) ތިރީގައިއެވާ ގޮތަށް އިސްލާހުކުރުން
57. އުޅަނދުފަހަރަށް އިންވާރޑް ކްލިއަރެންސް ދެވޭނެ ބަނދަރުތައް
(ށ) މި މާއްދާގެ (ހ) ގައި އެހެން އޮތް ކަމުގައިވީ ނަމަވެސް ރަސްމީ ބަނދަރުތައް ފިޔަވައި އެހެން ތަންތަނަށް މުދާ އަރުވައި ބޭލުމަށް އުޅަނދުފަހަރު ދިއުމުގެ ހުއްދަ ދެވޭ ހާލަތްތަކުގައި އެ ތަންތަނުން އިންވާރޑް ކްލިއަރެންސް ދެވިދާނެއެވެ.
2 ވަނަ މާއްދާ - ބުނެވިދިޔަ ގަވާއިދުގެ 70 ވަނަ މާއްދާގެ (ށ) ތިރީގައިއެވާ ގޮތަށް އިސްލާހުކުރުން.
70. އުޅަނދުފަހަރަށް އައުޓްވާރޑް ކްލިއަރެންސް ދެވޭނެ ބަނދަރުތައް
(ށ) މިމާއްދާގެ (ޙ) ގައި އެހެން އޮތް ކަމުގައިވީ ނަމަވެސް ރަސްމީ ބަނދަރުތައް ފިޔަވައި އެހެން ތަންތަނަށް މުދާ އަރުވައި ބޭލުމަށް އުޅަނދުފަހަރު ދިއުމުގެ ހުއްދަ ދެވޭ ހާލަތްތަކުގައި އެ ތަންތަނުން އައުޓްވާރޑް ކްލިއަރެންސް ދެވިދާނެއެވެ.
3 ވަނަ މާއްދާ - ބުނެވިދިޔަ ގަވާއިދުގެ 74 ވަނަ މާއްދާގެ (އ) ގެ ފަހަތަށް (ވ) ގެ ގޮތުގައި އަންނަނިވި މާއްދާ އިތުރުކުރުމަށްފަހު އޭގެ ފަހަތަށް ހުރި އަކުރުތައް ތަރުތީބުކުރުން.
74. ހުއްދަކުރާ ހާލަތްތައް
(ވ) ސަރުކާރުން ކަނޑައަޅާ ސިޔާސަތެއް ތަންފީޡުކުރުމުގެ ގޮތުން، ކަސްޓަމްސްއިން ކަނޑައަޅާ އުސޫލަކާ އެއްގޮތަށް، ރަސްމީ ބަނދަރުތައް ފިޔަވައި އެހެން ތަންތަނަށް މުދާ އަރުވައި ބޭލުމަށް އުޅަނދުފަހަރު ދިއުމުގެ ހުއްދަ ދިނުމުގެ އިހުތިޔާރު ކަސްޓަމްސްއަށް ލިބިގެންވެއެވެ.
4 ވަނަ މާއްދާ - ބުނެވިދިޔަ ގަވާއިދުގެ 82 ވަނަ މާއްދާގެ (ހ) ތިރީގައިއެވާ ގޮތަށް އިސްލާހުކުރުމަށްފަހު، އެ މާއްދާގެ (ށ) ގެ ގޮތުގައި އަކުރެއް އިތުރުކުރުމަށްފަހު ދެންހުރި އަކުރުތައް ތަރުތީބުކުރުމަށް.
82. ރަސްމީ ބަނދަރުތައް ފިޔަވައި އެހެން ތަންތަނަށް މުދާ އަރުވައި ބޭލުމުގެ ފީ
(ހ) ރާއްޖެއިން ބޭރުން ރާއްޖެއަށް ކަނޑުމަގުން ގެންނަ މުދަލުގެ ތެރެއިން ރަސްމީ ނަދަރުތައް ފިޔަވައި އެހެން ތަންތަނަށް މުދާ ބޭލުމަށް އުޅަނދުފަހަރު ދިއުމުގެ ހުއްދަ ދެވޭނީ މިގަވާއިދުގެ ޖަދުވަލު 36 ގެ 11 ވަނަ ނަންބަރުގައި ބަޔާންކޮށްފައިވާ ފީ ކްސްޓަމްސްއަށް ދެއްކުމުންނެވެ.
(ށ) ރާއްޖެއިން ބޭރުން ރާއްޖެއަށް ކަނޑުމަގުން ގެންނަ މުދަލުގެ ތެރެއިން ރަސްމީ ބަނދަރުތައް ފިޔަވައި އެހެން ތަންތަނަށް މުދާ އަރުވައި ބޭލުމުގެ ކަންތައް ބެލެހެއްޓުމަށް ކަސްޓަމްސް އޮފިސަރުން ފޮނުވޭނީ މިގަވާއިދުގެ ޖަދުވަލު 36 ގެ 12 ވަނަ ނަންބަރުގައި ބަޔާންކޮށްފައިވާ ފީ ކަސްޓަމްސްއަށް ދެއްކުމުންނެވެ.
5 ވަނަ މާއްދާ - ބުނެވިދިޔަ ގަވާއިދުގެ ޖަދުވަލު 36 ގެ 11 ވަނަ ނަންބަރު ތިރީގައިއެވާ ގޮތަށް އިސްލާހުކުރުން.
(އިސްލާހުކުރެވިފައިވާ ޖަދުވަލު 36 ގެ 11 ވަނަ ނަންބަރުގެ ޓޭބަލް އެޓޭޗްކުރެވިފައިވާ މިގަވާއިދުގެ ޕީ.ޑީ.އެފް ފައިލްގައި ހިމެނިފައިވާނެއެވެ. އަދި މި ޓޭބަލްގެ ވާރޑް ޑޮކިއުމަންޓް ނިމުމުން އަޕްލޯޑް ކުރެވިގެންދާނެއެވެ.)
6 ވަނަ މާއްދާ - ބުނެވިދިޔަ ގަވާއިދުގެ ޖަދުވަލު 36 ގެ 12 އަދި 13 ވަނަ ނަންބަރުގެ ގޮތުގައި ތިރީގައިވާ ފަދައިން ދެ ނަންބަރު އިތުރުކޮށް، ފަހަތަށް އަންނަ ނަންބަރުތައް ތަރުތީބުކުރުން.
(ތަރުތީބުކުރެވިފައިވާ ޖަދުވަލު 36 ގެ ޓޭބަލް އެޓޭޗްކުރެވިފައިވާ މިގަވާއިދުގެ ޕީ.ޑީ.އެފް ފައިލްގައި ހިމެނިފައިވާނެއެވެ. އަދި މި ޓޭބަލްގެ ވާރޑް ޑޮކިއުމަންޓް ނިމުމުން އަޕްލޯޑް ކުރެވިގެންދާނެއެވެ.)
7 ވަނަ މާއްދާ - މިގަވާއިދަށް އަމަލު ކުރަންފަށާނީ، މިގަވާއިދު ދިވެހިސަރުކާރުގެ ގެޒެޓުގައި ށާއިއުކުރާ ދުވަހުން ފެށިގެންނެވެ.
ކިޔުންތެރިންގެ ހިޔާލު