ދިވެހިރާއްޖެއަށް ވައިގެމަގުން އަންނަ އުޅަނދުފަހަރާއި، ވައިގެމަގުން ފުރާ އުޅަނދުފަހަރާއި، އެ އުޅަނދުފަހަރުގައި ދަތުރުކުރާ މީހުންގެ މައުލޫމާތު މޯލްޑިވްސް އިމިގްރޭށަނަށް ފޯރުކޮށްދިނުމުގެ ގަވާއިދު

(މި ގަވާއިދަށް އަމަލުކުރަން ފެށީ 25 ސެޕްޓެމްބަރު 2026 ގައި)

1 ވަނަ މާއްދާ - ތައާރުފާއި ނަން

(ހ) މިއީ ދިވެހިރާއްޖެއަށް ވައިގެމަގުން އަންނަ އުޅަނދުފަހަރާއި، ވައިގެމަގުން ފުރާ އުޅަނދުފަހަރާއި، އެ އުޅަނދުފަހަރުގައި ދަތުރުކުރާ މީހުންގެ މައުލޫމާތު، އެ މީހުން ރާއްޖެއަށް އައުމުގެ ކުރިން ނުވަތަ ރާއްޖެއިން ފުރުމުގެ ކުރިން މޯލްޑިވްސް އިމިގްރޭށަނަށް ފޯރުކޮށްދިނުމާ ގުޅޭ އުސޫލުތައް ކަނޑައެޅުމަށްޓަކައި، ގާނޫނު ނަންބަރު 2025-07 (ދިވެހިރާއްޖޭގެ އިމިގްރޭށަންގެ ގާނޫނު) ގެ 8 ވަނަ މާއްދާ (އެއަށްފަހު 26 ވަނަ މާއްދާ) އާއި، ދިވެހިރާއްޖެއިން ބައިވެރިވެފައިވާ ވައިގެ ދަތުރުފަތުރުގެ މުއާހަދާގެ އެނެކްސް 9 ގެ 9.15 ވަނަ ނަންބަރަށް ރިއާޔަތްކޮށް، އެ ގާނޫނުގެ 35 ވަނަ މާއްދާއިން ބާރުލިބިގެން އެކުލަވައިލައިފައިވާ ގަވާއިދެކެވެ.

(ށ) މި ގަވާއިދަށް ކިޔާނީ، "ދިވެހިރާއްޖެއަށް ވައިގެމަގުން އަންނަ އުޅަނދުފަހަރާއި، ވައިގެމަގުން ފުރާ އުޅަނދުފަހަރާއި، އެ އުޅަނދުފަހަރުގައި ދަތުރުކުރާ މީހުންގެ މައުލޫމާތު މޯލްޑިވްސް އިމިގްރޭށަނަށް ފޯރުކޮށްދިނުމުގެ ގަވާއިދު" އެވެ.

2 ވަނަ މާއްދާ - މަގްސަދު

 ގަވާއިދުގެ މައިގަނޑު މަގްސަދުތައް، ތިރީގައި މިވަނީއެވެ.
(ހ) ދިވެހިރާއްޖޭގެ ސަލާމަތާއި ރައްކައުތެރިކަން ކަށަވަރުކުރުމަށްޓަކައި، ދިވެހިރާއްޖެއަށް އަންނަ އުޅަނދެއްގައި ތިބި މީހުންނާއި، ދިވެހިރާއްޖެއިން ފުރާ އުޅަނދެއްގައި ތިބި މީހުންގެ މައުލޫމާތު، އެ ފަރާތްތައް ރާއްޖެއަށް އައުމުގެ ކުރިން ނުވަތަ ރާއްޖެއިން ފުރުމުގެ ކުރިން މޯލްޑިވްސް އިމިގްރޭށަނަށް ހުށަހަޅާނެ އިޖުރާތުތައް ކަނޑައެޅުން.

(ށ) ބިދޭސީންގެ ތެރެއިން، ނުރައްކާތެރި ކުށްކުށާއި އިންތިޒާމުވެގެން ކުރާ ބޮޑެތި ކުށްތަކުގައި ށާމިލުވާ މީހުންނާއި ޓެރަރިސްޓް ޖަމާއަތްތަކަށް ނިސްބަތްވާ މީހުންނާއި އެފަދަ ޖަމާއަތްތަކާ ގުޅުންހުރިކަމަށް ބެލެވޭ މީހުންނާއި، ޓެރަރިސްޓުންކަމަށް މައުލޫމާތު ލިބިފައިވާ މީހުން ރާއްޖެ އެތެރެވުމުގެ ކުރިން ދުރާލައި ދެނެގަތުމަށް މަގުފަހިވާނެ އިންތިޒާމެއް ހަމަޖެއްސުން.

(ނ) ދިވެހިރާއްޖެއިން ބައިވެރިވެފައިވާ ވައިގެ ދަތުރުފަތުރުގެ މުއާހަދާއާއި، އ.ދ ގެ ސެކިއުރިޓީ ކައުންސިލުގެ ނަންބަރު 2178(2014) ގެ ގަރާރާއި، 2396(2017) ގެ ގަރާރާއި، 2482(2019) ގެ ގަރާރު ހިމެނޭގޮތުން، އ.ދ ގެ ގަރާރުތަކުގައި ބަޔާންކޮށްފައިވާ ކަންކަން ތަންފީޒުކުރުމަށް މަގުފަހިކުރުން.

3 ވަނަ މާއްދާ - ހިންގޭނެ ދާއިރާ

މި ގަވާއިދު ހިނގާނީ، ދިވެހިރާއްޖެއަށް ވައިގެމަގުން އަންނަ އުޅަނދުފަހަރުގެ މައްޗަށާއި، ވައިގެމަގުން ރާއްޖެއިން ފުރާ އުޅަނދުފަހަރުގެ މައްޗަށާއި، އެފަދަ އުޅަނދެއްގެ މިލްކުވެރިކަން ލިބިފައިވާ ފަރާތްތަކާއި، އެފަދަ އުޅަނދެއް ޗާޓަރުކޮށްފައިވާ ފަރާތްތަކާއި، އެފަދަ އުޅަނދެއްގެ އޭޖެންޓުކަން ކުރާ ފަރާތްތަކާއި، އެފަދަ އުޅަނދެއްގެ ކެޕްޓަނުންނާއި، އަދި މިނޫންވެސް އެފަދަ އުޅަނދެއްގެ މައްޗަށް ޒިންމާވާ އެންމެހައި ފަރާތްތަކުގެ މައްޗަށެވެ.

4 ވަނަ މާއްދާ - ފޯރުކޮށްދޭންޖެހޭ މައުލޫމާތާއި، ނހުށަހަޅަންޖެހޭ ވަގުތު

(ހ) މި ގަވާއިދުގެ ޖަދުވަލު 1 ގެ 2.5 ވަނަ ނަންބަރާއި 2.6 ވަނަ ނަންބަރުގައި ބަޔާންކޮށްފައިވާ ވަގުތުގެ ތެރޭގައި، ދިވެހިރާއްޖެއަށް އަންނަ އުޅަނދެއްގައި ތިބި މީހުންނާއި، ދިވެހިރާއްޖެއިން ފުރާ އުޅަނދެއްގައި ތިބި މީހުންގެ މައުލޫމާތު، އެ ފަރާތްތައް ރާއްޖެއަށް އައުމުގެ ކުރިން ނުވަތަ ފުރުމުގެ ކުރިން، ކޮންމެ އުޅަނދަކުންވެސް މޯލްޑިވްސް އިމިގްރޭށަނަށް ފޯރުކޮށްދޭންވާނެއެވެ.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ދިމާވެދާނެ ހާއްސަ ހާލަތަކަށް ރިއާޔަތްކޮށް ބޭނުންވެއްޖެ ހިނދެއްގައި، މި ގަވާއިދުގައި ބަޔާންކޮށްފައިވާ މައުލޫމާތަށްވުރެ އިތުރު މައުލޫމާތު ހޯދުމަށް އަދި/ނުވަތަ ވަކި މައުލޫމާތެއް ހުށަހަޅަން ނުޖެހޭގޮތަށް ހަމަޖެއްސުމުގެ އިހްތިޔާރު، މޯލްޑިވްސް އިމިގްރޭށަނަށް ލިބިގެންވެއެވެ.

(ނ) ރާއްޖެއަށް އޮޕަރޭޓްކުރާ ފްލައިޓް ފުރާ އެއަރޕޯޓެއް އޮތް ތަނާއި ރާއްޖެއާ ދެމެދު ހުރި ދުރުމިނަށާއި ފްލައިޓަށް ރިއާޔަތްކުރުމަށްފަހު، މި މާއްދާގެ (ހ) ގައި ބަޔާންކޮށްފައިވާ ވަގުތަށް ވުރެ ފަހުގެ ވަގުތެއްގެ ތެރޭގައި، މި ގަވާއިދުގައި ބަޔާންކޮށްފައިވާ މައުލޫމާތު މޯލްޑިވްސް އިމިގްރޭށަނަށް ފޯރުކޮށްދޭގޮތަށް ކަނޑައެޅުމުގެ އިހުތިޔާރު މޯލްޑިވްސް އިމިގްރޭށަނަށް ލިބިގެންވެއެވެ.

(ރ) ދިވެހިރާއްޖެއަށް އަންނަ އުޅަނދެއްގައި ތިބި މީހުންނާއި، ދިވެހިރާއްޖެއިން ފުރާ އުޅަނދެއްގައި ތިބި މީހުންނާ ބެހޭގޮތުން މޯލްޑިވްސް އިމިގްރޭށަނަށް ފޯރުކޮށްދޭންޖެހޭ މައުލޫމާތާގުޅޭ ތަފްސީލު، މި ގަވާއިދުގެ ޖަދުވަލު 1 ގައި ހިމެނިފައިވާނެއެވެ.

(ބ) މި ގަވާއިދުގެ ދަށުން މޯލްޑިވްސް އިމިގްރޭށަނަށް ފޯރުކޮށްދޭންޖެހޭ މައުލޫމާތު ފޯރުކޮށްދިނުމަކީ، އެހެން ގަވާއިދެއްގެ ދަށުން ފޯރުކޮށްދޭންޖެހޭ މައުލޫމާތު ފޯރުކޮށްދޭން ނުޖެހުން ނުވަތަ ހުށަހަޅަންޖެހޭ މައުލޫމާތެއް ހުށަހަޅަން ނުޖެހުންކަމަށް ބަލައިގެންނުވާނެއެވެ.

5 ވަނަ މާއްދާ - ހަރަދަށް ޒިންމާވުން

މި ގަވާއިދުގެ ދަށުން ފޯރުކޮށްދޭންޖެހޭ މައުލޫމާތު ފޯރުކޮށްދިނުމަށްޓަކައި މެދުވެރިޔަކު މެދުވެރިކުރުމަށް، ނުވަތަ ވަސީލަތެއް ބޭނުންކުރުމަށް ހަރަދެއް ކުރަންޖެހޭ ނަމަ އެ ހަރަދެއް ކުރުމަކީ، އެ މައުލޫމާތު ފޯރުކޮށްދޭ ފަރާތުގެ ޒިންމާއެކެވެ.

6 ވަނަ މާއްދާ - މައުލޫމާތު ބޭނުންކުރުން

މި ގަވާއިދުގެ ދަށުން މޯލްޑިވްސް އިމިގްރޭށަނަށް ލިބޭ މައުލޫމާތު ބޭނުންކުރަންވާނީ ގައުމުތަކުގެ ސަލާމަތާއި ރައްކާތެރިކަން ކަށަވަރުކުރުމަށާއި ދިވެހިރާއްޖޭގެ ގާނޫނުތަކާ އެއްގޮތްވާ ގޮތުގެ މަތިން ޓެރަރިޒަމާއި ބޮޑެތި ޖިނާއީ ކުށްތަކާ ދެކޮޅަށް މަސައްކަތްކުރުމަށްޓަކައި އަދި ދިވެހިރާއްޖެއިން އަމަލުކުރުން ލާޒިމުވާ ވައިގެ ދަތުރުފަތުރުގެ މުއާހަދާތައް ތަންފީޒުކުރުމުގެ ބޭނުމަށެވެ.

7 ވަނަ މާއްދާ - މައުލޫމާތު ހިއްސާކުރުން

މި ގަވާއިދުގެ ދަށުން ފޯރުކޮށްދޭ މައުލޫމާތު ހިއްސާކުރެވޭނީ ހަމައެކަނި އަންނަނިވި ފަރާތްތަކާއެވެ.

(ހ) މޯލްޑިވްސް އިމިގްރޭށަނުގެ ކަމާބެހޭ މުވައްޒަފުންނަށް.

(ށ) ގާނޫނު ނަންބަރު 2011-08 (ދިވެހިރާއްޖޭގެ ކަސްޓަމްސްގެ ގާނޫނު) ގެ 60 ވަނަ މާއްދާއާއި، 70 ވަނަ މާއްދާއާއި، 84 ވަނަ މާއްދާގެ ބޭނުމަށް އެ އިދާރާގެ ކަމާބެހޭ ފަރާތްތަކަށް.

(ނ) ގާނޫނު ނަންބަރު 2015-32 (ޓެރަރިޒަމް މަނާކުރުމުގެ ގާނޫނު) ގެ ތިންވަނަ ބާބުގައި ބަޔާންކޮށްފައިވާ ގޮތަށް، އެ މައުލޫމާތަކީ އެ ގާނޫނުގައި ބަޔާންކޮށްފައިވާ ޓެރަރިޒަމާ ގުޅުންހުރި އިންޓެލިޖެންސް އިދާރާއަކާ ހިއްސާކުރަންޖެހޭ ހާލަތުގައި އެ އިދާރާއަކަށް.

8 ވަނަ މާއްދާ - މައުލޫމާތުގެ ސިއްރުކަން ކަށަވަރުކޮށްދިނުން

ގަވާއިދުގެ ދަށުން މޯލްޑިވްސް އިމިގްރޭށަނަށް ލިބޭ މައުލޫމާތަކީ ސިއްރު މައުލޫމާތުގެ ގޮތުގައި ބެލޭނެ މައުލޫމާތެވެ. އަދި މި ގަވާއިދުގެ ދަށުން މޯލްޑިވްސް އިމިގްރޭށަނަށް ލިބޭ މައުލޫމާތު، މޯލްޑިވްސް އިމިގްރޭށަނުގެ ކަމާބެހޭ މުވައްޒަފުންނާއި، މޯލްޑިވްސް އިމިގްރޭށަނުން މި މައުލޫމާތު ހިއްސާކުރާ އެހެން އިދާރާތަކާއި އެ އިދާރާތަކުގެ ކަމާބެހޭ ފަރާތްތަކުން ސިއްރުގެ ގޮތުގައި ހިފަހައްޓަންވާނެއެވެ.

9 ވަނަ މާއްދާ - މައުލޫމާތު ރައްކާކޮށްފައި ބެހެއްޓޭނެ މުއްދަތު

(ހ) މި ގަވާއިދުގެ ދަށުން މޯލްޑިވްސް އިމިގްރޭށަނަށް ފޯރުކޮށްދޭ މައުލޫމާތު މޯލްޑިވްސް އިމިގްރޭށަނުން ކަނޑައަޅާ މުއްދަތަކަށް ރައްކާކޮށްފައި ބެހެއްޓުމުގެ އިހްތިޔާރު މޯލްޑިވްސް އިމިގްރޭށަނަށް ލިބިގެންވެއެވެ.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތްކަމުގައި ވިޔަސް، މި ގަވާއިދުގެ ދަށުން ފޯރުކޮށްދޭ މައުލޫމާތެއް ނުވަތަ ލިޔުމެއް ނައްތައިލެވޭނީ ދައުލަތުގެ ލިޔެކިޔުން ނައްތައިލުމާ ގުޅޭގޮތުން އެ އިރެއްގައި އަމަލުކުރާ ގާނޫނާއި ގަވާއިދާ އެއްގޮތްވާ ގޮތުގެ މަތިންނެވެ.

10 ވަނަ މާއްދާ - ފިޔަވަޅު އެޅުން

މި ގަވާއިދާ ހިލާފުވާ ފަރާތްތައް 2,000 (ދެހާސް) ރުފިޔާއިން ޖޫރިމަނާކުރުމުގެ އިހްތިޔާރު މޯލްޑިވްސް އިމިގްރޭށަނަށް ލިބިގެންވެއެވެ.\\\

11 ވަނަ މާއްދާ - މާނަކުރުން

މި ގަވާއިދުގައި، އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި ލަފުޒުތަކާއި އިބާރާތްތައް މާނަކުރާނީ ތިރީގައިވާ ގޮތަށެވެ.

(ހ) "މެދުވެރިން" ކަމަށް ބުނެފައި އެވަނީ، މި ގަވާއިދުގެ ދަށުން ފޯރުކޮށްދޭންޖެހޭ މައުލޫމާތު ފޯރުކޮށްދިނުމަށްޓަކައި އެ މައުލޫމާތު ފޯރުކޮށްދޭންޖެހޭ ފަރާތުން އައްޔަނުކުރާ ފަރާތަށެވެ.

(ށ) "ވައިގެ ދަތުރުފަތުރުގެ މުއާހަދާ" ކަމަށް ބުނެފައި އެވަނީ، 7 ޑިސެންބަރު 1944 ގައި ޗިކާގޯ ކޮންފަރެންސްގައި ސޮއިކޮށް، އަދި 12 މާރިޗު 1974 ގައި ދިވެހިރާއްޖެއިން ތަސްދީގުކޮށް، އެ މުއާހަދާގައި ރާއްޖެއިން ބައިވެރިވެފައިވާ Convention on International Civil Aviation އަށެވެ. އަދި މި މާނައިގެ ތެރޭގައި ބުނެވިދިޔަ ކޮންވެންށަނުގެ އެންމެހައި އެނެކްސްތަކާއި، އެ ކޮންވެންށަނަށް ގެނެވޭ އެންމެހައި އިސްލާހުތައް ވެސް ހިމެނެއެވެ.

(ނ) "ނުރައްކާތެރި ކުށެއް" ކަމަށް ބުނެފައި އެވަނީ، ގާނޫނު ނަންބަރު 2025-07 (ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނު) ގެ 5 ވަނަ މާއްދާގައި ބަޔާންކޮށްފައިވާ ކުށްތަކަށެވެ.

(ރ) "އިންތިޒާމުވެގެން ކުރާ ބޮޑެތި ކުށް" ކަމަށް ބުނެފައި އެވަނީ، ގާނޫނު ނަންބަރު 2025-07 (ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނު) ގެ 4 ވަނަ މާއްދާގައި ބަޔާންކޮށްފައިވާ ކުށްތަކަށެވެ.

12 ވަނަ މާއްދާ - މި ގަވާއިދަށް އަމަލުކުރަން ފަށާނީ، 2026 ވަނަ އަހަރުގެ އޮކްޓޫބަރު މަހުގެ 30 ވަނަ ދުވަހުން ފެށިގެންނެވެ.

މައި ގާނޫނު

އިމިގްރޭށަންގެ ގާނޫނު (ގާނޫނު ނަންބަރު 2007-01)