ޓެކްނިކަލް ޕެނަލް ތައް އެކުލަވައިލުމާއި ހިންގުމުގެ ގަވާއިދު

(މި ގަވާއިދަށް އަމަލުކުރަން ފެށީ 4 މާރިޗު 2026 ގައި)

1 ވަނަ މާއްދާ - ތައާރުފާއި ނަން

(ހ) މިއީ ގާނޫނު ނަންބަރު 2021-07 (ދިވެހިރާއްޖޭގެ މަތީ ތައުލީމާއި ތަމްރީނުގެ ގާނޫނު) ގެ 53 ވަނަ މާއްދާގެ (ހ) އާއި (ށ) އަށް ރިއާޔަތްކޮށް، ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑްތައް އެޕްރޫވްކުރުމަށް ޓެކްނިކަލް ޕެނަލްތައް އެކުލަވައިލައި، އެ ޕެނަލްތަކުގެ މަސައްކަތުގެ ދާއިރާތައް ކަނޑައަޅައި، އެ ޕެނަލްތައް ހިންގުމާބެހޭ އުސޫލުތައް ބަޔާންކުރާ ގަވާއިދެވެ.

(ށ) މި ގަވާއިދަށް ކިޔާނީ "ޓެކްނިކަލް ޕެނަލްތައް އެކުލަވައިލުމާއި ހިންގުމުގެ ގަވާއިދު" އެވެ.

2 ވަނަ މާއްދާ - މަގުސަދު 

މި ގަވާއިދުގެ މަގުސަދުތައް، ތިރީގައި މިވަނީއެވެ.

(ހ) ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑާއި ޓްރޭނިންގ މެޓީރިއަލްތައް، ވަޒީފާގެ ބާޒާރަށް ބޭނުންވާ ފަންނީ ހުނަރުވެރި މަސައްކަތްތެރިކަމުގެ ދާއިރާތަކުގެ މިންގަނޑަށް ފެތޭކަން ކަށަވަރުކުރުމަށް، އޮތޯރިޓީއަށް ބޭނުންވާ ފަންނީ ލަފާދިނުމަށް ޓެކްނިކަލް ޕެނަލްތައް އެކުލަވައިލުން.

(ށ) ޓެކްނިކަލް ޕެނަލްތަކުގެ މަސައްކަތުގެ ދާއިރާތައް ކަނޑައެޅުމާއި، ހިންގުމުގެ ގަވާއިދު ބަޔާންކުރުން.

3 ވަނަ މާއްދާ - ޓެކްނިކަލް ޕެނަލްތައް އެކުލަވައިލުމާއި އުވައިލުން

ޓެކްނިކަލް ޕެނަލްތައް އެކުލަވައިލާނީ ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑުގެ ކޮންމެ ޕުރޮގުރާމަކަށް ވަކިންނެވެ. ކޮންމެ ސްޓޭންޑަޑެއް ފާސްކުރުމަށް، މަދުވެގެން 2 (ދޭއް) ބައްދަލުވުން ބާއްވަންވާނެއެވެ. އަދި ޓެކްނިކަލް ޕެނަލް އުފައްދާ ދާއިރާގެ ނޭށަނަލް ކޮމްޕީޓެންސީ ސްޓޭންޑަޑާއި ޓްރޭނިންގ މެޓީރިއަލްތައް ފާސްކޮށް ނިމުމުން އެ ޓެކްނިކަލް ޕެނަލެއް އުވުނީއެވެ.

4 ވަނަ މާއްދާ - މާލީ އިނާޔަތް 

ޓެކްނިކަލް ޕެނަލްތަކުގެ މެންބަރުން ހާޒިރުވާ ޖަލްސާތަކަށް ދޭ އެލަވަންސް ކަނޑައަޅާނީ، ނޭށަނަލް ޕޭ ކޮމިށަންގެ ލަފާގެ މަތީން، ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ މިނިސްޓަރު ކަނޑައަޅާ ގޮތެއްގެ މަތީންނެވެ.

5 ވަނަ މާއްދާ - ޓެކްނިކަލް ޕެނަލްތަކުގެ މެންބަރުން އައްޔަނުކުރެވޭ ގޮތާއި މެންބަރުންގެ އަދަދު

(ހ) ޓެކްނިކަލް ޕެނަލްތަކަށް މެންބަރުން އައްޔަނުކުރާނީ، މި މާއްދާގެ (1) ވަނަ ނަންބަރުގައިވާ ފަރާތް ހިމެނޭހެން ކޮންމެ ޕެނަލެއްގައި މަދުވެގެން 3 (ތިނެއް) މެންބަރުން އަދި ގިނަވެގެން 5 (ފަހެއް) މެންބަރުން ހިމެނޭ ގޮތަށް، އޮތޯރިޓީގެ ޗީފް އެކްޒެކެޓިވް އޮފިސަރ ނުވަތަ އެ ފަރާތުން ހުއްދަ ދީފައިވާ ފަރާތަކުންނެވެ.

1. ޓެކްނިކަލް ޕެނަލް އުފައްދާ ދާއިރާގައި މަސައްކަތްކުރަމުންދާ މެންބަރެއް؛
2. ޓެކްނިކަލް ޕެނަލް އުފައްދާ ދާއިރާގައި ކިޔަވައިދޭ މެންބަރެއް؛
3. ޓެކްނިކަލް ޕެނަލް އުފައްދާ ދާއިރާއަކީ، ރެގިއުލޭޓަރީ ބޮޑީއަކުން ހުއްދަ ލިބިގެން ހިންގަންޖެހޭ ޕުރޮގުރާމަކާ ގުޅުންހުރި އަދި ލައިސަންސް ނަގަންޖެހޭ ދާއިރާއެއް ނަމަ، އެ ރެގިއުލޭޓަރީ ބޮޑީ ތަމްސީލުކުރާ މެންބަރެއް.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ޓެކްނިކަލް ޕެނަލް އުފައްދާ ދާއިރާގެ ގޮތުން މަދުވެގެން 3 (ތިނެއް) މެންބަރުން ހަމަނުވާ ހާލަތްތަކުގައި ޕެނަލުގައި ތިބޭނެ މެންބަރުންގެ އަދަދު ބަދަލުކުރުމުގެ އިހުތިޔާރު، އޮތޯރިޓީގެ ޗީފް އެކްޒެކެޓިވް އޮފިސަރަށް ނުވަތަ އެ ފަރާތުން ހުއްދަ ދީފައިވާ ފަރާތަކަށް ލިބިގެންވެއެވެ.

6 ވަނަ މާއްދާ - މެންބަރުންގެ ށަރުތު ތައް

ޓެކްނިކަލް ޕެނަލުގެ މެންބަރުންގެ ކިބައިގައި އަންނަނިވި ށަރުތުތައް ހުންނަންވާނެއެވެ.

(ހ) ޓެކްނިކަލް ޕެނަލް ނިސްބަތްވާ ދާއިރާއިން ނުވަތަ އެ ދާއިރާއާ ގުޅުންހުރި ދާއިރާއަކުން، ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑް ތައްޔާރުކުރާ ލެވެލަށް ވުރެ މަތީ ލެވެލެއްގެ ސެޓުފިކެޓެއް ނުވަތަ އެ ދާއިރާއިން މަދުވެގެން 5 (ފަހެއް) އަހަރުދުވަހުގެ މަސައްކަތު ތަޖުރިބާ ހުރި ފަރާތެއް ކަމުގައި ވުން.

(ށ) ޓެކްނިކަލް ޕެނަލް އުފައްދާ ދާއިރާއަކީ، ރެގިއުލޭޓަރީ ބޮޑީއަކުން ހުއްދަ ލިބިގެން ހިންގަންޖެހޭ ޕުރޮގުރާމަކާ ގުޅުންހުރި އަދި ލައިސަންސް ނަގަންޖެހޭ ދާއިރާއެއް ނަމަ، އެ ރެގިއުލޭޓަރީ ބޮޑީ ތަމްސީލުކުރާ ފަރާތެއް ކަމުގައި ވުން.

(ނ) ފާއިތުވި 1 (އެކެއް) އަހަރުދުވަހު ގެ ތެރޭގައި ޖިނާއީ ކުށެއް ކުރިކަން ށަރީއަތަށް ސާބިތުވެ ހުކުމެއް ކޮށްފައިވާ ފަރާތެއް ކަމުގައި ނުވުން.

7 ވަނަ މާއްދާ - ޓެކްނިކަލް ޕެނަލްތަކުގެ މެންބަރުންގެ މަސްއޫލިއްޔަތުތައް

ޓެކްނިކަލް ޕެނަލްތަކުގެ މެންބަރުންގެ މަސްއޫލިއްޔަތުތަކުގެ ތެރޭގައި އަންނަނިވި ކަންކަން ހިމެނޭނެއެވެ.

(ހ) ޓެކްނިކަލް ޕެނަލްތަކުގެ ބައްދަލުވުންތަކުގައި މަށްވަރާކުރުމަށް އެޖެންޑާކޮށްފައިވާ ކަންކަމާ ގުޅޭގޮތުން ލަފާދެވޭވަރަށް ތައްޔާރުވެގެން ބައްދަލުވުންތަކުގައި ބައިވެރިވުން.

(ށ) ޓެކްނިކަލް ޕެނަލްތަކުގެ ބައްދަލުވުންތަކުގައި މަށްވަރާކުރެވޭ ކަންކަމާއި ނިންމުންތައް ނިންމުމުގައި އަމަލީގޮތުން ބައިވެރިވ،ެ ފަންނީ ލަފާ ދިނުން.

(ނ) ޓެކްނިކަލް ޕެނަލްތަކުގެ ބައްދަލުވުންތަކުގެ ސިއްރު ހިފެހެއްޓުން.

8 ވަނަ މާއްދާ - ޓެކްނިކަލް ޕެނަލްތަކުގެ ބައްދަލުވުން ބޭއްވުމާއި ކޯރަމާއި ރިޔާސަތު ބެލެހެއްޓުން

(ހ) ޓެކްނިކަލް ޕެނަލެއްގެ ބައްދަލުވުން ބާއްވާނީ، ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑެއް އަލަށް ތައްޔާރުކުރާއިރު ނުވަތަ މުރާޖާކުރާއިރު ފަންނީ ލަފާ ހޯދުމަށެވެ.

(ށ) ޓެކްނިކަލް ޕެނަލެއްގެ ބައްދަލުވުން ބޭއްވޭނީ، އެ ޓެކްނިކަލް ޕެނަލްގެ ޖުމުލަ
މެންބަރުންގެ ދެބައިކުޅައެއްބަޔަށް ވުރެ ގިނަ މެންބަރުން ބައިވެރިވުމުންނެވެ.

(ނ) ޓެކްނިކަލް ޕެނަލްތަކުގެ ބައްދަލުވުންތައް މެންބަރުން އެއްތަނަކަށް ހާޒިރުވެގެން ނުވަތަ އޯޑިއޯ ކޮންފަރެންސާއި ވީޑިއޯ ކޮންފަރެންސް ފަދަ ޒަމާނީ މުވާސަލާތީ ވަސީލަތްތައް ބޭނުންކޮށްގެން ވެސް ކުރި ޔަށް ގެންދެވޭނެއެވެ. އަދި މި ބައްދަލުވުންތަކުގެ ބޭނުމަށް ހިއްސާކުރާ ލިޔެކިޔުންތަކުގެ ސިއްރުކަން ހިފެހެއްޓޭކަން ބައްދަލުވުމުގައި ބައިވެރިވާ މެންބަރުން ކަށަވަރު ކުރަންވާނެއެވެ.

(ރ) ޓެކްނިކަލް ޕެނަލްތައް އެކުލަވަ އިލައިފައި ބާއްވާ ފުރަތަމަ ބައްދަލުވުމުގައި އެ ޕެނަލެއްގެ ބައްދަލުވުންތަކުގައި ރިޔާސަތު ބަލަހައްޓާނެ ފަރާތެއް މެންބަރުންގެ މެދުގައި މަށްވަރާކޮށް އައްޔަނުކުރަން ވާނެއެވެ. އެ ފަރާތަށް ބައިވެރިނުވެވޭ ނަމަ، ރިޔާސަތު ބަލަހައްޓާނީ، ބައްދަލުވުމުގައި ބައިވެރިވާ މެންބަރުންގެ ތެރެއިން މެންބަރުން ކަނޑައަޅާ ފަރާތެކެވެ.

9 ވަނަ މާއްދާ - ޓެކްނިކަލް ޕެނަލްތަކުގެ ސެކްރެޓޭރިއެޓް ބެލެހެއްޓުން

(ހ) ޓެކްނިކަލް ޕެނަލްތަކުގެ ބައްދަލުވުންތަކުގެ ސެކްރެޓޭރިއެޓް ބަލަހައްޓާނީ އޮތޯރިޓީންނެވެ.

(ށ) ޓެކްނިކަލް ޕެނަލްތަކުގެ ބައްދަލުވުންތަކުގައި ކުރި މަށްވަރާގެ ހުލާސާއާއި، ނިންމާ ނިންމުން ސާފުކޮށް އެނގޭގޮތަށް ސެކްރެޓޭރިއެޓުން ލިޔެ ޔައުމިއްޔާ ކުރަންވާނެއެވެ. އަދި ކޮންމެ ބައްދަލުވުމެއްގެ ޔައުމިއްޔާ، ޖެހިގެން އޮންނަ ބައްދަލުވުމުގެ 24 (ސައުވީސް) ގަޑިއިރުގެ ކުރިން، މެންބަރުންގެ ކޮމެންޓަށް ފޮނުވަންވާނެއެވެ. ޔައުމިއްޔާއަށް މެންބަރަކު އިސްލާހެއް ހުށަހަޅައިފި ނަމަ، ޓެކްނިކަލް ޕެނަލުގެ މެންބަރުންނަށް، ޔައުމިއްޔާ ފާސްކުރުމުގެ ކުރިން އެ އިސްލާހެއް އަންގަންވާނެއެވެ.

(ނ) ޓެކްނިކަލް ޕެނަލްތަކުގެ ކޮންމެ ބައްދަލުވުމެއްގައި، އޭގެ ކުރީ ބައްދަލުވުމުގެ ޔައުމިއްޔާ ފާސްކުރަންވާނެއެވެ.

10 ވަނަ މާއްދާ - ޓެކްނިކަލް ޕެނަލްތަކުގެ ނިންމުންތައް

ޓެކްނިކަލް ޕެނަލްތަކުގެ ބައްދަލުވުންތަކުގެ ނިންމުންތައް ނިންމާނީ، ބައްދަލުވުމުގައި ބައިވެރިވ،ެ ވޯޓުގައި ބައިވެރިވި މެންބަރުންގެ އަޣުލަބިއްޔަތުންނެވެ.

11 ވަނަ މާއްދާ - ޓެކްނިކަލް ޕެނަލްތަކުގެ މެންބަރުން ވަކިކުރުމާއި ވަކިވުން

ޓެކްނިކަލް ޕެނަލްތަކުގެ މެންބަރަކު ވަކިކުރާނީ، މި މާއްދާގައި ބަޔާންކޮށްފައިވާ ހާލަތެއް މެދުވެރިވެއްޖެ ނަމަ، އޮތޯރިޓީގެ ޗީފް އެކްޒެކެޓިވް އޮފިސަރ ނުވަތަ އެ ފަރާތުން ހުއްދަ ދީފައިވާ ފަރާތަކުންނެވެ.

(ހ) ޕެނަލްގެ މެންބަރަކު ވަކިވުމަށްއެދި ލިޔުމުން ހުށަހެޅުން.

(ށ) މި އުސޫލުގެ 6 ވަނަ މާއްދާގެ (ށ) އާއި (ނ) ގައި ބަޔާންކޮށްފައިވާ ށަރުތުތަކުގެ ތެރެއިން ށަރުތެއް އުނިވުން.

(ނ) މަގުބޫލު އުޒުރެއް ނެތި، ވިދިވިދިގެން 2 (ދޭއް) ބައްދަލުވުމަށް ހާޒިރުނުވެއްޖެ ނަމަ، އެ މެންބަރަކު ވަކިކުރުމުގެ އިހުތިޔާރު، އޮތޯރިޓީއަށް ލިބިގެންވެއެވެ.

12 ވަނަ މާއްދާ - މާނަކުރުން

މި ގަވާއިދުގައި، އަންނަނިވި ލަފުޒުތަކާއި އިބާރާތްތައް ބޭނުންކޮށްފައިވަނީ ތިރީގައިވާ މާނައިގައެވެ.

(ހ) "ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑް" ކަމަށް ބުނެފައި އެވަނީ، ފަންނީ މަސައްކަތްތެރިކަމުގެ ވަޒީފާއަށް މީހުން ބިނާކުރުމަށް ބޭނުންވާ އަސާސީ އިލްމާއި ހުނަރުތަކަށް މި އޮތޯރިޓީން ކަނޑައަޅައިފައިވާ މިންގަނޑުތަކަށެވެ.

(ށ) "އޮތޯރިޓީ" ކަމަށް ބުނެފައި އެވަނީ، "މޯލްޑިވްސް ނޭށަނަލް ސްކިލްސް ޑިވެލޮޕްމަންޓް އޮތޯރިޓީ" އަށެވެ.

(ނ) "ޓެކްނިކަލް ޕެނަލް" ކަމަށް ބުނެފައި އެވަނީ، މަސައްކަތްތެރިކަމުގެ ވަޒީފާއަށް މީހުން ބިނާކުރުމަށް ބޭނުންވާ ނޭށަނަލް އޮކިޔުޕޭށަނަލް ކޮމްޕީޓެންސީ ސްޓޭންޑަޑްތަކާއި އެ ސްޓޭންޑަޑްތަކުގެ ޓްރޭނިންގ މެޓީރިއަލްތައް ތައްޔާރުކުރުމަށް ފަންނީ ލަފާ ދިނުމަށް ވަގުތީގޮތުން އެކުލަވައިލާ ފަންނީ މާހިރުންގެ ޕެނަލަށެވެ.

(ރ) "މަސައްކަތުގެ ދާއިރާ" ކަމަށް ބުނެފައި އެވަނީ، އާމްދަނީ ހޯދުމަށް ދިވެހިރާއްޖޭގައި ވަޒީފާ އަދާކުރާ މަސައްކަތުގެ ދާއިރާ ނުވަތަ އޮކިޔުޕޭށަންތަކަށެވެ.

13 ވަނަ މާއްދާ - ގަވާއިދަށް އަމަލުކުރަން ފެށުން

މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ.

މައި ގާނޫނު

މަތީ ތައުލީމާއި ތަމްރީނުގެ ގާނޫނު (ގާނޫނު ނަންބަރު 2021-07)