(މި ގަވާއިދަށް އަމަލުކުރަން ފެށީ 15 ޑިސެމްބަރު 2024 ގައި)

1 ވަނަ މާއްދާ - ތައާރަފު

(ހ) މިއީ، އެއްގަމު އުޅަނދާއި ކަނޑު ދަތުރުފަތުރުކުރާ އުޅަނދުފަހަރުން ކޮންމެ އަހަރަކު އެއްފަހަރު ދައްކަންޖެހޭ އަހަރީފީއާއި ޖޫރިމަނާގެ ފައިސާގެ ތެރެއިން ދައުލަތަށް ދައްކަންޖެހި ނުދެއްކި ހުރި ފައިސާ ބަހައިލައިގެން ދެއްކޭނެ އުސޫލުތައް ބަޔާންކުރާ ގަވާއިދެވެ.

(ށ) މިއީ، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނު) ގެ 3 ވަނަ މާއްދާގެ (ހ) އާއި، ގާނޫނު ނަންބަރު 1978-69 (ކަނޑުގައި ދުއްވާ އުޅަނދުތައް ދުއްވުމާބެހޭ ގާނޫނު) ގެ 6 ވަނަ މާއްދާގެ (ހ) އާއި (ނ) ގެ ދަށުން އެކުލަވައިލައިފައިވާ ގަވާއިދެކެވެ.

(ނ) މި ގަވާއިދަށް ކިޔާނީ، "އެއްގަމު އުޅަނދާއި ކަނޑު އުޅަނދުފަހަރާ ގުޅޭގޮތުން ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން ދެއްކުމުގެ ގަވާއިދު'' އެވެ.

2 ވަނަ މާއްދަ - ގަވާއިދު ހިންގާ ފަރާތް

މި ގަވާއިދު ހިންގާނީ، އެއްގަމާއި ކަނޑު ދަތުރުފަތުރުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކުރެވިފައިވާ މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތުންނެވެ.

3 ވަނަ މާއްދަ - މަގުސަދު

މި ގަވާއިދުގެ މަގުސަދަކީ، އެއްގަމުގައި ދުއްވާ އުޅަނދުތަކުންނާއި ކަނޑު ދަތުރުފަތުރުކުރާ އުޅަނދުފަހަރުން ކޮންމެ އަހަރަކު އެއްފަހަރު ދައްކަންޖެހޭ އަހަރީފީއާއި އަހަރީފީ ނުދެއްކުމުގެ ސަބަބުން އަރައިފައިވާ ޖޫރިމަނާގެ ފައިސާއާއި، އަދި އެނޫންވެސް ޖޫރިމަނާގެ ތެރެއިން ދައުލަތަށް ދައްކަން ޖެހި ނުދެއްކި ހުރި ފައިސާ އެކީ އެއްފަހަރާ ދައްކަން ދަތިވާ ފަރާތްތަކަށް ލުއިފަސޭހަ ގޮތެއްގައި އެ ފައިސާ ދައުލަތަށް ދެއްކޭނެ މަގު ފަހިކޮށްދިނުމެވެ.

4 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދެއްކުމުގެ ފުރު ސަތު ދިނުމުގެ ށަރުތުތައް

(ހ) އަންނަނިވި ށަރުތު ތައް ފުރިހަމަވާ ނަމަ، ދައުލަތަށް ދައްކަންޖެހި ނުދެއްކި ހުރި ފައިސާ މި ގަވާއިދުގައިވާ ގޮތުގެ މަތީން ބަހައިލައިގެން ދެއްކުމުގެ ފުރުސަތު، އެކަމަށް އެދޭ ފަރާތަކަށް ދެވޭނެއެވެ.

1. ދައްކަންޖެހި ނުދައްކާހުރި ފައިސާގެ އަދަދު 10,000 (ދިހަ ހާސް) ރުފިޔާއަށްވުރެ އިތުރުވެފައިވުން؛
2. އެ ފައިސާއަކީ ފައިސާ ދެއްކުމުގެ ސުންގަޑި ފާއިތުވެފައިވާ ފައިސާއަކަށް ވުން؛
3. މި ގަވާއިދުގެ ދަށުން ފައިސާ ބަހައިލައިގެން ދެއްކުމަށް ހުށަހެޅުން؛
4. މީގެ ކުރިން ބަހައިލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުން؛
5. އެދޭ ފަރާތަކީ އުޅަނދުގެ ވެރިފަރާތް ކަމުގައި ވުން.

(ށ) މި މައްދާގެ (ހ) ގެ (3) ވަނަ ނަންބަރުގައި އެހެން ބަޔާންކޮށްފައި އޮތް ނަމަވެސް، މި ގަވާއިދުގެ ތެރެއިން ކުރިން ފުރުސަތު ދެވި، އެއްބަސްވުމާ އެއްގޮތަށް ފައިސާ ދައްކައި ހަލާސްކޮށްފައިވާ ފަރާތަކަށް އަލުން ފުރުސަތު ދެވިދާނެއެވެ.

5 ވަނަ މާއްދަ - ބަހައިލައިގެން އިންސްޓޯލްމަންޓަށް ފައިސާ ދެއްކުމަށް އެދި ހުށަހެޅުން

(ހ) ބަހައިލައިގެން ފައިސާ ދެއްކުމަށް އެދި ހުށަހަޅާނީ، އެކަމަށް ކަނޑައަޅައިފައިވާ ފޯމު، މިނިސްޓްރީއަށް ހުށަހަޅައިގެންނެވެ. މިފަދައިން ހުށަހަޅާ ހުށަހެޅުމެއްގައި ށަރުތު ފުރިހަމަނުވާ ނަމަ، ގިނަވެގެން 7 (ހަތެއް) ދުވަހުގެ ތެރޭގައި، ބަހައިލައިގެން ފައިސާ ދެއްކުމަށް ހުށަހެޅި ފަރާތަށް ލިޔުމުން އެކަން އަންގަންވާނެއެވެ.

(ށ) މި މާއްދާގެ (ހ) ގައި ބަޔާންކޮށްފައިވާ މުއްދަތުގައި، ށަރުތު ހަމަނުވާކަން ވަކި ފަރާތަކަށް އަންގައިފައި ނުވިނަމަވެސް، ބަހައިލައިގެން ފައިސާ ދެއްކުމުގެ ފުރުސަތު އެ ފަރާތަކަށް ދެވޭނީ، މި ގަވާއިދުގެ (4) ވަނަ މާއްދާގެ (ހ) ގައި ބަޔާންކޮށްފައިވާ ށަރުތުތައް ފުރިހަމަވާނަމައެވެ.

6 ވަނަ މާއްދާ - ބަހައިލައިގެން އިންސްޓޯލްމަންޓަށް ފައިސާ ދެއްކުމަށް ފުރުސަތު ދިނުން

(ހ) އެއްގަމު އުޅަނދާއި ކަނޑު އުޅަނދުފަހަރާ ގުޅޭގޮތުން ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން އިންސްޓޯލްމަންޓަށް ދެއްކުމުގެ ފުރުސަތު ދެވޭނީ، މި އުސޫލުގެ ޖަދުވަލު 1 ގައި ކަނޑައެޅިފައިވާ ގޮތުގެ މަތީންނެވެ. 

(ށ) ބަހައިލައިގެން އިންސްޓޯލްމަންޓަށް ދެއްކުމުގެ ފުރުސަތު ދެވޭނީ، މި ފުރުސަތު ދެވިދާނެކަމަށް އެ ފަރާތަށް އަންގައި، މި ގަވާއިދުގެ 7 ވަނަ މާއްދާގައިވާ ގޮތުގެ މަތީން ކޮމިޓްމަންޓް ފީ ދެއްކުމުންނެވެ.

7 ވަނަ މާއްދަ - ކޮމިޓްމަންޓް ފީ

(ހ) މި ގަވާއިދުގެ ދަށުން މިނިސްޓްރީއަށް ހުށަހަޅާ ފޯމުގައި، މި ގަވާއިދުގައި ބަޔާންކޮށްފައިވާ ށަރުތުތައް ފުރިހަމަވާ ނަމަ، ފޯމު ލިބޭތާ ގިނަވެގެން 10 (ދިހައެއް) ދުވަހުގެ ތެރޭގައި، މި ގަވާއިދުގެ ޖަދުވަލު 1 ގައިވާ ގޮތުގެ މަތީން ހިސާބުކުރެވޭ ކޮމިޓްމަންޓް ފީ މިނިސްޓްރީން ކަނޑައެޅުމަށްފަހު، އެ ފައިސާ މިނިސްޓްރީއަށް ދެއްކުމަށް އެ ފަރާތަކަށް އަންގަންވާނެއެވެ. މިފަދައިން އަންގާ އެންގުމެއްގައި މި ފައިސާ ދައްކާނެ ގޮތުގެ އިރުށާދު ދީފައި އޮންނަންވާނެއެވެ.

(ށ) ކޮމިޓްމަންޓް ފީ ދެއްކުމަށް ގިނަވެގެން ދެވޭނީ 14 (ސާދަ) ދުވަހެވެ. މި މުއްދަތުގެ ތެރޭގައި ކޮމިޓްމަންޓް ފީ ދައްކައިފައި ނުވާ ނަމަ، އިތުރު އެންގުމަކާ ނުލައި، ހުށަހަޅާ ފަރާތުގެ ފޯމު ބާތިލުކުރެވޭނެއެވެ.

8 ވަނަ މާއްދަ - އެއްބަސްވުން އެކުލަވައިލުން

(ހ) މި ގަވާއިދުގައިވާ ގޮތުގެ މަތީން ކޮމިޓްމަންޓް ފީ ދައްކައިފި ނަމަ، ބަހައިލައިގެން ފައިސާ ދެއްކުމަށް ޓަކައި އެ ކަމަށް ހުށަހަޅާ ފަރާތާއި މިނިސްޓްރީއާ ދެމެދު އެއްބަސްވުމެއް އެކުލަވައިލަންވާނެއެވެ.

(ށ) މި މާއްދާގެ (ހ) ގެ ދަށުން ސޮއިކުރެވޭ އެއްބަސްވުމެއްގައި، އެންމެ މަދުވެގެން ވެސް، އަންނަނިވި ކަންކަން ހިމަނަންވާނެއެވެ.

1. އެއްބަސްވުމުގެ މުއްދަތު؛
2. ފައިސާ ދައްކަންޖެހޭ ގޮތުގެ ތަފުސީލު (މަހެއްގެ މައްޗަށް ދައްކަންޖެހޭ އަދަދާއި، ފައިސާ ދެއްކުމަށް މިނިސްޓްރީން ކަނޑައަޅާ ގޮތް)؛
3. އެއްބަސްވުމުގެ މުއްދަތުގައި އުޅަނދާ ގުޅޭ އިތުރު ފައިސާއެއް ނުވަތަ ޖޫރިމަނާއެއް ދައްކަން ޖެހިއްޖެ ނަމަ އަމަލުކުރަންވާނެ ގޮތް؛
4. އެއްބަސްވުމާ ހިލާފުވެއްޖެ ނަމަ އަމަލުކުރެވޭނެ ގޮތް؛
5. މަތީގައި ބަޔާންކޮށްފައިވާ ކަންކަމުގެ އިތުރުން ވެސް އެއްބަސްވުމުގައި ހިމެނުން މުހިންމުކަމަށް މިނިސްޓްރީއަށް ގަބޫލުކުރެވޭ ކަންކަން. 

(ނ) މިގޮތަށް އެކުލަވައިލެވޭ އެއްބަސްވުމުގެ މުއްދަތާއި އިންސްޓޯލްމަންޓުގެ ގޮތުގައި ކޮންމެ މަހަކު ދައްކަންޖެހޭ އަދަދު ކަނޑައަޅާނީ، ކޮމިޓްމަންޓް ފީ އުނިކުރުމުން، އެއްބަސްވުމުގައި ސޮއިކުރާ ތާރީހާ ހަމަޔަށް އެ ފަރާތަކުން ދައްކަންޖެހިފައިވާ ފީއާއި ޖޫރިމަނާގެ ފައިސާގެ ޖުމުލަ އަދަދަށް ރިއާޔަތްކުރުމަށްފަހު، މިނިސްޓްރީންނެވެ.

9 ވަނަ މާއްދަ - އެއްބަސްވުން އުވައިލުން

(ހ) މި ގަވާއިދުގެ ދަށުން ސޮއިކުރެވޭ އެއްބަސްވުމާ އެއްގޮތަށް، މަގުބޫލު އުޒުރެއް ނެތި ފައިސާ ނުދައްކާތާ 30 (ތިރީސް) ދުވަސް ފާއިތުވެފައިވާ ނަމަ، އެއްބަސްވުން ބާތިލުކުރުމުގެ އިހުތިޔާރު، މިނިސްޓްރީއަށް ލިބިގެންވާނެއެވެ.

(ށ) މި ގަވާއިދުގެ ދަށުން މަގުބޫލު އުޒުރެއްކަމުގައި ބަލާނީ، އަންނަނިވި ކަންތައްތަކުގެ ތެރެއިން ކަމެއް މެދުވެރިވެފައިވާ ނަމައެވެ.

1. ގުދުރަތީ ކާރިސާއެއް ކުރިމަތިވުން؛
2. އެ ކަމެއް ކުރުމަށް ނުކުޅޭދޭ ފަދަ ބައްޔެއްވުން.

10 ވަނަ މާއްދަ - އެހެނިހެން ކަންކަން

(ހ) މި ގަވާއިދުގެ ދަށުން ބަހައިލައިގެން ދައްކާ ފައިސާ އަޅައިކެނޑޭނީ ތިރީގައިވާ ތަރުތީބުންނެވެ.

1. ދައްކަންޖެހިފައިވާ އަހަރީފީގެ އަދަދު؛
2. އަހަރީފީއަކާ ގުޅިގެން އަރައިފައިވާ ޖޫރިމަނާ؛
3. އެހެނިހެން ޖޫރިމަނާ،

(ށ) މި ގަވާއިދުގައިވާ ގޮތުގެ މަތީން ބަހައިލައިގެން ފައިސާ ދެއްކުމުގެ ފުރުސަތު ދިން ނަމަވެސް، އެއްބަސްވުމުގެ ދަށުން ބަހައިލެވޭ ފައިސާ ދެއްކުމަށް ކަނޑައަޅާ މުއްދަތުގެ ތެރޭގައި ނުހިމެނޭ ފައިސާއެއް ދައްކަންޖެހޭ ނަމަ، ކަމާ ގުޅޭ އުސޫލުތަކާ އެއްގޮތަށް ގަވާއިދުން އެ ފައިސާ ދައްކަމުން ގެންދަންވާނެއެވެ.

(ނ) މި ގަވާއިދުގައި ބަޔާންކޮށްފައިވާ މުއްދަތު ގުނާނީ، ސަރުކާރު ބަންދު ދުވަސްތަކާއި ރަސްމީ ބަންދު ދުވަސްތައް ހިމަނައިގެންނެވެ.

11 ވަނަ މާއްދާ - މާނަކުރުން

މި ގަވާއިދުގައި އެހެން ގޮތަކަށް ބަޔާންކޮށްފައި ނުވާހައި ހިނދަކު، ތިރީގައިވާ އަކުރުތަކުގައިވާ އިބާރާތްތަކާއި ލަފުޒުތަކަށް ދީފައިވަނީ އެ އަކުރުތަކުގައި ދީފައިވާ މާނައެވެ. 

(ހ) "ކޮމިޓްމަންޓް ފީ" ކަމަށް ބުނެފައި އެވަނީ، މި ގަވާއިދުގެ ދަށުން އިންސްޓޯލްމަންޓަށް ބަހައި ލައިގެން ފައިސާ ދެއްކުމުގެ ފުރުސަތު ލިބިގަތުމަށް، އިންސްޓޯލްމަންޓް އެއްބަސްވުމުގައި ސޮއިކުރުމުގެ ކުރިން، މި ގަވާއިދުގެ ޖަދުވަލު 1 ގައިވާ ގޮތުގެ މަތީން މިނިސްޓްރީއަށް ދައްކަންޖެހޭ ފައިސާއަށެވެ.

(ށ) "އެހެނިހެން ޖޫރިމަނާ" ކަމަށް ބުނެފައި އެވަނީ، އަހަރީފީއާއި، އަހަރީފީ ނުދެއްކުމުގެ ސަބަބުން އަރާ ޖޫރިމަނާގެ ފައިސާ ފިޔަވައި، ގާނޫނު ނަންބަރު 2009-05 (އެއްގަމު ދަތުރުފަތުރުގެ ގާނޫނާއި)، ގާނޫނު ނަންބަރު 1978-69 (ކަނޑުގައި ދުއްވާ އުޅަނދުތައް ދުއްވުމާބެހޭ ގާނޫނު) ގެ ދަށުން ކުރެވޭ ޖޫރިމަނާތަކަށެވެ.

(ނ) "ގުދުރަތީ ކާރިސާ" ކަމަށް ބުނެފައި އެވަނީ، މުޖުތަމައެއްގެ ނުވަތަ ޖަމާއަތެއްގެ އަމިއްލަ ވަސީލަތްތައް ބޭނުންކޮށްގެން ތަހައްމަލުނުކުރެވޭ ގޮތަށް، އެ ބައެއްގެ އިންސާނީ ކެރިކުޅަދާނަކަމަށާއި، މާއްދީ ވަސީލަތްތަކަށާއި، އިގްތިސާދީ ވަސީލަތްތަކަށާއި ތިމާވެށްޓަށް ގެއްލުންވެ، އާންމު ދިރިއުޅުމަށް ހުރަސްއެޅޭ ފަދަ ބޮޑެތި ހާދިސާތަކަށެވެ.

(ރ) "މިނިސްޓްރީ" ކަމަށް ބުނެފައި އެވަނީ، އެއްގަމު ދަތުރުފަތުރާއި ކަނޑު ދަތުރުފަތުރުގެ ކަންތައްތައް ހަމަޖެއްސުމަށް އެ ވަގުތަކު ސަރުކާރުން ހަމަޖައްސައިފައިވާ މިނިސްޓްރީއަށެވެ.

12 ވަނަ މާއްދާ - އަމަލުކުރަން ފެށުން

މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ. 

ޖަދުވަލު 1

ކޮމިޓްމަންޓް ޕޭމަންޓާއި އިންސްޓޯލްމަންޓުގެ އަދަދު ކަނޑައަޅާ ތާވަލު 

މައި ގާނޫނު

1. އެއްގަމު ދަތުރުފަތުރުގެ ގާނޫނު (ގާނޫނު ނަންބަރު 2009-05)
2. ކަނޑުގައި ދުއްވާ އުޅަނދުތައް ދުއްވުމާބެހޭ ގާނޫނު (ގާނޫނު ނަންބަރު 1978-69)