މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު (ގަވާއިދު ނަންބަރު 2011-43) އަށް 31 ވަނަ އިސްލާހު ގެނައުމުގެ ގަވާއިދު

(މި ގަވާއިދަށް އަމަލުކުރަން ފެށީ 25 ނޮވެމްބަރު 2024 ގައި)

ގަވާއިދު ނަންބަރު 2011-43 (މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު) އަށް އަންނަނިވި އިސްލާހުތައް ގެނައުން.

1 ވަނަ މާއްދާ - ބުނެވިދިޔަ ގަވާއިދުގެ 7 ވަނަ މާއްދާގެ (ނ) އަންނަނިވި ގޮތަށް އިސްލާހުކުރުން.

(ނ) މި މާއްދާގައި އެހެން ގޮތަކަށް ބަޔާންކޮށްފައި އޮތް ނަމަވެސް، ޓޫރިޒަމް ދާއިރާގެ މުދަލާއި ހިދުމަތް ފޯރުވައިދޭ ތަނެއްގެ ނުވަތަ އުޅަނދެއްގެ މުވައްޒަފުންނަށް ހާއްސަކުރެވިގެން އެއްވެސް ފަރާތަކުން އެ ތަނުގައި ނުވަތަ އެ އުޅަނދުގައި ހިންގާ ފިހާރައާއި ކެފޭ ރަޖިސްޓަރ ކުރަންވާނީ އެ ފަރާތުން ހިންގާ ޓެކްސް ނެގޭ އެހެން ހަރަކާތްތަކާ ވަކިންނެވެ.

2 ވަނަ މާއްދާ - ބުނެވިދިޔަ ގަވާއިދުގެ 7 ވަނަ މާއްދާގެ (ނ) ގެ ފަހަތަށް އަންނަނިވި ގޮތަށް އަކުރެއް އިތުރުކުރުން.

(ރ) މި މާއްދާގެ (ނ) ގައި އެހެން ބަޔާންކޮށްފައި އޮތް ނަމަވެސް، ޓޫރިޒަމް ދާއިރާގެ މުދަލާއި ހިދުމަތް ފޯރުވައިދޭ ތަނުގައި، މި މާއްދާގެ (ނ) ގައި ބަޔާންކޮށްފައިވާ ފަދަ ފިހާރަތަކާއި ކެފޭތައް ހިންގާ ފަރާތަކީ އެއްފަރާތެއް ކަމުގައި ވާ ނަމަ، އެ ކެފޭތަކާއި ފިހާރަތައް ރަޖިސްޓަރ ކުރަންވާނ އެކުގައެވެ. 

3 ވަނަ މާއްދާ - ބުނެވިދިޔަ ގަވާއިދުގެ 43 ވަނަ މާއްދާގެ (ބ) އަންނަނިވި ގޮތަށް އިސްލާހުކުރުން.

(ބ) ާނޫނުގެ 15 ވަނަ މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ތަނެއް ނުވަތަ އުޅަނދެއް ހިންގާ ފަރާތަކުން، އެ ތަނެއްގެ ނުވަތަ އެ އުޅަނދެއްގެ މުވައްޒަފުންނަށް ހާއްސަކުރެވިގެން ހިންގާ ފިހާރައަކަށް ނުވަތަ ކެފޭއަކަށް މުދަލާއި ހިދުމަތް ފޯރުވައިދޭ ނަމަ އަދި އެ ފިހާރަ ނުވަތަ ކެފޭ ހިންގާ ފަރާތަކީ އެ ތަން ނުވަތަ އެ އުޅަނދު ހިންގާ ފަރާތް ކަމުގައި ވާ ނަމަ، އަދި އެ ފިހާރަ ނުވަތަ ކެފޭ ހިންގާ ފަރާތް ޖީ.އެސް.ޓީ. އަށް ރަޖިސްޓަރ ކޮށްފައިވާ ނަމަ، އެ ފަދަ މުދަލާއި ހިދުމަތުން، ގާނޫނުގެ 15 ވަނަ މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ތަނުން ނުވަތަ އުޅަނދުން އައުޓްޕުޓް ޓެކްސް ނަގާކަށް ނުޖެހޭނެއެވެ.

4 ވަނަ މާއްދާ - ބުނެވިދިޔަ ގަވާއިދުގެ 57 ވަނަ މާއްދާގެ ފަހަތަށް އަންނަނިވި ގޮތަށް މާއްދާއެއް އިތުރުކުރުން.

ދިވެހިރާއްޖޭގެ އެތެރޭގައި ވައިގެ ދަތުރުފަތުރުގެ ހިދުމަތް ދޭ ފަރާތްތަކުން ވިއްކާ މުދަލާއި ދޭ ހިދުމަތް 1-57.

(ހ) ގާނޫނުގެ 15 ވަނަ މާއްދާގެ (ހ) ގެ (5) ވަނަ ނަންބަރުގެ ބޭނުމަށް، "ދިވެހިރާއްޖޭގެ އެތެރޭގައި ވައިގެ ދަތުރުފަތުރުގެ ހިދުމަތް ދޭ ފަރާތްތަކުން ދިވެހިރައްޔިތުން ފިޔަވައި އެހެން ފަރާތްތަކަށް ވިއްކާ މުދަލާއި ދޭ ހިދުމަތް" ކަމަށް ބުނެފައި އެ ވަނީ، ދިވެހިރައްޔިތުން ފިޔަވައި އެހެން ފަރާތްތަކާއި އެ ފަރާތްތަކާއެކު އުފުލާ ކާގޯ، ދިވެހިރާއްޖޭގެ އެއް ތަނުން އަނެއް ތަނަށް ވައިގެ މަގުން ގެންގޮސްދިނުމަށެވެ.

(ށ) މި މާއްދާގެ (ހ) ގައި އެހެން ބަޔާންކޮށްފައި އޮތް ނަމަވެސް، ދިވެހިރައްޔިތުން އުފުލުމަށް ޗާޓަރުކުރާ ފްލައިޓް ފިޔަވައި އެ ނޫން ބޭނުންތަކަށް ޗާޓަރުކުރާ ފްލައިޓްތަކަކީ، ދިވެހިރައްޔިތުން ފިޔަވައި އެހެން ފަރާތްތަކަށް ފޯރުވައިދޭ ހިދުމަތެއްގެ ގޮތުގައި ބެލެވޭނެއެވެ.

(ނ) އެތެރޭގެ ވައިގެ ދަތުރުފަތުރުގެ ހިދުމަތް ފޯރުވައިދެވޭ ފަރާތްތަކުގެ ތެރެއިން ގާނޫނުގެ 16 ވަނަ މާއްދާގައި ބަޔާންކޮށްފައިވާ ޖީ.އެސް.ޓީ. ނެގޭ ރޭޓު ރައްދުވާ ކޮންމެ ދިވެހިރައްޔިތެއްގެ ދިވެހިރައްޔިތެއްކަން އަންގައިދޭ ކާޑު ނަންބަރ،ު ކޮންމެ ފްލައިޓެއްގެ ފްލައިޓް މެނިފެސްޓުގައި ބަޔާންކޮށްފައި އޮންނަންވާނެއެވެ. ފްލައިޓް މެނިފެސްޓުގައި އެ ނަންބަރު ބަޔާންކޮށްފައި ނެތް ނަމަ، އަދި އެ ފަސިންޖަރަކީ ދިވެހިރައްޔިތެއްކަން އެހެން ގޮތަކުން ވެސް ސާބިތުކޮށް ނުދެވިއްޖެ ނަމަ، އެ ފަރާތަކަށް ފޯރުވައިދިން ހިދުމަތުން ގާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓުގައި، ވައިގެ ދަތުރުފަތުރުގެ ހިދުމަތް ދޭ ފަރާތުން މީރާއަށް ޖީ.އެސް.ޓީ. ދައްކަންޖެހޭނެއެވެ.

5 ވަނަ މާއްދާ - ބުނެވިދިޔަ ގަވާއިދުގެ 105-1 ވަނަ މާއްދާގެ ފަހަތަށް އަންނަނިވި ގޮތަށް މާއްދާއެއް އިތުރުކުރުން.

ޓޫރިޒަމް ދާއިރާގެ މުދަލާއި ހިދުމަތް ދޭ ތަންތަނުގައި މުވައްޒަފުންނަށް ހާއްސަކުރެވިގެން ހިންގާ ފިހާރަތަކާއި ކެފޭތައް 2-105.

ގާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓުގައި ޓެކްސް ދައްކަންޖެހޭ މުއާމަލާތްތަކުން ޓެކްސް ދެއްކުމުން އެއްކިބާވުމަށް، ޓޫރިޒަމް ދާއިރާގެ މުދަލާއި ހިދުމަތް ދޭ ތަންތަނުގެ މުވައްޒަފުންނަށް ހާއްސަކުރެވިގެން ހިންގާ ފިހާރަތައް ނުވަތަ ކެފޭތައް ބޭނުންކުރާކަމަށް މީރާއަށް ގަބޫލުކުރެވޭ ނަމަ، އެ ފަދަ މުއާމަލާތްތަކުން ޖީ.އެސް.ޓީ. ނަގަންޖެހޭ ރޭޓަކީ ގާނޫނުގެ 15 ވަނަ މާއްދާގެ (ށ) ގައި ބަޔާންކޮށްފައިވާ ރޭޓެވެ.

6 ވަނަ މާއްދާ - ބުނެވިދިޔަ ގަވާއިދުގެ 3-113 ވަނަ މާއްދާގެ (ނ) ގެ ފަހަތަށް އަންނަނިވި ގޮތަށް އަކުރެއް އިތުރުކުރުން.

(ރ) ގަވާއިދު ނަންބަރު 2011-43 (މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު) އަށް 31 ވަނަ އިސްލާހު ގެނައުމުގެ ގަވާއިދަށް އަމަލުކުރަން ފަށާ ތާރީހުން ފެށިގެން، ޓެކްސް ރޫލިންގ ނަންބަރު 2014-22 (މުދަލާއި ހިދުމަތުގެ އަގުން ނެގޭ ޓެކްސް: ދިވެހިރައްޔިތުންނަށް ފޯރުވައިދޭ ދިވެހިރާއްޖޭގެ އެތެރޭގެ ވައިގެ ދަތުރުފަތުރުގެ ހިދުމަތްތަކާއި ޓޫރިޒަމް ދާއިރާގެ މުދަލާއި ހިދުމަތް ދޭ ތަންތަނުގެ މުވައްޒަފުންނަށް ފޯރުވައިދޭ ހިދުމަތްތައް) އުވުނީއެވެ.

7 ވަނަ މާއްދާ - މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ.

މައި ގަވާއިދު

މުދަލާއި ހިދުމަތުގެ އަގުން ޓެކްސް ނެގުމުގެ ގަވާއިދު (ގަވާއިދު ނަންބަރު 2011-43)