ސުޕީރިއަރ ކޯޓުތަކަށް ފަނޑިޔާރުން އައްޔަނުކުރުމުގައި އަމަލުކުރާނެ ގޮތުގެ ގަވާއިދު

(ގަވާއިދު ނަންބަރު 2019-1009)

1 ވަނަ މާއްދާ - ތައާރަފު

މިއީ ގާނޫނުއަސާސީގެ 159 ވަނަ މާއްދާގެ (ނ) ގެ 1 ވަނަ ނަންބަރާއި ގާނޫނު ނަންބަރު 2008-10 (ޖުޑީށަލް ސަރވިސް ކޮމިށަނުގެ ގާނޫނުގެ) 21 ވަނަ މާއްދާގެ (ނ) ގެ 1 ވަނަ ނަންބަރުން ބާރު ލިބިގެން، ގާނޫނު ނަންބަރު 2010-13 (ދިވެހިރާއްޖޭގެ ފަނޑިޔާރުންގެ ގާނޫނު) ގެ 18 ވަނަ މާއްދާގެ (ހ) އާއި 15 ވަނަ މާއްދާގައިވާ ށަރުތުތަކަށް ބަލައި ސުޕީރީއަރ ކޯޓުތަކަށް ފަނޑިޔާރުން އައްޔަނުކުރުމުގައި އަމަލުކުރާނެ ގޮތުގެ ގަވާއިދެވެ.

2 ވަނަ މާއްދާ - އިންޓަވިއު ކުރާނެ ދާއިރާތަކާއި ސުވާލުތައް ކަނޑައެޅުން

(ހ) އިންޓަވިއު ކުރާނެ ދާއިރާތަކާއި އެ ދާއިރާތަކަށް ކަނޑައަޅައިފަ އިވާ މާކްސް ތިރީގައި މި ވަނީއެވެ.

ދުސްތޫރީ އިލްމުގެ ހުނަރުވެރިކަމާއި ގާނޫނީ އިލްމުގެ ހުނަރުވެރިކަން ހުރި މިންވަރު (7.5 މާކްސް)
އިސްލާމީ ށަރީއާގެ އިލްމުގެ ހުނަރުވެރިކަން ހުރި މިންވަރު (7.5 މާކްސް)
މިނިވަންކަމާއި މުސްތަގިއްލުކަމާއި ހަމަހަމަކަމާއި އިންސާފުވެރިކަމުގެ ސިފަހުރި މިންވަރު (4.5 މާކްސް)
ދިވެހިރާއްޖޭގެ ށަރުއީ ނިޒާމަށް ފަރިތަވެފައިވާ މިންވަރު (3.5 މާކްސް) ވާހަކަ ދެއްކުންތެރިކަމާއި ރޭވުންތެރިކަމާއި ލީޑަރށިޕްގެ ހުނަރު ހުރި މިންވަރު (3.5 މާކްސް)
ހުށިޔާރުކަމާއި މައްސަލަތައް ހައްލުކުރުމުގެ ހުނަރު ހުރި މިންވަރު (3.5 މާކްސް)

(ށ) މި މާއްދާގެ (ހ) ގައި ބަޔާންކޮށްފައިވާ ދާއިރާތަކުން ކުރެވޭނެ ސުވާލުތައ،ް އިންޓަވިއު ޕެނަލުން ކަނޑައަޅަންވާނެއެވެ.

3 ވަނަ މާއްދާ - ށަރުތު ހަމަވާ ފަރާތްތަކާއި އިންޓަވިއުއަށް ށޯޓްލިސްޓްކުރެވޭ ފަރާތްތައް ކަނޑައެޅުން

(ހ) ފަނޑިޔާރުކަމަށް ކުރިމަތިލައިފައިވާ ކެންޑިޑޭޓުންގެ ތެރެއިން ށަރުތު ހަމަވާ ކެންޑިޑޭޓުންގެ ލިސްޓެއް އިންޓަވިއު ޕެނަލުން އެކުލަވައިލާން ވާނެއެވެ.

(ށ) މި މާއްދާގެ (ހ) ގައިވާ ލިސްޓުގައިވާ ކެންޑިޑޭޓުންގެ އަދަދު، އި އުލާނުގައިވާ އަދަދުގެ 2 ގުނައަށްވުރެ އިތުރުވާނަމަ، މި ގަވާއިދުގެ ޖަދުވަލު 1 ގައި ބަޔާންކޮށްފައިވާ ކްރައިޓީރިއާގައިވާ ތައުލީމާއި ތަޖުރިބާއާއި އަހްލާގާއި ސުލޫކުގެ ބައިން އެންމެ މަތީން މާކްސް ލިބޭ މީހުންގެ ތަރުތީބަށް ބަލައި، ބޭނުންވާ އަދަދުގެ ދެގުނަޔަށްވާ އަދަދަށްވުރެ މަދުނުވާ އަދަދަކަށް ށޯޓްލިސްޓް ކުރަންވާނެއެވެ.

(ނ) މި މާއްދާގެ (ހ) ގައިވާ ގޮތުގެމަތީން ށަރުތު ހަމަނުވާކަމަށް އިންޓަވިއު ޕެނަލުން ކަނޑައަޅަންވާނެއެވެ.

4 ވަނަ މާއްދާ - އިންޓަވިއު

(ހ) ށޯޓްލިސްޓް ކުރެވޭ ހުރިހާ ކެންޑިޑޭޓުންނާ އިންޓަވިއު ކުރަންޖެހޭނެއެވެ.

(ށ) އިންޓަވިއު ބާއްވާނެ ތާރީހާއި ވަގުތު، އިންޓަވިއު ޕެނަލުން ކަނޑައެޅުމަށްފަހު،ކޮމިށަނުގެ ވެބްސައިޓުގައި އެކަން އާންމުކޮށް އިއު ލާނު ކުރަންވާނެއެވެ. އަދި 3 ވަނަ މާއްދާގެ (ށ) ގައިވާ ގޮތުގެމަތިން އިންޓަވިއުއަށް ށޯޓްލިސްޓް ކުރެވުނު ފަރާތްތަކަށް،އިންޓަވިއުއަށް ށޯޓްލިސްޓްކުރެވުނު ކަމާއި، އިންޓަވިއު ބާއްވާނެ ތާރީހާއި ވަގުތު އަންގަންވާނެއެވެ.

(ނ) އިންޓަވިއު ޕެނަލުން މާކްސް ދޭންވާނީ، މި އުސޫލުގެ ޖަދުވަލު 1 ގައިވާ ކްރައިޓީރިއާ އެއްގޮތްވާ ގޮތުގެ މަތީންނެވެ. އަދި ކްރައިޓީރިއާ އެއްގޮތްވާ ގޮތުގެމަތީން އިންޓަވިއުގެ ބައިން ކޮންމެ ކެންޑިޑޭޓަކަށް އިންޓަވިއު ޕެނަލުގައި ހިމެނޭ މެންބަރުން މާކްސް ދޭނެ ށީޓެއް ތައްޔާރު ކުރަންޖެހޭނެއެވެ.

(ޅ) އިންޓަވިއުކޮށް ނިމުމަށްފަހު، އިންޓަވިއު ޕެނަލުގެ މެންބަރުން އިންޓަވިއުއަށް ދީފައިވާ މާކުހާއި ކްރައިޓީރިއާގައިވާ އެހެން ބައިތަކަށް ލިބިފައިވާ މާކްސް އެއްކުރުމަށްފަހު، ކޮންމެ ކެންޑިޑޭޓަކަށް ލިބުނު ޖުމުލަ މާކްސް ހިމެނޭގޮތަށް ހުރިހާ ކެންޑިޑޭޓުންނަށް ލިބުނު މާކްސްތައް އެނގޭނެ ލިސްޓެއް ހަދަންވާނެއެވެ. އަދި އެ ލިސްޓު ތަރުތީބު ކުރާނީ އެންމެ މަތިން މާކްސް ލިބިފައިވާ ކެންޑިޑޭޓުންގެ ތަރުތީބުންނެވެ.

(ކ) އިންޓަވިއުކޮށް ނިމުމަށްފަހު، މި މާއްދާގެ (ޅ) ގައި ބަޔާންކޮށްފައިވާ މާކްސްދީފައިވާ ގޮތުގެ ލިސްޓު، ކޮމިށަނަށް ހުށަހަޅަންވާނެއެވެ. މިގޮތަށް ހުށަހަޅާއިރު، ކޮމިށަނުގެ މެންބަރުންގެ މައުލޫމާތަށްޓަކައި ޕެނަލުގެ މެންބަރުން ވަކިވަކި ކެންޑިޑޭޓުންނަށް މާކްސް ދިން ށީޓުތައް ރިފަރެންސްގެ ގޮތުގައި ކޮންމެ މެންބަރެއްގެ ފައިލުގައި އޮންނަން ވާނެއެވެ.

5 ވަނަ މާއްދާ - އައްޔަނުކުރާނެ ފަނޑިޔާރުން ކަނޑައެޅުން

(ހ) އިންޓަވިއު ޕެނަލުގެ މާކްސް ލިސްޓަށް ބެލުމަށްފަހު، ފަނޑިޔާރުކަމަށް އައްޔަނުކުރާނެ ފަރާތްތައް ކަނޑައަޅާނީ ކޮމިށަނުންނެވެ.

(ށ) 4 ވަނަ މާއްދާގެ (ޅ) ގައި ބުނާ މާކްސް ލިސްޓަށް ބެލުމަށްފަހު، ލިސްޓުގެ އެންމެ މަތީން މާކްސް ލިބިފައިވާ ކެންޑިޑޭޓުންގެ ތަރުތީބުން ފަހަރަކު ކެންޑިޑޭޓަކަށް ވޯޓުނަގައި، ކޮމިށަނުގެ އަގުލަބިއްޔަތުން ނުވަތަ އިއްތިފާގުން އެކަމަށް އެންމެ ފުރަތަމަހޮވޭ ކެންޑިޑޭޓުންގެ ތަރުތީބުން ފަނޑިޔާރުން އައްޔަނުކުރަން ނިންމަންވާނެއެވެ.

(ނ) މި ގަވާއިދުގެ 4 ވަނަ މާއްދާގެ (ޅ) ގައި ބަޔާންކޮށްފައިވާ ލިސްޓުގައިވާ ނަންތަކަށް ވޯޓަށް އަހަންވާނީ ނަންތައް ތަރުތީބު ކުރެވިފައިވާ ގޮތަށް ފަހަރަކު ނަމަކަށެވެ. މިގޮތަށް ވޯޓަށް އެހުމުން ވޯޓްދޭނީ އަތް އުފުލައިގެންނެވެ. އެންމެފުރަތަ ކޮމިށަނުން އަގުލަބިއްޔަތު ލިބޭ ކެންޑިޑޭޓުންގެ ތަރުތީބުން ފަނޑިޔާރުކަމަށް އައްޔަނުކުރަން ނިންމަންވާނެއެވެ. ލިސްޓުގެ އެންމެ މަތިން މާކްސް ލިބިފައިވާ ފަރާތްތަކަށް ވޯޓް ނުދިންމެންބަރަކު ވޯޓު ނުދިން ސަބަބު ޖަލްސާގައި ހާމަކުރަން ވާނެއެވެ.

(ރ) ދެ ކެންޑިޑޭޓަކަށް ނުވަތަ އެއަށްވުރެ ގިނަ ކެންޑިޑޭޓަކަށް ލިބިފައިވާ ޖުމުލަ މާކްސް އެއްވަރުވެއްޖެނަމަ، ފަނޑިޔާރުކަމަށް އައްޔަނުކުރުމަށް ފުރަތަމަ ވޯޓަށް އަހާނެ ކެންޑިޑޭޓުން ކަނޑައަޅާނީ ގުރުއަތުލައިގެންނެވެ.

6 ވަނަ މާއްދާ - ފަނޑިޔާރުކަމަށް އައްޔަނުކުރުން

(ހ) އިންޓަވިއު ކުރެވުނު ފަރާތްތަކުގެ ތެރެއިން ފަނޑިޔާރުކަމަށް ހޮވުނު ފަރާތްތަކަށް ހޮވުނުކަން، ނުހޮވުނު ފަރާތްތަކަށް ނުހޮވުނުކަން، ކޮމިށަނުން އަންގަންވާނެއެވެ.

(ށ) ފަނޑިޔާރުކަމަށް އައްޔަނުކުރުމަށް ކޮމިށަނުން ނިންމައިފައިވާ ކެންޑިޑޭޓުން ފަނޑިޔާރުކަމަށް އައްޔަނުކުރުމަށް އިދާރީގޮތުން ކުރަންޖެހޭ އެންމެހައި ކަންތައްތައް ރައީސްގެ މަށްވަރާގެ މަތިން ކޮމިށަނުގެ އިދާރާއިން ކޮށް ނިން މަން ވާނެއެވެ.

(ރ) އިންޓަވިއުއަށް ކަނޑައަޅައިފައިވާ މާކުހުގެ ތެރެއިން އިންޓަވިއު އިން ފާސްވުމަށްޓަކައިމަދުވެގެން ދެބައިކުޅައެއްބައި މާކްސް ލިބެންވާނެއެވެ. އަދި އެ އަދަދަށް މާކްސް ލިބިފައިނުވާ ކެންޑިޑޭޓުން ފަނޑިޔާރުކަމަށް ހޮވުމުގައި ޑިސްކޮލިފައިވާނެއެވެ.

(ބ) އިންޓަވިއު ކުރެވޭ ކޮންމެ ކެން ޑިޑޭޓަކަށް ވެސް މާކްސް ދިނުމަށްޓަކައި، އިންޓަވިއު ޕެނަލުގައި ހިމެނޭ ކޮންމެ ފަރާތަކަށްވެސް އިންޓަވިއުއަށް ވަކިން މާކްސްދޭނެ ށީޓެއް އޮންނަން ވާނެއެވެ. އަދި އިންޓަވިއު ނިމުމުން، އިންޓަވިއު ޕެނަލުގައި ހިމެނޭ ފަރާތްތަކުން މާކްސް ށީޓްތަކުގައި ވަގުތުން ސޮއި ކުރަން ވާނެއެވެ.

މި ގަވާއިދުގެ އަންނަނިވި ޖަދުވަލު އެޓޭޗްކުރެވިފައިވާ ފައިލުގައި ހިމެނިފައިވާނެ)

ޖަދުވަލު 1

ސުޕީރިއަާކޯޓަށަްފަނޑިޔާރުނަް އަައްޔަަނަުކުރުމުގައަިމާކްސަްދޭނަެގޮތުގަެކްރައިޓީރިއާ

މައި ގާނޫނު

ގުޅުންހުރި ގަވާއިދު

ކޯޓުތަކަށް ފަނޑިޔާރުން އައްޔަނުކުރުމުގައި އަމަލުކުރާނެ ގޮތުގެ ގަވާއިދު (ގަވާއިދު ނަންބަރު 2019-1069)

ރިފަރެންސް

7wY_2019-R-1009 - Judicial Appointments For Superior Courts.pdf