ޕާޓްނަރށިޕްގެ ގާނޫނު (ގާނޫނު ނަންބަރު 2011-13) އަށް 1 ވަނަ އިސްލާހު ގެނައުމުގެ ގާނޫނު
(ގާނޫނު ނަންބަރު 2016-02)
ގާނޫނު ނަންބަރު 2011-13 (ޕާޓްނަރށިޕްގެ ގާނޫނު) އަށް އަންނަނިވި އިސްލާހުތައް ގެނައުން.
1 ވަނަ މާއްދާ – ބުނެވިދިޔަ ގާނޫނުގެ 6 ވަނަ މާއްދާ އަންނަނިވި ގޮތަށް އިސްލާހުކުރުން
6. ޕާޓްނަރުންގެ އަދަދު
ޕާޓްނަރށިޕްގައި އެންމެ ގިނަވެގެން ހިމެނޭނެ ޕަޓްނަރުންގެ އަދަދު، ޕާޓްނަރށިޕްގެ އެއްބަސްވުމުގައި ބަޔާންކުރުންވާނެއެވެ.
2 ވަނަ މާއްދާ – ބުނެވިދިޔަ ގަނޫނުގެ 10 ވަނަ މާއްދާގެ (ހ) އަންނަނިވި ގޮތަށް އިސްލަހުކުރުން.
10. މެނޭޖިންގ ޕާޓްނަރު
(ހ) ކޮންމެ ޕާޓްނަރށިޕެއްގައި މެނޭޖިންގ ޕާޓްނަރެއް ހުންނަންވާނެއެވެ. ލިމިޓެޑް ލަޔަބިލިޓީ ޕާޓްނަރށިޕެއްގެ މެނޭޖިންގ ޕާޓްނަރެއްގެ ގޮތުގައި، ތައިބީ ށަހްސެއް ނުވަތަ ގާނޫނީ ށަހްސެއް އައްޔަންކުރެވިދާނެއެވެ.
3 ވަނަ މާއްދާ – ބުނެވެދިޔަ ގާނޫނުގެ 10 ވަނަ މާއްދާގެ (ނ) އަންނަނިވި ގޮތަށް އިސްލާހުކުރުން.
10. (ނ) މެނޭޖިންގ ޕާޓްނަރަކީ އާންމު ގޮތެއްގައި ދިވެހިރާއްޖޭގައި ދިރިއުޅޭ ފަރާތަކަށް ވާންވާނެއެވެ.
4 ވަނަ މާއްދާ – ބުނެވިދިޔަ ގާނޫނުގެ 11 ވަނަ މާއްދާގެ (ނ) އަންނަނިވި ގޮތަށް އިސްލާހުކުރުން.
11. (ނ) ޕާޓްނަރށިޕް ގުޅޭގޮތުން ރެޖިސްޓްރާއާއެކު ކުރަންޖެހޭ މުއާމަލަތްތައް ކުރުން؛
5 ވަނަ މާއްދާ - ބުނެވިދިޔަ ގާނޫނުގެ 11 ވަނަ މާއްދާގެ (ރ) އަންނަނިވި ގޮތަށް އިސްލާހުކުރުން.
11. (ރ) މި ގާނޫނުގެ ދަށުން ހަދާ ގަވާއިދާއި، ޕާޓްނަރށިޕްގެ އެއްބަސްވުމުގައި، ޕާޓްނަރށިޕްގެ މެނޭޖިންގ ޕާޓްނަރުގެ މަސްއޫލިއްޔަތުކަމަށް ބަޔާންކޮށްފައިވާ ކޮންމެ ކަމެއް ކުރުން؛ އަދި
6 ވަނަ މާއްދާ – ބުނެވިދިޔަ ގާނޫނުގެ 11 ވަނަ މާއްދާގެ (ރ) ގެ ފަހަތަށް އަންނަނިވި އަކުރު އިތުރުކުރުން.
11. (ބ) ލިމިޓެޑް ލަޔަބިލިޓީ ޕާޓްނަރށިޕެއް ނަމަ، ދަރަންޏަށް ޒިންމާވުމާއި، ގާނޫނީ ގޮތުން ކުރަންޖެހޭ ހުރިހާ ކަމެއް ފުރިހަމަކުރުން.
7 ވަނަ މާއްދާ – ބުނެވިދިޔަ ގާނޫނުގެ 23 ވަނަ މާއްދާގެ (ނ) އަންނަނިވި ގޮތަށް އިސްލަހުކުރުން.
23. (ނ) ލިމިޑެޓް ލަޔަބިލިޓީ ޕާޓްނަރށިޕެއްގެ ޕާޓްނަރުން ދަރަންޏަށް ޒިންމާވާންވާނީ އަންނަނިވި ގޮތުގެމަތިންނެވެ.
- އެފަރާތަކުން އަގު އަދާކޮށްފައިވަ ހިއްސާގެ މިންވަރާއި، ހިއްސާ އެކަށައެޅުމަށްފަހު އަގު އަދާކޮށްފައިނުވާ ހިއްސާ އެކުލެވޭނަމަ، ޕާޓްނަރށިޕްގެ އެއްބަސްވުމުގައި ބަޔާންކޮށްފައިވާ ޖުމްލަ ހިއްސާވާ މިންވަރަށް؛ ނުވަތަ
- ޕާޓްނަރށިޕްގެ އެއްބަސްވުމުގައި ޒިންމާ އުފުލާނެކަމަށް ބަޔާންކޮށްފައިވާ، މި އަކުރުގެ (1) ވަނަ ނަންބަރުގައި ބުނާ މިންވަރަށްވުރެ، މަތީ މިންވަރަކަށް.
8 ވަނަ މާއްދާ – މި ގާނޫނަށް އަމަލުކުރަން ފަށާނީ، މި ގަނޫނު ދިވެހި ސަރުކާރުގެ ގެޒެޓުގައި ށާއިއުކުރާ ދުވަހުން ފެށިގެންނެވެ.
މައި ގާނޫނު
ޕާޓްނަރށިޕްގެ ގާނޫނު (ގާނޫނު ނަންބަރު 2011-13)
ކޮންސޮލިޑޭޓެޑް ގާނޫނު
ޕާޓްނަރށިޕްގެ ގާނޫނު (ކޮންސޮލިޑޭޓެޑް) (ކޮންސޮލިޑޭޓެޑް ނަންބަރު 2011-13)
ކިޔުންތެރިންގެ ހިޔާލު