(މި އުސޫލަށް އަމަލުކުރަން ފެށީ 8 ނޮވެމްބަރު 2024 ގައި)

 

1 ވަނަ މާއްދާ - ތައާރަފާއި ނަން

(ހ) މިއ،ީ މާލީ ދަތިކަމުގެ ސަބަބުން ގެދޮރު އިމާރާތްކުރުމަށް ދަތިވާ ފަރާތްތަކަށް މާލީގޮތުން ހައްލު ހޯދައިދިނުމުގެ ގޮތުން، ސަރުކާރުން އެކަށައަޅައިފައިވާ ސިޔާސަތުގެ ދަށުން، ގެދޮރު އިމާރާތްކުރުމަށް "ހިޔާވެހި ފައިނޭންސިންގ - ފަހިމާލެ" ނަމުގައި، އިސްލާމީ މިންގަނޑުތަކާ އެއްގޮތަށް ދޫކުރާ ފެސިލިޓީ ދޫކުރުމަށް ކަނޑައަޅައިފައިވާ އުސޫލެކެވެ.

(ށ) މި އުސޫލަށް ކިޔާނީ، "ހިޔާވެހި ފައިނޭންސިންގ އުސޫލު – ފަހިމާލެ" އެވެ.

(ނ) މި ސްކީމް ހާއްސަކުރެވިފައިވަނީ މާލެއަށެވެ.

 

2 ވަނަ މާއްދާ - މަގުސަދު 

މި އުސޫލުގެ މަގުސަދަކީ، ދިވެހި ރައްޔިތުންގެ ތެރެއިން ގެދޮރު އިމާރާތްކުރުމުގެ މާލީ ފުދުންތެރިކަން ނެތް ފަރާތްތަކަށ،ް ލުއިފަސޭހަ އުސޫލުތަކެއްގެ ދަށުން ގެދޮރު އިމާރާތްކުރުމަށް މަގުފަހިކޮށްދިނުމެވެ. މި ސްކީމުގެ ދަށުން ދޫކުރެވޭ ފެސިލިޓީ ބޭނުންކުރަންވާނީ ހަމައެކަނި ގެދޮރު އިމާރާތްކުރުމަށާއި، ހަދަން ފަށައި ނުނިމިހުރި އިމާރާތްތައް ނިންމުމަށެވެ.

 

3 ވަނަ މާއްދާ - ފެސިލިޓީ ދޫކުރުން

މި ސްކީމުގެ ދަށުން "ފައިނޭންސިންގ ފެސިލިޓީ" ދޫކުރެވޭނީ އަންނަނިވި ކަންކަމަށެވެ.

(ހ) އަލަށް އިމާރާތެއް ތަރައްގީކުރުމަށް.

(ށ) ހަދަން ފަށައި ނުނިމި ހުރި އިމާރާތެއް ނިންމުމަށް.

 

4 ވަނަ މާއްދާ - ފެސިލިޓީ ދޫކުރުމަށް ހަމަޖެހިފައިވާ ގޮތް

މި ސްކީމުގެ ދަށުން "ފައިނޭންސިންގ ފެސިލިޓީ" ދޫކުރުމަށް ހަމަޖެހިފައިވަނީ އަންނަނިވި ގޮތަށެވެ. 

(ހ) "ހިޔާވެހި ފައިނޭންސިންގ – ފަހިމާލެ" ފެސިލިޓީ ދޫކުރާނީ، ބޭންކް އޮފް މޯލްޑިވްސް ޕަބްލިކް ލިމިޓެޑާއި، މޯލްޑިވްސް އިސްލާމިކް ބޭންކް މެދުވެރިކޮށެވެ.

(ށ) މި ސްކީމުގެ ދަށުން ފައިސާގެ ގޮތުގައި ގިނަވެގެން ދޫކުރެވޭނީ 6,000,000 (ހަ މިލިޔަން) ރުފިޔާއެވެ.
(ނ) މި ފެސިލިޓީ ދޫކުރުމުގައި އިސްލާމިކް ފައިނޭންސް ގެ އުސޫލުން %5 (ފަހެއް އިންސައްތަ) ޕްރޮފިޓުގެ ގޮތުގައި ނެގޭނެއެވެ. 

(ރ) މި ފެސިލިޓީ އަނބުރާ ދެއްކުމަށް ހުށަހެޅޭނެ އެންމެ ދިގު މުއްދަތަކީ، 25 (ފަންސަވީސް) އަހަރެވެ. މި މުއްދަތު ކަނޑައަޅާނީ، ފެސިލިޓީއަށް އެދި ހުށަހަޅާ ފަރާތުގެ އުމުރަށް ބެލުމަށްފަހު، ފެސިލިޓީ ދޫކުރާ ބޭންކަކުންނެވެ.

(ބ) މި ފެސިލިޓީގެ ދަށުން ގްރޭސް ޕީރިއަޑުގެ ގޮތުގައި އެންމެ ގިނަވެގެން ދެވޭނީ، 18 (އަށާރަ) މަސްދުވަހެވެ. މި ފެސިލިޓީ އަނބުރާ ދެއްކުމަށް ކަނޑައެޅޭ މުއްދަތު ގުނާނީ ގްރޭސް ޕީރިއަޑް ނުހިމަނައެވެ. 

(ޅ) މި ފެސިލިޓީއަށް ކުރިމަތިލާ ފަރާތުން ހުށަހަޅާ ފެސިލިޓީގެ %5 (ފަހެއް އިންސައްތަ) އާއި %10 (ދިހައެއް އިންސައްތަ) އާ ދެމެދުގެ އިކުއިޓީ ކޮންޓްރިބިއުށަން، ފެސިލިޓީ ހުށަހަޅާ ފަރާތުން ދައްކަންޖެހޭނެވެ. އިކުއިޓީ ކޮންޓްރިބިއުށަންގެ އަދަދު ކަނޑައަޅާނީ، ފެސިލިޓީ ހުށަހަޅާ ފަރާތުގެ ކުރެޑިޓް އިވެލުއޭށަނަށް ފަހު، ފެސިލިޓީ ދޫކުރާ ބޭންކަކުންނެވެ.

(ކ) މި ފެސިލިޓީ ދޫކުރެވޭނީ، ބިމުގެ ނުވަތަ ބިންތަކުގެ ރަޖިސްޓަރީ، މި ފެސިލިޓީ ދޫކުރާ ބޭންކުގައި ރަހުނުކުރުމަށްފަހުގައެވެ.

(އ) ކުރިން ނަގައިފައިވާ ފެސިލިޓީއެއްގެ ދަށުން ފައިސާ އިތުރުކުރުމަށް ނުވަތަ "ރީ-ފައިނޭންސް" ކުރުމަށް މި ފެސިލިޓީ ބޭނުމެއް ނުކުރެވޭނެއެވެ.

(ވ) މި ފެސިލިޓީއަށް ފޯމު ހުށަހަޅާ ފަރާތ/ްފަރާތްތަކަކީ، ދިވެހި ސަރުކާރުގެ ގެޒެޓުގައި މި އުސޫލު

ށާއިއުކުރެވޭ ތާރީހުގެ ފަހުން ބިން ބެހުމުގެ މަރުހަލާ ފަށައިފައިވާ ފަރާތަކަށް ވެގެން ނުވާނެއެވެ. ބިން ބެހުމުގެ މަރުހަލާ ފެށުނު ކަމަށް ބަލާނީ، ބިން ބެހުމަށް ށަރުއީ މަރުހަލާއަށް ހުށަހެޅުމަށެވެ. 

 

5 ވަނަ މާއްދާ - އަކަފޫޓަށްވުރެ ކުދި ބިން އެއްކޮށްލުން (ރީޑިވަލޮޕްމަންޓް)

މި އުސޫލުގެ 4 ވަނަ މާއްދާގެ (ށ) ގައި އެހެން ބަޔާންކޮށްފައި އޮތް ނަމަވެސ،ް މި ފެސިލިޓީގެ ދަށުން ހުށަހަޅާ ފަރާތްތަކުގެ ތެރެއިން ކުދި ބިންކޮޅުތައް އެއްކޮށްގެން ބިން ތަރައްގީކުރުމަށް ހުށަހަޅާ ފަރާތްތަކަށް އިސްކަންދެވޭނެއެވެ. މި ގޮތުން ކުދި ބިންކޮޅުތައް އެއްކުރާ ނަމަ އެއްކުރެވޭނީ، 600 (ހަސަތޭކަ) އަކަފޫޓަށްވުރެ ކުޑަ ބިންކޮޅުތަކެވެ. އަދި މިގޮތަށް އިމާރާތްކުރުމަށް އެދޭ ފަރާތްތަކުން 6 (ހައެއް) މިލިޔަން ރުފިޔާގެ އިތުރުން، އިތުރުވާ ކޮންމެ ބިމަކަށް 1 (އެކެއް) މިލިޔަން ރުފިޔާ ހަމަޖެހޭނެއެވެ. މި އުސޫލުން އެންމެ ގިނައިން ދޫކުރެވޭނީ، ޕްރޮޖެކްޓަކަށް 10 (ދިހައެއް) މިލިޔަނާ ހަމައަށެވެ. 

 

6 ވަނަ މާއްދާ - ފެސިލިޓީގެ ދަށުން ތަރައްގީކުރާ އިމާރާތް

މި ފެސިލިޓީގެ ދަށުން ތަރައްގީކުރާ އިމާރާތާ ގުޅޭ އަންނަނިވި ކަންކަން ފުރިހަމަކުރަންވާނެއެވެ. 

(ހ) މި ފެސިލިޓީއަކީ ތަރައްގީކުރާ އިމާރާތެއް ނިންމުމަށް ނުވަތަ ނުނިމިހުރި އިމާރާތެއް ނިންމުމަށް ދޫކުރާ ފެސިލިޓީއެއް ކަމަށް ވުމުން، ފެސިލިޓީއަށް އެދޭ ޖުމުލަ ފައިސާއިން އިމާރާތް ނުވަތަ ހުށަހަޅާ ޕްރޮޖެކްޓް ނިންމޭވަރުގެ ތަނަކަށް ވާންޖެހޭނެއެވެ. މިގޮތުން، އިމާރާތް އެއްކޮށް ނިންމުމަށް ނުވަތަ އިމާރާތުގެ ބައެއް ނިންމުމަށް ނުވަތަ ރެސިޑެންށިއަލް ސްޕޭސް އިތުރުކުރުމަށް ހުށަހަޅާއިރު ބިލް އޮފް ކުއަންޓިޓީގައި ހިމެނިފައިވާ އަގު މި ސްކީމަށް ކަނޑައެޅިފައިވާ ލިމިޓަށް ރިއާޔަތްކޮށްފައި ހުންނަންވާނެއެވެ.

(ށ) މި ސްކީމުގެ ދަށުން ތަރައްގީކުރާ އިމާރާތުގެ ހުރިހާ ކުރެހުމެއް ހުންނަންވާނީ ގާނޫނު ނަންބަރު 2024-16 (ބިނާވެށި ޕްލޭންކުރުމާއި ހިންގުމުގެ ގާނޫނު) ގައި ކަނޑައެޅިފައިވާ މިންގަނޑުތަކުގެ ދަށުން ތައްޔާރުކޮށްފައެވެ. އަދި ގަވާއިދު ނަންބަރު 2019-1010 (އިމާރާތްކުރުމުގެ ދާއިރާގައި މަސައްކަތްކުރާ ފަންނުވެރިންގެ ގަވާއިދު) ގެ ދަށުން ރަޖިސްޓަރީ ކުރެވިފައިވާ ދާއިރާގެ ޕްރޮފެށަނަލް ފަރާތެއްގެ ހުއްދަ ނުވަތަ ސޮޔާއެކުގައެވެ. މިގޮތުން ފެސިލިޓީގެ ދަށުން އިމާރާތްކުރުމަށް ހުށަހަޅާ ތަންތަނުގެ ކުރެހުންތައް ހުންނަންވާނީ އަންނަނިވި ގޮތަ ށެވެ.

1. މި ސްކީމުގެ ދަށުން އެއްބުރިއަށް (ސިންގަލް ސްޓޯރީ) އިމާރާތްކުރާ ތަނެއް ނަމަ، ރަޖިސްޓަރީވެފައިވާ އާކިޓެކްޓެއްގެ ނުވަތަ ސިވިލް އިންޖިނިއަރެއްގެ ހުއްދައިގެ ނަންބަރާއި ސޮއި އޮންނަންވާނެއެވެ. މިގޮތުން ކުރަހާ ކުރެހުންތައް ސިޓީ ކައުންސިލުން އެޕްރޫވްކުރާކަށް ނުޖެހޭނެއެވެ. 
2. އެއްބުރިޔަށްވުރެ އުސްކޮށް އިމާރާތްކުރާ ތަނެއް ނަމަ، ގާނޫނު ނަންބަރު 2024-16 (ބިނާވެށި ޕްލޭންކުރުމާއި ހިންގުމުގެ ގާނޫނު) ގެ ދަށުން ކަނޑައަޅައިފައިވާ މިންގަނޑުތަކާ އެއްގޮތަށް ފާސްކޮށްފައިވާ ކުރެހުމެއް ކަމުގައި ވާންޖެހޭނެއެވެ.

(ނ) މި ސްކީމުގެ ދަށުން ތަރައްގީކުރާ ޕްރޮޖެކްޓް ނުވަތަ އިމާރާތުގެ ފްލޯ އޭރިއާގެ %80 (އައްޑިހަ އިންސައްތަ) ވާންވާނީ، ރެސިޑެންށިއަލް ސްޕޭސް (ދިރިއުޅުމުގެ ބޭނުމަށް) އަށެވެ. 

(ރ) މި ފެސިލިޓީގެ ދަށުން އިމާރާތްކުރާ ތަންތަނުގެ ސްޓްރަކްޗަރަލް މަސައްކަތްތައް (ކޮންކްރީޓާއި، ރޭނުމާއި، ސިމެންތިޖެހުމާއި، ހިޔާކުރުމުގެ މަސައްކަތް) ކުރަންވާނީ، ގަވާއިދު ނަންބަރު 2019-1019 (އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދު) ގެ ދަށުން ރަޖިސްޓަރީ ކުރެވިފައިވާ %100 (ސައްތައިންސައްތަ) ދިވެހި ކޮންޓްރެކްޓަރެއް މެދުވެރިކޮށެވެ.

(ބ) މި ފެސިލިޓީގެ ދަށުން އިމާރާތްކުރަންވާނީ ގާނޫނު ނަންބަރު 2017-04 (އިމާރާތްކުރުމުގެ ގާނޫނު) އާއި، އެ ގާނޫނުގެ ދަށުން ހަދައިފައިވާ ގަވާއިދުތަކުގައި ބަޔާންކުރާ ހަމަތަކުގެ މަތީންނެވެ.

 

7 ވަނަ މާއްދާ - ފެސިލިޓީގެ ދަށުން ފައިސާ ދޫކުރުން

މި ފެސިލިޓީ ދޫކުރެވޭނީ ތިރީގައި ބަޔާންކޮށްފައިވާ ގޮތަށެވެ.

(ހ) މި އުސޫލުގައި ބަޔާންކޮށްފައިވާ އަސާސީ ށަރުތުތައް ފުރިހަމަވާކަން ނުވަތަ ނޫންކަން ކަނޑައަޅާނީ މިނިސްޓްރީންނެވެ.

(ށ) ފެސިލިޓީގެ ފައިނޭންށަލް އެލިޖިބިލިޓީއާއި ފެސިލިޓީއަށް ފައިސާ ދޫކުރުމާއި، ފެސިލިޓީގެ ރީޕޭމަންޓާއި މިފަދަ އެންމެހައި ކަންކަން ކުރިޔަށް ގެންދާނީ ބޭންކުން މި ސްކީމަށް ކަނޑައަޅައިފައިވާ މިންގަނޑުތަކާ އެއްގޮތަށެވެ.

(ނ) މި ފެސިލިޓީގެ ދަށުން އެޑްވާންސް ޕޭމަންޓުގެ ގޮތުގައި އެންމެ ގިނައިން ދޫކުރެވޭނީ، %15 (ފަނަރަ އިންސައްތަ) އާ ހަމަޔަށެވެ. ބާކީ ފައިސާ ދޫކުރެވޭނީ، އިމާރާތުގެ މަސައްކަތް ކުރިޔަށްދާ މިންވަރަކުން، ޕްރޮގްރެސިވް ޕޭމަންޓް އުސޫލުގެ ދަށުންނެވެ.

(ރ) މި ފެސިލިޓީގެ ދަށުން ދޫކުރާ އެންމެ ފަހު ޕޭމަންޓް ދޫކުރެވެނީ، ދިރިއުޅުވޭނެ ފެންވަރެއްގެ ބޯހިޔާވަހިކަމެއް ގާއިމުކުރެވިފައިވާކަން ކަށަވަރުކުރުމަށްފަހުގައެވެ.

 

8 ވަނަ މާއްދާ - ފެސިލިޓީއާ ގުޅިގެން ނަގާ ފީ

މި ފެސިލިޓީގެ ޕްރޮސެސިންގ ފީއާއި، ކްރިބް ފީއާއި އިންށުއަރަންސް ފީ ދައްކާނީ، ފެސިލިޓީ ނަގާ ފަރާތުންނެވެ. 

 

9 ވަނަ މާއްދާ - ހުށަހަޅާ ފަރާތްތަކުގެ އަސާސީ ށަރުތުތައް

މި ސްކީމުގެ ދަށުން "ފައިނޭންސިންގ ފެސިލިޓީ" ހޯދުމަށް އެދޭ މީހުންގެ ކިބައިގައި އަންނަނިވި ށަރުތުތައް ހުންނަންވާނެއެވެ.

(ހ) ދިވެހި ރައްޔިތަކަށް ވުން.

(ށ) އުމުރުން 18 (އަށާރަ) އަހަރު ފުރިފައިވާ މީހެއްކަމުގައި ވުން. އުމުރު ގުނުމުގައި ބަލާނީ، މި ސްކީމަށް ފޯމު ހުށަހެޅުމަށް ދީފައިވާ މުއްދަތު ހަމަވާ ތާރީހަށެވެ.

(ނ) މި ފެސިލިޓީއަށް އެދޭ ފަރާތުގެ ނަމުގައި ބިމެއް ރަޖިސްޓަރީކޮށްފައި އޮތުން. މީގެ ތެރޭގައި، އެއްފަރާތަށްވުރެ ގިނަ ފަރާތުގެ ނަމުގައި އޮންނަ ބިން ވެސް ހިމެނޭނެއެވެ. އަދި ރަޖިސްޓަރީކޮށްފައި އޮތުމުގެ މާނައިގައި ސަރުކާރުގެ ސްކީމެއްގެ ތެރެއިން ބިން ގަނެވިއްކުމުގެ އެއްބަސްވުމެއްގެ ދަށުން ރަހުނުކުރުމުގެ ހައްގުއެ ފަރާތަކަށް ލިބިފައިވާ ފަރާތްތައް ވެސް ހިމެނޭނެއެވެ.

(ރ) ސަރުކާރުން ހިންގައިފައިވާ ބޯހިޔާވަހިކަމުގެ އެއްވެސް ސްކީމަކުން ފެސިލިޓީއެއް ނުވަތަ ލޯނެއް/ ފުލެޓެއް/ ރޯހައުސްއެއް ލިބިފައިވާ ފަރާތެއް ކަމުގައި ނުވުމުގެ އިތުރުން ވިޔަފާރި އުސޫލުން ނުވަތަ ގަނެ ވިއްކުމުގެ އުސޫލުން ބޯހިޔާވަހިކަން ގަތުމުގެ މުއާމަލާތެއް ކޮށްފައިވާ ފަރާތެއް ކަމުގައި ނުވުން.

(ބ) ސަރުކާރުގެ ބޯހިޔާވަހިކަމުގެ ސްކީމެއްގެ ދަށުން ބިމެއް ނުވަތަ ފުލެޓެއް ނުވަތަ ރޯހައުސްއެއް ލިބި، ވޭތުވެދިޔަ 10 (ދިހައެއް) އަހަރުދުވަހުގެ ތެރޭގައި އެއިން ތަނެއްގެ މިލްކުވެރިކަން ދޫކޮށްލައިފައިވާ ނުވަތަ ވިއްކައިފައިވާ ފަރާތެއް ކަމުގައި ނުވުން. މި މުއްދަތު ގުނުމުގައި ބަލާނީ ފޯމު ހުށަހަޅާ ތާރީހަށެވެ.

(ޅ) ދިރިއުޅުމަށް އަލަށް ގެދޮރު އަޅާ ފަރާތްތަކަށް މި ފެސިލިޓީގެ ދަށުން އިސްކަންދެވޭނެއެވެ.

(ކ) ސަރުކާރުގެ ބޯހިޔާވެހިކަމުގެ މަށްރޫއެއްގެ ދަށުން، ސަރުކާރަށް ނުވަތަ ބެހެނިވެރިންނަށް ދޫކޮށްލުމަށް ކަނޑައެޅިފައިވާ ބިމެއް ނަމަ، އެ ސްކީމުގެ އުސޫލުގެ ދަށުން ނިންމަންޖެހޭ ގާނޫނީ ކަންކަން ފުރިހަމަކުރަން ޖެހޭނެއެވ. 

(އ) މި އުސޫލުގެ 5 ވަނަ މާއްދާގައި ބަޔާންކޮށްފައިވާ އުސޫލުން ބިން އެއްކޮށް ތަރައްގީކުރާ ނަމަ ފުރިހަމަކުރަންޖެހޭ ގާނޫނީ އިޖުރާއަތްތައް ފުރިހަމަވެފައިވާ ފަރާތެއްކަމުގައި ވާންޖެހޭނެއެވެ. މި މާއްދާގައި ބަޔާންކޮށްފައިވާ ހާލަތެއްގައި، ފުރިހަމަކުރަންޖެހޭ ކަންކަން ފުރިހަމަވެފައި ނުވާ ނަމަ، އެޕްލިކޭށަން ހުށަހަޅާއިރު މި އުސޫލުގެ ޖަދުވަލު 1 ގައި ހިމަނައިފައިވާ އިގުރާރު ހުށަހަޅަންވާނެއެވެ.

 

10 ވަނަ މާއްދާ - ފެސިލިޓީއަށް އެދި ހުށަހެޅުން

މި ސްކީމުގެ ދަށުން "ފައިނޭންސިންގ ފެސިލިޓީ" ހޯދުމަށް އެދި ހުށަހެޅޭނީ ތިރީގައި ބަޔާންކޮށްފައިވާ ގޮތަށް "ހިޔާވެހި ޕޯޓަލް" މެދުވެރިކޮށެވެ.

(ހ) ފެސިލިޓީގައި ގޯތީގެ ވެރިފަރާތުގެ އިތުރުން އާއިލީގޮތުން ގުޅުންހުރި ފަރާތެއް ނުވަތަ ފަރާތްތައް ކޯ-އެޕްލިކަންޓެއްގެ ގޮތުގައި ބައިވެރިކުރެވިދާނެއެވެ.

(ށ) އާއިލީގޮތުން ގުޅުންހުރި ކޯ-އެޕްލިކަންޓެއް ނެތް ހާލަތުގައި ފެސިލިޓީގައި ގޯތީގެ ވެރިފަރާތުގެ އިތުރުން ށަރުއީގޮތުން ވާރުތަނުވާ ކޮންމެވެސް އެކަކު ކޯ-އެޕްލިކަންޓުގެ ގޮތުގައި ބައިވެރިކުރެވިދާނެއެވެ. މި ހާލަތުގައި، މިއިން ކޮންމެ ފަރާތެއްގެ ކިބައިގައި (ވަކިވަކިން) ފެސިލިޓީ ދެއްކުމުގެ ގާބިލުކަން ހުންނަން ޖެހޭނެއެވެ.

 

11  ވަނަ މާއްދާ - ފެސިލިޓީއަށް އެދި ހުށަހަޅާ ފަރާތްތަކުގެ ފައިނޭންސިންގ ސްކްރީނިންގ ހެދުން

މި ސްކީމުގެ ދަށުން ހުށަހަޅާ ފަރާތްތަކުގެ "ފައިނޭންށަލް ސްކްރީނިންގ" ހަދާނީ، ފެސިލިޓީ ދޫކުރާ ބޭންކުންނެވެ. މިގޮތުން ފެސިލިޓީ ލިބޭ ފަރާތްތައް ކަނޑައެޅުމުގައި ދިވެހިރާއްޖޭގައި އަމަލުކުރަމުން އަންނަ އާންމު ބޭންކިންގ އުސޫލުތަކާ އެއްގޮތަށް އިވެލުއޭޓްކުރެވ،ި ފެސިލިޓީ އަނބުރާ ދެއްކޭނެ ފަރާތެއްތޯ ކަށަވަރުކުރެވޭނެވެ.

 

12 ވަނަ މާއްދާ - ފައިނޭންސިންގ ފެސިލިޓީ ލިބޭ ފަރާތްތައް  ކަނޑައެޅުން

މި ސްކީމުގެ ދަށުން "ފައިނޭންސިންގ ފެސިލިޓީ" ލިބޭ ފަރާތްތައް ކަނޑައަޅާނީ، މި އުސޫލުގައި ބަޔާންކޮށްފައިވާ ށަރުތުގެ އިތުރުން، މި ފެސިލިޓީއަށް ހުށަހަޅާ ފަރާތްތަކުގެ ކުރެޑިޓް އެލިޖިބިލިޓީއާއި ފައިނޭން ށަލް ސްކްރީނިންގ ބެލުމަށްފަހުގައެވެ.

 

13 ވަނަ މާއްދާ - ސްކީމުގެ ދަށުން ދޫކުރާ ފައިނޭންސިންގ ފެސިލިޓީ ހަވާލުކުރުން 

މި ސްކީމުގެ ދަށުން "ފައިނޭންސިންގ ފެސިލިޓީ" ލިބޭ ފަރާތާ ރަސްމީކޮށް ހަވާލުކުރާނީ، މި ސްކީމް ހިންގާ ފަރާތުން ކަނޑައަޅާ ފަރާތަކާއި ފައިނޭންސިންގ ފެސިލިޓީ ލިބޭ ފަރާތާ ދެމެދުގައި ވެވޭ އެއްބަސްވުމުގެ ދަށުންނެވެ.

 

14 ވަނަ މާއްދާ - މާނަކުރުން

މި އުސޫލުގައި އިބާރާތެއް ނުވަތަ ލަފުޒެއް ބޭނުންކޮށްފައިވާ ގޮތުން ކަނޑައެޅިގެން އެހެން މާނައެއް ދޭހަނުވާހައި ހިނދަކު އަންނަނިވި އިބާރާތްތަކާއި ލަފުޒުތަކަށް ދީފައި އެވަނީ އެ އިބާރާތްތަކާއި ލަފުޒުތަކަށް ތިރީގައި ދީފައިވާ މާނަކުރުމެވެ.

(ހ) "ޕްރޮޖެކްޓް" ކަމަށް ބުނެފައި އެވަނީ، އިމާރާތް އެއްކޮށް ނިންމުމަށް ނުވަތަ އިމާރާތުގެ ބައެއް ނިންމުމަށް ނުވަތަ ރެސިޑެންށިއަލް ސްޕޭސް އިތުރުކުރުމަށް ހުށަހަޅާ ހުށަހެޅުންތަކަށެވެ.

(ށ) "ފެސިލިޓީގެ ޕްރޮސެސިންގ ފީ" ކަމަށް ބުނެފައި އެވަނީ، އެޕްލިކޭށަން އިވެލުއޭޓްކުރުމަށާއި ޕްރޮސެސްކުރުމަށް ބޭންކުން ނަގާ ފީއަށެވެ.  

(ނ) "ކްރިބް ފީ" ކަމަށް ބުނެފައި އެވަނީ، ކުރެޑިޓް އިންފޮމޭށަން ބިއުރޯ އޮފް މޯލްޑިވްސްއިން ކުރެޑިޓް އިންފޮމޭށަން ރިޕޯޓް ތައްޔާރުކުރުމަށް އެޕްލިކަންޓުގެ އަތުން ނަގާ ފީއަށެވެ.

(ރ) "އިންށުއަރަންސް ފީ" ކަމަށް ބުނެފައި އެވަނީ، ތަރައްގީކުރާ އިމާރާތް ނުވަތަ ރަހުނުކުރާ އިމާރާތާ ގުޅޭ ޕްރީމިއަމްގެ ގޮތުގައި ނަގާ ފީއަށެވެ.

(ބ) "ފެސިލިޓީ ނަގާ ފަރާތް" ކަމަށް ބުނެފައި އެވަނީ، ގޯތީގެ ރަޖިސްޓަރީގައި ހިމެނޭ ފަރާތް ނުވަތަ ފަރާތްތަކަށެވެ.

(ޅ) "ކޯ-އެޕްލިކަންޓް" ކަމަށް ބުނެފައި އެވަނީ، ފެސިލިޓީ ނަގާ ފަރާތުގެ އިތުރުން، ފެސިލިޓީ ނެގުމުގައި ބައިވެރިވާ ފަރާތް ނުވަތަ ފަރާތްތަކަށެވެ.

(ކ) "ފައިނޭންށަލް ސްކްރީނިންގ" ކަމަށް ބުނެފައި އެވަނީ، މި ފެސިލިޓީއަށް ކުރިމަތިލާ ފަރާތުގެ މާލީ ގާބިލުކަން ދެނެގަތުމަށް ޓަކައި ހަދާ އިވެލުއޭށަނަށެވެ.

(އ) "ހިޔާވެހި ޕޯޓަލް" ކަމަށް ބުނެފައި އެވަނީ، ސަރުކާރުގެ ބޯހިޔާވަހިކަމާ ގުޅުންހުރި ހުރިހާ ހިދުމަތްތަކަށް ހުށަހެޅުމަށް ފަރުމާކޮށްފައިވާ އޮންލައިން ޕޯޓަލަށެވެ.

(ވ) "މިނިސްޓްރީ" ކަމަށް ބުނެފައި އެވަނީ، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް (ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާ) އަށެވެ.

(މ) "ބޭންކް" ކަމަށް ބުނެފައި އެވަނީ، ބޭންކް އޮފް މޯލްޑިވްސް ޕަބްލިކް ލިމިޓެޑާއި މޯލްޑިވްސް އިސްލާމިކް ބޭންކަށެވެ.

 

15 ވަނަ މާއްދާ - މި އުސޫލަށް އަމަލުކުރަން ފެށުން

މި އުސޫލަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި އުސޫލު ށާއިއުކުރާ ތާރީހުން ފެށިގެންނެވެ. 

 

 

ޖަދުވަލު 1