ކަސްޓަމްގެ އާންމު ގަވާއިދު 2011 (ގަވާއިދު ނަންބަރު 41/2011)

އަށް 7 ވަނަ އިސްލާހު ގެނައުމުގެ ގަވާއިދު 

(ގަވާއިދު ނަންބަރު 2019-1027)

(މި ގަވާއިދަށް އަމަލުކުރަން ފެށީ 22 އެޕްރީލް 2019 ގައި)

 

1 ވަނަ މާއްދާ - ބުނެވިދިޔަ ގަވާއިދުގެ 205 ވަނަ މާއްދާގެ (ހ) އާއި (ނ) އަންނަނިވި ގޮތަށް އިސްލާހުކުރުން.

ކަސްޓަމްސްގެ މެދުވެރިން 205.

(ހ) ކަސްޓަމްސްގެ މެދުވެރިންނަކީ، އިމްޕޯޓް އެކްސްޕޯޓް މުދާ ކަސްޓަމްސްއިން ކުލިއަރ ކުރުމަށްޓަކައި ކުރަންޖެހޭ އެންމެހައި ކަންތައްތައް ގާނޫނާއި ގަވާއިދާއެއްގޮތްވާ ގޮތުގެ މަތިން ކުރުމުގައި މުދަލުގެ ވެރިފަރާތް ތަމްސީލުކުރުމަށްޓަކައި ކަސްޓަމްސްގެ މެދުވެރިންގެ ގޮތުގައި، ކަސްޓަމްސްގައި ރަޖިސްޓަރީ ކުރެވިފައިވާ ފަރާތްތަކެވެ. މިގޮތުން ކަސްޓަމްސްގެ މެދުވެރިންގެ ގޮތުގައި ރަޖިސްޓަރީ ކޮށްދެވޭނީ، ވިޔަފާރި ރަޖިސްޓަރީ ކުރުމުގެ ގާނޫނުތަކުގެ ދަށުން ރަޖިސްޓަރީކޮށްފައިވާ ވިޔަފާރިތަކަށެވެ.

(ށ) ކަސްޓަމްސްގެ މެދުވެރިންގެ ގޮތުގައި ރަޖިސްޓަރީކުރެވޭ ވިޔަފާރިތައް ތަމްސީލުކުރާ ފަރާތްތަކަކީ، ކަސްޓަމްސްގެ މެދުވެރިންނަށް ހިންގާ ތަމްރީނު ކޯހުން ފާސްވެ ސެޓުފިކެޓު ލިބިފައިވާ ފަރާތްތަކަށް ވާންވާނެއެވެ.

 

2 ވަނަ މާއްދާ - ބުނެވިދިޔަ ގަވާއިދުގެ 209 ވަނަ މާއްދާ އަންނަނިވި ގޮތަށް އިސްލާހުކުރުން.

ކަސްޓަމްސްގެ މެދުވެރިންގެ މައުލޫމާތު ބަދަލުވުން 209.

ކަސްޓަމްސްގެ މެދުވެރިންގެ ގޮތުގައި ރަޖިސްޓަރީކޮށްފައިވާ ފަރާތެއްގެ، ތިރީގައި ބަޔާންކޮށްފައިވާ މައުލޫމާތު ބަދަލުވެއްޖެނަމަ، އެ މައުލޫމާތު ބަދަލުވި ދުވަހުން ފެށިގެން 7 (ހަތެއް) ދުވަހުގެ ތެރޭގައި އެ މައުލޫމާތު ކަސްޓަމްސްއަށް ދޭންވާނެއެވެ.

(ހ) ވިޔަފާރީގެ މިލްކުވެރިކަން ބަދަލުވުން؛

(ށ) ވިޔަފާރީގެ ނަން ބަދަލުވުން؛ 

(ނ) ވިޔަފާރި ހިނގަމުންދާ އެޑްރެސް ބަދަލުވުން.

 

3 ވަނަ މާއްދާ - ބުނެވިދިޔަ ގަވާއިދުގެ 210 ވަނަ މާއްދާގެ (ބ) އަންނަނިވި ގޮތަށް އިސްލާހުކުރުން.

ކުރުން މަނާ ކަންތައްތައް 210.

ރާއްޖެއަށް މުދާ އިމްޕޯޓްކުރާ ފަރާތްތައް ނުވަތަ ރާއްޖެއިން މުދާ އެކްސްޕޯޓްކުރާ ފަރާތްތަކާއި ކަސްޓަމްސްއާ ދެމެދު އޮންނަ ގުޅުމަށް ނޭދެވޭ އަސަރެއް ފޯރާފަދަ ނުވަތަ އޮފިސަރުންނާއި މުއައްސަސާގެ އިހްތިރާމް ގެއްލޭފަދަ އަމަލެއް ކުރުން؛

 

4 ވަނަ މާއްދާ - ބުނެވިދިޔަ ގަވާއިދުގެ 211 ވަނަ މާއްދާގެ (ށ) އާއި (ނ) އުނިކުރުން.

 

5 ވަނަ މާއްދާ - ބުނެވިދިޔަ ގަވާއިދުގެ 215 ވަނަ މާއްދާގެ (ހ) އަންނަނިވި ގޮތަށް އިސްލާހުކުރުން.

ލައިސަންސް ބާތިލު ކުރުމާއި ހިފެހެއްޓުން 215.

(ހ) ކަސްޓަމްސްގެ މެދުވެރިންނަށް ދޫކޮށްފައިވާ ލައިސަންސް ބާތިލުކުރެވޭނެ ހާލަތްތައް ތިރީގައި ބަޔާންކޮށްފައި މިވަނީއެވެ. ކަސްޓަމްސްގެ މެދުވެރިންގެ ގޮތުގައި ރަޖިސްޓަރީކޮށްފައިވާ ފަރާތުން، ލައިސަންސް ބާތިލުކޮށްދިނުމަށް އެދުން؛

1. ކަސްޓަމްސްގެ މެދުވެރިންގެ ގޮތުގައި ރަޖިސްޓަރީކޮށްފައިވާ ވިޔަފާރި އުވާލުން؛
2. ކަސްޓަމްސްގެ މެދުވެރިންގެ ޚިދުމަތުގެ ފެންވަރުބެލުމަށް ކަސްޓަމްސްއިން ކަނޑައެޅިފައިވާ އުސޫލުގެ ދަށުން 50 (ފަންސާސް) ޕޮއިންޓަށްވުރެ މާކްސް ދަށްވުން؛
3. ކަސްޓަމްސްއިން ތަހުގީގުކޮށް ބެލި މައްސަލައެއްގެ ފިޔަވަޅެއްގެ ގޮތުގައި އެ ފަރާތުގެ ލައިސަންސް ހިފެހެއްޓުމަށް ނުވަތަ ބާތިލު ކުރުމަށް ނިންމުން.

 

6 ވަނަ މާއްދާ - ބުނެވިދިޔަ ގަވާއިދުގެ 216 ވަނަ މާއްދާގެ (ހ) އަންނަނިވި ގޮތަށް އިސްލާހުކުރުން. 

ކަސްޓަމްސްގެ ސަރަހައްދުތަކަށް ވަދެ ނުކުތުމަށް ދޫކޮށްފައިވާ ހުއްދަ ބާތިލުކުރުމާއި ހިފެހެއްޓުން 216.

(ހ) މި ގަވާއިދުގެ 206 ވަނަ މާއްދާގެ (ށ) އާއި (ނ) ގައި ބަޔާންކޮށްފައިވާ ކުށެއް، ކަސްޓަމްސްގެ ސަރަހައްދަށް ވަދެނުކުތުމަށް ފާސް ދޫކޮށްފައިވާ މީހަކު ކޮށްފިކަމަށް ނުވަތަ ކުރަން އުޅޭކަމަށް ނުވަތަ ކުރަމުންދާ ކަމަށް ނުވަތަ އެފަދަ ކުށެއް ކުރުމުގައި ބައިވެރިވިކަމަށް ކަސްޓަމްސްގެ ތަހުގީގަށް ސާބިތުވެއްޖެނަމަ، އެ ފަރާތަކަށް ދޫކޮށްފައިވާ ހުއްދަ ހިފެހެއްޓުމުގެ ނުވަތަ ބާތިލުކުރުމުގެ އިޚްތިޔާރު ކަސްޓަމްސްއަށް ލިބިގެންވެއެވެ.

 

7 ވަނަ މާއްދާ - ބުނެވިދިޔަ ގަވާއިދުގެ 216 ވަނަ މާއްދާގެ (ނ) އުނިކުރުން.

 

8 ވަނަ މާއްދާ - ބުނެވިދިޔަ ގަވާއިދުގެ 219 ވަނަ މާއްދާގެ (ށ) އަންނަނިވި ގޮތަށް އިސްލާހުކުރުން.

މައްސަލަ ހުށަހެޅުން 219.

މި މާއްދާގެ (ހ) ގައި ބަޔާންކޮށްފައިވާ ގޮތުގެމަތިން ހުށަހެޅޭ މައްސަލަތައް، ގިނަވެގެން 15 (ފަނަރަ) ދުވަހުގެ ތެރޭގައި ނިންމުމަށްފަހު، އެ މައްސަލަ ހުށަހެޅި ފަރާތަށް ކަސްޓަމްސްއިން އަންގަންވާނެއެވެ. އަދި މި މުއްދަތުގެ ތެރޭގައި ނުނިމޭނަމަ، ނިމޭނެކަމަށް ލަފާކުރެވޭ ދުވަސް ބަޔާންކޮށް، އެކަން އެފަރާތަށްއަންގަންވާނެއެވެ.

 

9 ވަނަ މާއްދާ - ބުނެވިދިޔަ ގަވާއިދުގެ 251 ވަނަ މާއްދާގެ (ނ) އަންނަނިވި ގޮތަށް އިސްލާހުކުރުން.

ބޮންޑެޑް ވެއަރހައުސްގައި ބެހެއްޓުމަށް ހުއްދަދޭ މުދާ 251.

ބަނގުރާއާއި، އޫރުމަހާއި އޫރުމަސް އެކުލެވޭ ތަކެތީގެ ވިޔަފާރި ކުރުމަށް ބޮންޑެޑް ވެއަރހައުސް ރަޖިސްޓަރީކުރެވޭނީ އެފަދަ ތަކެތި ބެހެއްޓުމަށް ސަރުކާރުން ހުއްދަކޮށްފައިވާ ސަރަހައްދުތަކުގައެވެ. މި ސަރަހައްދުތަކުގައި، މި ގަވާއިދުގެ 7 ވަނަ މާއްދާގެ (ހ) އިން ފެށިގެން (ދ) އާ ހަމައަށް ބަޔާންކޮށްފައިވާ ކަންތައްތައް ފުރިހަމަކުރުމަކީ އެ ސަރަހައްދެއް ހިންގާ ނުވަތަ ބަލަހައްޓާ ފަރާތުގެ ޒިންމާއެކެވެ.

 

10 ވަނަ މާއްދާ - ބުނެވިދިޔަ ގަވާއިދުގެ 264 ވަނަ މާއްދާގެ ފަހަތަށް އަންނަނިވި ގޮތަށް (ބ) އިތުރުކޮށް، ދެންހުރި އަކުރުތައް ތަރުތީބުކޮށް، އެ މާއްދާގެ (ޅ) އިސްލާހުކުރުން.

މުދާ އިމްޕޯޓް ކުރުން 264.

(ބ) މި މާއްދާގެ (ނ) އާއި (ރ) ގައި ބަޔާންކޮށްފައިވާ މުއްދަތުގެ ތެރޭގައި އެ ތަކެތި ލިބެންވީ ފަރާތަށް ތަކެތި ނުލިބޭނަމަ، ނުވަތަ އެއްވެސް ހާލަތެއް ދިމާވެގެން ކަސްޓަމްސް ޕޯޓަލް މެދުވެރިކޮށް އެކަން ކަސްޓަމްސްއަށް އެންގޭނެގޮތެއް ނެތްނަމަ، ކަސްޓަމްސްއިން އެ މުދާ ދޫކުރި ވަގުތުން ފެށިގެން 72 (ހަތްދިހަ ދޭއް) ގަޑިއިރު ހަމަވުމުގެ ކުރިން އީމެއިލުން ނުވަތަ ލިޔުމުން ކަސްޓަމްސްއަށް އެކަން އަންގަން ވާނެއެވެ.

(ޅ) މި މާއްދާގެ (ނ) އާއި (ރ) އާއި (ބ) ގައި ބަޔާންކޮށްފައިވާ މުއްދަތުގެ ތެރޭގައި އެ ތަކެތި ލިބެންވީ ފަރާތުން، އެ މައުލޫމާތު ކަސްޓަމްސްއަށް ހުށަނާޅައިފިނަމަ، އެ ތަކެތި ލިބެންވީ ފަރާތް 10،000 (ދިހަ ހާސް) ރުފިޔާއިން ޖޫރިމަނާ ކުރެވޭނެއެވެ. އަދި އެ މުއްދަތަށްފަހު އިތުރަށް ހިނގާ ކޮންމެ ގަޑިއެއްގެއިރަކަށް 135 (އެއްސަތޭކަ ތިރީސް ފަހެއް) ރުފިޔާއިން އެ ތަކެތި ލިބެންވީ ފަރާތް 
ޖޫރިމަނާ ކުރެވޭނެއެވެ. މިގޮތުން ޖޫރިމަނާ އެންމެ ގިނައިން ނެގޭނީ 666 ގަޑިއިރަށެވެ.

 

11 ވަނަ މާއްދާ - ބުނެވިދިޔަ ގަވާއިދުގެ 272 ވަނަ މާއްދާގެ (ށ) ގެ 1 ވަނަ ނަންބަރު، އަންނަނިވި ގޮތަށް އިސްލާ ހުކުރުން.

ބޮންޑެޑް ވެއަރހައުސްތަކުން ބަނގު ރާއާއި އޫރުމަސް އެކުލެވޭ ބާވަތްތައް ގެންދިޔު މަށް ހަވާލުވާ ފަރާތްތަކުގެ ޒިންމާ 272

.ބަނގުރާއާއި އޫރުމަހާއި އޫރުމަސް އެކުލެވޭ ބާވަތްތައް ގެންދަންޖެހޭ ތަން ފިޔަވައި އެހެން ތަނަކަށް ގެންދި ޔުން؛ (އެހެން ނަމަވެސް އެ ފަދަ މުދާހިފައިގެން ދަތުރުކުރާ އުޅަނދުފަހަރު ކަސްޓަމްސްގެ ހުއްދަޔާއެކުއެހެންތަނަކަށް ވަގުތީގޮތުން ކައިރިކުރުމަށް މި މާއްދާ ހުރަހެއް ނާޅައެވެ.)

 

12 ވަނަ މާއްދާ - ބުނެވިދިޔަ ގަވާއިދުގެ 275 ވަނަ މާއްދާގެ (ބ) ގެ ގޮތުގައި އަންނަނިވި އަކުރު އިތުރުކުރުން.

ބޮންޑެޑް ވެއަރހައުސްއަށް ވަދެ ނުކުތުން 275. 

ބޮންޑެޑް ވެއަރހައުސްއަށް ވަނުމަށް ބޭނުންވާ ފަރާތްތަކަށް ދޫކު ރާ ވަގުތީ ފާސް އެ ފަރާތެއްގެ އިހުމާލުން ހަލާކުވެއްޖެނަމަ، ނުވަތަ ގެއްލިއްޖެނަމަ، ފާހުގެ އަގަށްވާ 200 (ދުއިސައްތަ) ރުފިޔާ، އެ ފާސް ދޫކުރެވިފައިވާ ފަރާތުން ކަސްޓަމްސަށްދައްކަންވާނެއެވެ.

 

13 ވަނަ މާއްދާ - ބުނެވިދިޔަ ގަވާއިދުގެ 482 ވަނަ މާއްދާގެ (ބ) ގެ ގޮތުގައި، އަންނަނިވި އަކުރު އިތުރުކުރުން.

އިމްޕޯޓްކުރާ ފަރާތްތައް ރަޖިސްޓަރީކުރުން 482.

(ބ) އިމްޕޯޓްކުރާ ފަރާތެއް ރަޖިސްޓަރީވުމަށްފަހު، އެ ފަރާތުން ރަޖިސްޓަރީ ކުރުމަށް ހުށަހެޅި ފޯމުގައި ދީފައިވާ އެއްވެސް މައުލޫމާތެއް ބަދަލުވެއްޖެނަމަ، 3 (ތިނެއް) ދުވަހުގެ ތެރޭގައި ކަސްޓަމްސްއަށް އެކަން އަންގަންވާނެއެވެ.

 

14 ވަނަ މާއްދާ - ބުނެވިދިޔަ ގަވާއިދުގެ 483 ވަނަ މާއްދާގެ (ބ) ގެ ގޮތުގައި، އަންނަނިވި އަކުރު އިތުރުކުރުން.

(ބ) އެކްސްޕޯޓްކުރާ ފަރާތެއް ރަޖިސްޓަރީވުމަށްފަހު، އެ ފަރާތުން ރަޖިސްޓަރީ ކުރުމަށް ހުށަހެޅި ފޯމުގައި ދީފައިވާ އެއްވެސް މައުލޫމާތެއް ބަދަލުވެއްޖެނަމަ، 3 (ތިނެއް) ދުވަހުގެ ތެރޭގައި ކަސްޓަމްސްއަށް އެކަން އަންގަންވާނެއެވެ.

 

15 ވަނަ މާއްދާ - ބުނެވިދިޔަ ގަވާއިދުގެ ޖަދުވަލު 36 ގެ 14 ވަނަ ނަންބަރު އުނިކުރުން.

 

16 ވަނަ މާއްދާ - ބުނެވިދިޔަ ގަވާއިދަށް، މި ގަވާއިދުން އިތުރުކުރާ މާއްދާތަކާއި އުނިކުރާ މާއްދާތަކާ ގުޅިގެން ގަވާއިދުގެ މާއްދާތަކުގެ ނަންބަރު ތަރުތީބުކުރުން.

 

17 ވަނަ މާއްދާ - ބުނެވިދިޔަ ގަވާއިދުގެ ވަކި މާއްދާއަކަށް ނުވަތަ ވަކި މާއްދާއެއްގެ ބަޔަކަށް ހަވާލާދީފައިވާ ތަންތަން، މި ގަވާއިދުން ގެންނަ އިސްލާހުތަކާ ގުޅިގެން ބަދަލުކުރުން.

 

18 ވަނަ މާއްދާ - މި ގަވާއިދަށް އަމަލު ކުރަން ފަށާނީ، މި ގަވާއިދު ދިވެހިސަރުކާރުގެ ގެޒެޓުގައި ށާއިއުކުރާ ދުވަހުން ފެށިގެންނެވ.

 

މައި ގަވާއިދު

ކަސްޓަމްސްގެ އާންމު ގަވާއިދު (ގަވާއިދު ނަންބަރުު 2011-41)