އިންސްޓްޓިއުޓް އޮފް ޗާޓަރޑް އެކައުންޓެންޓް އޮފް މޯލްޑިވްސްގެ ދަރިވަރުންގެ ގަވާއިދު
(ކޮންސޮލިޑޭޓެޑް ނަންބަރު 2024-83)
(މި ގަވާއިދަށް އަމަލުކުރަން ފެށީ 10 ސެޕްޓެމްބަރު 2024 ގައި)
1 ވަނަ މާއްދާ - ތައާރުފާއި ނަން
(ހ) މިއީ، ގާނޫނު ނަންބަރު 2020-13 (ދިވެހިރާއްޖޭގެ ޗާޓަރޑް އެކައުންޓެންޓުންގެ ގާނޫނު) ގެ 38 ވަނަ މާއްދާގެ )ހ( ގެ (6) ވަނަ ނަންބަރުގެ ދަށުންއެކުލަވައިލައިފައިވާ ގަވާއިދެކެވެ.
(ށ) މި ގަވާއިދަށް ކިޔާނީ، "އިންސްޓިޓިއުޓް އޮފް ޗާޓަރޑް އެކައުންޓެންޓް އޮފް މޯލްޑިވްސްގެ ދަރިވަރުންގެ ގަވާއިދު" އެވެ،
2 ވަނަ މާއްދާ - މަގުސަދު
މި ގަވާއިދުގެ މަގުސަދަކީ، އިންސްޓިޓިއުޓުގައި ދަރިވަރުން ރަޖިސްޓަރީކުރުމާ ގުޅޭ އުސޫލުތަކާއި އިޖުރާތުތައް ކަނޑައެޅުމާއި، އިންސްޓިޓިއުޓުގެ ދަރިވަރުން އަމަލުކުރަންޖެހޭ އުސޫލުތައް ބަޔާންކުރުމެވެ.
3 ވަނަ މާއްދާ - ގަވާއިދު ހިންގުން
މި ގަވާއިދު ހިނގާނީ، އިންސްޓިޓިއުޓުގައި ދަރިވަރުންގެ ގޮތުގައި ރަޖިސްޓަރީކޮށްފައިވާ ފަރާތްތަކުގެ މައްޗަށެވެ.
4 ވަނަ މާއްދާ - ރަޖިސްޓަރީކުރަން ފެށޭ ތާރީހު
ދަރިވަރެއްގެ ގޮތުގައި އިންސްޓިޓިއުޓުގައި ރަޖިސްޓަރީވުމަށް ހުށަހަޅާ އެޕްލިކޭށަންތައް އިސްޓިޓިއުޓުން ބަލައިގަންނަން ފަށާނީ، 1 ޖަނަވަރީ 2025 އިން ފެށިގެންނެވެ.
5 ވަނަ މާއްދާ - ދަރިވަރަކަށް ވުމުގެ ށަރުތުތައް
އިންސްޓިޓިއުޓުގެ ދަރިވަރަކަށް ވާންއެދޭ ކޮންމެ ފަރާތެއްގެ ކިބައިގައި އަންނަނިވި ށަރުތުތައް ހުންނަންވާނެއެވެ.
(ހ) ދިވެހި ރައްޔިތެއް ކަމުގައި ވުން.
(ށ) އިންޓަރނޭށަނަލް ފެޑަރޭށަން އޮފް އެކައުންޓެންޓްސްގެ މެންބަރުކަން އޮންނަ ޕްރޮފެށަނަލް އެކައުންޓަންސީ އޯގަނައިޒޭށަނެއްގެ ޕްރޮފެށަނަލް އެކައުންޓަންސީ ކޯހެއްގައި ބައިވެރިވެ، އެފަދަ ކޯހެއް ފުރިހަމަކުރަމުން ދިއުން. ނުވަތަ
(ނ) އިންސްޓިޓިއުޓުގެ ފަރާތުން ހިންގުމަށް ހުއްދަކޮށްފައިވާ ކޯހެއްގައި ބައިވެރިވެ އެފަދަ ކޯހެއް ފުރިހަމަކުރަމުން ދިއުން.
6 ވަނަ މާއްދާ - އެޕްލިކޭށަން ހުށަހެޅުމުގެ އިޖުރާތުތައް
(ހ) އިންސްޓިޓިއުޓުގެ ދަރިވަރަކަށް ވުމުގެ ށަރުތު ހަމަވާ ފަރާތްތަކާއި ރަޖިސްޓަރީވުމަށް އެދޭ ފަރާތްތަކުން، އިންސްޓިޓިއުޓުގެ އޮންލައިން ޕޯޓަލް މެދުވެރިކޮށް، އެޕްލިކޭށަން ހުށަހަޅާއިރު ބޭނުންވާ ލިޔެކިޔުންތަކާއެކު އެޕްލިކޭށަނެއް ހުށަހަޅަންވާނެއެވެ.
(ށ) މި މާއްދާގައި ބަޔާންކޮށްފައިވާ އެޕްލިކޭށަނެއް އިންސްޓިޓިއުޓަށް ލިބުމުން، އެޕްލިކޭށަން ފޯމާއި އެޕްލިކޭށަނާ ގުޅުންހުރި އެހެނިހެން ލިޔެކިޔުންތައް އިންސްޓިޓިއުޓުން ރިވިއުކުރަންވާނެއެވެ.
(ނ) އިންސްޓިޓިއުޓުގެ ދަރިވަރެއްގެ ގޮތުގައި ރަޖިސްޓަރީވުމަށް އެދި އެޕްލިކޭށަން ހުށަހަޅާ ފަރާތްތަކުގެ އެޕްލިކޭށަން ރިވިއުކުރުމުގެ ތެރެއިން، އިންސްޓިޓިއުޓަށް އިތުރު މައުލޫމާތު ބޭނުންވާ ނަމަ، އެ މައުލޫމާތެއް ހުށަހެޅުމަށް އެ ފަރާތްތަކަށް އަންގައިފި ހިނދެއްގައި، އެފަދަ މައުލޫމާތު އެ ފަރާތް ތަކުން އިންސްޓިޓިއުޓަށް ހުށަހަޅަންވާނެއެވެ.
(ރ) އިންސްޓިޓިއުޓުގެ ދަރިވަރެއްގެ ގޮތުގައި ރަޖިސްޓަރީވުމަށް އެދި ހުށަހަޅާ ފަރާތާ ގުޅިގެން ބެލުމަށް އެކަށީގެންވާކަމަށް އިންސްޓިޓިއުޓަށް ފެންނަ އެ ނޫން ވެސް މައުލޫމާތެއް، އެޕްލިކޭށަން ރިވިއުކުރުމުގެ ތެރެއިން ވަޒަންކުރުމުގެ އިހްތިޔާރު އިންސްޓިޓިއުޓަށް ލިބިގެންވެއެވެ.
7 ވަނަ މާއްދާ - ރަޖިސްޓަރީކުރުން
(ހ) އިންސްޓިޓިއުޓުގެ ދަރިވަރެއްގެ ގޮތުގައި ރަޖިސްޓަރީވުމަށް ފުރިހަމަވާންޖެހޭ ށަރުތުތައް ފުރިހަމަވާ ފަރާތްތަކުން އިންސްޓިޓިއުޓުގެ މެންބަރުންނަށް ނުވާގޮތަށް، ދަރިވަރުންގެ ގޮތުގައި އިސްޓިޓިއުޓުގައި ރަސްމީކޮށް ރަޖިސްޓަރީކުރެވޭނެއެވެ.
(ށ) އިންސްޓިޓިއުޓުގެ ދަރިވަރެއްގެ ގޮތުގައި ރަޖިސްޓަރީކުރާ ފަރާތެއްގެ ރެޖިސްޓްރޭށަން މުއްދަތަކީ، ރަޖިސްޓަރީކުރާ ތާރީހުން ފެށިގެން 5 (ފަހެއް) އަހަރުދުވަހުގެ މުއްދަތެވެ. މި މުއްދަތު ހަމަވުމުން ރެޖިސްޓްރޭށަން ދަމަހައްޓަން ބޭނުންވާ ފަރާތްތަކުން ރެޖިސްޓްރޭށަން އައުކުރުމަށް ހުށަހެޅިދާނެއެވެ.
(ނ) އިންސްޓިޓިއުޓުގައި ރަޖިސްޓަރީވާ ދަރިވަރުންގެ ރަޖިސްޓަރީއެއް އިންސްޓިޓިއުޓުން ބަލަހައްޓަންވާނެއެވެ.
8 ވަނަ މާއްދާ - ރަޖިސްޓަރީން އުނިކުރުން
އަންނަނިވި ހާލަތްތަކުން ކުރެ ހާލަތެއް މެދުވެރިވެއްޖެ ނަމަ، އެ ދަރިވަރަކު ރަޖިސްޓަރީން އުނިކުރެވިދާނެއެވެ.
(ހ) ބައިވެރިވެފައިވާ ކޯހެއް ފުރިހަމަކޮށްފައިވާކަން ނުވަތަ ހާސިލުކުރަން އުޅުނު ކޮލިފިކޭށަނެއް ހާސިލުވެއްޖެކަމަށް އިންސްޓިޓިއުޓަށް އަންގައި، އެކަން ސާބިތުކުރަން ބޭނުންވާ ލިޔެކިޔުންތައް ހުށަހެޅުމުން.
(ށ) ބައިވެރިވެފައިވާ ކޯހެއް ފުރިހަމަކުރުމުގެ ނުވަތަ ހާސިލުކުރަން އުޅުނު ކޮލިފިކޭށަނެއް ހޯދުމުގެ މަސައްކަތް ހުއްޓައިލައިފައިވާކަމަށް އިންސްޓިޓިއުޓަށް ދަރިވަރު އެންގުމުން.
(ނ) އިންސްޓިޓިއުޓުގެ އެފިލިއޭޓެއްގެ ނުވަތަ މެންބަރެއްގެ ގޮތުގައި ދަރިވަރު ރަޖިސްޓަރީވުމުން.
(ރ) ސުލޫކީ މައްސަލައަކާ ގުޅިގެން އިންސްޓިޓިއުޓުން ނިންމާ ނިންމުމަކުން.
(ބ) ދަރިވަރަކު ނިޔާވެއްޖެ ނަމަ، ނިޔާވި ދަރިވަރުގެ ވާރިސުން، ދަރިވަރު ނިޔާވިކަން ކަށަވަރުކޮށްދޭ ރަސްމީ ލިޔުމެއްގެ ކޮޕީއެއް އިންސްޓިޓިއުޓަށް ހުށަހެޅުމުން.
(ޅ) މި ގަވާއިދުގައި ބަޔާންކޮށްފައިވާ ކަންކަމާ ހިލާފުވުމުން.
9 ވަނަ މާއްދާ - ދަރިވަރުން ދަމަހައްޓަންޖެހޭ އަހްލާގާއި އެތިކްސް
އިންސްޓިޓިއުޓުގެ ކޯޑް އޮފް އެތިކްސްގައިވާ އުސޫލުތަކަށް ތަބާވެ، އެންމެ މަތީ ދަރަޖައިގެ ޕްރޮފެށަނަލް އެތިކްސްއާއި އަހްލާގު އިންސްޓިޓިއުޓުގެ ދަރިވަރުން އަބަދުވެސް ދަމަހައްޓަންވާނެއެވެ.
10 ވަނަ މާއްދާ - ދަރިވަރުންގެ ހައް ގުތަކާއި އިލްތިޒާމުތައް
(ހ) އިންސްޓިޓިއުޓުގެ ދަރިވަރެއްގެ ގޮތުގައި ރަޖިސްޓަރީވުމާއެކު، އަދި ދަރިވަރެއްގެ ގޮތުގައި ރަޖިސްޓަރީވެފައިވާހައި ހިނދަކު، އިންސްޓިޓިއުޓުގެ އެންމެހައި އުސޫލުތަކާއި ގަވާއިދުތައް ދަރިވަރުގެ މައްޗަށް ހިނގާނެއެވެ.
(ށ) އިންސްޓިޓިއުޓުގެ އުސޫލުތަކާއި ގަވާއިދުތަކާ އެއްގޮތްވާ ގޮތުގެ މަތީން އިންސްޓިޓިއުޓުގެ ދަރިވަރުންނަށް ޕްރޮފެށަނަލް ޑިވެލޮޕްމަންޓާ ގުޅޭ ފުރުސަތުތަކާއި، އާޓިކަލްށިޕް ޕްލޭސްމަންޓްތަކާއި، އެހެނިހެން މަންފާ ލިބޭނެއެވެ.
(ނ) އިންސްޓިޓިއުޓުގެ ދަރިވަރުންގެ ނަމުގެ ފަހަތުގައި “ACA “ނުވަތަ “FCA “ފަދަ އަކުރުތައް ބޭނުންކޮށްގެން ނުވާނެއެވެ.
11 ވަނަ މާއްދާ - ގަވާއިދާ ހިލާފުވުން
މި ގަވާއިދުގައި ބަޔާންކޮށްފައިވާ އެއްވެސް އުސޫލަކާ އިންސްޓިޓިއުޓުގެ ދަރިވަރަކު ހިލާފުވެއްޖެ ނަމަ، ތިރީގައި ބަޔާންކޮށްފައިވާ ފިޔަވަޅުތައް އެޅޭނެއެވެ.
(ހ) ފުރަތަމަ އިންޒާރު ދިނުން.
(ށ) ސަސްޕެންޑްކުރުން ނުވަތަ ދަރިވަރުންގެ ރަޖިސްޓަރީން އުނިކުރުން.
12 ވަނަ މާއްދާ - އަހްލާ ގީ ފިޔަވަޅު އެޅުން
އިންސްޓިޓިއުޓުގެ ދަރިވަރަކާ ދެކޮޅަށް އަހްލާގީ ފިޔަވަޅެއް އެޅުމުގެ ކުރިން، އަދުލުވެރި އަދި ދެފުށްފެންނަ އިޖުރާއަތެއްގެ ދަށުން، އެ ދަރިވަރަކަށް ކަމާ ގުޅިގެން ބަސްބުނުމުގެ ފުރުސަތު އިންސްޓިޓިއުޓުން ދޭންވާނެއެވެ.
13 ވަނަ މާއްދާ - މައުލޫމާތު ބަދަލުވުން
އިންސްޓިޓިއުޓުގައި ރަޖިސްޓަރީކޮށްފައިވާ ދަރިވަރެއްގެ އެއްވެސް މައުލޫމާތެއް ބަދަލުވެއްޖެ ނަމަ، އިންސްޓިޓިއުޓުގެ ޕޯޓަލް މެދުވެރިކޮށް އެ ދަރިވަރެއްގެ ޕްރޮފައިލުގައިވާ މައުލޫމާތު، ދަރިވަރު އަމިއްލައަށް އަދާހަމަކުރަންވާނެއެވެ.
14 ވަނަ މާއްދާ - ބަދަލުތަކާއި އިސްލާހުތައް
އިންސްޓިޓިއުޓަށް އެކަށީގެންވާކަމަށް ގަބޫލުކުރާ ހާލަތުތަކުގައި މި ގަވާއިދުގައިވާ ކަންކަމާއި އުސޫލުތަކަށް ބަދަލުގެނައުމުގެ ނުވަތަ އެ ކަންކަން އިސްލާހުކުރުމުގެ ހައްގު އިންސްޓިޓިއުޓަށް ލިބިފައިވެއެވެ. އަދި އެފަދަ ކޮންމެ ބަދަލެއް ނުވަތަ އިސްލާހެއް ދިވެހި ސަރުކާރުގެ ގެޒެޓުގައި އިންސްޓިޓިއުޓުން ށާއިއުކުރަންވާނެއެވެ.
15 ވަނަ މާއްދާ - މާނަކުރުން
މި ގަވާއިދުގައި ކަނޑައެޅިގެން އެހެން ގޮތަކަށް ބަޔާންކޮށްފައި ނުވާހައި ހިނދަކު، އަންނަނިވި ލަފުޒުތަކާއި އިބާރާތްތަކަށް ދީފައި އެވަނީ އަންނަނިވި އަކުރުތަކުގައިވާ މާނަތަކެވެ.
(ހ) "އިންސްޓިޓިއުޓް" ކަމަށް ބުނެފައި އެވަނީ، ގާނޫނުގެ ދަށުން އުފައްދައިފައިވާ އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްއަށެވެ.
(ށ) “އިންޓަރނޭށަނަލް ފެޑަރޭށަން އޮފް އެކައުންޓެންޓްސް" ކަމަށް ބުނެފައި އެވަނީ، ގާނޫނުގެ 41 ވަނަ މާއްދާގެ (ދ) ގައި ބަޔާންކޮށްފައިވާ އިންޓަނޭށަނަލް ފެޑަރޭށަން އޮފް އެކައުންޓެންޓްސްއަށެވެ.
(ނ) “އޭ، ސީ. އޭ” ކަމަށް ބުނެފައި އެވަނީ، ގާނޫނުގެ 9 ވަނަ މާއްދާގައި ބަޔާންކޮށްފައިވާ އެސޯސިއޭޓް މެންބަރުންނަށެވެ.
(ރ) “އެފް. ސީ. އޭ” ކަމަށް ބުނެފައި އެވަނީ، ގާ ނޫނުގެ 10 ވަނަ މާއްދާގައި ބަޔާންކޮށްފައިވާ ފެލޯ މެންބަރުންނަށެވެ.
(ބ) “ދަރިވަރު” ކަމަށް ބުނެފައި އެވަނީ، ގާނޫނުގެ 41 ވަނަ މާއްދާގެ (ބ) ގައި ބަޔާންކޮށްފައިވާ ދަރިވަރުންނަށެވެ.
(ޅ) “ގާނޫނު” ކަމަށް ބުނެފައި އެވަނީ، ގާނޫނު ނަންބަރު 2020-13 (ދިވެހިރާއްޖޭގެ ޗާޓަރޑް އެކައުންޓެންޓުންގެ ގާނޫނު) އަށެވެ.
16 ވަނަ މާއްދާ - ގަވާއިދަށް އަމަލުކުރަން ފެށުން
މި ގަވާއިދަށް އަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ށާއިއުކުރާ ތާރީހުން ފެށިގެންނެވެ.
ކިޔުންތެރިންގެ ހިޔާލު