ކުޅިވަރާބެހޭ ގައުމީ މަޖިލީހުގެ ގަވާއިދު

(ކޮންސޮލިޑޭޓެޑް ނަންބަރު 2016-97)

(1ވަނަ އިސްލާހު ކޮންސޮލިޑޭޓް ކުރެވިފައި)

1 ވަނަ މާއްދާ - ތައާރުފް

(ހ) މި ގަވާއިދަކީ، ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ ތިންވަނަ ބާބުގެ 12 ވަނަ މާއްދާގެ ދަށުން ކުޅިވަރާބެހޭ ވަޒީރު އެކުލަވާލައި، ކުޅިވަރާބެހޭ ގައުމީ މަޖިލީހުގެ ކަންކަން ހިންގާނެގޮތް ބަޔާންކުރުމުގެ ގޮތުން އެކުލަވާލެވިފައިވާ ގަވާއިދެކެވެ.

(ށ) މި ގަވާއިދަކީ، ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ 15 ވަނަ މާއްދާއާއި، 22 ވަނަ މާއްދާއިން ކުޅިވަރާބެހޭ ގައުމީ މަޖިލީހަށް ލިބިފައިވާ ބާރުގެ ދަށުން ހެދިފައިވާ ގަވާއިދެވެ.

(ނ) މި މަޖިލީހުގެ ނަމަކީ "ކުޅިވަރާބެހޭ ގައުމީ މަޖިލިސް" އެވެ. އިނގިރޭސިބަހުން ކިޔާނީ “Council Sports National “މިހެންނެވެ.

(ރ) މި ގަވާއިދަށް ކިޔާނީ "ކުޅިވަރާބެހޭ ގައުމީ މަޖިލީހުގެ ގަވާއިދު" އެވެ.

2 ވަނަ މާއްދާ - ކުޅިވަރާބެހޭ ގައުމީ މަޖިލިސް

ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ ތިންވަނަ ބާބުގެ ދަށުން، ސަރުކާރުން އެ ވަގުތަކު ކުޅިވަރުގެ ކަންކަން ހިންގުމަށް ހަވާލުކުރެވިފައިވާ މުއައްސަސާގެ ދަށުގައި 'ކުޅިވަރާބެހޭ ގައުމީ މަޖިލިސް' ގެ ނަމުގައި މަޖިލީހެއް ހެދިފައި އޮންނަންވާނެއެވެ.

3 ވަނަ މާއްދާ - މަޖިލިސް އެކުލެވިގެންވާ ގޮތް

މަޖިލިސް އެކުލެވިގެންވަނީ 11 (އެގާރަ) މެންބަރުންގެ މައްޗަށެވެ. އެއީ:

(ހ) ކުޅިވަރާބެހޭ ވުޒާރާއިން މިނިސްޓަރު އައްޔަންކުރާ 2 (ދޭއް) މެންބަރުން؛

(ށ) މިނިސްޓަރު އައްޔަންކުރާ 2 (ދޭއް) އަންހެން މެންބަރުން؛

(ނ) އެޑިޔުކޭށަން މިނިސްޓްރީ ތަމްސީލުކުރުމަށް މިނިސްޓަރު އައްޔަންކުރާ 1 (އެކެއް) މެންބަރު؛

(ރ) މިނިސްޓަރު އައްޔަންކުރާ 1 (އެކެއް) ގާނޫނީ ވަކީލު؛

(ބ) ގައުމީ ކުޅިވަރު އެސޯސިއޭށަންތަކުން އޮލިމްޕިކް ކުޅިވަރުތައް ތަމްސީލުކުރުމަށް މިނިސްޓަރު އައްޔަންކުރާ 2 (ދޭއް) މެންބަރުން އަދި ނޮން -އޮލިމްޕިކް ކުޅިވަރުތައް ތަމްސީލުކުރުމަށް މިނިސްޓަރު އައްޔަންކުރާ 2 (ދޭއް) މެންބަރުން؛

މި 4 މެންބަރުން އައްޔަން ކުރުމަށް ހަމަޖެހިފައިވާގޮތް ތިރީގައި މިވަނީއެވެ.

- އޮލިމްޕިކް ކުޅިވަރުތައް ތަމްސީލުކުރާ ގައުމީ އެސޯސިއޭށަންތަކުން ހުށަހަޅާ ނަންތަކަށް ބެލުމަށްފަހު، އޮލިމްޕިކް ކުޅިވަރުތަކުން މިނިސްޓަރު ކަނޑައަޅާ 2 (ދޭއް) މެންބަރުން؛

- ނޮން -އޮލިމްޕިކް ކުޅިވަރުތައް ތަމްސީލުކުރާ ގައުމީ އެސޯސިއޭށަންތަކުން ހުށަހަޅާ ނަންތަކަށް ބެލުމަށްފަހު، ނޮން -އޮލިމްޕިކް ކުޅިވަރުތަކުން މިނިސްޓަރު ކަނޑައަޅާ 2 (ދޭއް) މެންބަރުން.

(ޅ) މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީން ކަނޑައަޅާ 1 (އެކެއް) މެންބަރު.

4 ވަނަ މާއްދާ - މެންބަރުންގެ ސިފަތައް

މަޖިލީހުގެ މެންބަރުންކަމުގައި އައްޔަންކުރާ މީހުންގެ ކިބައިގައި ތިރީގައިމިވާ ސިފަތައް ހުންނަންވާނެއެވެ.

(ހ) ބުއްދި ސަލާމަތުންހުރި ދިވެހިރައްޔިތަކު ކަމުގައިވުން؛

(ށ) ވޭތުވެދިޔަ 5 (ފަހެއް) އަހަރުދުވަހުގެ ތެރޭގައި ޖިނާއީ އެއްވެސް ކުށެއް ސާބިތުވެފައިވާ ފަރާތަކަށް ނުވުން؛

(ނ) ދިވެހިރާއްޖޭގައި އިޖުތިމާއީ އަދި ގައުމީ ފެންވަރުގައި ކުޅިވަރުގެ ދާއިރާގައި އަމަލީގޮތުން ހަރަކާތްތެރިވެ އެކަށީގެންވާ ތައުލީމު ނުވަތަ ތަޖުރިބާ ލިބިފައިވާ ފަރާތެއް ކަމުގައިވުން؛

(ރ) ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ ދަށުން ރަޖިސްޓަރީކުރާ ގައުމީ ކުޅީވަރު އެސޯސިއޭށަނެއްގެ ނުވަތަ ފެޑެރޭށަނެއްގެ އަދި މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީގައި ހިމެނޭ މެންބަރެއް ކަމުގައިނުވުން.

5 ވަނަ މާއްދާ - މަޖިލީހުގެ ދައުރު

(ހ) މިގަވާއިދުގެ 2 ވަނަ މާއްދާގެ ދަށުން އެކުލަވާލެވޭ މަޖިލީހުގެ ދައުރަކީ މީލާދީ 4 (ހަތަރެއް) އަހަރުދުވަހެވެ.

(ށ) މި މަޖިލީހުގެ ދައުރު ގުނަންފަށާނީ، މަޖިލިސް އެކުލަވާލެވޭ ތާރީހުން ފެށިގެންނެވެ.

6 ވަނަ މާއްދާ - މަގާމު ގެއްލުން

ތިރީގައިމިވާ ހާލަތްތަކުގެ ތެރެއިން ހާލަތެއް މެދުވެރިވެއްޖެނަމަ، މެންބަރުކަމުގެ މަގާމު ގެއްލޭނެއެވެ.

(ހ) އިސްތިއުފާ ދިނުން؛

(ށ) މެންބަރުކަމުގެ ދައުރު ހަމަވުން؛

(ނ) މެންބަރުކަމުން ވަކިކުރުން؛

(ރ) މަރުވުން.

7 ވަނަ މާއްދާ - މަގާމު ހުސްވުން

އެއްވެސް ސަބަބަކާހުރެ މަޖިލީހުގެ އެއްވެސް މެންބަރެއްގެ މަގާމު ހުސްވެއްޖެނަމަ، ގިނަވެގެން 60 (ފަސްދޮޅަސް) ދުވަހުގެ ތެރޭގައި އެ މަގާމަށް އެހެން ބޭފުޅަކު ހަމަޖައްސަން ޖެހޭނެއެވެ. ހުސްވާ މަގާމުތަކަށް މެންބަރުން ހަމަޖެއްސުމުގެ އެންމެހައި ކަމެއް ހަމަޖައްސާނީ ކުޅިވަރާބެހޭ ވުޒާރާއިންނެވެ.

8 ވަނަ މާއްދާ - އިސްތިއުފާ ދިނުން

މަޖިލީހުގެ މެންބަރަކު އޭނާގެ މަގާމުން އިސްތިއުފާދޭން ބޭނުންވެއްޖެނަމަ، ސަބަބު ބަޔާންކޮށް ކުޅިވަރާބެހޭ ވަޒީރަށް ލިޔުމުން ފޮނުވުމުން އެ މަގާމުން އޭނާ އިސްތިއުފާ ދީފިކަމުގައި ބެލެވޭނެއެވެ.

9 ވަނަ މާއްދާ - މެންބަރުކަމުން ވަކިކުރުން

ތިރީގައިވާ ހާލަތްތަކުގެ ތެރެއިން ހާލަތެއް މެދުވެރިވެއްޖެނަމަ، މަޖިލީހުގެ މަށްވަރާގެމަތިން މި ގަވާއިދުގެ ދަށުން މެންބަރަކު މެންބަރުކަމުން ވަކިކުރުމުގެ އިހުތިޔާރު ކުޅިވަރާބެހޭ ވަޒީރަށް ލިބިގެންވެއެވެ.

(ހ) މަޖިލީހުގެ މެންބަރެއްގެ ކިބައިގައި ހުރުމަށް މި ގަވާއިދުގެ 4 ވަނަ މާއްދާގައި ލާޒިމުކުރާ ސިފައެއް އުނިވުން؛

(ށ) ނިހާއީ ހުކުމަކުން އިފުލާސްކުރުން؛

(ނ) މަޖިލީހުގެ މެންބަރެއްގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތައް އަދާކުރުމުގައި އިހުމާލުވުން.

(ރ) ކުޅިވަރާބެހޭ ގައުމީ މަޖިލީހުގެ މެންބަރެއްގެ ހައިސިއްޔަތުން އުފުލަންޖެހޭ މަސްއޫލިއްޔަތުތައް އެންމެ އެކަށީގެންވާ ގޮތުގެ މަތީން އެ މެންބަރަކަށް އަދާނުކުރެވޭނެކަމަށް އެ މެންބަރަކު އައްޔަނުކުރި ފަރާތަށް ފެނުން. (އިތުރު ކުރެވިފައި)

10 ވަނަ މާއްދާ - ކުޅިވަރާބެހޭ ގައުމީ މަޖިލީހުގެ މަސްއޫލިއްޔަތުތައް

ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ ތިންވަނަ ބާބުގެ 13 ވަނަ މާއްދާގައި ބަޔާންކުރާ މަޖިލީހުގެ މަސްއޫލިއްޔަތުތަކާއި ޒިންމާތައް އަދާކުރަންވާނެއެވެ.

11 ވަނަ މާއްދާ - އޮނަރޭރިއަމް

މަޖިލީހުގެ ށަރަފާއި ހައިބަތު ރަމްޒުކޮށްދޭފަދަ އޮނަރޭރިއަމެއް މަޖިލީހުގެ މެންބަރުންނަށް ދެވޭނެއެވެ. އެގޮތުން، ކޮންމެ ބައްދަލުވުމަކަށް 500 (ފަސްސަތޭކަ) ރުފިޔާގެ ރޭޓުން، މަހަކު 3000 ރުފިޔާއަށްވުރެ ބޮޑުނުވާގޮތަށް މަޖިލީހުގެ މެންބަރުންނަށް އޮނަރޭރިއަމެއް ދެވޭނެއެވެ. އެއްވެސް ސަބަބަކާހުރެ ބައްދަލުވުމަކަށް ހާޒިރުނުވެވިއްޖެނަމަ، އެ ބައްދަލުވުމަށް ކަނޑައެޅިފައިވާފައިސާ އެ މެންބަރަކަށް ނުދެވޭނެއެވެ.

12 ވަނަ މާއްދާ - އަމިއްލަ މަސްލަހަތެއް އޮތްކަމެއް ނުވަތަ މައްސަލައެއް ބެލުމުގައި ބައިވެރިނުވުން

މަޖިލީހުގެ އެއްވެސް މެންބަރެއްގެ އަމިއްލަ މަސްލަހަތެއް ނުވަތަ ފައިދާއެއް ނުވަތަ ދައުރެއް އޮތްކަމެއް ނުވަތަ މައްސަލައެއް، މަޖިލީހުން ބަލާހިނދު، އެކަމެއް ނުވަތަ މައްސަލައެއް ބެލުމުގައި، އެއްވެސް މިންވަރަކަށް އެ މެންބަރަކު ބައިވެރިވެގެންނުވާނެއެވެ. އަދި މަޖިލީހުން ބަލާ މައްސަލައަކީ، މިފަދަ މަސްލަހަތެއް ނުވަތަ ފައިދާއެއް ނުވަތަ ދައުރެއް އޮތްކަމެއްކަން ނުވަތަ މައްސަލައެއްކަން ކުރިން އެނގިފައިނެތް ނަމަވެސް އެކަން އެނގޭހިނދު، އެކަން މަޖިލީހުގެ ރިޔާސަތަށް އެންގުމާއެކު، އެކަމެއް ނުވަތަ މައްސަލައެއް ބެލުމުން އެ މެންބަރަކު ތަނާޒުލު ވާންވާނެއެވެ.

13 ވަނަ މާއްދާ - މަޖިލީހުގެ ސިޔާސަތު އެކުލަވާލުން

މަޖިލީހުގެ މަސައްކަތްތައް ހިންގާނެ ގޮތުގެ ސިޔާސަތު ކަނޑައަޅަންވާނީ، ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) އާއި، އަދި ކުޅިވަރާ ބެހޭގޮތުން ސަރުކާރުން އެ ވަގުތަކު ގެންގުޅޭ ސިޔާސަތާ އެއްގޮތްވާ ގޮތުގެމަތިންނެވެ.

14 ވަނަ މާއްދާ - ގައުމީ ޖަމްއިއްޔާތަކާއި މަޖިލީހާ އޮންނަ ގުޅުން

ކުޅިވަރުގެ ގައުމީ ޖަމްއިއްޔާތަކުގެ ހަރަކާތްތައް ބަލައި، އެ ހަރަކާތްތައް އިތުރަށް ތަރައްގީކޮށް ކުރިއަރުވާނެ ގޮތްތަކާ ބެހޭގޮތުން ގައުމީ ޖަމްއިއްޔާތަކަށް، ފަންނީ އަދި އިދާރީ އިރުށާދު މަޖިލީހުން ދޭންވާނެއެވެ.

15 ވަނަ މާއްދާ - މަޖިލީހުގެ ރައީސާއި މަޖިލީހުގެ ނައިބުރައީސް

މަޖިލީހުގެ ރައީސަކީ މިނިސްޓަރ އޮފް ޔޫތު އެންޑް ސްޕޯޓްސް ކަނޑައަޅާ ފަރާތެކެވެ. ނައިބުރައީސަކީ މަޖިލީހުގެ މެންބަރުންގެ މެދުގައި ނެގޭ ވޯޓަކުން މެންބަރުން އައްޔަންކުރާ ފަރާތެކެވެ.

16 ވަނަ މާއްދާ - މަޖިލީހުގެ ބައްދަލުވުންތައް

(ހ) މަޖިލީހުގެ ކޮންމެ ބައްދަލުވުމެއްގެވެސް ރިޔާސަތު ބަލަހައްޓާނީ، މަޖިލީހުގެ ރައީސެވެ.

(ށ) މަޖިލިހުގެ ރައީސަށް ޖަލްސާގައި ބައިވެރިވެވެންނެތްނަމަ، ރިޔާސަތު ބަލަހައްޓަވާނީ މަޖިލިހުގެ ނައިބުރައީސެވެ.

(ނ) މަޖިލީހުގެ ބައްދަލުވުމެއް ބޭއްވޭނީ މަދުވެގެން މަޖިލީހުގެ 6 (ހައެއް) މެންބަރުން ހާޒިރުވެގެންނެވެ.

(ރ) މަޖިލީހުގެ ޖަލްސާއެއް މަދުވެގެން މަހަކު އެއްފަހަރު ބާއްވަންޖެހޭނެއެވެ.

17 ވަނަ މާއްދާ - މަޖިލީހުގެ ނިންމުންތައް

(ހ) މަޖިލީހުން ނިންމާ ނިންމުންތައް ނިންމަންވާނީ، މަޖިލީހުގެ ބައްދަލުވުމަށް ހާޒިރުވެ ތިބި މެންބަރުންގެ އަގުލަބިއްޔަތުންނެވެ.

(ށ) މަޖިލީހުން ކަމެއް ނިންމުމަށް ވޯޓު ނަގާއިރ،ު ދެފަރާތަށް ލިބިފައިވާ ވޯޓު ހަމަހަމަވާނަމަ، ކާސްޓިންގ ވޯޓު ދިނުމުގެ ބާރު މަޖިލީހުގެ ރައީސަށް ލިބިގެންވެއެވެ.

18 ވަނަ މާއްދާ - މަޖިލީހުގެ ސެކްރެޓޭރިއަޓް

މަޖިލީހުގެ މަސައްކަތްތައް އެންމެ ފުރިހަމަގޮތުގައި ކުރުމަށް، އިދާރީގޮތުން ކުރަންޖެހޭ އެންމެހައި ކަންކަން ކުރުމަށް، ކުޅިވަރާބެހޭ ވުޒާރާއިން ކަނޑައަޅާ މިންވަރަކަށް މުވައްޒަފުން އެކުލެވޭ ސެކްރެޓޭރިއަޓެއް ކުޅިވަރާބެހޭ ވުޒާރާގެ ބައެއްގެ ގޮތުގައި ގާއިމުވެފައި އޮންނަންވާނެއެވެ.

19 ވަނަ މާއްދާ - މަޖިލީހުގެ ބަޖެޓު

މަޖިލީހުގެ ވާޖިބުތަކާއި މަސްއޫލިއްޔަތުތައް ފުރިހަމައަށް އަދާކުރުމަށްޓަކައި، ކޮންމެ އަހަރަކު،ސަރުކާރުން އެ ވަގުތަކު ކުޅިވަރުގެ ކަންކަން ހިންގުމަށް ހަވާލުކުރެވިފައިވާ މުއައްސަސާއިން ކަނޑައަޅާ ބަޖެޓެއް މަޖިލީހަށް ލިބިފައި އޮންނަންވާނެއެވެ.

20 ވަނަ މާއްދާ - އަހަރީ ރިޕޯޓާއި ފައިސާގެ ރިޕޯޓު

ކޮންމެ މީލާދީ އަހަރެއް ނިމުމުން، މަޖިލީހުގެ މަސައްކަތްތައް ހިނގާދިޔަ ގޮތުގެ ރިޕޯޓަކާއި، މަޖިލީހުގެ ފައިސާގެ ކަންކަން ހިނގައިދިޔަ ގޮތުގެ ތަފުސީލު ރިޕޯޓެއް ތައްޔާރުކޮށް، މަޖިލީހުން ފާސްކޮށް، ހިނގާ އަހަރުގެ ޖަނަވަރީމަހުގެ ނިޔަލަށް ވަޒީރަށް ފޮނުވަންވާނެއެވެ.

21 ވަނަ މާއްދާ - މަޖިލީހުގެ ރައީސްގެ ޒިންމާތަކާއި މަސްއޫލިއްޔަތުތައް

މަޖިލީހުގެ ރައީސްގެ ޒިންމާތަކާއި މަސްއޫލިއްޔަތުތައް ތިރީގައި ބަޔާންކޮށްފައި މިވަނީއެވެ.

(ހ) މަޖިލީހުގެ ގަވާއިދުގައި ބަޔާންކުރާ އުސޫލުން މަޖިލީހުގެ ޖަލްސާތައް ބޭއްވުން؛

(ށ) މަޖިލީހުގެ ޖަލްސާތަކުގެ ރިޔާސަތު ބެލެހެއްޓުން؛

(ނ) މަޖިލީހުގެ ގަވާއިދުތަކާ ފުށުނާރާގޮތަށް މަޖިލީހުގެ ޖަލްސާތައް ހިންގުން؛

(ރ) މަޖިލީހުން ނިންމޭ ކަންތައްތައް ސަރުކާރުގެ ކުޅިވަރާބެހޭ ސިޔާސަތުތަކާ އެއްގޮތްވާ ގޮތުގެމަތިން ނިންމުމަށް ބާރުއެޅުން؛

(ބ) މަޖިލީހުގެ މަސައްކަތްތައް ކުރިއަށްގެންދިއުމުގައި ކުޅިވަރާބެހޭ ވުޒާރާއިން ކޮށްދޭންޖެހޭ ކަންތައްތައް ހަމަޖެއްސެވުމަށް ކުރަންޖެހޭ މަސައްކަތްތައް ކުރުން؛

(ޅ) ގާނޫނު ނަންބަރު 2015-30 (ދިވެހިރާއްޖޭގެ ކުޅިވަރު ގާނޫނު) ގެ ތިންވަނަ ބާބުގެ 13 ވަނަ މާއްދާގައި ބަޔާންކުރާ، މަޖިލީހުގެ ޒިންމާތައް އަދާކުރުމަށް ކަނޑައެޅިފައިވާ ފަރާތްތަކުން އެކަންކަން ކުރުވުމަށް އަޅަންޖެހޭ ފިޔަވަޅުތައް އެޅުން؛

(ކ) މަޖިލީހުގެ ބަޖެޓާއި، އަހަރީރިޕޯޓު ތައްޔާރުކޮށް ހުށަހެޅުން ފަދަ މަސައްކަތްތައް ކަނޑައެޅިފައިވާ މުއްދަތުތަކަށް ނިންމުން.

22 ވަނަ މާއްދާ - މަޖިލީހުގެ ނައިބު ރައީސްގެ ޒިންމާތަކާއި މަސްއޫލިއްޔަތުތައް

މަޖިލީހުގެ ނައިބުރައީސްގެ ޒިންމާތަކާއި މަސްއޫލިއްޔަތުތައް ތިރީގައި ބަޔާންކޮށްފައި މިވަނީއެވެ.

(ހ) މަޖިލީހުގެ ގަވާއިދު ބަޔާންކުރާގޮތަށް މަޖިލިސް ހިންގުމުގައި މަޖިލީހުގެ ރައީސަށް އެހީތެރިވެދިނުމާއި މަށްވަރާދިނުން؛

(ށ) މަޖިލީހުގެ ގަވާއިދުގައި ބަޔާންކުރާ އެކިއެކި ލިޔެކިޔުންތައް ތައްޔާރުކުރުމުގައި މަޖިލީހުގެ ރައީސަށް އެހީތެރިވެދިނުން؛

(ނ) މަޖިލީހުގެ ރައީސަށް ބައިވެރިވެން ނެތް ހާލަތްތަކުގައި މަޖިލީހުގެ ޖަލްސާތަކުގެ ރިޔާސަތު ބެލެހެއްޓުން؛

(ރ) މަޖިލީހުން ކުރަން ކަނޑައަޅާ ކަންތައްތައް ރާވައި ހިންގުމުގައި މަޖިލީހުގެ ރައީސަށް އެހީތެރިވެދިނުން.

23 ވަނަ މާއްދާ - މަޖިލީހުގެ މެންބަރުންގެ ޒިންމާތަކާއި މަސްއޫލިއްޔަތުތައް

މަޖިލީހުގެ މެންބަރުންގެ ޒިންމާތަކާއި މަސްއޫލިއްޔަތުތައް ތިރީގައި ބަޔާންކޮށްފައި މިވަނީއެވެ.

(ހ) މަޖިލީހުގެ ޖަލްސާތަކަށް ގަވާއިދުން ހާޒިރުވުން؛

(ށ) މަޖިލީހުގެ މަސައްކަތްތަކަށް ލަފާ ދިނުމާއި، މަސައްކަތްތަކުގައި އަމަލީގޮތުން ބައިވެރިވުން؛

(ނ) މަޖިލީހުގެ ރައީސް ނުވަތަ މަޖިލީހުން ހަވާލުކުރެވޭ ކަންތައްތައް ކަނޑައެޅިފައިވާ ސުންގަޑިތަކަށް ނިންމުން.

24 ވަނަ މާއްދާ - މަޖިލީހުގެ ސެކްރެޓޭރިއަޓުގެ ޒިންމާތަކާއި މަސްއޫލިއްޔަތުތައް

މަޖިލީހުގެ ސެކްރެޓޭރިއޭޓުގެ ޒިންމާތަކާއި މަސްއޫލިއްޔަތުތައް ތިރީގައި ބަޔާންކޮށްފައި މިވަނީއެވެ.

(ހ) މަޖިލީހުގެ ރައީސްގެ ލަފާގެމަތިން މަޖިލީހުގެ ޖަލްސާތަކުގެ އެޖެންޑާ ތައްޔާރުކުރުން؛

(ށ) މަޖިލީހުގެ ޖަލްސާތަކަށް ހުށަހަޅާ މައްސަލަތަކާބެހޭ މައުލޫމާތާއި ލިޔެކިޔުންތައް ހޯދައި ތައްޔާރުކުރުން؛

(ނ) މަޖިލީހުގެ ޖަލްސާތަކުގެ ޔައުމިއްޔާތައް ލިޔ،ެ ކަމާގުޅުންހުރި ފަރާތްތަކަށް ފޮނުވައި،ރައްކާތެރިކޮށް ބެލެހެއްޓުން؛

(ރ) މަޖިލީހުގެ ޖަލްސާތަކާ ގުޅިގެން މަޖިލީހުގެ މެންބަރުންނަށާއި އެނޫންވެސް ފަރާތްތަކަށް ފޮނުވަންޖެހޭ ލިޔެކިޔުންތައް ބަރާބަރަށް ފޮނުވަމުން ގެންދިއުން؛

(ބ) މަޖިލީހުގެ ރައީސްގެ ލަފަޔާއެކު މަޖިލީހުގެ ބަޖެޓު ތައްޔާރުކޮށް މަޖިލީހަށް ހުށަހެޅުން؛

(ޅ) ކޮންމެ އަހަރެއް ނިމުމުން، ވޭތުވެދިޔަ އަހަރު މަޖިލިސް ހިނގިގޮތުގެ އަހަރީރިޕޯޓު ރައީސްގެ ލަފަޔާއެކު ތައްޔާރުކުރުން؛

(ކ) މަޖިލީހުގެ ޖަލްސާތައް ބޭއްވުމުގެ އިންތިޒާމުތައް ހަމަޖެއްސުން؛

(އ) މަޖިލީހުން ކުރަން ނިންމާ ކަންތައްތައް، ރައީސްގެ ލަފަޔާއި އިރުށާދުގެ ދަށުން ރާވައި ހިންގުން؛

(ވ) މަޖިލީހުގެ މަސައްކަތްތަކާ ބެހޭގޮތުން ކުރަންޖެހޭ މިނޫންވެސް އިދާރީ މަސައްކަތްތައް ކުރުން.

25 ވަނަ މާއްދާ - މަޖިލީހުގެ ގަވާއިދު ހަދައި ހިންގުން

ކުޅިވަރާބެހޭ ގައުމީ މަޖިލީހުގެ ޒިންމާތަކާއި މަސްއޫލިއްޔަތުތައް އަދާކުރުމަށް ހަދަންޖެހޭ ގަވާއިދުތައް ހަދައި ހިންގާނީ ކުޅިވަރާބެހޭ ގައުމީ މަޖިލީހުންނެވެ.

26 ވަނަ މާއްދާ - މި ގަވާއިދަށް އަމަލުކުރުން

(ހ) މި ގަވާއިދަށް އަމަލުކުރަން ފަށާނީ، މި ގަވާއިދު ދިވެހި ސަރުކާރުގެ ގެޒެޓުގައި ށާއިއުކުރާ ދުވަހުން ފެށިގެންނެވެ.

(ށ) މި ގަވާއިދަށް ބަދަލުގެނެވޭނީ މަޖިލީހުގެ 2/3 (ތިންބައިކުޅަ ދެބައި) މެންބަރުންގެ އަގުލަބިއްޔަތުންނެވެ. މިގޮތަށް ގެނޭވޭ އިސްލާހުތައް، ދިވެހިސަރުކާރުގެ ގެޒެޓުގައި ށާއިއު ކުރެވޭ ތާރީހުން ފެށިގެން އަމަލުކުރެވޭނެއެވެ.

27 ވަނަ މާއްދާ - މާނަކުރުން

މި ގަވާއިދުގައި އެ އިބާރާތެއް ހިމެނިފައިވާގޮތުން ކަނޑައެޅިގެން އެހެން ގޮތަކަށް ދޭހަނުވާނަމަ؛

'މަޖިލިސް' ކަމަށް ބުނެފައި އެވަނީ، މި ގަވާއިދުގެ 2 ވަނަ މާއްދާގެ ދަށުން އެކުލަވައިލެވޭ 'ކުޅިވަރާބެހޭ ގައުމީ މަޖިލިސް' ށެވެ.

'ވުޒާރާ' ކަމަށް ބުނެފައި އެވަނީ، ސަރުކާރުން އެ ވަގުތަކު ކުޅިވަރުގެ ކަންކަން ހިންގުމަށް ހަވާލުކުރެވިފައިވާ މުއައްސަސާށެވެ.

'ވަޒީރު' ކަމަށް ބުނެފައި އެވަނީ، ސަރުކާރުން އެ ވަގުތަކު ކުޅިވަރުގެ ކަންކަން ހިންގުމަށް ހަވާލުކުރެވިފައިވާ މުއައްސަސާގެ އެންމެ އިސް ވެރިޔާށެވެ.

'ސަރުކާރު' ކަމަށް ބުނެފައި އެވަނީ، ވެރިކަން ހިންގާ ފަރާތާއި، އެ ފަރާތުގެ އެންމެހައި އިދާރާތައް ހިމެނޭގޮތުގެ މަތިންނެވެ.

'ގައުމީ ކުޅިވަރު ޖަމްއިއްޔާ' ކަމަށް ބުނެފައި އެވަނީ، މި ގަވާއިދުގައި ބަޔާންކޮށްފައިވާ ގޮތުގެމަތިން މަޖިލީހުގައި ރަޖިސްޓަރީކުރެވޭ، ކުޅިވަރުގެ ގައުމީ ޖަމްއިއްޔާތަކަށެވެ.