-

 އިމިގްރޭށަންގެ ގާނޫނު (ގާނޫނު ނަންބަރު 2007-01) އަށް 2 ވަނަ އިސްލާހު ގެނައުމުގެ ގާނޫނު

(ގާނޫނު ނަންބަރު 2020-25)

 

ގާނޫނު ނަންބަރު 2007-01 (ދިވެހިރާއްޖޭގެ އިމިގްރޭށަންގެ ގާނޫނު) އަށް އަންނަނިވި އިސްލާހުތައް ގެނައުން.

 

1 ވަނަ މާއްދާ - ބުނެވިދިޔަ ގާނޫނުގެ 9 ވަނަ މާއްދާގެ (ހ) ގެ ފެށޭ އިބާރާތް އަންނަނިވި ގޮތަށް އިސްލާހުކުރުން.

ރާއްޖޭގައި ހުރުމުގެ ހުއްދަ

9. (ހ) ބިދޭސީއަކު ރާއްޖޭގައި ހުރުމުގެ ހުއްދަ، މި ގާނޫނުގެ ބޭނުމަށްޓަކައި ބެހިގެންވަނީ އަންނަނިވި 10 (ދިހައެއް) ބާވަތަށެވެ.

 

2 ވަނަ މާއްދާ - ބުނެވިދިޔަ ގާނޫނުގެ 9 ވަނަ މާއްދާގެ (ހ) ގެ (8) ވަނަ ނަންބަރުގެ ފަހަތަށް އަންނަނިވި ފަދައިން ދެ ނަންބަރު އިތުރުކުރުން.

9. (ހ)

(9) މީޓިންގ ވީޒާ

(10) ކޯޕަރޭޓް ރެސިޑެންޓް ވީޒާ

 

3 ވަނަ މާއްދާ - ބުނެވިދިޔަ ގާނޫނުގެ 9 ވަނަ މާއްދާގެ (ށ) އަންނަނިވި ގޮތަށް އިސްލާހުކުރުން.

9. (ށ) މި ގާނޫނުގެ ދަށުން ހަދާ ގަވާއިދުގައިވާ ގޮތުގެމަތިން، މި މާއްދާގެ (ހ) ގައި ބަޔާންކޮށްފައިވާ ވީޒާތައް ދޫކުރާނީ ކޮންޓްރޯލަރ އޮފް އިމިގްރޭށަނެވެ.

 

4 ވަނަ މާއްދާ - ބުނެވިދިޔަ ގާނޫނުގެ 9 ވަނަ މާއްދާގެ (ށ) ގެ ފަހަތަށް އަންނަނިވި ފަދައިން ހަ އަކުރު އިތުރުކުރުން.

9. (ނ) މި ގާނޫނުގައި އެހެން ގޮތަކަށް ބަޔާންކޮށްފައި ވީނަމަވެސް، ގާނޫނު ނަންބަރު 2/2008 (ވަޒީފާއާބެހޭ ގާނޫނު) ގެ ދަށުން ވާރކް ޕަރމިޓް ދޫކުރުމާއި، ވާރކް ޕަރމިޓްގެ މުއްދަތު އިތުރުކުރުމާއި، ވާރކް ޕަރމިޓް ބާތިލުކުރުމާއި، ވާރކް ޕަރމިޓްގެ ފީ ނެގުމާއި، ވާރކް ޕަރމިޓްއާގުޅޭ އެންމެހައި ކަންކަން ހިންގައި ބަލަހައްޓާނީ، އެ ގާނޫނު ތަންފީޒުކުރުމުގެ މަސްއޫލިއްޔަތު ހަވާލުކޮށްފައިވާ މިނިސްޓްރީންނެވެ.

(ރ) މި މާއްދާގެ (ނ) ގައި ބަޔާންކުރާ ވާރކް ޕަރމިޓްގެ މައްޗަށް ބިނާކޮށް، ވާރކް ވީޒާއަށް އެދޭ ފަރާތްތަކަށް، އިތުރު ފީއެއް ނުވަތަ ށަރުތަކާ ނުލައި، ވާރކް ވީޒާ، ކޮންޓްރޯލަރ އޮފް އިމިގްރޭށަން ދޫކުރަންވާނެއެވެ. އެހެންނަމަވެސް، މި ގާނޫނުގެ 8 ވަނަ މާއްދާގައި ބަޔާންކުރާ ކަންކަމަށް ރިއާޔަތްކޮށް ވާރކް ވީޒާ ދޫނުކުރުމުގެ އިހްތިޔާރު، ކޮންޓްރޯލަރ އޮފް އިމިގްރޭށަނަށް ލިބިގެންވެއެވެ.

(ބ) މި ގާނޫނުގައި އެހެން ގޮތަކަށް ބަޔާންކޮށްފައި ވީނަމަވެސް، މި މާއްދާގެ (ހ) ގެ (4) ވަނަ ނަންބަރުގައި ބަޔާންކުރާ ބިޒްނަސް ވީޒާއާއި، އެ މާއްދާގެ (10) ވަނަ ނަންބަރުގައި ބަޔާންކުރާ ކޯޕަރޭޓް ރެސިޑެންޓް ވީޒާ ދޫކުރާނީ، ރަޖިސްޓްރާރ އޮފް ބިޒްނަސަސް ދޫކުރާ ހުއްދައިގެ މައްޗަށް ބިނާކޮށް އިތުރު ށަރުތަކާ ނުލައި، ކޮންޓްރޯލަރ އޮފް އިމިގްރޭށަނެވެ. އެހެންނަމަވެސް، މި ގާނޫނުގެ 8 ވަނަ މާއްދާގައި ބަޔާންކުރާ ކަންކަމަށް ރިއާޔަތްކޮށް މި މާއްދާގައި ބަޔާންކުރާ ވީޒާތައް ދޫނުކުރުމުގެ އިހްތިޔާރު، ކޮންޓްރޯލަރ އޮފް އިމިގްރޭށަނަށް ލިބިގެންވެއެވެ.

(ޅ) މި މާއްދާގެ (ހ) ގެ (4) ވަނަ ނަންބަރުގައި ބަޔާންކުރާ ބިޒްނަސް ވީޒާއާއި،   އެ މާއްދާގެ (10) ވަނަ ނަންބަރުގައި ބަޔާންކުރާ ކޯޕަރޭޓް ރެސިޑެންޓް ވީޒާ ދޫކުރުމާއި، އެ ވީޒާތަކުގެ މުއްދަތު އިތުރުކުރުމާއި، ވީޒާތައް ބާތިލުކުރުމާގުޅޭ އެންމެހައި އުސޫލުތައް، މި ގާނޫނުގެ ދަށުން ރަޖިސްޓްރާރ އޮފް ބިޒްނަސަސް ހަދާ ގަވާއިދުގައި ބަޔާންކުރަންވާނެއެވެ.

(ކ) މި މާއްދާގެ (ޅ) ގައި ބަޔާންކުރާ ގަވާއިދު، ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭށަންގެ ގާނޫނު) އަށް 2 ވަނަ އިސްލާހު ގެނައުމުގެ ގާނޫނަށް އަމަލުކުރަން ފަށާތާ 14 (ސާދަ) ދުވަހުގެ ތެރޭގައި، އެކުލަވާލައި އާންމުކުރަންވާނެއެވެ.

(އ) މި ގާނޫނުގެ ދަށުން މިހާރު ހެދިފައި ހުރި ގަވާއިދުތަކަށް، ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭށަންގެ ގާނޫނު) އަށް 2 ވަނަ އިސްލާހު ގެނައުމުގެ ގާނޫނާ ގުޅިގެން ބަދަލުގެންނަންޖެހޭނަމަ، ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭށަންގެ ގާނޫނު) އަށް 2 ވަނަ އިސްލާހު ގެނައުމުގެ ގާނޫނަށް އަމަލުކުރަން ފަށާތާ 14 (ސާދަ) ދުވަހުގެ ތެރޭގައި އެ ބަދަލެއް ގެނެސް އިސްލާހުކޮށް، އާންމުކުރަންވާނެއެވެ.

 

5 ވަނަ މާއްދާ - ބުނެވިދިޔަ ގާނޫނުގެ 13 ވަނަ މާއްދާ އަންނަނިވި ގޮތަށް އިސްލާހުކުރުން.

ބިޒްނަސް ވީޒާ 13.

ބިޒްނަސް ވީޒާއަކީ، ރަޖިސްޓްރާރ އޮފް ބިޒްނަސަސް ކަނޑައަޅާ ގޮތެއްގެމަތިން، ރަޖިސްޓްރާރ އޮފް ބިޒްނަސަސް ގަބޫލުކުރާ ވިޔަފާރިއެއް ނުވަތަ މަސައްކަތެއް ކުރުމަށްޓަކައި، އަދި ރާއްޖޭގައި ވަޒީފާއަދާކުރާ މީހެއްގެ ގޮތުގައި ނޫން ގޮތަކަށް އަންނަ ބިދޭސީއަކަށް ވަކި މުއްދަތަކަށް ރާއްޖޭގައި ހުރުމަށް، މި ގާނޫނުގެ 9 ވަނަ މާއްދާގެ (ޅ) ގައި ބަޔާންކުރާ ގަވާއިދުގެ ދަށުން ދެވޭ ހުއްދައެކެވެ.

 

6 ވަނަ މާއްދާ - ބުނެވިދިޔަ ގާނޫނުގެ 15 ވަނަ މާއްދާ އަންނަނިވި ގޮތަށް އިސްލާހުކުރުން.

ވާރކް ވީޒާ 15.

ވާރކް ވީޒާއަކީ، ގާނޫނު ނަންބަރު 2/2008 (ވަޒީފާއާބެހޭ ގާނޫނު) ގެ ދަށުން، ރާއްޖޭގައި ވަޒީފާއަދާކުރުމަށް އަންނަ ބިދޭސީއަކަށް، އޭނާ ރާއްޖޭގައި މަސައްކަތްކުރުމަށް ދޫކޮށްފައިވާ ހުއްދަ ކަމުގައިވާ ވާރކް ޕަރމިޓަށް ބިނާކޮށް، ވާރކް ޕަރމިޓްގެ މުއްދަތަށް ރާއްޖޭގައި ހުރުމަށް ދެވޭ ހުއްދައެކެވެ.

 

7 ވަނަ މާއްދާ - ބުނެވިދިޔަ ގާނޫނުގެ 16 ވަނަ މާއްދާ އަންނަނިވި ގޮތަށް އިސްލާހުކުރުން.

ރެސިޑެންޓް ވީޒާ 16.
(ހ) ރެސިޑެންޓް ވީޒާއަކީ، އަންނަނިވި ހާލަތްތަކުގައި ބިދޭސީންނަށް ރާއްޖޭގައި ހުރުމަށް ދެވޭ ހުއްދައެކެވެ.

  1. ގާނޫނާ އެއްގޮތްވާ ގޮތުގެމަތިން ދިވެއްސަކާ ކައިވެނިކޮށްގެން އުޅޭ ބިދޭސީންގެ ތެރެއިން، ކައިވެނީގެ މުއްދަތުގައި ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ؛
  2. ގާނޫނާ އެއްގޮތްވާ ގޮތުގެމަތިން ދިވެއްސަކާ ކައިވެނިކޮށްގެން ދަރިއެއް ލިބިފައިވާ ބިދޭސީންގެ ތެރެއިން، ވަރިވެފައިވާ ހާލަތުގައި ނުވަތަ އޭނާ ކައިވެނިކޮށްގެން އުޅުނު މީހާ މަރުވެފައިވާ ހާލަތުގައި، އޭނާގެ ދަރިންނާއެކު ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ.

(ށ) މި މާއްދާގެ (ހ) ގެ (1) ވަނަ ނަންބަރާއި (2) ވަނަ ނަންބަރުގައި ބަޔާންކޮށްފައިވާ ހާލަތްތައް ދެމިއޮތްނަމަ، މި މާއްދާގެ ދަށުން ދޫކުރާ ރެސިޑެންޓް ވީޒާ ކޮންމެ 5 (ފަހެއް) އަހަރަކުން އާ ކުރަންވާނެއެވެ.

(ނ) މި މާއްދާގެ (ށ) އެހެންއޮތްނަމަވެސް، ދިވެއްސަކާ ކައިވެނިކޮށްގެން އުޅޭ ބިދޭސީ ފަރާތްތަކުގެ ތެރެއިން އަލަށް ރެސިޑެންޓް ވީޒާއަށް އެދި ހުށަހަޅާ ފަރާތެއްނަމަ، ފުރަތަމަ ފަހަރު 1 (އެކެއް) އަހަރުދުވަހުގެ މުއްދަތަށް އެފަރާތަކަށް ރާއްޖޭގައި ހުރުމަށް ހުއްދަ ދޫކުރަންވާނެއެވެ.

(ރ) މި މާއްދާގެ (ހ) ގެ (1) ވަނަ ނަންބަރުގައި ބަޔާންކޮށްފައިވާ ހާލަތް ނިމުމަކަށް އަތުވެއްޖެނަމަ، އެފަރާތަށް ރާއްޖޭގައި ހުރުމަށް ދޫކުރެވިފައިވާ ރެސިޑެންޓް ވީޒާ ކެންސަލްވާނެއެވެ.

(ބ) މި މާއްދާގެ (ހ) ގައި ބަޔާންކުރާ ރެސިޑެންޓް ވީޒާ ދޫކުރުމުގެ އުސޫލުތައް،   މި ގާނޫނުގެ ދަށުން ހަދާ ގަވާއިދުގައި ބަޔާންކޮށް، ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭށަންގެ ގާނޫނު) އަށް 2 ވަނަ އިސްލާހު ގެނައުމުގެ ގާނޫނަށް އަމަލުކުރަން ފަށާތާ 14 (ސާދަ) ދުވަހުގެ ތެރޭގައި، އެކުލަވާލައި އާންމުކުރަންވާނެއެވެ.

 

8 ވަނަ މާއްދާ - ބުނެވިދިޔަ ގާނޫނުގެ 17 ވަނަ މާއްދާގެ ފަހަތަށް އަންނަނިވި ފަދައިން ދެ މާއްދާ އިތުރުކުރުން.

މީޓިންގ ވީޒާ 1-17.
މީޓިންގ ވީޒާއަކީ، ކޮންޓްރޯލަރ އޮފް އިމިގްރޭށަން ކަނޑައަޅާ ގޮތެއްގެމަތިން، ރަޖިސްޓްރާރ އޮފް ބިޒްނަސަސް ގަބޫލުކުރާ ވިޔަފާރިއަކާ ގުޅުންހުރި ބައްދަލުވުމެއް، ނުވަތަ ދައުލަތުގެ މުއައްސަސާއެއްގެ ބޭނުމަށް ރާއްޖޭގައި ބޭއްވޭ ބައްދަލުވުމެއް، ނުވަތަ އެނޫންވެސް ފަރާތަކުން އިންތިޒާމްކޮށްގެން ސަރުކާރުގެ ކަމާބެހޭ އިދާރާއެއްގެ ހުއްދަ ލިބިގެން ބާއްވާ ބައްދަލުވުމެއް، ނުވަތަ ކޮންފަރެންސެއް، ނުވަތަ ކޮންވެންށަނެއްގައި ބައިވެރިވުމަށް އަންނަ ބިދޭސީއަކަށް، ކުރު މުއްދަތަކަށް ރާއްޖޭގައި ހުރުމަށް، މި ގާނޫނުގެ ދަށުން ހަދާ ގަވާއިދުގައި ބަޔާންކުރާ ގޮތުގެމަތިން ދެވޭ ހުއްދައެކެވެ.

ކޯޕަރޭޓް ރެސިޑެންޓް ވީޒާ 17-2.
(ހ) ކޯޕަރޭޓް ރެސިޑެންޓް ވީޒާއަކީ، އަންނަނިވި ފަރާތްތަކަށް ރާއްޖޭގައި ހުރުމަށް، މި ގާނޫނުގެ 9 ވަނަ މާއްދާގެ (ޅ) ގައި ބަޔާންކުރާ ގަވާއިދުގެ ދަށުން ދެވޭ ހުއްދައެކެވެ.

  1. ރަޖިސްޓްރާރ އޮފް ބިޒްނަސަސް ކަނޑައަޅާ ގޮތެއްގެމަތިން، ދިވެހިރާއްޖޭގައި ރަޖިސްޓަރީކޮށްގެން ހިންގާ ފޮރިން އިންވެސްޓްމަންޓެއްގެ ހިއްސާދާރެއް ނުވަތަ ޑިރެކްޓަރެއް ނުވަތަ ޕާޓްނަރެއް ނުވަތަ އެނޫންވެސް އިސް ފަރާތެއް، އަދި އެއިން ފަރާތެއްގެ އާއިލާގެ މެންބަރެއް، ރާއްޖޭގައި ވަޒީފާއަދާކުރާ މީހެއްގެ ގޮތުގައި ނޫން ގޮތަކަށް، އެ ފޮރިން އިންވެސްޓްމަންޓް ނުވަތަ އެ ވިޔަފާރި ހިންގުމުގެ ބޭނުމަށް ދިގު މުއްދަތަކަށް ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ؛
  2. ދިވެހިރާއްޖޭގެ ބޭންކެއްގައި މަދުވެގެން 250,000 (ދެލައްކަ ފަންސާސްހާސް) އެމެރިކާ ޑޮލަރު 5 (ފަހެއް) އަހަރުގެ މުއްދަތަށް ފިކްސްޑް ޑިޕޮސިޓް އެކައުންޓެއްގައި ބަހައްޓައި، ދިވެހިރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ؛
  3. ސަރުކާރުން ކަނޑައަޅާ އުސޫލެއްގެ މަތިން، ސަރުކާރުން ކަނޑައަޅާ ވިޔަފާރިތަކުގައި މަދުވެގެން 250,000 (ދެލައްކަ ފަންސާސްހާސް) އެމެރިކާ ޑޮލަރު އިންވެސްޓްކޮށް، ދިވެހިރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ.

(ށ) މި މާއްދާގެ (ހ) ގެ (1) ވަނަ ނަންބަރާއި، (2) ވަނަ ނަންބަރާއި، (3) ވަނަ ނަންބަރުގައި ބަޔާންކޮށްފައިވާ ހާލަތްތައް ދެމިއޮތްނަމަ، މި މާއްދާގެ ދަށުން ދޫކުރާ ކޯޕަރޭޓް ރެސިޑެންޓް ވީޒާ ކޮންމެ 5 (ފަހެއް) އަހަރަކުން އާ ކުރަންވާނެއެވެ.

 

9 ވަނަ މާއްދާ - ބުނެވިދިޔަ ގާނޫނުގެ ޖަދުވަލުގައި ހިމެނޭ އަންނަނިވި ބައި އުނިކުރުން.

"ވާރކް ވީޒާއަށް އެދޭ ފަރާތްތަކަށް، ވާރކް ވީޒާ ހައްދައިދެވޭނީ މަހަކަށް 250 ރުފިޔާ، ސަރުކާރުން ކަނޑައަޅާ ފަރާތަށް ދެއްކުމުންނެވެ."

 

10 ވަނަ މާއްދާ - ބުނެވިދިޔަ ގާނޫނުގެ ޖަދުވަލުގައި ހިމެނޭ ތާވަލުގެ "ޑިޕެންޑަންޓް ވީޒާ" މި ގިންތީގެ ފަހަތަށް އަންނަނިވި ބައި އިތުރުކުރުން.

ކޯޕަރޭޓް ރެސިޑެންޓް ވީޒާ

ކޮންމެ ތިން މަހަކަށް ނުވަތަ ތިން މަހުން ބަޔަކަށް 750 ރުފިޔާ

 

11 ވަނަ މާއްދާ - މި ގާނޫނަށް އަމަލުކުރަން ފަށާނީ، މި ގާނޫނު ފާސްވެ، ތަސްދީގުކޮށް، ދިވެހިސަރުކާރުގެ ގެޒެޓުގައި ށާއިއުކުރާ ދުވަހުން ފެށިގެންނެވެ.      

 

މައި ގާނޫނު

އިމިގްރޭށަންގެ ގާނޫނު (ގާނޫނު ނަންބަރު 2007-01)

ރިފަރެންސް

ކިޔުންތެރިންގެ ހިޔާލު